سەرۆککۆمار
سەرۆکایەتی کۆماری عیراق: ئەم هێرشە پێشێلکارییەکی روونی یاسا نێودەوڵەتییەکانە
سەرۆکایەتی کۆماری عیراق رایگەیاند، بە توندترین شێوە ئیدانەی ئەو هێرشە دڕندانەیەی "قەوارەی زایۆنی" دەکات کە سەرکردەکانی بزووتنەوەی حەماسی لە دەوڵەتی قەتەری برا کردبووە ئامانج.
سەرۆکایەتی کۆماری عیراق ئاماژەی بەوەدا، "ئەم کارە دەستدرێژیکارە پێشێلکارییەکی روونی یاسا نێودەوڵەتییەکان و پەیماننامەکانی نەتەوە یەکگرتووەکانە، و پێشێلکردنێکی زەقی سەروەریی دەوڵەتی قەتەر و هەڕەشەیەکی جددییە بۆ سەر ئاسایش و سەقامگیری ناوچەکە."
سەرۆکایەتی کۆماری عیراق دووپاتی کردەوە، "عیراق پاڵپشتیی بێ سنوور و پشتیوانیی تەواوی خۆی بۆ دەوڵەتی قەتەر دەردەبڕێت، و جەخت لەسەر هەڵوێستی نەگۆڕی خۆی دەکاتەوە لە پاڵپشتیکردنی گەلی فەلەستین بۆ بەدەستهێنانی سەرجەم مافەکانیان، دامەزراندنی دەوڵەتی سەربەخۆی خۆیان، و راگرتنی دەستدرێژییە بەردەوامەکان و تاوانەکانی دژی خەڵکی کەرتی غەززە."
هەر بەپێی راگەیاندنی سەرۆکایەتی کۆماری عیراق، "ئەم دەستدرێژییە لە چوارچێوەی سیاسەتی کوشتن و تۆقاندن دێت کە قەوارەی داگیرکەر دژی گەلی فەلەستین پەیڕەوی دەکات." سەرۆکایەتی کۆمار جەختی لەسەر ئەوەش کردەوە، "پێویستە کۆمەڵگای نێودەوڵەتی بجوڵێت بۆ وەستاندنی ئەم تاوانانە کە پێشێلکاری مافەکانی مرۆڤن، و دەبێت بەرپرسیارێتی خۆی لە پاراستنی ئاشتی و ئاسایشی نێودەوڵەتی بگرێتە ئەستۆ."
د.لەتیف رەشید ئەمڕۆ سێشەممە 9ی ئەیلولی 2025 لە کۆشکی بەغدا پێشوازی لە وەزیری گواستنەوە رەزاق محێبس کرد.
له میانی دیدارەکه، دا باس له واقیعی کەرتی گواستنەوه له عێراق و پلانەکانی پەرەپێدانی کرا به شێوەیەک که ببێته هۆی بەرەوپێشبردنی خزمەتگوزارییەکان کە پێشکەش به هاووڵاتیان دەکرێت و بەرزکردنەوەی رۆڵی عێراق وەک ناوەندی گواستنەوەی هەرێمی و نێودەوڵەتی.
سەرۆک کۆمار، جەختی لەسەر گرنگی پشتیوانیکردنی پرۆژەکانی وەزارەت و زاڵبوون بەسەر ئەو ئاستەنگانەی رووبەڕوویان دەبێتەوە و ئاماژەی بەوەدا کە پێویستە ئەم هەوڵانە راستەوخۆ لە ژیانی رۆژانەی هاووڵاتیان و گەشەپێدانی ئابووری نیشتمانیدا رەنگ بداتەوە.
لای خۆیەوە وەزیری گواستنەوە سوپاسگوزاری و پێزانینی خۆی بۆ جەنابی سەرۆک کۆمار دەربڕی بۆ پشتیوانی بەردەوامی و جەختی کردەوە لەسەر بەردەوامی جێبەجێکردنی پڕۆژە گرنگەکان کە یارمەتیدەرن بۆ گەشەپێدانی ژێرخانی گواستنەوە و بەهێزکردنی پێگەی عێراق لەم بوارەدا.
د. لەتیف رەشید سەرۆک کۆماری عیراق، ئەمڕۆ لە کۆشکی بەغداد، پێشوازیکرد لە بەڕێوەبەری هەرێمیی رێکخراوی تەندروستی جیهانی بۆ هەرێمی رۆژهەڵاتی ناوەڕاست دکتۆرە حەنان بەلخی ، کە جەمیلە راعبی، نوێنەری رێکخراوی تەندروستی جیهانی لە عیراق یاوەری بوو.
لە دیدارەکەدا کە دکتۆر ساڵح حەسناوی، وەزیری تەندروستی ئامادەی بوو، گفتوگۆ دەربارەی رەوشی تەندروستی لە عیراق و هەوڵەکانی رێکخراوی تەندروستی جیهانی بۆ پێشخستنی کرا.
