کوردستان
لە رۆژی کۆتاییهاتنی ئەرکی سەربازیی هاوپەیمانی نێودەوڵەتی و کشانەوەی هێزەکانیان لە عیراق و هەرێمی کوردستان، قوباد تاڵەبانی پەیامێکی بڵاوکردەوە و تێیدا رایگەیاند، بە سوپاس و پێزانینەوە لە هەموو هاوکارییەکانی هاوپەیمانان دەڕوانین بۆ هێزەکانی پێشمەرگە و سوپای عیراق لە شەڕی بەرەنگاربوونەوەی تێرۆر و پاراستنی ئاسایش و سەقامگیری.
قوباد تاڵەبانی جێگری سەرۆک وەزیرانی هەرێم لە رۆژی کۆتاییهاتنی ئەرکی هاوپەیمانان و کشانەوەی هێزەکانیان لە عیراق و هەرێمی کوردستان پەیامێکی بڵاوکردەوە و رایگەیاند، بە سوپاس و پێزانینەوە لە هەموو هاوکارییەکانیان دەڕوانین بۆ هێزەکانی پێشمەرگە و سوپای عیراق لە شەڕی بەرەنگاربوونەوەی تیرۆر و پاراستنی ئاسایش و سەقامگیریی عیراق و کوردستان. هەروەها لەم رۆژەدا یادی هەموو شەهیدانی پێشمەرگە و سوپای عیراق و هاوپەیمانان دەکەینەوە و سڵاو بۆ گیانی پاکیان دەنێرین.
ئاشکراشیکرد، ئێمە لە هەرێمی کوردستان هاوکارییەکانی هاوپەیمانان لە سێ قۆناغی گرنگ و چارەنووسسازی وەک راگەیاندنی ناوچەی دژەفڕین لە ساڵی 1991 بە تایبەت لەلایەن ئەمریکا و بەریتانیا و فەرەنسا، روخاندنی رژێمی دیکتاتۆری بەعس لە ساڵی 2003 و شەڕی تیرۆریستانی داعش لە دوای ساڵی 2014 هەرگیز لەبیر ناکەین.
ئاماژەی بەوەشکرد، لە ئێستاشدا کشانەوەی هاوپەیمانان و گەڕانەوەی سەروەریی تەواو بۆ عیراق ساتەوەختێکی مێژوویی گرنگە بۆ عیراق و هەرێمی کوردستان و هەردوو حکومەتی فیدراڵ و هەرێم و هەموو هێزە سیاسییەکانی عیراق و کوردستان و هەموومان لەبەردەم بەرپرسیارێتیی گەورەداین، پێویستە بۆ هاووڵاتییانی عیراق و بۆ کۆمەڵگای نێودەوڵەتیشی بسەلمێنین کە دەتوانین پارێزگاری لە سەروەریی و ئاسایش و سەقامگیری وڵاتەکەمان بکەین، ئەم ئەرکەش بەبێ هاوکاری و پێکەوەکارکردن لەپێناو بەرژەوەندیی گشتی و بەبێ جێبەجێکردنی تەواوەتی دەستور بەدی نایەت.
قوباد تاڵەبانی راشیگەیاند، وەک هێزە سیاسییەکانی کوردستانیش لەبەردەم بەرپرسیارێتییەکی مێژووییداین، ئەرکە لەسەرمان بە یەکڕیزی و هاوبیری کاربکەین بۆ بەهێزکردنی دامەزراوە شەرعییەکان و هەنگاونان بەرەو حکومڕانییەکی باشتر و خزمەتگوزار و دادپەروەر، چونکە دواجار دەستکەوتە مێژووییەکانی گەلەکەمان تەنها بە پشتیوانی و بە متمانەی هاوڵاتییانمان دەپارێزرێت.
جێگری سەرۆک وەزیرانی هەرێم ئەوەشی خستەڕوو، لە کۆتاییدا هاووڵاتییانی خۆمان دڵنیا دەکەینەوە، هاوکاری و هەماهەنگییەکی زۆرباش هەیە لەنێوان هەردوو حکومەتی فیدراڵ و هەرێم، هێزی پێشمەرگەی کوردستانیش لەوپەڕی ئامادەیی خۆیدایە و وەک هەمیشە ئامادەیە بۆ پاراستنی خاکی کوردستان و سەروماڵی هاووڵاتییان لە هەرچەشنە هەڕەشە و مەترسییەک گیانفیدایی بکات.
