کوردستان
لە بەیاننامەیەکدا وەزارەتی دەرەوەی ئەمریکا بڵاویکردەوە، لە گفتوکۆکاندا نوێنەرانی وەزارەتەکانی دەرەوە و گەنجینە و کاروباری تیرۆر و ھەواڵکری ئەمریکا بەشداریان تێدا کردووە.
بە گوێرەی ڕاگەیەندراوەکەی وەزارەتی دەرەوە، گفتوگۆکان بەمەبەستی تەرخانکردنی بڕی سێ ملیار و ٥٠٠ ملیۆن دۆلاری پارە بلۆککراوەکانی ئەفغانستانە، کە لە بانکەکانی ئەمریکادایە، بۆ ئەوەی تەرخانبکرێت بۆ کاروباری مرۆیی و فریاگوزاری ناوخۆیی ئەفغانستان.
گفتوگۆی نێوان تاڵیبان و ئەمریکا لە کاتێکدایە، ھێشتا واشنتۆن بەفەرمی دانینەنانەوە بە دەسەڵاتی بزوتنەوەکەدا، کە لە مانگی ئابی ساڵی ٢٠٢١دا دەستیان بەسەر حوکمی ئەفغانستاندا گرتووەتەوە.
لەئێستادا ئەفغانستان ڕووبەڕووی ڕەوشێکی ئابوری و مرۆیی قورس بووەتەوە، سەرجەم پارەکانی لە دەرەوەی وڵات بلۆککراوە و بەھای دراوی وڵاتەکەش بە تەواوی ھەرەسی ھێناوە.
بەڕێوەبەرایەتی گشتی ھاتوچۆی سلێمانی بڵاویکردەوە، سەر لە بەیانی ئەمڕۆ لە سەر شەقامی چوار ڕیانی سەرچنار بۆ باخی بەختیاری ڕووداوێکی ھاتوچۆ لە نێوان دوو ئۆتۆمبێلدا ڕوویداوە.
ئاماژەی بەوەشکردووە، لە رووداوەکەدا دوو ئۆتۆمبێلی جۆی ( بی ئێم دەبڵیو) و نیسان ئاڵتیما پێکیانداداوە و لە ئاکامدا شۆفێری ئاڵتیماکە گیانی لەدەستداوە.
ڕێکخراوی پزیشکانی بێسنور بڵاویکردەوە، کەشتییەکی سەر بە ڕێکخراوەکەیان ٦٥٩ کەسی لەو کۆچبەرانە ڕزگار کردووە و لە ئێستادا چاوەڕوانن ببرێنە کەنارە ئاوییەکانی ئەوروپا.
ھاوکات ڕێکخراوی مرۆیی سی ۆوچ بڵاویکردەوە، کەشتییەکی سەر بە ڕێکخراوەکەیان ٤٣٨ پەنابەری لە دەریای ناوەڕاستدا ڕزگارکردووە، حکومەتی ئیتالیاش ڕێگەی پێداون لە بەندەرێکی وڵاتەکە لەنگەر بگرێت، بۆ ئەوەی کۆمەکی فریاگوزارییان پێ بگەیەندرێت.
وەزارەتی ناوخۆیی ئیتالیاش بڵاویکردەوە، لەسەرەتای ئەمساڵەوە نزیکەی ٣٩ ھەزار پەنابەری نوێ لەڕێی دەریای ناوەڕاستەوە توانیویانە خۆیان بگەیەننە ھەردوو دوورگەی لامبیدوسا و سقلیەی ئەو وڵاتە.
کەمال عاکیف وتەبێژی فەرمانگەی پەیوەندییەکانی دەرەوەی بەڕێوەبەرێتی خۆسەر لە راگەیەنراوێکدا بڵاویکردەوە، ھەندێک لایەن ھەواڵێکیان بڵاوکردوەتەوە سەبارەت بە ئەنجامدانی دیدار و رێککەوتن لە نێوان بەڕێوەبەرێتی خۆسەر و حکومەتی سوریا، ھەندێکی تریش زیاتر لەوە رۆشتوون و باسیان لە مەرج و خاڵی ناکۆکی لە دیدارەکاندا کردووە، وتیشی، ھەموو ئەو ھەواڵ و پڕوپاگەنانەی لەوبارەوە بڵاودەکرێتەوە راست نیین و بوونی ھێزەکانی سوریاش لە منبج و کوبانێ لە چوارچێوەی رێکەوتنی ساڵی ٢٠١٩دایە.
