هەواڵەکان
حکومەتی پاکستان ئاشکرای دەکات، چاوەڕوانی پێشکەوتنی بەرچاو دەکەن لەگەڵ ئێران بۆ دەستپێکردنەوەی خولی نوێی دانوستانەکان.
ئەمڕۆ پێنجشەممە، موحسین نەقوی وەزیری ناوخۆی پاکستان، لە میانی کۆبوونەوەی لەگەڵ ناتالی بێکەر باڵیۆزی ئەمریکا لە ئیسلام ئاباد، دوایین گۆڕانکارییەکانی ناوچەکەی تاوتوێ کرد، وەزیری ناوخۆی پاکستان جەختی لەوە کردەوە، وڵاتەکەی هەموو هەوڵێک دەدات بۆ ئەوەی وەفدی هەردوو وڵات 'ئەمریکا و ئێران' لە پایتەختی وڵاتەکەی کۆبکاتەوە بە مەبەستی تەواوکردنی گەڕی دووەمی دانوستانەکان.
وەزیری ناوخۆی پاکستان ئاماژەی بەوەکرد، بڕیارەکەی دۆناڵد ترەمپ بۆ درێژکردنەوەی ئاگربەست، هەنگاوێکی ستراتیژی و گرنگ بوو بۆ هێورکردنەوەی بارگرژییەکان.
پاکستان داوای لە واشنتۆن و تاران کرد، ئەم هەلە بقۆزنەوە و رێگە بدەن بە "چارەسەری دیپلۆماسی و ئاشتییانە" بۆ کۆتاییهێنان بەو کێشە و ئاڵۆزییانەی بەرۆکی ناوچەکەی گرتووە.
جێگەی ئاماژەیە، سەرۆکی ئەمریکا بڕیاریدا ئەو ئاگربەستەی لە 8ـی نیسانەوە دەستیپێکردبوو درێژبکاتەوە، ئەوەش وەک دەرفەتێک بۆ سەرخستنی هەوڵە دیپلۆماسییەکان.
پاکستان لە ئێستادا وەک "پردێکی دیپلۆماسی" کار دەکات بۆ نزیککردنەوەی واشنتۆن و تاران، لە کاتێکدا هەردوو وڵات لە دوای روداوەکانی مانگی شوباتەوە لەوپەڕی ئامادەباشی و گرژیدان.
وەزارەتی دەرەوەی ئێران ئاشکرایکرد، ئەمریكا و ئیسرائیل هەموو بەرپرسیارێتییەكی ئەو جەنگەیان دەكەوێتە ئەستۆ كە لە كۆتایی مانگی رابردووەوە دەستی پێكردووە، ئەو دوو وڵاتەشی بە دەستدرێژیكەر ناوبرد.
عەباس عراقچی وەزیری دەرەوەی ئێران لە كۆبوونەوەیەكدا لەگەڵ نێردەی كۆریای باشور ئاماژەی بەوەكرد، لێكەوتەكانی جەنگ تەنها لە ئەستۆی دەستدرێژیكەرانە و ئەوان هۆكاری تێكدانی رەوشەكە بوون.
هاوکات دۆناڵد ترەمپ سەرۆکی ئەرمریکا، وەسفی عەباس عراقچی کردووە و بە کەسێکی زیرەک ناوی بردووە.
ئەم لێدوانە توندانەی تاران لە كاتێكدایە كە چارەنوسی گفتوگۆكانی نێوان ئێران و ئەمریكا لە ئیسلام ئاباد نادیارن و گەروی هورمز بە داخراوی ماوەتەوە، ئێرانیش هۆكاری دووبارە داخستنەوەی گەروەكەی بۆ گەمارۆكانی ئەمریكا دەگەڕێنێتەوە.
سێنتكۆم رایگەیاند، 31 كەشتی ڕێڕەوی خۆیان گۆڕیوە یان گەڕاونەتەوە بەهۆی گەمارۆكانی سەر ئێران.
