رۆژنامەی وۆڵ ستریت جۆرناڵ لە راپۆرتێکدا لەژێر ناونیشانی "عەرەبستانی سعودیە و عیراق لەنێو جەنگێکی شاراوەدان"، پەردەی لەسەر بەشداریی بەرفراوانی گروپە چەکدارەکانی سەر بە ئێران لە عیراق لاداوە، کە هێرش دەکەنە سەر خاکی سعودیە.

وۆڵ ستریت جۆرناڵ دەڵێت؛ لە ماوەی پێنج هەفتەی رابردوودا ئەو گروپانە دەیان درۆنی بۆمبڕێژکراویان ئاڕاستەی سعودیە و وڵاتانی دیکەی کەنداو کردووە.

ئەمەش جەنگێکی شاراوەی لەنێو جەرگەی ململانێکاندا دروست کردووە، کە ئەگەری هەیە گەورەترین بەرهەمهێنەرانی نەوت لە جیهاندا بەرەو روبەڕووبوونەوەی راستەوخۆ ببات.

"بەپێی هەڵسەنگاندنە ئەمنییەکان، نزیکەی نیوەی ئەو 1000 هێرشە درۆنییەی کراونەتە سەر سعودیە، لە خاکی عیراقەوە ئەنجامدراون" ئەمە بەشێکی تری زانیارییەکانی وۆڵ ستریت جۆرناڵ.

رۆژنامەکە ئەوەشی خستوەتەڕوو، لە هێرشي درۆنییەکاندا، کە لە عیراقەوە ئەنجامدراون ئامانجی سەرەکیان کێڵگە نەوتییەکانی پارێزگای رۆژهەڵات و پاڵاوگەی "ینبع" بووە لەسەر دەریای سوور کە یەکێکە لە پاڵاوگە گەورەکانی سعودیە.

 

 

دەسەڵاتدارانی ئێران مەرجی بەشداریی هەڵبژاردەی نیشتمانیی وڵاتەکەیان لە جامی جیهانیی ٢٠٢٦ بە دابینکردنی گرەنتی ئەمنی تەواو بۆ یاریزانان لە خاکی ویلایەتە یەکگرتووەکانی ئەمریکا دەبەستنەوە.

ئاژانسی تەسنیم لە زاری ئەحمەد دونیا مالی، وەزیری وەرزشی ئێران بڵاویکردەوە، کە هەڵبژاردەی ئێران تەنها لەو کاتەدا گەشتی ئەمریکا دەکات کە سەلامەتی وەفدەکەی بە تەواوی مسۆگەر بکرێت. 

وەزیر ئاماژەی بەوەش کردبوو کە داوای گواستنەوەی یارییەکانی ئێرانیان بۆ مەکسیک کردبوو، بەڵام فیدراسیۆنی نێودەوڵەتی تۆپی پێ (FIFA) ئەو داواکارییەی رەتکردەوە.

پێشتر وەزیری وەرزش لە سەرەتای مانگی ئازاردا رایگەیاندبوو، کە بەهۆی گرژییە سیاسییەکانی نێوان تاران و واشنتن، کەشێکی گونجاو بۆ بەشداریی هەڵبژاردەکە لەم پاڵەوانێتییەدا لەئارادا نییە.

جێی وەبیرهێنانەوەیە، تیروپشکی جامی جیهانی ٢٠٢٦ ئێرانی لە کۆمەڵەی حەوتەمدا لەگەڵ هەریەکە لە هەڵبژاردەکانی بەلجیکا، میسڕ و نیوزیلەندا داناوە و بڕیارە یارییەکانی لە شارەکانی لۆس ئەنجلۆس و سیاتڵ لە نێوان ١١ی حوزەیران تا ١٩ی تەممووزی ٢٠٢٦ بەڕێوەبچن.

