میدیا ئەمریكییەكان ئاشكرای دەكەن، دۆناڵد ترەمپ رێگریی كردووە لە ئەنجامدانی ئۆپراسیۆنێكی سەربازیی زەمینی بۆ ناو خاكی ئێران، كە ئامانج لێی دەستبەسەرداگرتنی یۆرانیۆمی پیتێنراو بووە.

سی ئێن ئێن لە زاری چەند سەرچاوەیەكی ئاگادارەوە بڵاویكردەوە، كە "دان كەین" سەرۆكی ئەركانی سوپای ئەمریكا، مانگی رابردوو بە نهێنی سەردانی فەرماندەیی ناوەندیی هێزەكانی ئەمریكای كردووە بۆ بینینی پلانی هێرشێكی سەربازیی زەمینی بۆ ناو خاكی ئێران، كە ئامانج لێی دەستبەسەرداگرتنی یۆرانیۆمی پیتێنراو بووە..

سی ئێن ئێن ئەوەشی خستووەتەڕوو، هۆكاری راگرتنی ئەو ئۆپەراسیۆنە سەربازییە بۆ ترسی ئەمریكا لە وەڵامدانەوەیەكی زۆر توندی ئێران و درێژە كێشانی جەنگەكە دەگەڕێتەوە، جیا لەوەی  زیانی گەورە بە ئابوریی جیهان دەگەیەنێت و دەبێتە هۆی كوژرانی ژمارەیەكی زۆر لە سەربازانی ئەمریكا.

بەڕێوەبەرایەتی گشتی کەشناسی و بوومەلەرزەزانی هەرێمی کوردستان، پێشبینییەکانی کەشوهەوای بۆ 48 سەعاتی داهاتوو بڵاوکردەوە و بەپێی پێشبینییەکان، سبەینێ یەکشەممە ئەگەری نمەباران هەیە.

کەشناسی هەرێم رایگەیاند، بۆ ئەمڕۆ ئاسمانی هەرێمی کوردستان بە گشتی ساماڵ دەبێت، بەڵام لە ناوچەکانی رۆژئاوای هەرێم هەندێک کات دەگۆڕێت بۆ پەڵە هەور، هەروەها پلەکانی گەرما نزیک دەبێتەوە لە تۆمارکراوەکانی دوێنێ.

ئاماژەی بەوەشکرد، سبەینێ ئاسمان لە نێوان ساماڵ و پەڵە هەور بۆ نیمچە هەوردا دەبێت، هاوکات لەگەڵ ئەم گۆڕانکارییەدا، ئەگەری بارینی تاوە بارانێکی کورتخایەن هەیە، بە تایبەتی لە ناوچە شاخاوییەکانی سنوری ئیدارەی سەربەخۆی سۆران و سنوری پارێزگای دهۆک.

کەشناسی هەرێم ئەوەشی خستەڕوو، پلەکانی گەرما هاوشێوەی ئەمڕۆ دەبێت و گۆڕانکارییەکی ئەوتۆی بەسەردا نایەت.

سبەینێ تاقیکردنەوەی نیشتمانی قۆناغی 12ـی ئامادەیی دەستپێدەکات و زیاتر لە 117 هەزار خوێندکار بە زانستی، وێژەیی و پیشەیی بەشداری دەکەن.

سبەینێ یەکشەممە، 14ـی 6ـی 2026، سەعات 7 و 30 خولەکی بەیانی، تاقیکردنەوەی نیشتمانی قۆناغی 12ـی ئامادەیی لە هەرێمی کوردستان دەستپێدەکات.

زیاتر لە 117 هەزار خوێندکار بەشدارن

 117 هەزار و 142 خوێندکار بەشداری تاقیکردنەوەکان دەکەن کە 88 هەزار و 116 خوێندکاریان لە بەشی زانستی، هەروەها 26 هەزار و 431 خوێندکار لە بەشی وێژەیین، دوو هەزار و 595 خوێندکاریش لە بەشی پیشەیین.