لە دوای ھەڕەشەکانی تورکیا بۆ ئەنجامدانی ئۆپراسیۆن لە ناوچەکانی منبج و تەلڕەفعەت لە باکوری حەلەب، ھێزەکانی سوریا لەو شوێنانەی پێشتر بە رێککەوتن لەگەڵ ھێزەکانی سوریای دیموکراتی ھەبوون، خۆیان توندوتۆڵ کردووە و چەک و کەرەستەی سەربازی زیاتریان رەوانەی ئەو شوێنانە کرد.
دەقی پەیامەکە...
بەبۆنەی ھاتنی ساڵی نوێی کۆچی (١٤٤٤) ،پیرۆزبایی گەرمی خۆمان ئاراستەی سەرجەم موسڵمانانی کوردستان و عێراق و جیھان دەکەین ، لەیەزدانی مەزن داواکارین ساڵی نوێ ببێتە مایەی خێر و خۆشی بۆ ھەموو لایەک و ھەروەک ھیواخوازین گشت ئاستەنگەکان تێپەڕێنین و بە یەک ڕیزی نێوان خەڵک و ھێز و لایەنە سیاسیەکان لەساڵی ئایندە خۆشگوزەرانی و سەقامگیری زیاتر بۆ گەلەکەمان بێتەدی.
مەکتەبی سیاسی
یەکێتیی نیشتیمانیی کوردستان
دەقی پەیامەکە...
بە بۆنەی ھاتنەوەی ساڵی نوێی کۆچییەوە، پیرۆزباییەکی گەرم ئاڕاستەی موسڵمانانی کوردستان، عێراق و جیھان دەکەم.
ھیوادارم ھەموومان پێکەوە ئەم دەرفەتە بکەینە بۆنەیەک بۆ قووڵکردنەوەی گیانی تەبایی، پێکەوەژیان و کاری پێکەوەیی لەپێناو سەربەرزیی خەڵکی کوردستان و پاراستنی خاکەکەمان.
بافڵ جەلال تاڵەبانی
سەرۆکی یەکێتیی نیشتمانیی کوردستان
بەھمەن قادر وتەبێژی بەنزینخانەکانی سلێمانی بە کوردسات نیوزی راگەیاند، بڕیاری کەمکردنەوەی نرخی بەنزین دراوە، بەڵام ئێوارەی ئەمڕۆ کەمکردنەوەی نرخەکە دەچێتە بواری جێبەجێکردنەوە.
وتیشی، تائێستا بڕیار نەدراوە نرخی بەنزین چەند کەمبکرێـتەوە، بەڵام بەشێوەیەکی گشتی بڕیار لەسەر کەمکردنەوەی نرخەکە دراوە.
ئەوەش لە کاتێکدایە رۆژی پێنجشەممەی رابردوو نرخی لیترێک بەنزینی نۆرماڵ لە ھەزار و ٣٥٠ دینارەوە کەمکرایەوە بۆ ھەزار و ٣٠٠ دینار، بەنزینی موحەسەنیش لە ھەزار و ٤٧٥ دینارەوە بۆ ھەزار و ٤٥٠ دینار کەمکرایەوە.
"مونا یاقوو"سەرۆکی دەستەی مافی مرۆڤی ھەرێم لە پەیجی تایبەتی خۆی لە فەیسبووک رایگەیاندووە، بۆ گفتوگۆکردن سەبارەت بەڕەوشی مافی مرۆڤ و پێشێلکاری و شێوازی مامەڵەکردن و ئەو کێشانەی ڕێگرن لە پێش کاری دەستەکەیان، زیاتر لە پێنج مانگ لەمەوبەر، داوای چاوپێکەوتنی سەرۆک وەزیرانی ھەرێمی کردووە، بەڵام تائێستا وەڵامی داواکارییەکەی نەدراوەتەوە.
