دەزگای ئاسایشی هەرێم لەبارەی هێرشەکانی سەرلە بەیانیی ئەمڕۆ راگەیەنراوێکی بڵاوکردەوە و تێیدا هاتووە: بە پێنج موشەک هێرشکراوەتە سەر چەند ناوچەیەک لە سنوری پارێزگای سلێمانی و هەڵەبجە.

دەقی راگەیەنراوەکە: 

دەزگای ئاسایشی هەرێم رایدەگەیەنێت، سەعات (03:10) خولەکی بەیانی رۆژی دووشەممە 14ـی 9ـی 2026 بە(پێنج) موشەک هێرشکرایە سەر ئەم ناوچانە.

 

•  بە (سێ) موشەک هێرشکرایە سەر زڕگوێزەڵە.
• (یەک) موشەک لە نزیک گوندی گورگەچیا سەربەناحیەی سیروان کەوتووەتە خوارەوە.
• (یەک) موشەک لە نێوان گوندەکانی داری زاین و میراسی خواروو لەقەرەداغ کەوتووەتە خوارەوە.

 

 

لەئەنجامی هێرشەکاندا هیچ زیانێکی گیانی نەبووە و بەپێویستی دەزانین، داوا لەهاوڵاتیان بکەین لەدوای هێرشەکان نزیکی شوێنەکان نەبنەوە و دەستکاری پارچەو پاشماوەکانی موشەک و درۆن نەکەن لەپێناو پاراستنی سەلامەتیان.

پۆلیسی سلێمانی رایدەگەیەنێت، تۆمەتبارێک لەلایەن مەفرەزەکانی نوسینگەی نەهێشتنی تاوانی سەیدسادقەوە دەستگیرکرا، کە بڕی چوار ملیۆن دیناری لەناو دەغیلەی ماڵێکدا دزیبوو.

بەڕێوەبەرایەتی پۆلیسی پارێزگای سلێمانی لە راگەیەنراوێکدا ئاماژەی بەوەکرد، دوای ئەوەی هاووڵاتییەک سکاڵای یاسایی تۆمارکرد کە بڕی چوار ملیۆن دیناری لەناو دەغیلەی ماڵەکەیدا لێدزراوە، بە بڕیاری دادوەر لێکۆڵینەوەکان دەستیان پێکرد.

ئاماژەی بەوەشکرد، لە دوای بەدواداچوون و کۆکردنەوەی زانیاری ورد، مەفرەزەکانی نوسینگەی نەهێشتنی تاوانی سەیدسادق توانیان شوێنی تۆمەتبارەکە بدۆزنەوە و دەستگیری بکەن، لە کاتی دەستگیرکردنەکەشیدا توانرا دەستبەسەر تەواوی بڕە پارە دزراوەکەدا بگیڕێت.

پۆلیسی سلێمانی ئاماژەی بەوەشکردووە، تۆمەتبارەکە لەدایکبووی ساڵی 2003ـە، لە ئێستاشدا بە بڕیاری دادوەر و بەپێی ماددەی (446) لە یاسای سزادانی عیراقی راگیراوە و لێکۆڵینەوە لەگەڵیدا بەردەوامە.

کەشناسی هەرێم پێشبینییەکانی بۆ 48 سەعاتی داهاتوو بڵاوکردەوە و رایگەیاند، پلەکانی گەرما بەراورد بە رۆژانی رابردوو روو لە نزمبوونەوە دەکەن.

کەشناسی هەرێم، ئەمڕۆ دووشەممە، ئاشکرای کرد: ئاسمان لە زۆربەی کاتەکاندا ساماڵ دەبێت و خێرایی با لە نێوان 10 بۆ 20 کم/سەعاتدا دەبێت بە ئاراستەی باکوری خۆرئاوا.

بەپێی کەشناسی، پلەکانی گەرما بە بڕی 1 تا 2 پلە لە تۆمارکراوەکانی دوێنێ نزمتر دەبنەوە. لە بەرزترین پلەکانی گەرمای تۆمارکراودا، گەرمیان بە 41 پلە بەرزترین و حاجی ئۆمەران بە ٢٨ پلەی سیلیزی نزمترین پلەی گەرمییان تێدا تۆمار دەکرێت، هەروەها لە هەولێر ٣٩، سلێمانی ٣٦، دهۆک ٣٨، هەڵەبجە ٣٨ و چەمچەماڵ ٣٩ پلەی سیلیزی دەبێت.

