هەواڵەکان
وەزارەتی دەرەوەی ئێران، ئەمڕۆ شەممە، رایگەیاند کە عەباس عراقچی، وەزیری دەرەوەی وڵاتەکە، لە میانی کۆبوونەوەیدا لەگەڵ سەرۆک وەزیرانی پاکستان، هەڵوێستی ئێرانی لەبارەی ئاگربەست و کۆتاییهێنان بە شەڕ روون کردووەتەوە.
لە بەیاننامەیەکی وەزارەتی دەرەوەی ئێراندا، هاتووە: عەباس عراقچی لە کۆبوونەوەکەیدا لەگەڵ سەرۆک وەزیرانی پاکستان، دیدگای ئێرانی سەبارەت بە پرسی ئاگربەست و پێویستی کۆتاییهێنان بە جەنگ خستووەتەڕوو.
بەیاننامەکە ئاماژەی بەوەش کردووە: عراقچی تیشکی خستووەتە سەر بەردەوامیی دەستدرێژییەکانی ئیسرائیل بۆ سەر لوبنان و ستایشی بایەخدانی حکومەتی پاکستانی کردووە بۆ جێبەجێکردنی رێککەوتنی ئاگربەست لە لوبنان.
توێژینەوەیەکی نوێ کە لە گۆڤاری (Poultry Science) بڵاوکراوەتەوە، ئاشکرای دەکات کە تیمێکی توێژەران لە زانکۆی میسووری ئەمریکی بە سەرۆکایەتی زانا "کیهۆ لی"، هەنگاوێکی گرنگیان ناوە بەرەو پەرەپێدانی جۆرە مریشکێک کە بتوانێت پرۆتینی سوودبەخش بۆ چارەسەری پزیشکی لەناو هێلکەکانیدا بەرهەمبهێنێت.
بەکاربردنی هێلکەی مریشک بۆ مەبەستی پزیشکی (وەک ڤاکسینی ئەنفلۆنزا) بیرۆکەیەکی کۆنە، بەڵام زانایان هەمیشە رووبەڕووی کێشەیەکی گەورە دەبوونەوە، ئەویش ئەوە بوو کە کاتێک جینێکی نوێیان دەخستە ناو دی ئێن ئەی (DNA) مریشکەکەوە، دوای ماوەیەک جینەکە لە کار دەکەوت یان کاریگەرییەکەی نەوە دوای نەوە کەمی دەکرد، ئەمەش بە "سەپاندنی لاوەکی" (epigenetic suppression) دەناسرێت.
بۆ تێپەڕاندنی ئەم بەربەستە، تیمە توێژەرەکە تەکنیکێکی جیاوازیان بەکارهێنا کە بریتی بو لە بەکارهێنانی مەکینەی بڕینی جین (CRISPR)، بەشێوازێک جینە نوێیەکەیان لە شوێنێکی دیاریکراوی جینۆمدا چاند کە پەیوەستە بە جینی (GAPDH).
جینی (GAPDH) بەرپرسە لە بەرهەمهێنانی وزە لە شەکر و هیچ خانەیەک ناتوانێت بەبێ ئەو بژی، بۆیە هەمیشە بە چالاکی دەمێنێتەوە، زانایان سوودیان لەم تایبەتمەندییە وەرگرت و جینە پزیشکییەکەیان لەوێدا جێگیر کرد بۆ ئەوەی دڵنیابن لەوەی هەمیشە بە چالاکی دەمێنێتەوە.
ئەنجامەکان چییان نیشاندا؟
تاقیکردنەوەکان سەرکەوتوو بوون، ئەو نیشانە رووناکییەی (فلۆری) کە بۆ چاودێریکردنی جینەکە دانرابو، دوای دابەشبونی خانەکان و تێپەڕبونی کاتێکی زۆر بە جێگیری مایەوە. ئەمەش ئەوە دەسەلمێنێت کە جینەکە کپ نەکراوە و بەردەوامە لە کارکردن.
هەنگاوی داهاتوو:
هەرچەندە ئەم تاقیکردنەوانە تا ئێستا تەنها لەسەر ئاستی خانەکان ئەنجامدراون و نەگەیشتوونەتە سەر باڵندەی زیندو، بەڵام ئەم دۆزینەوەیە رێگا خۆش دەکات بۆ ئەوەی لە داهاتوودا مریشک وەک "کارگەیەکی زیندو" بەکاربهێنرێت بۆ بەرهەمهێنانی دەرمان و پرۆتینە پزیشکییەکان بە شێوەیەکی جێگیر و کاریگەر.
