کوردستان
نەوشیروان مستەفا ئەمین لە ساڵی 1944 لە گەڕەكی سەرشەقامی سلێمانی لە خانەوادەیەكی رۆشنبیر لەدایكبووە، خوێندنی سەرەتایی و ناوەندی و ئامادەیی لە سلێمانی تەواوكردووە، لە ساڵی 1967 كۆلێژی زانستە سیاسییەكانی لە زانكۆی بەغداد تەواو كردووە، سەرەتای شەستەكانی سەدەی رابردوو دەستی بەكاری سیاسی كردووە و یەكەم وێستگەی كاری سیاسی لە نێو یەكێتی قوتابیانی كوردستان بووە.
لە ساڵانی 1963-1964 بووەتە ئەندامی سكرتارییەتی یەكێتی قوتابیان، هەر لەو ماوەیەدا بووەتە ئەندامی پارتی دیموكراتی كوردستان، لەساڵی 1967 بووەتە ئەندامی لقی سلێمانی پارتی.
وەك گەنجێكی سلێمانی لەشەستەكاندا سەرقاڵی نوسین و كاری رۆژنامەگەری بووە و خاوەنی ئیمتیازی گۆڤاری رزگاری بووە كە لە ساڵی 1969 دەرچووە، دوای بەیاننامەی 11ی ئاداری 1970 لەگەڵ كۆمەڵێك هاوڕێی لە سلێمانییەوە دوورخراونەتەوە بۆ خوارووی عێراق و دواتر لە بەغداد یەكیان گرتووەتەوە، لەو سەردەمەشدا بە مەبەستی خوێندن و دووركەوتنەوە لە هەڕەشەكانی ئەو سەردەمەی حكومەتی عێراق چووەتە نەمسا كە لەو سەردەمەدا لەلایەن حكومەتی عێراقەوە سزای لە سێدارەدانی بۆ دەرچووە.
لە نەمسا دوای تەواوكردنی خوێندنی ماستەر، سەرقاڵی خوێندنی دكتۆرا بووە لە بواری یاسای نێودەوڵەتی، بەڵام لەسەر داوای سەرۆك مام جەلال و بۆ دامەزراندنی یەكێتیی نیشتمانیی كوردستان، دەستبەرداری خوێندنەكەی بووە و گەڕاوەتەوە بۆ كوردستان.
لە خەباتی شاخ، نەوشیروان مستەفا وەك سەركردەیەكی دیار دەركەوتووە، سكرتێری كۆمەڵەی رەنجدەرانی كوردستان و دواتر جێگری سكرتێری گشتیی یەكێتیی نیشتمانیی كوردستان بووە، یەكێك بووە لە سەركردە نزیك و متمانەپێكراوەكانی سەرۆك مام جەلال، بە ئەندازیاری راپەڕینی بەهاری 1991ی خەڵكی كوردستان دادەنرێت.
نەوشیروان مستەفا لە ساڵی 1981 ژیانی هاوسەرگیری لەگەڵ شوعلە عەلی پێكهێناوە و خاوەنی دوو كوڕ و كچێكن بەناوەكانی (چیا، نما، چرا).
لە ساڵی 2006 دەستبەرداری كاری سیاسی بوو و دەستیكردووە بە كاری راگەیاندن، لەساڵی 2009 لە یەكێتیی نیشتیمانیی كوردستان جیابووەوە و كۆمپانیای وشە و دواتریش بزوتنەوەی گۆڕانی دامەزراند و بووە رێكخەری گشتی بزووتنەوەكە.
نەوشیروان مستەفا نوسەرێكی ورد و بە توانا بووە و شارەزاییەكی تەواوی لە مێژووی سیاسی و كۆمەڵایەتی كوردستان هەبووە و 18 كتێبی نووسیوە، لە 19ی ئایاری 2017 لە سلێمانی بە نەخۆشی كۆچی دوایی كرد و لە گردی زەرگەتە بەخاك سپێردراوە.
