رۆژهەڵاتی ناوەڕاست
لە نوێترین پەیامیدا عەلی لاریجانی سکرتێری ئەنجومەنی ئاسایشی نەتەوەیی ئێران، رایگەیاند؛ کە ئەوان دەستپێشخەری ئەم جەنگە نەبوون و بە توندی بەرگری لە شارستانییەتە شەش هەزار ساڵەییەکەیان دەکەن.
لە نوێترین پەیامدا کە پاشنیوەڕۆی ئەمڕۆ عەلی لاریجانی لە ئێکس بڵاویکردەوە، ئێران جەخت لەوە دەکاتەوە کە "وەک 300 ساڵی رابردوو، ئێران دەستپێشخەری ئەم جەنگە نەبووە". لە پەیامەکەدا هاتووە کە هێزە چەکدارە ئازاکانیان بەشداری هیچ هێرشێکیان نەکردووە، مەگەر تەنها لە حاڵەتی بەرگریکردندا بووبێت. ئەم لێدوانە وەڵامێکە بۆ ئەو تۆمەتانەی کە دەڵێن ئێران هۆکاری تێکچوونی دۆخی ناوچەکەیە.
هەروەها لە بەشێکی تری پەیامەکەدا بە زمانێکی توندەوە هاتووە: "ئێمە بە توندی بەرگری لە خۆمان و شارستانییەتە شەش هەزار ساڵەییەکەمان دەکەین بێ گوێدانە باجەکەی، و وا لە دوژمنان دەکەین پەشیمان ببنەوە لە لێکدانەوە هەڵەکانیان". ئەم پەیامە حەماسییە هەوڵێکی تری تارانە بۆ نیشاندانی خۆڕاگری لە بەرانبەر هێرشە چڕەکانی ئەمریکا و ئیسرائیل، هاوکات بۆ بەرزکردنەوەی ورەی ناوخۆیی و جوڵاندنی هەستی نەتەوایەتیی ئێرانییەکانە لەم دۆخە هەستیارەدا.
سەرۆک وەزیرانی عیراق فەرمان بە هێزە ئەمنییەکان دەکات رێگری لە هەر کارێک بکەن کە ئاسایشی وڵات تێکبدات، و جەخت دەکاتەوە کە رێگە نادەن عیراق تێوەبگلێت لە ململانێکانی ناوچەکە.
محەمەد شیاع سودانی، فەرماندەی گشتیی هێزە چەکدارەکان، ئەمڕۆ دووشەممە سەرپەرشتیی کۆبوونەوەیەکی نائاسایی ئەنجومەنی وەزاری بۆ ئاسایشی نیشتمانیی کرد. لە کۆبوونەوەکەدا، سودانی فەرمانی دا بە دەزگا ئەمنییەکان کە رووبەڕووی هەر هەوڵێک ببنەوە کە بیەوێت ئاسایش و سەقامگیریی وڵات تێکبدات، و رێگە بە هیچ لایەنێک نەدرێت عیراق پەلکێشی ناو ئەو ململانێیانە بکات کە لە ناوچەکەدا دەگوزەرێن.
ئەنجومەنەکە جەختی کردەوە کە لەپاڵ پاراستنی مافی دەربڕین و خۆپیشاندانی ئاشتیانە، حکومەت بە هیچ شێوەیەک رێگە نادات هێرش بکرێتە سەر نێردە دیپلۆماسییەکان و دامەزراوە هەستیارەکان، و بڕیاری جەنگ و ئاشتی و جوڵەی سەربازیش تەنیا لە دەسەڵاتی دەوڵەت و دامەزراوە دەستوورییەکانیدایە و رێگە نادەن خاکی عێراق بۆ هیچ ململانێیەکی دەرەکی بەکاربهێنرێت.