سەرچاوە: Naukatv.ru
هەریەک لە ستیڤ ویتکۆف و جارید کۆشنەر، نێردراوانی ئەمریکا، ئەمڕۆ شەممە، گەیشتنە ئیسلام ئابادی پایتەختی پاکستان بە مەبەستی دەستپێکردنەوەی دانوستانەکان لەگەڵ ئێران، ئەمەش لە کاتێکدایە هێشتا روون نییە کە ئایا کۆبوونەوەی راستەوخۆ لە نێوان هەردوولادا ئەنجام دەدرێت یان نا.
کۆشکی سپی رایگەیاند کە نێردراوەکان گفتوگۆی کەسی لەگەڵ نوێنەرانی شاندی ئێرانیدا ئەنجام دەدەن، ئاماژەی بەوەش کردووە کە ئەم هەنگاوە لە چوارچێوەی هەوڵەکاندایە بۆ پاڵنانی پڕۆسەی دانوستانەکان بەرەو پێشەوە.
لە بەرانبەردا، میدیا رەسمییەکانی ئێران بڵاویانکردەوە، عەباس عێراقچی وەزیری دەرەوەی ئێران کە رۆژی هەینی گەیشتە ئیسلام ئاباد، پلانی نییە لەگەڵ بەرپرسانی ئەمریکیدا کۆببێتەوە، و بڕیارە پاکستان پێشنیازەکانی تاران بگەیەنێتە واشنتون.
ئەم جووڵانە لە کاتێکدا دێن کە هەوڵەکان بۆ گەڕاندنەوەی هەردوولا بۆ سەر مێزی دانوستان پەککەوتوون، بەتایبەت بەهۆی سووربوونی ئێران لەسەر رەتکردنەوەی وتووێژ لەژێر سێبەری گەمارۆی دەریایی ئەمریکا، لە بەرامبەر ئەو کۆتوبەندانەی تاران خستوویەتیە سەر هاتوچۆی کەشتیوانی لە گەرووی هورمز، کە کاریگەرییەکی گەورەی لەسەر بازاڕەکانی وزەی جیهان دروست کردووە.
وەزارەتی بازرگانی عيراق، ئەمڕۆ شەممە، رایگەیاند کە کۆمەڵێک رێکاری پێشوەختەیان گرتووەتەبەر بۆ بەهێزکردنی ئاسایشی خۆراک لە رێگەی دابینکردنی خەزێنەی زیادە (خەزێنەی ستراتیژی).
محەمەد حەنوون، وتەبێژی وەزارەتی بازرگانی لە بەیاننامەیەکدا رایگەیاندوو: کۆگاکانی ناوەندی و لقەکانی کۆمپانیای گشتی بۆ بازرگانیی خۆراک، خەزێنەیەکی پێویستیان لە کاڵا بنەڕەتییەکان هەیە، پڕۆسەی دابینکردن و دابەشکردنیش بەپێی خشتە کاتییە دیاریکراوەکان و بێ هیچ ئاستەنگێک بەردەوامە.
هەروەها جەختی کردەوە کە: هەموو ماددەکان پێش دابەشکردن، پشکنینی تاقیگەییان بۆ دەکرێت و هیچ کەمییەک لە پێداویستییەکانی هاوڵاتیاندا نییە.
سودانی و مالكی لە كۆبوونەوەكەی دوێنێدا، چوارچێوەی هەماهەنگییان سەرپشككردووە لە دیاریكردنی كاندیدی پۆستی سەرۆك وەزیرانی عیراق.
موشریق فرێجی یەكێك لە سەركردەكانی هاوپەیمانی ئاوەدانكردنەوە و گەشەپێدان كە محەمەد شیاع سودانی سەرۆكایەتی دەكات رایگەیاندووە، لە كۆبوونەوەكەی شەوی رابردوودا سودانی و نوری مالكی، چوارچێوەی هەماهەنگییان سەرپشككردووە بۆ دیاریكردنی كاندیدی سەرۆك وەزیرانی داهاتووی عیراق لە كۆبوونەوەی ئەمڕۆدا بۆ كۆتاییهێنان بە چەقبەستویی سیاسی و یەكلاكردنەوەی ئەو بابەتە.