رۆلاند لێسکۆر، وەزیری دارایی فەرەنسا رایگەیاند، جەنگی ئێران و لێکەوتەکانی لەسەر بازاڕی وزە، زیانێکی دارایی گەورەی بە وڵاتەکەی گەیاندووە، کە بڕەکەی لە نێوان چوار بۆ شەش ملیار یۆرۆدایە.

وەزیری  دارایی فەرەنسا لە لێدوانێکیدا بۆ میدیای وڵاتەکەی  اماژەی بەوە کرد، سەرەڕای هەنگاوەکان بۆ کەمکردنەوەی زیانەکانی وڵاتەکەی بەهۆی جەنگی ئیسرائیل و ئەمریکا بەرانبەر بە ئێران، بەڵام وڵاتەکەی زیانێکی زۆری پێگەیشتوە.

ناوبراو ئاماژەی بەوەکردوە، کە زیانەکان کاریگەریان لەسەر بەرزبونەوەی تێچوی قەرزە حکومییەکانیشی کردوە و بەرزی کردوەنەتەوە، کە بەهۆی رەوشی ئێستای بازاڕەوە دروست بووە.

هاوکات وەزیری دارایی فەرەنسا، جەختی کردەوە کە پاکێجێک بۆ سڕکردنی خەرجییەکان پێشکەش دەکات و بڕیاریشە ئێوارەی ئەمڕۆ سێشەممە، سباستیان لێکۆرنۆ، سەرۆک وەزیرانی فەرەنسا، زنجیرەیەک هەنگاوی نوێ بۆ هاوکاریکردنی هاووڵاتیان لە روبەڕوبونەوەی بەرزبوونەوەی نرخی وزەدا رابگەیەنێت.

وەزارەتی نەوتی عیراق رایگەیاند، لە چەند رۆژی داهاتوودا هێڵی نەوتی كەركوك-بەندەری جەیهانی توركیا دەستپێدەکات.

ساحب بەزون وتەبێژی وەزارەتی نەوتی عیراق رایگەیاند، بە ئامانجی زیادكردنی هەناردەی نەوتی عیراق، لە چەند رۆژی داهاتوودا هیڵی نەوتی كەركوك-بەندەری جەیهانی توركیا لە رێی فیشخابورەوە دەكرێتەوە و لە سەرەتاشدا رۆژانە نزیكەی 600 هەزار بەرمیل نەوت لە رێی ئەو هێڵەوە هەناردە دەكرێت، لە كاتێكدا ئەو هێڵە توانای هەناردەكردنی یەك ملیۆن و 600 هەزار بەرمیلی رۆژانەی هەیە، دەشڵێت، لە ئێستادا هەناردەكردنی نەوت لە رێی هەرێمی كوردستانەوە بۆ بەندەری جەیهان رۆژانە نزیكەی 200 هەزار بەرمیلە.

وتەبێژی وەزارەتی نەوتی عیراق راشیگەیاندووە، وەزارەتەكەیان كار دەكات بۆ بەكارهێنانی هەموو رێگا بەردەستەكان بە مەبەستی هەناردەكردنی نەوت و كارەكانیشیان بۆ كردنەوەی بۆری نەوتی عیراق-ئوردن لە داهاتوودا بەردەوامە.

کەشناسی هەرێم رایگەیاند، کاریگەری ئەو شەپۆلە باران بارینەی رووی لە ناوچەکەمان کردبوو کۆتایی هاتووە و پێشبینیش دەکات باران بارین بە شێوەی تاوتاو بەردەوام بێت، ئاماژەی بەوەشکردوە پلەکانی گەرما نزمدەبنەوە.

ئەمڕۆ سێشەممە، بەڕێوەبەرایەتی گشتی کەشناسی و بوومەلەرزەزانی هەرێم، پێشبینی 48 سەعاتی داهاتوی بڵاوکردەوە بە گوێرەی پێشبینییەکان، سەرەڕای کۆتایی هاتنی شەپۆلی توندی باران بارین، نمەباران لە شوێنە جیاجیاکان بەردەوامی دەبێت و پلەکانی گەرماش نزمدەبنەوە.