لە بەشێکی تری کۆبوونەوەکەدا، مەترسییە ئابوورییەکانی بەردەوامی و فراوانبوونی جەنگەکە لە ناوچەکەدا تاوتوێ کرا. بۆ ئەم مەبەستەش، هەریەک لە وەزیری نەوت (کە هاوکات بە وەکالەت وەزیری کارەبایە) و وەزیری بازرگانی بانگهێشت کران و راپۆرتێکی گشتگیریان لەسەر دۆخی بەرهەمهێنانی سووتەمەنی، وزە و ئاسایشی خۆراک خستەڕوو، بۆ گرتنەبەری رێوشوێنی پێویست بۆ رووبەڕووبوونەوەی لێکەوتەکانی ئەم جەنگە لەسەر عێراق.
فەرماندەیی ناوەندیی ئەمریکا (سێنتکۆم) ئاشکرای کرد کە سێ فڕۆکەی جەنگیی ئەمریکی لە جۆری ئێف-15 بە هەڵە لەلایەن سیستەمی بەرگریی ئاسمانیی کوەیتەوە خراونەتە خوارەوە، بەڵام سەرجەم فڕۆکەوانەکان سەلامەتن.
لە راگەیەندراوێکی رەسمیدا، فەرماندەیی ناوەندیی هێزەکانی ئەمریکا رایگەیاند کە کاتژمێر11:03ی شەوی 1ی ئازار (بە کاتی رۆژهەڵاتی ئەمریکا)، سێ فڕۆکەی جەنگی لە جۆری (F-15E Strike Eagle) کە بەشداربوون لە ئۆپەراسیۆنەکان، لە ئاسمانی کوەیت بە هەڵە خراونەتە خوارەوە.
سێنتکۆم روونیکردووەتەوە کە لە کاتی پێکدادانی تونددا، کە هێرشی فڕۆکە، موشەکی بالیستی و درۆنەکانی ئێرانی تێدابووە، سیستەمی بەرگریی ئاسمانیی کوەیت بە هەڵە ئەو سێ فڕۆکە ئەمریکییەی کردووەتە ئامانج.
راگەیەندراوەکە پشتڕاستی دەکاتەوە کە هەر شەش فڕۆکەوانەکە (تیمی فڕۆکەکان) بە سەلامەتی خۆیان هەڵداوەتە خوارەوە و رزگارکراون و دۆخی تەندروستییان جێگیرە.
هاوکات ئاماژەی بەوە کردووە کە کوەیت دانی بەم رووداوەدا ناوە و ئەمریکاش سوپاسی هەوڵەکانی هێزەکانی بەرگریی کوەیت دەکات لە پرۆسەی رزگارکردنەکە و پاڵپشتییەکانیان لەم ئۆپەراسیۆنە بەردەوامەدا، و لە ئێستاشدا هۆکاری دروستبوونی ئەو هەڵەیە لەژێر لێکۆڵینەوەدایە. کەوتنەخوارەوەی ئەم سێ فڕۆکە پێشکەوتووەی ئەمریکا نیشانەی ئەوەیە کە ئاسمانی کەنداو بەهۆی چڕیی موشەک و فڕۆکەکانەوە دۆخێکی زۆر مەترسیداری تێدا دروست بووە.
سەرچاوەیەک بە ئاژانسی رۆیتەرزی راگەیاندووە کە کۆمپانیای ئارامکۆی سعودیە پاڵاوگەیەکی نەوتی لە ناوچەی رەئس تەنورە بەهۆی هێرشێکی درۆنەوە داخستووە.
لە لێدوانێکدا بۆ ئاژانسی رۆیتەرز، ئەمڕۆ دووشەممە، سەرچاوەیەکی ئاگادار ئاشکرای کرد کە کۆمپانیای نەوتی سعودیە (ئارامکۆ)، پاڵاوگەکەی خۆی لە ناوچەی رەئس تەنورە وەک رێکارێکی پێشوەختە و خۆپارێزی داخستووە.
ئەم بڕیارە دوای ئەوە دێت کە پاڵاوگەکە رووبەڕووی هێرشێکی فڕۆکەی بێفڕۆکەوان (درۆن) بووەتەوە. سەرچاوەکە جەختی لەوەش کردووەتەوە کە لە ئێستادا دۆخەکە بە تەواوی لەژێر کۆنترۆڵدایە.