سەرۆک کۆمار ئاماژەی بە پەرۆشی عیراق بۆپتەوکردنی پەیوەندییەکانی لەگەڵ رێکخراوە جیهانییەکە کرد، بە شێوەیەک کە ئاستێکی تەندروستی نایاب بۆ هاووڵاتیان دابین بکات.
سەرۆک جەختی لە گرنگیی پشتگیریکردنی رێکخراوی تەندروستی جیهانی بۆ هەوڵەکانی عیراق لە دروستکردنی نەخۆشخانە و سەنتەرە پزیشکییە تایبەتمەندەکان لە بوارە جیاجیا پزیشکییەکاندا کردەوە، هەروەها فراوانکردنی ئاسۆکانی هاوکاری دوولایەنە لە راهێنان و بەتواناکردنی کادرە پزیشکییە عیراقییەکان لە رێگەی سازدانی وۆرکشۆپ و خولە ناوخۆیی و دەرەکییەکانەوە.
لەلای خۆیەوە، دکتۆرە حەنان بەلخی جەختی لە پەرۆشی ڕێکخراوەکە بۆ بەهێزکردنی پەیوەندییەکانی لەگەڵ عێراق کردەوە، بە شێوەیەک کە بنەماکانی هاوکاری دوولایەنەی بنیاتنەر بچەسپێنێت و بە ئەرێنی لەسەر گەشەپێدانی کەرتی تەندروستی بە گشتی رەنگ بداتەوە.
ئەمڕۆ د.لەتیف رەشید سەرۆک کۆماری عیراق لە کۆشکی بەغداد، پێشوازیکرد لە جۆشوا هاریس، هەڵسوڕێنەری باڵیۆزخانەی ویلایەتە یەکگرتووەکانی ئەمریکا لە عیراق ، بەبۆنەی دەستبەکاربوونی وەک هەڵسوڕێنەری کاروباری باڵیۆزخانە.
لە میانی دیدارەکەدا، گفتوگۆ سەبارەت بە رێگەکانی پتەوکردنی پەیوەندییە دوو قۆڵییەکانی نێوان هەردوو وڵات و هاندانی ئەو دەستپێشخەرییانە کرا کە خزمەت بە بەرژەوەندییەکانی هەردوو گەلی دۆست دەکەن.
سەرۆک کۆمار جەختی لەسەر پەرۆشی عیراق بۆ بنیاتنانی شەراکەتی هاوسەنگ کردەوە کە لەسەر بنەمای ڕێزی دوو لایەنە و بەرژەوەندییە هاوبەشەکان بێت.
هەروەها پێشهاتەکانی بارودۆخی ناوچەیی و نێودەوڵەتی تاوتوێ کران، لەگەڵ جەختکردنەوە لەسەر گرنگی بەردەوامیدان بە هەوڵەکان بۆ بەدیهێنانی سەقامگیری ناوچەیی و بەهێزکردنی دیالۆگی بنیاتنەرانە لە نێوان لایەنە جیاوازەکاندا.
لەلای خۆیەوە، جۆشوا هاریس خۆشحاڵی خۆی بە نوێنەرایەتیکردنی وڵاتەکەی لە عیراق دەربڕی، و جەختی لەسەر پەرۆشی خۆی بۆ کاری هاوبەش بۆ پتەوکردنی پەیوەندییەکان و پەرەپێدانی هاریکاری لە بوارە جیاوازەکاندا کردەوە، بە شێوەیەک کە یارمەتیدەر بێت لە پشتگیریکردنی ئاسایش و سەقامگیری و خۆشگوزەرانی لە ناوچەکەدا.
لە چوارچێوەی پاڵپشتییەکانی بۆ پێشکەوتنی ئەکادیمیای وڵات، د.لەتیف رەشید سەرۆک کۆماری عیراق، کۆمەڵێک کتێب و سەرچاوەی زانستی و کەلتووری و مێژوویی و کۆمەڵایەتی بە دیاری بۆ زانکۆکانی سەلاحەدین و هەڵەبجە بەخشی.
محەممەد ئەمین فارس نوێنەری سەرۆک کۆمار کۆمەڵێک کتێبی بە زانکۆی سەلاحەدین لە پارێزگای هەولێر پێشکەشکرد و سڵاوی سەرۆک کۆماری بە مامۆستایان و خوێندکارانی زانکۆکە گەیاند و هیوای سەرکەوتنی بەردەوامی بۆ خواستن لە کارە ئەکادیمییەکانیاندا.
هەر لەو چوارچێوەیەدا، عیزەدین مەجید نوێنەری سەرۆک کۆمار ئەو کتێبانەی کە لەلایەن سەرۆک کۆمارەوە دابینکرابون بە زانکۆی هەڵەبجە بەخشرا و پاڵپشتی سەرۆک کۆماری بۆ دووپاتکردنەوە کە بواری زانستی و رۆشنبیری لە وڵاتدا بەرەوپێش دەبات.
