کوردستان
نەبەرد عومەر بەرپرسی دەستەی هەڵبژاردنەکانی هەرێمی کوردستان، سەردانی دەزگای میدیایی کوردساتی کرد و لەلایەن دێرین لەتیف رەشید بەڕێوەبەری گشتیی دەزگاکەوە پێشوازی لێکرا.
لە سەردانەکەیدا کە ئەمڕۆ سێشەممە 20ـی 5ـی 2025 بوو، بەرپرسی دەستەی هەڵبژاردنەکانی هەرێمی کوردستان، سوپاسی دەزگای میدیایی کوردساتی کرد لەپای ئەو هەوڵانەی کە دەزگاکە ناویەتی بۆ سەرخستنی پڕۆسەی هەڵبژاردنی پەرلەمانی کوردستان کە لە رۆژی 20ـی 10ـی 2024 بەڕێوەچوو.
وەزارەتی نەوتی عیراق رایگەیاند، ئەو دوو گرێبەستەی حکومەتی هەرێم کە لە تۆڕە کۆمەڵایەتییەکاندا باسدەکرێت و بەهاکەی دەیان ملیار دۆلارە، نایاساییە و سەرپێچییەکی روونی یاسایە.
وەزارەتی نەوتی عیراق راگەیەنراوێکی لەبارەی ئەو دوو گرێبەستەوە بڵاوکردەوە کە حکومەتی هەرێم لە بواری وزەدا ئەنجامی داوە و ئاماژەی بەوەکردووە، سەرچاوەکانی هەواڵ باس لە دو گرێبەست دەکەن کە بەهاکەیان دەیان ملیار دۆلارە.
لە راگەیەنراوەکەدا هاتووە، ئەو دوو گرێبەستەی وەزارەتی سامانە سروشتییەکان ئەنجامی داوە لەبارەی کێڵگەی میران و تۆپخانە لە سلێمانی، پێچەوانەی بڕیاری دادگای فیدڕاڵین.
وەزارەتەکە دەشڵێت، سەرەڕای پێویستی عیراق بۆ ئەنجامدانی گرێبەستی وەبەرهێنان لەبواری غاز و پڕکردنەوەی پێداویستی ناوخۆ بۆ کارپێکردنی وێستگەکانی بەرهەمهێنانی کارەبا، بەڵام هێشتا ئەو رێکارانەی حکومەتی هەرێم گرتوونیەتە بەر پێشێلکارییەکی روونی یاسایە.
ئاماژەی بەوەشکردووە، سامانە سروشتییەکان موڵکی سەرجەم تاکێکی عیراقە و هەر وەبەرهێنانێک لەو سامانەدا، پێویستە لەرێگای حکومەتی عیراقەوە بێت.
وەزارەتەکە جەختی لەوەشکردووەتەوە، بە پشتبەستن بە دەستووری عیراق و بڕیارەکانی دادگای فیدڕاڵی، ناوەڕۆکی ئەو گرێبەستانە "پوچەڵن".
بەڕێوەبەرایەتی بەرەنگاربوونەوەی توندوتیژی دژى ئافرەتان و خێزان ئەو رێنماییانەی بڵاوکردەوە کە پێویستە جێبەجێ بکرێن بۆ رووبەڕووبوونەوەی کەسی هەراسانکار لە تۆڕە کۆمەڵایەتییەکان.
لقی سلێمانی بەڕێوەبەرایەتی بەرەنگاربوونەوەی توندوتیژی دژى ئافرەتان و خێزان چوار رێنمایی تایبەت بە رووبەڕووبوونەوەی کەسەی هەراسانکار لەسەر تۆڕە کۆمەڵایەتییەکان بڵاوکردووەتەوە و دەڵێت: ئەوانە رێنمایی گرنگن.
دقی رێنماییەکان:
1-پەیوەندی بە كەسی هەراسانكارەوە ببڕە، تەنانەت ئەگەر لەژێر گوشارێكی زۆردا بیت.
2-نابێت هیچ بڕە پارەیەك رەوانە بكەن یان ژمارەی كارتی بانكیتان ئاشكرا بكەن.
