کوردستان
بافڵ جەلال تاڵەبانی، سەرۆکی یەکێتیی نیشتمانیی کوردستان لە ماڵی مام لە بەغداد پێشوازی لە محەمەد سەمعان ئاغا، پارێزگاری کەرکوک کرد.
لە دیدارێکدا جەخت لە هەماهەنگی و بەهێزکردنی پەیوەندیی نێوان نەتەوە و پێکهاتەکانی کەرکوک کرایەوە، لەپێناو زیاتر خزمەتکردنی خەڵکی شارەکە.
هەر لە دیدارەکەدا بافڵ جەلال تاڵەبانی وتی، کەرکوک نمونەی پێکەوەژیان و تەباییە، پێویستە هەموومان پێکەوە کار بکەین بۆ چەسپاندنی سەقامگیری و دابینکردنی مافی ڕەوای کەرکوکییەکان بەبێ جیاوازی.
لە گەرمیان بڕیارێکی نوێ لەبارەی پرۆسەی دابەشکردنی بەنزین بەسەر ئۆتۆمبێلە بێسەرەتاکاندا دەرکراو شوێن و کاتی وەرگرتنی بەنزینیان بۆ دیاریکرا.
بەپێی راگەیەنراوێکی بەڕێوەبەرایەتیی نەوت و کانزاکانی گەرمیان ، لە پێناو بەرژەوەندیی گشتیی شۆفێران و بۆ رێگریکردن لە دووبارە وەرگرتنەوەی بەنزین لە یەک رۆژدا لەلایەن بەشێک لە ئۆتۆمبێلە بێسەرەتاکانەوە، لە رۆژی پێنجشەممەوە ئۆتۆمبێلە بێتابلۆ و تابلۆ کاتییەکان تەنها لە وێستگە و کاتە دیاریکراوەکاندا دەتوانن بەنزین وەربگرن؛ بە شێوازێک لە کەلار لە (وێستگەی مرواری - گردەگۆزینە) تەنها رۆژانی یەکشەممە و پێنجشەممە، لە رزگاری لە (وێستگەی دەروو) تەنها رۆژانی سێشەممە، و لە کفریش لە (وێستگەی میر) تەنها رۆژانی چوارشەممە بەنزینیان پێ دەدرێت.
نەوت و کانزاکانی گەرمیان جەختیشی کردووەتەوە، لە کات و وێستگە دیاریکراوەکاندا هیچ ئۆتۆمبێلێکی تابلۆدار بەنزینی پێ نادرێت و لە مەودوا پرۆسەی پێدانی بەنزین بە ئۆتۆمبێلە بێسەرەتاکان لە رێگەی تۆمارکردنی (ژمارەی شاسی) دەبێت لە سیستمدا، بە جۆرێک هەر شۆفێرێک لە ماوەی حەوت رۆژدا تەنها یەک جار دەتوانێت بەنزین وەربگرێت.
عیراق بڕی زیاتر لە 58 ملیار و 633 ملیۆن دیناری بۆ جوتیارانی هەرێم خەرجكرد.
نەوزاد كامیل، بەڕێوەبەری گشتی بازرگانی لە وەزارەتی بازرگانی هەرێم بە كوردسات نیوزی راگەیاند، حكومەتی عیراق بڕیاریداوە بە خەرجكردنی 350 ملیار دیناری بۆ شایستەی دارایی جووتیارانی ساڵی 2025، لەو بڕەش 58 ملیار و 633 ملیۆن و 889 هەزار دیناری بۆ جووتیارانی هەرێمی كوردستان تەرخانكراوە.
وتیشی، 21 ملیار و 908 ملیۆن دینار بۆ پارێزگای سلێمانی و 19 ملیار و 726 ملیۆن دینار بۆ پارێزگای هەولێر و 16 ملیار و 999 ملیۆن دیناری بۆ پارێزگای دهۆك تەرخانكراوە.
کاروان ستونی، وتەبێژی بەڕێوەبەرایەتیی گشتیی حەج و عومڕەی هەرێمی کوردستان، چەند بڕیارێکی نوێی سەبارەت بە کۆمپانیاکانی گواستنەوەی عومرەکاران ئاشکرا کرد.