 کەشناسی دەڵێت؛ ئەمرۆ پلەکانی گەرما نزمدەبنەوە بەراوردە بە تۆمارکراوەکانی دوێنێ  و نمەباران بە شێوەی تاوەباران بەردەوامی دەبێت و لە دوای نیوەڕۆی ئەمڕۆوە، لە سنوری ئیدارەی راپەڕین ئەگەری باران بارینی بەهاری زیاتر دەبێت بەراورد بە ناوچەکانی تر.

 لەبارەی کەشی سبەینێ چوارشەممەوە، کەشناسی دەڵێت؛ بە گشتی ئاسمان ساماڵ و پەڵە هەور دەبێت، ئەگەری باران بارین لە ناوچە شاخاوییەکان هەیە و پلەکانی گەرماش بەراورد بە ئەمڕۆ کەمێک بەرز دەبنەوە.

بەرزترین پلەکانی گەرمای پێشبینیکراو بە پلەی سیلیزی بۆ سبەینێ بەمشێوەی دەبێت

هەولێر: 22 پلەی سیلیزی

پیرمام: 20 پلەی سیلیزی

سۆران: 20 پلەی سیلیزی

حاجی ئۆمەران: 13 پلەی سیلیزی

سلێمانی: 19 پلەی سیلیزی

چەمچەماڵ: 22 پلەی سیلیزی

دهۆک: 20 پلەی سیلیزی

زاخۆ: 21 پلەی سیلیزی

هەڵەبجە: 22 پلەی سیلیزی

گەرمیان: 23 پلەی سیلیزی

 

کەرتی سووتەمەنی لە دامەزراوەی حکومی "رۆساتۆم"، لە میانی کۆڕبەندی نێودەوڵەتی "ENWEX-2026"، یەکەم رۆبۆتی گەڕۆکی بۆ شەحنکردنەوەی ئۆتۆمبێلی کارەبایی لەسەر ئاستی ڕووسیا ئاشکرا کرد.

ئەم وێستگەی شەحنکردنەوەیە دەتوانێت بە شێوەیەکی سەربەخۆ لە شوێنە دیاریکراوەکانی وەک پارکینی ئۆتۆمبێل، سەنتەرە بازرگانییەکان، کۆمەڵگە نیشتەجێبوونەکان یان کەنار شەقامەکان هاتوچۆ بکات.

 بە پێچەوانەی وێستگە باوەکان، شۆفێر پێویست ناکات بچێتە لای وێستگەکە، بەڵکو لە رێگەی ئەپڵیکەیشنێکی مۆبایلەوە رۆبۆتەکە بانگ دەکات و رۆبۆتەکە ڕاستەوخۆ دەگاتە لای ئۆتۆمبێلەکەی.

پڕۆژەکە پشت بە پاتریی لیتیۆم-ئایۆنی ناوخۆیی ڕووسیا دەبەستێت و کۆمپانیای "Centrotech Engineering" گەشەپێدەری سەرەکییەتی، بڕیاریشە لە داهاتوودا لەلایەن کۆمپانیاکانی بەڕێوەبردنی خانووبەرە و ژێرخانی کارەباییەوە سوودی لێ وەربگیرێت.

کۆشکی سپی، بەرەبەیانی ئەمڕۆ سێشەممە، دەستلەکارکێشانەوەی "لۆری چافیز دیرمەر"ی لە پۆستی وەزیری کار راگەیاند، بە مەبەستی وەرگرتنی پۆستێکی نوێ لە کەرتی تایبەتدا، بڕیاریشە جێگرەکەی بە وەکالەت ئەرکەکانی پۆستەکە بگرێتە ئەستۆ.