3- لە بانگەشەكانی هەراسانكار دوور بكەونەوە و هەڕەشەی ئاگاداركردنەوەی پۆلیسی لێ مەكە لەكاتی روداوەكەدا، بەڵكو راستەوخۆ كەسانی شارەزاو پەیوەندیداری لێ ئاگادار بكەرەوە.
4- وێنە "سكرینشوت"ـی بەڵگەكان بپارێزە بۆ بەرگریكردن لە خۆت لە كاتی سكاڵا تۆماركردندا.
لەگەڵ فراوانبوونی تۆڕە کۆمەڵایەتییەکان، کە کۆنتڕۆڵکردنی رەفتاری تاکەکان تیایاندا سەختترە، ئەو گرفت و تاوانانەی بەهۆی ئامێرەکانی پەیوەندیکردنەوە دروست دەبن و رودەدەن زیاتر بون، ئەگەرچی هەوڵی زۆر دراوە و لایەنە پەیوەندیدارەکانیش چەندین رێکاریان بۆ روبەڕوبونەوەی ئەو تاوانانە گرتوەتە بەر، بەڵام هێشتا بەهۆی ئەوەی تاکەکان دەتوانن ناسنامەی خۆیان بشارنەوە و سنوردارکردن و کۆنتڕۆڵ کردن ئاسان نییە.
باشترین رێگەچارەش هۆشیاری تاکەکان و بەکارهێنەرانی ئەو تۆڕانەیە کە چۆن مامەڵە لەگەڵ ئەو تۆڕانەدا بکەن و بەکاریان بهێنن، هەروەها هۆشیاری بەرانبەر بە تاوانەکان و ئەو رێکارانەی دەبێت بیگرێتە بەر لەکاتی توشبون بە هەر دۆخێکی نەخوازراودا.
بەڕێوەبەرایەتی شەهیدانی عیراق رایگەیاند، لە ساڵی 2008ـەوە هەزار و 700 رووفاتی كوردی هەرێمی كوردستان لە گۆڕە بە كۆمەڵەكانی عیراق دەرهێنراون.
عەبدولئیلا نائلی سەرۆكی بەڕێوەبەرایەتی شەهیدانی عیراق رایگەیاند، لە ساڵی 2008ـەوە تا ئێستا 30 گۆڕی بە كۆمەڵ لە شوێنە جیاوازەكانی عیراق هەڵداوەتەوە و رووفاتی زیاتر لە هەزار و 700 روفاتی كوردییان دەرهێناوە.
ئاماژەی بەوەش كرد، بەڕێوەبەرایەتیەكەیان رووبەڕووی كێشەیەكی گەورە دەبێتەوە لە دیاریكردنی ناسنامەی ئەو رووفاتانە، بەو پێیەی زۆربەی خانەوادەی شەهیدەكان مردوون، یان كۆچیان كردووە، هەروەها كەسانێك هەن كە شوێنی نیشتەجێبوونیان دەستنیشان نەكراوە.
نائلی ئاشكراشیكرد، پلانیان هەیە بۆ كردنەوەی چەند بەڕێوەبەرایەتییەك كە یەكێكیان تایبەت دەبێت بە كاروباری كورد، بۆ ئەوەی لە رێگەی ئەوانەوە هەماهەنگی لەگەڵ وەزارەتی كاروباری ئەنفال لە هەرێم بكەن.
پێشتر، بە هەوڵەكانی شاناز ئیبراهیم ئەحمەد خانمی یەكەمی عیراق چەندین گۆڕی بە كۆمەڵ هەڵدراوەتەوە، رووفاتی ئەو كەسانەی لەو گۆڕە بەكۆمەڵەدا بوون گەڕێنرانەوە بۆ هەرێمی كوردستان.
کەشناسیی هەرێم پێشبینییەکانی کەشوهەوای ئەمڕۆ و سبەینێی بڵاوکردەوە و ئاماژەی بەوەکردووە، ئەمڕۆ پلەکانی گەرما نزم دەبنەوە و خۆڵ دەبارێت، بەڵام سبەینێ کەش ئاسایی دەبێتەوە.
کەشناسیی هەرێم رایگەیاند، ئەمڕۆ سێشەممە، ئاسمان ساماڵ و پەڵەهەور دەبێت، لەگەڵ بوونى تۆزێکى سوک لە کەشدا لە هەندێک ناوچە ، هەروەها پلەکانی گەرما 1 بۆ 3 پلەی سیلیزی نزم دەبنەوە.