کاروان ستونی رایگەیاند: ئەو کۆمپانیایانەی لە ساڵی 2025 گرێبەستیان ئەنجامداوە، بەردەوام دەبن لەسەر کارەکانیان تا ئەو کاتەی رێنمایی نوێ لەلایەن بەڕێوەبەرایەتییەکەوە دەردەچێت.
سەبارەت بە کۆمپانیا نوێیەکان، وتەبێژی حەج و عومرە ئاماژەی بەوە کرد کە هەموو ئەو کۆمپانیایانەی لە ساڵی 2025 گرێبەستیان نەکردووە یان بە تازەیی دامەزراون و مۆڵەتی کارکردنیان وەرگرتووە، بەپێی مەرج و رێنماییەکانی ساڵی 2025 گرێبەستی کاتییان لەگەڵدا دەکرێت تا کاتی دەرچوونی رێنماییە نوێیەکان.
لە کۆتاییدا ئاماژەی بەوەش کرد: ئەم بڕیارانە لە ئەمڕۆوە، چوارشەممە 19ی ئابی 2026، دەچنە بواری جێبەجێکردنەوە.
شاناز ئیبراهیم ئەحمەد، ئەندامی مەکتەبی سیاسیی یەکێتیی نیشتمانیی کوردستان لە شاری سلێمانی سەردانی دامەزراوەی سەرۆک جەلال تاڵەبانی کرد و لەلایەن باڵیۆز د. محەمەد سابیر، سەرۆکی دامەزراوەکە و یوسف زۆزانی، جێگری سەرۆکی دامەزراوەکەوە پێشوازیی لێکرا.
لە دیدارێکدا، شاناز ئیبراهیم ئەحمەد دەستخۆشی لە بەڕێوەبەرانی دامەزراوەکە کرد بۆ هەوڵەکانیان لەپای گۆڕینی ناوی فڕۆکەخانەی نێودەوڵەتیی سلێمانی بۆ "فڕۆکەخانەی نێودەوڵەتیی جەلال تاڵەبانی" و چەسپاندنی لە سیستمی فڕۆکەوانیی مەدەنی و خشتەی گەشتە نێودەوڵەتییەکاندا.
دوا بەدوای تاوتوێکردنی هەوڵ، هیممەت و پرۆژەکانی داهاتووی دامەزراوەکە، شاناز ئیبراهیم ئەحمەد بەشەکانی دامەزراوەکە و پانۆرامای وێنەیی وێستگەکانی ژیان و خەباتی سیاسی و دیپلۆماتیی سەرۆک مام جەلالی بەسەرکردەوە.
عەبدوڵا حاجی مەحمود، وەزیری کاروباری شەهیدان و ئەنفالکراوانی حکومەتی هەرێمی کوردستان لە میانی بەشداریکردنی لە بەرنامەی پرسی رۆژی کوردسات نیوز، کۆمەڵێک بڕیار و پێشهاتی نوێی سەبارەت بە موچە و دۆسیەی زیندانیانی سیاسی و کەسوکاری شەهیدان راگەیاند.
وەزیری کاروباری شەهیدانی حکومەتی هەرێم ئاماژەی بەوە کرد: ناو و دۆسیەی تەواوی زیندانیانی سیاسیی هەرێمی کوردستان دەگوازرێتەوە بۆ سەر حکومەتی فیدراڵیی عیراق، و سەرجەم زیندانیانی سیاسی لە چوارچێوەی پروژەیاسای ساڵی 2027دا تۆمار کراون.
لەلایەکی ترەوە، وەزیر روونی کردەوە: بەپێی یاسا و پلەبەندی، موچەی زیندانیانی سیاسیی هەرێم هاوتای موچەی عیراق دەکرێت.
سەبارەت بە موچەی شەهیدان، ئاشکرای کرد: موچەکانیان لە 250 هەزار دینارەوە بەرز دەکرێتەوە بۆ 600 هەزار دینار.
بەڕێوەبەرایەتیی گشتیی تاقیکردنەوەکان لە وەزارەتی پەروەردەی حکومەتی هەرێمی کوردستان، گشتاندنێکی رەسمی ئاڕاستەی سەرجەم بەڕێوەبەرایەتییە گشتییەکانی پەروەردە لە پارێزگا و ئیدارە سەربەخۆکان کرد، بەمەبەستی ئاگادارکردنەوەیان لە گۆڕانکاری لە خشتەی تاقیکردنەوە گشتییەکانی پۆلی ١٢ی ئامادەیی بە هەموو بەشەکانییەوە.
