کوردستان
ئەمڕۆ بەهۆی گۆڕانی کەشوهەوا و کەوتنەوەی هەورەبروسکە لە چەند ناوچەیەکی جیاوازی هەرێمی کوردستان، چوار هاووڵاتی بوونە قوربانی، بە جۆرێک سێ کەسیان گیانیان لەدەستداوە و ئەویتریش بریندار بووە.
کاروان حەبیب، پەیامنێری کوردسات نیوز رایگەیاند، لە سنوری خورماتوو هەورەبروسکە لە دوو شوێنی جیاوازدا لە سنوری گوندەکانی (ئاخجەمەشەد) و (ئەلبۆ سەباح)، دوو کەس بەهۆی هەورەبروسکەوە گیانیان لەدەستدا.
بەڕێوەبەری نەخۆشخانەی گشتیی خورماتووش، بە کوردسات نیوزی راگەیاند، تەرمی دوو کەسەکە گەیەندراوەتە نەخۆشخانەی خورماتوو.
دوانیوەڕۆی ئەمڕۆش لە گوندی ئالانی سەر بە ناحیەی زەڕایەن لە سنوری ناحیەی زەرایەن، شوانێکی تەمەن 24 ساڵان، کە بە نەتەوەی عەرەب بوو بە هەمان هۆکار گیانی لەدەستداوە.
هاوكات جگە لەوانەش، ئەمڕۆ لە گوندی دێڵزەی سەر بە قەزای چۆمان، هەورەبروسکە لە ماڵێکداوە و بەهۆیەوە ژنێک بریندار بووە.
مەکتەبی سیاسی یەکێتی، پەیامێکی لە ساڵیادی کۆچی دوایی سەرۆک مام جەلالدا پەیامێکی بڵاوکردەوە و تێیدا هاتووە؛دوای نۆساڵ بەسەر کۆچی دوایی سەرۆک مامجەلالدا، تا ئەمڕۆ ئەندێشە مەزنەکانی سـەرۆک مـام جـەلال بەردی بــناغـەی ئــەم پرۆسـە سیاسیەی عیراقە.
ئاماژەی بەوەشکردوە، مام جەلال وەک یەکەم پێشمەرگەو یەکەم رابەری دیموکراتی، سەرۆکایەتی کۆماری عیراقی فیدراڵی گرتەئەستۆ و بووە پارێزەری دەستووریی لە مافەکانی گەلی کورد و هەموو پێکهاتەکان.
دەقی پەیامەکەی مەکتەبی سیاسی یەکێتی
نۆ ساڵ بەسەر ماڵئاوایی یەکجارەکی ڕابەری نەتەوەیی و نیشتمانیی سەرۆک مام جەلال تێپەڕدەبێت و ئەمڕۆ لەهەر کاتێک زیاتر بەها مەزنەکانی کە تێکۆشانی لە پێناودا کرد، وەک رێگای درەوشاوەی کۆمەڵانی خەڵکی کوردستان و عیراق دووپات دەبێتەوە، رێگای سەرکەوتنی وڵاتێکی دەستووری و فیدراڵی کە هاوبەشی و هاوسەنگی حکومڕانی ڕێنوێنی خەباتی سیاسییان بێت.
سەرۆک مام جەلال بە بەرچاو ڕوونی وتێگەیشتنێکی قووڵەوە لە هەموو قۆناغەکانی گۆڕانکاری سیاسی ناوچەکە و جیهان ، نزیکەی حەوت دەیەی لە تەمەنی پڕ بەرەکەتی خۆی لە خەباتێکی هەمەلایەنەی حزبایەتی ، فیکری ، ڕوناکبیری و پێشمەرگایەتی، بەتایبەتیش لە ڕێبەرایەتی کردنی یەکێتیی نیشتمانیی کوردستان و شۆڕشی نوێی گەلەکەمان، ئینجا لەسەرخستنی ئەزموونی کوردستان و لە دوای پرۆسەی ئازادی عیراقیش لە ڕەگداکوتینی بناغەی وڵاتێکی دەستوریدا خستەگەڕ. لە ترۆپکی ئەم خەباتە درێژخایانەشدا مام جەلال وەک یەکەم پێشمەرگەو یەکەم ڕابەری دیموکراتی، سەرۆکایەتی کۆماری عیراقی فیدراڵی گرتەئەستۆ و بووە پارێزەری دەستووریی لە مافەکانی گەلی کورد و هەموو پێکهاتەکان، بووە سەممام ئەمانی وڵاتێک کە سەرەنجام بەسەر دژوارییەکانی حوکمی دیکتاتۆریی زاڵ دەبێت و ڕوو لە سیستمێکی پەرلەمانی و حکومەتێکی سەربەخۆ و فیدرال دەکات.
