وەفدێکی یەکێتیی نیشتمانیی کوردستان کە پێکهاتبوون لە بەختیار بەکر و شاخەوان ساڵح میرزا، بەنوێنەرایەتی یەکێتی نیشتیمانی کوردسان، لەسەر بانگهێشتی تایبەتی پارتی کاری هۆڵەندا، لە کۆنگرەی پارتی پێشکەوتوخوازی هۆڵەندا بەشداربوون.

بەختیار بەکر لەبارەی بەشداربوونیان لە کۆنگرەکەدا رایگەیاند، کۆنگرەکە جیاوازترە لە کۆنگرە و کۆڕبەندەکانی دیکە و دەچێتە مێژوو، لەبەر ئەوەی کۆنگرەی یەکگرتنی دوو پارتی سەرەکی و رەسەنی خاوەن پێگەی سیاسی و جەماوەرین.

وتیشی، یەکێتی بەو پێیەی دەستە خوشکی پارتی کار بووە و پارتە نوێیەکەش جێگرەوەی پارتی کار دەبێت، بڕیاریانداوە لە کۆڕبەندە جیهانییەکاندا کە یەکێتیش تیایاندا ئەندامە، درێژە بە خەبات بدەن و وەکو پارتێکی سۆسیال دیموکراتی پێشکەوتوخواز دەمێنەوە.

گۆڤاری فۆربسی ئەمریكی ئاشكرایدەكات، رێككەوتنە نوێكەی سەرۆكی ئەمریكا لەگەڵ ئێران، هاوشێوەی رێككەوتننامە ئەتۆمییەكەی ساڵی 2015ی سەردەمی باراك ئۆبامایە.
گۆڤاری فۆربس دەڵێت، سەرەڕای ئەوەی ئیدارەی ترەمپ هەوڵدەدات ئەم ڕێككەوتنە بە جیاواز لە سەردەمی ئۆباما نیشان بدات، بەڵام بڕگە سەرەكییەكانی وەك کەمکردنەوەی سزاكان و پێدانی دەرفەتی دارایی بە تاران، بە تەواوی هاوشێوەی رێككەوتنەكەی پێشوون كە ترەمپ لە ساڵی 2018 لێی كشایەوە.
بەپێی زانیارییەكانی گۆڤارەكە، گەرووی هورمز بە هاوبەشی نێوان ئێران و عەمان سەرلەنوێ دەكرێتەوە و لە بەرانبەریشدا بەشێك لە پارە بلۆككراوەكانی ئێران ئازاد دەكرین.
خاڵەكانی رێككەوتنەكە كە هەندێكیان دزەیان پێكراوە، ناكۆكی لەناو ئیدارەی ئەمریكادا دروستكردووە، بە شێوەیەك سیناتۆری كۆمارییەكان تێد كروز رایگەیاند، ئێران پارە بلۆككروەكان بۆ بەردەوامیدان بە پیتاندنی یۆرانیۆم بەكاردەهێنێت، بە هەڵەیەكی كارەساتبار بۆ ئەمریكا دادەنێت.

سبەینێ لە سەرتاسەری هەرێمی كوردستان تاقیكردنەوەكانی پۆلی 12ی ئامادەیی بە بەشداری زیاتر لە  117 هەزار خوێندكار لە بەشەكانی وێژەیی، زانستی و پیشەیی دەستپێدەكەن و هێڵەكانی ئینتەرنێتیش بۆ ماوەی سەعاتێك رادەگیرێن.
نەژاد عەبدوڵا، بەڕێوەبەری گشتی پەروەردەی سلێمانی، بە كوردسات نیوزی راگەیاند، لە سنوری پەروەردەی سلێمانی زیاتر لە 26 هەزار و 563 خوێندكار مافی بەشداریكردنی تاقیكردنەوەكانیان هەیە.
هاوشێوەی ساڵانی رابردوو، لەسەر بڕیاری وەزارەتی پەروەردە، هێڵەكانی ئینتەرنێت بۆ ماوەی سەعاتێك دەبڕێن، هاوكات بەكارهێنانی مۆبایل لە خوێندكاران، سەرپەرشتیارانی هۆڵەكانی تاقیكردنەوە قەدەغەدەكرێت.
هاوكات پەروەردەی سلێمانی دەڵێت، رێگە بە تیمەكانی راگەیاندن و فۆتۆگرافەران و راگەیاندكاران نادرێت بچنە ناو هۆڵەكانی تاقیكردنەوەكانەوە بۆ ڕوماڵكردن.
بۆ ئەمساڵ 117 هەزار و 142 خوێندكار و 19 هەزار و 403 مامۆستا و فەرمانبەر بەشداری پرۆسەكە دەكەن، رۆژی 8ی تەمووزیش كۆتایی بە تاقیكردنەوەكان دێت.