سەبارەت بە کەشوهەوای سبەی سێشەممە (١٥ی ئەیلوولی ٢٠٢٦)، ئاسمان لە ساماڵەوە دەگۆڕێت بۆ نیمچە هەور بەتایبەتی لە ناوچە شاخاوییەکاندا. پلەکانی گەرماش بە جێگیری دەمێننەوە و نزیک دەبنەوە لە تۆمارکراوەکانی ئەمڕۆ.

ئەدمیراڵ براد كۆپەر، فەرماندەی فەرماندەیی ناوەندیی ئەمریكا (سێنتكۆم)، لە چاوپێكەوتنێكدا لە بەرنامەی (فەیس زە نەیشن) ی تۆڕی هەواڵی سی بی ئێس رایگەیاند، بەهیچ شێوەیەك نیگەران نییە سەبارەت بە یەدەگی تەقەمەنی و چەكەكانی ئەمریكا. 

ئەمەش لە كاتێكدایە كە هەندێك راپۆرتە رۆژنامەوانییەكان ئاماژە بەوە دەكەن وەزارەتی جەنگی ئەمریكا (پێنتاگۆن) لە رووبەڕووبوونەوەكانیدا لەگەڵ ئێراندا بەشێكی زۆری یەدەگەكەی بەكارهێناوە.

لەچاوپێكەوتنەكەدا پێشكەشكارەكە باسی لەوەكرد، ئەمریكا 45% موشەكی پاتریۆت و زیاتر لە نیوەی یەدەگی موشەكەكانی سیستمی بەرگریی ئاسمانی تادی بەكارهێناوە،  لەوەڵامدا براد كوپەر وتی لەگەڵ ئەوەشدا نیگەران نین.

هەر لەو چێوەیەشدا، دۆناڵد ترەمپ سەرۆكی ئەمریكا سەرەتای ئەم مانگە رایگەیاندبوو ئەمریكا خاوەنی بڕێكی بێسنوور لە تەقەمەنی كوالیتی ناوەند و بەرزە، جگە لەوەش، بە ئاستێك تەقەمەنی بەرهەم دەهێنین كە پێشتر وێنەی نەبووە. 

 

وەزارەتی تەندروستیی عیراق ئاماری کۆتایی روداوی دزەکردنی غازی ئامۆنیای لە کارگەیەکی پارێزگای بەسڕە راگەیاند و ئاشکرای کرد، بەهۆی روداوەکەوە دوو کەس گیانیان لەدەستداوە و 114 کەسی تریش بریندار بوون.

بەپێی راگەیەندراوێکی وەزارەتی تەندروستی: تەواوی برینداران فریاگوزاریی سەرەتاییان بۆ کراوە و خزمەتگوزارییە پزیشکییە پێویستەکانیان پێشکەش کراوە.

هەروەها ئاماژە بەوە کراوە: بە راسپاردە و بەدواداچوونی راستەوخۆی دکتۆر عەبدولحوسێن موسەوی، وەزیری تەندروستی، چاودێریی دۆخی برینداران دەکرێت.

وەزارەتەکە ئەوەشی خستۆتە روو کە زیاتر لە 50 ئۆتۆمبێلی فریاکەوتن ئاڕاستەی شوێنی روداوەکە کراون بۆ پێشکەشکردنی یارمەتیی سەرەتایی و گواستنەوەی برینداران بۆ مەڵبەند و بنکە تەندروستییەکان.

رونیشی کردەوە کە تاوەکو ئێستا 21 بریندار لە نەخۆشخانەکاندا ماونەتەوە و بەسەر نەخۆشخانەکاندا دابەش بوون؛ 12 بریندار لە نەخۆشخانەی زوبێر، دوو بریندار لە نەخۆشخانەی سەیاب، و 7برینداریش لە نەخۆشخانەی کوەیتی.

وەزارەتی تەندروستی جەختی کردەوە: دۆخی تەندروستیی هەموو بریندارەکان جێگیرە بە بێجگە لە یەک دۆخ، و پرۆسەی پێشکەشکردنی چاودێریی پزیشکی و بەدواداچوون بۆ تەندروستیی برینداران بەردەوامە.