ئاماژەی بەوەشكردووە، سبەینێ چوارشەممە، ئاسمان ساماڵ و پەڵەهەور دەبێت و پلەکانی گەرما جارێکی دیکە 1 بۆ 3 پلەی سیلیزی بەرز دەبنەوە.
بەرزترین پلەکانی گەرمای پێشبینیکراو بە پلەی سیلیزی بەم جۆرە دەبن:
هەولێر : 36 پلەی سیلیزی
سلێمانی : 35 پلەی سیلیزی
دهۆک : 36 پلەی سیلیزی
کەرکوک : 40 پلەی سیلیزی
زاخۆ : 36 پلەی سیلیزی
هەڵەبجە : 37 پلەی سیلیزی
سۆران : 33 پلەی سیلیزی
حاجی ئۆمەران : 23 پلەی سیلیزی
گەرمیان: 42 پلەی سیلیزی
بەهۆی روداوێکی هاتوچۆوە، پێشنیوەڕۆی ئەمڕۆ ئیدارەی گەرمیان، لەکاتی گەڕانەوەیان لە تاقیکردنەوە، دوو خوێندکار کە برای یەکترن، گیانیان لەدەستدا.
پەیامنێری کوردسات نیوز باسی لەوەکرد، پێشنیوەڕۆی ئەمڕۆ دوو خوێندکار کە برای یەکترن، بە ماتۆڕسکیلەکەیان لە تاقیکردنەوە گەڕاونەتەوە بۆ ماڵەوە، بەڵام لە رێگادا بارهەڵگرێک لێیداون و بەهۆیەوە هەردووکیان گیانیان لەدەستداوە.
ئاماژەی بەوەشکرد، بارهەڵگرەکە لە مەرزی پەروێزخانەوە هاتووە و ئەو دوو برایەش لەدوای تەواوبوونی تاقیکردنەوەکانیان، بەرەو گوندی سوتکێی سەر بە ناحیەی مەیدان گەڕاونەتەوە.
دوو براکە تەنها سێ ساڵ جیاوازی تەمەنیان هەبووە و یەکیان 12 ساڵ و ئەوی دیکەشیان 15 ساڵ بووە.
ئەمڕۆ پارێزگارەكانی هەرێمی كوردستان سەردانی سنە دەكەن و لەگەڵ پارێزگاری سێ شاری رۆژهەڵاتی كوردستان، تاوتوێی پرسی ئابووری و بازرگانی و كشتوكاڵی و گەشتیاری دەكەن.
پەیامنێری كوردسات نیوز رایگەیاند، پارێزگارەكانی سلێمانی و هەڵەبجە و هەولێر و دهۆك و ژوورە بازرگانییەكان و لێپرسراوی كۆمەڵگەی حاجی ئۆمەران، سەردانی شاری سنە دەكەن، لەگەڵ پارێزگاری سنە و ورمێ و كرماشان كۆدەبنەوە.
وتیشی، بە مەبەستی پتەوكردن و گەشەپێدانی پەیوەندییەكان، لە كۆبونەوەكاندا بابەتی ئابووری، بازرگانی، كشتوكاڵ، گەشتوگوزار و كلتوری تاوتوێ دەكرێن.
پێشتریش ئارەش لهۆنی، پارێزگاری سنە رایگەیاندبوو، ئامانجی سەرەكیی سەردان و كۆبونەوەكان، گەشەپێدانی ئابووری دەبێت لەگەڵ هەرێمی كوردستان، لەبەرئەوەی نەتوانراوە وەك پێویست كەڵك لە بازاڕی عیراق وەربگرن.
دوای ئەوەی ئۆفیسی هەڵبژاردنەکانی سلێمانی رایگەیاند، وادەی نوێکردنەوەی تۆماری بایۆمێتری دەنگدان بۆ 15ی حوزەیران درێژ کراوەتەوە، کە دەتوانرێت حەوت مامەڵە ئەنجام بدرێت.