فەرماندەیی ناوەندیی هێزەكانی ئەمریكا 'سێنتكۆم' رایگەیاند، لە چوارچێوەی گەمارۆ دەریاییەكان بۆ سەر ئێران، فەرمانیان بە 31 كەشتی كردووە كە بگەڕێنەوە بۆ بەندەرەكان یان رێڕەوی گەشتیاری خۆیان بگۆڕن.
هاوكات، وەزیری گەنجینەی ئەمریكا رایگەیاند، بەهۆی پڕبوونی كۆگاكانی نەوت لە دوورگەی "خارگ" و نەبوونی توانای هەناردەكردن، بەمزووانە بیرە نەوتەكانی ئێران دادەخرێن.
هەروەها بەپێی راپۆرتێكی رۆژنامەی "وۆڵ ستریت جۆرناڵ"، ئەو گەمارۆیانە رۆژانە زیاتر لە 500 ملیۆن دۆلار زیان بە ئێران دەگەیەنێت.
ئەو گەمارۆی ئەمریكا بۆ سەر ئێران دوای شكستی دانوستانەكانی واشنتۆن و تاران دێت لە پاكستان كە مەبەست لێی كۆتاییهێنان بوو بەو شەڕەی ئەمریكا و ئیسرائیل لە 28ـی شوباتدا دژی ئێران دەستیان پێكردبوو.
بە ئامانجی پاراستنی سەلامەتی هاووڵاتیان و چەسپاندنی یاسا، رێکاری نوێ دژ بە ئۆتۆمبێلی بێسەرەتا و سەرپێچییەکان پەیڕەو دەکرێت.
بەڕێوەبەرایەتی هاتوچۆی راپەڕین رایگەیاند، ئۆتۆمبێلی بێ سەرەتا و بڕاوە هەڕەشەیە بۆ سەر ئاسایشی نیشتمانی، بۆیە مەفرەزەکانیان راسپێردراون دەست بەسەر ئەو جۆرە ئۆتۆمبێل و ماتۆڕسکیلانەدا بگرن و هیچ جۆرە سازشێک لەم بڕیارەدا ناکرێت.
ئاماژەی بەوەشکرد، لێخوڕینی بێ مۆڵەت و بێزارکردنی هاووڵاتیان بە دەنگی نائاسایی و سەرکێشی، وەک بەزاندنی سنوری ئازادیی گشتی هەژمار کراوە، ئەوەشی خستەڕوو، سەلامەتیی گشتی هێڵی سورە و هەر کەسێک بیبەزێنێت، رووبەڕووی سزای قورسی یاسایی و بێ گەڕانەوە دەبێتەوە.
هاتوچۆی راپەڕین ئاشکراشیکرد، پلانێکی تۆکمە لەگەڵ لایەنە ئەمنییەکان داڕێژراوە بۆ کۆنترۆڵکردنی زیاتری سنورەکان و ناو شارەکان، تا ئەو ئاستەی "یاسا ببێتە تاکە دادوەر لەسەر شەقام."
هاتوچۆی ڕاپەڕین جەخت دەکاتەوە، ئەفسەر و کارمەندانیان لە پێناو پاراستنی گیانی هاووڵاتیان لە ئەرکدا دەبن و داوا لە هەمووان دەکەن پابەندی یاساکان بن بۆ پاراستنی بەرژەوەندی گشتی و دوورکەوتنەوە لە زیانەکان.
قوباد تاڵەبانی جێگری سەرۆك وەزیرانی هەرێمی كوردستان بۆ بەشداریكردن لە كۆڕبەندی نێودەوڵەتیی ئابووریی دێڵفی، سەردانی یۆنانی كردووە و لە میانی کۆبوونەوەکانیدا لەگەڵ عەبدوڵا گول سەرۆك كۆماری پێشووی توركیا کۆبووەوە.
قوباد تاڵەبانی رایگەیاندووە، خۆشحاڵ بووم بە دیدارم لەگەڵ عەبدوڵڵا گویل، سەرۆک کۆماری پێشووی تورکیا، دەستخۆشیم لێ کرد کە بە هەموو شێوەیەک پشتیوانیی سەرخستنی پرۆسەی ئاشتی لە تورکیا دەکات.