ئەمینداری گشتیی یەکگرتووی ئیسلامی کوردستان پەیامێکی بڵاوکردووەتەوە و دەڵێت، "وەرزی تەبایی و یەکدەنگی و ئاشتەوایی نیشتمانییە، نە خۆزگە و نە گلەیی سوودی نییە".
سەلاحەدین بەهادین، ئەمینداری گشتیی یەکگرتووی ئیسلامی کوردستان لەبارەی کشانەوەی هێزەکانی ئەمریکا و هاوپەیمانان پەیامێکی بڵاوکردووەتەوە و رایگەیاندووە، "کشانەوەی هێزەکانی ئەمریکا کارێکی ئاساییە و پابەندییە بە ڕێککەوتنی نێوان عێراق و ئەمریکا، جگە لەوەی ئازادن چی بکەن بۆ بەرژەوەندیی خۆیان!!".
سەلاحدین بەهادین ئاماژەی بەوەشداوە، "دەبوو هەرێم و عیراقیش حسابی حاڵی خۆیان بکردایە و چاوەڕێی نادیار نەکەن، وەرزی تەبایی و یەکدەنگی و ئاشتەوایی نیشتمانییە، نە خۆزگە و نە گلەیی سوودی نییە".
پۆلیسی سلێمانی رایدەگەیەنێت، مەفرەزەکانی نوسینگەی نەهێشتنی تاوانی ناوبازاڕ تۆمەتبارێکیان دەستگیرکرد کە بڕی پێنج دەفتەر دۆلاری لە هاووڵاتییەک بردووە.
بەپێی راگەیەندراوێکی بەڕێوەبەرایەتی پۆلیسی پارێزگای سلێمانی، روداوەکە دوای ئەوە هاتووە، کە هاووڵاتییەک لە دەستشۆر و شوێنی نوێژی یەکێک لە مزگەوتەکانی ناوبازاڕی سلێمانی بڕی (پێنج دەفتەر دۆلار)ـی بیرچووە و بەجێی هێشتووە، بەڵام دوای گەڕانەوەی بۆ شوێنەکە پارەکەی دیارنەماوە.
ئاماژە بەوەشکراوە، دوای ئاگادارکردنەوەی نوسینگەی نەهێشتنی تاوانی ناوبازاڕ، لێکۆڵینەوەکان دەستیان پێکرد و بە سوودوەرگرتن لە کامێراکانی چاودێری و بە بڕیاری دادوەر، توانرا تۆمەتبارێک دەستگیر بکرێت و بڕی 40 هەزار دۆلار (چوار دەفتەر دۆلار) لە پارەکە بدۆزرێتەوە و بگەڕێنرێتەوە بۆ خاوەنەکەی.
پۆلیسی سلێمانی ئاشکراشیکرد، لە ئێستادا تۆمەتبارەکە بە بڕیاری دادوەر و بەپێی (ماددەی 446) لە یاسای سزادانی عیراقی راگیراوە و لێکۆڵینەوەکان لەگەڵیدا بەردەوامن.
لە درێژەی بەدواداچوونە بەردەوامەکانیاندا بۆ پاراستنی تەندروستیی گشتی و رێگری لە ساغکردنەوەی خۆراکی خراپبوو، لیژنە هاوبەشەکانی قائیمقامیەتی سلێمانی دەستیان بەسەر بڕێکی زۆر گۆشتی ناتەندروست و نەشیاو بۆ خواردندا گرت.
ئەمڕۆ لە ئەنجامی بەدواداچوونێکی ورددا، لیژنە هاوبەشەکانی قائیمقامیەتی سلێمانی لە باخێکدا لە نزیک گەڕەکی سەرچنار دەستیان گرت بەسەر گۆشتی چەندین سەر ئاژەڵی نەخۆش و لاوازدا، کە بە شێوەیەکی نایاسایی و بەدەر لە مەرجە تەندروستی و ڤێتێرنەرییەکان سەربڕدرابوون.