پەروەردەی سلێمانی لەبارەی روماڵکردنی ساتی ئەنجامدانی تاقیکردنەوەکانی پۆلی 12 راگەیەنراوێکی بڵاوکردووەتەوە و تێیدا ئاماژەی بەوەداوە کە بۆ لەمەودوا، روماڵکردنی تاقیکردنەوەکان قەدەغە دەبێت. 

نەژاد عەبدوڵا، بەڕێوەبەری گشتیی پەروەردەی سلێمانی رایگەیاند، بە هیچ شێوەیەک رێگە بە تیمی کەناڵەکان، فۆتۆگرافەران و راگەیاندکاران نادرێت بچنە ناو هۆڵەکانی تاقیکردنەوەکانەوە بۆ روماڵکردن.

ئاماژەی بەوەشداوە، ئەم بڕیارە لەپێناو پاراستنی ئارامی و سەقامگیری پرۆسەی تاقیکردنەوە گشتییەکانی پۆلی 12ـی ئامادەیی و بە مەبەستی فەراهەمکردنی کەشێکی لەبارە بۆ خوێندکاران.

وتیشی، ​"داوا لە سەرجەم دەزگاکانی راگەیاندن دەکەین هاوکارمان بن لە سەرکەوتنی ئەم پرۆسە نیشتمانییە و رێز لە تایبەتمەندی و ئارامی هۆڵەکان بگرن، هەر کەمتەرخەمییەک لە جێبەجێکردنی ئەم رێنماییانەدا، لێپرسینەوەی یاسایی بەدوای خۆیدا دەهێنێت".

کەناڵی تەلەفزیۆنی (فرانس ٣)، رۆژی شەممە، پەردەی لەسەر روداوێکی سەیر لادا کە بەسەر جووتیارێکدا هاتووە لە باشووری فەرەنسا، کاتێک بەڕێکەوت دۆزیویەتییەوە کە ماوەی 32 ساڵە لە تۆمارە رەسمییەکاندا وەک "کەسێکی مردوو" ناوی نووسراوە.

کەناڵەکە رایگەیاندووە: ئەمە چیرۆکێکی باوەڕنەکراوە و بووەتە مایەی سەرئێشە و دڵەڕاوکێ بۆ خێزانی جووتیارێک لە هەرێمی (لواری باڵا).

باوکەکە کە ناوی 'پاتریس'ە، وەک دەرکەوتووە لە روانگەی یاساوە ماوەی 32 ساڵە بە مردوو دادەنرێت، لە کاتێکدا ئەو هێشتا لە ژیاندا ماوە و تەندروستیشی باشە.

بەپێی راپۆرتی کەناڵی (فرانس ٣)، چیرۆکەکە لە مانگی نیساندا (ئەپریل) دەستیپێکرد، کاتێک خێزانەکە نامەیەکیان لە دادگای بازرگانییەوە پێگەیشت کە تێیدا داوای رێکخستنەوەی باری یاسایی کۆمپانیا کشتوکاڵییەکەیان دەکرد، بەو بیانووەی کە بەڕێوەبەرەکەی (پاتریس) لە بەڵگەنامەکاندا وەک کەسێکی کۆچکردوو تۆمارکراوە!.

دەسەڵاتداران هەڕەشەی سڕینەوەی کۆمپانیاکەیان لە تۆمارەکاندا کردبوو ئەگەر کێشەکە چارەسەر نەکرێت، لەو کاتەدا جووتیارەکە تووشی شۆک بوو کاتێک زانی کە لە ساڵی 1994ەوە بە شێوەیەکی رەسمی لە تۆمارەکانی دەوڵەتدا وەک مردوو دەستنیشانکراوە.

