جەی دی ڤانس، جێگری سەرۆکی ئەمریکا، ئێرانی بە تێکدانی ئاسایشی کەشتیوانیی نێودەوڵەتی تۆمەتبار کرد و رایگەیاند، بەهۆی ئەم کردەوانەی تارانەوە نرخی وزە لە بازاڕەکانی جیهاندا روی لە بەرزبوونەوە کردوە. 

جێگرەکەی دۆناڵد ترەمپ رایگەیاند،بەهۆی بە ئامانج گرتنی کەشتییەکان لەلایەن ئێرانەوە لە گەروی هورمزدا، نرخی وزە لە جیهاندا بەزربوەتەوە و بۆ ئەو مەبەستەش رێکاری پێویستیان گرتوەتەبەر.

جێگری سەرۆکی ئەمریکا رونیشی کردەوە، تێکدانی کەشتیوانیی نێودەوڵەتی و دروستکردنی ئاستەنگ لەلایەن ئێرانەوە، پەرچەکردارێک بووە بەرانبەر ئەو هەنگاوانەی واشنتۆن بۆ رێگریکردن لە دەستگەیشتنی تاران بە چەکی  ئەتۆمی گرتویەتیەبەر.

ڤانس دەشڵیت؛  سەرەڕای رێگرییەکانی ئێران، بەڵام تا ئێستاش بڕێکی زۆر لە نەوت و گاز بەپێی پێویست لە گەروی هورمزەوە دەگوازرێتەوە.

ئەم قسانەی جێگری دۆناڵد ترەمپ لە کاتێکدایە، پێشتر دۆناڵد ترەمپی سەرۆکی ئەمریکا رایگەیاندبوو، جەنگی ئێران نەبوەتە هۆی بەرزبونەوەی وزە لە جیهاندا، بەڵکو جەنگی روسیا و ئۆکراین هۆکاری  بەرزبونەوەکەن.

عەباس عراقچی وەزیری دەرەوەی ئێران بە مەبەستی بەشداریكردن لە كۆبوونەوەكانی كۆمەڵەی گشتیی نەتەوە یەكگرتووەكان بەرەو نیۆرك بەڕیكەوت، هاوكات دۆناڵد ترەمپ سەرۆكی ئەمریكاش ئامادەیی خۆی بۆ بینینی سەرۆك كۆماری ئێران دەربڕیوە.

بەپێی زانیارییەكانی ئاژانسی تەسنیم، عراقچی پێش گەیشتنی بۆ نیویۆرك، سەرەتا سەردانی دەوحەی پایتەختی قەتەر دەكات و دوای مانەوەیەكی كورت بەڕێدەكەوێت بۆ ئەمریكا.

ئەم سەردانەی وەزیری دەرەوەی ئێران ئامادەكارییە بۆ سەردانی مەسعود پزەشكیان سەرۆك كۆماری ئێران كە بڕیارە بەشداری لە كارنامەی كۆبوونەوەكانی نەتەوە یەكگرتووەكاندا بكات.

 لە بەرانبەردا، دۆناڵد ترەمپ سەرۆكی ئەمریكا سەبارەت بە ئەگەری ئەنجامدانی دانوستان رایگەیاند، ئامادەیە لەگەڵ سەرۆك كۆماری ئێران كۆبێتەوە.

فڕۆکە جەنگییەکانی پاکستان بەربەیانی ئەمڕۆ، چەند هێرشێکی ئاسمانییان کردە سەر ویلایەتی کۆنەر لە رۆژهەڵاتی ئەفغانستان.

 بەپێی ئامارە سەرەتاییەکان، لە ئەنجامی بۆردومانکردنی ماڵێک لە ناوچەی پاتان لە بەڕێوەبەرایەتی نورگل، لانی کەم سێ کەس کە دوویان ئافرەتن کوژراون و چوار کەسی تریش برینداربوون، و ماڵەکەش بە تەواوی وێران بووە.

هاوکات، راپۆرتەکان ئاماژە بەوە دەکەن کە فڕۆکەکانی پاکستان بۆردومانی بەڕێوەبەرایەتی بەر مەلیان لە ویلایەتی پەکتیکای باشور کردووە و زەرەر و زیانێکی زۆریان بە ماڵ و دوکانەکانی ناوچەکە گەیاندووە، بەڵام تا ئێستا زانیاری لەسەر زیانی گیانیی ئەو ناوچەیە بەردەست نییە.

