20 دەریاوانی ئێرانی كە لەلایەن ئەمریكاوە دەستبەسەربوون بە هاوكاریی پاكستان گەڕێنرانەوە وڵاتی خۆیان.
رەزا ئەمیری موقەدەم، باڵوێزی ئێران لە پاكستان رایگەیاند، ئەو كەشتییەی چەند هەفتەیەك لەمەوبەر لە ئاوەكانی سەنگافورە لە ئۆپەراسیۆنێكی ئەمریكادا دەستی بەسەردا گیرا و بەهۆیەوە 20 دەریاوانی ئێرانی لە رەوشێكی نەگونجاودا بوون، توانرا ئەمڕۆ بە هاوكاریی پاكستان رزگابكرێن.

باڵوێزی ئێران وتیشی،  سوپاسی هەوڵە مرۆیی و خێرخوازییەكانی حكومەتی پاكستان دەكات بۆ بەدواداچوون و ئازادكردنی ئەو دەریاوانانە.

ئاماژەی بەوە كرد، دەریاوانەكان دوای هەوڵە دیپلۆماسییەكان، لە سەنگافورەوە گواستراونەتەوە بۆ ئیسلامئابادی پایتەختی پاكستان و لەوێشەوە گەڕێندراونەتەوە بۆ ئێران.

 

سەرەڕای ئەوەی ئاگربەستێکی لاواز لە ناوچەکە بەردەوامە و دۆناڵد ترەمپیش زوو زوو  هەڕەشەی دەستپێکردنەوەی هێرشە سەربازییەکانی دەکات ئەگەر تاران بە رێککەوتن رازینەبێت، مەسعود پزیشکیان، سەرۆک کۆماری ئێران، لە دیدارێکدا لەگەڵ ئەمیر حاتمی، فەرماندەی گشتیی سوپا، جەختی لەسەر پشتگیریی تەواوی حکومەتەکەی بۆ بەهێزکردنی ژێرخانی بەرگریی وڵات کردەوە.

بەپێی راپۆرتی ئاژانسی ئیسنای ئێران، پزیشکیان ستایشی فەرماندەی گشتی سوپای وڵاتەکەی کرد و رایگەیاند، وەڵامی هێرشەکانی ئەمریکا و ئیسرائیل و رۆڵی هێزە چەکدارەکانی لە هەلومەرجی ئێستای جەنگی تێکەڵاودا یەکلاکەرەوە بووە.

سەرۆک کۆماری ئێران، ئاماژەی بەوەش کرد، حکومەت بە تەواوی توانایەوە لە پاڵ هێزە چەکدارەکاندایە و پشتگیری لە بەرنامەکانی نوێکردنەوەی کەرەستەکان، پشتیوانی لۆجیستی و زیادکردنی توانای رێگری دەکات.

ئاژانسی ئێسنا، ئاماژەی بەوەشکردوە، فەرماندەی گشتیی سوپای ئێران راپۆرتێکی لەسەر رەوشی مەیدانی و ئۆپراسیۆنیی هێزەکان پێشکەش بە سەرۆک کۆمار کردوە، و پرۆسەی ئامادەکاریی دووبارە، بوژانەوە و بەرزکردنەوەی توانای شەڕکەری یەکەکان لە ماوەی ئاگربەستدا روون کردەوە.

فەرماندەی گشتیی سوپا بە پشتبەستن بە ئەزموونە مەیدانییەکانی ئەم دواییانە جەختی لەوە کردەوە، کە سوپا لەڕێگەی نوێکردنەوەی تواناکانییەوە، لە ئامادەباشی تەواودایە بۆ ئەوەی وڵامێکی توند و یەکلاکەرەوە بداتەوە بە هەر جۆرە هێرشێک، کە بکرێتە سەر وڵاتەکەی.

لە هەنگاوێکی نوێدا بۆ توندکردنی هەڵوێستەکانی تاران لەبەرانبەر داواکارییەکانی ئەمریکا، بڕیار درا بە هێشتنەوەی یۆرانیۆمی پیتێنراو لەناو خاکەکەی و رێگری کردن لە گواستنەوەی بۆ دەرەوە.