کەناڵەکە ئاماژەی بەوەش کردووە، دوای ئەوەی پیاوەکە سەردانی دادگای کردووە، دادگا وا تێگەیشتووە کە رەنگە لێکچوونی ناو لە ناو خێزانەکەیدا هەبێت، بەڵام جووتیارەکە ئەم ئەگەرەی بە تەواوی رەتکردووەتەوە.

لەبەر ئەوە، دیوانی دادگا داوای لێکردووە کە کۆپییەکی رەسمی لە بڕوانامەی لەدایکبوونی (ناسنامە) پێشکەش بکات، بۆ ئەوەی دووبارە وردبینی لە زانیارییەکاندا بکرێتەوە و ئەو مەتەڵە چارەسەر بێت.

کەناڵەکە لە راپۆرتەکەیدا بەردەوام دەبێت و دەڵێت، خێزانەکە لە راستیدا هەموو بەڵگەنامە داواکراوەکانیان بۆ دادگا ناردووە، بەڵام سەرەڕای ئەوەش، تا ئێستا کەس نەیتوانیوە گرێکوێرەی ئەم هەڵە بیرۆکراتییە بکاتەوە یان رونکردنەوەیەکی رون لەسەر ئەوەی کە رویداوە پێشکەش بکات.

مەسعوود پزیشکیان، سەرۆک کۆماری ئێران، ئەمڕۆ شەممە، جەختی کردەوە کە شەڕ لە بەدیهێنانی ئامانجەکانیدا شکستی هێناوە.

پزیشکیان لە لێدوانێکی رۆژنامەوانیدا رایگەیاند:  شەڕ لە بەدیهێنانی ئامانجەکانیدا شکستی هێنا، سەرەڕای تیرۆرکردنی سەرکردەکان و زانا ئەتۆمییەکان و هێرشکردنە سەر ژێرخانەکان.

ئاماژەی بەوەش کرد: من بە باشی لەو سەختییانە تێدەگەم کە گەلەکەمان چەشتوویەتی، و ئارامگرتنیان لەبەرامبەر گوشارە ئابوورییەکاندا تاقیکردنەوەیەک بوو...

دۆسییەی چەك دانان ناكۆكی لەنێوان گروپە چەكدارەكانی ناو حەشدی شەعبی دروستكردووە و پەرلەمانتارێكی عیراقیش دەڵێت، ئەو پرسە بەتەواویی پەیوەستە بە رێككەوتنی ئەمریكا و ئێرانەوە.

موختار موسەوی، ئەندامی ئەنجومەنی نوێنەرانی عیراق لە لێدوانێكی رۆژنامەوانیدا رایگەیاندووە، دۆسییەی چەك دانان لەناو حەشدی شەعبی، ناكۆكی دروستكردووە و بەشێك لە گروپە چەكدارەكان ئامادەییان نیشانداوە بۆ دانانی چەك، بەشێكی تریشیان بە توندی چەك دانان رەتدەكەنەوە.

ئەوەشی خستەڕوو، گۆڕەپانی سیاسی عیراق پەیوەستە بە پێشهاتە ناوچەییەكانەوە، ئەگەر ئەمریكا و ئێران بگەنە رێككەوتن، رەنگە بە جۆرێكی تر مامەڵە لەگەڵ گروپە چەكدارەكانی عیراق بكرێت، ئەمریكا و گروپە چەكدارەكانیش لە سروشتی ئەو بابەتە تێدەگەن.

ئەوەش لەكاتێكدایە، تائێستا گروپە چەكدارەكانی سەرایا سەلام، عەسائیبی ئەهلی حەق و كەتیبەكانی ئیمامی عەلی بڕیاری چەك دانان و هەڵوەشاندنەوەیان داوە، بەڵام چەند گروپێكی تر لەنێویاندا بزووتنەوەی نوجەبا و حزبوڵای عیراق بە توندی دژی چەك دانانن.

بەهۆی نەبوونی پاڵپشتی سەركردە دیارەكانی چوارچێوەی هەماهەنگی نوری مالكی شكستیهێنا لە پێكهێنانی گەورەترین فراكسیۆنی پەرلەمانی لەناو چوارچێوەی هەماهەنگی.