ژمارەی هۆڵی تاقیکردنەوەکان

کۆی گشتی هۆڵەکان دوو هەزار و سێ هۆڵە، هەزار و 390 هۆڵیان بۆ بەشی زانستین، هەروەها 521 هۆڵیان بۆ بەشی وێژەیین، 92 هۆڵیش بۆ بەشی پیشەیی.

چاودێر

12 هەزار و 18 کەس چاودێری تاقیکردنەوەکانن

بەڕێوەبەری هۆڵ

2003 بەڕێوەبەری هۆڵ بەشدارن

سەرپەرشتیار

هەزار و 376 سەرپەرشتیار بەشداری تاقیکردنەوەکان دەکەن

یاریدەدەری بەڕێوەبەری هۆڵ

2003 یاریدەدەری بەڕێوەبەری هۆڵ بەشداری تاقیکردنەوەکان دەکەن

خزمەتگوزار

2003 خزمەتگوزار لە تاقیکردنەوەکان دەبن 

بە پاڵپشتی دەزگای میدیایی کوردسات، دووەم بۆنەی تێدئێكس ئاشتی لە هەڵەبجە بە بەشداری ژمارەیەك لە كەسایەتییە دیارەكان لە سەرجەم بوارەكاندا دەستیپێکرد.

دووەم بۆنەی تێدئێكس ئاشتی لە هەڵەبجە بەڕێوەدەچێت كە بۆنەیەكی نێودەوڵەتییە و لەلایەن رێكخراوی تێدئێكسی جیهانییەوە رێكدەخرێت.

لە بۆنەکەدا كەسانی سەركەوتوو و بە ئەزمونی خەڵكی هەڵەبجە چیرۆكەكانیان دەگێڕنەوە بۆ هێنانەكایەی گفتوگۆی قوڵ و گۆڕینەوەی ئەزموون.

جێگەی ئاماژەیە، لە ساڵی 2023 بۆ یەكەمجار لە مێژووی هەڵەبجە بە هەوڵی چەند گەنجێكی شارەكە و بە هەماهەنگی لەگەڵ تێدێكس، یەكەم تێدئێكسی هەڵەبجە-ئاشتی بەشداری ژمارەیەك لە كەسایەتییە دیارەكان لە سەرجەم بوارەكان بەڕێوەچوو تیایدا جەختكرایەوە لە پێكەوەژیان و ئاشتی.

ئۆتۆمبێلێکی بارهەڵگر کەوتە ناو رووباری چۆمان و بەهۆی روداوەکە کەسێک گیانی لەدەستدا.

بەڕێوەبەرایەتی هاتوچۆی سۆران رایگەیاند، بەیانی ئەمڕۆ ئۆتۆمبێلێکی بارهەڵگر کە سێ سەرنشینی تێدابوو، لە رێگای هامڵتۆن نزیک گوندی رەزان وەرگەڕا و کەوتە ناو رووباری چۆمان.

ئاماژەی بەوەشکرد، دوای ماوەیەک لە روداوەکە توانرا هەرسێ سەرنشینەکە بدۆزرێنەوە و لە روبارەکە دەربهێنرێن.

هاتوچۆی سۆران ئەوەشی خستەڕوو، یەکێک لە سەرنشینەکان بەهۆی سەختی برینەکەیەوە کەمێک پێش ئێستا گیانی لەدەستدا.

سەرۆكی روسیا ئامادەیی وڵاتەكەی دەدەبڕێت بۆ دانوستان لەگەڵ ئۆكراین بەو مەرجەی بەرژەوەندییە نیشتمانییەكانی وڵاتەكەی رەچاو بكرێت.

ڤلادیمYر پوتن سەرۆكی روسیا لە رێوڕەسمی رۆژی روسیا لە كۆشكی كرملن رایگەیاند، روسیا ئامادەیە لەگەڵ ئۆكراین دانوستان بكات، بەو مەرجەی بەرژەوەندییە نیشتمانییەكانی وڵاتەكەی رەچاو بكرێت، وتیشی، مەبەستیان بەرژەوەندییەكانی ئێستا نییە، بەڵكو دەبێت بەرژەوەندییە درێژخایەنەكان بە رەچاوكردنی رەهەندە مێژووییەكان جێگیر بكرێن و بپارێزرێن.