ئاماژەی بەوەشکرد، عەبدوڵڵا گویل وەبیری هێنایەوە کە پرۆسەی ئاشتی خەونێکی گەورەی سەرۆک مام جەلال بوو و بەردەوام لە دیدار و کۆبوونەوەکانیدا لەگەڵ لێپرسراوانی تورکیا هەوڵی دەدا پرسی کورد بە شێوەیەکی ئاشتییانە و بە دوور لە شەڕ و توندوتیژی چارەسەر بکرێت.
قوباد تاڵەبانی راشیگەیاند، سەرۆک کۆماری پێشووی تورکیا ستایشی هەڵوێستی هەرێم و یەکێتی کرد لەبارەی جەنگی ئەمریکا و ئیسرائیل لەگەڵ ئێران، هەروەها بەبۆنەی گۆڕانکاری لە پۆستەکانی ئیدارەی کەرکوکیشەوە ستایشی سیاسەت و هەڵوێستی یەکێتی کرد کە کار دەکات بۆ قوڵکردنەوەی گیانی برایەتی و پێکەوەژیان لەناو هەموو پێکهاتەکانی کەرکوکدا.
قوباد تاڵەبانی جێگری سەرۆک وەزیرانی هەرێم لەگەڵ یۆرگۆس یێراپێتریتیس، وەزیری دەرەوەی یۆنان کۆبووەوە و جەختیان لەسەر بەرەو پێشبردنی پەیوەندییەکانی نێوانیان لە بوارە جیاوازەکاندا کردەوە.
قوباد تاڵەبانی رایگەیاند، لە چەند ساڵی رابردوودا پەیوەندییەکانی نێوان هەرێمی کوردستان و وڵاتی یۆنان پێشکەوتنی بەرچاوی بەخۆیەوە بینیوە، لەگەڵ یۆرگۆس یێراپێتریتیس، وەزیری دەرەوەی یۆنان بە گرنگمان زانی کاری زیاتر بکرێت بۆ باشترکردنی پەیوەندییەکانمان لە بوارەکانی بازرگانی و گەشتوگوزار و خوێندنی باڵا و کشتوکاڵدا.
ئەوەشی خستەڕوو، بۆ ئەم مەبەستەش داوام کرد حکومەتی یۆنان کار بکات بۆ کردنەوەی گەشتی ئاسمانیی راستەوخۆ لەنێوان سلێمانی و ئەسینا.
جێگری سەرۆک وەزیرانی هەرێم راشیگەیاند، وەک چۆن ساڵی رابردوو کۆڕبەندی نێودەوڵەتیی ئابوریی دێڵفی بە شێوەیەکی سەرکەوتووانە لە سلێمانی بەڕێوەچوو، هەردوولامان بە پێویستمان زانی کاری هاوبەش بکرێت بۆ ئەوەی بەڕێوەچوونی ئەم کۆڕبەندە لە سلێمانی بەردەوام بێت.
بۆ رێگریکردن لە هەڵگیرسانی جەنگێکی نوێ لە ناوچەکە، سەرۆکی ئەمریکا بژاردەی دیپلۆماسی وەک ئەولەویەتی کارەکانی بەرانبەر ئێران دەستنیشان دەکات و رایدەگەیەنێت؛ رەنگە رۆژی هەینی دانوستانەکان بەڕێوەبچێت.
بەپێی زانیارییەکانی ماڵپەڕەکە کە لە چەند سەرچاوەیەکی ئاگادارەوە دەستی کەوتووە، ترەمپ پێیوایە ئەوەی لە روی سەربازییەوە پێویست بووە ئەنجامی داوە و لە ئێستادا دەیەوێت لەو جەنگانە بکشێتەوە.
ئەکسیۆس ئاشکرایکردووە، ترەمپ هێزی سەربازی بەکارناهێنێت و دەیەوێت کۆتایی بە جەنگ بهێنێت، مەگەر کاتێک کە هیچ رێگەیەکی تر نەمێنێت.
سەرۆکی ئەمریکا ئاماژەی بەوە کردووە، ئەگەر ئێران بەشداری لە گفتوگۆکاندا نەکات، ئەوا بژاردەی سەربازی دەگەڕێتەوە سەر مێزەکە.
