رۆژنامەی مەعاریفی ئیسرائیلی لە چەند سەرچاوەیەكی باڵای ئیسرائیلەوە ئاشكرایكردووە، لە ماوەی دوو هەفتەی رابردوودا ئەمریكا داوای لە تەلئەبیب كردووە هێرشێكی سەربەخۆ و سەربازی بكاتە سەر ئێران.

بەپێی راپۆرتەكە، ئیدارەی ئەمریكا بە سەرۆكایەتی دوناڵد ترەمپ ویستوویەتی ئیسرائیل مەترسییە سیاسییەكانی هێرشەكە لەئەستۆ بگرێت تا زیان بە پێگەی سیاسی ترەمپ نەگات بە تایبەتیش لە ئێستادا كە هەڵبژاردنەكانی نیوەی حكومەت لە ئەمریكا نزیكدەبێتەوە.

ئەیال زامیر، سەرۆكی ئەركانی سوپای ئیسرائیلیش، بە لایەنی ئەمریكی راگەیاندووە: هێرشێكی لەو شێوەیە دەبێتە هۆی دواخستنی هەڵبژاردنەكانی ئیسرائیل كە بڕیارە لە 27ی تشرینی یەكەم بەڕێوەبچێت، ئەمەش وای لە واشنتۆن كردووە لە داواكارییەكەی پەشیان بێتەوە.

داواكارییەكە لەكاتێكدایە، بەپێی خەمڵاندنەكان ئێران بە خێرایی سەرقاڵی دووبارە بنیاتنانەوەی تواناكانیەتی لە دروستكردنی فڕۆكەی بێفڕۆكەوان و مووشەكی بالیستیك.

 

هۆشدارییەکی توندی ئەمنی؛ ئەمریکا مەرجی نوێ بۆ بەکارهێنانی فڕۆکەخانەکانی سعودیە دەسەپێنێت.

لە درێژەی رێکارە ئەمنییە توندەکاندا و بەهۆی مەترسییە بەردەوامەکان، باڵیۆزخانەی ئەمریکا لە  سعودیە بڕیارێکی نوێی دەرکرد و تێیدا سەرجەم کارمەندەکانی ئاگادار کردەوە کە لەمەودوا بۆ بەکارهێنانی هەریەک لە فڕۆکەخانەکانی جدە و دامام، پێویستییان بە وەرگرتنی مۆڵەتی تایبەت دەبێت.

ئەم بڕیارە نوێیە تەنها چەند رۆژێک دوای بڕیارێکی هاوشێوە دێت کە پێشتر سەبارەت بە فڕۆکەخانەی نێودەوڵەتی شا خالید لە زیاز دەرکراببوو.

باڵیۆزخانەی ئەمریکا لە  راگەیەنراوێکدا، کە لە پێگەی فەرمی خۆی بڵاویکردووەتەوە، هۆکاری ئەم رێکارە بۆ هێرشە دووبارەبووەکانی حوسییەکان دەگەڕێنێتەوە — کە لەلایەن ئێرانەوە پشتگیری دەکرێن — بۆ سەر ناوچە و فڕۆکەخانەکانی سعودیە.

لە راگەیەرنراوەکەدا جەختکراوەتەوە که‌، کارمەندانی ئەمریکا کە لە سعودیە کار دەکەن، ئێستا لەپێناو سەلامەتییاندا ناچارن پێش بەکارهێنانی فڕۆکەخانەکانی ریاز، جدە و دامام، مۆڵەتی تایبەتی پێشوەختە بەدەستبهێنن.

دوێنێ، بەهۆی هێرشی حوسییەکان بۆسەر فڕۆکەخانەی نێودەوڵەتیی ریاز لە سعودیە، ژمارەیەکی نادیارد لە کوژراو و بریندار هەبوون، بەڵام ئەمڕۆ ئاشکرابووە کە ژمارەی کوژراو و بریندار 300ـی تێپەڕاند.