سەبارەت بە وردەکاریی روداوەکە، بابان ئەحمەد، سەرۆکی لیژنە هاوبەشەکانی قائیمقامیەتی سلێمانی رایگەیاند، "خاوەنی شوێنەکە بەنیاز بووە ئەو گۆشتە ناتەندروستە لەسەر رێگە سەرەکییەکان بە نرخی هەرزان ساغ بکاتەوە." جەختیشی لەوە کردەوە کە خواردنی ئەم جۆرە گۆشتانە هۆکارێکی سەرەکییە بۆ بڵاوبوونەوەی نەخۆشییە مەترسیدارەکان و بە هیچ جۆرێک شیاوی بەکارهێنانی مرۆیی نییە.
سەرۆکی لیژنە هاوبەشەکان ئاماژەی بەوەشکرد، لە ئێستادا تەواوی گۆشتەکە دەستی بەسەردا گیراوە و پەڕاوی لێکۆڵینەوە بۆ کەسە سەرپێچیکارەکە کراوەتەوە تاوەکو رووبەڕووی سزای تووندی یاسایی بکرێتەوە.
لە کۆتاییدا، قائیمقامیەتی سلێمانی داوای لە هاوڵاتییان کرد بۆ پاراستنی تەندروستیی گشتی و سەلامەتیی کۆمەڵگە، بەردەوام هاوکار و هەماهەنگی لیژنەکانیان بن و لە کاتی بەدیکردنی هەر سەرپێچییەکدا دەستبەجێ ئاگاداریان بپەڕێننەوە.
مەسعود بارزانی، سەرۆکی پارتی دیموکراتی کوردستان، سەبارەت بە کشانەوەی هێزەکانی هاوپەیمانان لە عتیراق پەیامێکی بڵاوکردووەتەوە و تێیداهاتووە، "هێزەکانی هاوپەیمانان لە ماوەی مانەوەیاندا یارمەتییەكی زۆری هێزەکانی عێراق و هێزەکانی پێشمەرگەیان دا و تەنانەت قوربانیی زۆریشیان دا، دەمەوێ خەڵکی خۆشەویستی کوردستان لەوە دڵنیا بکەمەوە کە هەماهەنگییەکی زۆر باش لەگەڵ حکوومەتی عێراقی فیدڕاڵدا هەیە بۆ بەرپەرچدانەوەی هەر جۆرە هەڕەشە و مەترسییەک، جا ئەو هەڕەشەیە لەژێر ناوی داعشدا بێت یان هەر ناوێکی تر".
دەقی پەیامەکە
هەروەک هەموو لایەک ئاگادارن، بەپێی ڕێککەوتنی نێوان هێزەکانی هاوپەیمانان و حکوومەتی عێراقی فیدڕاڵ، ئەمڕۆ 30ی ئەیلوولی 2026 دوایین ڕۆژە بۆ کۆتاییهاتنی ئەرکی هێزەکانی هاوپەیمانان لە عێراق و هەرێمی کوردستان. هاوپەیمانان لە شەڕی دژی تیرۆر و هەروەها لە گەڕاندنەوە و بەهێزکردنی سەقامگیری لە عێراقدا پشتیوانی هێزەکانی عێراق و هێزەکانی پێشمەرگە بوون.
هێزەکانی هاوپەیمانان لە ماوەی مانەوەیاندا یارمەتییەكی زۆری هێزەکانی عێراق و هێزەکانی پێشمەرگەیان دا و تەنانەت قوربانیی زۆریشیان دا. ئێستاش دوای کۆتاییهاتنی ئەرکەکەیان، ئەوە لە داهاتوودا بۆ حکوومەتی عێراق و هەرێمی کوردستان بەجێدەمێنێت کە بەپێی هەلومەرجەکان و لەپێناو پاراستنی سەقامگیریدا، ڕێککەوتنی دووقۆڵی لەگەڵ وڵاتانی هاوپەیماندا بکەن.
لێرەدا جێی خۆیەتی سوپاسی هەوڵ و ماندووبوونی هێزەکانی هاوپەیمانان بکەین، ڕۆڵیان لە تێکشکاندنی داعش و گەڕاندنەوەی سەقامگیری بۆ عێراق جێگەی پێزانین و ڕێزگرتنێکی زۆرە. هەروەها سڵاو بۆ گیانی پاکی سەرجەم شەهیدانی پێشمەرگە، هێزە عێراقییەکان و هێزەکانی هاوپەیمانان دەنێرین و یادیان هەمیشە بە بەرزی دەمێنێتەوە.