ئاژانسی هەواڵی رۆیتەرز لە زاری دوو سەرچاوەی باڵای ئێرانییەوە رایگەیاند، موجتەبا خامنەیی رێبەری باڵای ئێران بڕیاری دەرکردووە کە نابێت ئەو یۆرانیۆمەی بە رێژەیەکی بەرز پیتێنراوە رەوانەی دەرەوەی وڵات بکرێت، ئەم بڕیارە رەوشی گفتوگۆکانی نێوان تاران و واشنتۆن ئاڵۆزتر دەکات و هەڵوێستی ئێران لە بەرانبەر داواکارییە سەرەکییەکانی ئەمریکا توندتر دەکاتەوە.

ئاماژەی بەوەشکرد، مـوجتەبا خـامنەیی گواستنەوەی یۆرانیۆمی پیتێندراوی بۆ دەرەوەی ئـێران قەدەغەکرد

لە لایەکی ترەوە، لێپرسراوانی ئیسرائیل ئاشکرایانکردووە، دۆناڵد ترەمپ دڵنیایی پێداون ناردنە دەرەوەی یۆرانیۆم مەرجی سەرەکی هەر رێککەوتنێکە. ئاماژەی بەوە کرد کە ئەم هەنگاوە بۆ رێگریکردنە لە دروستکردنی چەکی ئەتۆمی لەلایەن تارانەوە و پێویستە کۆگاکان بۆ دەرەوەی وڵات بگوازرێنەوە.

چاودێران پێیان وایە ئەم بڕیارە دەبێتە هۆی زیاتربوونی فشارەکان لەسەر ئیدارەی نوێی ئەمریکا و رەوتی گفتوگۆکانی ئاشتی لە ناوچەکەدا بەرەو بنبەست دەبات.

ئێران تاوتوێی وەڵامێكی ئەمریكا دەكات و ترەمپیش دەڵێت؛ دانوستانەكان  گەیشتوەتە خاڵێكی یەكلاكەرەوە.

ئیسماعیل بەقائی، وتەبێژی وەزارەتی دەرەوەی ئێران رایگەیاند، خەریكی تاوتوێكردنی وەڵامێكی واشنتۆنن لە چوارچێوەی هەوڵە نێوەندگیرییەكانی پاكستان بۆ كۆتایهێنان بە ململانێكانی رۆژهەڵاتی ناوەڕاست، چونكە ئەمە هاوكاتە لەگەڵ پێشوازیكردنی رۆژی چوارشەممە لە موحسین نەقوی، وەزیری ناوخۆی پاكستان بۆ دووەمین جار لە ماوەی كەمتر لە هەفتەیەكدا، راشیگەیاند، ئامادەبوونی وەزیری ناوخۆی پاكستان بۆ ئاسانكارییە لە گۆڕینەوەی پەیامەكان لەگەڵ ئەمریكا

لەلایەكی دیكەوە، بەرەبەیانی ئەمڕۆ سەرۆكی ئەمریكا دۆناڵد ترەمپ هۆشداری دا لەوەی كە بارودۆخی نێوان وڵاتەكەی و ئێران گەیشتووەتە خاڵێكی یەكلاكەرەوە، و جەختیشی كردەوە، هەمووان لە ئامادەباشی تەواودان بۆ جووڵە، ئەمەش وەك ئاماژەیەك بۆ نزیكبوونەوەی بڕیاردان لەسەر هێرشی سەربازی.

بەڵام ترەمپ لە هەمان كاتدا ئاماژەی بەوەش كرد، رەنگە چەند رۆژێك چاوەڕوان بكات بۆ بەدەستهێنانی ئەو وەڵامە راستانەی كە لە ئێرانی دەوێت، و هۆشداریشیدا كە بارودۆخەكە رەنگە زۆر بە خێرایی پەرەبسێنێت و تێكبچێت.