هاتوچۆی هەرێم چەند بڕیارێکی تایبەت بە ماتۆڕسکیلەکان بڵاوکردەوە و ئاماژەی بەوەکردووە، ماتۆڕسواران بەپێی جۆری سەرپێچییەکە سزا دەدرێن.
سەرپێچی و سزاکان بەم جۆرەن:
-ئەگەر ماتۆڕسواران بە دەنگی ئەگزۆز هاووڵاتیان هەراسان بکەن، ئەوا دەدرێنە دادگا و دەست بەسەر ماتۆڕەکەیاندا دەگیرێت.
-هەر ماتۆڕسوارێک لە ترافیکلایتەکان نەوەستێت سزای مادی دەدرێت.
-هەر ماتۆڕسوارێک کڵاو و سەرئەژنۆ و مەچەکپارێز بەکارنەهێنێت سزای مادی دەدرێت.
-ماتۆڕسواران سەرکێشی و نمایش بکەن دەدرێنە دادگا و دەست بەسەر ماتۆڕەکەیاندا دەگیرێت.
-ئەگەر ماتۆڕەکان لۆگۆی کۆمپانیاکانی گەیاندنیان پێوەبێت مانگانە سزاکە بۆ کۆمپانیاکە دەنێردرێت.
ئەمەش لەکاتێکدایە، بەشێکی زۆری هاووڵاتیانی هەرێم ئێستا بێزارن لەدەست بەرزی دەنگی ماتۆڕەکان و نمایشە سەرکێشییەکانیان لەسەر شەقامی گشتی و گەڕەک و کۆڵانەکاندا.
کەشناسیی هەرێم پێشبینییەکانی کەشوهەوای ئەمڕۆ و سبەینێی بڵاوکردەوە و ئاماژەی بەوەکردووە، پلەکانی گەرما روو لە نزمبوونەوە دەکەن.
کەشناسیی هەرێم رایگەیاند، ئەمڕۆ دووشەممە، ئاسمان ساماڵ و پەڵەهەور دەبێت، ئەگەرى تۆزێکى کەم لە هەندێک ناوچەى باشورى هەرێم هەیە هەروەها پلەکانی گەرما بەگشتیی نزیک دەبنەوە لە تۆمارکراوەکانی دوێنێ، بەڵام لە ناوچە شاخاوییەکان دادەبەزن.
ئەوەش هاتووە، سبەینێ سێشەممە، ئاسمان ساماڵ و پەڵەهەور دەبێت، لەگەڵ بوونی تۆزیکی سوک لە هەوادا، کە لە ناوچەکانی باشوری هەرێم کاریگەرییەکەی زیاتر دەبێت.
بەپێی پێشبینییەکانی کەشناسی، سبەینێ پلەکانی گەرما 2 بۆ 3 پلەی سیلیزی نزمتر دەبنەوە بەراورد بە ئەمڕۆ.
بەرزترین پلەکانی گەرمای پێشبینیکراو بە پلەی سیلیزی بەمجۆرە دەبن:
هەولێر : 37 پلەی سیلیزی
سلێمانی : 34 پلەی سیلیزی
دهۆک : 34 پلەی سیلیزی
کەرکوک : 37 پلەی سیلیزی
زاخۆ : 34 پلەی سیلیزی
هەڵەبجە : 37 پلەی سیلیزی
سۆران : 33 پلەی سیلیزی
حاجی ئۆمەران : 23 پلەی سیلیزی
گەرمیان :40 پلەی سیلیزی
پۆلیسی سلێمانی دەڵێت: ئەو تۆمەتبارەی لەگەڕەکی سەرچنار بە چەکوش هێرشیکردەسەر هاووڵاتییەک و برینداری کرد لەلایەن هێزەکانمانەوە دەستگیرکرا.