رۆژنامەکە ئەوەشی خستووەتەڕوو، لایەنی ئەمریکی و پاکستان چاوەڕێی پەیامی رابەری باڵای ئێران دەکەن کە بڕیارە لە ئەمڕۆوە تا دوو رۆژی داهاتوو بێدەنگی بشکێنێت و هەڵوێستی وڵاتەکەی رابگەیەنێت.
لەلایەکی ترەوە، دۆناڵد ترەمپ بە رۆژنامەی نیویۆرک پۆستی راگەیاندووە، رەنگە تا رۆژی هەینی دانوستانەکان لەگەڵ ئێران دەستپێبکاتەوە.
وتیشی، رەنگە لە 36 بۆ 72 سەعاتی داهاتوودا دانوستانەکان بەڕێوەبچێت.
ئەم جوڵانەی ترەمپ لە چوارچێوەی ستراتیژییەتێکی نوێدایە بۆ کەمکردنەوەی تێچووە سەربازییەکانی ئەمریکا و هاندانی وڵاتان بۆ دانیشتن لەسەر مێزی گفتوگۆ.
بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغداد چاویکەوت بە دکتۆر عەبدولحسێن موسەوی، سەرۆکی هاوپەیمانی نەهجی نیشتمانی.
لە دیدارێکدا د.خالید شوانی سەرپەرشتیاری مەکتەبی سیاسی لە بەغداد ئامادەبوو، پێویستیی بەردەوامی هاریکاری و هەماهەنگی هەمەلایەنەی نێوان لایەنەکان دووپاتی لەسەرکرایەوە لەپێناو پاراستنی سەقامگیری وڵات.
هەر لە دیدارەکەدا جەخت لە تەواوکردنی رێکارەکانی پێکهێنانی حکومەتی نوێی عیراق لە وادەی دەستووری کرایەوە بە شێوەیەک حکومەتێک بنیادبنرێت کە حکومەتی هاووڵاتی و خزمەتکردن بێت و ببێتە مایەی ئاوەدانی زیاتر.
کۆمیسیۆنی باڵای سەربەخۆی هەڵبژاردنەکان لە عیراق، وادەی دەستپێکردنی قۆناغێکی نوێی تۆماری بایۆمێتری بۆ دەنگدەران راگەیاند، کە بڕیارە لە 20ی نیسانی 2026 دەستپێبکات و تەواوی پارێزگاکانی وڵات بگرێتەوە.
جومانە غەلای، وتەبێژی رەسمی کۆمیسیۆن، ئاماژەی بەوە کرد کە ئەم قۆناغە لە رێگەی 1079 بنکەی تۆمارکردنەوە بەڕێوەدەچێت، پڕۆسەکە بە پلەی یەکەم ئەو هاووڵاتییانە دەگرێتەوە کە پێشتر ناویان تۆمار نەکردووە، لەگەڵ گەنجانی لەدایکبووی ساڵی 2008 کە بۆ یەکەمجار مافی دەنگدانیان دەبێت.
کۆمیسیۆن جەختی کردەوە کە تەنها پشت بە "کارتی نیشتمانیی" دەبەستێت و رەگەزنامە و ناسنامەی کۆن وەرناگیرێت، وپڕۆسەکە چەند بوارێک دەگرێتەوە، لەوانە: تۆماری نوێ بۆ ئەوانەی پێشتر ناویان نەبووە، وبۆ چاککردنی هەڵە لە ناو، وێنە، یان رێکەوتی لەدایکبوون، وبۆ سڕینەوەی ناوی کۆچکردووان لەلایەن کەسوکاریانەوە بە بەڵگەی رەسمی.
وتەبێژی کۆمیسیۆن، سەبارەت بە هێزە ئەمنییەکان، ئاماژەی بەوەکد، کە پڕۆسەی نوێکردنەوە و گۆڕینی جۆری دەنگدان (گشتی و تایبەت) بەردەوام دەبێت. بەڵام غەلای رونی کردەوە کە لەم قۆناغەدا "گۆڕینی شوێنی نیشتەجێبوون" لە پارێزگایەکەوە بۆ پارێزگایەکی تر رێگەی پێنادرێت و بۆ کاتێکی تر دواخراوە.