پاڵاوگەی رەئس تەنورە کە دەکەوێتە رۆژهەڵاتی سعودیە، بە گەورەترین و کۆنترین پاڵاوگەی نەوتی کۆمپانیای ئارامکۆ دادەنرێت و توانای پاڵاوکردنی رۆژانەی نزیکەی 550 هەزار بەرمیل نەوتی هەیە. ئەم دامەزراوەیە بەهۆی هەڵکەوتە جوگرافییەکەی و بوونی گەورەترین تێرمیناڵی هەناردەکردنی نەوتی دەریایی تێیدا، وەک شادەماری وزەی جیهانی دەبینرێت.
عەلی لاریجانی، بەرپرسی باڵای ئێرانی هێرشێکی توندی کردە سەر سەرۆکی ئەمریکا و رایگەیاند کە ترەمپ خیانەتی لە دروشمی "ئەمریکا لە پێشەوەیە" کردووە.
لە کاردانەوەیەکدا سەبارەت بە پێشهاتە خێراکانی ناوچەکە، عەلی لاریجانی رەخنەی توندی لە دۆناڵد ترەمپ گرت و رایگەیاند کە ناوبراو خیانەتی لە دروشمی "ئەمریکا لە پێشەوەیە" کردووە، تەنیا بۆ ئەوەی پەیڕەوی لە دروشمی "ئیسرائیل لە پێشەوەیە" بکات. لاریجانی ئاماژەی بەوە کرد کە خەیاڵپڵاوییەکانی ترەمپ تەواوی ناوچەکەی راکێشاوەتە ناو جەنگێکی ناپێویستەوە، و ئێستاش بە هەق نیگەرانە لە کەوتنەوەی قوربانیی زیاتر لە ریزەکانی ئەمریکادا. هەروەها وتیشی: "بەڕاستی زۆر جێگەی داخە کە ئەو سامانی نەتەوەیی و خوێنی ئەمریکییەکان دەکاتە قوربانی بۆ بەرەوپێشبردنی خواستە فراوانخوازییە نایاساییەکانی ناتانیاهۆ".
ئەم لێدوانە توندەی لاریجانی لە کاتێکدایە کە ترەمپ پێشتر پشتڕاستی کردەوە کە 3 سەربازی ئەمریکی لە ئۆپەراسیۆنەکانی دژی ئێراندا کوژراون.
ماڵپەڕی ئەکسیۆس ئاشکرای کرد کە ئۆپەراسیۆنی هێرشکردنە سەر ئێران لەلایەن ئەمریکا و ئیسرائیلەوە بۆ ماوەی هەفتەیەک دواخراوە بەهۆی هۆکاری کەشوهەوا و پێدانی دوایین دەرفەت بە رێککەوتنی دیپلۆماسی.
بەپێی راپۆرتێکی ماڵپەڕی ئەکسیۆسی ئەمریکی، واشنتۆن و تەلئەبیب پلانیان هەبوو هەفتەیەک پێشتر هێرش بکەنە سەر ئێران، بەڵام بەهۆی خراپیی کەشوهەوا و پێویستیی هەماهەنگیی سەربازیی زیاترەوە، هێرشەکە دواخرا.
راپۆرتەکە دەڵێت ئەم دواخستنە کاتی زیاتری بە دۆناڵد ترەمپ دا بۆ ئەوەی بڕیار لە نێوان بژاردەی سەربازی و دیپلۆماسیدا بدات، و دوایین دەرفەت بە گفتوگۆکانی جنێڤ بدات. لە راپۆرتەکەدا هاتووە کە ئامانجی سەرەکیی هێرشەکە عەلی خامنەیی، رێبەری باڵای ئێران و سەرکردە باڵاکانی تر بوون لە کاتی کۆبوونەوەی هەفتانەیاندا لە رۆژی شەممە.