ماڵپەڕی " عەرەبی جدید" لە چەند سەرچاوەیەكی سیاسی ناو چوارچێوەی هەماهەنگییەوە ئاشكرایكردووە، بەهۆی نەبوونی پاڵپشتی سیاسی سەركردە دیارەكانی چوارچێوە، هەوڵەكانی نوری مالكی سەرۆكی هاوپەیمانی دەوڵەتی یاسا بۆ پێكهێنانی گەورەترین فراكسیۆنی پەرلەمانی لەناو چوارچێوەی هەماهەنگی بێ ئەنجام بوون و شكستیان هێناوە.

ئەوەشی خستووەتەرو، پەرلەمانتارانی چوارچێوە دركیان بە هەستیاری رەوشی عیراق و حكومەتی نوێ كردووە و پێیانوایە، پێكهێنانی هەر هاوپەیمانی و فراكسیۆنێكی نوێ پەرتەوازەبوونی زیاتری ناو چوارچێوە و لاوازبوونی هاوپەیمانی دەسەڵاتداری لە عیراق لێدەكەوێتەوە.

ئەو ماڵپەڕە ئاشكراشیكردووە، سەرەڕای بێ ئەنجامی هەوڵەكانی نوری مالكی هێشتا بەردەوامە لە راكێشانی پەرلەمانتاران و پێكهێنانی فراكسیۆنی نوێ بە ئامانجی هەبوونی كاریگەری لەسەر بڕیارەكانی ئەنجومەنی نوێنەران و حكومەت، بەڵام سەركردە دیارەكانی تری چوارچێوە چاویان لە پڕكردنەوەی پۆستە وزارییەكانی حكومەتی نوێی و پاڵپشتیكردنی حكومەتەكەیە، بە هەموو شێوەیەكیش خۆیان لە ململانێی پێشوەختەی دەسەڵات بەدوور دەگرن.

لەسەر ئاستی جیهان زیاتر لە 138 ملیۆن منداڵ لە رەوشێكی سەختدان و بەشێكیشیان بەهۆی كاركردنەوە ژیانیان لە مەترسیدایە.

رێكخراوی نێودەوڵەتی كار ئامارێكی لەبارەی كاركردنی منداڵان و مەترسی لەسەر ژیانیان بڵاوكردووەتەوە و رایگەیاندووە، لەسەر جیهان زیاتر لە 138 ملیۆن منداڵ لە رەوشێكی زۆر سەختدا كار دەكەن و لە مافی پەروەردە بێبەشكراون و ژیانی 54 ملیۆن منداڵیش لە مەترسیدایە.

راشیگەیاندووە، ئەمساڵ كەمپینێك بە ناونیشانی كارتی سوور بۆ كارپێكردنی منداڵان و كاری پڕ رێز بۆ گەورەكان بەڕێوەدەچێت و داوا لە وڵاتانی جیهان و رێكخراوە نێودەوڵەتییەكانیش دەكات كار بكەن بۆ رێگریكردن لە كاركردنی منداڵان.

رێكخراوی نێودەوڵەتی كار داوا لەسەرجەم وڵاتانی جیهانیش دەكات، لە دژی كارپێكردنی منداڵان هەڵوێستیان هەبێت بۆئەوەی ئەو بەڵێنانەی دراون گۆڕانكاریی راستەقینە بۆ هەموو منداڵان و خێزانەكان دروستبكات.

وەزارەتی دەرەوەی ئێران، ئەمڕۆ شەممە، رایگەیاند، ئیمزاکردنی یاداشتی لێکتێگەیشتنی تایبەت بە دانوستانەکانی ئیسلام ئاباد سبەی ئەنجام نادرێت، ئاماژەی بەوەش کرد کە تەواوکردنی لە چەند رۆژی داهاتوودا بە ئەگەرێکی کراوە دەمێنێتەوە.

وەزارەتی دەرەوەی ئێران لە لێدوانەکانیدا، رایگەیاند: واژۆکردنی یاداشتی لێکتێگەیشتنەکە سبەی نابێت، بەڵام بەدووریش نازانرێت لە چەند رۆژی داهاتوودا ئەنجام بدرێت.