لە بەرانبەردا سەرۆکی هەردوو زانکۆ و ستافی مامۆستایان سوپاس و پێزانینی خۆیان بۆ دیاریەکانی سەرۆک کۆمار دەربڕی و جەختیانکردەوە، کە گرنگیدانی سەرۆک کۆمار بە پێشکەوتنی ئەکادیمی وڵات بریتیە لە چەسپاندنی بناغەکانی هۆشیاری و ڕۆشنبیریی لە نێو نەوەی داهاتوودا.
د. لەتیف رەشید سەرۆک کۆماری عیراق پێشوازیکرد لە حەسەن محەمەد زەمان باڵیۆزی کوەیت لە عیراق.
لە میانی دیدارەکەدا کە ئەمڕۆ لە کۆشکی بەغداد بەڕێوەچوو ، باس لە پەیوەندیی دووقۆڵیی و چۆنیەتی پتەوکردنیان کرا لە بوارە جیاجیاکاندا.
سەرۆک کۆمار ویستی عیراقی دووپاتکردەوە بۆ دامەزراندنی باشترین پەیوەندی و هاریکاری هاوبەش لەگەڵ دەوڵەتی کوەیت، بە شێوەیەک کە بەرژەوەندییەکانی هەردوو وڵاتی برا زامن بکات و سەروەرییان بپارێزێت و سەقامگیری و خۆشگوزەرانی بۆ گەلانی ناوچەکە بهێنێت.
لای خۆیەوە باڵیۆز زەمان ویستی کوەیتی بۆ پتەوکردنی پەیوەندییەکانی لەگەڵ عیراق دوپاتکردەوە بە شێوەیەک کە ویستی هەردوو گەل بۆ پێشکەوتن و خۆشگوزەرانی بەدیبهێنێت.
سەرۆك كۆماری عیراق فەرمانی كۆماری بۆ دەستبەكاربوونی 86 باڵیۆزی عیراق لە كۆی 91 باڵیوز دەركرد.
سەرۆكایەتی كۆماری عیراق لە راگەیەنراوێكدا بڵاویكردەوە، د. لەتیف رەشید سەرۆك كۆماری عیراق فەرمانی كۆماری دەركردووە بۆ دەستبەكاربوونی 86 باڵیۆزی نوێ بۆ ئەوەی نوێنەرایتی عیراق بكەن لەو وڵاتانانەی بۆیان دیاریكراوە.
راشیگەیاند، لە قۆناغی دووەمدا ئەو باڵیۆزانەش كە رێكارەكانیان تەواو دەكرێت سەرۆك كۆمار فەرمانی كۆماری بۆ دەستبەكاربونیان دەردەكات.
ئەوەش لەدوای ئەوەدێت، كە رۆژی 26ی 8 ئەنجومەنی نوێنەران بە ئامادەبوونی 169 پەرلەمانتار و بە زۆرینەی دەنگ لیستی باڵیۆزەكانی عیراقی پەسەند كرد كە لە ساڵی 2009 ەوە هیچ دەنگدانێكی لەسەر نەكرابوو و لە 91 باڵیۆز پێكهاتبوون .
سەرۆک کۆمار بانگهێشتێکی رەسمی لە سەرۆکی میسرەوە پێگەیشت بۆ بەشداریکردن لە رێوڕەسمی کردنەوەی مۆزەخانەی گەورەی میسر.
د. لەتیف رەشید سەرۆک کۆماری عیراق، نامەیەکی لە عەبدولفەتاح سیسی، سەرۆک کۆماری عەرەبی میسرەوە پێگەیشت، کە تێیدا بانگهێشتی سەرۆک کۆمار کراوە بۆ بەشداریکردن لە رێوڕەسمی کردنەوەی مۆزەخانەی گەورەی میسر.
ئەمەش لە میانی پێشوازیکردنی بوو ئەحمەد سەمیر باڵیۆزی میسر لەعیراق، کە ئەمڕۆ لە کۆشکی بەغداد بەڕێوەچوو.
سەرۆک کۆمار دەربارەی بانگهێشتنامەکەی عەبدولفەتاح سیسی پێزانین و سوپاسی خۆی دەربڕی و سڵاوی خۆی ئاراستەی سەرۆکی میسر کرد و هیوای پێشکەوتن و خۆشگوزەرانی هەمیشەیی بۆ گەلی برای میسر خواست.
د.لەتیف رەشید جەختی لە پێویستی پەرەپێدانی پەیوەندییە دوو قۆڵییەکان لە نێوان هەردوو وڵاتدا و پتەوکردنی رێڕەوی هاوکاری لە بوارە جیاوازەکاندا کردەوە کە خزمەت بە بەرژەوەندییە هاوبەشەکان بکات.
هەروەها سەرۆک کۆمار ئاماژەی بە رۆڵی گرنگی عیراق و میسر لە رووبەڕووبوونەوەی ئاڵنگاریەکان و هەوڵە بەردەوامەکانیان بۆ چەسپاندنی ئاشتی و سەقامگیری لە ناوچەکەدا کرد، هەروەک ئاماژەی بە هەڵوێستی عیراق کرد کە پشتگیری لە گەلی فەلەستین دەکات بۆ بەدەستهێنانی مافەکانی و دامەزراندنی دەوڵەتی سەربەخۆی خۆیان و جەختی لە پێویستی کارکردن بۆ کۆتاییهێنان بەو دەستدرێژییە کردەوە کە کەرتی غەززە رووبەڕووی دەبێتەوە و گرەنتی دابینکردنی گەیشتنی یارمەتییە مرۆییەکانی بە پێویست زانی.
