رۆژهەڵاتی ناوەڕاست
لیوا موحسین رەزایی، ئەندامی کۆمەڵەی دەستنیشانکردنی بەرژەوەندییەکانی کۆماری ئیسلامیی ئێران، هۆشداریی دایە دۆناڵد ترەمپ، سەرۆکی ئەمریکا و سوپاکەی لەوەی کە ئەگەر بچنە ناو جەنگ لەگەڵ ئێراندا، روبەڕووی "رێڕەوێکی تاریکی بێبڕانەوە" دەبنەوە.
لیوا رەزایی رایگەیاند: ئەمڕۆ ترەمپ و سوپای ئەمریکا خۆیان لەناو بنبەستێکی تەواوەتیدا دەبیننەوە، ئەگەر بچنە ناو جەنگەوە، روبەڕووی رێڕەوێکی تاریکی بێبڕانەوە دەبنەوە.. رێڕەوێک کە لە گەروی هورمزەوە دەست پێدەکات و درێژ دەبێتەوە بۆ کەنداو، دەریای عومان، گەروی بابولمەندەب و زەریای هیندی، ئەمەش جەنگێکی زۆر بەربڵاوی لێ دەکەوێتەوە.
ناوبراو رونکردنەوەی زیاتری دا و وتی: گەروی هورمز بەڕوی بازرگانیی ئازاددا دانەخراوە، بەڵکو بەڕوی هێزە سەربازییەکان و هەڵگیرسێنەرانی جەنگ لە ناوچەکەدا داخراوە، بەڕێوەبردنی ئێستای هێزە دەریاییەکانی سەر بە سوپای پاسداران وایکردووە کە کەشتییەکانی وڵاتە جیاوازەکان دوای ناسینەوە و تۆمارکردنیان، بە سەلامەتی لەم رێڕەوەوە تێپەڕن.
لە حەسەكە و كۆبانێ هەڵبژاردن بۆ هەڵبژاردنی نوێنەرانیان لە پەرلەمانی سوریا، دەستیپێكرد.
پەیامنێری كوردسات نیوز رایگەیاند، لە رۆژئاوای كوردستان ئەنەكەسە تاكە پارتی كوردییە كە بەشداری هەڵبژاردنەكەی كردووە لە پێناو دابەش نەبوونی دەنگی كورد و 24 لایەنی دیكە پاڵپشتی خۆیان بۆ ئەنەكەسە دووپاتكردووەتەوە، هەروەها 22 كەس خۆیان بۆ ئەو چوار كورسیە كاندید كردووە كە بۆ پشكی كورد لە حەسەكەو كۆبانێ دیاریكراوە.
لەكۆی 221 كورسی پەرلەمان سوریا، تەنها چوار كورسی بۆ كورد لە رۆژئاوای كوردستان دیاریكراوە، لە كاتێكدا تەنیا ئەحمەد شەرع سەرۆكی سوریا خۆی دەتوانێت 70 كورسی پەرلەمان یەكلابكاتەوە.
هێزی دەریایی سوپای پاسدارانی ئێران رایگەیاند، لە 24 سەعاتی رابردوودا، 25 كەشتیی جۆراوجۆر و نەوتهەڵگر بە گەروی هورموزدا تێپەڕیون.
نوسینگەی پەیوەندییە گشتییەكانی هێزی دەریایی سوپای پاسدارانی ئێران، لە راگەیەنراوێكدا ئاماژەی بەوەكردوە، لە 24 سەعاتی رابردوودا، 25 كەشتیی جۆراوجۆر بە گەروی هورموزدا تێپەڕیون.
ئاشکراشیکرد، ئەو كەشتیانەی مۆڵەتی تێپەڕبوونیان پێدراوە پێكهاتوون لە نەوتهەڵگرەكان و كەشتییەكانی گواستنەوەی كۆنتێنەر و كۆمەڵێك كەشتیی تری بازرگانی بوون.
ئاماژەی بەوەشكردووە، ئەو كەشتیانە دوای تەواوكردنی رێكارە یاساییەكان و هەماهەنگیی تەواو لەگەڵ هێزە دەریاییەكانی ئێراندا توانیانە گەروەكە تێپەڕێن، پیشتریش، سوپای پاسداران رایگەیاندبوو رێگەی بە تێپەڕبوونی 26 كەشتیی دیكەدا بۆ ئەوەی گەروەكەدا تێپەڕین.