لە کاتی بەردەوامیی گرژییەکانی نێوان تاران و واشنتۆن، سەرۆک کۆماری ئێران پەیامێکی توندی سەبارەت بە رەتکردنەوەی هەڕەشەکان و پاراستنی سەروەری وڵاتەکەی بڵاوکردەوە.

مەسعود پزیشکیان، سەرۆک کۆماری ئێران لە تۆڕی کۆمەڵایەتی ئێکس بڵاویکردەوە، ئێران هەمیشە پابەندی بەڵێنەکانی بووە و هەموو رێگەیەکی گرتووەتەبەر بۆ ئەوەی رێگری لە هەڵگیرسانی جەنگ بکات.

پزیشکیان جەختیکردەوە، "لەلای ئێمەوە هەموو دەرگاکان کراوەن"، بەڵام هۆشداریشیدا و وتی: "هەوڵدان بۆ ناچارکردنی ئێران بە ملکەچکردن لە رێگەی زۆرەملێ و هەڕەشەوە، تەنها خەیاڵە.

لە درێژەی پەیامەکەیدا هاتووە، "رێزگرتن بەرانبەر لە دیپلۆماسیدا، بژاردەیەکی ژیرانەتر، سەلامەتتر و رێگریکردنە لە جەنگ."

ئەم لێدوانەی پزیشکیان لەکاتێکدایە کە گرژییەکانی نێوان ئێران و ئەمریکا بەردەوامە و لایەنەکان لەسەر پرسی رێککەوتنی نوێ و گەمارۆکان بۆچوونی جیاوازیان هەیە.

سەرۆكی پەرلەمانی ئێران رایگەیاند، جوڵەكانی ئەمریكا و ئیسرائیل دەریدەخەن بە نیازی خولێكی تری جەنگە و واشنتۆن لە جەنگێكدا تێوەدەگلێت كە ناتوانێت تێیدا سەربكەوێت.

محەمەد باقر قالیباف، سەرۆکی پەرلەمانی ئێران رایگەیاند، ئەمریكا لە جەنگێك تێوەدەگلێت تێیدا سەركەوتوو نابێت و باجی هەڵگیرساندنی جەنگەكان لەلایەن بازرگانانی جەنگەوە، دەبێت هەژارانی ئەمریكا بیدەن.

دەشڵێت، ئەمریكا بە هەڵە پێی وایە بە گەمارۆدان ناچاریان دەكات وەڵامی داواكارییەكانی بدەنەوە، بەڵام گەمارۆكە كاریگەری لەسەر ئەوان نییە و سازش لەسەر مافەكانی ئێران ناكەن.

وتیشی، جوڵە ئاشكرا و شاراوەكانی ئەمریكا و ئیسرائیل دەریدەخەن كە هەوڵی خولێكی نوێی جەنگ دەدەن.

ئیمارات، عیراق بە هێرشەكەی سەر وێستگەی ئەتۆمی براكە تۆمەتباردەكات و سەرۆك وەزیرانی عیراقیش، سەرجەم هێزە ئەمنییەكانی راسپارد رێوشوێنی بەپەلە بگرنەبەر بۆ پوچەڵكردنەی هەر هێرشێك لە خاكی عیراقەوە بۆ سەر وڵاتانی دراوسێ.

وەزارەتی دەرەوەی ئیمارات لە راگەیەنراوێكدا بڵاویكردەوە، هێرشەكەی رۆژی یەكشەممەی رابردوو بۆ سەر وێستگەی  ئەتۆمی براكە لە خاكی عیراقەوە ئەنجامدراوە، ئەوەش پێشلكاری ئاشكرای سەروەری ئیمارات، یاساورێسا نێودەوڵەتییەكان و پەیماننامەی نەتەوەیەكگرتووەكان.

وەزارەتی دەرەوەی ئیمارات داواش لە حكومەتی عیراق دەكات، لەزووترین كاتدا و بەبێ هیچ مەرجێك رێوشوێنی پێویست بەرانبەر ئەو هێرشە دوژمنكارانەكەی سەر خاكی وڵاتەكەی بۆ سەر وڵاتانی ناوچەكە بگرێتەبەر و رایانبگرێت.