بە جۆرێک هەتا ئەمڕۆش ئەندێشە مەزنەکانی سەرۆک مام جەلال ستوونی پتەوی ئەزموونەکەمان و بەردی بناغەی ئەم پرۆسە سیاسییەی عیراقیشە.
بێگومان یەکێتیی نیشتمانیی کوردستان بە سەرۆکایەتی سەرۆک بافل جەلال تاڵەبانی هەم شانازیی بەم پێگە سەربەرزەی سەرۆک مام جەلالەوە دەکات و هەمیش وەفاداری درێژەپێدانی کەلتورەکەیەتی لە هەلومەرجی تازەی ناوچەکەدا. بۆیە سەر لەنوێ پابەندبوونی خۆی بەو ڕێبازە ئاوەدانە دووپات دەکاتەوە کە تێکۆشانی گەلی کوردستانی پایەدار کرد، عیراقی لە دیکتاتۆری رزگارکرد و نەخشەڕێی چارەسەری دەستووری کێشەکانی داڕشت، بە کێشەی ناوچە دابڕاوەکانی کوردستانیشەوە، بەتایبەتی کەرکوک ، وەک شاری برایەتی و پێکەوەژیان.
لەم بۆنە سەنگینەی
یادی نۆساڵەی کۆچی دوایی سەرۆک مام جەلالدا
درود بۆ گیانی بەرزەفڕی ڕابەری گەورەی نەتەوەیی و نیشتمانیمان.
ڕۆحی گشت شەهیدانی رێی ئازادی کوردستان و عیراق شاد و ئاسوودە بێت.
مەکتەبی سیاسیی
یەکێتیی نیشتمانیی کوردستان
سبەینێ 3ـی10ـی2025 نۆ ساڵ کۆچی دوایی، سکرتێری گشتیی یەکێتیی نیشتیمانیی کوردستان و سەرۆک کۆماری پێشووتری عیراق تێدەپەڕێت، کە هەمووان بێ جیاوازی سیاسی و ئاینی و نەتەوەیی، بە سەرۆک و کاربەدەستانی وڵاتانى جیهانەوە بۆی تاسەبارو چاو بە فرمێسک بوون.
سەرۆک مام جەلال وەک یەکەم کورد و یەکەم سەرۆک کۆماری عیراق دوای روخانی رژێمی بەعس، لە رۆژی 6 ی نیسانی 2005 بۆ یەکەمجار لە مێژووی عیراقدا وەک کوردێک بووە سەرۆک کۆماری عیراق.
سەرۆک مام جەلال لە ناوەڕاستی ساڵی 1970 لەگەڵ خاتوو هێرۆ ئیبراهیم ئەحمەد هاوسەرگیریی کردووە، مام جەلال لەگەڵ ئەوەی خوێندکار بووە لە بەغداد و دوای تەواوکردنیشی لە کاری سیاسی و رێکخراوەیی بەردەوامبووە.
لەدوای روخانی رژێمی بەعس، لە ساڵی 2003، سەرۆک مام جەلال ئەندامی مەجلیسی حوکمی عیراق بووە و بۆ خولێکیش سەرۆکی ئەو مەجلیسە بووە، لە داڕشتنەوەی دەستوری عیراقدا رۆڵی سەرەکیی گێڕاوە.
سەرۆک مام جەلال لە رۆژی 17ـی12ـی2012 تەندروستی تێکچوو، دواتر چەندین جار بەمەبەستی چارەسەری پزیشکی سەردانی ئەڵمانیا و نەخۆشخانەکانی کرد و دەگەڕایەوە بۆ کوردستان، بەڵام ئیتر تەندروستی رێگەی نەدا درێژە بە کاروانی خەباتی رزگاریخوازی گەلی کورد بدات و هەر بەهۆی نەخۆشییەکەوە دوای زیاتر لە نیو سەدە خەبات لە رۆژی 3ـی10ـی2017، لە تەمەنی 84 ساڵیدا لە وڵاتی ئەڵمانیا ماڵئاوایی لە گەلەکەی و تەواوی ئازادیخوازان کرد.