تێپەڕبوونی ئەم كەشتیانە لە كاتێكدایە كە گفتوگۆكانی نێوان ئەمریكا و ئێران بۆ گەیشتن بە رێككەوتنی سیاسی تارادەیەك گەیشتوەتە كۆتایی.
پاكستان پیرۆزبایی لە ترەمپ دەكات و ئامادەكاری بۆ میوانداریكردنی گفتوگۆكانی ئاشتی دەكات.
شەهباز شەریف، سەرۆك وەزیرانی پاكستان، بە رەسمی پیرۆزبایی لە دۆناڵد ترەمپ، سەرۆكی ئەمریكا كرد بەبۆنەی هەوڵە ناوازەكانی لە پێناو چەسپاندنی ئاشتیدا.
ئەم هەنگاوە دوای زنجیرەیەك پەیوەندی چڕوپڕ دێت كە ئامانج لێیان گەیشتنە بە رێككەوتنێك بۆ كۆتاییهێنان بە گرژی و جەنگی نێوان ئەمریكا و ئێران.
شەهباز شەریف ئاماژەی بەوەكرد، ئەو پەیوەندییە تەلەفۆنیانەی ترەمپ لەگەڵ سەركردەكانی عیراق، ئیمارات، سعودیە، قەتەر، توركیا، میسر، ئوردن و پاكستان ئەنجامی داون، زۆر بەپیت و بەرهەمدار بوون.
زیاتر لە 10 هەزار و 500 كەس لە سوریا داواكارییان بۆ وەرگرتنی رەگەزنامە پێشكەشكردووە.
وەزارەتی ناوخۆی سوریا ئاشكرایكردووە، لە چوارچێوەی جێبەجێكردنی مەرسومی سەرۆكایەتی سوریا بۆ پێدانی رەگەزنامە، لیژنەكانی وەرگرتنی داواكاری وەرگرتنی رەگەزنامە بەو هاووڵاتییە كوردانەی مەرسومی ژمارە 13ی ساڵی 2026 دەیانگرێتەوە، تائێستا دوو هەزار و 892 خێزان كە لە 10 هەزار و 516 كەس پێكهاتوون، لە چەند پارێزگایەك داواكارییان پێشكەشكردووە.
راشیگەیاندووە، پارێزگای حەسەكە زۆرترین رێژەی داواكاریی تۆماركردووە، كە دوو هەزار و 772 داواكاری بووە، پارێزگای حەلەب 75 داواكاری و لە دیمەشقیش 32 داواكاری پێشكەشكراون.
دەستەی فڕۆکەوانیی مەدەنی ئێران، ئەمڕۆ شەممە، داخستنی کایەی ئاسمانی خۆی لە رۆژئاوای وڵاتەکەی راگەیاند.
دەستەکە لە بەیاننامەیەکدا رایگەیاندووە: کایەی ئاسمانی داخراوە لەگەڵ سنووردارکردنی جووڵەی فڕین.
لە هەمان کاتدا ئەو دەنگۆیانەی رەتکردەوە کە گوایە هیچ هۆشدارییەک سەبارەت بە داخستنی ئاسمانی رۆژئاوای وڵاتەکە دەرچووبێت.
دەستەکە دەڵێت: بڕیاردراوە کاتەکانی کارکردن لە هەردوو فڕۆکەخانەی مێهرئاباد و ئیمام خومەینی لە تاران تا کاتژمێر 9:30ی شەو درێژ بکرێتەوە، روونیشیکردەوە: ئەم رێکارانە لە چوارچێوەی رێکخستنەوەی جووڵەی ئاسمانی و گەڕانەوەی قۆناغ بە قۆناغی کارکردنی فڕۆکەخانەکاندایە.
وەزارەتی بەرگری ئێران، ئەمڕۆ شەممە، رایگەیاند کە پابەندنەبوونی دوژمن بە داواکارییەکانی گەلی ئێرانەوە، زیانی گەورەتر بە دۆناڵد ترەمپ و ئیسرائیل دەگەیەنێت و جێبەجێکردنی ئەم داواکارییانەش تاکە رێگایە بۆ چوونەدەرەوە لە شەڕ.
وتەبێژی وەزارەتی بەرگری ئێران، عەمید رەزا تەڵایی، بە ئاماژەدان بە تێوەگلانی دۆناڵد ترەمپی سەرۆکی ئەمریکا لە شەڕ لەگەڵ ئێراندا، رایگەیاند: ترەمپ هیچ بژاردەیەکی تری لەبەردەمدا نییە جگە لە قبوڵکردنی داواکارییەکانی گەلی ئێران و داننان بە مافەکانی وڵاتەکەماندا.