لەلای خۆیەوە، باڵیۆزی میسر دووپاتی خواستی وڵاتەکەی کردەوە بۆ پتەوکردنی پەیوەندییە دوو قۆڵییەکان و پەرەپێدانی ئاسۆکانی هاوکاری و وەبەرهێنان و دروستکردنی هەلی کار و یەکپارچەیی ئابوری، بە شێوەیەک کە دەرفەتی زیاتری گەشەپێدانی بەردەوام بۆ بەرژەوەندی گەلانی عیراق و میسر بەدەست بهێنێت.
سەرۆک کۆماری جەخت لەسەر پەرۆشی عیراق بۆ بەهێزکردنی هاریکاری نێودەوڵەتی بۆ پەرەپێدانی سێکتەری وزە دەکاتەوە.
د.لەتیف رەشید سەرۆک کۆماری عیراق، ئەمڕۆ لە کۆشکی سەلام لە بەغداد، پێشوازیکرد لە ژمارەیەک لە بەشداربووانی یەکەمین کۆڕبەندی نێودەوڵەتی وزەی بەغداد، کە پێکهاتبوون لە ئەمینداری گشتی هەیسەم فەیسەڵ راشد رێکخراوی ئۆپێک و خەلیفە رجەب محەمەد عەبدولسادق وەزیری نەوت و گاز لە حکومەتی یەکێتی نیشتمانی لیبیا و ئیهاب رەجایی بریکاری یەکەمی وەزارەتی بەرهەمهێنان - وەزارەتی نەوتی میسر و ئەحمەد پرات چونکار جێگری وەزیری وزە و سەرچاوە سروشتییەکانی تورکیا بە ئامادەبونی حەیان عەبدولغەنی جێگری سەرۆک وەزیران بۆ کاروباری وزە و وەزیری نەوت،.
لە سەرەتای دیدارەکەدا، سەرۆک کۆمار بەخێرهاتنی وەفدەکەی کرد و ئاماژەی بە پەرۆشی عیراق کرد بۆ پێشخستنی کەرتی وزەی نیشتمانی و هەوڵەکانی بۆ بەهێزکردنی رێگە هاوبەشە بنیاتنەرەکان لەگەڵ دەوروبەری و ناوچەکە و نێودەوڵەتی بە شێوەیەک کە خزمەت بە خواستەکانی گەلان بکات بۆ پێشکەوتن و سەقامگیری.
سەرۆک کۆمار روونی کردەوە کە عیراق، بە پشتبەستن بە پێگەی ستراتیژی و سامانە هەمەچەشنەکانی، توانای وەبەرهێنانی لە سەرچاوە سروشتییە بەردەستەکان و پەسەندکردنی چارەسەری بەردەوام هەیە، جگە لە رۆڵی وەک هاوبەشێکی سەرەکی لە پرۆسەی گۆڕانکاری بەرەو ئابووری سەوز، و ئاڕاستەکردن بەرەو بەکارهێنانی وزەی نوێبووەوە، و پەرەپێدانی کەرتی کارەبا و کرانەوە بە تەکنەلۆژیای نوێ لەگەڵ پاراستنی ڕۆڵی هەمیشەی خۆی وەک یەکێک لە دیارترین بەرهەمهێنەرانی نەوت لە ناوچەکە.
سەرۆک کۆمار جەختی لەوە کردەوە کە بەڕێوەچوونی ئەم کۆڕبەندە هەنگاوێکی ئومێدبەخشە بۆ دەرخستنی یۆڵی پێشەنگی عیراق لە کەرتی وزە، ئاماژەی بەوەشدا کە سەرکەوتن لەم بوارەدا یارمەتیدەر دەبێت لە داڕشتنی دیدگای نوێ بۆ سیاسەتەکانی وزە، و ئاسۆی هاوکاری لەگەڵ کۆمپانیا نێودەوڵەتییەکان بۆ وەبەرهێنان لە بازاڕی عیراق فراوانتر دەکات، هیوای سەرکەوتنی بۆ کۆڕبەندی بەغدا و سەرکەوتنی بۆ بەشداربووان خواست لە گەیشتن بە بڕیارنامەکان کە خزمەت بە پەرەپێدانی کەرتی وزە و بەدیهێنانی بەرژەوەندییە نیشتمانییەکان بکات و ئاواتەکانی گەلان بەدی بهێنێت.
لە بەرانبەردا، ئەندامانی وەفدەکە سوپاس و پێزانینی خۆیان بۆ سەرۆک کۆمار و رێزگرتنیان بۆ دیدگا بەنرخەکانی دەربڕی، و ئارەزووی خۆیان بۆ قووڵکردنەوەی پەیوەندییە ئەرێنییەکان لەگەڵ عیراق لە هەموو سێکتەرەکان دووپاتکردەوە.
