کوردستان
د. نەرمین مەعروف، ئەندامی لیژنەی دارایی لە ئەنجومەنی نوێنەرانی عێراق بە کوردسات نیوزی راگەیاند، شەوی رابردوو لیژنەکەیان دەنگیدا لەسەر رەشنووسی کۆتایی ژمارەیەک ماددەی پڕۆژەیاسای بودجە، بەشێک لە ماددەکانی دیکەش ماون و لە دوو رۆژی داھاتوودا پەسەنددەکرێن.
وتیشی، چاوەڕێدەکرێت رۆژی ھەینی یاخود شەممەی داھاتوو لیژنەکەیان راپۆرتی کۆتایی خۆی لەسەر پڕۆژەیاسای بودجە ئامادەبکات و پێشکەش بە سەرۆکایەتی پەرلەمانی بکات.
بەگوێرەی رێککەوتنی نێوان لایەنەکانی ھاوپەیمانی بەڕێوەبردنی دەوڵەت، پێویستە لەنێوان ١٧ تا ٢٠ـی ئەم مانگە ئەنجومەنی نوێنەران یاسای بودجە پەسەند بکات.
ئاسۆ کەمال، بەڕێوەبەری کەشناسی و بومەلەرزەزانی سلێمانی بە کوردسات نیوزی ڕاگەیاند، ئەم بایەی کە ئێستا ڕووی لە سلێمانی کردووە، خێراییەکەی حەوت بۆ ھەشت مەتر لە چرکەیەکدا بووە ، کە دەکاتە ٣٠ کیلۆمەتر لە سەعاتێکدا، بە ئاڕاستەی باکوری ڕۆژھەڵات کاریگەری ھەبووە لەسەر ناوچەکە، لە کاتەکانی ئێوارەشدا خێراییەکەی کەمتردەبێتەوە و چالاکیەکەی کەمدەبێتەوە، بۆ سبەینێ چوارشەمەش ئەگەری ھەیە لە کاتەکانی نیوەڕۆوە چالاک ببێتەوە.
ئاماژەی بەوەشدا، پلەکانی گەرما نزمە بەراورد بە تێکڕاییەکانی کە نزمترین پلەی گەرمی ئەمڕۆ ١٧ پلەیە و بەرزترین پلەش ٢٨پلەیە ، کە بۆ مانگی ئایار ئەم پلەیە نزمە بەراورد بە مانگی ئایاری ساڵی پار، ئەوەش بەھۆی کاریگەری ئەو بارستە ھەوا ساردەی کە ئێستا لەسەر ناوچەکە ھەیە.
بەڕێوەبەری کەشناسی سلێمانی ڕاشیگەیاند، بۆ ڕۆژانی داھاتوو پلەکانی گەرما بە شێوەی پلە پلە ڕوو لە بەرزبوونەوە دەکات، بەڵام ھەر نزیکە لە ئاستی تێکڕاییەکان، واتە بەشێوەیەکی بەرچاو پلەکانی گەرما بەرز نابێتەوە کە ھەست بە گەرمییەکی زۆر بکرێت.
دەقی پرسەنامەکەی قوباد تاڵەبانی....
ھەڤاڵی بەڕێز کاک بورھان سعید سۆفی*
بەڕێزان خێزان و خانەوادەی کۆچکردوو خانێ ئیبراھیم
بەبیستنی ھەواڵی کۆچی دوایی خاتوو (خانێ ئیبراھیم)ی دایکی هەردوو ھەڤاڵی بەڕێزمان کاک نەهرۆ سەعید سوفی و بورھان سەعید سۆفی، نیگەران و دڵگران بووم. کۆچکردوو خاتوو خانێ خانمێکی نیشتمانپەروەر و لەبنەماڵەیەکی تێکۆشەر و جوامێری کوردایەتی بوو، پشتگیر و پشتیوانی شۆڕش و پێشمەرگە بوو و لەو پێناوەشدا نەھامەتی و دەردەسەری زۆری بەسەر ھاتووە، کۆچکردنی جێگای ئەسفی ھەموومانە.