ئەم هێرشانە لە کاتێکدایە کە گرژییەکانی نێوان هەردوو وڵات زیادی کردووە، دوای ئەوەی ئیسلام ئاباد، دەسەڵاتدارانی کابل بە حەواندنەوەی چەکدارانی بزووتنەوەی تاڵیبانی پاکستان تۆمەتبار دەکات.

لە بەرانبەردا تاڵیبانی ئەفغانستان ئەم تۆمەتانە رەتدەکاتەوە و هێرشەکان بە بەزاندنی سەروەریی خاکی ئەفغانستان دەزانێت.

وەزیری دەرەوەی توركیا دەڵێت، رێككەوتنی مەككە یاسا و رێساكانی جموجۆڵ لە رۆژهەڵاتی ناوەڕاست دەگۆڕێت و سعودیەش نایەوێت ببێتە بەشێك لە ململانێكانی ئەمریكا و ئێران.

هاكان فیدان وەزیری دەرەوەی توركیا لە چاوپێكەوتنێكی تەلەفزیۆنیدا رایگەیاند، رێككەوتنی مەككە بۆ بەرگریی هاوبەش لە نێوان توركیا و سعودیە و پاكستان دوای تەواوكردنی هەنگاوەكانی بنیادنانی بە تەواویی، دەرگای كراوە دەبێت بە روی ئەندامی نوێدا.

وتیشی، رێككەوتنی مەككە نوێنەرایەتی ئیرادەیەكی بەهێز دەكات و  دەبێتە سەكۆیەكی گرنگ و یاسا و رێساكانی جموجۆڵ لە رۆژهەڵاتی ناوەڕاست دەگۆڕێت.

وەزیری دەرەوەی توركیا ئاماژەی بەوەشكرد، هێرشی حوسییەكان بۆسەر سعودیە بەهۆی ململانێكانی نێوان ئێران و ئەمریكاوە جێگەی قبوڵ نییە، وتیشی، سعودیە نایەوێت ببێتە بەشێك لە ململانێكانی نێوان ئێران و ئەمریكا.

بارەگای ناوەندی خاتەمولئەنبیا هۆشداری توند دەداتە ئەمریكا و وڵاتانی ناوچەكە لە هەر هێرشێكی ئەگەری.

بەپێی راپۆرتی ئاژانسی هەواڵی مێهر، بارەگای ناوەندی خاتەمولئەنبیا لە راگەیەندراوێكدا هۆشدارییەكی توندی ئاراستەی ئەمریكا و وڵاتانی ناوچەكە كرد، ئاماژەی بەوە كردووە، بەپێی زانیارییەكانیان، ئەمریكا بۆ پەردەپۆشكردنی شكستەكانی و بە گڵۆپی سەوزی هەندێك وڵاتی ناوچەكە، لە كۆبوونەوەیەكی هاوبەشدا لە ئەوروپا بڕیاری داوە ڕێوشوێنەكانی دژی ئێران دەستپێبكاتەوە.

هەر لە راگەیەندراوەكەدا هاتوو، ئەگەر واشنتۆن هەر هەڵەیەك دژی ئێران بكات، سەرجەم بنكە و بەرژەوەندییەكانی لە ناوچەكەدا دەبنە ئامانجی هێرشی بەردەوام و ئازاربەخش.

هاوكات، هۆشداری درایە وڵاتانی ناوچەكەش كە ئەگەر هاوكاری ئەمریكا ببن، بە هاوبەشی ئەمریكا دادەنرێن و چیتر هێزە چەكدارەكانی ئێرانیش دان بەخۆیاندا ناگرن بەرانبەریان.

 

لە چوارچێوەی پەرەسەندنی ئاڵۆزییەکانی نێوان هەردوولادا، بزووتنەوەی "ئەنسارو الله"ی حوسییەکان هەڕەشەی گرتنەبەری رێکاری توند و ئامانجگرتنی فڕۆکەخانەکانی ریازی کرد.

مۆحەممەد مفتاح، کاربەڕێکەری سەرۆکایەتیی حکومەتی حوسییەکان لە صنعاء رایگەیاند، بزووتنەوەکەیان پەیڕەوی بنەمای "ئاڵۆزی بەرانبەر ئاڵۆزی" دەکات و جەختی کردەوە کە هەر گەمارۆیەک لەلایەن سعودییەوە بە داخستنی فڕۆکەخانەکانی ئەو وڵاتە وەڵام دەدرێتەوە.