د. لەتیف رەشید سەرۆک کۆماری عیراق رۆژی پێنجشەممە 4-9-2025 بەشداری کرد لە مەراسیمی ساڵانەی لەدایکبوونی پێغەمبەری ئیسلام (د.خ) کە لە مەزارگەی حەزرەتی قادری لە بەغداد بەڕێوەچوو.
لە مەراسیمێکدا سەرۆک کۆمار لەلایەن دکتۆر مشعان خەزرەجی سەرۆکی دیوانی وەقفی سونی و شێخ خالید گیلانی و شێخ عەفیفەدین گیلانی و ژمارەیەک زانا و کەسایەتی ئاینی پێشوازیی لێکرا.
سەرۆک کۆمار پیرۆزبایی لە ئامادەبوان کرد بەبۆنەی یادی لە دایکبوونی پێیغەمبەر (د.خ)و هیوای خواست ئەم یادە ببێتە مایەی ئاشتی و خێر و خۆشی بۆ گەلەکەمان، لە مەراسیمەکەدا د. کامل دولەیمی سەرۆکی دیوانی سەرۆکایەتی وتارێکی پێشکەش کرد کە وەزیری ناوخۆ عەبدولئەمیر شممەری و ژمارەیەک لە لێپرسراوان و کەسایەتی ئاینیی ئامادەی بوون و تیایدا جەختیکردەوە کە ئەو ئاستەنگانەی رووبەڕووی جیهانی ئەمڕۆمان دەبنەوە، وەک ململانێکان و قەیران و پەتا و هەژاری، ئەوەمان بیردەخاتەوە کە چەند پێویستیمان بە رێبازی پێغەمبەری مەزن محەمەد موستەفا هەیە تا بەزەیی و بەخشندەییی بۆ مرۆڤ دەگێڕێتەوە، بۆ ئەو رەوشتەی کە ئاشتی و برایەتی لە دڵی خەڵکدا دەچەسپێنێت، هەروەها بۆ دادپەروەری کە مافی ژیانێکی شایستە بۆ هەموو کەسێک مسۆگەر دەکات.
سەرۆکی دیوانی سەرۆکایەتی کۆمار ئەوەشی خستەڕوو کە ساڵیادی لەدایکبوونی پێغەمبەر د خ وێستگەیەکە کە تێیدا باوەڕ و ویستی خۆمان نوێ دەکەینەوە و رەوشت و رەفتارمان باشتر دەکەین و ئایندەیەکی گەش بۆ نەوەکانی داهاتوومان بنیات دەنێین.
ئەمەی خوارەوە دەقی وتاری سەرۆک کۆمارە :
بەناوی خودای گەورە و میهرەبان
جەنابی سەرۆک کۆمار
جەنابی سەرۆکی دیوانی وەقفی سونی
زانایانی بەڕێز و کەسایەتی ئاینی
میوانە بەڕێزەکان
سڵاو ی خودای گەورەتان لێ بێت
بەبۆنەی لەدایک بوونی رێبەری مرۆڤایەتی محەمەد (د.خ)، خۆشحاڵین و بەپەڕی شانازییەوە گەرمترین پیرۆزبایی خۆم ئاراستەی هەموو ئومەتی ئیسلام و رۆڵەی نیشتمانە خۆشەویستەکەمان دەکەم. لە خودای مەزن داواکارم ئەم بۆنەیە بۆ ئومەتی ئیسلامی بە گشتی و بۆ گەلی عێراقیمان بەتایبەتی بەخۆشی و شادی بگەڕێتەوە و بۆ ئەوەی ئاهەنگەکەمان نوێبوونەوە و بەڵێن بێت بۆ پەیڕەوکردنی ڕێبازی پێغەمبەری بەرز (صلی الله علیه وسلم).
سوپاس و ستایش بۆ خودا کە پێغەمبەرەکەی بە هیدایەت و ئایینی حەق نارد بۆ ئەوەی بەسەر هەموو ئایینەکاندا زاڵ بێت. خێر و ئارامی و بەرەکەت بۆ رێبەری مەزن محمد (د.خ )و لەسەر هەمووان بێت.
میوانە بەڕێزەکان،
ئەمڕۆ بۆنەیەکی پیرۆز لەناخی دڵمانەوە دەگێڕین: کە یادی لە دایکبوونی پێغەمبەر، کە ساڵیادی لە دایکبوونی رێبەری مرۆڤایەتی، محمد کوڕی عەبدوڵڵایە، سەلامی خوای لەسەر بێت.
ئەمە تەنیا ساڵڕۆژێکی مێژوویی نییە؛ لەدایکبوونی ڕووناکیە لە سەردەمێکدا کە تاریکی باڵی کێشابو ، لەدایکبوونی ڕەحمەتە لە جیهانێکدا کە دڕندەیی زاڵ بو بەسەریدا و لەدایکبوونی دادپەروەرییە لە سەردەمی نادادپەروەرییەکی بەربڵاودا. پێغەمبەر درود و سەلامی خوای لەسەر بێت، هات بۆ ئەوەی فێرمان بکات کە شکۆی مرۆڤ مافێکە بۆ هەموو مرۆڤێک، وە ڕەحمەتی کەسانی نزیک و دوور و موسڵمان و نا موسڵمان و تەنانەت هەموو لایەنەکانی ژیانیش دەگرێتەوە.