بەرپرسێکی هەواڵگریی ئیسرائیلیش ئاماژەی بەوە کردووە کە یەکێک لە هۆکارەکانی دواخستنەکە بۆ ئەوە بووە کە هەستێکی وایان پێ بدەن کە هێرشەکە نزیک نییە، تاوەکو دڵنیایی بدەنە سەرکردەکان و خامنەیی نەچێتە ناو پەناگە و ژێرزەمینەکانەوە.
هاوتەریب لەگەڵ ئامادەکارییە سەربازییەکان، نێردراوەکانی ئەمریکا (جارید کوشنەر و ستیڤ ویتکۆف) لە جنێڤ پێشنیازێکی کۆتاییان خستە بەردەم تاران بۆ راگرتنی پیتاندنی یۆرانیۆم بۆ ماوەی 10 ساڵ لە بەرامبەر پێدانی سووتەمەنیی ئەتۆمیی بێبەرامبەر بۆ مەبەستی مەدەنی. بەڵام دوای ئەوەی تاران پێشنیازەکەی رەتکردەوە، ترەمپ گڵۆپی سەوزی بۆ هێرشە سەربازییەکە هەڵکرد کە لەو کاتەدا تەواوی هێزەکان لە ئامادەباشیی تەواودا بوون.
تاران جەخت لەوە دەکاتەوە کە لە دوو دەیەی رابردوودا لێکۆڵینەوەی وردیان لە شکستەکانی سوپای ئەمریکا لە ناوچەکەدا کردووە.
عەباس عراقچی وەزیری دەرەوەی ئێران رایگەیاند، بۆ ماوەی دوو دەیەیە لێکۆڵینەوەیان لە شکستەکانی سوپای ئەمریکا لە رۆژهەڵات و رۆژئاوای وڵاتەکەیان کردووە و وانەکانیان لە ستراتیژی سەربازی خۆیاندا بەکارهێناوە.
ئاماژەی بەوەکرد، بۆردومانکردنی تاران هیچ کاریگەرییەکی لەسەر توانای جەنگی ئێران نابێت، چونکە سیستمێکی بەرگری لامەرکەزییان هەیە کە رێگەیان پێ دەدات کات و شێوازی کۆتاییهاتنی جەنگەکان دیاری بکەن.
سەرۆک وەزیرانی ئیسرائیل رایدەگەیەنێت، تەواوی هێزی سەربازییان بۆ شەڕی دژی ئێران بەگەڕ خستووە و هێرشەکان چڕتر دەبنەوە.
بنیامین ناتانیاهۆ، سەرۆک وەزیرانی ئیسرائیل، لە وتارێکی تەلەفزیۆنیدا رایگەیاند، فەرمانی بە سوپای وڵاتەکەی کردووە هێرشە ئاسمانییەکان بۆ سەر شاری تارانی پایتەختی ئێران چڕتر بکەنەوە.
ناتانیاهۆ وتیشی: هێزەکانیان ئێستا بە توندی لە دڵی تارانی دەدەن، و ئەم هێرشانە لە رۆژانی داهاتوودا چڕتر دەبن.
سەرۆک وەزیرانی ئیسرائیل جەختی لەوەشکردەوە، سوپای وڵاتەکەی بە بەکارهێنانی "تەواوی تواناکانی" دەستیکردووە بە هەڵمەتێکی سەربازی بێوێنە، بە ئامانجی پاراستنی بوونی ئیسرائیل و داهاتووی وڵاتەکەی.
ناتانیاهۆ سەرەخۆشی خۆی ئاراستەی کەسوکاری ئەو ئیسرائیلییانە کرد کە لە ئەنجامی هێرشە موشەکییەکانی ئێراندا کوژراون، و ئاماژەی بەوەش دا کە ئیسرائیل بە "رۆژانی سەخت"دا تێپەڕ دەبێت.
ئەم لێدوانانەی ناتانیاهۆ لە کاتێکدایە، خزمەتگوزاری فریاکەوتنی ئیسرائیل رایگەیاند، ئەمڕۆ یەکشەممە لە ئەنجامی هێرشێکی موشەکی بۆ سەر شارۆچکەی "بەیت شیمش"، نۆ کەس کوژراون.
