کوردستان
هاتوچۆی گەرمیان رایگەیاند، لە روداوێکی هاتوچۆدا لە کەلار کەسێک گیانی لەدەستدا و کەسێکی دیکەش بریندار بوو.
هاتوچۆی گەرمیان رایگەیاند، روداوەکە لە کەلار رویداوە و ماتۆڕ سکیلێک خۆی بە ژنێکی پیادەڕەودا کێشاوە.
باسی لەوەشکرد، دوای ئەوەی ماتۆڕسکیلەکە خۆی بە ژنەکەدا کێشاوە خۆشی وەرگەڕاوە بەهۆیەوە ژنەکە و شۆفێری ماتۆڕسکیلەکەش بە سەختی بریندار بوون و رەوانەی نەخۆشخانەکانی سلێمانی کراون.
ئەوەشی خستووەتە روو، دوای وەرگرتنی چارەسەر بەهۆی سەختی برینەکەیەوە شۆفێری ماتۆڕسکیلەکە گیانی لەدەستدا.
سەرۆك وەزیرانی عیراق دەڵێت، كار بۆ دەستپێكردنەوەی هەناردەكردنی نەوتی هەرێمی كوردستان دەكەن لە رێگەی بەندەری جەیهانی توركییەوە.
بەپێی راگەیەنراوێكی نوسینگەی محەمەد شیاع سودانی، سەرۆك وەزیرانی عیراق پێشوازی لە ئاڵپ ئەرسەلان وەزیری وزە و سەرچاوە سروشتییەكانی توركیا كردوە و جەختیكردووەتەوە، بەغداد كاردەكات بۆ باشتركردنی پەیوەندییەكانی نێوان هەردوو وڵات بە تایبەتیش لەگەڵ كۆمپانیا توركییەكان كە لە كەرتە جیاوازەكاندا لە عیراق كاردەكەن.
ئاماژەی بەوەشكرد، حكومەتی عیراق كار بۆ دەستپێكردنەوەی هەناردەی نەوتی هەرێمی كوردستان دەكات لە رێگای بەندەری جەیهانی توركییەوە.
هاوکات وەزیری وزەی توركیاش رایگەیاند، وڵاتەكەی ئامانجییەتی لە عیراق كاری هاوبەشی لەگەڵ بكات لە هەموو سێكتەرە جیاوازەكاندا، لەناویشیاندا هەناردەكردنی نەوتی بەسرە لە رێگەی بەندەری جەیهانی توركیا.
هێزەكانی سوریای دیموكرات رایگەیاند، بەهۆی هێرشێكی فڕۆكە جەنگیەكانی توركیا بۆسەر رۆژئاوای كوردستان نۆ كەسی یەك بنەماڵە شەهید بوون.
هێزەكانی سوریای دیموكرات هەسەدە لە تۆڕی كۆمەڵایەتی تێلێگرام بڵاویانكردەوە، درەنگانی شەوی یەكشەممە فرۆكەیەكی جەنگی توركیا خێزانێكیان بۆردومانكردووە لە ناوچەی نێوان گوندی قومجی و بەرخ بۆتان لە باشووری كۆبانی لە رۆژئاوای كوردستان كە كاریان لە بواری كشتوكاڵیدا دەكرد.
ئاماژەی بەوەشكرد، بەهۆی بۆردومانەكەی توركیاوە نۆ كەس شەهید بوون كە لە هەمان بنەماڵە بوون، جگە لەوەی دوانی دیكەش لە هەمان بنەماڵە بریندار بوون.
لە گوندی سۆفیانی سنووری ناحیەی بنگرد، درۆنێك كەوتەخوارەوە و بەڕێوەبەری ناحیەیەکەش دەڵێت، درۆنەكە جۆری بەیرەقداری توركیە.
محەمەد عەبدولرەحمان بەڕێوەبەری ناحیەی بنگرد بەکوردسات نیوزی راگەیاند: سەعات حەوت و نیوی ئێوارە لە سەربانی ماڵێک لەگوندی سۆفیانی ناحیەی بنگرد درۆنێک کەوتۆتە خوارەوە .