سەرکەوت ئەحمەد وتەبێژی پۆلیسی سلێمانی بە کوردسات نیوزی راگەیاند: ئەو تۆمەتبارەی لە گەڕەكی سەرچنار لەشاری سلێمانی هێرشیکردە سەر هاووڵاتییەك و برینداری كرد دەستگیر كرا.
سەرکەوت ئەحمەد وتیشی، لەئێستادا تۆمەتباری لەدایکبووی 1977 بەبڕیاری دادوەر راگیراوەو لێکۆڵینەوەکان بەردەوامە.
.
جێگەی ئاماژەیە، ئەمڕۆ لە گەڕەکی سەرچناری سلێمانی کەسێک بە چەکوش بەهۆی کێشەی پارەوە بەچەکوش هێرشیکرد سەر کەسێکی دیکە و برینداری کرد، لە ئێستاشدا لەلایەن پۆلیسی سلێمانیەوە دەستگیرکراوە.
لە هەولێر چوار تۆمەتبار بە تۆمەتی تەقەکردن و شەڕکردن دەستگیرکران، پۆلیسی هەولێریش دەڵێت: یەکێک لە تۆمەتبارەکان بەشداربووە لە تاوانێکی کوشتن.
بەڕێوەبەرایەتی پۆلیسی پارێزگای هەولێر بڵاویکردەوە، چوار تۆمەتبار بە تۆمەتی تەقەکردن و شەڕکردن دەستگیر کران.
ئاماژەی بەوەشکردووە، یەکێک لەو تۆمەتبارانە که ماوەیەک لەمەوبەر بەشدار بووە لە تاوانێکی کوشتن و ماوەیەک خۆی ون کردبوو، بەڵام بەهۆی چاودێریکردن و بەدواداچوونی پۆلیس تواندرا دەستگیر بکرێت.
پۆلیسی هەولێر راشیگەیاند، سەرجەم تۆمەتبارەکان بە بڕیاری دادوەری لێکۆڵینەوە دەستگیر کراون و لەئێستاشدا راگیراون و پەڕاوی لێکۆڵینەوەیان بۆ کراوەتەوە.
وەفدی ئیمڕاڵی دەم پارتی لە گەڵ ئۆجەلان كۆبوەوە، بۆ گفتوگكۆكردن لەسەر پرۆسەی ئاشتی لە توركیا و باكوری كوردستان.
ئەمڕۆ ئەندامانی وەفدی ئیمراڵی پارتی یەكسانی و دیموكراسی گەلان "دەم پارتی"كە پێكهاتبوون لە پەروین بوڵدان و فایەق ئۆزگور ئەرۆل لە دوورگەی ئیمراڵی لەگەڵ عەبدوڵا ئۆجەلان رێبەری زیندانیكراوی پارتی كرێكارانی كوردستان"پەكەكە" كۆبوەوە، بۆ تاوتوێكردنی پرۆسەی ئاشتی لە توركیا و باكوری كوردستان.
ئۆجەلان لە پایامێكدا بۆ رایگشتی رایگەیاندوە، پرۆسەی ئاشتی پێویستی بە ڕێككەوتنێكی نوێ هەیە لەسەر یاسای برایەتی، ئەوەی دەیكەن نوێنەرایەتی گۆڕانكارییەكی گەورەی روون دەكات.
ئاماژەی بۆ ئەوەشكردووە، سروشتی پەیوەندی توركیا و كورد تەواو جیاوازە، ئەوەی زیانی پێدەگات پەیوەندی برایەتییە، سەرقاڵی پاككردنەوەی ئەو تەڵە و مینانەن كە زیان بەو پەیوەندییە دەگەیەنن.
ئەوەش لە كاتێكدایە لە دوای كۆنگرەی 12ی پەكەكە و بڕیاری كۆتایهێنان بە خەباتی چەكداری، ئەوەیەكەم سەردانی وەفدی ئیمراڵییە بۆ لای ئۆجەلان، پێشتریش لە 28ی تشرینی دووەمی 2024، تا 21 نیسانی ئەمساڵ وەفدی ئیمراڵی چوار جار سەردانی ئیمراڵییان كردبوو.