هاوكات، ماڵپەڕی " عەرەبی جدید" لە چەند گەورە لێپرسراوێكی حكومەتی عیراقەوە ئاشكرایكردووە، عەلی زەیدی سەرۆك وەزیرانی عیراق سەرجەم لایەنە ئەمنییەكانی عیراقی راسپاردووە هەنگاوی كرداری و رێككاری تەكنیكی بگرنەبەر بۆ پوچەڵكردنەی هەر هێرشێك لە خاكی عیراقەوە بۆ سەر وڵاتانی دراوسێ.

ئاژانسی "ئیرنا"ی ئێرانی لە زاری سەرچاوە دیپلۆماسییە ئاگادارەکانەوە رایگەیاند، موحسین نەقوی، وەزیری ناوخۆی پاکستان بە مەبەستی دیدار لەگەڵ بەرپرسانی ئێران، بەرەو تاران بەڕێکەوتووە.

سەرچاوەکان ئاماژەیان بەوە کردووە کە نەقوی بۆ جاری دووەم لە ماوەی کەمتر لە هەفتەیەکدا سەردانی ئێران دەکات، بێ ئەوەی وردەکاری زیاتر سەبارەت بە کارنامەی سەردانەکە یان ئەو دۆسیانەی بڕیارە گەنگەشە بکرێن، ئاشكرا بکەن.

ئەم سەردانە لە چوارچێوەی ئەو رۆڵی نێوەندگیرییەدایە کە پاکستان لە نێوان ئێران و ویلایەتە یەکگرتووەکانی ئەمریکادا دەیگێڕێت، بۆ کۆتاییهێنان بەو جەنگەی کە لە 28ی شوباتی 2026وە بەردەوامە.

نەقوی پێشتر لە 16ی ئایاری ئەم مانگەدا سەردانی تارانی کردبوو، و لەوێ لەگەڵ مەسعود پزیشکیان سەرۆک کۆماری ئێران، محەمەد باقر قالیباف سەرۆکی ئەنجومەنی شورا، و وەزیرانی ناوخۆ و دەرەوەی ئەو وڵاتە کۆبووەوە.

ئەم پێشهاتانە لە کاتێکدا دێن کە دانوستانەکانی نێوان هەردوولا تووشی چەقبەستوویی بوون، بە جۆرێک ئێران و ویلایەتە یەکگرتووەکانی ئەمریکا لە ڕێگەی نێوەندگیرە پاکستانییەکانەوە پێشنیازەکان ئاڵوگۆڕ دەکەن، ئەمەش لە ناوەڕاستی پەرەسەندنی هۆشدارییە سەربازییەکانی هەردوولادا.

بوومەلەرزەیەك بە گوڕی 5.6 پلەی رێختەر پارێزگای مەڵاتی باكووری كوردستانی هەژاند.

سەنتەری بوومەلەرزە زانی ئی ئێم ئێس سی بۆ ئەوروپا و دەریای ناوەڕاست رایگەیاند، بەرەبەیانی ئەمرۆ بومەلەرزەیەك بە گوڕی 5.6 پلە بەپێی پێوەری رێختەر ناوچە سنورییەكانی نێوان باكوری كوردستان و سوریای هەژاندووە.

ناوەندەكە ئاماژەی بەوە كرد، رەوشەكە لە ژێر چاودێریدایە بۆ زانینی هەر زیانێكی گیانی یان ماددی تر كە لە ئەنجامی بوومەلەرزەكەوە بكەوێتەوە.

ئەمە لە كاتێكدایە كە ناوچەكە بە هۆی هەڵكەوتەی جوگرافی پێشتر چەندین جار رووبەڕووی كارەساتی سروشتی هاوشێوە بووەتەوە و زیانی بەرچاوی پێگەشتووە.