لەلایەکی ترەوە زانیاریی زیاتری خستەڕو و وتی: یاداشتی لێکتێگەیشتنی ئیسلام ئاباد لەم قۆناغەدا تیشک دەخاتە سەر کۆتاییهێنان بە شەڕ، بەبێ ئەوەی باسی پرسی ئەتۆمی بکات.

ئەمەش لە کاتێکدایە کە هەر ئەمڕۆ شەممە، شەهباز شەریف، سەرۆک وەزیرانی پاکستان پێشبینی کردبوو رێککەوتنی ئاشتی لە نێوان ویلایەتە یەکگرتووەکانی ئەمریکا و ئێران لە ماوەی 24 کسەعاتدا کۆتایی پێبێت.

شەریف رایگەیاندبوو: پاکستان لە هەر کاتێک زیاتر نزیکە لە گەیشتن بە رێککەوتنی ئاشتی لە نێوان ویلایەتە یەکگرتووەکانی ئەمریکا و ئێران، و پێشبینی دەکرێت لە ماوەی ٢٤ کاتژمێری داهاتوودا جێبەجێ بکرێت.

سەرۆک وەزیرانی پاکستان ئاماژەی بەوەش کردبوو کە: ئەمریکا و ئێران لەسەر چوارچێوەی کار بۆ رێککەوتنی ئاشتی رێککەوتوون کە کۆتایی بە چەندین مانگ لە ململانێ لە رۆژهەڵاتی ناوەڕاست دەهێنێت، و رونیشیکردەوە کە هەردوولا گەیشتوونەتە دەقی کۆتایی رێککەوتنەکە.

شەهباز شەریف ئەوەشی خستبووە روو کە وڵاتەکەی ئامادەکاری دەکات بۆ ئەنجامدانی رێوڕەسمی واژۆکردنی ئەلیکترۆنیی رێککەوتنی ئاشتییەکە کاتێک کارەکانی کۆتایی دێت، و ئاماژەی بەوەش کرد کە هەفتەی داهاتوو لە دوای تەواوبوونی پرۆسەی واژۆکردنی ئەلیکترۆنییەکە، دانوستانە تەکنیکییەکان بەڕێوەدەچن.

سەرۆكی سۆماڵیلاند سەردانی ئیسرائیل دەكات بۆ بەشداریكردن لە رێوڕەسمی كردنەوەی باڵیۆزخانەی هەرێمەكەی لە قودس.

رۆژنامەی مەعاریفی ئیسرائیلی بڵاویكردەوە، عەبدوڕەحمان عەبدوڵا عەرۆ سەرۆكی هەرێمی جوداخوازی سۆماڵیلاند رۆژی یەكشەممەی داهاتوو سەردانی ئیسرائیل دەكات بە مەبەستی بەشداریكردن لە كردنەوەی باڵیۆزخانەی هەرێمەكەی لە قودس.

ئەوەش یەكەمین سەردانی رەسمی سەرۆكی سۆماڵیلاندە لە دوای ئەوەی ئیسرائیل ساڵی رابردوودا دانینا بەو هەرێمە وەك وڵاتێكی رەسمی و سەربەخۆ.

لە سەردانەكەیدا سەرۆكی سۆماڵیلاند بە نیازە لەگەڵ سەرۆكی ئیسرائیل و چەند لێپرسراوێكی تری باڵای ئەو وڵاتە كۆببێتەوە بە مەبەستی زیاتر بەهێزكردنی پەیوەندییەكانیان.

ترەمپ رێگری دەكات لە ئۆپراسیۆنێكی سەربازیی لە ناو خاكی ئێران بە مەبەستی دەستبەسەرداگرتنی یۆرانیۆمی پیتێنراوی ئەو وڵاتە.

ئاژانسی سی ئێن ئێن لە زاری چەند سەرچاوەیەكی ئاگادارەوە بڵاویكردووەتەوە، دان كەین سەرۆك ئەركانی سوپای ئەمریكا، مانگی رابردوو بە نهێنی سەردانی فەرماندەیی ناوەندیی هێزەكانی ئەمریكای كردووە بۆ بینینی پلانی هێرشێكی سەربازیی زەمینی بۆ ناو خاكی ئێران، كە ئامانج لێی دەستبەسەرداگرتنی یۆرانیۆمی پیتێنراوی ئەو وڵاتە بووە.