ئەو، سەلامی خوای لەسەر بێت، پێغەمبەری ڕەحمەت و ئاشتی و پێغەمبەری رەوشت بوو. بناغەکانی دادپەروەری دامەزراند و بەهای زانستی بەرزکردەوە و ئیمانی بە کردەوەی چاکەوە، دین بە ژیانەوە گرێدا. لە کاتێکدا ژیانی ئەمڕۆی بەبیر دێنینەوە، ئیلهام لێ وەردەگرین بۆ بنیاتنانی نەتەوەکانمان بە دادپەروەری و پاراستنی شکۆی گەلانمان بە ئازادی و پاراستنی بەرژەوەندی نەتەوەکەمان لە ڕێگەی هاوکاری و یەکگرتووییەوە.
هاوڕێیانی ئازیز،
ئەو ئاڵەنگارییانەی ئەمڕۆ لە بەردەم دونیای ئێمەدان، لەوانەش ململانێ، قەیران، پەتا و هەژاری، ئەوەمان بیردەخاتەوە کە چەندە پێویستمان بە پێغەمبەری بەرزە: بەزەیی بۆ مرۆڤایەتی دەگەڕێنێتەوە، رەوشتێک کە ئارامی و برایەتی لە دڵەکاندا دەچێنێت، دادپەروەری کە مافی ژیانێکی شکۆمەندانەی هەموو تاکێک مسۆگەر بکات.
با ساڵیادی لەدایک بوونی پێغەمبەر بکەینە ساتێک بۆ نوێکردنەوەی ئیمان و ئیرادەمان، بۆ بەرزکردنەوەی رەوشت و ڕەفتارەکانمان و بنیاتنانی ئایندەیەکی گەش بۆ نەوەکانی داهاتوومان، کە بە ڕووناکی محمد (صلى الله عليه وسلم) ڕۆشنبکرێتەوە، کە ڕێگاکانی هیدایەت بۆ جیهان ڕۆشن کرد.
پیرۆزبایی لە هەمووان دەکەین بەبۆنەی لەدایک بوونی رێبەری ڕووناکی و ڕێنوێنمان محمد صلى الله عليه وسلم . ئێوە و گەلەکەمان و ئۆمەتی ئیسلامی هەموو ساڵێک لە خۆشی و ئارامیدا بن.
ئارامی و بەزەیی خوای گەورەتان لەسەر بێت.
د.لەتیف رەشید سەرۆک کۆماری عیراق، ئەمڕۆ چوارشەممە لە کۆشکی بەغداد، پێشوازی لە فالح فەیاز سەرۆکی دەستەی حەشدی شەعبی کرد.
لە دیدارەکەدا، گفتوگۆ دەربارەی رەوشی ئەمنی وڵات و هەوڵە بەردەوامەکان لە بواری بەرەنگاربوونەوەی تیرۆر و پشتیوانیکردنی دامودەزگا ئەمنییەکان کرا.
سەرۆک کۆمار جەختی لە گرنگی پتەوکردنی ئاسایش و سەقامگیری و پاراستنی دەستکەوتەکانی شەڕی دژی چەتە تیرۆریستییەکان کردەوە، بە شێوەیەک کە یارمەتیدەر بێت لە پاراستنی هاووڵاتیان.
لەلای خۆیەوە، فەیاز پێداچوونەوەیەکی بە هەوڵ و ئەرکەکانی حەشدی شەعبی لەم قۆناغەدا کرد، جەختی لە پابەندبوونی دەستەکە بە پشتیوانیکردنی هێزە ئەمنییەکان بۆ بەهێزکردنی ئاسایش و سەقامگیری لە وڵاتدا کردەوە.
د.لەتیف رەشید سەرۆک کۆماری عیراق، ئەمڕۆ لە کۆشکی بەغداد، پێشوازیکرد لە عەلی باپیر، سەرۆکی کۆمەڵی دادگهری کوردستان و وەفدی هاوڕێی.
لە دیدارەکەدا گفتوگۆ لەبارەی گۆڕانکارییە گشتییەکانی وڵات لەسەرجەم ئاستەکان و پێویستیی کاری هاوبەش بۆ چەسپاندنی ئاسایش و سەقامگیری و کارکردن بۆ دابینکردنی پێداویستی و خواستەکانی هاوڵاتیان و پێشخستنی خزمەتگوزارییەکان کرا.
سەرۆک کۆمار جەختی لە گرنگیی بەردەوامیدان بە گفتوگۆ لە نێوان حکومەتی فیدراڵی و هەرێمی کوردستان کردەوە بۆ تاوتوێکردنی کێشە هەڵپەسێردراوەکان و کارکردن بۆ چارەسەرکردنیان بەپێی دەستور و یاسا و بە شێوەیەک کە بەرژەوەندیی سەرجەم هاووڵاتیان دابین بکات.