ناوبراو ئاماژەی بەوەش کرد کە توانای وەڵامدانەوەی سەربازییان هەیە، بەڵام هەوڵ دەدەن مۆڵگە و دامەزراوە مەدەنییەکان بپارێزن.

ئەم هەڕەشانە لە کاتێکدان کە رووبەڕووبوونەوەی سەربازیی نێوان هەردوولا چووەتە قۆناغێکی مەترسیدارترەوە؛ حوسییەکان بە مووشەکی بالیستی و درۆن هێرشی چڕیان کردووەتە سەر ریاز، دەوروبەری فڕۆکەخانەی نێودەوڵەتیی مەلیک خالید و دامەزراوەکانی کۆمپانیای ئارامکۆ لە یەنبەع و جیزان و نەجران.

لە بەرانبەردا، هاوپەیمانێتیی عەرەبی بە سەرکردایەتیی سعودیە هێرشی ئاسمانیی بەرفراوانی کردووەتە سەر چەندین بەرەی ناو یەمەن و سیستەمی بەرگریی ئاسمانیی سعودیەش بەردەوامە لە تێکشکاندنی ئەو هێرشە مووشەکی و درۆنییانە.

سەرچاوەیەکی رەسمیی ئیماراتی وەڵامی راپۆرتێکی رۆژنامەی "هارتس"ی ئیسرائیلی دایەوە کە بانگەشەی ئەوەی کردبوو ئەبو زەبی پێش  حەوتی تشرینی یەکەم هۆشداریی دابووە ئیسرائیل لەبارەی هێرشێکی نزیکی بزووتنەوەی حەماس.

سەرچاوە ئیماراتییەکە لە وەڵامی پرسیارێکی رۆژنامەی "زە ناشناڵ"دا روونی کردەوە کە وڵاتەکەی بابەتی ئەمنی لە رێگەی لایەنە پەیوەندیدارەکانەوە لەگەڵ وڵاتانی تر تاوتوێ دەکات، نەک لەسەر ئاستی سەرکردەی وڵاتان.

هاوکات وەزارەتی دەرەوەی ئیمارات جەختی کردەوە کە حکومەتی وڵاتەکەی لێدوان لەسەر ڕاپۆرت و گومانکارییەکانی ڕاگەیاندنەکان لەبارەی گفتوگۆی سەرکردەکان نادات.

ئەم وەڵامەی ئیمارات دوای ئەوە هات کە "هارتس" ئیدعای کردبوو محەمەد بن زاید، سەرۆکی ئیمارات پێش وادەی هێرشەکەی  حەوتی تشرینی یەکەم، بنیامین نەتەنیاهوو سەرۆک وەزیرانی ئیسرائیلی لە رودانی هەنگاوێکی گەورەی حەماس و یەحیا سنوار ئاگادار کردووەتەوە؛ لە بەرانبەردا نوسینگەی سەرۆک وەزیرانی ئیسرائیلیش ناوەڕۆکی راپۆرتەکەی بەتەواوەتی ڕەت کردەوە.

ئیسماعیل بەقائی، وتەبێژی وەزارەتی دەرەوەی ئێران وەڵامی تۆمەتەکانی کۆشکی سپی داوەتەوە و رایگەیاند، ئەو تۆمەتانەی ئاڕاستەی تاران دەکرێن، تاوانبارکردنی کردەوەکانێکە کە واشنتۆن خۆی ئەنجامی دەدات.

بەقائی لە تۆڕی کۆمەڵایەتی "ئێکس" نووسیویەتی: تۆمەتە درێژخایەنەکانی کۆشکی سپی بۆ سەر ئێران، بە شێوەیەکی سەرسوڕهێنەر و بە وردی، وەسفی هەمان ئەو کردەوانە دەکەن کە ئەمریکا خۆی ئەنجامی داون یان پشتیوانیی لێ کردوون.

وتەبێژی وەزارەتی دەرەوەی ئێران ئەوەشی روونکردەوە کە ئەم جۆرە پێچەوانەکردنەوەی راستییانە سەیر نین، چونکە بە وتەی ئەو خراپەکاران هەڵدێن، تەنانەت کاتێک کەسیش راویان نەنێت.