وتیشی، درۆنەکە جۆری بەیرەقداری تورکیە و هێزە ئەمنییەکانیش هاتوونەتە شوێنی روداوەکەو لێکۆڵینەوەیان لە هۆکاری کەوتنە خوارەوەی روداوەکە دەستی پێکردووە.
ئاماژەی بەوەشکردووە، درۆنەکە کەوتۆتە سەربانی ماڵێک و هیچ زیانێکی گیانی و مادی لێنەکەوتۆتەوە
بافڵ جەلال تاڵەبانی، سەرۆکی یەکێتیی نیشتمانیی کوردستان بە یاوەری هەڤاڵان دلێر سەید مەجید و قوباد تاڵەبانی، سەردانی هەڤاڵ شێخ جەعفەر شێخ مستەفا، لێپرسراوی ئەنجوومەنی پاراستنی بەرژەوەندییە باڵاکانی یەکێتیی نیشتمانیی کوردستانی کرد.
لە دیدارێکدا پێشهات و گۆڕانکارییە سیاسییەکانی هەرێمی کوردستان، عیراق و پەیوەندییەکانی هەرێمی کوردستان و بەغدا تاوتوێکرا و جەخت لە هەماهەنگی لایەنە کوردستانییەکان کرایەوە بۆ گەیشتن بە حکومەتێکی خزمەتگوزار لە بەرژەوەندی خەڵکی کوردستان و چارەسەکردنی کێشەکان و پاراستنی سەقامگیری و بەهێزترکردنی قەوارەی هەرێمی کوردستان.
قائیمقامییەتی سلێمانی بڵاویکردەوە، رێژەی بەرهەمی هێلکەی پرۆژەکانی ناوخۆ خواستی هاووڵاتیان پڕدەکاتەوە، قائیمقایەتی سلێمانیش رێگری لە ساغکردنەوەی هەموو ئەوهێلکانە دەکات کە بەرێگەی نایاسایی هاوردە دەکرێن و مێژووی دەرچوون و بەسەرچونیان لەسەر نییە.
قائیمقامییەتی سلێمانی رایگەیاندووە، لە ئێستادا بەرهەمی هێلکەی پرۆژەکانی ناوخۆ لە ئاستێکی بەرزدایە، خواستی هاووڵاتیان و پێداویستی بازار پردەکاتەوە، ئەمەش بە هەنگاوێکی گرنگ وەسفکرا کە پشتگیری لە بەرهەمی ناوخۆ و رێگری لە زیادبونی نرخی هێلکە دەکات لە سنوری پارێزگای سلێمانی.
ئاماژەی بەوەشکردووە، بریاردرا کە رێگری لە ساغکردنەوەی هەموو ئەوهێلکانە بکرێت کە بەرێگەی نایاسایی هاوردە دەکرێن و مێژووی دەرچوون و بەسەرچوونیان لەسەر نییە.
بافڵ جەلال تاڵەبانی سەرۆکی یەکێتیی نیشتمانیی کوردستان و مەسرور بارزانی سەرۆکی حکومەتی هەرێمی کوردستان لە پیرمام کۆبوونەوە.
بافڵ جەلال تاڵەبانی سەرۆکی یەکێتیی نیشتیمانیی کوردستان لەدوای کۆبوونەوەی لەگەڵ مەسرور بارزانی سەرۆکی حکومەتی هەرێمی کوردستان لەلێدوانێکدا بۆ رۆژنامەنووسان رایگەیاند: کۆبوونەوەکەمان زۆر ئەرێنی بوو، لەسەر چەند پرسێکی ستراتیژی رێککەوتوین کە خزمەتی مللەت دەکات.
بافڵ جەلال تاڵەبانی راشیگەیاند، گفتوگۆکانمان بەردەوام دەبێت، ئامانجی هەردوولاشمان ئەوەیە بەزووترین کات حکومەتێکی بەهێز پێکبهێنرێت، کە خزمەتی کۆمەڵانی خەڵکی کوردستان بکات.
لە بەرانبەردا مەسرور بارزانی سەرۆکی حکومەتی هەرێمی کوردستان رایگەیاند؛ کۆبووەنەوەی نێوانمان زۆر باش و ئەرێنی بوو بۆ لێککنزیکبوونەوە و تاوتوێکردنی ئەو پرسانەی کە لەبەرژەوەندی خەڵکی کوردستان و ناوچەکەدایە.