د.لەتیف رەشید ئاماژەی بە گرنگیی هەڵبژاردنەکانی داهاتووی ئەنجومەنی نوێنەران لە وڵاتدا کردو وتیشی، پێویستە بەرزترین ئاستی پاکوخاوێنی و شەفافیەت دابین بکرێت بۆ بەهێزکردنی متمانەی دەنگدەران و دڵنیابوون لە بەشدارییەکی بەرفراوانیان بۆ هەڵبژاردنی نوێنەرانیان بە دوور لە هەر فشارێک، جەختیشی لەوە کردەوە، کە سەرۆکایەتیی کۆمار بە هەماهەنگی لەگەڵ سەرۆکایەتییەکان و کۆمیسیۆنی باڵای سەربەخۆی هەڵبژاردنەکان، رێکارەکانی لەمبارەیەوە گرتووەتەبەر.
لای خۆیەوە عەلی باپیر، پشتگیریی خۆی بۆ پێشنیارەکانی سەرۆک کۆمار دەربڕی سەبارەت بە پێویستیی کاری هاوبەش بۆ چارەسەرکردنی کێشە هەڵپەسێردراوەکان لە نێوان حکومەتی فیدراڵی و هەرێمی کوردستان.
د. لەتیف رەشید سەرۆک کۆماری عیراق، ئەمڕۆ دووشەممە 1ـی 9ـی 2025، لە کۆشکی بەغداد، پێشوازی لەدکتۆر ساڵح ئەلحەسناوی وەزیری تەندروستی عیراق کرد.
لەمیانەی دیدارەکەدا رەوشی کەرتی تەندروستی و رێگەکانی باشترکردنیان تاوتوێ کرا، سەرۆک کۆمار جەختی لەپێویستی بەرزکردنەوەی ئاستی خزمەتگوزارییەکانی وەزارەت کردەوە کە پێشکەشی هاووڵاتیانی دەکات و ئاماژەی بە گرنگی هۆشیاری تەندروستی کۆمەڵگە و پێویستی هەوڵی زیاتری کارمەندانی پزیشکی کرد، بە هاوکاری دەزگاکانی راگەیاندن و چالاکیە کۆمەڵایەتی جۆراوجۆرەکان، بۆ بەشداریکردن لە بەرزکردنەوەی ئاستی هۆشیاری و سنووردارکردنی بڵاوبوونەوەی نەخۆشییە جۆراوجۆرەکان.
لەلای خۆیەوە وەزیری تەندروستی ستایشی گرنگیدانی سەرۆک کۆماری کرد بۆ پەرەپێدانی رەوشی تەندروستی عیراق و جەختی لە هەوڵەکانی وەزارەت کردەوە بۆ بەرزکردنەوەی ئاستی شارەزایی کارمەندانی تەندروستی و پزیشکی و کاراکردنی پەیوەندی و هاوکاری پزیشکی لەگەڵ دەزگا نێودەوڵەتییەکانی تایبەتمەند لەم کەرتە گرنگەدا.
د. لەتیف رەشید، سەرۆک کۆماری عیراق، لە چاوپێکەوتنێکدا لەگەڵ کەناڵی ئەلئولا، تیشکی خستە سەر چەندین بابەتی گرنگی پەیوەندیدار بە رەوشی سیاسی، ئابووری، کۆمەڵایەتی و دەرەوەی عیراق، لەوانە پەیوەندییەکانی نێوان حکومەتی فیدراڵی و هەرێمی کوردستان، کێشەی نەوت و غاز، دابینکردنی موچە، پرۆسەی هەڵبژاردن، رەوشی زیندانییەکان، قەیرانی ئاو، پێشنیازە یاساییەکان و پرسی پەکەکە و غەززە.
پەیوەندییەکانی بەغداد و هەولێر و کێشەی نەوت و غاز:
سەرۆک کۆمار جەختی کردەوە کە "پەیوەندی نێوان حکومەتی فیدراڵی و حکومەتی هەرێمی کوردستان لە هەموو بوارەکاندا باشە، ناکۆکییەکان لە بنەڕەتدا لە نێوان پارێزگاکان و حکومەتی فیدراڵدایە و هاوبەشییەکان لە ناکۆکییەکان زیاترن."
سەبارەت بە یاسای نەوت و غاز، ئاماژەی بە "پێویستییەکی بەپەلە بۆ پەسەندکردنی یاسای نەوت و گاز و وردەکارییە یاساییەکان لەبارەی دابەشکردنی داهاتەکان و چارەسەرکردنی کێشەکانی ئێستا" کرد. بەداخەوە پەرلەمان سەرکەوتوو نەبووە لە دەرکردنی ئەم یاسایە گرنگە.