ئاژانسی هەواڵی رۆیتەرز بڵاویکردەوە، دوابەدوای ئەوەی دوێنێ بە چەند موشەکێکی بالیستیکی هێرشکرایە سەر فڕۆکەخانەی نێودەوڵەتیی ریاز لە سعودیە، ژمارەیەک کوژراو و برینداری لێکەوتەوە بەڵام ژمارەکان روون نەبوون.

ئاماژەی بەوەشداوە، ئێستا زانراوە کە بەهۆی ئەو هێرشەوە، لانیکەم 12 کەس گیانیان لەدەستداوە و 309 کەسی دیکەش بریندار بوون.

هاوکات، دەستەی فڕۆکەوانیی مەدەنیی سعودیەش روونیکردەوە، هێرشەکە بەبێ هیچ ئاگادارکردنەوەیەکی پێشوەختە ڕوویداوە و لە نێو کوژراوەکاندا چوار هاووڵاتیی سعودی، دوو بەنگلادیشی، و هاووڵاتیانی وڵاتانی ئەمریکا، ئوردن، فەلەستین، سوریا، سودان و میسر هەن.

لەلایەکی دیکەشەوە ئەوەشی ئاشکراکرد، سەرجەم گەشتە ئاسمانییەکانی فڕۆکەخانەکە کە خزمەت بە هەشت ملیۆن هاووڵاتی دەکات، بە تەواوی راگیراون و ئاڕاستەی فڕۆکەکان گۆڕاون.

 

 

دەستەی ئۆپەراسیۆنە بازرگانییە دەریاییەکانی بەریتانیا (UKMTO) رایگەیاند، رێنمایی بە ژمارەیەک کەشتی دراوە لە کەناراوەکانی شاری 'رەئس ئەلخەیمە'ـی ئیمارات بۆ ئەوەی شوێنی لەنگەرگرتنی خۆیان جێبهێڵن و لە ناوچەکە دوور بکەونەوە.

ئەم رێنماییە نوێیە دوای ئەوە دێت کە رۆژی هەینی، کەشتییەک لە دووریی 13 میلی دەریایی لە رۆژئاوای ناوچەی 'ئەلجەزیرە' لە کەناراوەکانی ئیمارات، رووبەڕووی هێرش بووەوە.

هەر بەگوێرەی راگەیەندراوی دەستە بەریتانییەکە، هێرشەکەی دوێنێ بووە هۆی سوتانی کەشتییەکە، بەڵام دواتر ئاگرەکەی کۆنترۆڵ کرا و زیانی گیانی لێنەکەوتووەتەوە و زیانە مادییەکانیشی کەم بوون.

تا ئێستاش، هیچ لایەنێک بەرپرسیارێتیی خۆی لەو هێرشە رانەگەیاندووە و دەسەڵاتدارانی ئیماراتیش بەردەوامن لە لێکۆڵینەوە بۆ ئاشکراکردنی سەرچاوەی هێرشەکە.

دوابەدوای چەند هێرشێکی حوسییەکان بۆسەر فڕۆکەخانەی ریاز لە سعودیە، ئەمڕۆش جارێکی دیکە هێرشکرایەوەسەری و لێپرسراوانی فڕۆکەخانەکەش گەشتە ئاسمانییەکانیان وەستاندووە.

ئاژانسی فڕانس پرێس لە زاری چەند سەرچاوەیەکەوە لەناو فڕۆکەخانەی ریازەوە رایگەیاند، ئەمڕۆ شەممە 10ـی 10ـی 2026، جارێکی دیکە دەنگی تەقینەوە فڕۆکەخانەی ریاز بیسترا.

ئاماژەی بەوەشداوە، بەهۆی تەقینەوەکەوە گەشتە ئاسمانییەکانی فڕۆکەخانەکە وەستێنراون و لێپرسراوانیش رێنوێنی گەشتیارانیان کردووە کە فڕۆکەخانەکە جێبهێڵن.