راشیگەیاندووە، دامەزراوەیەک گوایە سەربەخۆیە، ناتوانێت سەرکەوتوبێت لەکارەکانیدا، پۆستە ھەستیارەکان تیایدا درابێتە کەسانێکی حیزبی خاوەن باکگراوندێکی سیاسی، ئەو جۆرە ڕاسپاردنە بەڵگەیە لەسەر خواستی دەسەڵات بۆ ئیفلیجکردنی کاری ئەو دەزگایانە و بە دیکۆرکردنی.
سەرۆکی دەستەی مافی مرۆڤ جەختی لەوەشکردووەتەوە، کارکردن لە بواری مافی مرۆڤدا کارێکی ئەخلاقییە و پەیوەستە بە ویژدانی تاکەوە، بۆیە دەبێت گرنگی بە بەرژەوەندی ھەر کەسێک بدرێت کە مافی پێشێل کرابێت، بەبێ گوێدان بە مەیلی سیاسی و ئاین و نەتەوەیی.
کونسوڵخانەی ئەمریکا لە ھەولێر لە راگەیەنراوێکدا ئاماژەی بۆ ئەوەکردووە، ھێزی سەربازیی ئەمریکا لە نزیکەوە لەگەڵ وەزارەتی پێشمەرگەدا لە کاردایە بۆ دڵناییدان لەوەی پێشمەرگە کەلوپەلی دروستیان لە بەردەستدایە بۆ بەرەنگاربوونەوەی ھەڕەشەی تیرۆریستانی داعش.
راشیگەیاندووە، رۆژی چوارشەممە ھێزی پێشمەرگە ژمارەیەک پێداویستی سەربازییان لە ھێزەکانی ئەمریکا وەرگرتووە، ئەوەش پابەندبوونی ئەمریکایە بۆ ئاسایشی ھەرێمی کوردستان.
ھاوکار جەلال بەرێوەبەری دارستان و پاوانی سلێمانی لەلێدوانێکیدا رایگەیاند دەستیان بەھەڵمەتەکانیان کردووە بۆ رێنمایی کردنی ھاوڵاتی و گەشتیاران سەبارەت بەقەدەغەی ئاگرکردنەوە لەسەر سنوری دارستانەکانی گۆیژە و ئەزمڕ، وتیشی بەرێوەبەرایەتی گەشتوگوزاری سلێمانی ھەموو کۆشکەکانی ئاگادارکردۆتەوە کەبەپێی رێوشوێنەکانی پێدانی مۆڵەتەکانیان دەبێ تا کاتژمێر ١١ کراوەبن و دواتر دایبخەن.
ھاوکار جەلال راشیگەیاند بڕیاری قەدەغەی ئاگرکردنەوە چۆتە بواری جێبەجێکردنەوە و رێگە بەھیچ کەسێک نادەن خەڵوز و مقەڵی دابنێت و ئاگر بکاتەوە و تیمەکان بەردەوام دەبن لەچاودێری کردن، وتیشی بڕیاری قەدەغەکردنی مانەوە لەسەر سنوری گۆیژە و ئەزمڕ جێبەجێکراوە و رێگە بەھیچ کەسێک نادرێت لەسەر ئەو چیایە رۆژ بکاتەوە.
بەرێوەبەری دارستان و پاوانی سلێمانی داوایکرد لە ھاوڵاتیان و گەشتیاران زیاتر پابەندی ئەو بڕیارانە بن بەتایبەت لەرۆژانی پێنج شەممە و ھەینیدا و ھاوکاری تیمەکان بن و ئاگر نەکەنەوە و بزانن کەکێشانی نێرگەلە قەدەغەیە بەھۆی مەترسییەکانی بونی پشکۆ و خەڵوزی گەشاوە لەسەر دارستانەکە.