پوتن ئاماژەی بەوەشكرد، وڵاتانی ئەندامی ناتۆ هەوڵەكانیان چڕكردووەتەوە لە دژی مۆسكۆ و هەر ناتۆش بووە هۆی دەستپێكردنی جەنگ لەگەڵ ئۆكراین.

سێرگی لاڤرۆڤ وەزیری دەرەوەی روسیاش لەسەر داوای بەریتانیا رەزامەندیی نیشانداوە لەگەڵ فەڕەنسا و ئەڵمانیا كۆبێتەوە، بۆئەوەی گوێ لە پێشنیازەكانیان بگیرێت و دانوستان بكەن.

ئاژانسی بلومبێرگیش ئاشكرایكردووە، ئەڵمانیا و فەرەنسا و بەریتانیا لەگەڵ ئۆكراین كار دەكەن بۆ داڕشتنی پلانێكی تایبەت بە ئاشتی بۆئەوەی روسیا بەرەو دانوستانێكی جدی هان بدەن و رێگریش بكەن لە دێژەكێشانی جەنگی نێوان كیێڤ و مۆسكۆ.

فەرماندەی ناوەندی ئەمریكا رایگەیاند، چەند درۆنێكی ئێرانیان لە گەروی هورمز تەقاندووەتەوە كە ویستویانە رێگری لە تێپەڕبوونی كەشتیە بازرگانیەكان بكەن.

فەرماندەی ناوەندی ئەمریكا (سێنتكۆم) لە راگەیەنراوێكدا ئاماژەی بەوەكردووە، لە چەند سەعاتی رابردوودا ئێران چەند درۆنێكی خۆكوژیان لە گەروی هورمز ئاڕاستەكردبوو بۆ هێرشكردنەسەر كەشتییە بازرگانییەكان.

دەشڵێت، هێزەكانی ئەمریكا لە چەند سەعاتی رابردوودا سەرجەم درۆنەكانیان خستووەتەخوارەوە و هاتوچۆی دەریایی لە گەروەكەدا بەبێ هیچ بەربەستێك بەردەوامە.

پێشتر سێنتكۆم رایگەیاندبووو تا ئێستا توانیویانە رێڕەوی 136 كەشتیی بازرگانی بگۆڕن كە هەوڵیانداوە گەمارۆكە بشكێنن.

عەباس عراقچی، وەزیری دەرەوەی ئێران لە چاوپێکەوتنێکی تایبەتدا رایگەیاند، لەگەڵ ئەمریکا گەیشتوونەتە لێکتێگەیشتن کە تیایدا هەردوولا بەڵێن دەدەن رێز لە سەروەری یەکتر بگرن و دەستوەردان لە کاروباری ناوخۆی یەک نەکەن. ئاماژەی بەوەش کرد کە ئەمریکا بە نووسراو بەڵێنی داوە چیتر شەڕ دەست پێنەکات و هەڕەشە و هێز دژی ئێران بەکارنەهێنێت.

عراقچی سەبارەت بە ناوەڕۆکی یاداشتنامەکە ئاشکرای کرد، بابەتەکانی وەک پرسی ئەتۆمی، هەڵگرتنی سزاکان، ئاوەدانکردنەوە، چارەنووسی داراییە بلۆککراوەکانی ئێران، پرسی گەرووی هورمز و هەڵگرتنی گەمارۆی دەریایی لە یاداشتەکەدا جێگیر کراون. 

وتیشی: رێککەوتن و دانوستان پرۆسەیەکی دوولایەنەیە و هیچ رێککەوتنێک نییە کە لایەنێک تێیدا 100%ـی قازانج ببێت و لایەنەکەی تر هیچ. بەڵکو دەبێت هەردوولا گەیشتبنە ئاستی رەزامەندی.

وەزیری دەرەوەی ئێران روونیکردەوە، دانوستانەکان بۆ دوو قۆناغ پێشبینی کراون؛ قۆناغی یەکەم یاداشتنامەی لێکتێگەیشتنەکەیە، قۆناغی دووەمیش کە دەستپێکردنی دانوستانە وردەکانە. 