بافڵ جەلال تاڵەبانی سەرۆکی یەکێتیی نیشتمانیی کوردستان و مەسرور بارزانی سەرۆکی حکومەتی هەرێمی کوردستان لە پیرمام کۆبوونەوە.
کۆبوونەوەکە بۆ تاوتوێكردنی پێكهێنانی كابینەی نوێی حكومەتی هەرێمی کوردستانە.
پۆلیسی سلێمانی دەستگیرکردنی یەکێک لە تۆمەتبارانی هەڵکوتانە سەر رێستۆرانتەکەی سلێمانی راگەیاند، دەشڵێت بەردەوامن لە گەڕان بەدوای تۆمەتبارەکانی دیکەدا.
پۆلیسی سلێمانی رایگەیاندووە، شەوی رابردوو لە رێستۆرانتی فانسی لە شاری سلێمانی شەڕ و ئاڵۆزی دروست بوو و تەقەکرا، هێزەکانی پۆلیس و ئاسایشی سلێمانی بەردەوام بوون لە گەڕان و بەدواداچوونەکان بۆ دۆزینەوە و دەستگیرکردنی تۆمەتباران، سەرئەنجام یەکێک لە تۆمەتبارەکان خۆی رادەستی هێزەکانی پۆلیس کرد.
ئاماژەی بەوەشکردووە، لەگەڵ دەستگیرکردنی ئەو تۆمەتبارەدا دەستگیراوە بەسەر چەکێک لە جۆری دەمانچەی تورکیدا.
باسی لەوەشکردووە، لە ئێستادا تۆمەتبار (ز،ح،ع ) بەبڕیاری دادوەر راگیراوە و لێکۆڵینەوە لە روداوەکە بەردەوامە.
پۆلیسی سلێمانی دەشڵێت، هێزەکانمان بەردەوامن لە گەڕان بۆ دەستگیرکردنی ئەو تۆمەتبارانەی دیکە کە لەلایەن دادوەرەوە فەرمانی دەستگیرکردنیان بۆ دەرکراوە.
پارێزەری شێروان شێروانی بە کوردسات نیوزی راگەیاند، دادوەر ئازادبوونی بە مەرجی شێروان شێروانی رەتکردەوە. دەشڵێت، ئەگەر ئازاد نەکرێت تاوەکو مانگی ئەیلولی ئەمساڵ لە زینداندا دەمێنێتەوە.
محەمەد عەبدوڵا پارێزەری شێروان شێروانی بە کوردسات نیوزی راگەیاند، "ئەمڕۆ دوای پێشکەشکردنی داواکاری ئازادبوونی بریکاردارم لە دادگای بەرایی دەشتی هەولێر، بەڵام داواکاریەکەمان رەتکرایەوە".
وتیشی، "جارێکی تر ستەم لە شێروان شێروانی کرا و دادوەر بڕیاریدا بە رەتکردنەوەی داواکاری بریکاردارم رۆژنامەنووس شێروان ئەمین ناسراو بە شێروان شێروانی بە ئازاد بوونی بە مەرج، کە بەداخەوە بڕیارێکی چاوەڕوان نەکراو بوو".
ئەو پارێزەرە وتیشی، تانە لە بڕیارەکە دەدەن و پێیان وایە نادادی تێدایە، بۆیە چاوەڕێی ئەنجامی تانەکە دەکەن.
ئاماژەی بەوەشکرد، ئەگەر ئازادبوونی بە مەرج شێروان شێروانی نەگرێتەوە، ئەوا تاوەکو مانگی ئەیلولی ئەمساڵ ئەو رۆژنامەنووسە لە زینداندا دەمێنێتەوە.
ئەوەش لە کاتێکدایە، بڕیاربوو رۆژی 9ی ئەم مانگە، دوای تێپەڕبوونی زیاتر لە چوار ساڵ و 5 مانگ بەسەر زیندانیکردنیدا، رۆژنامەنووس شێروان شێروانی، یەکێک لە گیراوەکانی کەیسی بادینان، ئازاد بکرێت.
قوباد تاڵەبانی رایگەیاند، یادکردنەوەی زامی هەڵەبجە و ئەنفال و ئازارەکانی دیکە بۆنەیەکن بۆ بیرکردنەوە لەبوون و مێژوومان.