بریندارێكی ئاگركەوتنەوەكەی گرتووخانەی كۆبانێ گیانی لەدەستدا و 17 گەنجی دەستگیركراویش لە زیندانی حەلەب ئازادكران.

میدیاكانی رۆژئاوای كوردستان بڵاویانكردەوە، ئاماری گیانلەدەستدان بەهۆی روداوی ئاگركەوتنەوەكەی گرتووخانەی كۆبانێ، بەهۆی گیانلەدەستدانی یەكێك لە بریندارەكانەوە بەناوی ئەحمەد عەقیل بۆ 10 حاڵەت بەرزبووەتەوە و بەوەش ئاماری بریندارەكان بووەتە 19 كەس كە رەوشی سێ كەسیان ناجێگیرە.

پەیامنێری كوردسات نیوزیش لە رۆژئاوای كوردستان رایگەیاند، 17 گەنجی كوردی دانیشتووی كۆبانێ كە لە دوو رۆژی رابردوودا بەهۆی دەربڕینی ناڕەزاییەوە دەستگیركرابوون و رەوانەی زیندانی حەلەب كرابوون، ئازادكران.

لە چەند رۆژی رابردوودا لە ئەنجامی ئاگركەوتنەوە لە گرتووخانەی كۆبانێ، نۆ كەس گیانیان لەدەستدا و 20 كەسی تریش برینداربوون، زۆربەشیان ئەو هاووڵاتیانەی رۆژئاوای كوردستان بوون كە لەسەر خۆپیشاندان دەستگیركرابوون لە دژی شەهیدكردنی شەڕڤانێك لەلایەن چەند چەكدارێكی عەرەبەوە.

د. ئارام محەمەد قادر، وەزیری خوێندنی باڵا و توێژینەوەی زانستی بە یاوەری وەفدێکی وەزارەت، سەردانی کونسوڵخانەی وڵاتی چینی لە هەولێر کرد، بە مەبەستی گەیاندنی هاوخەمی و بەدواداچوونی ورد بۆ کەیسی گیانلەدەستدانی خوێندکاری دکتۆرا (محەمەد سەعدالدین هادی) لە چین و ئاسانکاری بۆ هێنانەوەی تەرمەکەی.

لە کۆبوونەوەکەدا، وەزیری خوێندنی باڵا جەختی لەسەر بەدواداچوونی یاسایی کەیسەکە کردەوە و ئامادەیی وەزارەتی نیشاندا بۆ رەوانەکردنی وەفدێک بۆ چین بە مەبەستی روونکردنەوەی هۆکاری گیانلەدەستدانەکەی و ئاسانکاریکردن بۆ هێنانەوەی تەرمەکەی، تاوەکو ئەنجامی لێکۆڵینەوەکان دڵنیایی بداتە خانەوادەکەی و خوێندکارانی کورد لەو وڵاتە.

لە بەرانبەردا، کونسوڵی گشتیی چین هاوخەمیی خۆی دەربڕی و رایگەیاند، لە ئێستادا باڵیۆزخانەی عیراق لە چین لەگەڵ زانکۆی دەریایی چین و لایەنە پەیوەندیدارەکانی ناوچەکە لە پەیوەندیدان بۆ دیاریکردنی هۆکاری روداوەکە، و دڵنیاییدا کە کەیسەکە لەلایەن تیمێکی پیشەیییەوە بەدواداچوونی بۆ دەکرێت.

وەزارەتی کارەبای حکومەتی هەرێمی کوردستان رایگەیاند، لە ماوەی نزیکەی 40 رۆژی هەڵمەتی داشکاندنی قەرزی کۆندا (لە 3ی ئاب تا 10ی ئەم مانگە)، نزیکەی 800هەزار هاوبەش لە سەرانسەری هەرێم سوودیان لە بڕیاری داشکاندنی 50٪ی قەرزی کۆنی کارەبا وەرگرتووە.

بەپێی راگەیەندراوێکی وەزارەتەکە، ئەم بڕیارەی ئەنجومەنی وەزیران بە مەبەستی هاوکاریکردنی هاووڵاتییان و ئاسانکاری بۆ دانەوەی قەرزە کۆنەکان بووە پێش جێبەجێکردنی تەواوەتیی "پڕۆژەی رووناکی" و گواستنەوە بۆ سیستەمی نوێی دابینکردنی کارەبای 24 کاتژمێری.