ئۆفیسی سلێمانی کۆمسیۆنی باڵای هەڵبژاردنەکانی عیراق رایگەیاندووە، نوێکردنەوەی تۆماری بایۆمێتری و پێدانەوەی کارتی دەنگدان کە لە 25ی ئازارەوە دەستی پێ کردبوو، بۆ 15ی حوزەیران درێژکراوەتەوە.
ئاماژەی بەوەشکردووە، ناوەندەکان رۆژانە لە سەعات 8:00ی بەیانی تاوەکو 5:00ی ئێوارە کراوە دەبن و ئەوانەشی بەهەر هۆکارێک ناتوانن سەردانی بنکەکان بکەن، ئەوا دەتوانن داوای تیم بکەن.
ئەوەش هاتووە، لەو ماوەیەی کە درێژکراوەتەوە دەنگدەران دەتوانن ئەم مامەڵانە ئەنجام بدەن:
-زیادکردن بۆ ئەودەنگدەرانەی ناویان لە ھیچ جۆرە داتایەکدا نییە، کە بەڵگەنامەی پێویست بۆ ئەم حاڵەتە بریتیە لە: کارتی نیشتمانی، کۆبۆنی خۆراک، کارتی زانیاری .
-تۆمارکردنی بایۆمتری دەنگدەر بۆ یەکەمجار و بەتایبەت بۆ لەدایکبووانی (٢٠٠٧)، کە بەڵگەنامەی پێویست بۆ ئەم حاڵەتە بریتیە لە: کارتی نیشتیمانی یان 'پێناسی باری شارستانی و رەگەزنامەی عیراقی' لەگەڵ کۆبۆنی خۆراک .
-گواستنەوەی ناوەندی دەنگدان، کە بەڵگەنامەی پێویست بۆ ئەم حاڵەتە بریتیە لە: کارتی نیشتیمانی یان 'پێناسی باری شارستانی و رەگەزنامەی عیراقی'، کارتی زانیاری لەگەڵ کۆبۆنی خۆراک کە لەساڵی٢٠٢٠-٢٠٢١ دەرچووبێت تایبەت بەو پارێزگایەی دەیەوێت دەنگدانەکەی بۆ بگوازێتەوە، ئەوەش بە مەبەستی سەلماندنی شوێنی نیشتەجێبوون لەکاتی داواکردن بۆ گواستنەوەی شوێنی دەنگدان لە پارێزگایەک بۆ پارێزگایەکی دیکە، یان کارتی نیشتەجێبوون لەکاتی نەبوونی کۆبۆنی خۆراک تەنھا بۆ گواستنەوەی شوێنی دەنگدان لە ناو سنوری یەک پارێزگا .
-راستکردنەوەی ناو یان ھەر ھەڵەیەکی دیکە لە زانیاری دەنگدەر، بەڵگەنامەی پێویست بۆ ئەم حاڵەتە بریتیە لە: کارتی دەنگدانی کۆن ئەگەر ھەبێت، کارتی نیشتمانی یان 'پێناسی باری شارستانی و رەگەزنامەی عیراقی' لەگەڵ کۆبۆنی خۆراک .
-سڕینەوەی ناوی مردووان، بەڵگەنامەی پێویست بریتیە لە: وێنەیەک لە بەڵگەنامەی مردوو یان وێنەی سڕینەوەی تۆمار یان 'قسام شرعی'.
-تۆمارکردنی کارمەندانی ھێزە ئەمنییەکان، لە بارێکیشدا گەر کارمەندی ھێزە ئەمنییەکان خانەنشین بووبێت ئەوا دوای پێشکەشکردنی بەڵگەنامەی خانەنشین بوون دەنگدانەکەی لە تایبەت دەکرێت بە دەنگدانی گشتی.
-تۆمارکردنی ئاوارەی پارێزگاکان، سەبارەت بە پارێزگای سلێمانی ئاوارەکانی قەزای شنگال دەگرێتەوە بە تەنھا، بەڵگەنامەکانیان تەنھا بریتیە لە: کارتی نیشتمانی یان 'پێناسی باری شارستانی و رەگەزنامەی عیراقی' لەگەڵ کۆبۆنی خۆراک.
سیستمی پەیڕۆڵ بۆ ئامادەكردنی لیستی موچەی مانگی پێنجی موچەخۆرانی هەرێمی كوردستان كارا كرا، هەروەها بۆ ئەم مانگە بڕێك پارە لە موچەی موچەخۆران دەبڕدرێت.