قوباد تاڵەبانی جێگری سەرۆکی حکومەتی هەرێم لە ساڵیادی کیمیایی بارانکردنی هەڵەبجەدا رایگەیاند، "یادکردنەوەی زامی هەڵەبجە و ئەنفال و ئازارەکانی دیکە تەنها یادکردنەوەیەکی سادە نین، بەڵکو بۆنەیەکن بۆ بیرکردنەوە لەبوونمان و لە مێژوومان".
ئاماژەی بەوەشکردووە، "ئەوانە بۆنەیەکن بۆ تێڕامان لەو کارەسات و نەهامەتییانەی بەسەر میلەتەکەماندا هاتووە و بۆنەیەکیشن بۆ تێگەیشتن لە هاوچارەنووسیمان وەک گەلی کورد بەبێ جیاوازی".
ئەمڕۆ 37 ساڵ بەسەر کیمیایی بارانکردنی هەڵەبجەدا تێدەپەڕێت، ئەو تاوانەی چەکی کیمایی قەدەغەکراوی بەرامبەر بە کورد تێدا بەکارهێنرا و بەهۆیەوە پێنج هەزار هاووڵاتیی شەهید و بە سەدانی دیکەش بریندار بوون.
سەرۆک کۆماری عیراق پەیامێکی بەبۆنەی ساڵیادی کیمیایی بارانکردنی هەڵەبجە بڵاوکردەوە و رایگەیاندووە، تاوانی كیمیابارانكردنی هەڵەبجە سەلمێنەری ئەو ستەمەیە كە رژێمی بەعس بەرانبەر گەلی كورد ئەنجامیدا. دەشڵێت، "هانی لایەنە پەیوەندیدارەکان دەدەین پەلە بکەن لە گۆڕینی هەڵەبجە بۆ پارێزگا و هەنگاوە یاساییەکانی تەواو بکەن".
د. لەتیف رەشید سەرۆک کۆماری عیراق لە ساڵیادی کیمیایی بارانکردنی هەڵەبجەدا رایگەیاند، "ئەم تاوانە دڕندانەیە، کە بووە هۆی شەهیدبوون و برینداربوونی هەزاران منداڵ و ژن و پیر و لەناوبردنی چەندین گوندی کوردنشین، دەربڕی ئەو ستەمەیە کە رژێمی لەناوچووی پێشوو دژ بە هاووڵاتیانی کورد بە تایبەتی و گەلی عیراق بە گشتیی ئەنجامی داوە".
ئاماژەی بەوەشکرد، تاوانی هەڵەبجە ویژدانی جیهانی هەژاند، راشیگەیاندووە، "تراژیدیای شاری هەڵەبجە ئەمڕۆ داوامان لێدەکات بەرەو پێشەوە هەنگاو بنێین بۆ چەسپاندنی ئەزموونی دیموکراسی لە وڵاتەکەماندا، هاوکات داواکردن لە کۆمەڵگەی نێودەوڵەتی بۆ ڕێگریکردن لە بڵاوبوونەوەی چەکە کۆکوژیە قەدەغەکراوە نێودەوڵەتییەوە و راگرتنی جەنگ و ململانێکان و چەسپاندنی سەقامگیری ئاسایش و ئاشتی لە ناوچەکە و جیهاندا".
روونیشیکردووەتەوە، جەخت لەسەر گرنگی هاوکاری و هەماهەنگی نێودەوڵەتی دەکەینەوە بۆ دۆکیۆمێنتکردنی ئەو تاوانانەی کە دژ بە هاووڵاتیان ئەنجام دراون، بۆ ئەوەی ببنە بەڵگە بۆ ئەو تاوانانەی کە رژێمە دیکتاتۆرییەکان بەرامبەر بە خەڵکی بێتاوان ئەنجامیان داوە.