بەپێی نووسراوە رەسمییەکە، بەهۆی هاوكاتبوونی پشووی رەسمیی یادی لەدایکبوونی پێغەمبەری ئیسلام (د.خ) لە رێککەوتی 25ی ئابی 2026، هیچ تاقیکردنەوەیەک لەو رێککەوتەدا ئەنجام نادرێت بۆ سەرجەم قوتابیان و خوێندکارانی پۆلی 12ی ئامادەیی (زانستی، وێژەیی و پیشەیی) لە قوتابخانە حکومی و ناحکومییەکان.
دوا بەدوای ئەو پشووە، رێزبەندیی ئەنجامدانی تاقیکردنەوەکان دەستکاری کراوە؛ بە جۆرێک ئەو تاقیکردنەوەیەی بڕیاربوو رۆژی 25ی ئاب بەڕێوەبچێت، دواخراوە بۆ رۆژی 27ی ئابی 2026. هەروەها ئەو تاقیکردنەوەیەش کە بڕیاربوو لە رۆژی 27ی ئاب ئەنجام بدرێت، دەگوێزرێتەوە بۆ رۆژی 30ی ئابی 2026.
وەزارەتی پەروەردە جەختی کردۆتەوە کە سەرجەم خوێندکاران بەپێی ئەم وادە و خشتە نوێیە بەردەوام دەبن لە بەشداریپێکردنیان لە تاقیکردنەوە گشتییەکاندا.
بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغداد لەگەڵ نزار ئامێدی، سەرۆک کۆماری عیراق کۆبووەوە.
لە کۆبوونەوەکەدا، رەوشی گشتیی وڵات و ناوچەکە تاوتوێکرا و جەخت لە بەردەوامیی گفتوگۆی نێوان لایەنە نیشتمانییەکان بۆ چارەسەرکردنی کێشەکان، پاراستنی ئاسایش و ئارامی و زامنکردنی ژیانێکی شایستە بۆ خەڵک کرایەوە.
لە کۆبوونەوەکەدا لەبارەی کێشەکانی نێوان هەرێمی کوردستان و بەغداد، بیروڕا ئاڵوگۆڕکرا و دووپات لە چارەسەرکردنیان لەسەر بنەمای دەستوور کرایەوە.
سەرۆکی یەکێتیی نیشتمانیی کوردستان ستایشی هەوڵەکانی سەرۆک کۆماری کرد بۆ نزیککردنەوەی دیدگا جیاوازەکان و دوورخستنەوەی عیراق لە گرژییە سیاسییەکان.
بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغداد لەگەڵ محەمەد شیاع سودانی، سەرۆکی هاوپەیمانیی ئاوەدانکردنەوە و گەشەپێدان کۆبووەوە.
لە دیدارێکدا کە د. خالید شوانی، سەرپەرشتیاری مەکتەبی سیاسی لە بەغداد ئامادەبوو، جەخت لە پێویستیی بەردەوامیی هەماهەنگی نێوان لایەنەکان، لەپێناو زاڵبوون بەسەر ئاڵنگارییە سیاسی و ئابوورییەکان و پاراستنی سەقامگیریی وڵات کرایەوە.
بافڵ جەلال تاڵەبانی دووپاتی لە سەرخستنی هەوڵە نیشتمانییەکان بۆ دوورخستەوەی وڵات لە ململانێکان کردەوە و وتی، ئەرکی هەموو لایەکمانە لە چوارچێوەی پاراستنی بەرژەوەندییە باڵاکان لەم رەوشەدا هاوکاریی حکومەتی عیراق بین تاوەکو پایەکانی دەوڵەتداریی بەهێزبکەین.
دەزگای ئاسایشی هەرێم دەستگیرکردنی حەوت تیرۆریستی داعشی راگەیاند، کە لەلایەن دادگاکانی عیراقەوە داواکراو بوون و رادەستی حکومەتی فیدراڵ کرانەوە.