بۆ ئەم خەمە پرسەو سەرەخۆشی لە کەسوکار و بنەماڵە تێکۆشەرەکەتان دەکەم. خوای گەورە لەکۆچکردوو خۆش بێت و جێگای بەھەشت بێت، سەبوری و دڵنەواییش بەھەموو لایەک ببەخشێت.
انا للە و انا الیە راجعون
قوباد تاڵەبانی
وەزارەتی دەرەوەی ئەمریکا راپۆرتی ساڵانەی خۆی بۆ ساڵی ٢٠٢٢ لەبارەی ئازادی ئاینی بڵاوکردەوە و ئاماژەی بەوەکرد، ساڵانێکی زۆرە ئازادیی پەیڕەوکردنی ھەموو جۆرە ئایینەکان لەلایەن ھەموو پێکھاتەکانەوە لە ھەرێمی کوردستان رێگەپێدراوە، بەڵام لەدەرەوەی سنوری ئەو ھەرێمە لە عێراقدا بە تایبەتیش لەلایەن ھێزە ئەمنییەکان و حەشدی شەعبی پەیڕەوکردنی ئایینەکانیان لە پێکھاتەکانی تر سنوردارکردوە رێگایان پێنادەن.
ئاماژەشی بەوەشکردووە، شەری مەزھەبی گروپە چەکدارەکان لەسەرانسەری عێراق بەردەوامە بێجگە لە ھەرێمی کوردستان نەبێت.
وەزارەتی دەرەوەی ئەمریکا بۆ ئەم راپۆرتە پشتیبەستووە بە سەرکردە ئاینییەکان و رێکخراوە ناحکومییەکان، بە پێی وتەی ئەوان ھێزە ئەمنییەکانی عێراق کەمیینەکانی ئەو وڵاتەیان ھەراسانکردووە.
پرسەنامەکەی سەرۆک بافڵ .....
کۆچی دوایی خاتوو (خانێ ئیبراھیم ئەحمەد) دایکی ھەڤاڵ نەهرۆ سەعید سۆفی تێکۆشەری دێرین و بورھان سەعید سۆفی ئەندامی مەکتەبی سیاسی و شەھید سەردار سەعید سۆفی لە دڵەوە نیگەرانی کردین.
بۆ ئەم خەمە گەورەیە پرسە و ھاوخەمی قووڵی خۆمان ئاڕاستەی کەسوکار و خانەوادە سەربەرزەکەی دەکەین کە نموونەی دڵسۆزی و تێکۆشانن لەپێناو گەلەکەمان.
خاتوو خانێ نموونەی ژنی ئازا و خۆڕاگری کورد بوو، بەھۆی دڵسۆزی و بەشدارییە کاریگەرەکەیان لە خەبات و شۆڕشی نوێدا ناڕەحەتی زۆریان چەشت. بەڵام ھەرگیز لەرێگە راستەکەی خەبات لاینەدا و تاوەکو ماڵئاواییکردنیشی سەربەرزانە و بۆ کوردستان ژیا.
لەخوای گەورە داواکارم کۆچکردوو بە بەھەشتی بەرین شاد بکات و سەبووری بەھەموولایەک ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
دەقی پرسەنامەکەی کۆسرەت رەسول....
برایانی بەڕێزم کاک نەھرۆ سەعید سۆفی و مام زیاد حاجی ئیبراھیم قەراجی
بەداخێکی زۆرەوە ھەواڵی کۆچی دوایی (حاجی خانێ حاجی ئیبراھیم) دایکی بەڕێزتان و خێزانی مام سەعید سۆفی-م بیست، دڵگران و خەمباری کردم، ھاوبەشی خەمتانم.
حاجی خانێ ژنێکی قارەمان و تێکۆشەر بوو، منداڵەکانی بە ھەستی کوردانەو خەباتگێڕانە پەروەردە کرد، لەپێناو کوردایەتی زیندانەکانی بەعسی بینی و ئەشکەنجەو ئازار درا، بەداخەوە بۆ لەدەستدانی.
بۆ ئەم کۆستەو لەدەستدانی ئەم ژنە تێکۆشەرە پرسەو سەرەخۆشی و ھاوخەمی خۆمتان ئاراستە دەکەم، ھیواخوازم ئەمە دواکۆست و ناخۆشیتان بێت، خوای گەورە سەبووری ھەموو لایەک بدات و کۆچکردوو جێگای بەھەشتی بەرین بێت.