لە ئاگادارینامەیەكدا كە وەزارەتی دارایی و ئابوریی هەرێمی كوردستان بۆ یەكە ژمێریارییەكانی سەرجەم فەرمانگەكانی ناردووە و وێنەیەكی دەست كوردسات نیوز كەوتووە، ئاماژەی بە چالاككردنی سیستمی پەیڕۆڵ كراوە كە دەتوانرێت لە سبەینێوە دەست بە دروستكردنی خشتەی مانگی پێنج بكرێت.
هەروەها دەڵێت، لە پڕۆفایلی هەموو موچەخۆراندا لێبڕینی ژمارەی فەرمانبەر زیادكراوە كە 1% لە مووچەی بنەڕەتی فەرمانبەر دەبردرێت، ئەوەش ئەو بڕەیە كە ساڵی یەك جار لە فەرمانبەر دەبڕدرێت.
سیستمی پەیرۆڵ لەلایەن فەرمانگەی تەكنەلۆژیای زانیاریی حكومەتی هەرێمی كوردستانەوە كاری لەسەر دەكرێت و سیستمێكی پێشكەوتووی ئەلیكترۆنییەو لە هەرێمی كوردستان نزیكەی هەزار و 400 یەكەی ژمێریاری هەن كە لەو رێگەیەوە موچەی مانگانەیان ئامادە دەبێت.
لە سێمانی سێ تۆمەتبار بە تۆمەتی دزیکردن و شکاندنی جامی ئۆتۆمبێل دەستگیرکران.
بەڕێوەبەرایەتی پۆلیسی پارێزگای سلێمانی بڵاویکردەوە، مەفرەزەکانی نوسینگەی رۆژهەڵاتی بەشی پۆلیسی نەهێشتنی تاوان سێ تۆمەتباریان دەستگیرکرد کە جامی حەوت ئوتۆمبێلیان شکاندبوو دزیان لێکردبوون.
ئاماژەی بەوەشکرد، لەچوارچێوەی چالاکییە بەردەوامەکانی هێزەکانی پۆلیسی پارێزگای سلێمانی بۆ دەستگیرکردنی تۆمەتباران و پاراستنی ئارامیی و ئاسایش و سەرو ماڵی هاووڵاتیان و پاش وەرگرتنی بڕیاری دادوەر، مەفرەزەکانی نوسینگەی رۆژهەڵاتی بەشی پۆلیسی نەهێشتنی تاوان سێ تۆمەتباریان دەستگیرکرد بەتۆمەتی دزی کردن و شکاندنی جامی ئوتۆمبێل.
پۆلیسی سلێمانی راشیگەیاند، لەلێکۆڵینەوەکاندا تۆمەتباران دانیان بەوەدا ناوە کە جامی حەوت ئوتۆمبێلیان شکاندوەو پارەیان لەناو ئوتۆمبێلەکان دزیوە.
قوباد تاڵەبانی، جێگری سەرۆک وەزیران لەگەڵ ئەحمەد داودئۆغڵوو، سەرۆک وەزیرانی پێشوتری تورکیا و سەرۆکی پارتی ئایندە کۆبووەوە و پێکەوە پرۆسەی ئاشتی لە تورکیا و چونییەتی بەهێزترکردنی پەیوەندییەکانی نێوان هەردوولایان تاوتوێ کرد.
لە دەستپێکی کۆبوونەوەکەدا کە ئەمڕۆ بەڕێوەچوو، داودئۆغڵوو باسی لە هاوڕێیەتی 20 ساڵەی خۆی لەگەڵ سەرۆک مام جەلال کرد و پەرۆشی و هەوڵە بەردەوامەکانی سەرۆک مام جەلالی بۆ چارەسەرکردنی ئاشتییانەی کێشەکان لە کوردستان و عیراق و ناوچەکە و بە تایبەتێش پرۆسەی ئاشتی لە تورکیا بیرهێنایەوە.