عراقچی ئەوەشی رایگەیاند، کە پرسی ئەتۆمی و هەڵگرتنی گەمارۆکانی سەر ئێران بۆ قۆناغی دووەم دواخراون و ماوەی 60 رۆژ دانوستان بۆ یەکلاکردنەوەی ئەو پرسانە دیاریکراوە.
لەسەر ئاستی ناوچەیی، عەباس عراقچی جەختی لەسەر هەڵوێستی نەگۆڕی تاران کردەوە و رایگەیاند، هەرگیز حزبوڵای لوبنان بە تەنیا جێناهێڵن و کۆتاییهێنان بە شەڕەکە دەبێت لوبنان و هەموو بەرەکانی تر بگرێتەوە.

لە کۆتاییدا وەزیری دەرەوەی ئێران هۆشداری دا لەوەی کە ئەم رێککەوتنە چەندین دوژمنی هەیە، کە لە سەرووی هەموویانەوە ئیسرائیلە و هەوڵی تێکدانی دەدات.

سەعدی ئەحمەد پیرە بۆ یادی لەدایکبوونی خاتوو هێرۆ ئیبراهیم ئەحمەد، پەیامێکی بڵاوکردەوە و دەڵێت: لە هەموو قۆناغەکانی ژیانتان مێژوویەکی پڕ سەروەریتان تۆمارکرد.

دەقی پەیامەکەی:

رۆژی لە دایکبوونتان پیرۆز خوشکی ئازیزی هەموومان و هەڤاڵی پێشمەرگە هێرۆخان، مێژوویەکی ژیانی پڕ سەروەریتان تۆمارکرد لە هەموو قۆناغەکان هاوسەرەکەتان سەرۆک مام جەلال -تان جێنەهێشت، نیشانەی تەبایی ناو پێشمەرگە بوویت جگە لە ئەرکی ماڵەوە ئەندامی پەرلەمانی کوردستان بوویت، چەتریکی گرنگ بوون بۆ هونەرمەندان و نوسەرانی کوردستان، هەروەها دایکێکی بەسۆز و میهرەبان بوویت بۆ منداڵانی کوردستان لە رێگای رێکخراوی منداڵپارێزی کوردستان .

راو و سیاسەتی بنیاتنەرانەتان هەمووی لە رێگای سیخورمە و خاک و کوردسات دەگواستەوە، زۆر گەورەتر بوویت لە خانمی یەکەمی عیراق بەرنامە کلتوری و مرۆڤایەتییەکان و سیاسەتەکان گشتگیر و رێزلێگیراو بوو لە هەموو شوێنێک، تەمەن درێژبیت و هەر بمێنیت بۆمان 
سەعدی ئەحمەد پیرە.

ئەندامی مەکتەبی سیاسی یەکێتی نیشتیمانی کوردستان

نزار ئامێدی: کۆمەڵکوژی سپایکەر بە شاهیدییەکی زیندوو لەسەر دڕندەیی تیرۆر و تاوانە قێزەونەکانی دژی گەلی عیراق دەمێنێتەوە.

نزار ئامێدی، سەرۆک کۆماری عیراق، لە ساڵیادی تاوانی "سپایکەر"دا پەیامێکی بڵاوکردەوە و تێیدا رایگەیاند، ئەو کارەساتە بە شاهیدییەکی زیندوو لەسەر دڕندەیی تیرۆر و تاوانە قێزەونەکانی دژی گەلی عیراق دەمێنێتەوە.

سەرۆک کۆماری عیراق بە ئازارێکی قووڵەوە یادی قوربانیانی ئەو کارەساتەی کردەوە کە بە ناحەق لەسەر دەستی گروپی تیرۆریستی داعش شەهید کران.

جەختی لەوەش کردەوە، ئەم یادە خەمناکە دەبێتە پاڵنەرێکی بەهێز بۆ پتەوکردنی یەکڕیزی نیشتمانی و پاراستنی خاکی عیراق لە هەر مەترسی و هەڕەشەیەک.