لەبارەی هەرێمی کوردستانیشەوە زۆر کەس لەڕووی پەرۆشی و هەندێکیش لەڕووی ڕق و لێکدانەوەی نادروستەوە وای بۆ دەچن کە بە نەمانی هێزەکانی هاوپەیمانان ئیدی هەرێمیش دەکەوێتە ژێر هەڕەشە و کۆتایی پێدێت. دەمەوێ خەڵکی خۆشەویستی کوردستان لەوە دڵنیا بکەمەوە کە هەماهەنگییەکی زۆر باش لەگەڵ حکوومەتی عێراقی فیدڕاڵدا هەیە بۆ بەرپەرچدانەوەی هەر جۆرە هەڕەشە و مەترسییەک، جا ئەو هەڕەشەیە لەژێر ناوی داعشدا بێت یان هەر ناوێکی تر.
هەر کەسێک و لایەنێکیش خەیالی ئەوەی هەبێت ببێتە هەڕەشە و زیان بە سەقامگیریی هەرێمی کوردستان بگەیەنێت، با بزانێت لە کوردستاندا بەقەد پێویست پێشمەرگە و قارەمان و گیانفیدای وڵات هەن کە بەرگری لە خەڵک و خاکی کوردستان بکەن و هەموو هەڕەشە و دەستدرێژییەک تێکبشکێنن. هێزی پێشمەرگەی کوردستانیش کە ڕەگی لە مێژووی خەباتی ڕزگاریخوازی کوردستاندا هەیە و زادەی خوێنی شەهیدان و فرمێسکی دایکە شەهیدانە، هەر دەمێنێتەوە. هێزی پێشمەرگەی کوردستان بە هەماهەنگیی تەواو لەگەڵ هێزەکانی عێراقی فیدڕاڵدا، ئامادەن بۆ بەرگری، پاراستنی سەقامگیریی وڵات و نەهێشتنی هەموو جۆرە هەڕەشە و مەترسییەک.
مسعود بارزانی
30ی ئەیلوولی 2026
یەکێتیی ژنانی کوردستان هەڵمەتێکی بێبەرانبەر بۆ پشکنینی پێشوەختەی شێرپەنجەی مەمک لە هەڵەبجە ئەنجامدەدات.
سەبارەت بە هەڵمەتەکە، یەکێتیی ژنانی کوردستان رایگەیاندووە: یەکێتیی ژنانی کوردستان بە هاوکاری لەگەڵ بەڕێوەبەرایەتیی گشتیی تەندروستیی هەڵەبجە، پڕۆژەی بێبەرانبەری یەک هەفتەیی بۆ ئەنجامدانی پشکنینی پێشوەختەی شێرپەنجەی مەمک ئەنجام دەدات.
یەکێتیی ژنانی کوردستان دەشڵێت: ئامانجمانە هیچ ژنێکی کوردستان لەبەر تێچووی دارایی، لە پشکنین و دڵنیابوونەوە لە تەندروستیی خۆی بێبەش نەبێت، چونکە ژنان شایەنی زۆرترین بەخشینن، هەر خانمێک لە هەڵەبجە دەتوانێت لەم ماوەیەدا سەردانی سەنتەرە دیاریکراوەکەمان بکات بۆ ئەنجامدانی پشکنینەکەی بە شێوەیەکی ئاسان و بێبەرانبەر.
شوێنی پشکنین بریتییە لە؛
سەنتەری نەخۆشییەکانی هەرس و جگەر و نەخۆشییەکانی مەمک
سبەینێ دەستپێدەکات و بۆ ماوەی یەک هەفتە و رۆژانە سەعات 8:30ـی بەیانی تا 12:00ـی نیوەڕۆ بەردەوام دەبێت.
لیژنەیەک بۆ روداوەکانی پردێ پێکهێندراوە و ئەمڕۆش سەردانی کەرکوک دەکەن و لەگەڵ رێبوار تەها، جێگری یەکەمی پارێزگاری کەرکوک کۆدەبنەوە و دواتریش سەردانی پردێ دەکەن.