شەوی رابردوو سەركردەكانی چوارچێوەی هەماهەنگی لە بەغداد بۆدیاریكردنی كاندیدی سەرۆك وەزیران كۆبوونەوە، بەڵام نەیانتوانی بگەنە رێككەوتن و ماوەی دەستوریش بۆ دیاریكردنی كاندیدی سەرۆك وەزیران ئەمڕۆ كۆتایی دێت.
ئەڵمانیا هێز بۆ دەریای ناوەڕاست دەنێرێت وەك ئامادەكارییەك بۆ بەشداریكردن لە پاراستنی ئاسایشی گەروی هورمز.
بۆریس پیستۆریۆس وەزیری بەرگریی ئەڵمانیا ناردنی یەكە دەریاییەكانی وڵاتەكەی بۆ دەریای ناوەڕاست راگەیاند، وەك ئامادەكارییەك بۆ ئەگەری بەشداریكردن لە پاراستنی ئاسایشی گەروی هورمز.
دەشڵێت، كەشتیی مینڕێژكەر و كەشتیی فەرماندەیی و پشتیوانی لەخۆدەگرێت بۆئەوەی هێزەكان بتوانن بە خێرایی بەرەو گەروی هورمز بجوڵێن، ئەگەر پەرلەمانی ئەڵمانیا رەزامەندیی لەسەر ئەركەكە دەربڕی.
ئاماژەی بەوەشكردووە، ئەم هەنگاوە بۆ گەڕاندنەوەی كاتە لە هەر دواكەوتنێك دوای وەرگرتنی مۆڵەتی لە پەرلەمان.
پێشتریش رایگەیاندبوو، بەشداریكردنیان لە پاراستنی هورمز بەستووەتەوە بە گەیشتن بە رێككەوتنێك لەژێر چەتری هاوپەیمانییەكی نێودەوڵەتیدا و ئەركەكانیشیان تەنها سنووردار دەبێت و تەنیا هەڵگرتنەوەی مین دەبێت لە ناوچەكەدا.
سێنتكۆم دەڵێت لە گەروی هورمز رێگرییان لە كەشتییەك كردووە كە ئاڵای ئێرانی لەسەربووە و ویستویەتی بەرەو بەندەرەكانی ئەو وڵاتە بڕوات.
فەرماندەیی ناوەندیی هێزەكانی ئەمریكا (سێنتكۆم) لە تۆڕی كۆمەڵایەتی ئێكس بڵاویكردەوە، كەشتی تێكشكێنەری یو ئێس ئێس رافایل پیراڵتا لە نزیك گەروی هورمز رێگریی لە كەشتییەك كردووە كە ئاڵای ئێرانی هەڵكردووە ویستویەتی بەرەو بەندەرێكی ئەو بڕوات.
پیت هێگسێس وەزیری جەنگی ئەمریكاش رایگەیاند، ئۆپراسیۆنی تووڕەیی داستان ئاسا بەردەوامە و لەو چوارچێوەیەشدا ئەو گەمارۆ دەریاییەی خستویانەتە سەر بەندەرەكانی ئێران فراوانتر دەبێت، تا ئەمڕۆش شكستیان بە 34 كەشتی سەر بە ئێران هێناوە كە هەوڵیانداوە گەمارۆكە بشكێنن.
دان كەین سوپاسالاری ئەمریكاش هۆشداریدا هەر كەشتییەكی سەر بە ئێران بیەوێت هێڵی گەمارۆ ببەزێنێت، ناچار بە گەڕانەوە دەكرێت یان دەستی بەسەردا دەگیرێت.
پێگەی مارین ترەفیكیش بڵاویكردەوە، رۆژی هەینی تەنها پێنج كەشتی توانیویانە بە گەروی هورمزدا تێپەڕن و تەنها یەك كەشتیشیان نەوتهەڵگری ئێرانی بووە.
قوباد تاڵەبانی، جێگری سەرۆک وەزیرانی هەرێم لە یازدەیەمین کۆڕبەندی نێودەوڵەتیی ئابوریی دێڵفی لەگەڵ دیمیتریس پاپاستێرجیو، وەزیری حکومڕانی ئەلیکترۆنی و زیرەکیی دەستکردی یۆنان کۆبووەوە.