کۆسرەت رەسول عەلی
سەرۆکی ئەنجومەنی باڵای سیاسی و بەرژەوەندی
یەکێتیی نیشتمانیی کوردستان
لە دوای کۆبوونەوەکە مەکتەبی سیاسی یەکێتی و پارتی راگەیەندراوێکی ھاوبەشیان بڵاوکردەوە و تیایدا ئاماژەیان بەوەکردووە، ھەردوولا وێرای بەرزنرخاندنی دەستپێشخەری مەسعود بارزانی کە لەکاتی پێویستدا ھات، ھەردوولا ھاوڕابوون پێکەوە لەگەڵ لایەنەکانی دیکە ھەنگاوی کرداری بنرێت بۆ بەپیرەوەچوونی ئەو دەستپێشخەرییە و ناوماڵی کوردستانی پێڕێکبخرێتەوە و لاپەرەیەکی نوێ لە کۆی پەیوەندیەکان بکرێتەوە.
ئاماژە بۆ ئەوەشکراوە، ھەردوولا دەستخۆشی لە ئەنجومەنی وەزیرانی ھەرێم دەکەن، بۆ پەسەندکردنی پرۆژەی رێکخستنەوەی دارایی کە پرۆژەی تێکڕای لایەنەکانی پێکھێنەری کابینەی نۆیەمە و ھەردوو مەکتەبی سیاسی بە تەواوی پشتیوانی لێدەکەن.
ھەروەھا ھەردوولا پەرۆش و ھاوڕابوون لەسەر بەھێزکردنی قەوارەی دەستوریی ھەرێم و پەرەپێدانی پەلەکردن لە ھەنگاوە یاسایی و سیاسییەکان بۆ فەراھەمەکردنی ئەنجامدانی ھەڵبژاردنی پەرلەمانی کوردستان لەوادەی خۆیدا لەمساڵدا، خوازیاری ئەوەشن ھەموو لایەک ھاوکاربن لەبەردەوامی کەشی برایەتی و کاری پێکەوەیی و نەھێشتنی کەلێنەکانی رابردوو .
لە کۆتای راگەیەنراوەکەشدا یەکێتی و پارتی ئەوەشیان خستووەتەڕوو، بڕیاریانداوە وەک یەک تیم کاربکەن و زنجیرەیەک کۆبوونەوەی دیکەش ئەنجامبدرێت بۆ فەراھەمکردنی کەشوھەوای لەبار لە ڕووی یاسایی و سیاسییەوە بۆ ئەنجامدانی ھەڵبژاردن و ڕوبەڕوبوونەوەی ئەو تەحەدیاتانەی لەناوچەکەدا ھەیە .
د. ڕێواز فایەق، سەرۆکی پەرلەمانی کوردستان لە میانەی کۆبوونەوەی لەگەڵ ڤیللی ڤارجیولا باڵیۆزی یەکێتیی ئەوروپا لە عێراق رایگەیاند، ھەوڵەکانیان چڕکردووەتەوە بۆ بەرەوپێشبردنی ھەنگاوەکان و گەیشتن بە ڕێککەوتنی کۆتایی لایەنە سیاسییەکان لەسەر پرسی ھەڵبژاردنەکان.
وتیشی، رێکارە یاساییەکانی کاراکردنەوەی کۆمیسیۆن تەواوکراون، چاوەڕوانن لە دەرفەتێکی نزیکدا لایەنەکان لەسەر ھەموارکردنەوەی یاسای ھەڵبژاردنەکانیش بگەنە ڕێککەوتن.
ھاوکات لە کۆبوونەوەکەدا سەرۆکی پەرلەمانی کوردستان و باڵیۆزی یەکێتی ئەوروپا لە عێراق جەختیانکردووەتەوە لەوەی کە پێویستە پەلەبکرێت لە ئامادەکارییەکان و گەیشتن بە داڕشتنی کۆتایی لەسەر کۆی ئەو پرسانەی تائێستا بوونەتە لەمپەر لەبەردەم پڕۆسەی ھەڵبژاردن.