وەزارەتی کارەبا ئاماژەی بەوەش کردووە، بەشێکی زۆری ئەو هاوبەشانەی قەرزیان لەسەر بووە توانیویانە لەو دەرفەتە سوودمەند ببن و جەختیشی کردووەتەوە کە لەسەر پشتیوانیکردنی هاووڵاتییان و دابینکردنی کارەبای بەردەوام بەردەوام دەبن.

لە چوارچێوەی هەوڵە بەردەوامەکان بۆ بەهێزکردنی پەیوەندیی نێوان دەزگا ئەمنییەکان و هاووڵاتییان و خێراکردنی ئاستی وەڵامدانەوەی روداوەکان، بەڕێوەبەرایەتیی پۆلیسی پارێزگای سلێمانی خستنەگەڕی هێڵێکی گەرمی نوێی راگەیاند.

بەپێی راگەیەندراوێکی رەسمیی راگەیاندنی بەڕێوەبەرایەتیی پۆلیسی پارێزگای سلێمانی، بەشی پۆلیسی نەهێشتنی تاوان هاوشانی هێڵی گەرمی ژمارە (105)، هێڵی گەرمی ژمارە (194)ی بۆ خزمەتی هاووڵاتییان کارا کردووە.

ئەم خزمەتگوزارییە بە شێوەی بەردەوام و(24)سەعاتی ئامادەی وەرگرتنی پەیوەندییەکان دەبێت، تاوەکو هاووڵاتییان لە کاتی رودانی هەر بارۆدۆخێکی نەخوازراو یان کتوپڕدا بە خێرایی پەیوەندی بە هێزەکانی پۆلیسەوە بکەن.

نوسینگەی سەرۆك وەزیرانی عیراق رایگەیاند، زەیدی لە فەرەنسا و ئەڵمانی چەند یاداشتێك لە بواری وزە و ئاسایش و چەند كەرتێكی تر ئیمزا دەكات.  

بەپێی راگەیەنراوێكی نوسینگەی سەرۆك وەزیرانی عیراق، عەلی زەیدی لەسەر بانگهێشتی حكومەتی ئەڵمانیا و فەرەنسا دەكات و بە سەرۆكایەتی وەفدێكی باڵا گفتوگۆ لەگەڵ هەردوو لایەنی فەرەنسی و ئەڵمانیدا دەكات. 

دەشڵێت، ئەم سەردانە لە چوارچێوەی هەوڵەكان و سیاسەتی حكومەتدایە بۆ پەرەپێدانی پەیوەندییە نێودەوڵەتییەكان و فراوانكردنی ئاسۆی هاوبەش لەگەڵ فەرەنسا و ئەڵمانیا لە كەرتی وزە و ئاسایش و گواستنەوە و بوارە گرنگەكانی تردا.

راشیگەیاند، زەیدی لەگەڵ ئیمانوێل ماكرۆن سەرۆكی فەرەنسا و فرێدریك مێرتس راوێژكاری ئەڵمانیا كۆدەبێتەوە بۆ تاوتوێكردنی چەندین دۆسیە و پرسێكی هەرێمیی و نێودەوڵەتیی هاوبەش.

نوسینگەی زەیدی ئاماژە بەوەدەكات، وەفدی عیراق بەشداری لە گفتوگۆ فراوانەكاندا دەكات بۆ پتەوكردنی هاوبەشی ئابوری لە سایەی ئالنگارییەكانی ناوچەكە و جیهان و لە سەردانەكەدا چەندین یاداشتنامەی لێكتێگەیشتن لە چەند بوارێكدا ئیمزا دەكرێت. 

 

وەزارەتی وزەی ئێران، لە پێناو کەمکردنەوەی بەکاربردنی سووتەمەنی و لە سۆنگەی قووڵبوونەوەی قەیرانی دابینکردنی وزە لە وڵاتدا، دەستپێشخەریی "رۆژێک بێ ئۆتۆمبێل"ی لە ناو بەڕێوەبەرایەتییەکانی وەزارەتەکەیدا دەستپێکرد.

عەباس عەلی ئابادی، وەزیری وزەی ئێران رایگەیاند، وەزارەتەکەیان کارمەندان هان دەدات بۆ بەکارهێنانی هۆکارەکانی گواستنەوەی جێگرەوە و دەستبەرداربوون لە ئۆتۆمبێلی تایبەتی خۆیان.