بەئامادەبوونی شاناز ئیبراهیم ئەحمەد خانمی یەکەمی عیراق بەڕێوەبەرایەتی شوێنەوار و کەلەپووری شاری سلێمانی ڕۆژی یەکشەممە 18ـی 5ـی 2025 لە مۆزەخانەی سلێمانی بەبۆنەی رۆژی جیهانی مۆزەخانەوە ئاهەنگێکی سازکرد.
وەک ڕێزلێنانێک بۆ هەوڵەکانی خانمی یەکەمی عیراق لە پاڵپشتیکردنی کاری مۆزەخانەکە و پاراستنی کۆکراوەی شوێنەوار و کەلەپوور، خەڵاتی یادگاری پێبەخشرا کە بریتی بوو لە قەڵغانی مۆزەخانەکە کە دووەم گەورەترین مۆزەخانەیە لەسەر ئاستی عیراق.
هاشم حەمە عەبدوڵا بەڕێوبەری شوێنەوار و کەلەپوری سلێمانی لە وتارێکیدا جەختی لەسەر رۆڵی گرنگی مۆزەخانەکان کردەوە وەک دامەزراوەیەکی پەروەردەیی و کەلتووری کە یارمەتیدەرە بۆ پێشکەوتنی کۆمەڵگاکان و کار دەکات بۆ پتەوکردنی ناسنامەی نیشتیمانی و بڵاوکردنەوەی هۆشیاری شارستانیەتی و ڕەنگدانەوەی پەیوەندی ڕابردوو بە ئێستا.
سەرۆکی هەرێمی کوردستان و وەزیری دەرەوەی ئێران لە تاران کۆبوونەوە و لە دیدارەکەدا چۆنیەتی پەرەپێدانی هاوکاریی هاوبه‌ش له بواره جیاجياكاندا گفتوگۆی لە بارەوەکرا.
سەرۆکایەتی هەرێمی کوردستان بڵاویکردەوە، ئه‌مڕۆ يه‌كشه‌ممه نێچیرڤان بارزانی سەرۆکی هەرێمی کوردستان، له ديدارێكدا لەگەڵ عەباس عراقچی وەزیری دەرەوەی کۆماری ئیسلامی ئێران، پەیوەندیى دوولايه‌نه و چۆنیەتی پەرەپێدانی هاوکاری هاوبه‌شيان له بواره جیاجياكاندا، تاوتوێ كرد.
ئاماژەی بەوەشکرد، هەر لە کۆبوونەوەکەدا هه‌ردوولا ستايشى پەیوەندییە دێرينه‌كانى نێوان ئێران و هه‌رێمى كوردستانيان كرد و جەختيان لەسەر خواستی دوولايه‌نه بۆ پەرەپێدانی پەیوەندییه‌كان کردەووە به شێوه‌يه‌ك خزمەت بە سەقامگیری و بەرژەوەندییە هاوبەشەکانى ئێران و عیراق به هه‌رێمى كوردستانه‌وه بکات.
سەرۆکایەتی هەرێم راشیگەیاندووە، تاوتوێكردنى دۆخى ناوچه‌كه به‌گشتى ته‌وه‌رێكى ديكه‌ى ديداره‌كه بوو. تيايدا داكۆکييان لەسەر گرنگيی گفتوگۆ بۆ دوورخستنه‌ى ناوچه‌كه له كێشه و ئاڵۆزى كرده‌وه.
سبەینێ دووشەممە موچەی مامۆستایانی گرێبەستی وەزارەتی پەروەردە و خوێندنی باڵا دابەش دەکرێت.
وەزارەتی دارایی و ئابوری هەرێم بڵاویکردەوە، سبەینێ دووشەممە موچەی مامۆستایانی گرێبەستی وەزارەتی پەروەردە و خوێندنی باڵا لەسەرتاسەری هەرێمی کوردستان دابەش دەکرێت.