ھاوکارجەلال بەرێوەبەری دارستان و پاوانی سلێمانی ئاماژەی بەوەکرد کەخۆشبەختانە ئێستا ھاوڵاتیان ھاوکارمانن بۆ جێبەجێکردنی ئەو بڕیارانە و پەرۆشن بۆ پاراستنی دارستانەکان و ژینگە.
"سیراج بارزانی"سەرۆکی ئەنجوومەنی گشتی ڕاژەی حکومەتی ھەرێمی کوردستان ڕایگەیاند، کابینەی نۆیەم گرنگییەکی زۆری بە بەرزکردنەوەی ئاستی داھات و کەمکردنەوەی خەرجییەکان داوە بۆ ئەوەی بگاتە ئاستێک کە بتوانێت دووبارە دەرگای دامەزراندن بکاتەوە.
راشیگەیاند، حکومەتی ھەرێم پێداچوونەوە بە میلاک و ڕاژەی فەرمانبەران دەکات و ژمارەی فەرمانبەرانیش بەپێی پێداویستی ڕاستەقینەی فەرمانگەکانی حکومەت دیاریدەکرێت بۆ ئەوەی باشترین خزمەت بە کەمترین تێچوو پێشکەش بکەن.
سەرۆکی ئەنجوومەنی گشتیی ڕاژە دڵنیایی دایە فەرمانبەران کە گواستنەوەیان بەپێی ڕٍاوێژ لەگەڵ خۆیان دەبێت.
دەقی پرسەنامەکە...
ھەڤاڵ کاک سەعدی ئەحمەد پیرە، ئەندامی مەکتەبی سیاسیی یەکێتیی نیشتمانیی کوردستان.
بۆ کۆچی دوایی خاتوو (مامز عەبدوڵا) دایکی بەڕێزتان، پرسە و ھاوخەمی قووڵی خۆمان ئاڕاستەی ئێوە، کەسوکار و بنەماڵە سەربەرز و تێکۆشەرەکەتان دەکەم.
لەخوای گەورە داواکارم رۆحی کۆچکردوو بەبەھەشتی بەرین شاد بکات و سەبووری بەھەموولایەک ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
٢٨ی تەممووزی ٢٠٢٢ - بەغدا
دەقی پرسەنامەکە...
بەڕێز کاک سەعدی ئەحمەد پیرە
بەرێزان خێزان و خانەوادەی کۆچکردوو
بەبیستنی ھەواڵی کۆچی دوایی خاتوو (مامز عەبدوڵا)ی دایکی ئازیزتان، نیگەران و دڵگران بووم.
کۆچکردوو خانمێکی وورەبەرز و نیشتمانپەروەر، پشت و پەنای پێشمەرگە بوو، لەژیانیدا زەحمەتێکی زۆری بینی بەلەئامێزگرتنی ڕۆڵە گیانفیدا و پێشمەرگە و نیشتمانپەروەرەکانییەوە، کۆچکردنیشی جێگای داخێکی گەورەیە.
بەم بۆنە غەمناکەوە پرسە و سەرەخۆشی ئاراستەی خۆتان و خانەوادە سەربەرزەکەتان دەکەم و ھیواخوازم ئەمە دوا ناخۆشیتان بێت.
خوای گەورە لە دایکی بەڕێزتان خۆش بێت و جێگای بەھەشت بێت، سەبوری و دڵنەواییش بەھەموو لایەک ببەخشێت.
انا للە و انا الیە راجعون
قوباد تاڵەبانی
سەرپەرشتیاری مەکتەبی سکرتاریەتی سەرۆک مام جەلال
دەقی بەیاننامەکە...
بەیاننامەی مەڵبەندی کەرکوک، لە(١٤)ـمین ساڵیادی شەھیدانی (٢٨)ـی تەمووز :-
کەسوکار و خانەوادەی سەربەرزی شەھیدان ...
ھاوڵاتیانی خۆراگری کەرکوک ...