جەختیشی کردەوە کە حکومەت هەوڵ دەدات پرۆسەی دەست بەسەرەوەگرتن و رێکخستنی بەکاربردنی وزە لە دامەزراوە رەسمییەکانی خۆیەوە دەستپێبکات.

ئەم دەستپێشخەرییە لە وەڵامی رێنماییەکانی مەسعود پزیشکیان، سەرۆک کۆماری ئێراندا هاتوو، کە تیایدا داوای کردبوو هەفتانە رۆژێک لە دامەزراوە حکومییەکاندا بکەرێتە رۆژی بێ ئۆتۆمبێل، هاوشانی کارکردن بۆ گەشەپێدانی گواستنەوەی گشتی و زیادکردنی بەرهەمهێنانی ئۆتۆمبێلی هایبرید.

وەزارەتی خوێندنی باڵا و توێژینەوەی زانستی رێکاری رەفتاری پیشەیی مامۆستایان و خوێندکارانی لە زانکۆ و پەیمانگەکان ئیمزا کرد، کە رێگری دەکات مامۆستا پەیوەندی سۆزداری، هاوسەرگیری، یان پەیوەندی تەلەفۆنی تایبەت لەگەڵ خوێندکاراندا دروست بکات.

د. ئارام محەمەد، وەزیری خوێندنی باڵا و توێژینەوەی زانستی، رێکارەکەی ئیمزا کردووە کە تەواوی زانکۆ، ئەنجومەن، دەستە و پەیمانگە حکومی و تایبەتەکانی هەرێمی کوردستان دەگرێتەوە، هەروەها ئامانج لێی پاراستنی بەرژەوەندی گشتی و دیاریکردنی ستانداردەکانی رەفتاری پیشەیییە لە قۆناغەکانی خوێندنی بەرایی، خوێندنی باڵا و بۆردی کوردستانی.

تەوەرەی یەکەم، رەفتاری ئەکادیمی و پیشەیی مامۆستایان رەفتاری یەکسان: قەدەغەیە جیاوازی لە نێوان خوێندکاراندا بکرێت لەسەر بنەمای ئایین، نەتەوە، رەگەز، بیروڕا، یان باری ئابوری و کۆمەڵایەتی.

پەیوەندییەکانی مامۆستا و خوێندکار: قەدەغەیە مامۆستا پەیوەندی سۆزداری، هاوسەرگیری، یان پەیوەندی تەلەفۆنی تایبەت لەگەڵ خوێندکاراندا دروست بکات. لە حەڵەتی هاوسەرگیری لە کاتی خوێندندا، مامۆستاکە دەگوێزرێتەوە بۆ دەرەوەی بەش و کۆلێژەکە.

پەیوەندیی تەلەفۆنی: پەیوەندییەکان دەبێت لە رێگەی ئیمەیڵی رەسمی، پلاتفۆرمی زانکۆ (LMS)، یان لە رێگەی نوێنەری پۆل و سەرۆک بەشەوە بێت. 

رێگریکردن لە بەرتیل و دیاری: وەرگرتنی دیاری لە خوێندکاران بە بەرتیل هەژمار دەکرێت و کەیسەکە رەوانەی دادگا دەکرێت.

رێگریکردن لە بەرژەوەندیی خزمایەتی: مامۆستا بۆی نییە وانە بڵێتەوە، بێتە سەرپەرشتیار یان ئەندامی لیژنەی تاوتوێکردن، ئەگەر خوێندکارەکە خزمایەتی تا پلە چوار لەگەڵیدا هەبێت. 

شێوازی وانەوتنەوە: دەبێت وانەکان بە بێلایەنی بڵێنەوە و دەستەواژەی هاندەر بۆ دووبەرەکی، جیاکاری نەتەوەیی یان ئایینی بەکارنەهێندرێت. 

هەڵسەنگاندن و نمرەدان: نمرەی خوێندکاران تەنها لەسەر بنەمای هەوڵ و کۆششی زانستی دەبێت و نابێت پەیوەندییە کەسییەکان کاریگەرییان لەسەر بڕیارەکان هەبێت. 