لە کۆتاییشدا ئەوەی خستووەتە روو، "بەرپرسیارێتی نیشتمانی و مرۆییمان داوامان لێدەکات کەهانی لایەنە پەیوەندیدارەکان بدەین پەلە بکەن لە گۆڕینی هەڵەبجە بۆ پارێزگا و هەنگاوە یاساییەکانی لە ئەنجومەنی نوێنەران تەواو بکەن، بۆ بەدەستهێنانی ئەو مافە بۆ شارەکە و بەرجەستەکردنی ئەو خزمەتگوزارییانەی کە پێویستیان پێیەتی و قەرەبووکردنەوەی کەسوکاری قوربانیان لەبەرامبەر ئەو زیانانەی کە هێشتا بەدەستیانەوە دەناڵێنن".
ئەمڕۆ 37 ساڵ بەسەر کیمیایی بارانکردنی هەڵەبجەدا تێدەپەڕێت، ئەو تاوانەی چەکی کیمایی قەدەغەکراوی بەرامبەر بە کورد تێدا بەکارهێنرا و بەهۆیەوە پێنج هەزار هاووڵاتیی شەهید و بە سەدانی دیکەش بریندار بوون.
شۆڕش ئیسماعیل وەزیری پێشمەرگەی حکومەتی هەرێمی کوردستان لە ساڵیادی کیمیابارانی هەڵەبجەدا پەیامێكی بڵاکردەوە و رایگەیاند، دەبێت ئەو تاوانەی دەرحەق بە هەڵەبجە و هەڵەبجەییەکان کرا ببێتە وانەیەک و یەکگرتوویی و تەباییمان بەهێزتر بکات، لە بەرامبەر سەرجەم پرسە چارەنووسازەکاندا کە رووبەڕووی گەلەکەمان دەبێتەوە”.
دەقی پەیامەکەی وەزیری پێشمەرگە:
پەیامی وەزیری پێشمەرگە لە ساڵیادی کارەساتی کیمیابارانکردنی هەڵەبجەدا.
“لـە ساڵیادی کارەساتی جینۆسایدکردنی هەڵەبجـەدا، درود بۆ رۆحی پاک و بێگەردی شەهیدانی کارەساتی کیمیابارانکردنی هەڵەبجە و سەرجەم شەهیدانی کوردستان دەنێرین، سەری ڕێزو وەفاداری بەرامبەر کەسوکاری شەهیدان و بریندارانی چەکی کیمیایی لە هەڵەبجە دادەنەوێینین.
کارەساتی هەڵەبجـە، تاوانی کۆمەڵکوژی و مەرگەساتی گەلێک بوو، لەلایەن رژێمی ڕەفتارفاشیی بەعسی ڕووخاو، کە بە چەندین جۆر گازی کیمیایی بۆمبارانی هەڵەبجەی کردو بەوھۆیەوە زیاتر لە پێنج ھەزار ھاووڵاتیی سڤیل شەھیدبوون و زیاتر لە 10 هەزار ھاووڵاتیی دیکەش برینداربوون، کە تاوەکوو ئێستاش بەشێکیان بەدەست ئازارەکانییانەوە دەناڵێنن.
هەڵەبجـە، بیرەوەرییەكی خەمناك و پەژارەیەكی نیشتمانی و نەتەوەییمانە كـە هەرگیز لە هزر و ئەندێشەی گەلەكەمان و مرۆڤی بەویژدان دەرناچێت.
دووژمنانی گەلەکەمان هەمیشە ویستوویانە بە زەبری ئاگر و ئاسن وەڵامی داواکارییە ڕەواکانی گەلی کوردستان بدەنەوە؛ بەڵام هەرگیز نەیانتوانیوەو ئەو خەونەیان بردۆتە ژێرگڵ.
دەبێت ئەو تاوانەی دەرحەق بە هەڵەبجە و هەڵەبجەییەکان کرا ببێتە وانەیەک و یەکگرتوویی و تەباییمان بەهێزتر بکات، لە بەرامبەر سەرجەم پرسە چارەنووسازەکاندا کە رووبەڕووی گەلەکەمان دەبێتەوە”.