وەزیری دەرەوەی ئێران رایدەگەیەنێت، تاران بۆ راگرتنی گرژییەکان هەنگاو دەنێت.
عەباس عراقچی بە هاوتا عومانییەکەی تاگەیاندووە، وڵاتەکەی دەستپێشخەرییە جدییەکان بۆ گەڕاندنەوەی سەقامگیری قبوڵ دەکات.
عەباس عراقچی، وەزیری دەرەوەی ئێران، لە پەیوەندییەکی تەلەفۆنیدا لەگەڵ وەزیری دەرەوەی عومان، رەوشی ناوچەکەی تاوتوێ کرد و جەختی لەسەر هەڵوێستی وڵاتەکەی کردەوە.
عراقچی لەو پەیوەندییەدا ریگەیاند، ئێران پێشوازی لە هەر هەوڵێکی "جدی و راستەقینە" دەکات کە ئامانجی راگرتنی گرژی و ئاڵۆزییەکان بێت لە ناوچەکەدا.
وەزیری دەرەوەی ئێران ئەوەشی خستەڕوو، تاران ئامادەیە بۆ کارکردن لەپێناو گەڕاندنەوەی سەقامگیری و ئارامی بۆ ناوچەکە، ئەمەش لە چوارچێوەی هەوڵە دیپلۆماسییەکان بۆ کەمکردنەوەی مەترسییەکان.
سەرۆک کۆماری ئێران رایدەگەیەنێت: کوژرانی عەلی خامنەیی کارەساتێکی گەورەیە و ئەنجوومەنی کاتیی دەستی بەکارەکانی کردووە.
مەسعود پزیشکیان، سەرۆک کۆماری ئێران لە پەیامێکی ڤیدیۆییدا کە ئاراستەی گەلی وڵاتەکەی کرد، کوژرانی عەلی خامنەیی، رێبەری باڵای کۆماری ئیسلامیی ئێرانی بە دەستی ئیسرائیل و ئەمریکا بە "کارەساتێکی گەورە" وەسف کرد.
پزیشکیان لە پەیامەکەیدا ئاماژەی بەوەکرد، هەرچەندە ئەم روداوە بۆ ئێران قورسە، بەڵام رێبازی رێبەران بۆ دادپەروەری بەردەوام دەبێت و بە کۆچی ئەوان ئەم کاروانە ناوەستێت.
وتیشی: ئەمریکا و ئیسرائیل جگە لە سەرشۆڕی، هیچ دەستکەوتێکی تریان لەم کارەیاندا نابێت.
سەرۆک کۆماری ئێران ئەوەشی خستەڕوو، بەپێی مادەی 111ـی دەستوری وڵات، لە ئەمڕۆوە "ئەنجوومەنی سەرکردایەتی کاتیی" کارەکانی دەستپێکردووە بۆ ئەوەی بەردەوامی بە رێبازی رێبەری پێشوو بدات. هەروەها جەختی لەوەش کردەوە کە هێزە چەکدارەکانی ئێران بە توندی وەڵامی هەر هێرشێک دەدەنەوە و بنکەکانی دوژمن تێکدەشکێنن.
بەپێی راپۆرتێکی ئاژانسی رۆیتەرز، کە لە زاری دوو سەرچاوەی ئەمریکییەوە بڵاوکراوەتەوە، هێرشە ئاسمانییەکانی ئەمریکا و ئیسرائیل رێک لەو کاتەدا ئەنجامدراون، کە عەلی خامنەیی، ڕێبەری باڵای ئێران، لەگەڵ بازنەی نزیک و راوێژکارە باڵاکانی لە کۆبوونەوەدا بووە.