ئاماژەی بەوەشکرد، کە سەرجەمی تەمویلەکانیان لەداهاتی ناوخۆ خەرج دەکرێت.
حاڵەتێکی دیکەی توشبوو بە تای خوێنبەربوون لە هەولێر تۆمارکرا، وەزارەتی تەندروستیش دەڵێت: توشبووەکە خەڵکی شاری موسڵە.
وەزارەتی تەندوستی هەرێم بڵاویکردەوە، حاڵەتێکی دیکە بە نەخۆشی تای خوێنبەربوون تۆمارکرا ئەویش ژنێکی دانیشتووی بعاجی سەر بە پارێزگای نەینەوایە و تەمەنی 27 ساڵە.
ئاماژەی بەوەشکرد، دوای هەبوونی نیشانەکانی، روو لەشاری هەولێر دەکات بۆ وەرگرتنی چارەسەر لە نەخۆشخانەی هەولێری فێرکاری، بەهۆی بوونی نیشانەکان و گومانلێکردن بە نەخۆشی تای خوێنبەربوون و چەندین رێکاری دەستنیشانکردن و چارەسەری پزیشکی دەگیرێتەبەر، لە ئێستادا لەشاری هەولێر لەژێر چاودێری چڕ لە نەخۆشخانە خەوێندراوە و چارەسەر وەردەگرێت.
وەزارەتی تەندروستی داواش لە هاووڵاتیان دەکات رێنماییەکانی وەزارەتی تەندروستی جێبەجێبکەن، هەرەوەها لەکاتی بوونی گومان و نیشانەکانی نەخۆشی لەسەر ئاژەڵ پێویستە تیمەکانی ڤێترنەری ئاگاداربکەنەوە.
راشیگەیاندووە. هاووڵاتیانی بەرکەوتووانی بەخێوکردنی ئاژەڵ یان بەرهەمەکانی ئاژەڵ لەکاتی بوونی هەر نیشانەیەکی ناتەندروست، بەخێرایی سەردانی نەخۆشخانەکان بکەن بێ دواکەوتن.
جێگەی ئاماژەیە، لەماوەی مانگی رابردوو، تەنها دوو حالەت دەسنیشانکراون و پشتڕاستکراوەتەوە، کە حالەتێکیان لەشاری دهۆک بوو هەفتەی رابردوو لەبەر قورسی باری تەندروستی گیانی لەدەستدا و حالەتی دووەم بە تەواوی چاکبووەوە و لە نەخۆشخانە دەرچووە.
ئەمڕۆ لە تاران نێچیرڤان بارزانی سەرۆکی هەرێمی کوردستان، لەگەڵ مەسعود پزشکیان سەرۆك کۆماری ئیسلامی ئێران، كۆبووه‌وه.
لە کۆبوونەوەکەدا، خۆشحاڵيى خۆیان به ئاستی پەیوەندییه‌كانى نێوان هه‌ردوولا ده‌ربڕى و داكۆكييان لە خواستى دوولايه‌نه بۆ بره‌ودانى زياتر به هاريكاريى هاوبه‌ش، بەتایبەتی لە بواره‌كانى بازرگانی و ئابوريدا كرده‌وه.
نێچیرڤان بارزانی پابەندی هەرێمی کوردستانى بە سیاسەتی دراوسێیەتی باش لەسەر بنەمای بەرژەوەندیی هاوبەش و رێزله‌يه‌كگرتن دووپات كرده‌وه، هه‌روه‌ها ئاماژەى به هاوبه‌شى و په‌يوه‌نديى له‌مێژينه و دێرينى هه‌رێمى كوردستان له‌گه‌ڵ ئێراندا كرد.