کێشەی موچە و گۆڕانکارییەکانی بودجە:
د. لەتیف رەشید رایگەیاند، "ئەرکی حکومەتە موچەی سەرجەم فەرمانبەران دابین بکات". لە هەمان کاتدا روونی کردەوە؛ کێشەیەکی گەورەمان هەیە لەڕوی خەرجیەکانی حکومەت بۆ دابینکردنی موچە، کە دەکاتە 80%ی داهاتی دەوڵەت، لە کاتێکدا لە وڵاتانی پێشکەوتووی دیکەدا، لە 6% تێناپەڕێت، پێویستە ئەم کێشەیە چارەسەر بکەین."
هەڵبژاردنەکان و پاراستنی متمانە:
سەرۆک کۆمار داوای کرد، "لە هەڵبژاردنی پەرلەمانی داهاتوودا هەڵبژاردنێکی ئازاد و دادپەروەرانە مسۆگەر بکەین و رێگری بکەین لە بەکارهێنانی دەسەڵات بۆ مەبەستی هەڵبژاردن". هەروەها رەتی کردەوە "بانگەشەی دواخستنی هەڵبژاردن یان پێکهێنانی حکومەتی فریاگوزاری بە هیچ جۆرێک راست نییە."
رەوشی زیندانییەکان و یاسای لێبوردن:
د. لەتیف رەشید روونیکردەوە، "سەرۆکایەتی کۆمار، لە رێگەی لیژنە هاوبەشە وەزارییەکانەوە، چارەنووسی 23 هەزار دەستبەسەرکراو کە سزا نەدراون و حوکمەکانیان تەواو کردبوو و بە هۆکاری جۆراوجۆر هێشتا لە زیندان بوون، یەکلایی کردەوە." بەپێی یاسای لێبوردن 55 هەزار زیندانی ئازاد کراون.
قەیرانی ئاو و پێشنیازە یاساییەکان:
سەبارەت بە قەیرانی ئاو، سەرۆک کۆمار وتی "جیهان لە ئەنجامی گۆڕانی کەشوهەوادا رووبەڕووی قەیرانێکی گەورەی ئاو بووەتەوە، بە عیراقیشەوە." داوای کرد "پشکێکی دادپەروەرانەی ئاو لە وڵاتانی دراوسێ وەربگرین و بە فیڕۆدانی ئاو بوەستێنین."
ئاشکراشی کرد کە سەرۆکایەتی کۆمار "چەندین رەشنووسی یاسای پێشکەش بە ئەنجومەنی نوێنەران کردووە، لەوانە پێکهێنانی ئەنجومەنی باڵای ئاو و چارەسەرکردنی کێشەکانی ژنان."
پرسی پەکەکە و غەززە:
لەکۆتایی لێدوانەکەیدا، سەرۆک کۆمار تیشکی خستە سەر پرسی لەناوبردنی چەکی پەکەکە و وتی "لەناوبردنی چەکی پارتی کرێکارانی کوردستان (پەکەکە) بەپێی رێککەوتنێک لەگەڵ حکومەتی تورکیا هەنگاوێکی گرنگە بۆ بەرەوپێشبردنی ئاشتی و سەقامگیری."
سەبارەت بە غەززەش، جەختی کردەوە "دەستدرێژییە بەردەوامەکان بۆ سەر غەززە کاریگەری نەرێنی لەسەر تەواوی ناوچەکە هەیە. هەڵوێستی ئێمە لە عیراق روونە و نوێ نییە، ئێمە پشتیوانی لە گەلی فەلەستینی بۆ گەیشتن بە مافە رەواکانی تەواوی خۆی دەکەین و ئێستا دەبێت دەستدرێژییەکان رابگیرێت و هاوکاری مرۆیی بگەیەنرێت."
کۆنفرانسی هاوپەیمانی سۆسیال دیموکراتەکانی وڵاتانی عەرەبی لە سلێمانی بەڕێوەدەچێت و سەرۆک کۆماری عیراق تێیدا وتارێکی پێشکەشکرد و ئاماژەی بەوەکرد، دەبێت هاوسەنگی لە نێوان وڵاتاندا بمێنێتەوەو كێشەكان چارەسەربكرێن.
د.لەتیف رەشید سەرۆک کۆماری عیراق لە وتارەکەیدا رایگەیاند، وڵاتە گەورەکان مافی مرۆڤ پێشێل دەکەن و دەبێت کۆمەڵکوژییەکان بوەستێنرێن.
وتیشی، دەبێت ئەو دڕەندەیەی لە غەززە هەیە رابگیرێت، هاوکات گەلی عیراق هاوسۆزی فەلەستینەکانە.
سەرۆک کۆمار ئاماژەی بەوەشکرد، کێشەکانی ئەم سەردەمە کەمی ئاو و نەبوونی وزەیە، دەبێت هەموان پێکەوە کاربکەین بۆ بۆ چارەسەرکردنی ئەو کێشانە.
د. لەتیف رەشید داواشی لە میوانەکانی بەشداربووی کۆنفڕانسەکە کرد سەردانی پارێزگای هەڵەبجە بکەن، تا بۆیان دەرکەوێت رژێمی بەعس چ تاوانێکی بەرانبەر بە گەلی کورد و ئەو شارە ئەنجامداوە.