لە رۆژێکی وەکو ئەمڕۆدا و (١٤) ساڵ بەر لەئێستا، کاتێک کۆمەڵانی خەڵکی کەرکوک، لە ڕێگای خۆپیشاندانێکی شارستانی و مەدەنیانەوە، ھەڵوێستی خۆیان دژی پڕۆژە یاسای ژمارە (٢٤) لە یاسای ھەڵبژاردنی ئەنجومەنی پارێزگاکانی ژمارە (٣٦)ـی ساڵی (٢٠٠٨) دەردەبڕی کە دەویسترا لەلایەن شۆڤێنیەکانی پەرلەمانی عێراقەوە دۆخی سیاسی و دیموگرافیای کەرکوک بگەڕێندرێتەوە بۆ سەردەمی حزبی بەعسی رووخاو.
بەڵام بەداخەوە تاریکپەرستانی دژ بە میلەتەکەمان لە کردەوەیەکی ترسنۆکانەی تیرۆرستیدا، دەستیان چووە خوێنی ئاڵی (٢٤) ھاوڵاتی بێتاوانی کەرکوک کە (٩) کەسیان لە توێژی مامۆستایان بوون، کە دواتر وەک ھەمیشە کۆچکردوو سەرۆک مام جەلال، لە دژی ئەو پرۆژە یاساییە ڤیتۆی بەکارھێنا رێگربوو لە پیلانی شۆڤێنیەکان.
لەم یادە پر خەم و ئازارەدا، جارێکی دیکە سەری رێز و نەوازش بۆ شەھیدانی (٢٨)ـی تەمووز دادەنوێنین، کە بە دروشمی (ئێمە لێرە ناڕۆین) دژی ئەوپیلانە وەستانەوە و
بەڵێنی وەفایان بۆ دووپاتدەکینەوە کە درێژەپێدەری رێبازەکەیان بین و رێگەنەدەین بەعسی و شۆڤێنیەکان مەرامی گڵاوی خۆیان بۆ بچێتەسەر.
ھەروەک لەم یادەدا، دۆخی کەرکوک و ھەرێم و عێراق و ناوچەکەش، وامان لێدەخوازێت یەک دەنگ و یەکگرتووبین بۆ بەدەستھێنانی مافی ڕەوای میلەتەکەمان و دژی سەرجەم پیلانەکان بوەستینەوە.
سڵاو لە رۆحی پاکی شەھیدانی (٢٨)ـی تەمووزی ساڵی (٢٠٠٨) و سەرجەم شەھیدانی رێگای ئازادی میلەتەکەمان.
ڕەوەند مەلا مەحمود
لێپرسراوی مەڵبەندی (٢)ی رێکخستنی کەرکوکی (ی.ن.ک)
لە بیرەوەری (١٤)مین ساڵەی خۆپیشاندانە خوێناوییەکەی کەرکوک ئاسۆ مامەند پەیامێک بڵاو دەکاتەوە
کۆمەڵانی خەڵکی کوردستان..!
کەرکوکییە دڵسۆز و خۆڕاگرەکان..!
لە (٢٨)ی تەمووزی ساڵی (٢٠٠٨) دەیان ھەزار ھاووڵاتی کەرکوک خۆپیشاندانێکی ھێمنانە و مەدەنیانەیان لە شارەکەیان رێکخست بۆ پاراستنی مافە دەستورییەکانیان، بەڵام بە داخەوە ئاکامەکەی کۆمەڵکوژکردنی ھاوڵاتییان و خوێناویکردنی شارەکەی لێکەوتەوە.
لە (٢٢)ی تەمموزی ساڵی (٢٠٠٨) سەرۆکی ئەوکاتی پەرلەمانی عیراق، پڕۆژە یاسای ھەڵبژاردنی پارێزگاکانی خستە بەردەم ئەندامانی پەرلەمانی عیراق بۆ ئەوەی دەنگی لەسەر بدەن، لە ناو پڕۆژە یاساکەدا مادەی (٢٤) بوونی ھەبوو کە سەرلەبەری دژی مادەی (١٤٠)ی دەستووری ھەمیشەیی عیراق بوو!