ئەمەش لە کاتێکدایە، پێشتریش حوسییەکانی یەمەن بە موشەکی بالیستیکی هێرشیان کردبووەسەر فڕۆکەخانەی ریاز و چەندین پێگەی دیکەی گرنگی سعودیە، کە زۆرینەی پێگەکانیش شوێنی ستراتیژی و شوێنی بەڕێکردنی کار و ژیانی رۆژانەی هاووڵاتیانی مەدەنییە.

بەپێی راپۆرتێکی بلومبێرگ، سەرەڕای تێپەڕبوونی چەندین مانگ بەسەر هێرشەکانی ئەمریکا و ئیسرائیلدا، تاران توانیویەتی کارگە سەرەکییەکانی دروستکردنی موشەک و درۆن بپارێزێت، ئەمەش دەرفەتی پێداوە لە ماوەی پچڕانی هێرشەکاندا توانا سەربازییەکانی نوێ بکاتەوە.

لە راپۆرتەکەی پێگەی بلومبێرگدا هاتووە، لە کاتێکدا دانوستانەکانی نێوان واشنتۆن و تاران بەرەو پێشچوونی بەخۆیەوە نەدیوە، دۆناڵد ترەمپ، سەرۆکی ئەمریکا بڕیاری داوە دەستپێکردنەوەی هێرشەکان بۆ سەر ئێران رابگرێت تا دوای هەڵبژاردنەکانی نوێکردنەوەی نیوەی خولی کۆنگرێس لە مانگی تشرینی دووەمی داهاتوودا.

بلومبێرگ لە زاری لێپرسراوانی هەواڵگریی رۆژئاواوە بڵاویکردەوە، ئێران هێشتا توانای بەرهەمهێنانی چەکی نوێ و پڕکردنەوەی کۆگا موشەکی و درۆنییەکانی ماوە، بە جۆرێک کۆگایەکی گەورەی موشەکی بالیستی و چەکی دژە کەشتیی پاراستووە و دەتوانێت لە ماوەیەکی کورتدا قەبارەی بەرهەمهێنانی زیادبکات.

شارەزایانی سەربازی جەختلەوە دەکەنەوە، وەستانی هێرشەکانی ئەمریکا هەلی بە ئێران بەخشیوە، بۆ ئەوەی توانا سەربازییەکانی فراوانتربکات و خۆی بۆ ئەگەری سەرهەڵدانەوەی پێکدادانەکان ئامادەبکات.

 

فەرماندەیەكی پێشووی هەسەدە دەڵێت مەترسییەكی جددی لەسەر كورد و پێكهاتەكانی تر و تەواوی ئەو دەستكەوتانە دروستبووە كە لە شەڕی تیرۆر بەدەستهاتوون.

فەرهاد شامی بەڕێوەبەری پێشووی ناوەندی راگەیاندنی هەسەدە لە تۆڕی كۆمەڵایەتی ئێكس بڵاویكردەوە، مەترسی گەورە هەیە بۆ لەدەستدانی خەبات و قوربانییەكانی هێزەكانی سوریای دیموكرات و هاوپەیمانی نێودەوڵەتی كە لە ماوەی دەیەی رابردوودا لە شەڕی دژی داعش و گروپە توندڕەوەكاندا لە باكوری رۆژهەڵاتی سوریا پێشكەشیانكردووە.

دەشڵێت، خۆپیشاندان و روداوەكانی حەسەكەكە  لەژێر سایەی پاراستنی هێزە ئەمنییەكانی سوریا رێكخرابوو، یادەوەرییە نیگەرانكەرەكانی سەردەمی داعش بە بیر دەهێنێتەوە و نیگەرانییەكی جددیش لەبارەی سەرهەڵدانەوەی توندوتیژی و توندڕەویی دروست دەكەن.

فەرهاد شامی راشیگەیاندووە، ئەو هەڕەشە پەرەسەندووانەی روبەڕوی كورد و مەسیحییەكان و پێكهاتەكانی تری ناوچەكە دەبنەوە، پێویستی بە هەنگاونانی رێكخراوەكان و كۆمەڵگەی نێودەوڵەتی هەیە بۆ رێگرتن لە پشێوی و سەرهەڵدانی ئاڵۆزیی.
 