ئاژانسی هەواڵی "مێهر" لە زاری عەمید رەزا تەڵاییەوە بڵاویکردەوە: چ لە گۆڕەپانەکانی جەنگ و چ لە دیپلۆماسیدا، دابینکردنی داواکارییەکانی گەلی ئێران تاکە رێگایە بۆ چوونەدەرەوە لەو سێیەمین شەڕەی کە بەسەر دوژمنی ئەمریکی-ئیسرائیلدا سەپێنراوە.
وتەبێژی وەزارەتی بەرگری و پشتیوانی هێزە چەکدارەکان وتیشی: پابەندنەبوونی دوژمن بە داواکارییە رەواکانی گەلی ئێرانەوە، دەبێتە هۆی ئەوەی ترەمپ و ئیسرائیل زیانی گەورەتر و شکستە یەک لەدوای یەکەکانی داهاتوو بچێژن.
هەروەها جەختی کردەوە: ترەمپ دەبێت لەگەڵ قبوڵکردنی پێشنیازەکانی ئێراندا، بیر لە رێگریکردن لە زیان و تێچووی زیاتری بەردەوامیی شەڕەکە بۆ سەر گەلی ئەمریکا و کۆمەڵگەی نێودوڵەتی بکاتەوە.
وتەبێژی وەزارەتی بەرگری و پشتیوانی هێزە چەکدارەکان ئاماژەی بەوەش کرد کە: پشتگوێخستنی ترەمپ و بێباکیی ئەو بەرانبەر بە بەرژەوەندییە نیشتمانییەکانی ئەمریکا، و پابەندبوونی بە ئیسرائیل و رەفتارە لوتبەرزانەکەی، دەبێتە هۆی نقومبوونی زیاتری ئەمریکا لە زۆنگاوی شەڕدا.
بەپێی راپۆرتێکی کەناڵی 12ـی ئیسرائیلی، سوپای ئیسرائیل لە ئاستی ئامادەباشیی تەواودایە، ئەوەش بەهۆی ئەگەری سەرهەڵدانەوەی گرژی و ئاڵۆزییە سەربازییەکان لەگەڵ ئێران.
ئەم ئامادەباشییە لەکاتێکدایە کە سوپای ئیسرائیل خۆی بۆ ئەو ئەگەرە ئامادە دەکات کە دۆناڵد ترەمپ، سەرۆکی ئەمریکا، لە چەند رۆژی داهاتوودا بڕیاری ئەنجامدانی کردەی سەربازی دژی ئێران بدات، ئەمەش لە چوارچێوەی هەماهەنگییەکی چڕ لەگەڵ ویلایەتە یەکگرتووەکانی ئەمریکا.
بەپێی راپۆرتەکە، ئیسرائیل پێی وایە دانوستانەکانی نێوان واشنتۆن و تاران ناگاتە هیچ ئەنجامێکی کۆتایی و ئامادەکارییەکان بەو ئاڕاستەیەن کە هێرشەکە "رەنگە لە ماوەی چەند رۆژێکدا روبدات".
ئەم ئامادەکارییانە لەژێر رۆشنایی ئەو وادە کورتەدا دێت کە ترەمپ دیاری کردووە، سەرۆکی ئەمریکا پێشتر رایگەیاندبوو، لە لێواری ئەنجامدانی هێرشێکدا بووە، بەڵام بڕیاریداوە چەند رۆژێکی تر بدات بە هەوڵەکانی نێوەندگیری کە لەلایەن پاکستان و قەتەرەوە سەرپەرشتی دەکرێن.
سەرچاوەیەکی ئەمریکی بە کەناڵی 12ـی راگەیاندووە، ترەمپ هەست بە "نیگەرانی و بێزارییەکی زۆر دەکات" بەرانبەر بە ئاڕاستەی دانوستانەکان لەگەڵ تاران.
لە لایەکی ترەوە، رۆژی هەینی سەرۆکی ئەمریکا رایگەیاند، گەشتەکەی بۆ بەشداریکردن لە ئاهەنگی هاوسەرگیریی کوڕەکەی هەڵدەوەشێنێتەوە و لە واشنتۆن دەمێنێتەوە، هۆکارەکەشی بۆ "پەرەسەندنە نوێیەکان" گەڕاندەوە.
رابەری دروزەكانی سوریا دەڵێت، جیابونەوەیان لە دەسەڵاتی ئێستای دیمەشق بڕیاری كۆتاییە، لەبەرئەوەی پێكەوەژیان لە سوریا بووەتە ئەستەم و مەحاڵ.