ئەم وەڵامەی تاران دوای ئەوە هات کە ئانا کیلی، جێگری وتەبێژی کۆشکی سپی تۆمەتی ئەنجامدانی هێرش لە گەروی هورمز و بەئامانجگرتنی ئەمریکییەکانی ئاڕاستەی ئێران کردبوو و ئیدعاى کردبوو کە ئێران تاقە لایەنە تاوانی جەنگی ئەنجامدابێت.

محەمەد باقر قاليباف، سەرۆکی پەرلەمانی ئێران رایگەیاند کە خۆڕاگریی گەلی ئێران جگە لە دەستەبەرکردنی ئاسایشی نیشتمانی، دەکرێت زەمینە بۆ دروستبوونی سیستمێکی نوێ لە ناوچەکە و جیهاندا خۆش بکات و بێتە هۆی کرانەوەی ئابووری و ستراتیژی.

لە دانیشتنێکی ئۆنلاینی پەرلەماندا، قاليباف هۆشداریی دا لەبارەی دوو هەڵەی ستراتیژی لە ناوخۆی وڵاتەکەیدا و روونی کردەوە کە روانینی جەنگخوازانە بەبێ ئاسۆیەکی روون و رەتکردنەوەی تەواوەتیی دیپلۆماسی، ئێران بەرەو داخوران و جەنگێکی بێ کۆتایی دەبات.

لە بەرانبەردا، ئاماژەی بەوەش کرد: وتاری ترس و نیشاندانی وڵات بە لاوازی دەبێتە هۆی تەسلیمبوون.

سەرۆکی پەرلەمانی ئێران جەختی لەسەر پێویستیی تێکەڵکردنی هێزی سەربازی و دیپلۆماسی کردەوە تاوەکو دەستکەوتە مەیدانییەکان وەربگێڕدرێن بۆ بەرپەرچدانەوە، هاوکات ئاماژەی بەوەش کرد کە ئێران ناگەڕێتەوە بۆ مەرجەکانی پێشووی دانوستان و گەرووی هورمز ناکاتەوە تاوەکو مافە ڕەواکانی نەبەخشرێت و ئەمریکاش پابەندبوونەکانی جێبەجێ نەکات.

وتەبێژی گروپە چەکدارەکانی حوسییەکان لەبارەی هێرشەکانی سەر ریاز و دامەزراوەکانی کۆمپانیای ئارامکۆ وتی: ئەو هێرشانەمان لە وەڵامی هێرشە ئاسمانییەکانی سعودیە ئەنجامداوە.

یەحیا سەریع، وتەبێژی حوسییەکان رایانگەیاند، لە وەڵامی هێرشە ئاسمانییەکانی سعودیەدا، لە ڕێگەی دوو ئۆپەراسیۆن بە ژمارەیەکی زۆر موشەکی بالیستی و درۆن، چەند ئامانجێکی هەستیاریان لە ریاز و دامەزراوەکانی کۆمپانیای 'ئارامکۆ'یان لە یەنبەع کردووەتە ئامانج.

وتیشی، هێرشەکان بە سەرکەوتوویی ئامانجەکانیان پێکاوە و ئاگری گەورەیان لێکەوتووەتەوە.

ئەوەشی روونکردەەوە، بەردەوام دەبن لە هێرشەکانیان تا ئەو کاتەی بۆردومان و گەمارۆکانی سەر یەمەن کۆتاییان دێت.

 

فەرماندەیی ناوەندیی ئەمریکا لە راگەیەندراوێکدا ئاماری هاتوچۆی کەشتیوانی لە گەروی هورمز بڵاوکردەوە و رایگەیاند، لەگەڵ هاوبەشەکانیان لە هەوڵی بەردەوامدان بۆ دەستەبەرکردنی ئاسایشی کەشتیوانی و پاراستنی رێڕەوە ئاوییەکان.

به‌گوێره‌ی راگەیەندراوەکەی فەرماندەیی ناوەندیی ئەمریکا 'سێنتکۆم'، زیاتر لە دوو هەزار کەشتیی بازرگانی بە هەماهەنگی لە گەروی هورمزدا تێپەڕیوون، هەروەها جەخت لەوەکراوەتەوە، کە هێڵە سەرەکییەکانی گواستنەوە لە گەروەکە پاککراونەتەوە و بە تەواوی دوورن لە مەترسیی مین.