بە دەستلەکارکێشانەوەی "لۆری چافیز دیرمەر"، ناوبراو دەبێتە سێیەم وەزیری ئەمریکی کە لە ماوەی هەفتەکانی رابردوودا ئیدارەی دۆناڵد ترەمپ جێبهێڵێت؛ ئەمەش دوای "کریستی نۆیم" وەزیری ئاسایشی نیشتمانی و "بام بۆندی" وەزیری داد.

پێشتر ترەمپ لە مانگی ئازاردا "کریستی نۆیم"ی لە پۆستی وەزیری ئاسایشی نیشتمانی دوورخستەوە، دوای کەمتر لە مانگێکیش "بام بۆندی" داواکاری گشتی لە پۆستی وەزیری داد دوورخرایەوە، ئەوەش لە میانی بڵاوبوونەوەی ڕاپۆرتەکان سەبارەت بە "خراپی ڕەفتار".

"ستیڤن چێنگ" بەڕێوەبەری پەیوەندییەکانی کۆشکی سپی، لە هەژماری خۆی لە تۆڕی کۆمەڵایەتی "X" نووسیویەتی: "وەزیری کار لۆری چافیز دیرمەر ئیدارەی ئەمریکا جێدەهێڵێت بۆ وەرگرتنی پۆستێک لە کەرتی تایبەت، لە شوێنی ئەویش کیسی ساندەرلین پۆستی وەزیری کار بە وەکالەت وەردەگرێت."

 

وەزارەتی دەرەوەی ئێران، ئەمڕۆ سێشەممە، رایگەیاند کە هێرشی ئەمریکا بۆ سەر کەشتیی (تۆسکا) بە پێشێلکردنی ئاگربەست دادەنرێت.

وەزارەتەکە لە بەیاننامەیەکدا  وتی: بە توندی سەرکۆنەی هێرشی سوپای ئەمریکا بۆ سەر کەشتیی تۆسکا و بە بارمتەگرتنی تاقمەکەی دەکەین، ئاماژەی بەوەش کرد کە: ئەم هێرشە چەتەگەریی دەریایی، کارێکی تیرۆریستی و پێشێلکردنی ئاگربەستە.

هەر لە بەیاننامەکەدا وەزارەتی دەرەوەی ئێران دەڵێت: هۆشداری دەدەین لە ئەنجامە مەترسیدارەکانی دەستبەسەرداگرتنی کەشتییەکە و جەخت لەسەر پێویستی ئازادکردنی کەشتییەکە و تیمەکەی دەکەینەوە، ئاماژەی بەوەش کرد کە ئێران تەواوی تواناکانی خۆی بۆ بەرگری لە بەرژەوەندییەکان، ئاسایشی نەتەوەیی و کەرامەتی گەلەکەی بەکاردەهێنێت.

هەروەها جەختیکردەوە کە ویلایەتە یەکگرتووەکانی ئەمریکا بەرپرسیارێتی تەواوی تێکچوونی دۆخی ناوچەکە لە ئەستۆ دەگرێت.

عەباس عامری ئەمینداری گشتیی چوارچێوەی هەماهەنگ رایگەیاند، لە کۆبوونەوەکەی ئەمشەوی چوارجێوەی هەماهەنگیدا، بڕیاردراوە دەستنیشانکردنی ناوی کاندیدەکەیان بۆ پۆستی سەرۆک وەزیرانی عیراق دوابخرێت بۆ رۆژی چوارشەممە و سبەینێ سێشەممەش  لە گفتوگۆکانیان بەردەوام دەبن.

ئەمشەو لە ماڵی عەمار حەکیم، چوارچیوەی هەماهەنگی کۆبوونەوە، گەرچی ناوی کاندیدەکەیان ئاشکرا نەکرد و دوایان خست بۆ رۆژی چوارشەممە، بەڵام ئەمینداری گشتیی چوارچێوەی هەماهەنگی دەڵێت؛ کۆبوونەوەکە ئەرێنی بووە.