لە دانیشتنەکەدا بێجگە لە نوێنەرانی کورد، نزیکەی تەواوی ئەوانەی کە لە ھۆڵی پەرلەماندا ئامادەییان ھەبوو دەنگیان بە یاساکەدا، ئەو کاتە ژمارەی ئەندامانی پەرلەمان ( ٢٧٥) کەس بوو، بە پێی پێڕەو دەبوو بۆ ھەر یاسایەک سێ لە سەر پێنجی ئەندامانی پەرلەمان ئامادەییان ھەبێت، ھەر چەندە ئەو ژماریە ئامادە نەبوو ھەروا نوێنەرانی کوردیش ھۆڵی پەرلەمانیان جێھێشت.. بەڵام (١٤٢) پەرلەمانتار لە ھۆڵەکەدا مانەوە، لەو ژمارەیەش ( ١٢٧) ئەندامیان دەنگیان بە یاساکەدا.!
بە دەنگدان بەو پڕۆژە یاسایەش، ھیچ بەھایەک بۆ مادەی (١٤٠)ی دەستووری ھەمیشەیی نەمایەوە، چونکە مادەی (٢٤) بە ھەمان نەفەس و سیاسەتی سەردەمی حزبی بەعسی ھەڵوەشاوە نووسرابووەوە!
ناوەڕۆکی یاسای (٢٤) ھەڕەشەیەکی گەورە بوو بۆ سەر کورد و دۆزەکەی، ھەروا مەترسییەکی جددییش بوو بۆ سەر دانیشتوانی کوردی کەرکوک.
لە ناو پرۆژە یاساکەدا چەند بڕیارێک ھەبوون کە زۆر مەترسیدار بوون، لەوانە؛ دانیشتوانی قەزاو ناحییەکانی بێبەش دەکرد لە ئەنجامدانی ھەڵبژاردن لەو پارێزگایە، ھەروا جەختی لەوە دەکردەوە کە دەسەڵاتەکانی پارێزگای کەرکوک بە گوێرەی ٪٣٢ لە نێوان ھەر سێ پێکھاتەی (عەرەب، کورد و تروکمان) دابەش بکرێت، و لە ٪٤یش بۆ مەسیحییەکان. ئەم برگەیەش دژی دیموکراسی و ئیستحقاقەکانی ھەڵبژاردن بوو کە کورد بەردەوام زۆرینەی مسۆگەر بووە لەو پارێزگایەدا، چونکە ڕێژەی دانیشتوانی کورد لە کەرکوک ھیچ کات لە ٪٥٠ کەمتر نەبووە، ئەمە وێڕای ئەوەی کە زیاتر لە (٣٥) ساڵ رووبەڕووی پڕۆسەی تەعریب و تەرحیل و تەھجیر بووبوونەوە! ھەروەھا لە خاڵی پێنجەمی ئەو پرۆژە یاسایەدا چەند بڕگەیەکی مەترسیداری تێدا بوو سەبارەت بەو ماڵە ئاوارە کوردانەی کە لە دوای ساڵی (٢٠٠٣)وە گەڕابوونەوە کەرکوک و لەسەر ماڵ و حاڵی خۆیان گیرسابوونەوە، بەڵام ئەو پڕۆژە یاسایە ماڵ و خانووەکانی ئەو کوردانەی بە تەجاوز و نافەرمی ئەژمار کردبوو..! لەوەش مەترسیدار تر، رادەستکردنی مەلەفی ئەمنی پارێزگاکە بوو بە ھێزە سەربازییەکان، و بێبەش کردنی ھێزە ئەمنییە خۆجێیەکان لە بەڕێوەبردنی مەلەفی ئەمنی پارێزگاکەیاندا.