لە کۆتاییدا، کۆمیسیۆن داوا لە هاووڵاتییان دەکات لە کاتی دەوامی فەرمیدا سەردانی بنکەکان بکەن بۆ ئەوەی لە ڕێگەی وەرگرتنی پەنجەمۆر و وێنەی بایۆمێترییەوە، مافی بەشداریکردنیان لە هەڵبژاردنەکانی داهاتوودا پارێزراو بێت.
بەگوێرەی دوایین ئامارەکانی پەیمانگای ئاماری تورکیا، رێژەی منداڵان تەنها %24.8ی کۆی گشتی دانیشتوانی ئەو وڵاتە پێکدەهێنن، ئەمەش دابەزینێکی بەرچاوە بەراورد بە ساڵی رابردوو کە %25.5 بووە، کە ئەمەش بەردەوامیی رەوتی دابەزینی گەشەی دانیشتوان پشتڕاست دەکاتەوە.
لە کۆتایی ساڵی 2025 دا، ژمارەی دانیشتوانی تورکیا گەیشتووەتە نزیکەی 86.1 ملیۆن کەس، کە لەو ژمارەیە 21.3 ملیۆنیان منداڵ و مێرمنداڵن (تەمەن خوار 17 ساڵ).
ئەم گۆڕانکارییە دیمۆگرافییە کاتێک دەردەکەوێت کە بەراورد بکرێت بە ساڵی 1970، کاتێک منداڵان %48.5ی کۆمەڵگەیان پێکدەهێنا، پاشان لە نەوەدەکاندا بۆ %41.8 دابەزی.
پێشبینییەکان بۆ داهاتوو
پێشبینییەکان ئاماژە بەوە دەکەن ئەگەر ئەم رەوتە بەردەوام بێت، رێژەی منداڵان تا ساڵی 2100 بۆ %14.5 دادەبەزێت، بەڵام لە باشترین سیناریۆدا، ئەگەر سیاسەتەکانی هاندانی منداڵبوون سەرکەوتوو بن، رێژەکە لە کۆتایی سەدەدا لە دەوروبەری %18.6 جێگیر دەبێت.
هەژاری و خوێندن
سەرەڕای کەمبوونەوەی رێژەیان، منداڵان لە تورکیا رووبەڕووی گوشاری ئابووری دەبنەوە؛ ئامارەکان دەری دەخەن کە %36.8ی منداڵان لەژێر مەترسیی هەژاری یان پەراوێزخستنی کۆمەڵایەتیدان، کە ئەمەش زۆر زیاترە لە تێکڕای گشتی هەژاری لە وڵاتدا کە %27.9ـە.
بەراوردکاری لەگەڵ ئەوروپا
تورکیا هێشتا خاوەنی کۆمەڵگەیەکی گەنجترە بەراورد بە وڵاتانی یەکێتی ئەوروپا، رێژەی منداڵانی تورکیا (%24.8) لە پێش ئیرلەندا دێت کە بە %22.7 لە پلەی یەکەمی یەکێتییەکەدایە، لە کاتێکدا ماڵتا و ئیتاڵیا بە نزیکەی %14 لە کۆتایی لیستەکەدان.
کەمبوونەوەی هاوسەرگیریی پێشوەختە
وەک وەرچەرخانێکی ئەرێنی کۆمەڵایەتی، ئامارەکان دابەزینێکی توندیان لە هاوسەرگیریی کچانی تەمەن ١٦-١٧ ساڵ تۆمار کردووە؛ رێژەکە لە %7.3 لە ساڵی 2002 وە بۆ تەنها %1.5 لە ساڵی 2025 دابەزیوە، ئەمەش نیشانەی بەرزبوونەوەی هۆشیاری و گۆڕانی یاسا و بنەما کۆمەڵایەتییەکانە.
چین هۆشداری دەدات لە رەوشی رۆژهەڵاتی ناوەڕاست و جەختیش لە راگرتنی تەواوەتی جەنگ دەكاتەوە
وەزارەتی دەرەوەی چین هۆشداری دەدات و رایگەیاندووە، رەوشی ئێستای رۆژهەڵاتی ناوەڕاست لە نێوان جەنگ و لە ئاشتیدا قۆناغێكی هەستیاردایە.