عەباس عامری، ئامژەی بەوەکرد، کۆبوونەوەکە زۆر باش بووە و لەیەک تێکگەیشتنی باش هەبووە، بەڵام گفتوگۆکان پێویستی بەکاتی زیاتر هەبوو، بۆیە هەموو لایەنەکانی چوارچێوەی هەماهەنگی بڕیاریاندا تاوەکوو چوارشەممە کۆبوونەوەکە دوا بخرێت و سبەینێش بەردەوام دەبن لە گفتوگۆکردن.

ئەمە لە کاتێکدایە ئاژانسی رۆیتەرز و چەند سەرچاوەیەکی ناوخۆیی رایانگەیاند بوو، باسم ئەلبەدری، نزیک لە نوری مالیکی کاندید کراوە بۆ پۆستی سەرۆک وەزیرانی عیراق.

تەندروستی راپەرین  بڵاویکردوەتەوە، بەهۆی تەرزە بارینی چەند سەعاتی ئێوارەی ئەمڕۆ 35 حاڵەتی برینداربوون لە نەخۆشخانەی گشتی رانییە  تۆمار کراون، ئاماژەی بەوەشکردوە بریندارەکان بەربوونەوەو شکانی قاچ و دەست و برینداربونی جەستەیی بوون.

دوای ئەوەی ئێوارەی ئەمڕۆ شەپۆلێکی باران بارین و تەرزە، سنوری راپەرینی گرتەوە، بەڕێوەبەرایەتی گشتی تەندروستی راپەرین  راگەیەندراوێکی بڵاوکردەوە.

بە گوێرەی راگەیاندنەکە زۆربەی بریندارەکان بەهۆی ئاڵۆزبوونی رەوشی هاتووچۆ و خلیسکان لەسەر رێگاوبانەکان بووە لە کاتی راکردن و خۆپاراستنی هاووڵاتیان لە زیانەکانی تەرزە بەهێزەکە.

لە کۆتایی راگەیەندراوەکەدا، نەخۆشخانەکە هیوای چاکبوونەوەی خێرا و تەندروستییەکی باشی بۆ سەرجەم بریندارەکان و هاووڵاتیانی سنوورەکە دەخوازێت.

بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغداد لەگەڵ قەیس خەزعەلی، ئەمینداری گشتیی بزووتنەوەی عەسائیبی ئەهلی حەق کۆبووەوە، لەمیانی دیدارێکدا جەخت لە یەکخستنی هەوڵەکان بۆ زاڵبوون بەسەر ئاڵنگارییەکاندا کرایەوە.

لە کۆبوونەوەکەدا دوایین پێشهاتەکانی ناوچەکە و عیراق خرایەبەر باس و جەخت لە یەکخستنی هەوڵەکان بۆ زاڵبوون بەسەر ئاڵنگارییەکاندا کرایەوە.

هەردوولا هاوڕابوون لەسەر پێویستی پابەندبوون بە وادەی دەستووری بۆ تەواوکردنی رێکارەکانی پێکهێنانی حکومەتی نوێی عیراق بۆ خزمەتکردنی زیاتری خەڵک.

دۆناڵد ترەمپ، سەرۆکی ئەمریکا رایگەیاند کە ئەو رێککەوتنەی ئێستا کاری لەسەر دەکەن لەگەڵ ئێران، زۆر باشتر و بەهێزتر دەبێت لە رێککەوتنە ئەتۆمییەکەی ساڵی 2015 کە لە سەردەمی باراک ئۆباما  ئیمزا کرابوو.

سەرۆکی ئەمریکا رەخنەی لە رێکەوتنەکەی باراک ئۆباما گرتوە و دەڵێت؛ ئەو رێککەوتنە رێگەیەکی مسۆگەر بوو بۆ دەستڕاگەیشتنی ئێران بە چەکی ئەتۆمی، بەڵام جەختی کردەوە کە لە رێککەوتنە نوێیەکەدا، ئەگەر ئەنجامبدرێت رێگە بەوە نادرێت.