وەزارەتی خوێندنی باڵا و توێژینەوەی زانستی حکومەتی ھەرێم رایگەیاند، بڕیاریانداوە بە درێژکردنەوەی ماوەی پێشکەشکردن و دواخستنی وادەی ئەنجامدانی تاقیکردنەوەی توانستی زانستی بۆ سەرجەم خوزایاران و پێشکەشکارانی خوێندنی باڵا بۆ دکتۆرا و ماستەر و دبلۆمی باڵا لە سەرجەم زانکۆکانی ھەرێمی کوردستان.
بەپێی بڕیارەکە، ماوەی پێشکەشکردن بۆ خوێندنی باڵا لە رۆژی پێنجشەممە رێککەوتی ١٨ی ٥ی ٢٠٢٣ تاکو رۆژی یەکشەممە کە دەکاتە ٦ی ٤ی ٢٠٢٣ درێژکرایەوە.
ھەر بەپێی بڕیارەکە کاتی تاقیکردنەوەی توانستی زانستیی لە رۆژی دووشەممە ٢٩ی ٥ی ٢٠٢٣ بۆ رۆژی دووشەممە رێککەوتی ١٢ی ٦ی ٢٠٢٣ دوادەخرێت و دەستپێکی خوێندنی ئەکادیمیش دەکەوێتە مانگی ئەیلولی ئەمساڵ.
کونسوڵخانە و نوێنەرایەتییەکانی بەریتانیا، ئەمریکا، ئەڵمانیا، ھۆڵەندا، کەنەدا، یەکێتی ئەوروپا، فەڕەنسا، چیک، یۆنان، ئیتالیا، بولگاریا، پۆلەندا و رۆمانیا دەستخۆشی لە حکومەتی ھەرێم ء پەرلەمانی کوردستان و خەڵکی کوردستان دەکەن لە پابەندبوونیان بە بنەما و بەھا دیموکراسییەکان و پێشوازیکردن لە رۆحی نوێبونەوەی ھاوکاری لایەنەکان.
داوا لە حکومەتی ھەرێم و پەرلەمانی کوردستانیش دەکەن ھەنگاوی پێویست بنێن بۆ ئەنجامدانی ھەڵبژاردنەکانی ھەرێمی کوردستان بەبێ دواخستن.
کونسوڵخانە و نوێنەرایەتییە دییلۆماسییەکان جەخت لە گرنگی ھەڵبژاردنی ئازاد و دادپەروەوانە دەکەنەوە و داوا لە ھەموو لایەنە پەیوەندیدارەکان و لایەنە سیاسییەکان و سەرجەم لایەنە پەیوەندیدارەکانی دیکەی ھەرێمی کوردستان دەکەن بەشێوەیەکی ھاوبەش کاربکەن ئەو ئاستەنگانەی بەردەم ھەڵبژاردن تێپەڕێنن بۆ گەرەنتی ھەڵبژاردنێک بەپێی پێوەرە نێودەوڵەتییەکان و مافی ھەموو ھاووڵاتیان پارێزراوبێت، لەوانەش ژنان و کەمینەکان لە پرۆسەی دیموکراسیدا.
دەقی پەیامەکە...
کەس وکاری سەربەرزی شەھیدان
فەرماندەو پێشمەرگە قارەمانەکان
ھەڤاڵانی یەکێتی نیشتیمانی کوردستان لەباڵەکایەتی و
تەواوی سنووری مەڵبەندی سۆران
باڵەکایەتی کوانوی شۆڕش و خەبات و تێکۆشان و سیمبولی خۆڕاگری و قوربانیدان، مەڵبەندی شەھیدان و بەرخودان، ئەنوای شۆڕش و رێبازی کوردایەتی و شۆڕشی نوێی گەلەکەمانە، لە مێژووی باڵەکایەتیدا رۆژی ٥/١٧ ی ھەموو ساڵێک، رۆژێکی جیاوازەو بەڕۆژی (شەھیدانی باڵەکایەتی) ناوزەند کراوە، لەم رۆژەدا شەھیدی سەرکردە حەسەن کوێستانی و پۆلێک لە فەرماندەو پێشمەرگەی قارەمان بەو پەری دڕندەیی لەلایەن تێکدەرانی شۆرشی نوێی گەلەکەمان شەھید کران و گیانی خۆیان کردە قوربانی گەل و خاکی پیرۆزی کوردستان و رێبازی سەرۆک مام جەلال.