هەر لە کۆبونەوەکەدا، هەردوولا دوایین پێشهاتەکانی ناوچه‌كه‌يان تاوتوێ کرد و هاوڕا بوون له‌سه‌ر گرنگیی پاراستنی سەقامگیری و چاره‌سه‌رى ئاشتيانه‌ى كێشه‌كان، هه‌روه‌ها چه‌ند پرسێكى ديكه‌ى جێى بايه‌خى هاوبه‌ش.
خانمی یەکەمی عیراق ستایشی دوایین کۆنسێرتی ئۆرکێسترای سیمفۆنی سلێمانی کرد و رایگەیاند، "گرنگە لەیادمان بێت، کاتێک وشەکان پەکیان دەکەوێت موزیک دێتە گۆ".
شاناز ئیبراهیم ئەحمەد خانمی یەکەمی عیراق رایگەیاند، ئۆرکێسترای سیمفۆنی سلێمانی بەڕابەرایەتی هانس رۆتمان و ئاکۆ عەزیز، کۆششێکی بێ وێنەی پێشکەشکرد کە سەرنجی ئامادەبووانی نمایشەکەی راکێشا بە چەند بڕگەیەکی موزیکی بتهۆڤن و چەند ئاوازێکی کوردیی ناسراو.
ئاماژەی بەوەشکرد، "گرنگە لەیادمان بێت، کاتێک وشەکان پەکیان دەکەوێت موزیک دێتە گۆ".
دوێنێ شەممە، ئۆرکێسترای سیمفۆنی سلێمانی بە رابەرایەتی هانس رۆتمانی بە رەگەز ئەڵمانی رابەری ئۆرکێسترا و سۆڵۆی ڤایۆلین و کۆنسێرت ماستەر ئاکۆ عەزیز عینایەت، هەروەها بەشداری چەندین هونەرمەند و موزیکژەنی ناوخۆ و جیهانیی، یەکەم کۆنسێرتی ساڵی 2025ی پێشکەش کرد و زیاتر لە هەزار بینەر بۆ بینینی کۆنسێرتەکە ئامادە بوون.
ئاسایشی هەولێر دەستگیرکردنی تۆمەتباری روداوەکەی گەڕەکی ئازادی راگەیاند و دەڵێت، رێکاری یاسای بەرانبەر گیراوەتە بەر.
بەڕێوەبەرایەتی ئاسایشی هەولێر رایگەیاند، لە گەڕەکی ئازادی شاری هەولێر لەسەر کێشەیەکی کۆمەڵایەتی شەڕە تەقە لەنێوان دوو دراوسێدا دروست بوو، کە بەهۆیەوە کەسێک کوژرا و کەسێکی دیکەش بریندار بوو، بکوژەکەش بۆ شوێنێکی نادیار هەڵاتبوو.
ئاماژەی بەوەشكرد، دوای وەر گرتنی رەزامەندی دادوەری لێکۆڵینەوەی ئاسایشی هەولێر لە بەرەبەیانی ئەمڕۆدا تۆمەتبارەکە دەستگیرکرا و رێکاری یاسای بەرانبەر گیراوەتەبەر.
شەوی رابردوو لە گەڕەکی ئازادی شاری هەولێر، بەهۆی دروستبوونی دەمەقاڵێ و شەڕ لەنێوان دوو دراوسێدا گەنجێکی تەمەن 23 ساڵ کوژرا، کە بەپێی زانیارییەکانی کوردسات نیوز، بەهۆی کۆترەوە شەڕەکە سەری هەڵداوە.
سەرۆک کۆماری ئێران لە کۆڕبەندی گفتوگۆی تاراندا رایگەیاند، چەکی ئەتۆم وێرانکەرە و خواستی ئەوەیان نییە بەدەستی بهێنن. باسی لەوەشکرد، "سیاسەتی ئەمڕۆی جیهان رەوشتی تێدا نەماوە".