 

ئەحمەد شەرع، سەرۆکی سوریا داوای لێبوردنی لە دانیشتووانی پارێزگای دێرەزور کرد، ئەمەش بەهۆی ئەو لێدوانانەی کە باوکی لە چاوپێکەوتنێکی تەلەفزیۆنیدا دابووی و ببووە هۆی دروستبوونی شەپۆلێکی توڕەیی لە تۆڕە کۆمەڵایەتییەکاندا.

شەرع لە پەیوەندییەکی تەلەفۆنیدا لەگەڵ پارێزگاری دێرەزور و ژمارەیەک لە کەسایەتییە دیارەکانی پارێزگاکە رایگەیاند: خەڵکی دێرەزور پێگەیەکی گەورەیان لەلای سەرجەم سوورییەکان هەیە و تەئکیدی کردەوە کە: خەڵکی دێر خۆشەویست و پشتوپەنا و تاجی سەر سەری ئێمەن.

سەرۆکی سوریا ئاماژەی بەوەش کرد: ئەو بێڕێزییەی بەرانبەر بە خەڵکی پارێزگاکە کراوە پێش ئەوەی ئازاری خەڵکی دێرەزور بدات، ئازاری کەسیی خۆی داوە، هاوکات جەختی لەوە کردەوە کە مافەکانیان پارێزراوە و مێژوو و هەڵوێستە نیشتمانییەکانی خەڵکی دێرەزوور پێش وتەکان دەکەون و شایەتییان بۆ دەدەن.

رونیشیکردەوە: ئەوەی رویداوە لەوانەیە هەڵەیەک بووبێت یان بەهۆی بڕینی هەندێک رستە لە کاتی گفتوگۆکەدا بووبێت، بەناوی باوکی و بەناوی خۆیەوە داوای لێبوردنی لە خەڵکی پارێزگاکە کرد و قووڵایی خۆشەویستی خۆی بۆ دانیشتووانی دێرەزوور "چ لادێ و چ شار" دووپاتکردەوە.

شایانی باسە، تۆڕە کۆمەڵایەتییەکان لە سوریا رەخنەیەکی بەرفراوانیان لە باوکی سەرۆکی سوریا گرت دوای پەخشکردنی چاوپێکەوتنێکی تەلەفزیۆنی کە وەسفێکی تێدابوو، کە زۆرێک بە بێڕێزی بەرانبەر بە خەڵکی دێرەزوور لێکیان دایەوە.

 

وەزیری دەرەوەی ئێران رایگەیاند، وەڵامی چاوەراننەكراویان دەبێت بۆ هەر هێرشێك كە بكرێتەوە سەر وڵاتەكەی.

عەباس عراقچی، وەزیری دەرەوەی ئێران لە پۆستێكدا لە تۆڕی كۆمەڵایەتی "ئێكس" نووسیویەتی، دوای چەند مانگێك لە دەستپێكردنی جەنگ دژی ئێران، كۆنگرێسی ئەمریكا دانی بە لەدەستدانی دەیان فڕۆكەدا ناوە لە كاتی جەنگی دژی ئێراندا.

جەختیشی كردەوە، هێزە چەكدارەكانی ئێران توانای خۆیان لە خستنەخوارەوەی فڕۆكە جەنگییە پێشكەوتووەكاندا سەلماندووە.

وەزیری دەرەوەی ئێران لەبارەی ئەگەری دەستپێكردنەوەی هێرشەكان بۆسەر وڵاتەكەی وتی، گەرانەوە بۆمەیدانی جەنگ  و دەستپێكردنەوەی هێرشەكان بۆسەر وڵاتەكەی بە توانای سەربازی نوێ وەڵام دەدرێتەوە.

وەزیری دەرەوەی ئێران دووپاتیكردەوە، وڵاتەكەی سوودی لەو زانیارییانە وەرگرتووە كە لە كاتی ڕووبەڕووبوونەوەكانی ئەم دواییەدا بەدەستی هێناون.

 

وەزارەتی تەندروستیی لوبنان، نوێترین ئاماری قوربانیانی وڵاتەكەی بەهۆی هێرش و بۆردومانەكانی ئیسرائیل بڵاوكردەوە و ئاماژەی بەوە كرد، لە سەرەتای دەستپێكردنی هێرشە چڕەكانی ئیسرائیلەوە بۆ سەر وڵاتەكە لە 2ی ئاداری رابردووەوە، تا ئێستا سێ هەزار و 42 كەس كوژراون.