 

دۆناڵد ترەمپ، سەرۆکی ئەمریکا رایگەیاند، ئێران دەبێت بەزوویی بڕیاربدات. یان هەموو داواکارییەکانمان جێبەجێ دەکات، یان بوونی نامێنێت. وڵاتەکە لە هەڵئاوساندایە و تەنانەت پارەی نییە مووچەی سوپاش بدات.

دۆناڵد ترەمپ، سەرۆکی ئەمریکا، دۆخی ئێرانی بە قەیراناوی وەسف کرد و رایگەیاند، تاران تووشی هەڵاوسانی %300 بووە و پارەی نییە مووچەی هێزە ئەمنییەکانی بدات. هەروەها جەختیکردەوە کە کۆنتڕۆڵی تەواوی گەرووی هورمزیان لە دەستدایە و پرسی ئێران زۆر بە خێرایی یەکلادەبێتەوە.

سەرۆکی ئەمریکا لە درێژەی قسەکانیدا سەبارەت بە بەرنامەی ئەتۆمیی تاران هۆشداریی دا و رایگەیاند، ئێران هەرگیز خاوەنی چەکی ئەتۆمی نابێت، و هەوڵدان بۆ بەدەستهێنانی هۆکارێک دەبێت بۆ ئەوەی ئەمریکا هێرش بکاتە سەریان. ترەمپ ئاماژەی بەوەش کرد کە ئێران بژاردەیەکی توندی لەبەردەمە، یان ئەوەتا هەموو شتێک بە ئەمریکا دەبەخشێت کە دەیەوێت، یان بە تەواوی بوونی نامێنێت.

لە بەشێکی تری لێدوانەکانیدا، ترەمپ باس لە پرسی وزە و ئابووری کرد و رایگەیاند، لە سایەی هێزی سوپای ئەمریکاوە، ئێستا کۆنتڕۆڵی تەواوی گەرووی هورمز کراوە و قەبارەی هەناردەی نەوت لەو رێگەیەوە لە ئاستی پێش جەنگیش زیاترە. داوای لە پاڵاوگەکان و فرۆشیارانی تاکەکەسی کرد کە دەستبەجێ نرخەکان دابەزێنن، چونکە بڕێکی زۆر سوتەمەنی دابین کراوە و لەم دواییانەشدا روسیا رازی بووە ملیۆنان بەرمیل گازوایل بۆ ئەمریکا بنێرێت.

لە کۆتایی لێدوانەکانیدا، ترەمپ رەخنەی لە نەدانی خەڵاتی نۆبڵی ئاشتی بە ئەمریکا گرت و ئەوەی خستەڕوو، نەدانی ئەو خەڵاتە بەڵگەیەکی تر نیشان دەدات کە وڵاتانی وەکو نەرویژ و لایەنەکانی دیکە بەردەوام بەدوای سوودوەرگرتنەوەن لە پێگەی ئەمریکا.

سێنتکۆم ئاستی جێبەجێکردنی گەمارۆ دەریاییەکەی بۆ سەر ئێران توندتر دەکاتەوە و رایدەگەیەنێت، هێزە دەریاییەکانیان لە گەروی هورمزدا رێڕەوی 133 کەشتیی بازرگانییان گۆڕیوە.

فەرماندەیی ناوەندیی هێزەکانی ئەمریکا سێنتکۆم رایگەیاند، لە چوارچێوەی جێبەجێکردنی گەمارۆ دەریاییە توندەکەیان بۆ سەر ئێران، تا رۆژی 9ی تشرینی یەکەم هێزەکانیان رێڕەوی 133 کەشتیی بازرگانییان گۆڕیوە.

سێنتکۆم لە هەژماری رەسمی خۆی خۆی وێنەی هێلیکۆپتەرێکی سەربازیی بڵاوکردووەتەوە و رایگەیاندووە: "فڕۆکەیەکی هێزی دەریایی ئەمریکا لە جۆری 'MH-60S Sea Hawk'  لەسەر سەکۆی کەشتیی جەنگیی ئاسمانیی 'USS John Paul Jones' فڕیوە، کە بەشێکە لە هەوڵەکانی توندکردنی گەمارۆ تۆکمەکەی ئەمریکا بۆ سەر ئێران."