ئاماژەی بەوەشکردووە، قەبارەی گواستنەوەی نەوت و بازرگانی لە گەروی هورمز لە ماوەی دوو هەفتەی رابردوودا گەیشتووەتە بەرزترین ئاست بەراورد بە شەش مانگی رابردوو، لە بەرانبەردا جەختی کردووەتەوە، ئێران لە رێگەی گەروی هورمزەوە تەنانەت یەک بەرمیل نەوتیشی هەناردە نەکردووە.

میدیاکانی سعودییە، ئەمرۆ شەممە، بڵاویانکردەوە، دووکەڵ و ئاگرێکی بەرز لە نێزیک فڕۆکەخانەی مەلیک خالید لە ریازی پایتەختی سعودیە بەدیکراوە.

ئەم روداوە دوای چەند سەعاتێک دەێت لە دەرچوونی ئاگادارکردنەوەی بەپەلە و پێشوەختە لەلایەن بەڕێوەبەرایەتیی گشتیی بەرگریی شارستانیی سعودیە لە شارەکانی ریاز، خەرج، جدە، تائف، یەنبەع، خەمیس مەشیت، عولا، ئەبها و جازان.

ئەم پەیامانەی ئاگادارکردنەوەی پێشوەختە ئاساییانە کاتێک بڵاودەکرێنەوە کە ناوچەکانی شانشینی سعودیە رووبەڕووی هێرش دەبنەوە لە لایەن یەمەنەوە، لە کاتێکدا تا ئێستا دەسەڵاتدارانی سعودیە بە رەسمی تۆمارکردنی زیانی گیانی و مادییان رانەگەیاندووە.

واشنتۆن لە چوارچێوەی هەنگاوەکانیدا بۆ کەمکردنەوەی سزاکان دوای گۆڕانکارییە سیاسییەکانی دەسەڵات لە دیمەشق، هەڵگرتنی کۆتا کۆتوبەندەکانی بەردەم فرۆشتنی چەک و دابینکردنی دارایی سەربازیی بۆ سوریا راگەیاند.

وەزارەتی دەرەوەی ئەمریکا ئاشکرای کرد کە سوریای لە کۆتا دوو رێگری لەژێر یاسای بنبڕکردنی چەکی کیمیایی و بایۆلۆجیی ساڵی 1991 بەخشیوە.

ئەم هەنگاوە ئاستەنگە یاساییەکانی بەردەم فرۆشتنی چەک و خزمەتگوزارییە بەرگرییەکان و هاوکاریی دارایی سەربازیی دەرەکی بۆ سوریا لادەبات، بەبێ ئەوەی بەو مانایە بێت کە رێكکەوتنی نوێی چەک یان هاوکاریی دارایی دەستبەجێ بۆ دیمەشق دابین بڕوات.

بڕیارەکە لە 16 ئەیلوولی 2026ەوە چووەتە بواری جێبەجێکردنەوە و لە تۆماری فیدراڵیی ئەمریکادا بڵاوکراوەتەوە.

ئەم بڕیارە بەشێکە لە زنجیرە کارئاسانییەکانی ئەمریکا کە پیشتر هەڵگرتنی سزاکانی "قەیسەر" و دەرهێنانی سوریا لە لیستی وڵاتانی پشتگیریکاری تێرۆریشی دەگرتەوە.

لە لایەکی ترەوە، جو ویڵسن، ئەندامی ئه‌نجومه‌نی نوێنه‌رانی ئەمریکا لە 19ی ئەیلوولدا نیگەرانیی خۆی بەرانبەر بەردەوامیی هەندێک کۆتوبەندی دیکەی بازرگانی نیشاندا و داوای کرد ئاسانکاریی زیاتر بۆ کۆمپانیا ئەمریکییەکان بکرێت تاوەکو بتوانن وەبەرهێنان لە بازاڕی سوریادا بکەن.

عەباس عراقچی، وەزیری دەرەوەی ئێران، وەڵامی لێدوانەکانی جان نۆئێل بارۆ، وەزیری دەرەوەی فەرەنسای لەبارەی رەوشی ناوخۆی ئێران دایەوە و مێژوی فەرەنسای لە جەزائیر بەبیری هێنایەوە و پێی راگەیاند: بەسیەتی فرمێسکی تیمساح.