ئاماژەی بەوەشكردووە، پێویستە كاری لەپێشینەی هەردوو لایەنی ئەمریكی و ئێرانی راگرتنی تەواوەتی شەڕ بێت.
وەزارەتی دەرەوەی چین جەختیكردوەتەوە لەوەی لە هەوڵەكانیان بۆ راگرتنی شەڕ و سەركەوتنی دانوستانەكانی ئاشتی بەردەوام دەبن.
لیستی موچەی مانگی چواری موچەخۆرانی هەرێمی كوردستان رادەستی وەزارتی دارایی عیراق كرا
پەیامنێری كوردسات نیوز رایگەیاند، ئەمرۆ لیستی مووچەی مانگی نیسانی فەرمانبەران و مووچەخۆرانی هەرێمی كوردستان و ڕاپۆرتی تەرازووی پێداچوونەوەی مانگی ئازار لەلایەن تیمی تەكنیكی وەزارەتی دارایی و ئابووری هەرێمی كوردستانەوە ڕادەستی فەرمانگەی ژمێریاری وەزارەتی دارایی حكومەتی فیدراڵ كراوە.
سەرچاوەیەكیش لە وەزارەتی دارایی حكومەتی هەرێم وتی، بەهۆی ئەو كاریگەرییە ئابورییانەی بەهۆی جەنگی ناوچەكەوە روبەڕووی هەرێمی كوردستان بووەتەوە، لەگەڵ بەغداد رێككەتوون تا رەوشی ناوچەكە ئاسایی دەبێتەوە، مانگانە داهاتی نانەوتیی هەرێمی كوردستان هەرچەندێك بێت، حكومەتی عیراق تەمویلی موچە دەكات.
سەبارەت بە درێژكردنەوەی ئاگربەست، میدیاکانی ئەمریكا دەڵێت: ئەگەر ئێران هەنگاوی نوێ نەنێت ئاگربەست زۆر ناخایەنێت، سوپای پاسدارانیش دەڵێت بەپێی بەرژەوەندی خۆیان مامەڵە دەكەن
چەند سەرچاوەیەك بە تۆڕی "فۆكس نیوز"یان راگەیاند، ئەو ئاگربەستەی سەرۆكی ئەمریكا رایگەیاندووە رەنگە بۆ ماوەیەكی كورت بێت، ئەگەر بە خێرایی رێككەوتن نەكرێت.
راشیگەیاند، ئەم هەنگاوە كۆتا هەوڵە بۆ گەیشتن بە ئاشتی لە پێناو گەلی ئێران كە بەهۆی جەنگەوە لە نەهامەتیدان، هەروەها دەرفەتێكە بۆ حكومەتی ئێران كە لەناوخۆی خۆیاندا بگەنە رێككەوتن.
لە بەرامبەردا، تەلەفزیۆنی ئێرانی رایگەیاند، رەنگە تاران پابەندی ئاگربەست نەبێت و بەپێی بەرژەوەندی خۆی بجوڵێتەوە.
تەلەفزیۆنی ئێران لە زاری سوپای پاسدارانەوە بڵاویكردەوە، سوپای پاسداران ئامادەیە بۆ روبەڕوبوونەوەی هەر دوژمنكارییەكی نوێ، هەروەها گورز ئاڕاستەی بەرژەوەندییەكانی دوژمن دەكەن ئەگەر جەنگ سەرهەڵبداتەوە.
ئیسماعیل بەقایی، وتەبێژی وەزارەتی دەرەوەی ئێران، ئەمڕۆ چوارشەممە، رایگەیاند کە وڵاتەکەی هێشتا بڕیاری کۆتایی نەداوە سەبارەت بە بەشداریکردن لە خولی نوێی دانوستانەکان.
بەقایی ئاماژەی بەوە کرد: ئێران هێشتا بڕیاری نەداوە ئایا بەشداری لە خولی نوێی وتوێژەکانی ئاشتی لەگەڵ ویلایەتە یەکگرتووەکانی ئەمریکا دەکات یان نا.