حیكمەت هیجری رابەری رۆحی دروزەكانی سوریا رایگەیاند، پێكهێنانی ئیدارەیەكی خۆبەڕێوبەریی لە ناوچەی جەبەل بەشان و جیابوونەوەی تەواو لە حكومەتی دیمەشق، بڕیاری كۆتایی دروزەكانە، چونكە پێكەوەژیان بووەتە مەحاڵ و مافی چارەی خۆنووسینیش دانووستانی لەسەر ناكرێت.
رابەری رۆحی دروزەكانی سوریا حكومەتەكەی ئەحمەد شەرعی بە تیرۆریست ناوبرد و داواشیكرد دیمەشق پابەند بێت بە ئاگربەستی تەمموزی 2025 بۆ ئازادكردنی رفێندراوان و كۆتاییهێنان بە گەمارۆی ئابووری سەر ناوچەكە دروزنشینەكان.
وەزیری دەرەوەی ئێران و سوپاسالاری پاكستان لە تاران كۆبونەوە و تاوتوێی هەوڵە دیپلۆماسییەكان كرا بۆ رێگریكردن لە پەرەسەندنی گرژیەكان.
ئاژانسی تەسنیمی ئێرانی بڵاویكردەوە، درەنگانی شەوی هەینی عەباس عراقچی وەزیری دەرەوەی وڵاتەكە و عاسم مونیر سوپاسالاری پاكستان لە تاران كۆبونەوە.
دەشڵێت، عراقچی و مونیر باسیان لە هەوڵە دیپلۆماسییەكان كرد بۆ رێگریكردن لە پەرەسەندنی گرژییەكان و كۆتاییهێنان بە شەڕ لەگەڵ رێگەكانی بەهێزكردنی ئاشتی و سەقامگیر لە رۆژهەڵاتی ئاسیا.
ئەوەش لەكاتێكدایە، ئاژانسە جیهانیەكان بڵاویانكردەوە، مونیر دانوستانی چڕ لە نێوان ئەمریكا و ئێران بۆ ئامانجی لێكنزیككردنەوەیان و گەیشتن بە رێككەوتن.
وەفدێكی قەتەریش بە هەماهەنگی لەگەڵ ئەمریكا لە ئێران بۆ ئەوەی وەك نێوەندگیر لە نێوان تاران و واشنتۆن كار بكەن و كۆتایی بە شەڕی نێوانیان بهێنن.
كێشەی دۆسیەی دادوەری لە نێوان دیمەشق و بەڕێوەبەریی خۆسەر بە هەڵپەسێردراوی ماوەتەوە و بووەتە هۆی پەككەوتنی مامەڵە یاسایی و كارگێڕییەكانی دانیشتووانی حەسەكە.
بەپێی زانیارییەكانی روانگەی سووری بۆ مافەكانی مرۆڤ، بڕیار بوو 99 دادوەری ئیدارەی خۆسەر سەردانی دیمەشق بكەن بۆ چاوپێكەوتن لەگەڵ وەزیری داد، بە مەبەستی دامەزراندنی 40 دادوەریان لە سیستمی دادوەریی وڵاتەكە، بەڵام كۆبوونەوەكە بۆ چەندین جار دواخراوە.
روانگەی سوری دەشڵێت، حكومەتی سووریا بەنیازی راسپاردنی 20 دادوەری خاوەن ئەزموونی دە ساڵەیە بۆ كاركردنی راستەوخۆ لە دادگاكانی حەسەكە، لەگەڵ ناردنی 20 دادوەری دیكە بۆ خولی راهێنان لە پەیمانگای باڵای دادوەری.
مەزڵوم عەبدی، فەرماندەی گشتیی هەسەدە رایگەیاندووە، بەردەوامیی پەككەوتنی وەزارەتی داد، كاریگەری نەرێنی كردووەتە سەر دۆسیەكانی هەڵبژاردن، پاسپۆرت و تۆماری خانوبەرە و چارەسەركردنی ئەم كێشەیەش كلیلە بۆ یەكلاكردنەوەی پرسە هەڵپەسێردراوەكانی دیكە.
بە ئامانجی دانوستانی چڕ لەگەڵ دەسەڵاتدارانی تاران بۆ گەیشتن بە رێككەوتنی كۆتایی لەگەڵ ئەمریكا، سوپا سالاری پاكستان بەرەو ئێران بەرێكەوت.