دەزگای ئاسایشی هەرێم لە راگەیەنراوێکدا بڵاویکردەووە، بەڕێوەبەرایەتی گشتی ئۆپراسیۆنەکانی ئاسایش، لەسەر بنەمای زانیاری هەواڵگری توانیان حەوت تیرۆریستی داعشی داواکراوی دادگاکانی عیراق بەمادەی'٤'ی تیرۆر کە لەشاری سلێمانی و دەورووبەری خۆیان حەشاردابوو دەستگیربکەن و داواکراوان لە رابردوودا چەکداری گرووپی تیرۆریستی داعش بوون.
ئاماژەی بەوەشکرد، لەرۆژی 18-8-2026 تیرۆریستان رادەستی لایەنە پەیوەندیدارەکانی حکومەتی فیدراڵ کران، بەپێی تایبەتمەندی شوێنی تاوان بۆ تەواوکردنی رێکارەکانی لێکۆڵینەوە.
ئاگرێکی گەورە لەنێو باڵەخانەی پارێزگای سلێمانی کەوتەووە و لەماوەیەکی کەمدا لەلایەن تیمەکانی بەرگری شارستانییەوە ئاگرەکە کۆنترۆڵکرا، پارێزگاری سلێمانیش دەڵێت؛ تائێستا هۆکاری ئاگرکەوتنەوەکە نەزانراوە.
د.هەڤاڵ ئەبوبەكر، پارێزگاری سلێمانی بە كوردسات نیوزی راگەیاند، ئاگرەكە لەكاتی بەتاڵكردنەوەی تانكەرێكی سوتەمەنی بۆ ناو كۆگای سوتەمەنیی باڵەخانەكە كەوتووەتەوە.
دەشڵێت، تا ئێستا هۆکاری ئاگرەکە نەزانراوە، لیژنەیەکمان بۆ ئەم ئاگرە و ئەوەی تانجەرۆش پێکهێناوە.
پارێزگاری سلێمانی وتیشی، تیمەكانی بەرگری شارستانی توانیویانە لەماوەیەكی كەمدا بگەنە شوێنی روداوەكە و ئاگرەكە كۆنترۆڵ بكەن.
لەلای خۆشیەوە ئارام عەلی وتەبێژی بەرگریی شارستانی سلێمانی بە کوردسات نیوزی راگەیاند، لەلایەن تیمەکانیانەوە توانراوە لە کەمترین ماوەدا ئاگرەکە کۆنترۆڵ بکەن، لەبارەی زیانەکەی ئاگرەکە دەشڵێت؛ تەنها تانکەری سوتەمەنییەکە زیانی بەرکەوتووە.
جێگەی ئاماژەیە لە دوێنێ شەوەوە، ئەمە دووەم ئاگری گەورەیە لە پارێزگای سلێمانی کەوتووەتەوە و کە بەهۆیەوە زیانی گیانی و مادی زۆری لێکەوتووەتەوە.
پۆلیسی سلێمانی کەسێکی بە تۆمەتی دزیکردن دەستگیرکرد کە سێ فەرمانی گرتنی هەبوو.
بەڕێوەبەرایەتیی پۆلیسی پارێزگای سلێمانی ئاشکرایکرد،، مەفرەزەکانی نوسینگەی نەهێشتنی تاوانی رۆژئاوا تۆمەتبارێکیان بەتۆمەتی ئەنجامدانی تاوانی دزیکردن دەستگیر کردووە کە پێشتر سێ فەرمانی دەستگیرکردنی بۆ دەرچووبوو.
بەپێی راگەیەندراوی پۆلیسی سلێمانی، دوای ئەوەی تۆمەتبارەکە چەند تاوانێکی دزیکردنی لە ناحیەی پیرەمەگرون ئەنجامداوە، دادوەر فەرمانی گرتنی بۆ دەرکردووە، پاش کۆکردنەوەی زانیاری و بەدواداچوونی ورد لەلایەن نوسینگەی نەهێشتنی تاوانی رۆژئاواوە، توانرا شوێنی تۆمەتبارەکە بدۆزرێتەوە و دەستگیر بکرێت.
پۆلیسی سلێمانی ئاماژەی بەوەشکرد، لەکاتی دەستگیرکردنی تۆمەتبارەکەدا، دەست بەسەر ئۆتۆمبێلێکدا گیراوە لە جۆری (کیا - دوو تۆنی) کە هی خۆی بووە و لە تاوانەکانی دزیکردندا بەکاریهێناوە.