باڵەکایەتی لەگەڵ سروشتە جوانەکەی و ھەستی جوانی میوان دۆستی و لوتف شیرینی خەڵکە دڵپاکەکەی، لەگەڵ بوێری و مێرخاسی و ئازایەتی ڕۆڵەکانی و چەندین خەسڵەتی بەرزو جوامێرانەو جوانی تر، کە بوونەتە شوناس بۆ ناسینەوەی، شانازییەکی گەورەتری لە سەرووی ھەموو شانازیەکان بۆخۆی مسۆگەرکردووە، ئەویش خوێنی گەش و ئاڵی زیاتر لە ١٣٠٠ رۆڵەی نەبەردو قارەمانیەتی، کە لە ئەمڕۆدا لای دۆست و دوژمن، بۆتە ئایکۆن و ئاوێنەی ناسینەوەی مێژووی تێکۆشان و شۆڕشگێڕیەتی باڵەکایەتی.
لە رۆژگاری سەختی خەبات کە بێ ئومێدی باڵی کێشابوو بەسەر کوردستاندا، خەڵکی تێکۆشەرو نیشتمان پەروەری باڵەکایەتی پشت بەستوو بە بیرو باوەری پتەوی کوردایەتی و ئیرادەی پۆڵاینیان و متمانە بە شۆڕش و سەرکردایەتی یەکێتی نیشتیمانی کوردستان و رابەری بزوتنەوەی رزگاریخوازی گەلەکەمان جەنابی سەرۆک مام جەلال، رۆڵەکانی باڵەکایەتی لەساڵی (١٩٧٦)و لەگەڵ ھەڵگیرسادنەوەی شۆڕشی نوێی گەلی کوردستان، بەتفەنگ و فیشەک و نانی خۆیان چوونە قەندیل و بوون بە داینەمۆو دەسکەچیلەی بڵێسەی ئاگری شۆڕشی نوێ، ئەوێ رۆژێ ئەو پێشمەرگە قارەمانانەی باڵەکایەتی، تەکانێکی ھێندە گەورەیان بە شۆڕشدا کە جەنابی (مام جەلال)و سەرکردە بەشداربووەکانی سەرەتای شۆڕش لە لاپەڕەکانی مێژووی خەباتی راستەقینەی کوردایەتی و یەکێتیدا بەشانازییەوە باسیان کردووە و مێژوویەکی پڕ لە شانازی و سەروەریان تۆمار کردووە.
ئیدی لەوکاتەوەو ئێستاشی لەگەڵدا بێت پێشمەرگەو رۆڵە تێکۆشەرو قارەمانەکانی باڵەکایەتی لە (باشورەوە بۆ باکوری کوردستان، بۆ ڕۆژھەڵات و ڕۆژئاوای کوردستان) پێدەشت و دوندوو چیاو سەنگەرێک نەماوە، قارەمانانە لە پێناوی کوردو کوردستان و ڕێبازەکەیان خەباتیان تێدا نەکردبێ و بە خوێنی گەش و ئاڵی خۆیان سەرکەوتن و مێژووی پڕ لە سەروەریان تۆمار نەکردبێت، بۆیە ئێمەی درێژە پێدەری ڕێبازی شەھیدانین و بەڵێنمان پێداون دەسکەوتەژانیان بپارێزین ، ئەو مافەش بەخۆمان دەدەین کە بەشانازیەکی گەورەوە یادی شەھیدانی باڵەکایەتی بکەینەوەو ئەزموونی دەوڵەمەندی خەباتی شەھیدانمان بکەین بە ھەوێن و چرای روناکی دەستمان، بۆ درێژەدان بە رێ و رێبازی بەرزو پیرۆزیان و داستان و وێنەو تابلۆی ھیلاکی رۆژانی سەختی خەباتیان بنەخشێنین و ھەزار شەوەی لاپەڕەی مێژووی قارەمانیەتیان تۆمار بکەین، کە بەشێکی گەورەی روباری خوێنی شەھیدانی یەکێتیی، کە (ی.ن.ک) شانازی پێوە دەکات، سەرچاوەکەی لە لوتکەی چیاو دۆڵ و گوندو خانووە قوڕەکانی باڵەکایەتییەوە سەرچاوەی گرتووە.