لە تەوەرێکی کۆبوونەوەکەدا ئاڵۆگۆڕی بیروڕاکرا سەبارەت بە پرۆسەی ئاشتی لە تورکیا. هەردوولا هاوڕابوون لە ئاشتیدا هیچ لایەنێک دۆڕاو نییە و جەختیشیان کردەوە لە گرنگیی پابەندیی لایەنە پەیوەندیدارەکان بە هەنگاونانی پێویست بۆ سەرخستنی پرۆسەکە. لەمبارەیەوە قوباد تاڵەبانی ئاماژەی بەوەدا، سەرکەوتنی پرۆسەی ئاشتی نەک تەنها بۆ هەردوو گەلی کورد و تورک لە تورکیا بەڵکو لە بەرژەوەندی هەموو ناوچەکەدایە، هەربۆیە پێویستە هەموو لایەنێک یارمەتیدەر و هاوکاربن لە سەرخستنی پرۆسەکەدا.
لە بەشێکی دیکەی کۆبوونەوەکەدا باس لە پێویستی کاری هاوبەش کرا بۆ بەهێزترکردنی پەیوەندییەکانی نێوان هەرێمی کوردستان و وڵاتی تورکیا. جێگری سەرۆک وەزیران ئاماژەی بەوەکرد، هەرێمی کوردستان خوازیارە لە هەموو روویەکەوە پەیوەندییەکانی لەگەڵ تورکیادا بەهێزتر بکات و وتیشی، لە بەرژەوەندی هەردوولادایە کە هەرچی زووتر ئاسمانی تورکیا بەڕووی گەشتە ئاسمانییەکانی فڕۆکەخانەی نێودەوڵەتیی سلێمانیدا بکرێتەوە.
پێكهێنانی هاوپەیمانییەك لە نێوان یەكێتی و پارتی، بۆ بەشداریكردن لە هەڵبژاردنی داهاتووی ئەنجومەنی نوێنەرانی عیراق هەڵوەشایەوە و بە لیستی جیا بەشداری دەكەن.
سەعدی ئەحمەد پیرە وتەبێژی یەكێتیی نیشتیمانیی كوردستان رایگەیاند، لەگەڵ پارتی بە لیستی جیا بەشداری هەڵبژاردنی داهاتووی ئەنجومەنی نوێنەرانی عیراق دەكەن.
سەعدی ئەحمەد پیرە وتیشی، لە ناوچە جێناكۆكەكان و پێكهێنانی هاوپەیمانێتیەك بۆ ئەو پرۆسەیە هەڵوەشاوەتەوە.
بەڕێوەبەرایەتی پۆلیسی دارستان و ژینگەی پارێزگای سلێمانی بڵاویکردەوە، بنکەی پۆلیسی دارستان و ژینگەی مێرگەپان لە دوو چالاکی جیاوازدا توانیان چوار سەرپێچیکار بەتۆمەتی زیادەڕۆیی و بەکارهێنانی ( زەوی ) موڵکی گشتی هەروەها دیاردەی بیرهەڵکەندن دەستگیر بکەن .
ئاماژەی بەوەشکردووە، دوای وەرگرتنی زانیاری و بەدواداچوون دەرکەوت هاووڵاتیەک هەستاوە بە تەخت کردنی( زەوی ) موڵکی گشتی و هەڵکەندنی نزیکەی 20 داری تەمەن جیاواز ، هەربۆیە لەلایەن پۆلیسی دارستانی مێرگەپان ئەو سەرپێچیکارە دەستگیرکرا .
پۆلیسی دارستانی سلێمانی راشیگەیاند، مەفرەزەکانی هەمان بنکە توانیان دەست بەسەر ئامێرێکی بیر هەڵکەندندا بگرن لەجۆری (پایڵ) قەبارە بچووک، هاوکات سێ سەرپێچیکار بەتۆمەتی کارکردن و بەکارهێنانی ئەو ئامێری بیرهەڵکەندنە دەستگیرکران .
ئەوەشی خستەڕوو، لەئێستادا پەڕاوی لێکۆڵینەوەی بۆ رێکخراوە بەمەبەستی وەرگرتنی رێکاری یاسایی لەلایەن بەڕێز دادوەری لێکۆڵینەوە .