ئاسۆ ئەحمەد، پەیامنێری کوردسات نیوز رایگەیاند، لیژنەکە لەسەر ئاستی سەربازی باڵا پێکهێندراوە لەسەر راسپاردەی عەلی زەیدی؛ هەریەکە لە فەرماندەی سوپای عیراق، دژەتیرۆری عیراق، سوپای عیراق، وەزارەتی ناوخۆ و دەزگای هەواڵگری و ئاسایشی نیشتمانی لە لیژنەکەدا دەبن.
ئاسۆ ئەحمەد ئاماژەی بەوەشکرد، لیژنەکە دەچنە پردێ و سەردانی ماڵی هەردوو مێرمنداڵە کوردەکە دەکەن، کە لە روبەڕوبونەوەکانی هێزەکانی عیراق و تیرۆرساتنی داعشدا شەهید بوون و لێکۆڵینەوە لە روداوەکەش دەکەن.
جێی باسە، رۆژی 27-9ـی2026 دژە تیرۆرى عیراق لە روبەروبنەوەی دوو چەکداری داعشدا رایگەیاند، دوو چەکدارى داعشیان لە پردێ کوشتووە و یەکێکیتریشیان بە برینداری دەستگیرکردوە، بەڵام دواتر زانرا یەک چەکداری داعش کوژراوە و ئەویتر مێرمنداڵێکی کوردە و بە داعش لە قەڵەمیان داوە، ئەمەش بوە هۆی ناڕەزایتی و خۆپیشاندانی بەدوادا هات.
یەکێتیی نیشتمانیی کوردستان لەبارەی روداوەکەی ناحیەی پردێی سەر بە شاری کەرکوک راگەیەنراوێکی بڵاوکردەوە و تێیدا هاتووە: نابێت تیرۆر و خەڵکی سڤیل تێکەڵ بکرێن.
دەقی راگەیەنراوەکە:
ئێمە لە یەکێتیی نیشتمانیی کوردستان بەوردیی و نیگەرانییەکی قوڵەوە چاودێریی ئەو رووداوە نەخوازراوەی شاری کەرکوکی خۆشەویست دەکەین، کە بەداخەوە دوو گەنجی کورد لەپردێ تێیدا شەهید بوون.
لای یەکێتیی نیشتمانیی کوردستان، کەرکوک شاری پێکەوە ژیانی ئاشتییانەی پێکهاتەکانە و لە رابردووشدا، لەڕووبەڕووبوونەوەی تیرۆر رۆڵی پێشەنگ و کاریگەریی هەبووە، بە پشتیوانی هێزەکانی هاوپەیمانان و هاوئاهەنگی تەواوی هێزە عێراقییەکان، ئێستاش ئامادەیی تەواوەتیمان هەیە لە بەرگریکردن لەکەرکوک و تەواوی خاکی عێراق، بەڵام نابێت تیرۆر و خەڵکی سڤیل تێکەڵ بکرێن.
بۆیە، داوا لەبەڕێز عەلی زەیدی، سەرۆک وەزیرانی عێراق دەکەین، کە لیژنەی پێکهێندراو لە ڕووداوەکە ڕابسپێرێت، لێکۆڵینەوەی زۆر جددی لە ڕووداوەکە بکرێت و کەمتەرخەمان ڕووبەڕووی سزای یاسایی بکرێنەوە.
کاروان گەزنەیی
وتەبێژی یەکێتیی نیشتمانیی کوردستان
راگەیاندنی زانکۆی کۆیە بڵاویکردەوە، هەنگاوەکانیان بەردەوامە بۆ جێبەجێکردنی رێکارەکان بۆ دەستپێشخەریی 'زانکۆی سەوز' و لەسەر راسپاردەی قوباد تاڵەبانی، 12 پاسی کارەبایی بۆ زانکۆکەیان دابیندەکرێت.
لە راگەیەنراوەکەی زانکۆی کۆیەدا ئەوەش هاتووە، ئەم پرۆسەیە لە چوارچێوەی پلانی ستراتیژیی زانکۆی کۆیە 2023 - 2027 و دەستپێشخەریی «زانکۆی سەوز» دێت، کە لە رێکەوتی 16ـی ئایاری 2024 لەلایەن قوباد تاڵەبانی، جێگری سەرۆک وەزیران بە رەسمی اگەیەندرا.