ئەوەشی خستەڕوو، تۆمەتبار (ر. ب. ع) لە ئێستادا بە بڕیاری دادوەر و بەپێی مادەی 443 لە یاسای سزادانی عیراقی راگیراوە و لێکۆڵینەوەکان لەگەڵیدا بەردەوامە.
پۆلیسی راپەڕین تۆمەتبارێکی لە هەولێر دەستگیرکرد کە هەڕەشەی بڵاوکردنەوەی وێنە و ڤیدیۆی لە کچێک دەکرد.
بەڕێوەبەرایەتیی پۆلیسی راپەڕین ئاشکرایکرد، نوسینگەی نەهێشتنی خراپ بەکارهێنانی ئامێرەکانی پەیوەندیکردن لە رانیە، تۆمەتبارێکی دەستگیر کردووە کە هەڕەشەی بڵاوکردنەوەی وێنە و ڤیدیۆی لە کچێکی تەمەن خوار 18 ساڵ کردووە لە بەرانبەر وەرگرتنی پارەدا.
بەپێی راگەیەندراوی پۆلیسی راپەڕین، نزیکەی 10 رۆژ پێش ئێستا کچەکە لەگەڵ دایکیدا سەردانی نوسینگەکەیان کردووە و سکاڵای یاساییان تۆمار کردووە، دوای وەرگرتنی بڕیاری دادوەر و کۆکردنەوەی زانیاری، شەوی رابردوو بە هاوکاریی تیمی ئایتیی پۆلیسی راپەڕین و پۆلیسی نەهێشتنی تاوانی هەولێر، تۆمەتبارەکە لە شاری هەولێر دەستگیرکراوە.
پۆلیسی راپەڕین ئەوەشی خستەڕوو، تۆمەتبارەکە ناوی (ر.ر.س)یە و تەمەنی 16 ساڵە و دانیشتووی بەحرکەیە لە هەولێر، لە بەردەم پۆلیس و دادوەردا دانی ناوە بە تاوانەکەیدا و لە ئێستادا بەپێی مادەی دوو لە یاسای قەدەغەکردنی خراپ بەکارهێنانی ئامێرەکانی پەیوەندیکردن راگیراوە و لێکۆڵینەوەکان لەگەڵیدا بەردەوامن.
پۆلیسی ڕاپەڕین داواش لە دایکان و باوکان دەکات ئاگاداری منداڵەکانیان بن، بەتایبەت ئەوانەی تەمەنیان لە خوار 18 ساڵەوەیە، تا تووشی پەیوەندیی نەخوازراو و لێکەوتەی خراپی کۆمەڵایەتی و دەروونی نەبنەوە.
قوباد تاڵەبانی ستایشی هەوڵەکانی د. هاژە عەبدوڵا دەکات و دەڵێت، "ئێستا کە وەک یەکەمین ژن لەسەر ئاستی عیراقدا بەرزترین پلەی زانستی لە بواری شێرپەنجەدا بەدەستهێناوە، هەموو کورد و بە تایبەتیش ژنان پێی سەربەرزن".
قوباد تاڵەبانی رایگەیاندووە: شەرەفمەند بووم کە بە دیداری د. هاژە عەبدوڵا شاد بووم و پێی سەربەرزین. دڵنیاین تا بێت نموونەی زیاتر دەبێت. پیرۆزبایی لە خۆی و هەموو هاوپیشە دڵسۆزەکانی و ستاف و بەڕێوەبەری نەخۆشخانەی هیوا دەکەم و شانازی بە هەموویانەوە دەکەین.
قوباد تاڵەبانی ئاماژەی بەوەداوە: ساڵی 2002 دەستپێشخەربوو لە کردنەوەی یەکەم بەشی شێرپەنجە لە تەندروستیی سلێمانیدا کە دواتر بووە بناغەیەکی پتەو بۆ دروستکردنی نەخۆشخانەی هیوا. لەو کاتەوە تا ئێستا بەوپەڕی خەمخۆری و پەرۆشییەوە خزمەتی تووشبووانی شێرپەنجە دەکات، لەگەڵ هاوڕێ و هاوپیشەکانی هیوای ژیانیان بۆ هەزاران کەس گەڕاندووەتەوە. هەربۆیە هەمووان خۆشیان دەوێت و شانازی پێوە دەکەن و ناوی دکتۆر هاژە بۆ تووشبووانی شێرپەنجە و خانەوادەکانیان واتای متمانە و هیوا و بەردەوامیی ژیان دەدات.