لە یادو بیرەوەی رۆژی شەھیدانی باڵەکایەتیدا، یادێک دەکەین بۆ تەواوی شەھیدانی سنووری مەڵبەندی شەشی سۆران، لەئاست رۆحی پاک و بەرزە فڕی تەواوی شەھیدانمان سەری رێزو وەفاداری دادەنوێنین و سڵاو دەنێرین بۆ کەسوکارە سەربەرزەکانیان، بۆیە لە سۆنگەی باوەڕی بەرزی نیشتمانیی و نەتەوەیمان بە خەباتی رەوای رێبازی کوردایەتی و شەھیدانمان، درێژە پێدەری خوێندنگەی سیاسەت و فەلسەفەو دیدگای سەرۆک مام جەلال دەبین لە پێناوی پاراستنی دەسکەوتەکانی گەلەکەمان و ئاڵاو ئامانجە گەورەکانتان، تا گەیشتن بە لوتکەی سەرکەوتن و بەدیھێنانی ھەموو دروشم و ئامانجەکانی شەھیدانمان خەبات درێژەی ھەیە ناسرەوین تا سەرەکەوین.
سڵاو بۆ رۆحی بەرزە فڕی شەھیدانی باڵەکایەتی و تێکرای شەھیدانی کوردستان
نەمری و سەروەری بۆ شەھیدان و سەربەرزی بۆ کەسوکاریان
مەڵبەندی شەشی سۆران
١٧ی ئایاری ٢٠٢٣
دەزگای ئاسایشی ھەرێم لە راگەیەندراوێکدا رایگەیاند، بەڕێوەبەرایەتی ئاسایشی گەرمیان لەسەر بنەمای زانیاری ھەواڵگری و بەدواداچوون و چاودێری پاش دەستکەوتنی زانیاری لەسەر تۆمەتبارێکی لە یاساھەڵاتوو لە خواروی عێراق، تیرۆریستێکی بە مادەی چواری تیرۆر، لەسەر فەرمانی دادوەری لێکۆڵینەوەی ئاسایش دەستگیرکرد و داتر کەیسەکەی رەوانەی دەسەڵاتی دادوەری عێراق دەکرێتەوە.
ئاماژەی بەوەشکردووە، ئەو تیرۆرستە بۆخۆحەشاردان ھاتبووە ھەرێمی کوردستان و لە شارۆچکەی کەلار نیشتەجێبووە و تەمەنی ٤٥ ساڵە.
سروە محەمەد ئەندامی ئەنجومەنی نوێنەرانی عێراق لە فراکسیۆنی یەکێتی بۆ کوردسات نیوز رایگەیاند، دوای وەرگرتنی رەزامەندی دەزگای شەھیدان و زیندانییە سیاسییەکانی عێراق کار بۆ ئەوە دەکەن بەندینخانەی نوگرە سەلمان لە پارێزگای سەماوەی باشوری عێراق بکەن بە مۆزەخانەیەک و تاوانەکانی رژێمی پێشووی عێراقی تێدا بخرێتەڕوو.
ئەندامەکەی فراکسیۆنی یەکێتی ئەوەشی راگەیاند، بەشێکی گەورەی ئەو مۆزەخانە نیشتمانییە تەرخان دەکرێت بۆ خستنەڕووی بەڵگەکانی تاوانی ئەنفال، چونکە ئەو زیندانە لەرابردوودا زۆرینەی ئەنفالکراوانی کوردی تێدا بووە.
دەقی پەیامی قوباد تاڵەبانی....
بەڕێزان سەرۆک و ئەندامانی سکرتاریەتی یەکێتی مامۆستایانی کوردستان
بەبۆنەی یادی دامەزراندنی یەکێتی مامۆستایانی کوردستانەوە گەرمترین پیرۆزبایی ئاڕاستەی ئێوە و ھەموو مامۆستایانی کوردستان دەکەم.