ماڵپەری شەفافیەت بۆ چاودێری و رێكخستنی داهاتە نانەوتییەكانی سلێمانی و هەڵەبجە و هەردوو ئیدارەی راپەڕین و گەرمیان داهاتی ئەم هەفتەیەی بڵاوکردەوە کە زیاتر لە حەوت ملیار و 183 ملیۆن دینارە.
ئەمڕۆ هەینی، ماڵپەری شەفافیەت بڵاویکردەوە، داهاتی یەک هەفتەی سلێمانی لە رۆژی(26ـی 9ـی 2026 بۆ 2ـی 9ـی 2026) داهاتی نانەوتی، لە سلێمانی و هەڵەبجە و هەردوو ئیدارەی راپەڕین و گەرمیان، حەوت ملیار و 183 ملیۆن و 513هەزار دینار بووە.
ئاماژەی بەوەشکردوە، لەو داهاتە لە 86%ی بەشێوەی نەختینەیە و 14%ی داهاتەكە بەشێوەی چەكە و بەراورد بە هەفتەی رابردوو داهات کەمیی کردوە.
جێگەی ئاماژەیە، پڕۆژەی شەفافییەت لە داهات و خەرجی، لەسەر راسپاردەی قوباد تاڵەبانی جێگری سەرۆک وەزیرانی هەرێم دامەزرا، ئێستا رۆژانە لە رێگەی ئەو ماڵپەڕەوە دەتوانیت سەرجەم داهاتە نانەوتییەکانی هەردوو پارێزگای سلێمانی و هەڵەبجە و ئیدارە سەربەخۆکانی راپەڕین و گەرمیان بزانیت
کەشناسیی هەرێم رایگەیاند، کەشوهەوا ناجێگیر دەبێت و نمەباران وبارانی مامناوەند بەردەوام دەبێت؛ پلەکانی گەرماش نزم دەبنەوە.
بەڕێوەبەرایەتی گشتیی کەشناسیی و بومەلەرزەزانی هەرێم پێشبینی 48 سەعاتی داهاتوی بۆ کەشوهەوا بڵاوکردوەتەوە، بە گوێرەی پێشبینییەکانیش نمەباران و بارانی مامناوەند بە شێوازی پچڕ پچر لە چەند ناوچەیەکی هەرێم دەبارێن، بە تایبەت لە ناوچە شاخاوییەکان.
ئەمڕۆ هەینی، کەشناسیی هەرێم ئاماژەی بەوەکردوە پلەکانی گەرما یەک بۆ دوو پلە نزمدەبنەوە بەراورد بە دوێنێ و بارانبارین بەردەوام دەبێت.
لەبارەی کەشی سبەینێوە، کەشناسی دەڵێت؛ پلەکانی گەرما نزیک دەبن لە تۆمارکراوەکانی ئەمڕۆ و بارانبارین بە هەمانشێوە بە شێوازی پچڕ پچڕ بەردەوام دەبێت.
بەرزترین پلەکانی گەرمای پێشبینیکراو بە پلەی سیلیزی بۆ سبەینێ بەمشێوەیە دەبێت؛
هەولێر: 29 پلەی سیلیزی
سلێمانی: 25 پلەی سیلیزی
دهۆک: 27 پلەی سیلیزی
هەڵەبجە:28 پلەی سیلیزی
سۆران : 27 پلەی سیلیزی
پیرمام: 24 پلەی سیلیزی
چەمچەماڵ: 28 پلەی سیلیزی
زاخۆ: 30 پلەی سیلیزی
ئاکرێ: 27 پلەی سیلیزی
گەرمیان: 33 پلەی سیلیزی
حاجی ئۆمەران: 20 پلەی سیلیزی
توركش ئێرلاین گەشتەكانی بۆ فڕۆكەخانەی نێودەوڵەتیی جەلال تاڵەبانی دەستپێكردەوە
هێڵی ئاسمانی توركش ئێرلاین گەشتە ئاسمانییەكانی بۆ فڕۆكەخانەی نێودەوڵەتیی جەلال تاڵەبانی دەستپێكردەوە و بریارە هەفتانەش چوار گەشت ئەنجام بدات.