سەرچاوەکان ئاماژە بەوە دەکەن، کە دڵنیابوونەوەی هەواڵگری لە شوێن و کاتی ئەو کۆبوونەوەیە، هۆکاری سەرەکیی دەستپێکردنی هێرشەکان بووە لەو ساتەدا، بە ئامانجی دروستکردنی جۆرێک لە شۆکی گەورە لە رێگەی بە ئامانجگرتنی راستەوخۆی خامنەیی و تیمەکەی.
بە گوێرەی زانیارییەکانی رۆیتەرز بڕیاربووە کۆبوونەوەکە ئێوارەی رۆژی شەممە ئەنجام بدرێت، بەڵام کاتەکەی پێشخراوە بۆ بەیانیەکەی.
دەزگا هەواڵگرییەکانی ئیسرائیل، کە بەردەوام چاودێری جووڵەکانی رێبەری ئێرانیان کردووە، هەر لە بەیانی ڕۆژی شەممەوە بە گۆڕانکارییەکە و ئەنجامدانی دیدارەکە لەگەڵ کەسە نزیکەکانیاندا زانیووە، هەر ئەمەش وایکردووە پلانی هێرشەکە خێرا بکرێت و پێش بخرێت بۆ ئەوەی رێک لە کاتی کۆبوونەوەکەدا لێدانەکە ئەنجام بدرێت.
سوپای پاسدارانی ئێران، شەشەمین راگەیەندراوی بڵاوکردەوە و دەستپێکردنی قۆناغێکی نوێی هێرشە چەکدارییەکانی بۆ سەر ئامانجە سەربازییەکانی ئیسرائیل و ئەمریکا رادەگەیەنێت.
بەگوێرەی راگەیەندراوەکە، سوپای پاسداران، لە رێگەی شەپۆلێکی چڕی موشەکی و فڕۆکەی بێفڕۆکەوانەوە، ناوچە جیاوازەکانی ناو خاکی ئیسرائیل و بنکە سەربازییەکانی ئەمریکای لە ناوچەکەدا کردووەتە ئامانج.
لە بەشێکی تری راگەیەنداروەکەدا هاتووە، ئامانجەکانیان بە تەواوەتی پێکاوە، لەوانەش 27 بنکەی سەربازی ئەمریکا لە رۆژهەڵاتی ناوەڕاست، لەگەڵ بنکەی ئاسمانی "تەل نوف" و بارەگای سەرکردایەتی گشتی سوپای ئیسرائیل لە "هاکاریا". هەروەها ئاماژە بەوە کراوە، کە کۆمەڵگەی پیشەسازی بەرگری لە تەل ئەبیب یەکێکی تر بووە لە ئامانجە سەرەکییەکان.
سوپای پاسداران جەختی کردووەتەوە، کە هێزە چەکدارەکانی ئێران رێگە نادەن دەنگی زەنگی مەترسی لە ناوچەکەدا بوەستێت و هەڕەشەی ئەنجامدانی تۆڵەسەندنەوەی جیاواز و گورجبڕ دەکەن.
لە کۆتایی راگەیەنداروەکەدا، ئاماژە بەوە کراوە، کە هێرشەکان بەشێوەی یەک لە دوای یەک و توندتر بەردەوام دەبن تا بەدیهێنانی ئامانجەکانیان.
بەیانی رۆژی شەممە بۆ رۆژهەڵاتی ناوەڕاست و جیهانیش بە هەواڵێکی بەپەلە و شۆکهێنەر دەستی پێکرد، کاتێک وەزارەتی بەرگری ئیسرائیل لە راگەیەندراوێکی رەسمیدا، دەستپێکردنی هێرشێکی سەربازیی هاوبەشی لەگەڵ ئەمریکا بۆ سەر قوڵایی خاکی ئێران راگەیاند.