ئاماژە بەوەش دراوە، قوباد تاڵەبانی لەو دەستپێشخەرییەدا، پشتیوانیی تەواوی خۆی بۆ گواستنەوەی کارەبایی لە زانکۆی کۆیە دەربڕی و بەڵێنی دابینکردنی 12 پاسی کارەبایی بە زانکۆکە دا.
ئەوەشی روونکردووەتەوە، بەم جۆرە لەگەڵ کۆمپانیایەکی وڵاتی 'چین'دا رێککەوتوون بە مەبەستی دابینکردنی پاسەکان و ئەوەش دەبێتە هەنگاوێکی کرداریی بۆ بەدیهێنانی ئەو بەڵێنە و چەسپاندنی دیدگای ستراتیژیی زانکۆکەیان.
ژمارەیەک جوتیاری ناحیەی قوشتەپە سەردانی وەزارەتی کشتوکاڵ و سەرچاوەکانی ئاوی حکومەتی هەرێمیان کردووە و بێگەرد تاڵەبانیش دەڵێت، "هەمیشە پاڵپشتیی تەواوی جووتیارانی هەرێم دەکەم".
بەپێی راگەیەندراوێکی وەزارەتی کشتوکاڵ و سەرچاوەکانی ئاو، بێگەرد تاڵەبانی، وەزیری کشتوکاڵ پێشوازی لە ژمارەیەک لە جوتیارانی بەرهەمهێنی کەلەرم و لەهانەی دەشتی هەولێر (ناحیەی قوشتەپە) کردووە، لە نزیکەوە گوێ لە کێشە و داواکارییە رەواکانی جووتیاران گیراوە، لەبارەی بەرهەمی ناوخۆیی و چۆنیەتی ساغکردنەوەی لە بازاڕەکاندا.
بێگەرد تاڵەبانی، وەزیری کشتوکاڵ رایگەیاندووە: هەمیشە پاڵپشتیی تەواوی جووتیارانی هەرێم دەکەم، هەروەها بڕیاردراوە بە ئاراستە کردنی نوسراوی رەسمی بۆ لایەنە پەیوەندیدارەکان، بە مەبەستی توندوتۆڵکردنی جێبەجێکردنی ناوەڕۆکی رۆژژمێری کشتوکاڵی و قەدەغەکردنی هاوردەکردنی بەرهەمی دەرەکی لە وەرزی پێگەیشتنی بەرهەمی ناوخۆیدا، بە ئامانجی پاراستن و رەخساندنی بازاڕی گونجاو بۆ بەرهەمی جووتیارانی خۆماڵی.
پارێزگای هەڵەبجە بڵاویکردەوە، بە هەوڵی پارێزگاری هەڵەبجە، بڕیاری لێخۆشبوون بۆ کۆمەڵێک بەرکەوتەی چەکی کیمیایی لەپارەی کارەبای 24 سەعاتی دەرچوو.
پارێزگای هەڵەبجە رایگەیاند، لە چوارچێوەی هەوڵە بەردەوامەکانی نوخشە ناسیح، پارێزگاری هەڵەبجە بۆ خزمەتکردنی کەسوکاری سەربەرزی شەهیدان و بەرکەوتووانی چەکی کیمیایی، بڕیاری لێخۆشبوون بۆ 18 هاووڵاتی کە بەركەوتەی چەكی كیمیاین، لە پارەی كارەبای 24 سەعاتی، دەرچوو.
ئەوەشی روونکردووەتەوە، بڕیارەکە پاڵپشت بە نووسراوی ئەنجومەنی وەزیران و سەرۆكایەتیی دیوان و بە بڕیاری (ژمارە 12018 لە رێکەوتی 22ـی ئەیلوولی 2026) دەرچووە و ئەو 18 کەسە لەو رێکەوتەوە دەتوانن سودمەند بن لە بڕیارەکە.
ئاماژەی بەوەشکردووە، پارێزگاری هەڵەبجە سوپاس و پێزانینی ئاڕاستەی سەرۆکی حکومەت و جێگری سەرۆكی حكومەت و سەرۆکایەتی دیوانی ئەنجومەنی وەزیران کرد بۆ بەدەمەوەهاتن و پاڵپشتییان بۆ خزمەتکردنی بەرکەوتووانی چەکی کیمیایی لە هەڵەبجە.