بەپێی راگەیەنراوەکەی فەرماندەیی ناوەندیی ئەمریکا، رێڕەوگۆڕینی ئەم کەشتییە بازرگانییانە بە ئامانجی دڵنیابوونەوەیە لە جێبەجێکردنی تەواوەتیی سزاکان و پابەندبوونی کەشتییەکان بە بڕیاری گەمارۆدانی دەریایی ئێران

.

سەرۆک کۆماری ئێران سەرکەوتنی هەر گفتوگۆیەکی وڵاتەکەی لەگەڵ ئەمریکا دەبەستێتەوە بە نەهێشتنی هەڕەشەکان.

مەسعود پزیشکیان، سەرۆک کۆماری ئێران رایگەیاند، سەرکەوتنی گفتوگۆکان لەگەڵ ئەمریکا بۆ کۆتاییهێنان بە جەنگ، بەستراوەتەوە بەوەی بەبێ بوونی "پەستان و هەڕەشە" ئەنجام بدرێن.

لە وتارێکیدا لە میانی لووتکەی وڵاتانی سەربەخۆ لە تورکمانستان، پزیشکیان ئاماژەی بەوەکرد، "دیالۆگ هیچ واتایەکی نابێ و دەرفەتی سەرکەوتنی نابێت، مەگەر لەسەر بنەمای رێزی پابەندبوونی دوولایەنە بێت."

مەسعود پزیشکیان جەختیشیکردەوە، دانوستانکردن بێواتایە "ئەگەر دوور نەبێت لە پەستان و هەڕەشەکان."

ئەم لێدوانانەی سەرۆک کۆماری ئێران لە کاتێکدایە، رۆژی پێنجشەممە دۆناڵد ترەمپ، سەرۆکی ئەمریکا ئاماژەی بە ئەنجامدانی "گفتوگۆی بەرهەمدار" لەگەڵ تاران کرد و ئەگەری ئەنجامدانی هێرشی نوێی بۆ سەر ئەو وڵاتە لانی کەم پێش هەڵبژاردنەکانی نیوەی خولەکەی بەدوور زانی.

سعودیە كوژرانی سێ كەس لە دوو هێرشدا بۆسەر فڕۆكەخانەی نێودەوڵەتیی شا خالید لە ریاز رادەگەیەنێت و ئاگربەستیش لەگەڵ حوسییەكان رەتدەكاتەوە.

دەستەی فڕۆكەوانیی شارستانیی سعودیە لە راگەیەنراوێكدا ئاشكرایكرد، فڕۆكەخانەی نێودەوڵەتیی شا خالید لە شاری ریاز روبەڕوی دوو پەلامار بووەتەوە، یەكەمیان بەشەكانی فڕۆكەخانەكەی پێكاوە و دووەمیش فڕۆكەیەكی هێڵی ئاسمانیی سعودیەی كردووەتە ئامانج.

راشیگەیاندووە، بەهۆی هێرشەكانەوە سێ كەس كوژراون و چەند كەسێكی تری بیانیش برینداربوون.

سەرچاوەیەكی دیپلۆماسیش بە ئاژانسی فرانس پرێسی راگەیاندووە، سعودیە بە هیچ شێوەیەك رازی نابێت بە ئاگربەست لەگەڵ حوسییەكان تا ئەو كاتەی حكومەتی شەرعیی یەمەن سەرجەم ئەو ناوچانە كۆنتڕۆڵ دەكاتەوە كە لە چەند هەفتەی رابردوودا لەدەستی داون، جەختیشیكردەوە، ریاز رادەستی گوشار و هەڕەشەی سەربازیی حوسییەكان نابێت لە ناوچەكەدا.