بەپێی راگەیەنراوێكی فڕۆكەخانەی نێودەوڵەتیی جەلال تاڵەبانی، ئەمڕۆ هێڵی ئاسمانی توركش ئێرلاین گەشتە ئاسمانییەكانیان بۆ فرۆكەخانەكە دەستپێكردەوە.
بەپێی راگەیەنراوەكە، هێڵی ئاسمانی توركش ئێرلاین لە سەرەتادا هەفتانە چوار گەشت لە نێوان (ئەستەنبول-سلێمانی-ئەستەنبول) ئەنجام دەدات.
ئەوە لەكاتێكدایە پێشتریش هەریەك لە كۆمپانیاكانی هێڵی ئاسمانی ئەی جێت و پیگاسۆسی توركی گەشتەكانیان بۆفرۆكەخانەی نێودەوڵەتی جەلال تاڵەبانی دەستپێكردەوە.
رۆژی یەکشەممە ئەنجامی زانکۆلاین بۆ دەرچووانی قۆناغی 12ـی ئامادەیی رادەگەیەنرێت.
وەزارەتی خوێندنی باڵا و توێژینەوەی زانستیی هەرێمی کوردستان ئاشکرایکرد، رۆژی یەکشەممە 4ـی10ـی2026، لە کۆنفڕانسێکی رۆژنامەوانیدا ئەنجامەکانی وەرگرتنی دەرچووانی قۆناغی 12ـی ئامادەیی لە زانکۆ و پەیمانگاکان بۆ ساڵی خوێندنی '2026-2027 ئاشکرا دەکرێت.
ئاماژەی بەوەشکرد، راستەوخۆ دوای راگەیاندنی ئەنجامەکان، پرۆسەی خوێندنی قۆناغی یەکەم لە زانکۆکان دەستپێدەکات.
وەزارەتی خوێندنی باڵا داواش لە وەرگیراوان دەکات بە زووترین کات پەیوەندی بە زانکۆکانیانەوە بکەنبۆ تەواوکردنی مامەڵەکانیان، جەختیشی کردەوە کە تەواوی زانکۆکان ئامادەکارییان کردووە بۆ پێشوازیکردن لە خوێندکارانی نوێ.
قوباد تاڵەبانی، لێپرسراوی مەکتەبی سکرتارییەتی سەرۆک مام جەلال بە ئامادەبوونی هەڤاڵ دێوالی رەمەزان، لێپرسراویی مەڵبەندی 4ـی د‌هۆکی رێکخستنەکانی یەکێتی لەگەڵ ئەندامانی ئەنجومەنی مەڵبەندی دهۆک کۆبووەوە.
لە کۆبوونەوەکەدا کە رۆژی پێنجششەمە 1ـی 10ـی 2026 بەڕێوەچوو، بە ئاماژەدان بە گرنگیی دەڤەری بادینان بۆ یەکێتیی نیشتمانیی کوردستان، روونیکردەوە گۆڕانکارییەکان لە رێکخستنەکان بۆ بەهێزکردنەوەی پێگەی یەکێتییە لەو سنوورەدا. پشتیوانی تەواوی خۆشی بۆ ئەندامانی ئەنجومەنی مەڵبەند دەربڕی بۆ ئەوەی بتوانن بە باشترین شێوە سیاسەتی یەکێتی لە سنووری بادینان جێبەجێ بکەن و رێکخستنەکان ببووژێننەوە.
سەبارەت بە رەوشی یەکێتیش، لێپرسراوی مەکتەبی سکرتارییەتی سەرۆک مام جەلال ئاماژەی بەوەکرد: یەکێتی بە سەرکردایەتی سەرۆک بافڵ جەلال تاڵەبانی، سیاسەتێکی روون و شەفافی هەیە و لەگەڵ دەنگدەرەکانی راستگۆیە و پابەندە بە هەموو ئەو بەڵێنانەی لەکاتی هەڵبژاردن بە دەنگدەرانی داوە.
روونیشیکردەوە، لەم قۆناغەدا یەکێتی لە هەموو کات بەهێزترە و لەسەر ئاستی عیراق و ناوچەکەدا بۆ پرسە گرنگەکان حیسابی تایبەت بۆ سیاسەت و هەڵوێستی یەکێتی دەکرێت. وتیشی: لە دوای سەرۆک مام جەلالەوە هیچ کاتێک پەیوەندییە نێودەوڵەتییەکانی یەکێتی وەک ئێستا بەهێز نەبووە و سەرۆکی یەکێتی بە بەردەوامی لەگەڵ ناوەندەکانی بڕیاری نێودەوڵەتی لە پەیوەندیدایە.