عراقچی لە پەیامێکدا بۆ بارۆ ئاماژەی بەوە کرد: لە کاتی جەنگی سەربەخۆیی جەزائیردا ملیۆنێک و 500 هەزار جەزائیری بە دەستی فەرەنسا کوژراون، بەڵام پاریس تاوەکو ئێستاش رەتیدەکاتەوە داوای لێبوردن لە تاوانەکانی بکات.

وەزیری دەرەوەی ئێران لە تۆڕی کۆمەڵایەتیی "ئێکس" نووسیویەتی: جەنابی بارۆ، بەسیەتی فرمێسکی تیمساح! بێدەنگیتان لە بەرانبەر ئەو کۆمەڵکوژییەی ئەمریکا دژ بە منداڵانی قوتابیمان ئەنجامی دا، وەڵامی سەرجەم قسەکانتان دەداتەوە.

ئەم وەڵامەی عێراقچی دوای ئەوە هات کە وەزیری دەرەوەی فەرەنسا لەبارەی رەوشی ناوخۆیی ئێرانەوە رایگەیاندبوو: دەبێت ئێرانییەکان مافی دیاریکردنی چارەنووسی خۆیانیان بە سەربەستی هەبێت و رێز لە مافە سەرەتاییەکانیان بگیرێت.

سەرۆكی پەرلەمانی ئێران هۆشداریی دەداتە ئەمریكا و سعودیە و دەڵێت، سەردەمی خستنەخوارەوەی فڕۆكە جەنگییەكانی ئێف 35 و ئێف 15 دەستیپێكردووە.

محەمەد باقر قالیباف سەرۆكی پەرلەمانی توركیا لە تۆڕی كۆمەڵایەتی ئێكس بڵاویكردەوە: سەردەمی راوەدونانی فڕۆكە سەربازییەكانی ئێف 35 و ئێف 15 و خستنەخوارەوەیان دەستیپێكردووە، وڵاتانی خاوەن فڕۆكەكانیش ناچارن تەنها بڵێن زیانیان بەركەوتووە.

وتیشی: ئەو روداوانەی پێشتر كابووسێكی ترسناك بوون، ئێستا بوونەتە واقعێكی رۆژانە و پێویستە لایەنی بەرانبەر لەمەودوا وەك واقعێكی نوێ مامەڵەی لەگەڵدا بكات.

لەماوەی رابردووشدا ئەمریكا بە ئامانجگرتنی فڕۆكەیەكی جەنگیی ئێف 35ی لە ئاسمانی ئێران ئاشكراكرد و سعودیەش بە ئامانجگرتنی سێ فڕۆكەی ئێف 15ی لە شەڕی دژی حوسییەكانی یەمەن راگەیاند.

وەزیری دادی توركیا دەڵێت، پرۆسەی ئاشتی پێی ناوەتە قۆناغێكی نوێوە و بڕگەكانی یاسای چوارچێوەش دەخرێنە بواری جێبەجێكردنەوە.

ئاكن گورلیك وەزیری دادی توركیا رایگەیاند: پرۆسەی ئاشتی گەیشتووەتە قۆناغێكی زۆر باش و پێشكەوتوو، بەتایبەتیش دوای ئەوەی پەرلەمانی توركیا بە دەنگی 467 پەرلەمانتار یاسای چوارچێوەی تایبەت بە پرۆسەی پەسەندكرد.

وتیشی: لەئێستادا قۆناغی دووەمی پرۆسەی ئاشتی دەستیپێكردووە، بەڵام جێبەجێكردنی كردارییانەی بڕیارەكان بەستراوەتەوە بەوەی ئەنجومەنی ئاسایشی نیشتمانی توركیا پرۆسەی چەكدانانی پەكەكە پشتڕاستبكاتەوە بۆئەوەی تەواوی هەنگاوەكان بچنە بواری جێبەجێكردنەوە.

وەزیری دادی توركیا ئاماژەی بەوەشكرد، هاووڵاتیان پێشوازییەكی گەرمیان لەو هەنگاوانە كردووە و زۆر دڵخۆشن بە بەڕێوەچوونی پرۆسەی ئاشتی و ئاواتەخوازن لەو رێگەیەوە سەقامگیریی هەمیشەیی بۆ توركیا بگەڕێتەوە.