لە بەر ئەو ھۆکارانە کەرکوکییەکان و سەرکردایەتی سیاسی کوردستان، ئەو پرۆژە یاسایەیان بە مەترسی زانی بۆ سەر داھاتووی کەرکوک و پرسی کورد لەو پارێزگایە، لەو سۆنگەیەوە کارادانەوەی فراوانی لەسەر ئاستی جەماوەری و حزبی لێکەوتەوە.
دوای ئەوەی پیلانگێڕان لە ناو پەرلەمانی عێراق بە شێوازێکی نایاسایی ئەو پرۆژە یاسایەیان تێپەڕاند، لە (٢٨)ی تەمموزی ساڵی (٢٠٠٨) ھاوڵاتییانی دلێر و خۆڕاگری کەرکوک، ھاتنە دەرەوە و بڕیاری خۆپیشاندانیان دا٫ بە دەم ھوتاف کێشان و رەتکردنەوەی مادەی (٢٤) چوونە بەردەم بینای پارێزگای کەرکوک کە ژمارەیان زیاتر لە (١٥٠) ھەزار ھاووڵاتیی بوو.
بەڵام بە داخەوە زۆری نەخایاند دەستی رەشی تیرۆر و پیلانگێڕان! گەیشتە خوێنی ئاڵی خۆپێشاندەران و بە ھۆیەوە دەیان ھاووڵاتیی بێتاوانی کورد شەھید و بریندار بوون، کە بەشێکی شەھیدەکان لە توێژی مامۆستایان بوو.
لە سەروئانی کاردانەوەکان لە دژی یاسای ژمارە (٢٤)ی ھەڵبژاردن، رەوانشاد سەرۆک مام جەلال سەرۆک کۆماری ئەو کاتی عێراق، وەک پارێزەری ھەمیشەیی پرسی کورد و کەرکوکییەکان لە بەغدا، ئەو یاسایەی (ڤیتۆ) کردو رێگەی نەدا جێبەجێ بکرێ، و خەونی گڵاوی پیلانگێڕان بەدیی بھێنرێ.
لەم یادەدا.. سڵاو لە سەرۆک مام جەلال و شەھیدانی ٢٨ی تەمموز و سەرجەم شەھیدانی رێگەی کوردستان!
ھەر شەکاوە بێت ئاڵای کوردستان!
ئاسۆ مامەند
سەرپەرشتیاری کەرکوک-سەڵاحەدینی یەکێتیی نیشتمانیی کوردستان
بەڕێوەبەرایەتی پۆلیسی پارێزگای سلێمانی رایگەیاند، دوای ئەوەی زانیاری گەیشتە دەست بەڕێوەبەری پۆلیسی پارێزگای سلێمانی کە دوو ھاوڵاتی ئێرانی لەلایەن پێنج تۆمەتبارەوە ڕفێنراون و لەبەرامبەر ئازادکردنیان داوای چوار ملیار تمەنیان لێ دەکرێت، دەستبەجێ بەشی پۆلیسی سەیدسادقی ڕاسپارد و زانیاری تەواوی پێدان لەسەر شوێنی تۆمەتباران کە ئەو دوو ھاوڵاتیەیان ڕفاندووە.
دەشڵێت، دوای بەدواداچوون و لێکۆڵینەوەکان توانرا شوێنی تۆمەتباران لە قەزای سەیدسادق بدۆزرێتەوە و ڕفێندراوەکان ئازادبکرێن و سەرجەم تۆمەتباران دەستگیربکرێن کەژمارەیان پێنج تۆمەتبارە.
ئاماژەی بەوەشکردووە، لەئێستادا تۆمەتباران ( ف، ح ، ع) لەدایکبووی ١٩٩٣، ( ن، ح ، ع) لەدایکبووی ٢٠٠٢، (ە ، م، ح ) لەدایکبووی ١٩٩٥، ( ا ، ح ، م ) لەدایکبووی ٢٠٠٢ ،( ز ، ع ،ع ) لەدایکبووی ١٩٩٩ بەبڕیاری دادوەرو بەپێی ماددەی ٤٢١ لەیاسای سزادانی عیراقی ڕاگیراون و لێکۆڵینەوە لەگەڵیان بەردەوامە.