وتیشی: ئێمە بە نیازپاکی و بە جیدییەوە چووینە ناو وتوێژەکان، بەڵام لایەنی بەرامبەر بێباکی و بێخەمیی خۆی نیشان داوە.
بەقایی لە درێژەی قسەکانیدا وتی: هێرشکردنە سەر کەشتییە ئێرانییەکان پێشێلکارییەکی زەقی یاسا نێودەوڵەتییەکان و چەتەیی دەریاییە، هەر کاتێکیش دانوستانەکان بەرەو بەدەستهێنانی ئەنجامێکی دیاریکراو ئاراستە کران، ئەو کاتە ئێران بڕیار دەدات کە ئایا بەشداری تێدا دەکات یان نا.
حەمەی حەمەسەعید وەزیری رۆشنبیریی هەرێمی کوردستان بەبۆنەی 128ـەمین ساڵیادی رۆژنامەگەریی کوردی پەیامێکی بڵاوکردەو و تێیدا داوا لە تەواوی رۆژنامەنووس و میدیاکان دەکات بە ئەمانەتەوە کارەکەیان بکەن و نیشتمان بپارێزن
دەقی پەیامەکە:
بەڕێزان، ڕۆژنامەنووسان و قەڵەمە بوێرەکانی کوردستان
کەسوکاری سەربەرزی شەهیدانی ڕۆژنامەوان و بواری میدیا..
ڕۆژی 22ـی نیسان، یادی 128 ساڵەی دەرچوونی یەکەمین ژمارەی ڕۆژنامەی (کوردستان)ـە لە قاهیرە. ئەو وەرچەرخانە مێژووییەی لەسەر دەستی میقداد میدحەت بەدرخان دەستیپێکرد، تەنها سەرەتایەکی مەعریفی نەبوو، بەڵکو دامەزراندنی سەنگەرێکی گرنگی بەرگری و مانەوە بوو لە مێژووی بزوتنەوەی ڕزگاریخوازی گەلی کوردستاندا.
لەم یادە پیرۆزەدا، سڵاوی ڕێز و ئەمەکداری دەنێرین بۆ هەموو ئەو ڕۆژنامەنووسە پێشمەرگانەی، کە لە سەنگەرەکانی شەڕ و ئاشتیدا بوونەتە دەنگی ڕاستەقینەی میللەتەکەمان، هەروەها سڵاو بۆ ئەو ڕۆژنامەنووسە خاوەن هەڵوێستانەی، کە پیشەییانە و دڵسۆزانە خزمەت دەکەن.
میدیای نیشتمانی..
ئەمڕۆ، کە ناوچەکەمان لە نێو جەرگەی ململانێ و ئاڵۆزییەکی گەورەدایە، ئەرکی میدیا و میدیاکاران لە هەموو کاتێک قورسترە. لە کاتێکدا کە ئێمە وەک هەرێمی کوردستان بەشێک نین لەو ململانێیانە، پێویستە میدیا ببێتە فاکتەری یەکڕیزی و قووڵکردنەوەی تەبایی، نەک ڕێگەخۆشکەر بۆ پەرتەوازەیی.
ئەرکی ئێوەیە بە ڕۆحیەتێکی نیشتمانییەوە ڕووماڵی ڕووداوەکان بکەن و بەرژەوەندییە باڵاکانی نیشتمان بپارێزن، بۆ ئەوەی قەوارەی هەرێمی کوردستان، کە بەرهەمی خوێنی هەزاران شەهید و تێکۆشانی ڕێبوارانی ڕێگای ئازادییە، بە پارێزراوی بمێنێتەوە.
لە کۆتاییدا، دروود بۆ گیانی پاکی سەرجەم شەهیدانی ڕۆژنامەنووس و شەهیدانی ڕێگای ڕزگاری کوردستان دەخوازین. هەمیشە لە پێشەنگی گەیاندنی ڕاستی و پاراستنی بەها نەتەوەییەکاندا بن.
حەمەی حەمەسەعید
وەزیری ڕۆشنبیری و لاوان
21ـی نیسانی 2026