باڵیۆزی نەمسا و باڵیۆزی سویسرا سەردانی وەزارەتی پێشمەرگەیان کرد و یەکخستنەوەی هێزەکانی پێشمەرگەیان بە دەستکەوتێکی گرنگ و مێژوویی لەقەڵەمداوە.
وەزارەتی پێشمەرگە رایگەیاندووە: ئەمڕۆ سێشەممە، 29ـی 9ـی 2026، شۆڕش ئیسماعیل، وەزیری پێشمەرگە پێشوازی کرد لە ئاکسێل وێچ، باڵیۆزی نەمسا و پیتەر نیڵسون، باڵیۆزی سویسرا لە عیراق، لەگەڵ وەفدی سەربازیی یاوەریان.
بەپێی راگەیەندراوەکەی وەزارەتی پێشمەرگە، وەزیری پێشمەرگە پیرۆزبایی ئاڕاستەی هەردوو باڵیۆز کرد بە بۆنەی دەستبەکاربوونیان وەک باڵیۆزی نوێی وڵاتی نەمسا و سویسرا لە عیراق و هیوای سەرکەوتنی بۆ خواستن لە ئەرکە نوێیەکەیاندا، هەروەها تاوتوێی دوایین پێشهات و گۆڕانکارییەکانی هەرێمی کوردستان، عیراق و ناوچەکە کرا، جەخت لە گرنگیی بەردەوامیی هەماهەنگی و پەرەپێدانی پەیوەندییەکان کرایەوە.
وەزارەتی پێشمەرگە ئاماژەی بەوەشداوە، هەردوو باڵیۆز پیرۆزباییان ئاراستەی وەزارەتی پێشمەرگە کرد بە بۆنەی پرۆسەی یەکخستنەوە و یەکگرتنەوەی هێزەکانی پێشمەرگە و بە دەستکەوتێکی گرنگ و مێژووییان لەقەڵەمدا بۆ هێزی پێشمەرگەی کوردستان، هەروەها ڕۆڵی باڵا و قارەمانانەی هێزی پێشمەرگەیان بەرز نرخاند لە پاراستنی ئارامی و سەقامگیری و بەرەنگاربوونەوەی تیرۆر لە ناوچەکەدا.
پۆلیسی هەولێر رایدەگەیەنێت، فرۆشتنی بەنزین بە شێوەی نایاسایی لەسەر شەقامەکان بە هەموو شێوەیەک قەدەغەیە.
بەڕێوەبەرایەتیی پۆلیسی پارێزگای هەولێر روونکردنەوەیەکی بڵاوکردەوە و ئاماژەی بەوەکرد، بەپێی ئەنجامی پشکنینەکانی تاقگە، دەرکەوتووە ئەو ماددەیەی بە ناوی بەنزینەوە لەسەر شەقامەکان دەفرۆشرێت، تێکەڵەیەکە لە نەفتا و چەند ماددەیەکی تر و بڕێکی کەم بەنزین.
ئاشکراشیکرد، بەکارهێنانی ئەم تێکەڵەیە مەترسیدارە و هۆکاری سەرەکیی سووتانی ئۆتۆمبێل و دروستبوونی کارەساتی نەخوازراوە.
لە کۆتایی رونکردنەوەکەدا، پۆلیسی هەولێر هۆشداریشیدا، لەمەودوا هەرکەسێک ئەو کارە بکات، رووبەڕووی رێکاری یاسایی و لێپرسینەوەی توند دەکرێتەوە.
یەکێک لەو گەنجانەی بەهۆی روبەڕوبونەوەی نێوان دژەتیرۆری عیراق و تیرۆرستانی داعش لە پردێ کوژرا، ناوی محەمەد هێمنە و پەیوەندی بە داعشەوە نییە و بە شەهید تۆمار دەکرێت.
وتەی پارێزگاری کەرکوک
محەمەد سەمعان، پارێزگاری کەرکوک رایگەیاند: محەمەد هێمن بە شەهید تۆمار دەکرێت.
سەرەتای روداوەکەی پردێ
رۆژی 27ـی 9ـی 2026، لە پردێ، روبەڕوبونەوە لەنێوان دژەتیرۆری عیراق و تیرۆرستانی داعش رویدا، دوای روداوەکە دژەتیرۆری عیراق کوژرانی سێ کەسی راگەیاند و ئاماژەی بەوەدابوو، "دوو کەسیان داعشن و کەسێکی دیکەشیان مێرمنداڵێکە کە پەیوەندی بە روبەڕوبونەوەکەوە نییە".