سەرۆكی روسیا جارێكی تر ئامادەیی وڵاتەكەی دەردەبڕێت بۆ نێوەندگیری و هاوكاری لەپێناو كۆتاییهێنان بە جەنگ و ململانێكانی رۆژهەڵاتی ناوەڕاست.

ڤلادیمێر پوتن، سەرۆكی روسیا لە پەراوێزی لوتكەیەكی هەرێمیی لە توركمانستان، لەگەڵ مەسعود پزیشكیان، سەرۆك كۆماری ئێران كۆبووەوە و ئامادەیی وڵاتەکەی بۆ هاوكاریی دەربڕی لەپێناو چارەسەركردنی شەڕ و ئاڵۆزییەكانی رۆژهەڵاتی ناوەڕاست.

وتیشی، ئێران هەوڵی راستەقینە دەدات بۆ كۆتاییهێنان بەو ململانێیەی كە لە 28ـی شوباتی رابردووەوە بە هێرشەكانی ئەمریكا و ئیسرائیل بۆسەر تاران دەستیپێكرد.

هاوکات سەرۆك كۆماری ئێرانیش رایگەیاند، وڵاتەكەی بەشدارە لە دیالۆگ، بەڵام ئەمریكا هەموو جارێك كە دانوستان دەكەن، دەست بە هێرشدەكاتەوە.

ئەو كۆبوونەوەیەی پوتن و پزیشكیان لە كاتێكدایە، کە دۆناڵد ترەمپ، سەرۆكی ئەمریكا ئەگەری هێرشی نوێی بۆسەر ئێران پێش هەڵبژاردنەكانی نیوەی خولی ئەمریكا لە مانگی تشرینی دووەمی ئەمساڵ بەدوور زانیوە و رایگەیاندووە، واشنتۆن دانوستانی بەرهەمدار لەگەڵ تاران ئەنجام دەدات.

دۆناڵد ترەمپ، سەرۆکی ئەمریکا رایگەیاند، پێش هەڵبژاردنەکانی ئەمریکا، کە لە مانگی 11دا ئەنجامدەدرێت، هێرش ناکاتە سەر ئێران، ئاماژەی بەوەشکردوە گەروی هورمز لە رەوشێکی باشدایە بۆ هەناردەی نەوت.

سەرۆکی ئەمریکا، پەیامێکی لە تروس سۆشیاڵ بڵاوکردوەتەوە و دەڵێت؛ لە ئێستادا لە گفتوگۆی بەرهەمداردان لەگەڵ ئێران و بیر لە هێرشکردن ناکەنەوە.

لە بارەی رەوشی ئابوریی ئێرانیشەوە، سەرۆکی ئەمریکا دەڵێت؛ ئەوان لە رەوشێکی تەواو خراپدان، لە روی ئابوری و سەربازییەوە بە تەواوەتی تێکشکاون.

ناوبراو ئاماژەی بە گەمارۆکانی هێزی ئەمریکا داوە بۆسەر ئێرانو دەڵێت بە تەواوەتی کاریگەری دروست کردوە.

سەرۆکی ئەمریکا دەشڵێت؛ لە ئێستادا نەوتێکی زۆر بە گەروی هورمزدا تێدەپەڕێت و تەنها شەوی رابردوو 22 ملیۆن بەرمیل نەوت بە گەروەکەدا رۆشتوە.

ئەمە لە کاتێکدایە، فەرماندەیی ناوەندیی ئەمریکا(سێنتکۆم) پێشتر، رایگەیاندوە لە مانگەکانی رابردوی جەنگدا هێزەکانی ئەمریکا، هاوکاربون بۆ تێپەڕبونی ملیارێک و 250 ملیۆن بەرمیل نەوت بە گەروی هورمزدا.

 

عەباس عراقچی، وەزیری دەرەوەی ئێران، رایگەیاند تاران سەرقاڵی پێداچوونەوە و تاوتوێکردنی وەڵامی ئەمریکایە بۆ پڕۆژە حەوت رۆژیەکەی تاران.