شۆڕش ئیسماعیل
وەزیری پێشمەرگەی حکومەتی هەرێمی کوردستان
١٦ـی ئاداری ٢٠٢٥
بافڵ جەلال تاڵەبانی سەرۆکی یەکێتیی نیشتمانیی کوردستان، لە یادی کیمیابارانی هەڵەبجەدا دەڵێت، ئیتر کاتی هاتووە دوور لە دروشم، هەنگاوی کرداری بنرێت بۆ ئاوەدانکردنەوەی زیاتری هەڵەبجە و بە یەک دەست هەموومان بە پرۆژەیەکی نیشتمانییەوە کاربکەین بۆ سەرخستنی هەنگاوەکانی دەنگدان بە پارێزگابوونی هەڵەبجە و قەرەبووکردنەوەی قوربانیان، و گەیاندنی خزمەتگوزاری زیاتر بە ناوچەکە.
دەقی پەیامەکەی سەرک بافڵ...
هەمیشە دەست لەسەر سنگ، هاوسۆزین لەگەڵ خانەوادەی سەربەرزی شەهیدان و قوربانیانی چەکی کیمیایی.
هەڵەبجە بۆ ئێمە هێمای قوربانی و مەزڵومیەتی گەلەکەمانە، دوای ٣٧ ساڵ لە جینۆسایدکردن و کیمیابارانکردنی هەڵەبجەی هەمیشە زیندوو، تاوەکو ئێستا ئاسەوار و کاریگەرییە خراپەکانی بەسەر خەڵک و خاکی شارەکەوە ماوە.
ئێمە لە ئازاری کەسوکارەکانمان، داواکاری و خواستەکانیان لە هەڵەبجەی سەربەرز تێدەگەین، بۆیە لەگەڵ هەموو گلەیی و پێویستییەکانیاندام و لە پێشەوەی بەرگری لە مافەکانتان و پارێزەری راستەقینەشتان دەبم بۆ هێنانەدییان.
یەکێتیی نیشتمانیی کوردستان پەرۆشانە لە رێگای نوێنەرەکانی لە ناوەندەکانی دەسەڵات و یاسادانان وەک هەمیشە بێ درێغیکردن بۆ پرسی هەڵەبجە کاردەکات و بەردەوام لە هەوڵدا دەبین تا خزمەتی شاری شەهیدان و خەڵکە خۆشەویستەکەی بکەین، ئەمەش ئەرکە لەسەرشانی هەموو یەکێتییەک کە خزمەتکاری هەڵەبجە بێت.
ئیتر کاتی هاتووە دوور لە دروشم، هەنگاوی کرداری بنرێت بۆ ئاوەدانکردنەوەی زیاتری هەڵەبجە و بە یەک دەست هەموومان بە پرۆژەیەکی نیشتمانییەوە کاربکەین بۆ سەرخستنی هەنگاوەکانی دەنگدان بە پارێزگابوونی هەڵەبجە لە ئەنجوومەنی نوێنەرانی عیراق و قەرەبووکردنەوەی قوربانیان، و گەیاندنی خزمەتگوزاری زیاتر بە ناوچەکە.
ئەرکی حکومەتیشە خزمەتکردنی هەڵەبجە و ئاوەڕدانەوەی زیاتر لە شارەکە بکاتە ئەولەویەتی کارکردنی و بودجە و شایستەی دارایی پێویست دابینبکات کە لە ئاست گەورەیی هەڵەبجەدا بێت.
سڵاوی وەفاداریمان بۆ گیانی پاک و نەمری شەهیدانی کیمیابارانی هەڵەبجە، سەربەرزی بۆ هەڵەبجە و هەڵەبجەییەکان.
بافڵ جەلال تاڵەبانی
سەرۆکی یەکێتیی نیشتمانیی کوردستان
لە سەرەتای راگەیەندراوەکەدا هاتووە: "ئەمڕۆ بە خەمێکی قوڵەوە یادی 37 ساڵەی تاوانی دڕندانەی دژ بە گەلەکەمان دەکەینەوە کە لە شاری هەڵەبجە لە لایەن هێزەکانی رژێمی بەعسی روخاوەوە بەرامبەر بە خەڵکی بێدیفاع و مەدەنی ئەو شارە ئەنجامدرا."
راگەیەندراوەکە ئاماژە بەوە دەکات کە ئەو تاوانەی شۆڤێنیەکانی بەعس بەسەر ئەم شارەدا هێنایان، رقێک بوو بەرامبەر رۆڵی مێژوویی هەڵەبجە کە لە جوڵانەوەی فەرهەنگی و شارستانێتی و سیاسیدا خاوەنی بیری دەوڵەمەند و پێشکەوتنخوازی کوردایەتی بوون و لە راپەڕین و شۆرشەکانی گەلەکەشماندا هەمیشە سەرمەشق بوون.