هەروەها ئاماژەی بەوە کرد، ئەگەر ئەو کۆتایی بە رێککەوتنە کۆنەکە نەهێنایە، ئەوا چەکی ئەتۆمی دژی ئیسرائیل، رۆژهەڵاتی ناوەڕاست و تەنانەت بنکە سەربازییەکانی ئەمریکاش بەکاردەهێنرا.

سەرۆکی ئەمریکا  باسی لەوەش کرد، گەیشتن بەم رێککەوتنە دەبێتە دەستکەوتێکی گەورە بۆ جیهان و ئاشتی و ئاسایش بۆ ئیسرائیل و ئەوروپا و ئەمریکاش دەستەبەر دەکات، هاوکات جەختیشی کردەوە کە بۆ ئیمزاکردنی ئەم رێککەوتنە لەژێر هیچ جۆرە فشارێکدا نییە.

قوباد تاڵەبانی، جێگری سەرۆک وەزیران پێشوازی لە عەدنان درجال، سەرۆکی یەکێتیی تۆپی پێی عیراق کرد و پێکەوە لەبارەی رەوشی وەرزش لە عیراق و کوردستان گفتوگۆیان کرد.

 لە کۆبونەوەکەدا کە رۆژی دووشەممە (20-4-2026) بەڕێوەچوو، قوباد تاڵەبانی پیرۆزبایی لە سەرۆکی یەکێتیی تۆپی پێی عیراق کرد بەبۆنەی سەرکەوتنی مێژوویی هەڵبژاردەکەوە بۆ مۆندیال و هەوڵەکانی بەرز نرخاند لە بەرەوپێشبردنی تۆپی پێی عیراقدا.

 هەردوولا بە گرنگیان زانی ئاستی هاوکاری و هەماهەنگی نێوان هەرێم و بەغداد بەهێزتر بکرێت بۆ زیاتر بە پیشەییکردنی تۆپی پێ و هەروەها بەهێزترکردنی ئاستی یانەکان و دروستکردنی ژێرخانێکی پتەو بۆ پەروەردەکردن و پێگەیاندنی یاریزانی پیشەیی.

 لە کۆتایی کۆبوونەوەکەدا عەدنان درجال، درێسی ‌هەڵبژاردەی عیراق و تۆپی تایبەتی مۆندیالی 2026ـی وەک دیاری پێشکەش بە جێگری سەرۆک وەزیران کرد.

ئاژانسی هەواڵی تەسنیمی ئێران بڵاویکردوەتەوە، هەڵوێستی ئێران سەبارەت بە بەشدارینەکردن لە دانوستانەکان تا ئێستا هیچ گۆڕانکارییەکی بەسەردا نەهاتووە و مەرجی بەشداریکردنی گرێدراوە بە لابردنی گەمارۆ دەریاییەکانی سەر ئێران.

سەرەڕای لێدوانەکانی ئەمڕۆی دۆناڵد ترەمپ، کە رایگەیاند جەی دی ڤانس و تیمی دانوستانکاری ئەمریکا بەرەو پاکستان بەڕێکەوتوون، بەڵام تا ئێستا ئێران رەتیدەکاتەوە بەشداری گەرێکی تری دانوستانەکان ببێت لەگەڵ ئەمریکا.

بە گوێرەی ئاژانسەکە، سەرچاوە ئاگادارەکان ئاماژە بەوە دەکەن کە گەمارۆی دەریایی یەکێکە لە کۆسپە سەرەکییەکانی بەردەم دەسپێکردنەوەی گفتوگۆکان، کە لە رێگەی نێوەندگیری پاکستانەوە بە لایەنی ئەمریکی گەیەندراوە. 