وەزارەتەكە رونیشیكردەوە، ژمارەی بریندارانی ئەو هێرش و بۆردومانە بەردەوامانەی ئیسرائیل بۆ سەر ناوچە جیاجیاكانی لوبنان، گەیشتووەتە نۆ هەزار و 301 كەس.

ئەم ئامارانە لە كاتێكیشدان، كە هێرشە ئاسمانییەكانی ئیسرائیل بۆ سەر ناوچە جیاجیاكانی لوبنان زیانی مرۆیی و ماددی گەورەیان لێكەوتووەتەوە.

 

ئاژانسی رۆیتەرز بڵاویكردەوە، كۆمپانیای روس ئەتۆمی روسیا لە چەند هەفتەی داهاتوودا پسپۆڕە ئەتۆمییەكانی دەگەڕێنێتەوە بۆ وێستگەی ئەتۆمی بوشەهری ئێران.

كۆمپانیای "روس ئەتۆم" سەدان كارمەندی لە وێستگەی بوشەهر هەیە و دوو یەكەی نوێ  وێستگەكە بەڕێوەدەبات، بەڵام  لە كۆتاییەكانی مانگی ئادار بەهۆی بۆردومانكردنی وێستگەی بوشەهر لەلایەن ئەمریكا و ئیسرائیلەوە، پسپۆڕە ئەتۆمییەكانی لەو وێستگەیە كشاندەوە.

وێستگەی ئەتۆمیی بوشەهر توانای بەرهەمهێنانی هەزار مێگاوات كارەبای هەیە و تەنها وێستگەی ئەتۆمیی ئێرانە، كە روسیا  بەشدارە لەبونیادنان و كارپێكردنی.

موجتەبا خامنەیی، رابەری باڵای ئێران رایگەیاند یەکێک لە دەستکەوتەکانیان، لە جەنگی ئەمریکا و ئیسرائیل بەرانبەربە ئێران بەرزبوونەوەی توانای ئێرانە بۆ ئاستی دەسەڵاتێکی گەورە و کاریگەر

ئاماژەی بەوەشکردوە، زیادبوونی هەوڵی چالاکانی جەماوەری و بەرەوپێشبردنی کولتوری منداڵبون دەتوانێت شارستانیەتێکی نوێی ئێرانی ئیسلامی دروستبکات

لە نوێترین پەیامیدا، موجتەبا خامنەیی، رابەری باڵای ئێران رایگەیاندوە، لە دەستکەوتە بەنرخەکانی بەرگریی کردنیان لە دژی ئەمریکا  وئیسرائیل یەک خستنی گەل وبەرزبوونەوەی توانای ئێرانە بۆ ئاستی دەسەڵاتێکی گەورە و کاریگەر.

موجتەبا ئاماژەی بەوەشکردوە، ئەو رەوشەی ئێستا پەیوەندی راستەوخۆی بە پرسی دانیشتوانەوە هەیە و پرسی پێویستی زیادکردنی ژمارەی دانیشتووان هەندێک جار لە روانگەی پێویستی قەرەبووکردنەوەی ئەو کەموکوڕیانەی کە لە ئەنجامی هەندێک سیاسەتی رابردووەوە هاتوونەتە ئاراوە سەیر دەکرێت.

دەشلێت؛ نەتەوەی گەورەی ئێران دەتوانێت لە داهاتوودا رۆڵی گەورە ببینێت و هەنگاوی گەورە بەرەو دروستکردنی شارستانیەتێکی نوێی ئێرانی ئیسلامی بنێت، بۆیە زیادبوونی هەوڵی چالاکانی جەماوەری لە بواری دانیشتوان و بەرەوپێشبردنی کولتوری منداڵبوون دەتوانێت کاریگەرییەکی بەرچاوی هەبێت لەسەر دەستەبەرکردنی ئەم داهاتوو گەشە.