پاراستنی ئاکاری گشتی: قەدەغەیە مامۆستا لەژێر کاریگەری خواردنەوە کحولییەکان بچێتە ناو حەرەمی زانکۆ یان هۆڵەکانی خوێندن. 

گەیاندنی زانیاری و تۆڕە کۆمەڵایەتییەکان: دەبێت مامۆستایان بە وشیارییەوە مامەڵە لەگەڵ تۆڕە کۆمەڵایەتییەکان بکەن بۆ پاراستنی ناوبانگی زانکۆ. 

تەوەرەی دووەم: رەفتار و ئەرکەکانی خوێندکاران پشت بەستن بە توانای خۆیی: خوێندکار دەبێت لەسەر بنەمای توانای زانستی خۆی نمرە بەدەستبهێنێت و قەدەغەیە پەنا بباتە بەر واسیتە، فشار، یان هەڕەشەکردن لە مامۆستا.

 پەیوەندی رەسمی: خوێندکاران بۆیان نییە پەیوەندی کەسی یان تەلەفۆنی راستەوخۆ لەگەڵ مامۆستا دروست بکان یان بانگهێشتی خوان و پێشکەشکردنی دیاری بکان. 

پۆشاک و کۆدی جلوبەرگ: دەبێت خوێندکاران رەچاوی ئادابی گشتی و کولتوری کۆمەڵگە بکەن و پابەندی رێنماییەکانی (Dress Code)ی زانکۆ ببن. 

بەکارهێنانی مۆبایل: بەکارهێنانی مۆبایل لە ناو هۆڵەکاندا قەدەغەیە، مەگەر بە رەزامەندی مامۆستا و بۆ مەبەستی فێربوون بێت. 

تۆمارکردنی دەنگ و وێنە: تۆمارکردنی وێنە، ڤیدیۆ یان دەنگی مامۆستا لە کاتی وانەدا بە بێ رەزامەندی پێشوەختە بە تەواوی قەدەغەیە.

 ناوهێنانی مامۆستا: پێویستە لە کاتی ناوهێناندا پاشگری زانستی یان پێشگری "مامۆستا" بەکاربهێندرێت. 

پاراستنی ئارامی و کەلوپەلەکان: ئەنجامدانی چالاکی سیاسی، ئایینی و کۆمەڵایەتی یان سازدانی ئاهەنگی کەسی (وەک رۆژی لەدایکبوون) لە ناو حەرەمی زانکۆدا بە بێ مۆڵەت قەدەغەیە. 

قەدەغەکردنی ماددە زیانبەخشەکان: بردنەژوورەوەی چەک، خواردنەوە کحولییەکان، یان دروستکردنی ئاژاوە و تێکدانی ژینگەی ئۆتۆمبێل یان هۆڵەکان قەدەغەیە. 

ئامادەبوون لە وانەکان: دواکەوتن لە وانەی یەکەم تەنها تا 10 خولەک بە پاساوی رەوا رێگەپێدراوە، لە وانەکانی تردا مامۆستا سەرپشکە لە رێگەنەدان بە چوونی خوێندکار بۆ ناو هۆڵ. 

تەوەرەی سێیەم: حوکمە گشتییەکان هەفتەی ئاڕاستەکردن (Orientation): زانکۆکان پێویستە لە هەفتەی یەکەمی خوێندندا رۆژێک بۆ ئاشناکردنی خوێندکارانی قۆناغی یەکەم بە رێنماییەکان تەرخان بکەن. 

سەرپێچی و سزاكان: هەر جۆرە جیاکاری یان سەرپێچییەک بەپێی یاسای بەرژەوەندیکردنی فەرمانبەرانی دەوڵەت ژماره (14)ی ساڵی 1991 و رێنمایی بەرزەفتکردنی خوێندکاران دادگایی یان رێکاری یاسایی لەبەرانبەر دەگیرێتەبەر.

 قەدەغەکردنی جگەرەکێشان: جگەرەکێشان و ڤەیپ لە ناو زانکۆ قەدەغەیە، جگە لەو شوێنانەی تایبەت دەکرێن (Smoking Area).

 پاراستنی نهێنی سکاڵاکار: ناو و ناسنامەی ئەو کەسانەی سکاڵا لەسەر پێشێلکارییەکان پێشکەش دەکەن بە نهێنی دەپارێزرێت. 