هاوکات، نزار ئامێدی ستایشی خۆڕاگری و قوربانیانی گەلی عیراقی کرد کە هۆکاری شکستپێهێنانی تەواوی پلانە تیرۆریستییەکان بوون، ئاماژەی بە رۆڵی مێژوویی فەتوای "جیهادی کیفائی" مەرجەعیەتی باڵای ئایینی کرد کە وەک وەرچەرخانێکی یەکلاکەرەوە، هێزی گەلی بۆ بەرگریکردن لە نیشتمان و پیرۆزییەکان رێکخست و تەلاحومی نیشتمانی بەهێزتر کرد.

موراد قەرەیلان دەڵێت، دەبێت ئۆجەلان ئازاد ببێت، بۆ هێنانە ئارای ئاشتی لە نێوان گەلی كورد و توركدا، ئەگەر لە زیندان بمێنێتەوە ئاشتی بەرەوپێش ناچێت.
موراد قەرەیلان، ئەندامی فەرماندەیی ناوەندی پاراستنی گەل(نەپەگە) رایگەیاند، بۆ سەرخستنی پرۆسەی ئاشتی پێش هەموو شتێك دەبێت بە یاسایەك پێگەی ئۆجەلان رونبكرێتەوە.
وتیشی، ئازادی جەستەیی ئۆجەلان مەرجی هێنانەئارای ئاشتییە لە نێوان گەلانی كورد و توركدا، ئەگەر لە زیندان بمێنێتەوە، ئەو پرۆسەیە بەرەوپێش ناچێت.
راشیگەیاند، ئەو خەباتەی ئۆجەلان ئێستا لە ئیمراڵی بەڕێوەی دەبات، خەباتێكی نەتەوەییە و بۆ هەموو كوردێكە. چونكە ئەگەر توركیا واز لە سیاسەتی نكۆلیكردن و لەناوبردن نەهێنێت، هەمیشە دەستكەوتەكانی كورد وەك مەترسی بۆ سەر خۆی دەبینێت، بەو بیركردنەوەیەش ناتوانێت دۆستایەتییەكی راستەقینە لەگەڵ كورددا پێكبهێنێت.

سایلۆی سلێمانی لەبارەی کردنەوەی دەرگای سایلۆکانی بەڕووی جوتیارانی سنوری سلێمانی راگەیەنراوێکی بڵاوکردووەتەوە و تێیدا کات و شێوازی نۆرەگرتنی جوتیاران بۆ رادەستکردنی گەنمەکانیان بە سایلۆکان رونکراوەتەوە.

دەقی راگەیەنراوەکە: 

ئاگاداری جوتیارانی خۆشەویست دەکەین سبەی رۆژی شەممە رێکەوتی 13ـی 6ـی 2026 دەرگای سایلۆکان بەڕووی جوتیاراندا دەکرێنەوە. بە مەبەستی دەستپێکردنی وەرزی بەبازاڕکردنی گەنمی جوتیاران بۆ ساڵی 2026. داواکارین لە جوتیاران لە رێگەی ئەم لینکەی خوارەوە کە لە چەند کاتژمێری داهاتوودا دەکەوێتەکار نۆرەکانیان بگرن بۆ هێنانی گەنمەکانیان .

https://hajz.grainboardiq.com/

ماو دیو، جێگری وەزیری دەرەوە و بەڕێوەبەری گشتیی بەشی پلاندانانی سیاسەت و جێگری سەرۆکی کۆمەڵەی خاچی سووری چین، پێشوازی لە د. لەتیف رەشید سەرۆک کۆماری پێشووی عیراق کرد.
 لە کۆبوونەوەکەدا، هەردوولا گفتوگۆیان لەسەر بەرژەوەندییە هاوبەشەکانیان کرد و باسیشیان لە پەیوەندییەکانی عیراق و چین، پێشهاتە ناوچەیی و نێودەوڵەتییەکان و ئاسۆی فراوانکردنی هاوکارییەکان و بەرژەوەندی هاوبەش کرد. 