لەسەر بنەمای پابەندبون بە یاساکانی بایکۆتکردنی ئیسرائیل ئەحمەد شەرعی سەرۆکی سوریا، مەرسموێکی نوێی گومرگی دەرکرد، کە بە تەواوی هاوردەکردن و بردنەژوورەوەی هەر جۆرە کاڵا و شمەکێکی ئیسرائیلی بۆ ناوخۆی وڵاتەکە قەدەغە دەکات.

میدیاکانی سوریا بڵاویانکردوەتەوە، سەرۆکی سوریا بە مەرسومێک هاوردەی کاڵای ئیسرئیلی بۆ وڵاتەکەی قەدەغەکردوە و لە مادەی (112)ی ئەم مەرسوومەدا هاتووە، کە هێنانەژورەوەی چەندین جۆر کاڵا بۆ ناوچەی ئازادی هاوبەشی نێوان سووریا و ئوردن قەدەغەیە.

بە تایبەت جەختکراوەتەوە لەو شمەکانەی، کە پێشێلی یاساکانی بایکۆتی ئیسرائیل و بنەماکانی ئاسایشی گشتی دەکەن.

هاوکات لە مادەی (206)ـی مەرسومەکەدا ئامەژەبەوەکراوە، کە دادگای گومرگی بە شێوەیەکی خێرا و دەستبەجێ حوکم لەو کەیسانەدا دەکات کە پەیوەندییان بە قاچاخچێتیی "ماددەی هۆشبەر، چەک و تەقەمەنی جەنگی، یان کاڵای ئیسرائیلییەوە" هەیە، بەبێ ڕەچاوکردنی بڕ و بەهای دارایی کەرەستە دەستبەسەرداگیراوەکان.

ئاژانسی سانا ئەوەشیخستوەتەڕوو، ئەم هەنگاوە یاساییە نوێیە وەک جەختکردنەوەیەک دێت لەسەر هەڵوێستی رەسمی و مێژویی دیمەشق، کە لە پەنجاکانی سەدەی رابردووەوە پابەندە بە بڕیارەکانی کۆمکاری عەرەبی بۆ بایکۆتکردنی تەلئەبیب، بەو پێیەی یاساکانی سوریا هەر جۆرە پەیوەندییەکی بازرگانی، ئابوری یان وەبەرهێنان لەگەڵ ئیسرائیلدا قەدەغە دەکەن.

 

بەپێی زانیارییەكانی رۆژنامەیەكی ئەمریكی، ئێران دەیان پێگەی موشەكیی بەكارخستووەتەوە و سەمۆ موشەكییەكانیشی گواستوەتەوە بۆ چەند شوێنێكی جیاواز.

رۆژنامەی نیویۆرك تایمز لە زاری چەند لێپرسراوێكی باڵای ئەمریكاوە بڵاویكردووەتەوە، ئێران دەستیكردووە بە كردنەوە و كارپێكردنەوەی 30 پێگەی موشەكیی و سەكۆ موشەكییەكانیشی گواستوەتەوە بۆ چەند شوێنێكی جیاواز، ئەوەش وەك ئامادەكارییەك بۆ ئەگەری دەستپێكردنەوەی جەنگ.

بەپێی هەڵسەنگاندنەكانی هەواڵگری ئەمریكاش، ئێران تائێستا پارێزگاری لە نزیكەی لە سەدا 70ی سەكۆ موشەكییەكانی و لەسەدا 70ی موشەكە كۆگاكراوەكانی دەكات كە لە نێویاندا موشەكی بالیستی و موشەكی كروزیش هەیە.

بەپێی راپۆرتەكانیش، رێژەی لەسەدا 90ی دامەزراوەكانی كۆگاكردن و هەڵدانی موشەكی ئێران كە لەژێر زەویدان، ئێستا بۆ بەكارهێنان گونجاون سەرباری ئەوەی لە چەند مانگی رابردوودا لەلایەن ئیسرائیل و ئەمریكاوە كرابوونە ئامانج.