پاش کەمێک، دەنگی چەندین تەقینەوەی بەهێز لە تاران و دەوروبەری بیسترا، ئەمەش وایکرد بەرپرسانی فڕۆکەوانی ئاسمانی ئێران و عیراق بۆ پاراستنی گیانی سەرنشینان، هەموو گەشتە ئاسمانییەکان رابگرن و ئاسمان بەڕووی هاتوچۆدا دابخەن
لە کاتێکدا دۆناڵد ترەمپ، سەرۆکی ئەمریکا، ئۆپراسیۆنەکەی بە هەنگاوێکی گەورە بۆ "سەقامگیری" وەسف کرد، تاران بێدەنگ نەبوو؛ سوپای پاسداران بە چەندین موشەکی بالیستی پێگەکانی ئەمریکا و ئیسرائیلی لە ناوچەکە کردە ئامانج.
مەودای گرژییەکان تەنها لەناو خاکی ئێراندا نەمایەوە، بەڵکو هێرشەکان گەیشتنە بەحرەین، ئیمارات، سعودیە و شاری هەولێر، هاوکات تاران بە رەسمی داخستنی گەرووی هورمزی راگەیاند، کە گرنگترین رێڕەوی وزەیە لە جیهاندا.
میدیا جیهانییەکانیش ئاماژەیان بەوەکرد، لە هێرشەکانی ئەمریکا و ئیسرایلدا بۆسەر ئێران، زیاتر لە 40 بەرپرسی ئێران کوژراون وخودی سەرۆکی ئەمریکا ئاماژەی بەوەکرد هێرشيکان چوار رۆژ دەخایەنێت.
هەرچەندە لە سەعاتەکانی یەکەمدا میدیاکانی ئیسرائیل باسیان لە ئەگەری کوژرانی بەرپرسە باڵاکان دەکرد و میدیاکانی ئێرانیش بە توندی رەتیان دەکردەوە، بەڵام دواجار لە کاتژمێر 4:30بەرەبەیاندا، تاران هەواڵە چاوەڕواننەکراوەکەی پشتڕاستکردەوە و بە رەسمی راگەیەندرا، کە عەلی خامنەیی، رێبەری کۆماری ئیسلامی ئێران، لەگەڵ کچەکەی و زاوایەکی لە ئەنجامی هێرشەکاندا هەر بەرەبەیان کوژراون.
ئەم راگەیاندنە بووە هۆی دروستبوونی شۆک لە ناوخۆی ئێران وسوپای پاسداران هەڕەشەی "تۆڵەیەکی وێرانکەر"ی کرد، بەڵام دۆناڵد ترەمپ خەمساردانە لە لێدوانێکی رایگەیاند،کە "نەمانی ئەم بەربەستانە" دەرفەتێکی نوێیە بۆ رێککەوتن و کۆتاییهێنان بە ململانێکان، ئەمڕۆ ئاسانتر لە دوێنێ دەتوانین لەگەڵ ئێران بگەینە رێککەوتن.
بنیامین ناتانیاهۆ، سەرۆک وەزیرانی ئیسرائیل رایگەیاند، کە ئۆپراسیۆنە سەربازییەکانیان بە هەماهەنگییەکی توندوتۆڵ لەگەڵ ئەمریکا دژی ئێران بەردەوام دەبن، "بە هەر نرخێک بێت".
نەتەنیاهۆ ئاشکرای کرد، کە هێزەکانیان بارەگای سەرەکی عەلی خامنەییان لە تاران وێران کردووە و توانیویانە ژمارەیەکی زۆر لە سەرکردەکانی رژێم و سوپای پاسداران لەناو ببەن؛ هەروەها ئاماژەی بەوەش کرد، کە بەڵگەی زیاتر هەن دەیسەلمێنن "خامنەیی چیتر لە ژیاندا نەماوە".
نەتەنیاهۆ جەختی لەوە کردەوە کە ئەم شەڕە دواجار دەبێتە هۆی بەدیهێنانی ئاشتی، بەڵام داوای سەبر و بەرگەی زیاتری کرد.
هەروەها سوپاسی سەرۆک دۆناڵد ترەمپی کرد بۆ "سەرکردایەتییە مێژووییەکەی" و جەختی کردەوە، کە رژێمی ئێران نابێت دەستی بە چەکی ئەتۆمی رابگات، چونکە مەترسییە بۆ سەر بوونی ئیسرائیل.