بە پێی ئاژانسەكە، هۆكاری راگرتنی ئەو ئۆپراسیۆنە سەربازییە بۆ ترسی ئەمریكا لە وەڵامدانەوەیەكی زۆر توندی ئێران و درێژەكێشانی جەنگ دەگەڕێتەوە، جگە لەوەی  زیانی گەورەش بە ئابووریی جیهان دەگەیەنێت و دەبێتە هۆی كوژرانی ژمارەیەكی زۆر لە سەربازانی ئەمریكا، ئاماژە بەوەشكراوە، خودی دۆناڵد ترەمپ سەرۆكی ئەمریكا فەرمانیكردووە بە هەڵوەشاندنەوەی ئەو پلانە بۆئەوەی رەوشەكە ئاڵۆزتر نەبێت.

سبەینێ تاقیکردنەوەکانی قۆناغی 12ـی ئامادەیی دەستپێدەکات و لەکاتی تاقیکردنەوەکانیش هێڵەکانی ئینتەرنێت لە هەرێم دەپچڕێت.

پەیمان خواجە وتەبێژی وەزارەتی پەروەردەی هەرێم رایگەیاند، سبەینێ تاقیکردنەوەکانی قۆناغی 12ـی ئامادەیی دەستپێدەکات، لە ماوەی تاقیکردنەوەکانیشدا هێڵی ئینتەرنێت بۆ ماوەیەکی کاتی لە هەرێم دەپچڕێت،

وتیشی، پچڕانی هێڵەکانی ئینتەرنێت لە پێناو رێگریکردنە لە هەوڵەکان بۆ گزیکردن لەکاتی تاقیکردنەوەکاندا.

وتەبێژی وەزارەتی پەروەردەی هەرێم ئەوەشی خستەڕوو، بڕیارەکە تا کۆتاییهاتنی تاقیکردنەوەکانی قۆناغی 12ـی ئامادەیی بەردەوام دەبێت.

وەزارەتی پەروەردە ئاشکرایکردووە، 117 هەزار و 142 خوێندکار بەشداری تاقیکردنەوەکان دەکەن کە 88 هەزار و 116 خوێندکاریان لە بەشی زانستی، هەروەها 26 هەزار و 431 خوێندکار لە بەشی وێژەیین، دوو هەزار و 595 خوێندکاریش لە بەشی پیشەیین.

ئاژانسی رۆیتەرز لە سەرچاوەیەکی رۆژئاوایی ئاگادارەوە، ئەمڕۆ شەممە، گواستییەوە، کە ئەگەر هەیە لە زووترین کاتدا و لە  رۆژی یەکشەممەدا، رێککەوتنی نێوان ویلایەتە یەکگرتووەکانی ئەمریکا و ئێران لەلایەن جەی دی ڤانس، جێگری سەرۆکی ئەمریکا و محەمەد باقر قالیباف، سەرۆکی پەرلەمانی ئێرانەوە واژۆ بکرێت، بەوپێیەی شاری جنێڤ وەک شوێنی واژۆکردنەکە دەستنیشان کراوە.

لە هەمان چوارچێوەدا، چەندین سەرچاوەی ئاگادار بە رۆیتەرزیان راگەیاندووە کە رەشنووسی مەرجەکانی رێککەوتنی نێوان ئەمریکا و ئێران، دەستپێکردنی ئازادکردنی ملیاران دۆلار لە داراییە بلۆککراوەکانی ئێران لەلایەن واشنتنۆنەوە و هەڵگرتنی سزاکانی سەر هەناردەکردنی نەوتی ئێران لەخۆدەگرێت، لە بەرانبەر دووبارە کردنەوەی گەروی هورمز.

سەرچاوەکان ئاماژەیان بەوەش کردوە کە: بەرنامە ئەتۆمییەکەی ئێران لە ماوەی دانوستانێکدا کە ٦٠ رۆژ دەخایەنێت تاوتوێ دەکرێت، هەروەها ئەوەشیان خستووەتەڕو کە: پێشنیارەکان تاوتوێکردنی قەرەبووی ئەگەری بۆ ئێران بەهۆی شەڕەوە، و دەستبەرداربوون لە داواکارییە کۆنەکانی ئەمریکا بۆ سەپاندنی سنووردارکردن بەسەر بەرنامەی موشەکیی ئێراندا دەگرێتەوە.