یەکێتی مامۆستایان خاوەنی مێژوویەکی پڕ لە شانازییە، چ وەک بەشداریکردن و رۆڵی گرنگی لە خەباتی رزگاریخوازانەی گەلەکەماندا و چ وەک ئەرکی پیشەیی خۆی لە پەروەردەکردنی چەندین نەوە و داکۆکیکردن لە مافی مامۆستایاندا.
گومانی تێدانییە کە ئەرکی یەکێتی مامۆستایان لەم قۆناغەدا قورسترە لە ھەر قۆناغێکی دیکە، بەوپێیەی داھاتووی وڵاتەکەمان بەندە بە پەروەردەکردنی نەوەیەکی زانستخوازی نیشتمانپەرەوەرە و بۆ ئەمەش پێویستە یەکێتی مامۆستایان رۆڵی کارا ببینێت لە پێداچوونەوە بە سیستمی پەروەردە و گەشەپێدانی زیاتری پەروەردەی کوردستان.
جارێکی دیکە پیرۆزبایی لە ھەموو مامۆستایانی کوردستان دەکەم و ھیوای سەرکەوتنی زیاتر بۆ رێکخراوەکەتان دەخوازم.
قوباد تاڵەبانی
جێگری سەرۆکی ئەنجومەنی وەزیران
دەقی پەیامی بافڵ جەلال تاڵەبانی....
بەبۆنەی ساڵیادی دامەزراندنی یەکێتیی مامۆستایانی کوردستانەوە، پیرۆزباییەکی گەرم ئاڕاستەی مامۆستایانی کوردستان، سەرۆک و ئەندامانی سکرتاریەتی یەکێتیی مامۆستایانی کوردستان دەکەم.
مامۆستایانی کوردستان لە ھەموو وێستگە جیاوازەکانی گەلی کورددا، پێشەنگبوون لە پێگەیاندنی نەوە جیاوازەکانی کوردستان و لە شۆڕش و خەباتی چەکداریشدا، قارەمان و تێکۆشەر بوون. لەم یادە مێژووییەدا سڵاو و پێزانینی زۆرمان بۆ ھەموو ئەو مامۆستا جوامێرانە دەنێرین کە سەرباری ھەموو قۆناغە سەختەکان، پرۆسەی پەروەردە و فێرکردنیان پشتگوێ نەخست و لە خەمی نەوەی دواڕۆژی گەلەکەماندا بوون.
یەکێتیی نیشتمانیی کوردستان ھەمیشە پشتیوان و داکۆکیکاری مامۆستایان بووە و لەم ئەرکە نیشتمانییەشی بەردەوام دەبێت. بۆ ساڵی نوێی کارکردنتان ھاوکار و ھەماھەنگ دەبین لەپێناو خزمەتکردنی زیاتری مامۆستایان. ئێوەن نموونەی کوردستان و ئێمەین بەرامبەر ھەوڵ و ماندووبوونتان وەفادار دەبین.
شاد و سەرفرازبن
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
میتحەد سانجار، ھاوسەرۆکی پارتی چەپی سەوز لە کۆنفرانسێکی رۆژنامەوانییدا رایگەیاند، بە گشتی لەم ھەڵبژاردنەدا نەگەیشتن بە ئامانجی خۆیان و لە چەند ناوچەیەک دەنگیان لەدەستداوە، بەڵام لەگەڵ ئۆرگانەکانیان و ھاوپەیمانەکانیان دادەنیشن و لێکۆڵینەوە لە ئەنجامەکانی ئەم ھەڵبژاردنە دەکەن.
لە ھەڵبژاردنی ئەمجارەی پەرلەمانی تورکیادا، پارتی دیموکراتی گەلان-ھەدەپە لەژێرناوی (پارتی چەپی سەوز) و لە چوارچێوەی (ھاوپەیمانیی رەنج و ئازادی)، بەشداری ھەڵبژاردنی کرد، کە بەپێی ئەنجامە بەراییەکان تاکو ئێستا ئەو ھاوپەیمانێتییە رێژەی ١٠.٥٢%ی دەنگەکانی بەدەستھێناوە و تائێستا ٦٦ کورسیی پەرلەمانی مسۆگەر کردووە.