جێبەجێکردن: ئەم رێکارە لە رۆژی دەرچوونییەوە دەچێتە بوار جێبەجێکردن و بۆ ساڵی خوێندنی (2026-2027) و ساڵانی دواتر بەکاردەهێندرێت. 

سەرۆکی ئەمریکا رایدەگەیەنێت، ئێران بە هەر نرخێک بێت دەیەوێت رێککەوتن بکات بەڵام رێگەی پێنادرێت ببێتە خاوەنی چەکی ئەتۆمی.

دۆناڵد ترەمپ، سەرۆکی ئەمریکا رایگەیاند، ئێران بە هەموو شێوەیەک هەوڵی بەدەستهێنانی رێککەوتن دەدات و خوازیاری گەیشتنە بە رێککەوتن بە هەر نرخێک بێت، بەڵام جەختی کردەوە کە تاران بە هیچ جۆرێک دەستی بە چەکی ئەتۆمی ناگات.

ترەمپ ئاماژەی بەوەشکرد، رەنگە شەڕی ئێران پێش یان دوای هەڵبژاردنی خولی نیوەی ئەمریکا کۆتایی پێبێت، بەڵام بە هیچ شێوەیەک ئامادە نییە ئیمزا لەسەر رێککەوتنێک بکات کە کەموکوڕی تێدابێت.

لە بەشێکی دیکەی قسەکانیدا سەبارەت بە جەنگی روسیا و ئۆکراین، ترەمپ داوای لە ڤۆلۆدیمێر زیلینسکی سەرۆکی ئۆکراین کرد هێرشەکانی بۆ سەر دامەزراوە نەوتییەکانی روسیا رابگرێت، هەروەها ئاماژەی بە پەیوەندییە بازرگانی و سیاسییەکانی واشنتۆن لەگەڵ پەکین کرد و رایگەیاند، چین لە چەند ساڵی رابردوودا بە دادپەروەرییانە مامەڵەی لەگەڵ ئەمریکادا کردووە.

بەڕێوەبەرایەتیی هەواڵگریی سەربازی، ئەمڕۆ یەکشەممە، دەستگیرکردنی تیرۆریستێک بە ناوی (ئەبو ساهیر)، کە یەکێکە لە سەرکردە دیارەکانی رێکخراوی تیرۆریستی داعش لە کەرکوک راگەیاند.

بەڕێوەبەرایەتییەکە لە راگەیەندراوێکدا بڵاویکردەوە، ئەمڕۆ یەکشەممە، لە ئۆپراسیۆنێکی پێشوەختە و ورددا، توانرا یەکێک لە تیرۆریستە داواکراوەکان بەپێی ماددەی (4/1) لە یاسای بەرەنگاربوونەوەی تیرۆر دەستگیر بکرێت، کە بە (ئەبو ساهیر) ناسراوە و لەلایەن دەزگا ئەمنییەکانەوە بە ئامانجێکی ئاستبەرز و گرنگ هەژمار دەکرا.

ئاماژەی بەوەش کرد، دەستگیرکردنی ناوبراو دوای بەدواداچوونی چڕی هەواڵگری هات، کە بووە هۆی دەستنیشانکردنی شوێنی خۆحەشاردانی لە ناحیەی (یایچی) لە پارێزگای کەرکوک، و پرۆسەی هەڵکوتانە سەر شوێنەکە بە هەماهەنگی لەنێوان بەشی هەواڵگریی فیرقەی هەشت و هۆبەی هەواڵگریی یایچی ئەنجامدرا.

لە بەشێکی تری راگەیەندراوەکەدا هاتوو، زانیارییە هەواڵگرییەکان ئاماژە بەوە دەکەن کە تیرۆریستە دەستگیرکراوەکە چەندین پۆستی لەوەی پێی دەوترا "ویلایەتی عیراق" وەرگرتووە؛ لەوانە کارکردن لە "فیرقەی یەرمووک" لە پارێزگای ئەنبار لە سنووری سەقڵاویە، جگە لە وەرگرتنی بەرپرسیاریەتی لەوەی پێی دەوترا "دیوانی خزمەتگوزارییەکان" لە سەردەمی دەسەڵاتی چەکدارانی داعش لە بەشێک لە ناوچەکانی ئەنبار.