تەسنیم ئاماژەی بەوەکردوە، بەرپرسانی ئێران پێیان وایە، ئەمریکا هێشتا بە دیدێکی زیادەڕۆیانە و بە هەمان ئەو هەڵە سەربازییانەی پێشوتری سەیری مێزی دانوستان دەکات، بۆیە تاران ئامادە نییە ببێتە بەشێک لەوەی کە ناوی ناوە شانۆگەری و کات کوشتنی ئەمریکی.

ئاژانسەکە ئەوەشی خستوەتەڕوو، ئێران ئەگەری فریودانی میدیایی لەلایەن واشنتۆنەوە لەبەرچاو دەگرێت و هاوکات ئامادەکاری بۆ هەر روبەڕووبوونەوەیەکی سەربازی دەکات و  مەرجی گەڕانەوە بۆ دانوستانیش لابردنی گەمارۆ دەریاییەکانە.

سەرۆکی ئەمریکا رایگەیاند، ئەمرۆ وەفدی دانوستانکاریان بۆ گفتوگۆکردن لەگەڵ ئێران دەگەنە ئیسلام ئاباد و جەختیکردەوە دەبێت ئێران دەستبەرداری چەکی ئەتۆمی ببێت.

دۆناڵد ترەمپ بە رۆژنامەی نیویۆرک پۆستی ئەمریکی راگەیاندوە، جەی دی ڤانسی جێگری و تیمی دانوستانکاریان لە رێگادان و لە ماوەی چەند سەعاتی داهاتودا دەگەنە ئیسلام ئاباد.

ناوبراو، جەختیکردەوە گرنگترین خاڵ دەبێت ئێران قبوڵی بکات ئەوەیە نابێت چەکی ئەتۆمی هەبێت.

سەرۆکی ئەمریکا ئاماژەی بەوەشکردوە، ئامادەن لەگەڵ سەرکردە باڵاکانی ئێران کۆببنەوە ئەگەر پێشکەوتنێک بەدەست بهێنرێت و ئەو پێی وایە مامەڵە لەگەڵ کەسانی گونجاودا دەکەن.

دۆناڵد ترەمپ ئەوەشیخستوەتەڕوو لە گفتوگۆی ئەمجارەیان لەگەڵ ئێران بڕوای وایە وەفدی ئێران جدین لەم قۆناغەدا و هاوشێوەی رابردوو هەمووان بۆ گەیشتن بە رێککەوتن کۆدەبنەوە و نەک بۆ کات کوشتن.

ئەمە لە کاتیكدایە بڕیارە سبەینێ سێشەممە و رۆژێک پێش وادەی تەواو بونی ئاگربەستەکە، گەڕێکی تری دانوستانەکان لە نێوان ئەمریکا  و ئێران ئەنجامبدرێت لە ئیسلام ئابادی پایتەختی پاکستان.

 

ئیسماعیل قائانی، فەرماندەی فەیلەقی قودسی سوپای پاسدارانی ئێران، ئەمڕۆ دووشەممە، لە سەردانەکەیدا بۆ بەغداد رایگەیاند کە پێکهێنانی حکومەت لە عیراق مافێکی تایبەتی گەلی عیراقە و جەختی لە رەتکردنەوەی هەر دەستوەردانێکی دەرەکی لەم پرسەدا کرد.

قائانی لە پەیامێکدا ئاماژەی بەوە کرد: عیراق گەورەترە لەوەی ئەوانی دیکە دەستوەردان لە کاروباری بکەن بەتایبەتی ئەوانەی تاوانیان دژ بە مرۆڤایەتی ئەنجامداوە.

 فەرماندەی فەیلەقی قودسی دووپاتی کردەوە کە هەڵبژاردنی سەرۆک وەزیران تەنها بەپێی بڕیاری عیراقییەکان خۆیان ئەنجام دەدرێت هەروەها ستایشی هەڵوێستی گەلی عیراق و مەرجەعیەتی ئایینی باڵا و بەرپرسانی کرد بۆ ئەو هاوکاری و تێگەیشتنەی نیشانیان داوە