کۆبوونەوەکە دەرفەتێکی بۆ ئاڵوگۆڕی بیروڕا سەبارەت بە بەهێزکردنی پەیوەندی نێوان هەردوو وڵات رەخساند.

ماڵپەڕی شەفافیەت بۆ چاودێری و رێكخستنی داهاتە نانەوتییەكانی سلێمانی و هەڵەبجە و ئیدارەی راپەڕین و گەرمیان رایگەیاند، بەراورد بە هەفتەی رابردوو بە بڕی یەك ملیار دینار و بە رێژەی 28% كەمیكردووە.
ماڵپەڕەکە ئەوەشی رونکردووەتەوە، داهاتی ئەم هەفتەی سلێمانی لە 6/6/2026 تا 12/6/2026 بڕی سێ‌ ملیار و 504 ملیۆن و 531 هەزار دینار بووە، 93%ی داهاتەكە بەشێوەی نەختینە و 7% یشی بەشێوەی چەك بووە.
ئەوەشی ئاشکرا کردووە، بەراورد بە هەفتەی رابردووش داهاتەكە بەبڕی یەك ملیار دینار بە رێژەی 28% كەمیكردووە، كە هەفتەی رابردوو بڕی داهاتەكە زیاتر لە چوار ملیار و 894 ملیۆن و 739 هەزار دیناربووە.

وەزارەتی دەرەوەی ئێران رایدەگەیەنێت، کە دەقی لێکتێگەیشتن لەگەڵ ئەمریکا جێگیر و ئامادەیە، بەڵام رێککەوتنەکە هێشتا نەبووەتە کۆتایی؛ ئاماژە بەوەش دەکات واشنتۆن دەیەوێت لە رێگەی گێڕانەوەی میدیاییەوە وەک سەرکەوتن نیشانی بدات.

دوای لێدوانەکانی دۆناڵف ترەمپ، کە رایگەیاند لەگەڵ ئێران گەیشتونەتە ریککەوتنی کۆتایی، وەزارەتی دەرەوەی ئێران راگەیەندراوێکی بڵاوکردەوە.

وەزارەتی دەرەوەی ئێران رایگەیاند، پێشتریش ئاماژە بەوە کرابوو کە زۆربەی دەقەکانی رێککەوتنەکە یەکلاکراوەتەوە، بەڵام لایەنی ئەمریکی دەیەویست داواکاریی نوێ بۆ ناوەڕۆکەکەی زیاد بکات، بۆیە لە ئێستادا رێککەوتنەکە بە بنبڕ و کۆتایی دانانرێت هەرچەندە دەقی لێکتێگەیشتنەکە تا رادەیەکی زۆر ئامادەیە.

 وەزارەتی دەرەوەی ئێران جەختی لەوەش کردەوە، کە گێڕانەوە و لێدوانەکانی لایەنی ئەمریکی تەنها بۆ ئەوەیە وا پیشان بدەن، کە ئێران لەژێر گوشار و هەڕەشەدا لە هەڵوێستەکانی پاشەکشەی کردووە.

ئاماژەی بەوەشکردوە، کە سەرجەم بەندەکانی هەر لێکتێگەیشتنێکی ئەگەری، لەلایەن لێپرسراوە باڵاکانی وڵاتەوە لێکۆڵینەوەی تێدا دەکرێت و لە کاتی خۆیدا هەڵوێستی رەسمی رادەگەیەنن.

لە کۆتاییدا، وەزارەتی دەرەوەی ئێران ئاماژەی بەوەداوە، کە ئەوەی لە میدیاکاندا دەربارەی کات و شوێنی ئیمزاکردنی رێککەوتنەکە بڵاودەکرێتەوە تەنها پێشبینی راگەیاندنەکانن و جەختیشیکردوەتەوە، هەریەکە لە پاکستان و قەتەر رۆڵێکی کاریگەر لەم نێوەندگیرییەدا دەبینن و ئێران سەلماندی کە سازش لەسەر ئەو شتە ناکات، کە بە هێڵە سورەکانی پێناسەی کردووە.