عراقچی لە لێدوانێکیدا بۆ رۆژنامەنووسان ئاماژەی بەوە کرد کە پرۆسەی دانوستانەکان نەپچڕاون و ئاڵوگۆڕی پەیامەکان لە رێگەی ناوبژیوانانەوە بەردەوامە.

 ناوبراو ئاماژەی بەوەشکردوە، دیدگاکانی لایەنی ئەمریکییان وەرگرتووە و پێشبینی دەکەن لە  چەند رۆژی داهاتوودا وەڵامی رەسمی ئەمریکا بدەنەوە.

 ئەم لێدوانانە لە کاتێکدایە، پێشتر دۆناڵد ترەمپ سەرۆکی ئەمریکا رایگەیاندبوو پێشنیازە حەوت رۆژیەکەی ئێرانی رەتکردوەتەوە.

هاکان فیدان، وەزیری دەرەوەی تورکیا، دووپاتی کردەوە کە وڵاتەکەی هێزی سەربازی نانێرێت بۆ خاکی وڵاتانی تر بۆ ئەنجامدانی هێرش لێیانەوە.

فیدان لە لێدوانێکی رۆژنامەوانیدا رایگەیاند: تورکیا هێزی سەربازی نانێرێت بۆ خاکی وڵاتێکی تر تا هێرشی لەوێوە بپێورێت، روونیشی کردەوە: پەیماننامەی مەککە رێککەوتنێکی بەرگرییە نەک هێرشبەری، و لە ئاناساتێکدا ئەگەر یەکێک لە وڵاتانی ئەندام رووبەڕووی هێرش ببێتەوە، وڵاتانی تر پشتیوانی لێ دەکەن.

ئاماژەی بەوەش کرد: لیژنە سەربازییەکان لە هاوپەیمانیی مەککە کاردەکەن لەسەر لێکۆڵینەوە لە چۆنیەتی بەشداری لە پشتیوانیکردنی عەرەبستانی سعودیە دژی هێرشەکانی حوسییەکان.

 

ئێران گەیشتنی یەکەم گەشتی ئاسمانی لە شاری نەجەفەوە بۆ تاران راگەیاند، ئەمەش دوای بەخشینی تایبەت لە سزاکانی سەر کەرتی فرۆکەوانی و گەشتە ئاسمانییەکانی ئێران.

بەپێی میدیاکانی ئێران، ئه‌مڕۆ پێنجشەممە سەعات ٧:٣٠ی بەیانی، یەکەم فڕۆکەی هێڵی ئاسمانیی عیراقی وەک کۆمپانیایەکی بیانی، دوای راوەستانی بۆ چەند مانگێک، لە فڕۆکەخانەی نێودەوڵەتیی ئیمام خومەینی نیشتەوە.

ئەم گەشتە لەسەر هێڵی (نەجەف - تاران - نەجەف) ئەنجام دەدرێت، کە نیشانەی دەستپێکردنەوەی گەشتە ئاسمانییە راستەوخۆ و رۆژانەیییەکانی ئەو کۆمپانیایەیە بۆ فڕۆکەخانەی ئیمام خومەینی.

شایەنی باسە، بەڕێوەبەرایەتیی هێڵە ئاسمانییەکانی عیراق رۆژی دووشەممەی رابردوو رایگەیاندبوو کە لە رۆژی پێنجشەممەوە گەشتە راستەوخۆکانی بۆ ئێران دەست پێ دەکاتەوە.

لە راگەیەندراوێکی وەزارەتی گواستنەوەی عیراقیشدا هاتووە: پلانە نوێیەکە گەشتی بەردەوام و رۆژانە لەنێوان فڕۆکەخانەی نێودەوڵەتیی نەجەف و فڕۆکەخانەکانی مەشهەد، تاران و ئەسفەهان لەخۆدەگرێت، ئەمەش بە مەبەستی ئاسانکاری لە هاتووچۆی گەشتیاران و رەخساندنی دەرفەتی گواستنەوەی ئاسمانیی بەردەوام لەنێوان عیراق و شارەکانی ئێراندا.