هەروەها لە راگەیەندراوەکەدا جەخت کراوەتەوە: "وەک چۆن هەر لە پاش راپەڕینەوە یەکێتیی نیشتمانیی کوردستان لەسەر ئەرکی خۆی و دواتر لە رێگەی حکومەتی هەرێمەوە هەوڵی بێوچانی خستە گەڕ بۆ گەڕاندنەوەی سیمای ئاوەدانی و پێشکەشکردنی خزمەتگوزاری بە هەڵەبجە و خەڵکەکەی، ئیمڕۆش زیاتر لە جاران و پاش بەڕەسمی ناساندنی هەڵەبجە وەک چوارەمین پارێزگای کوردستان لە لایەن پارلەمان و حکومەتی هەرێمەوە، لەپێناو سارێژکردنی زامەکان و باشتر قەرەبوکردنەوەی زیانلێکەوتوانی تاوانی جینۆسایدکردنی ئەم شارە تێدەکۆشێت."
مەکتەبی سیاسی یەکێتی لەم بۆنە خەمناکەدا تەئکیدی کردووەتەوە کە سەرکردایەتی یەکێتی لە رێگەی فراکسیۆنەکەیەوە لە پەرلەمانی عیراق و تیمی ئیدارەی هەڵەبجە و حکومەتی فیدراڵی، لە هەوڵی بەردەوامدان تاوەکو لە ئەنجومەنی نوێنەران پرۆژە یاسای بەرەسمی ناساندنی هەڵەبجە وەک نۆزدەیەمین پارێزگای عێراق دوا خوێندنەوە و دەنگدانی لەسەر بکرێت و بە پێی یاسا و بنەما دەستورییەکان گشت شایستە و مافەکانی بۆ دابین بکرێت.
لە کۆتایی راگەیەندراوەکەدا هاتووە: "تاوانی کیمیایبارانی هەڵەبجە زامێکی لە بیرنەکراوە. درود بۆ رۆحی شەهیدانی کیمیایبارانی هەڵەبجە و گشت شەهیدانی جینۆسایدی گەلەکەمان.
ئەنجومەنی پشتیوانی یەکێتی نیشتمانی کوردستان لە یادی 37 ساڵەی کارەساتی کیمیابارانی هەڵەبجەدا پەیامێکی بڵاوکردەوە.
لە پەیامەکەدا هاتووە: "ئەمڕۆ یادی گەورەترین تاوانی دەرهەق بە مرۆڤ و مرۆڤایەتی دەکەینەوە ئەویش کیمیابارانکردنی هەڵەبجەیە. ئەو تاوانەی کە پەڵەیەکی ڕەش و شەرمەزارییە بە نێوچاوانی ڕژێمی بەعس و برینێکی قوڵیشە لە جەستەی مرۆڤایەتیدا."
لە بەشێکی دیکەی پەیامەکەدا، ئەنجومەنی پشتیوانی یەکێتی نیشتمانی کوردستان ئاماژەی بەوە کردووە کە لە ساتێکی کەمدا نزیکەی 5000 پێنج هەزار مرۆڤی پەپولە ئاسا کرانە قوربانی ڕق و کینەی ئەو رژێمە خوێنڕێژە، و شارێکیان لە خەندەو پێکەنین نوقمی هاوارو ناڵەی مردن بە گازە ژەهراوییەکان کرد.
پەیامەکە بەم شێوەیە کۆتایی هاتووە: "لەم بۆنە خەمناک و کارەساتبارەدا پەیامی هاوخەمی و ماتەمینی خۆمانتان پێ رائەگەیەنین و لەئاست شەهیدو قوربانیانی ئەو تاوانەدا سۆزو وەفا ئەنوێنین... درود دەنێرین بۆ رۆحی پاکی شەهیدان و قوربانیانی کیمیابارانی هەڵەبجە، دروود بۆ رۆحی پاکی شەهیدان و ئەنفال..."
حاجی مەسیفی، سکرتێری ئەنجومەنی پشتیوانی یەکێتی نیشتمانی کوردستان