سەرچاوەیەکی تایبەت لە دەزگای ئاسایشی هەرێم دەڵێت، "ئەو گۆڕانکاریانەی لە ماوەی رابردوودا لە شوێنی ژمارەیەک لە بازگەکانی ئیدارەی گەرمیان کراوە بەپێی پلانێکی وردی تۆکمە بووە و زۆربەی ئەو شوێنانە دەگرێتەوە، کە پێویستیان بە گۆڕانکارییە".
سەرچاوەیەکی تایبەت لە دەزگای ئاسایشی هەرێمی کوردستان بە کوردسات نیوزی راگەیاند، ئەو گۆڕانکاریانەی لە ماوەی رابردوودا لە شوێنی ژمارەیەک لە بازگەکانی ئیدارەی گەرمیان کراوە لە دەرئەنجامی پلانێکی وردی تۆکمە و بەرنامەبۆدارێژراوی ئەمنیی دەزگای ئاسایشی هەرێمی کوردستان بووە.
ئەو سەرچاوەیە ئاماژەی بەوەشکرد، تەنها ئیدارەی گەرمیان ناگرێتەوە، بەڵکو زۆربەی ئەو شوێنانە دەگرێتەوە، کە پێویستیان بە گۆڕانکاری هەیە لەوانە بازگەی ئێستای عەربەت لە شوێنی ئێستای نامێنێت و دەگوازرێتەوە بۆ پشتی شەقامی 100 مەتری لەسەر هەمان رێگەی سەرەکی.
هەروەها بازنەی بانی مەقان دەگوازرێتەوە بۆ قەرەهەنجیر، کە ئامانج لەم گۆڕانکاریانە رێکخستنەوەی زیاتری بازگەکان و کارئاسانییە بۆ هاووڵاتیان و پاراستنی زیاتری ئاسایش و ئارامی هەرێمی کوردستانە و بەهۆی فراونبوونی سنوری جوگرافیای شارەکان و رێگە سەرەکییەکان واپێویست دەکات گۆرانکاری لە شوێنی هەندێک لە بازگەکاندا بکرێت.
سەرچاوەکەی دەزگای ئاسایشی هەرێمی کوردستان دەشڵێت: دەزگاکەیان ئارامی و پاراستنی بست بەبستی خاکی هەرێمی کوردستان و خەڵکەکەی بە ئامانەتێکی گەورەی سەرشانیان دەزانن و سازش لەسەر بستێکی خاکی هەرێم ناکات، وەک هەمیشە بەو پەڕی هێزو توانایانەوە لە ئەرکدا دەبن بۆ پاراستنی سەرو ماڵی هاووڵاتیان و ئاسایشی هەرێمی کوردستان.
وەفدێک لە بەغدادەوە دێنە هەولێر و گفتوگۆ لەسەر گۆڕانکاری کارتی زانیاری دەکرێت و پەیامنێری کوردسات نیوزیش دەڵێت، "پێشنیازێک هەیە کارتی زانیاری هەر نەمێنێت".
بڕیار محەمەد، پەیامنێری کوردسات نیوز رایگەیاند: بڕیار وایە لە هەفتەی داهاتوودا وەفدێکی باڵای سەربازی و کارگێڕی لە بەغدادەوە بگەنە هەولێر و سەردانی بەڕێوەبەرایەتی رەگەزنامە و کارتی زانیاری هەرێمی کوردستان بکەن.
بەپێی زانیارییەکانی پەیامنێری کوردسات نیوز، گفتوگۆ لەبارەی تۆمارکردن و نوێنکردنەوەی کارتی زانیاری دەکرێت، کارتی زانیاری دەکرێتە ئەلیکترۆنی و بەو شێوەیەی ئێستا نامێنێت، بەشێک لە ئامێرەکان کە پێویستن بۆ پڕۆسەکە گەیشتونەتە هەولێر و پێشتریش راهێنان بە کارمەندەکان کراوە.
بڕیار محەمەد دەشڵێت: چەند پێشنیازێک هەیە، یەکێک لەوانە ئەوەیە کە رێکارەکانی دەرهێنانی کارتی زانیاری ئاسان بکرێت، پێشنیازێکی تریش ئەوەیە کە کارتی زانیاری نەمێنێت.