لە کۆتاییدا نەتەنیاهۆ داوای لە گەلی ئێران دەکات دەسەڵاتی ئێستای ئێران بڕوخێنن و رایگەیاند ئێستا دەرفەتێکی مێژوویی بۆ ئێرانییەکان رەخساوە تاوەکو خۆیان چارەنووسی خۆیان دیاری بکەن.
سەرۆک وەزیرانی ئیسرائیل دەڵێت: ئۆپراسیۆنەکان بۆ سەر ئێران رێگە لەو وڵاتە دەگرێت دەستی بە چەکی ئەتۆمی بگات.
بنیامین ناتانیاهۆ، سەرۆک وەزیرانی ئیسرائیل، ئەمڕۆ شەممە رایگەیاند، ئیسرائیل و ئەمریکا ئۆپەراسیۆنێکیان بۆ لەناوبردنی "هەڕەشەی بوونی" ئێران دەستپێکردووە.
ناتانیاهۆ ئاماژەی بەوەکرد، ماوەی 47 ساڵە ئێران داوای "مەرگ بۆ ئیسرائیل و ئەمریکا" دەکات، خوێنی خەڵکی رشتووە و گەلی خۆی قەتڵوعام کردووە.
جەختی لەوەکردەوە، نابێت رێگە بدرێت ئێراندەستی بە چەکی ئەتۆمی بگات.
ئەوەشیخستەڕوو، ئۆپەراسیۆنە هاوبەشەکە زەمینە خۆش دەکات بۆ ئەوەی گەلی بوێری ئێران چارەنووسی خۆیان بەدەستی خۆیان بگرن.
ناتانیاهۆ سوپاسی دۆناڵد ترەمپی کرد بۆ "سەرکردایەتییە مێژووییەکەی".
هێرشی ئیسرائیل و ئەمریكا بۆ سەر ئێران دەستیپێكرد و چەند موشەكێك لە تاران كەوتنەخوارەوە و میدیای ئیسرائیلیش دەڵێت، چەند سەركردەیەكی ئێران كراونەتە ئامانج.
بە رەسمی ئیسرائیل و ئەمریكا هێرشیان بۆسەر ئێران دەستپێكرد و میدیای رەسمی ئێرانیش رایگەیاند، چەند موشەكێك لە تارانی پایتەخت كەوتوونەتە خوارەوە و دوكەڵی چڕ لە ئاسمانی شارەكە بەرزبووەتەوە.
بی بی سی بڵاویكردەوە، هێرشەكانی ئەمریكا و ئیسرائیل، قوم و ئەسفەهان و تەبرێز و رۆژهەڵاتی كوردستان و چەند شارێكی تری ئێرانی گرتووەتەوە، وەزارەتی بەرگری و دەزگای هەواڵگری و نوسینگەی فەرماندەیی و رێكخراوی ئەتۆمی ئێران كراونەتە ئامانج.
وەزارەتی ناوخۆی ئێرانیش راگەیەنراوێكی لەبارەی هێرشەكان بڵاوكردەوە دەڵێت، دوژمن هەموو یاسا نێودەوڵەتییەكانی پیشێلكردووە و هێرشی كردووەتە سەر وڵاتەكەی و هەموو هەوڵێك دەدەن بۆ دەستەبەركردنی ئارامی، داوا لە هاووڵاتیانی وڵاتەكەشی كردووە دان بەخۆیاندا بگرن و ئارام بن.
وەزارەتی تەندروستی ئێرانیش رایگەیاند، تەواوی نەخۆشخانەكانی تاران خراونەتە حاڵەتی ئامادەباشییەوە و دەوامی خوێندنگەكانیش راگیراون.
بنیامین ناتانیاهۆ سەرۆك وەزیرانی ئیسرائیلیش ئۆپراسیۆنی سەر ئێرانی ناونا نەڕەی شێر و دەشڵێت، سوپا خراوەتە ئامادەباشییەوە و ئاسمانی وڵاتەكەیان داخستووە.