زانیاریی کوردسات نیوز
دوای روداوەکە ئاسۆ ئەحمەد پەیامنێری کوردسات نیوز رایگەیاند: کوڕی خاوەن ئەو کۆگایەی کە روبەڕوبونەوەکە تێیدارویداوە بێسەروشوێنە.
ئەمڕۆش، 29ـی 9ـی 2026، پەیوەندی بە کەسوکاری ئەو کوڕە بێسەروشوێنەوە کراوە و پێیانراگەیەندراوە کە تەرمەکەی لە پزیشکی دادیی کەرکوکە.
وتەی ئەندامانی ئەنجومەنی پارێزگای کەرکوک
سەبارەت بە روداوەکە، د. ئەحمەد کەرکوکی، ئەندامی ئەنجومەنی پارێزگای کەرکوک رایگەیاند: سەرچاوەمان هەیە کە دوای کوژرانی گەنجەکە پێناسی کەسێکی داعشیان کردووەتە گیرفانی.
هەر سەبارەت بەو روداوە، مازن غەریب، ئەندامی ئەنجومەنی پارێزگای کەرکوک ئاماژەی بەوەدا: هێزە عیراقییەکان دانیان بەوەدا ناوە کە ئەو گەنجەیان بە هەڵە شەهید کردووە، ئەمە جێگەی قبوڵ نییە و سەرۆک کۆمارمان ئاگادار کردووەتەوە.
مێرمنداڵێکی دیکەش شەهید بووبوو
هەر لە روداوەکەدا، مێرمنداڵیکی دیکە بەناوی موراد زانا شەهید کوژرا، دواتر رێبوار تەها بە کوردسات نیوزی راگەیاند، "موراد زانا بە شەهید تۆمار دەکرێت".
نەشئەت شاهوێز خورشید، جێگری سەرۆکی ئەنجومەنی پارێزگای کەرکوک و سەرۆکی هاوپەیمانی، کەرکوک هێز و ئیرادەمانە، لە رێگەی نووسراوێکی رەسمییەوە داوایەکی بەپەلەی ئاراستەی سەرۆکی ئەنجومەنی وەزیرانی عیراق کرد، سەبارەت بە روداو و پێکدادانەکانی ناحیەی پردێ.
لە پەیامەکەدا ئاماژە بەوە کراوە: لە روداوەکانی رۆژی یەکشەممە 27ی ئەیلوولی 2026 لە ناحیەی پردێ، ژمارەیەک هاووڵاتی بوونەتە قوربانی، لەوانەش مێرمنداڵێکی تەمەن 14 ساڵ بەناوی (موراد زانا)، جگە لە دۆزینەوەی تەرمی گەنجێکی تری ناحیەکە بەناوی (محەمەد هێمن)، کە ئەوەش نیگەرانی و خەمێکی قووڵی لەلای دانیشتووانی ناوچەکە دروستکردووە.
جێگری سەرۆکی ئەنجومەنی پارێزگای کەرکوک جەختی کردەوە کە پێویستە دەستبەجێ بە شەفافییەتەوە وەڵامی پرسیارەکانی خەڵک و کەسوکاری قوربانییان بدرێتەوە لەسەر چۆنیەتی رودانی پێکدادانەکە، سروشتی کردەوە سەربازییەکە، رێکارەکانی پاراستنی مەدەنییەکان و ئاماری وردی قوربانییان.
لە نووسراوەکەدا هاتوو کە رووبەڕووبوونەوەی تیرۆر ئەرکێکە و هێزە ئاسایشییەکان شایەنی رێزن، بەڵام پاراستنی گیانی هاووڵاتییان بەرپرسیارێتیی سەرەکیی دەوڵەتە و یاسا لە سەرووی هەمووانەوەیە.
لە کۆتاییدا، نەشئەت شاهوێز داوای لە سەرۆکوەزیران کرد کە راگەیەندراوێکی بەپەلە و رەسمی لەسەر روداوەکە دەربکات. هەروەها لیژنەیەکی تایبەت پێکبهێنرێت بۆ سەردانیکردنی ناوچەکە، وگوێگرتن لە کەسوکاری قوربانییان و شایەتحاڵەکان.