قوباد تاڵەبانی دەشڵێت: ئێستا کە وەک یەکەمین ژن لەسەر ئاستی عیراقدا بەرزترین پلەی زانستی لە بواری شێرپەنجەدا بەدەستهێناوە، هەموو کورد و بە تایبەتیش ژنان پێی سەربەرزن. لەپاڵ ئەرکی قورسی رۆژانەی لە چارەسەرکردنی تووشبوواندا لە نەخۆشخانەی هیوا، هەوڵی بێ وچان و کۆڵنەدانی لە بەرزکردنەوی ئاستی زانستی و ئەنجامدانی توێژینەوەی بە نرخ، نموونەیەکی باڵا و مەزنە بۆ ژنان و هەموو زانستخوازان.
قوباد تاڵەبانی و کونسوڵی نوێی ئەڵمانیا، پەرەپێدانی پەیوەندییە دوو قۆڵییەکان و برەودانیان بەکاری هاوبەش لەگەڵ هەرێمی کوردستان دووپاتکردەوە.
قوباد تاڵەبانی جێگری سەرۆکی ئەنجومەنی وەزیران پێشوازیکرد لە کریستیان ئۆلفکە، کونسوڵی گشتیی نوێی ئەڵمانیا لە هەرێمی کوردستان.
لە دیدارەکەدا جێگری سەرۆکی ئەنجومەنی وەزیران ئامادەیی دەربڕی بۆ هەموو جۆرە هاوکارییەک لە کاروبارەکاندا، هەروەک هەردوولا هاوڕابوون لەسەر پێویستیی کارکردنی زیاتر بۆ پێشخستنی پەیوەندییەکانی نێوان ئەڵمانیا و هەرێمی کوردستان لە بوارە جیاوازەکاندا.
پڕۆسەی دابەشکردنی زەوی بەسەر فەرمانبەراندا لە سنوری ئیدارەی سەربەخۆی راپەڕین بەردەوامە و ئەمڕۆ سێشەممە، لە قەزای حاجیاوا قۆناغی دووەمی پرۆسەکە دەستیپێکردو بڕیارە 91 فەرمانبەر ببنە خاوەنی زەوی خۆیان.
خالید ئەحمەد، پەیامنێری کوردسات نیوز رایگەیاند، بە ئامادەبونی سەرپەرشتیاری ئیدارەی راپەڕین، بەڕێوەبەری گشتیی شارەوانییەکان و داواکاری گشتی، لە رێگەی تیروپشکێکی ئاشکرا و شەفافەوە 91 فەرمانبەری دەبنە خاوەنی زەوی.
بە گوێرەی زانیارییەکانی پەیامنێری کوردستا نیوز، ئەم قۆناغە تایبەتە بەو فەرمانبەرانەی، کە کۆی خاڵەکانیان لەنێوان (38 بۆ39) خاڵدایە و ئەمەش دوای ئەوە دێت، کە لە قۆناغی یەکەمدا 146 فەرمانبەر بە خاڵبەندیی 40 بۆ 50 خاڵ سوودمەند بوون لە وەرگرتنی زەوی.
بەپێی ئامارەکان، تاوەکو ئێستا لە سنوری قەزای حاجیاوا ناوی نزیکەی چوار هەزار و 250 فەرمانبەر بۆ وەرگرتنی زەوی گەڕاوەتەوە، لە کاتێکدا لەسەر ئاستی گشتیی ئیدارەی راپەڕین ئەو ژمارەیە دەگاتە نزیکەی 25 هەزار فەرمانبەر، کە لەلایەن ئەنجومەنی وەزیران و وەزارەتی شارەوانییەوە پەسەند کراون.
بەپێی بڕیاری سەرۆکوەزیران مەسرور بارزانی، پێویستە هەموو فەرمانبەرێک کە مەرجەکان دەیگرێتەوە، پارچەیەک زەوی بە رووبەری 200 مەتر دووجای پێبدرێت و پرۆسەکە تاوەکو سوودمەندبوونی دواین فەرمانبەر بەردەوام دەبێت.