ئەمڕۆ یەکشەممە، کۆڕبەندی گفتوگۆی تاران بە بەشداری وەفدی 53 وڵات لە تارانی پایتەختی ئێران بەڕێوەدەچێت و وەفدی هەرێمی کوردستانیش تێیدا بەشدارە.
لە کۆڕبەندەکەدا باس لە دوایین پێشهاتەکانی بەردەم ئێران و رۆژهەڵاتی ناوەڕاست دەکرێت و پرسی ئابووری و جەنگ و چەک، مافی مرۆڤ و دۆخی ناوچەکە بە گشتیی دەخرێنە بەر باس.
لە کۆڕبەندەکەدا مەسعود پزیشکیان سەرۆک کۆماری ئێران باسی لە دوایین سیاسەتەکانی رۆژهەڵاتی ناوەڕاست و جیهان کرد و رایگەیاند، "سیاسەتی ئەمڕۆی جیهان رەوشتی تێدا نەماوە، دوژمنەکانمان چەکمان پێدەفرۆشن بۆ ئەوەی یەکتری پێ بکوژین".
باسی لەوەشکرد، ئەوان بە ئاشتییانە مامەڵە دەکەن، دوژمنەکانیان دەیانەوێت ناوچەکە لە دواکەوتوویی و شەڕدا بمێنێتەوە.
لەبارەی ئیسرائیل و هێرشەکانی بۆسەر کەرتی غەززە ئەوەی خستە روو، ئیسرائیل رۆژانە مافی مرۆڤ پێشێل دەکات.
ئارەزووی بەدەستهێنانی چەکی ئەتۆم ناکەین
لەبارەی بەرنامە ئەتۆمییەکەی ئێرانەوە سەرۆک کۆماری ئەو وڵاتە ئەوەی خستە روو، ئەوان خواستی بەدەستهێنانی چەکی ئەتۆمیان نییە، چونکە چەکێکی وێرانکەرە. ئەوەش لە کاتێکدایە، پرسی بەدەستهێنانی چەکی ئەتۆم یەکێکە لە مشتومڕاویترین خاڵيکانی نێوان ئەمریکا و ئێران بۆ رێککەوتن لەسەر بەرنامەی ئەتۆمی و هەڵگرتنی سزاکانی سەر ئەو وڵاتە.
کەشناسیی هەرێم پێشبینییەکانی کەشوهەوای ئەمڕۆ و سبەینێی بڵاوکردەوە و ئاماژەی بەوەکرد، پلەکانی گەرما ئەمڕۆ بەرز دەبنەوە، بەڵام سبەینێ روو لە نزمبوونەوە دەکەن.
کەشناسیی هەرێم رایگەیاند، ئەمڕۆ یەکشەممە، ئاسمان ساماڵ و پەڵەهەور دەبێت لە هەندێک ناوچەى جیا جیا نیمچەهەور دەبێت، هەروەها ئەگەرى تۆزێکى کەم لە هەندێک ناوچەى باشورى هەرێم هەیە.
ئاماژەی بەوەشکردووە، سبەینێ دووشەممە، ئاسمان ساماڵ و پەڵەهەور دەبێت.
بەپێی پێشبینییەکانی کەشناسی، ئەمڕۆ پلەکانی گەرما 2 بۆ 3 پلەی سیلیزی بەرزدەبنەوە، بەڵام سبەینێ 2 بۆ 3 پلە نزم دەبنەوە.
بەرزترین پلەکانی گەرمای پێشبینیکراو بە پلەی سیلیزی بەم جۆرە دەبن:
هەولێر : 35 پلەی سیلیزی
سلێمانی : 33 پلەی سیلیزی
دهۆک : 33 پلەی سیلیزی
کەرکوک : 37 پلەی سیلیزی
زاخۆ : 34 پلەی سیلیزی
هەڵەبجە : 33 پلەی سیلیزی
سۆران : 31 پلەی سیلیزی
حاجی ئۆمەران : 21 پلەی سیلیزی
گەرمیان :39 پلەی سیلیزی