لەلایەکی ترەوە، بەرپرسێکی ئەمریکی بۆ رۆیتەرز راستی ئەم پێشنیارانەی رەتکردەوە و جەختی لەوە کردەوە کە: هیچ پارەیەک بۆ ئێران ئازاد ناکرێت تاوەکو مەرجەکانی رێککەوتنەکە جێبەجێ نەکات، ئاماژەی بەوەش کرد کە گەروی هورمز بە کراوەیی دەمێنێتەوە و ئێران هیچ داراییەک پێشکەش بەو گروپانە ناکات کە واشنتۆن وەک تیرۆریست پۆلێنیان کردوون، و رایگەیاند کە تاران رەزامەندی لەسەر ئەوە دەربڕیوە.

لەلایەن خۆشییەوە، بەرپرسێکی باڵای ئیسرائیل رایگەیاند کە ئیسرائیل پێشبینی دەکات ئازادیی جووڵە بۆ خۆی بپارێزێت بۆ روبەڕووبوونەوەی ئەوەی کە وەک هەڕەشە بۆ سەر ئاسایشی خۆی دایئەنێت.

میدیا ئەمریكییەكان ئاشكرای دەكەن، دۆناڵد ترەمپ رێگریی كردووە لە ئەنجامدانی ئۆپراسیۆنێكی سەربازیی زەمینی بۆ ناو خاكی ئێران، كە ئامانج لێی دەستبەسەرداگرتنی یۆرانیۆمی پیتێنراو بووە.

سی ئێن ئێن لە زاری چەند سەرچاوەیەكی ئاگادارەوە بڵاویكردەوە، كە "دان كەین" سەرۆكی ئەركانی سوپای ئەمریكا، مانگی رابردوو بە نهێنی سەردانی فەرماندەیی ناوەندیی هێزەكانی ئەمریكای كردووە بۆ بینینی پلانی هێرشێكی سەربازیی زەمینی بۆ ناو خاكی ئێران، كە ئامانج لێی دەستبەسەرداگرتنی یۆرانیۆمی پیتێنراو بووە..

سی ئێن ئێن ئەوەشی خستووەتەڕوو، هۆكاری راگرتنی ئەو ئۆپەراسیۆنە سەربازییە بۆ ترسی ئەمریكا لە وەڵامدانەوەیەكی زۆر توندی ئێران و درێژە كێشانی جەنگەكە دەگەڕێتەوە، جیا لەوەی  زیانی گەورە بە ئابوریی جیهان دەگەیەنێت و دەبێتە هۆی كوژرانی ژمارەیەكی زۆر لە سەربازانی ئەمریكا.

بەڕێوەبەرایەتی گشتی کەشناسی و بوومەلەرزەزانی هەرێمی کوردستان، پێشبینییەکانی کەشوهەوای بۆ 48 سەعاتی داهاتوو بڵاوکردەوە و بەپێی پێشبینییەکان، سبەینێ یەکشەممە ئەگەری نمەباران هەیە.

کەشناسی هەرێم رایگەیاند، بۆ ئەمڕۆ ئاسمانی هەرێمی کوردستان بە گشتی ساماڵ دەبێت، بەڵام لە ناوچەکانی رۆژئاوای هەرێم هەندێک کات دەگۆڕێت بۆ پەڵە هەور، هەروەها پلەکانی گەرما نزیک دەبێتەوە لە تۆمارکراوەکانی دوێنێ.

ئاماژەی بەوەشکرد، سبەینێ ئاسمان لە نێوان ساماڵ و پەڵە هەور بۆ نیمچە هەوردا دەبێت، هاوکات لەگەڵ ئەم گۆڕانکارییەدا، ئەگەری بارینی تاوە بارانێکی کورتخایەن هەیە، بە تایبەتی لە ناوچە شاخاوییەکانی سنوری ئیدارەی سەربەخۆی سۆران و سنوری پارێزگای دهۆک.

کەشناسی هەرێم ئەوەشی خستەڕوو، پلەکانی گەرما هاوشێوەی ئەمڕۆ دەبێت و گۆڕانکارییەکی ئەوتۆی بەسەردا نایەت.