سەرباری ئەوەش، جەخت کراوەتەوە کە رێکارە یاساییە پێویستەکان بەرانبەر تۆمەتبارەکە گیراونەتە بەر بە مەبەستی رەوانەکردنی بۆ دادگا بەپێی یاسا بەرکارەکان.

خاتوو شاناز ئیبراهیم ئەحمەد، پەیامێکی هاوخەمی بۆ شەهیدبوونی سیپان حوزنی بڵاوکردووەتەوە و تێیداهاتووە، "شەهید سیپان بە خوێنی خۆی جارێکی تر سەلماندی کە ڕێگای بەرگری و فیداکاری، ڕێگایەکی پڕ لە قوربانییە".

دەقی پەیامەکەی خاتوو شاناز ئیبراهیم ئەحمەد

بەدڵێکی پڕ لەخەمەوە پرسە و سەرەخۆشیی لە کەسوکاری شەهید سیپان حوزنی، ئەندامی هەسەدە و شەڕڤانی لیوای حەسەکە، دەکەم؛ کە لەتاوانێکی دڕندانەدا شەهیدکرا. 
شەهید سیپان بە خوێنی خۆی جارێکی تر سەلماندی کە ڕێگای بەرگری و فیداکاری، ڕێگایەکی پڕ لە قوربانییە. 
بەشداری خەمی بنەماڵەی شەهیدم و لە خودای گەورە داواکارم سەبر و ئارامییان پێ ببەخشێت، ئاشتی باڵ بکێشێتەوە بەسەر ناوچەکەدا. 
یاد و ناوی شەهید سیپان حوزنی بۆ هەمیشە بە ڕێز و شانازییەوە دەمێنێتەوە.

شاناز ئیبراهیم ئەحمەد

لێکۆڵینەوەیەک ئاشکرایدەکات، بەکارهێنانی ژیریی دەستکرد لە جەنگی نێوان ئێران و ئەمریکا، کاریگەرییەکی گەورەی هەبووە لە گۆڕینی رەوتی شەڕەکە.

کۆمپانیای ئەنسرۆپیک راپۆرتێکی بڵاوکردووەتەوە و کاریگەرییەکانی بەکارهێنانی ژیری دەستکرد بەگشتیی و 'کڵاود' بەتایبەتی دەردەخات.

لە راپۆرتەکەدا هاتووە، لەلایەکەوە ئێران لە بەئامانجگرتنی بەشێک لە پێگە و کەشتییەکانی ئەمریکا لە ناوچەکە، ژیریی دەستکردی کۆمپانیای 'کڵاود'ـی وەک سەرچاوەیەک بۆ دروستکردنی رێبەری دەستنیشانکردنی ئامانجەکان و پێگەی کەشتییەکان و کۆکردنەوەی زانیاریی لەبارەی شێوە و جۆری فڕۆکەکان، بەکارهێناوە.

لەلایەکی دیکەشەوە، حوسییەکانی یەمەنیش لە دروستکردنی مۆدێلی پێشکەوتووی موشەک و درۆن، پشتیان بە بەکارهێنانی ئەم مۆدێلە لە ژیریی دەستکرد بەستووە بۆ کۆکردنەوەی زانیاریی ورد و دیاریکردن و کردنە ئامانجی ئامانجەکانیان.

هاوکاتی ئەمانە، روسیاش مۆدێلێکی نوێی درۆنی دروستکردووە و لە بەرانبەر ئۆکراین بەکاریدەهێنێت، کە هیچ مرۆڤێک و ئاڕاستەکەرێکی پێویستنەبێت بۆ پێکانی ئامانجەکانی، بەڵکو پشت بە ژیریی دەستکرد ببەستێت.

هەر لەو چوارچێوەیەدا، محەمەد باقر قاڵیباف سەرۆكی پەرلەمانی ئێران، یاسای نیشتمانی بۆ گەشەپێدانی ژیریی دەستكردی ئاڕاستەی مەسعود پزیشكیان، سەرۆك كۆماری وڵاتەكە كرد  بۆ پەسەندكردنی.
ئەم یاسایە كە لە 12 ماددە پێكدێت، بڕیاری دامەزراندنی رێكخراوێكی نیشتمانی سەربەخۆ لەژێر سەرپەرشتی سەرۆك كۆمار دەدات بۆ رێكخستن و گەشەپێدانی سیستەمی ژیریی دەستكرد لە وڵاتەكەدا.