لە کۆبوونەوەکەدا کە رۆژی هەینی (24/4/2026) بەڕێوەچوو، گفتوگۆکرا لەبارەی چۆنییەتی سوودوەرگرتن لە ئەزموونی حکومڕانیی ئەلیکترۆنیی یۆنان و بەکارهێنانی زیرەکیی دەستکرد بۆ باشتر پێشکەشکردنی خزمەتگوزارییەکان.
لەمبارەیەوە بڕیاردرا لینکێکی نوێی پەیوەندی لە نێوان پسپۆڕانی هەردوو حکومەتی یۆنان و هەرێم بکرێتەوە بۆ ئاڵوگۆڕی زانیارییەکان. هەروەها بە پێویست زانرا سەنتەرێکی زانیاری بۆ حکومەتی هەرێم دروست بکرێت تا یارمەتیدەربێت لە باشتر بەڕێوەچوونی پرۆسەی بە ئەلیکترۆنیکردنی دامەزراوەکانی حکومەت.
هەردوولا هاوڕابوون حکومڕانیی ئەلیکترۆنی یارمەتیدەر دەبێت لە پرسی شەفافییەت و متمانەی نێوان حکومەت و هاووڵاتییان بەهێزتر دەکات، جگە لەوەش شێوازی پێشکەشکردنی خزمەتگوزارییەکان خێراتر دەکات.
لەم چوارچێوەیەدا قوباد تاڵەبانی ئاماژەیدا بە هەوڵەکانی بە ئەلیکترۆنیکردنی حکومەتی هەرێم، لەوانە بایۆمەتری و پۆرتاڵی خزمەت و ماڵپەڕی شەفافییەت و روونیکردەوە لە ماوەی دە ساڵی رابردوودا ژێرخانێکی باش بۆ حکومڕانی ئەلیکترۆنی دانراوە و هەرچەندە هێشتا زۆر هەنگاو ماوە بنرێت، بەڵام ئەو کارانەی تا ئێستاش کراون، کارئاسانی باشیان بۆ حکومەت و هاووڵاتییان دروست کردووە.
جێگری سەرۆکوەزیران وتیشی ئامانجمانە پۆڕتاڵی خزمەت و هەموو پرۆژەکانی دیکەی بەئەلیکترۆنیکردنی دامەزراوەکان بە زیرەکیی دەستکردەوە ببەستینەوە تا بە شێوەیەکی شەفاف و خێرا مامەڵەی هاووڵاتییان جێبەجێ بکرێت.
بەڕێوەبەرایەتی پۆلیسی پارێزگای سلێمانی رایگەیاند، مەفرەزەکانی نوسینگەی نەهێشتنی تاوانی سەیدسادق بە هاوکاری نوسینگەی نەهێشتنی تاوانی دەربەندیخان، دوو تۆمەتباریان دەستگیرکردووە، کە بەتۆمەتی رفاندنی هاووڵاتییەک و بەپێی ماددەی 421 لە یاسای سزادان داواکراو بوون.
پۆلیسی سلێمانی ئاماژەی بەوەشکردوە، تۆمەتبارەکان لە دایکبووی ساڵانی 2002 و 2004ـن، دوای ئەنجامدانی تاوانەکەیان لە قەزای دەربەندیخان بەرەو سەیدسادق هەڵاتون و لەوێ خۆیان حەشارداوە.
بەگوێرەی راگەیەندراوەکەی پۆلیس، دوای بەدواداچونی هێزەکانیان و لە ئۆپەراسیۆنێکی هاوبەشدا دەستگیرکران.
پۆلیسی سلێمانی دەشڵێت؛ لە کاتی دەستگیرکردنیاندا، دەست بەسەر دوو ئۆتۆمبێل و دوو مۆبایلدا گیراوە، کە بە تۆمەتباران بووە، لە ئێستاشدا بە بڕیاری دادوەر راگیراون و لێکۆڵینەوە لە دۆسیەکەیان بەردەوامە.
وەزارەتی ناوخۆی هەرێمی کوردستان دەستگیرکردنی کەسێکی بە تۆمەتی تەشهیرکردن و تێکدانی ئاشتی کۆمەڵایەتی راگەیاند.
وەزارەتی ناوخۆی هەرێم لە راگەیەندراویكی بڵاوکردوەتەوە و تێیدا هاتووە؛ کەسێکیان بە ناوی "عومەر جەمال" لەسەر فەرمانی دادوەر و لەلایەن هێزەکانی پۆلیسەوە دەستگیر کردووە، ئەمەش دوای ئەوەی لە تۆڕی کۆمەڵایەتی X چەند بابەتێکی نەگونجاوی دەربارەی زیارەتکارانی شیعە بڵاوکردبووەوە.