ئاژانسی هەواڵی فرانس پرێس بڵاویكردەوە، عاسم مونیر سوپاسالاری پاكستان بۆ نێوەندگیری نێوان ئێران و ئەمریكا و دانوستانی چڕ لەگەڵ ئێرانیەكان بەرەو تاران بە رێككەوتووە.
هاوكات ئاژانسی رۆیتەرز رایگەیاندووە، تیمێكی قەتەر بە هەماهەنگی ئەمریكا لە ئێرانن بۆ ئەوەی لایەنەكان لەیەك نزیك بكەنەوە و رێككەوتنی كۆتاییهاتن بە شەڕ بكرێت.
باڵیۆزخانەی پاكستانیش لە تاران ڕایگەیاند، موحسین نەقەوی، وەزیری ناوخۆ، لەگەڵ عەباس عراقچی، وەزیری دەرەوەی ئێران كۆبووەتەوە بۆ تاوتوێكردنی پێشنیارەكانی تایبەت بە چارەسەركردنی ناكۆكییەكانی نێوان ئێران و ئەمریكا.
ئیمارات لە كۆبوونەوەیەكی ئەنجومەنی ئاسایشی نێودەوڵەتیدا، داوای ئازادكردنی نزیكەی 20 هەزار دەریاوانی كرد كە بەهۆی هێرشەكانی ئێرانەوە لە گەروی هورمز گیریان خواردووە و ژیانیان لە مەترسیدایە.
غەسەق شاهین، جێگری نوێنەری هەمیشەیی ئیمارات لە نەتەوە یەكگرتووەكان ڕایگەیاند، جەنگی ئێران كە لە 28ی شوباتەوە دەستی پێكردووە، بە ئەنقەست بنكە مەدەنییەكان، بەندەرەكان، فڕۆكەخانەكان و تۆڕەكانی وزە و خۆراكی ئیمارات كراونەتە ئامانج.
ئاماژەی بەوەش كرد، ئەم هێرشانە پێشێلكارییەكی ئاشكرای یاسای نێودەوڵەتین، ئاسایشی ئابووری جیهانی دەخەنە مەترسییەوە و رێگرن لە گەیشتنی هاوكارییە مرۆییەكان.
هەروەها جەختیشی لە گرنگی جێبەجێكردنی بڕیارەكانی ئەنجومەنی ئاسایش كردەوە بۆ پاراستنی مەدەنییەكان و ئازادی گەشتوگوزاری دەریایی.
شاهین پشتیوانی وڵاتەكەی بۆ پڕۆژە بڕیاری بەحرەین_ ئەمریكی دەربڕی كە لەلایەن 138 دەوڵەتەوە پاڵپشتی دەكرێت، وەك پەیامێكی ناڕەزایەتی نێودەوڵەتی دژی ڕەفتارە شەڕانگێزییەكانی ئێران.
سەرچاوەیەكی ئێرانی خاڵە ناكۆكەكانی نێوان تاران و واشنتۆن بۆ گەیشتن بە ڕێككەوتن ئاشكرا دەكات، وەزیری دەرەوەی ئەمریكاش دەڵێت، هەندێك ئاماژەی باش سەبارەت بە گفتوگۆكان لەئارادان.
سەرچاوەیەكی باڵای ئێرانی، بە ڕۆیتەرزی راگەیاندووە، هێشتا ڕێككەوتن نەكراوە، بەڵام جیاوازییەكانی نێوان هەردوولا كەمكراونەتەوە.
ئەوەشی زیادكردووە، دۆسیەی پیتاندنی یۆرانیۆمی ئێران و رادەستكردنی بە ئەمریكا و كۆنترۆڵكردنی گەرووی هورمز لەلایەن تارانەوە، هێشتا لەنێوان خاڵە هەڵپەسێردراوەكاندا ماونەتەوە.
هاوكات دۆناڵد ترەمپ، سەرۆكی ئەمریكا رایگەیاند، واشنتۆن لە كۆتاییدا دەست بەسەر یۆرانیۆمی پیتێندراوی ئێراندا دەگرێت، هەرچەندە تاران رەتیدەكاتەوە ڕادەستی بكات.
لای خۆیەوە، ماركۆ روبیۆ، وەزیری دەرەوەی ئەمریكا جەختی كردەوە كە سەپاندنی هەر جۆرە باجێك لە گەرووی هورمزدا نایاساییە و ڕێگر دەبێت لە هەر ڕێككەوتنێكی دیپلۆماسی.