پەیامنێری کوردسات نیوز ئاماژەی بەوەشدا: لەمەودوا کار بەو کارتە زانیاریانە ناکرێت کە هاووڵاتیان هەیانە و هەمووی دەکرێتە ئەلیکترۆنی، بەشێکی راگیرانی ئەو مامەڵانەی کە بۆ دەرهێنانی کارتی زانیاری کراوە پەیوەندی بەو بابەتەوە هەیە.
وەزارەتی سامانە سروشتییەکانی هەرێم رایگەیاند، پرۆسەی چاکسازی لە کێڵگەی کۆرمۆر، کاریگەری لە رێژەی غازی ماڵان ناکات.
وەزارەتی سامانە سروستییەکانی هەرێم راگەیەندراوێکی بڵاوکردەوە و تێیدا هاتووە؛ هاوڵاتیان دڵنیا دەکەینەوە پڕۆسەی چاکسازیی کۆمپانیای داناغاز کە لە ماوەی مانگێک بەڕێوەدەچێت، بەهیچ شێوەیەک کاریگەریی لەسەر کەمبونەوەی غازی ماڵان ناکات
ئەماژەی بەوەشکردوە، لە ئێستادا بڕی بەرهەمهێنانی غاز 640 لە ملیۆن پێ سێجا بووە و لە چاکسازییەکەدا بڕی بەرهەمهێنانی غاز دەبێتە 520ملیۆن پێ سێجا.
سامانە سروستییەکان هاووڵاتیان دڵنیادەکاتەوە، بڕی کەمبونەوەی غاز بەهۆی چاکسازییەکەی دانا غازەوە کەمە و هیچ کاریگەرییەکی لەسەر غازی ماڵان نابێت.
وەزارەتی کارەبای هەرێم، رایگەیاند کۆمپانیای دانا غاز پرۆسەی چاکسازی لە کێڵگەی کۆرمۆر دەستپیدەکات و بۆ ماوەی یەک مانگ چەند سەعاتێک پێدانی کارەبا بە هاوبەشان کەمدەبێتەوە.
وەزارەتی کارەبای هەرێم راگەیەندراوێکی بڵاوکردوەتەوە و تێیدا هاتووە؛ هاوبەشانی كارەبا ئاگادار دەكاتەوە بۆ ماوەی یەک مانگ و لە رۆژیی 2ـی10 تا 2ـی 11 چەند سەعاتێک پێدانی کارەبا کەمدەبێتەوە.
وەزارەتی کارەبا دەڵێت؛ هۆکاری کەمبونەوەی کارەبا دەستپێکردنی پرۆسەی چاکسازییە لە كێڵگەی كۆرمۆر لەلایەن کۆمپانیای دانا غازەوە.
ئاماژە بەوەکراوە، وەزارەتی كارەبا و وەزارەتی سامانە سروشتییەكان هەماهەنگ دەبن بۆ ئەوەی پرۆسەكە كەمترین كاریگەریی لەسەر پێدانی سەحاتەکانی كارەبا هەبێت لەناو پرۆژەی روناکی.
وەزارەتی کارەبا ئاماژەی بەوەشکردوە، ساڵانە پرۆسەی چاكسازیكردن لە كێڵگەی كۆڕمۆر لەم کاتەدا ئەنجام دەدرێت، چونکە پلەكانی گەرما نزمدەبنەوە و بۆ و كەمترین كاریگەریی لەسەر پێدانی کارەبا دەبێت.
فراکسیۆنی یەکێتیی نیشتمانیی کوردستان لە بەغداد لە رۆژی سەروەریی عیراقدا راگەیەندراوێکی بڵاوکردەوە و تێیدا هاتووە؛ جەخت لەسەر سەربەخۆیی عیراق و مافی بریاردانی دەکەینەوە
فراکسیۆنی یەکێتیی نیشتمانیی کوردستان ئاماژەی بەوەکردوە، تەواوبوونی سەروەری و پاراستنی پێویستی بە کارێکی جدییە بۆ کۆنترۆڵکردنی چەک لە دەستی دەوڵەتدا و تەنها دەوڵەت خاوەنی بڕیاری جەنگ و ئاشتی بێت.