له دووه‌م رۆژى سه‌ردانيدا بۆ تاران، ئێواره‌ى ئه‌مڕۆ نێچيرڤان بارزانى سه‌رۆكى هه‌رێمى كوردستان، له‌گه‌ڵ عه‌لى ئه‌كبه‌ر ئه‌حمه‌ديان ئه‌ميندارى ئه‌نجومه‌نى باڵاى ئاسايشى نه‌ته‌وه‌يى كۆمارى ئيسلاميى ئێران كۆبووه‌وه.
سەرۆکایەتی هەرێمی کوردستان لە راگەیەندراوێکدا ئاماژەی بەوەداوە: له كۆبوونه‌وه‌كه‌دا په‌يوه‌ندييه‌كانى كۆمارى ئيسلاميى ئێران له‌گه‌ڵ عیراق و هه‌رێمى كوردستان تاوتوێ كرا و ده‌رباره‌ی هه‌ماهه‌نگی و هاريكاريى هاوبه‌شيان به‌تايبه‌تى له بوارى پاراستنى ئاسايش و سه‌قامگیریدا، بیروڕایان گۆڕییه‌وه.
لە راگەیەندراوەکەدا ئاماژە بەوەشدراوە، نێچيرڤان بارزانى جه‌ختى له هه‌ڵوێستى هه‌رێمى كوردستان كرده‌وه كه به هيچ شێوه‌يه‌ك رێگه نادرێت خاك و سنوره‌كانى ببنه سه‌رچاوه‌ى هه‌ڕه‌شه له‌سه‌ر ئاسايشى وڵاتانى دراوسێ، هەروەها دوایین پێشهاته‌کان و دۆخی ڕۆژهه‌ڵاتی ناوه‌ڕاست و چه‌ند پرسێکی جێی بایه‌خی هاوبه‌ش، ته‌وه‌رێکی دیکه‌ی کۆبوونه‌وه‌که بوو.
جارێکی دیکە بۆری ئاوی ئیفرازی سێ لە هەولێر شکا، بەڕێوەبەری ئاوی هەولێریش دەڵێت: بە شکانی ئەو بۆرییە بەشێک لە گەڕەکەکانی شارەکە بێ ئاودەبن.
رابەر حوسێن بەڕێوەبەری ئاوی هەولێر بە کوردسات نیوزی رایگەیاند، بەپێی زانیارییەکان بەهۆی کارکردن لە پرۆژەیەکی کارەبا بۆری ئاوی ئیفرازی سێ شکاوە و بەهۆیەوە لە ٪40ـی هەولێر کێشەی ئاوی بۆ دروست دەبێت.
وتیشی، هەوڵدەدەین لە کەمترین ماوەدا بۆرییەکە چاکبکەینەوە، داواش لە هاووڵاتیان دەکەین تا کێشەکە چارەسەر دەکرێت دەست بە ئاوەوە بگرن و کەم بەکاری بهێنن.
جێگەی ئاماژەیە، لەساڵانی رابردووشدا چەندین جار بۆری ئاوی ئیفرازی سێ لە هەولێر شکاوە و بەهۆیەوە بەشێکی زۆری هاووڵاتیانی هەولێر روبەرووی کەمئاوی دەبنەوە.
پارێزگاری سنە رایگەیاند، بۆ یەکەمجار هەرچوار پارێزگارەکەی هەرێمی کوردستان پێکەوە سەردانی شاری سنە دەکەن.
ئارەش لهۆنی پارێزگاری سنە رایگەیاند، رۆژی سێشەممەی داهاتوو پارێزگارەکانی هەولێر، سلێمانی، دهوک و هەڵەبجە سەردانی شاری سنە دەکەن. وتیشی، سەرنجی سەرەکیی سەردانەکە گەشەپێدانی ئابووری دەبێت لەگەڵ هەرێمی کوردستان.
بە وتەی پارێزگاری سنە، لە کۆبوونەوەکەدا پارێزگارانی کرماشان و ورمێش بەشدار دەبن.
ئارەش لهۆنی راشیگه‌یاند، "تاوەکو ئێستا نەمانتوانیوە بەتەواوی کەڵک لە بازاڕی عێراق وەربگرین وەک پێویست، بەڵام بە لەبەرچاوگرتنی پەیوەندیی کلتووری، دەتوانین پەیوەندییەکان پەرەپێبدەین".