ڕوبیۆ ئاماژەی بە پێشكەوتنی هەندێك لایەنی گفتوگۆكان كرد بۆ كۆتاییهێنان بە شەڕ، بەڵام هۆشداری دا لەوەی كە هێشتا ناتوانرێت زۆر گەشبین بن.
لە لایەكی دیكەوە، سەرچاوە ئێرانییەكان ڕایانگەیاندووە كە ڕێبەری وڵاتەكەیان فەرمانی داوە بە هێشتنەوەی یۆرانیۆمە پیتێندراوەكە لە ناوخۆی ئێراندا.
رۆژنامەی "یەدیعوت ئەحرونۆت"ی ئیسرائیلی لە راپۆرتێکدا ئاشکرای کرد، هێزەکانی ئەمریکا لە میانی روبەڕووبوونەوەکانیاندا لەگەڵ ئێران، تووشی زیانی گەورە بوونەتەوە.
بەپێی راپۆرتێکی رۆژنامە ئیسرائیلییەکە، وەزارەتی بەرگریی ئەمریکا 24 فڕۆکەی بێفڕۆکەوانی پێشکەوتووی لە جۆری "MQ-9 Reaper" لەدەستداوە کە تێچووەکانیان یەکجار زۆرە.
بەگوێرەی خەمڵاندنەکانی رۆژنامەکە، لەناوچونی ئەو 24 فڕۆکەی بێ فڕۆکەوانە یەکسانە بە لەدەستدانی 20٪ی کۆی گشتیی توانای سوپای ئەمریکا لە بواری فڕۆکەی بێفڕۆکەوانی جەنگیدا، کە زیانێکی دارایی بە بڕی نزیکەی یەک ملیار دۆلار لە حکومەتی ئەمریکا داوە.
ئاماژەبەوەشکراوە، لە ئێستاشدا واشنتۆن لە رێگەی ئیمزاکردنی گرێبەستی گرانبەهاوە لەگەڵ کۆمپانیا بەرهەمهێنەرەکاندا، هەوڵی قەرەبووکردنەوەی ئەو زیانانە دەدات.
گەرجی تائێستا ئەم زانیاریانە حکمەتی ئەمڕیکا رەتی دەکاتەوە، بەڵام رۆژنامەکە لە زاری بەرپرسێکی باڵای ئەمریکییەوە بڵاویکردووەتەوە، ئەو فڕۆکە بێفڕۆکەوانانە بەهۆی بەرپەرچدانەوە و تەقەی راستەوخۆی هێزەکانی ئێرانەوە لە کاتی جێبەجێکردنی ئۆپەراسیۆنەکاندا خراونەتە خوارەوە، یان لە رێگەی ئەو هێرشە موشەکییانەوە تێکشکێنراون، کە ئێران ئاراستەی بنکە سەربازییەکانی ئەمریکای کردوون و لەناو فڕۆکەخانەکاندا لەناوی بردوون.
دادگایەكی توركیا لە بڕیارێكی لەناكاودا ئۆزگور ئۆزەلی لە سەرۆكایەكی جەهەپە دوور خستەوە و كەمال كلچدارئۆغڵوی كردەوە بە سەرۆكی ئەوپارتە.
دادگای ئەنقەرە لە بڕیارێكی كتوپڕی لە دژی سەركردایەتیی ئێستای پارتی گەلی كۆماری-جەهەپە 38ـەمین كۆنگرەی ئاسایی پارتەكەی بە "پووچەڵ " لەقەڵەمدا و بەوەش بڕیاری پێشووتری دادگای 42ی بنەڕەتیی یاسای شارستانیی ئەنقەرەی هەڵوەشاندەوە.
بەپێی بڕیارەكە، ئۆزگور ئۆزەل و تەواوی دەستەی بەڕێوەبردنی حزبەكە لە ئەنجومەنی سەركردایەتی، ئەنجومەنی ناوەندی بڕیار و ئەنجومەنی دیسپلین، بە شێوەیەكی كاتی لە پۆستەكانیان دوورخراونەتەوە.
دادگاكە بڕیاریشیداوە، تا یەكلابوونەوەی دۆسیەكە، كەمال كلچدارئۆغڵو و ئەندامانی پێشووی ئەنجومەنەكان بگەڕێنەوە سەر ئەركەكانیان و سەركردایەتیی حزبەكە بگرنەوە دەست.
جەختیشیكردووەتوە، بڕیارەكە كۆتایی نییە و لایەنەكان دەتوانن لە ماوەی دوو هەفتەدا لە دادگای باڵای توركیا تانەی لێبدەن.