دەقی راگەیەندراوەکەی فراکسیۆنی یەکێتیی نیشتمانیی کوردستان لە بەغداد
فراکسیۆنی یەکێتیی نیشتمانیی کوردستان جەخت لەسەر سەربەخۆیی عێراق و مافی بریاردانی دەکاتەوە کە لە ئیرادەی گەلەکەیەوە سەرچاوە بگرێت؛ چونکە سەروەری گوزارشتە لە ناسنامەی دەوڵەت، هاوکات لەگەڵ تەواوبوونی کشانەوەی هێزەکانی هاوپەیمانیی نێودەوڵەتی بۆ ئەوەی هێزە ئەمنییەکانی عێراق بە هەموو جۆرەکانیەوە بەرپرسیارێتیی پاراستنی ئاسایش و سەروەریی وڵات بگرنە ئەستۆ. تەواوبوونی سەروەری و پاراستنی پێویستی بە کارێکی جدییە بۆ کۆنترۆڵکردنی چەک لە دەستی دەوڵەتدا و تەنها دەوڵەت خاوەنی بڕیاری جەنگ و ئاشتی بێت، سەرباری سەروەریی یاسا و سەربەخۆیی دارایی و ئابووری و هەمەجۆرکردنی سەرچاوەکانی داهات لەگەڵ دەستەبەرکردنی یەکسانی و دادپەروەریی ڕاستەقینە بۆ سەرجەم هاووڵاتییان؛ تاوەکو ئەو ڕێڕەوە درێژەی گەلەکەمان تەواو بێت کە تێیدا قوربانیی بەخشیوە و دەستکەوت و سەرکەوتنی بەدەستهێناوە، ئەویش پێویست دەکات هەموومان کار بکەین بۆ پاراستنیان و هەوڵدان بۆ گەڕاندنەوەی متمانەی کۆمەڵگەی نێودەوڵەتی بە عێراق تاوەکو هەنگاو بنێین بەرەو قۆناغێکی نوێ بۆ ئاوەدانکردنەوەی نیشتمان و گەشەپێدانی گشت سێکتەرەکان.
لە هەمان کاتدا پشتیوانی و پشتگیریی خۆمان بۆ بەڕێز سەرۆک وەزیران و کابینەی وزاریەکەی و هەوڵەکانی لەم بوارەدا ڕادەگەیەنین لە پێناو تەواوکردنی سەروەری و سەپاندنی سەروەری یاسا و بنبڕکردنی گەندەڵی.
هەروەها، هەوڵەکانی هێزەکانی هاوپەیمانیی نێودەوڵەتی و هێزە ئەمنییە قارەمانەکانمان و هێزەکانی پێشمەرگە و حەشدی شەعبی بەرز دەنرخێنین لە کاتی ڕوبەروبونەوەی بەرامبەر باندە تیرۆریستییەکان و پاککردنەوەی عێراق لە تاریکپەرستان.
گەرمترین پیرۆزبایی ئاراستەی ڕۆڵەکانی گەلەکەمان دەکەین و بەوپەڕی ڕێز و نەوازشەوە لە ئاست گیانی پاکی شەهیدانمان دەوەستین کە هەموو شتێکی خۆیان بەخشی لە پێناو پاراستنی عێراق و گەلەکەیدا.
فراکسیۆنی یەکێتیی نیشتمانیی کوردستان
١ی تشرینی یەکەمی ٢٠٢٦
کەشناسیی هەرێم رایگەیاند، کەشوهەوا ناجێگیر دەبێت و لە چەند ناوچەيەک باران دەبارێت و هەورەبروسکەشی لەگەڵ دەبێت.
بەڕێوەبەرایەتی گشتیی کەشناسیی و بومەلەرزەزانی هەرێم پێشبینی 48 سەعاتی داهاتوی بۆ کەشوهەوا بڵاوکردوەتەوە، بە گوێرەی پێشبینییەکانیش نمەباران و بارانی مامناوەند بە شێوازی پچڕ پچر لە چەند ناوچەیەکی هەرێم دەبارێن، بە تایبەت لە ناوچە شاخاوییەکان.
کەشناسیی هەرێم ئاماژەی بەوەکردوە بەهۆی هاتنی نزمە پاڵە پەستۆی دەریای ناوەراست کەش وهەوا بە گشتی ناجێگیر دەبێت و لە هەندێک ناوچە هەورە بروسکەش رودەدات.
لەبارەی کەشی سبەینێوە، کەشناسی دەڵێت؛ پلەکانی گەرما یەک بۆ دوو پلە بەراورد بە ئەمرۆ نزمدەبنەوە و بارانبارین بە شێوازی پچڕ پچڕ بەردەوام دەبێت.
بەرزترین پلەکانی گەرمای پێشبینیکراو بە پلەی سیلیزی بۆ سبەینێ بەمشێوەیە دەبێت؛
هەولێر: 29 پلەی سیلیزی
سلێمانی: 28 پلەی سیلیزی
دهۆک: 28 پلەی سیلیزی
هەڵەبجە:29 پلەی سیلیزی
سۆران : 27 پلەی سیلیزی
پیرمام: 24 پلەی سیلیزی
چەمچەماڵ: 29 پلەی سیلیزی
زاخۆ: 29 پلەی سیلیزی
ئاکرێ: 27 پلەی سیلیزی
گەرمیان: 33 پلەی سیلیزی
حاجی ئۆمەران: 20 پلەی سیلیزی
قوباد تاڵەبانی داوا دەكات هاوكارییەكانی كۆریای باشور لە هەرێم تەنها بۆ شارە گەورەكان نەبێت، بەڵكو قەزا و ناحییەكانیش بگرێتەوە.
قوباد تاڵەبانی جێگری سەرۆك وەزیرانی هەرێم لە هەولێر پێشوازیكرد لە گیۆ شیم كونسوڵی نوێی كۆریای باشوور لە هەرێم و ئامادەیی دەربڕی بۆ هەموو جۆرە هاوكاریی و هەماهەنگییەك بە مەبەستی پتەوكردنی پەیوەندییەكانی نێوان هەرێمی كوردستان و كۆریای باشوور، داواشیكرد، هاوكارییەكانی كۆریای باشور تەنها بۆ شارە گەورەكان نەبێت، بەڵكو قەزا و ناحییەكانیش بگرێتەوە، بە تایبەتی لە چوارچێوەی پرۆژەی گەشەپێدانی ناوچەییدا هاوكاری دەزگای پەرەپێدانی راپەڕین بكرێت.
لە بەشێكی تری كۆبوونەوەكەدا، قوباد تاڵەبانی داوایكرد حكومەتی كۆریای باشور لە راهێنان و گواستنەوەی شارەزایی و ئەزموندا هاوكاری دەزگای "هەب فاوندەیشن" بكات، خۆشحاڵیشی دەربڕی لە رێكخستنی فێستیڤاڵی كلتووریی كۆریا كە بڕیارە مانگی داهاتوو لە سلێمانی لەلایەن كونسوڵخانەی كۆریای باشورەوە بەڕێوەبچێت.
لە رۆژی کۆتاییهاتنی ئەرکی سەربازیی هاوپەیمانان لە عیراق، سەرۆکی ئاژانسی پاراستن و زانیاری / زانیاری، رایدەگەیەنێت، باوەڕی تەواویان بە توانای دامەزراوە هەواڵگری و سەربازییەکانی هەرێم و عیراق هەیە بۆ پاراستنی سەروەریی نیشتمان.
جەلال شێخ ناجی، سەرۆکی ئاژانسی پاراستن و زانیاری / زانیاری راگەیەنراوێکی بڵاوکردەوە و رایگەیاند، بەڕێزەوە لە رۆڵی هێزەکانی هاوپەیمانان دەڕوانین لە پشتگیری و هاوکاریکردنی گەلی کورد و عیراق و دامودەزگا ئەمنی و سەربازییەکان و پێزانینمان هەیە بۆ قوربانییەکانیان.
سەرۆکی ئاژانسی پاراستن و زانیاری / زانیاری، جەختیشی لە تواناکانی هێزە ناوخۆییەکان کردەوە و ئاشکرایکرد، باوەڕمان بە توانای بەهێزی دامەزراوە هەواڵگری و سەربازییەکانی هەرێم و عیراق هەیە کە دەتوانن سەروەریی خاکەکەمان بپارێزن.
ئەوەشی خستەڕوو، لەم رۆژەدا جەخت لە پێویستیی هەماهەنگی و هاریکاریی بەردەوامی سەرجەم دامەزراوە هەواڵگری و سەربازییەکانی هەرێم و عیراق دەکەینەوە لەپێناو پاراستنی ئاسایشی نیشتمانیی وڵاتەکەمان.