وەزارەتەکە ئاماژەی بەوە کردوو، کە هەرچەندە مافی ئازادی دەربڕین لە هەرێم پارێزراوە، بەڵام رێگە نادرێت ئەم ئازادییە بۆ تەشهیرکردن بە پێکهاتەکان و تێکدانی ئاشتی کۆمەڵایەتی بەکاربهێندرێت.
لە جەختیشی کردەوە کە هەرکەسێک یاسا پێشێل بکات ڕووبەڕووی لێپرسینەوە دەبێتەوە و لە ئێستاشدا ڕێکارە یاساییەکان بەرامبەر ناوبراو گیراونەتە بەر.
میدیاکانی ئەمریکا بە پشتبەستن بە لێپرسراوانی ئیدارەی ئەمریکا بڵاویانکردەوە، دۆناڵد ترەمپ بەنیازە ویتکۆف و کوشنەر بنێرێتە پاکستان تا بەشداری دانوستان لەگەڵ عەباس عراقچی، وەزیری دەرەوەی ئێران بکەن
بەپێی راپۆرتەکانی ئەکسیۆس و سی ئێن ئێن، ئیدارەی دۆناڵد ترەمپ لە چوارچێوەی هەوڵە دیپلۆماسی و فشارە ئابورییەکانیدا هەنگاوی نوێ دەنێت و بڕیارە لە چەند رۆژی داهاتوودا ویتکۆف و کوشنەر گەشت بکەن بۆ ئیسلام ئابادی پایتەختی پاکستان، بە مەبەستی ئەنجامدانی دانوستان لەگەڵ عەباس عراقچی.
ئەو دوو میدیایە ئاماژەیان بەوەکردوە، مەبەستی دۆناڵد ترەمپ لە ناردی ئەو دوو نوێنەرەی گەیشتن بە رێککەوتنێک بۆ راگرتنی جەنگ.
هاوکات ئاماژە بەوە کراوە، کە جەی دی ڤانس، جێگری دۆناڵد ترەمپ، لە ئێستادا پلانی نییە بەشداریی ئەو کۆبوونەوانە بکات بەهۆی ئامادەنەبوونی محەمد باقر قالیبافی سەرۆکی پەرلەمانی ئێران، بەڵام ئامادەیە لە ئەگەری بەدیهاتنی پێشکەوتن لە دانوستانەکاندا گەشت بکات بۆ پاکستان.
بنیامین ناتانیاهۆ، سەرۆکوەزیرانی ئیسرائیل، رایگەیاند، وڵاتەکەی دەستی کردووە بە هەنگاونان بەرەو بەدیهێنانی ئاشتییەکی مێژویی لەگەڵ لوبنان، بەڵام حزبوڵا هەوڵی تێکدانی ئەو پرۆسەیە دەدات.
نەتانیاهۆ ئاماژەی بەوەکردوە، وڵاتەکەی مافی تەواوی هەیە بۆ جوڵە و بەرپەرچدانەوەی هەر هەڕەشەیەک، وەک چۆن لە دوێنێ و ئەمڕۆدا هێرشیان ئەنجامداوە و جەختیکردوەتەوە پابەندن بە گەڕاندنەوەی ئاسایش بۆ دانیشتوانی باکوری وڵاتەکەیان.
لەسەر پرسی رۆژهەڵاتی ناوەڕاستیش، سەرۆک وەزیرانی ئیسرائیل جارێکتر بەڵاینی دا نەخشەی رۆژهەڵاتی ناوەڕاست دەگۆڕن و دوپاتی کردوە "ئەمە رێک ئەو کارەی کە دەیکەن لە ئێستادا".
سەبارەت بە هەماهەنگییە نێودەوڵەتییەکانیش، ناتانیاهۆ وتی، لەسەر پرسی ئێران و لوبنان لەگەڵ ئیدارەی ئەمریکا لە هەماهەنگی تەواودان و ئاشکراشی کرد پەیوەندییەکی تەلەفۆنی سەرکەوتوی لەگەڵ دۆناڵد ترەمپی سەرۆکی ئەمریکا ئەنجامداوە و باسی لەوە کرد کە ترەمپ فشارە سەربازی و ئابوورییەکانی بۆ سەر ئێران زیاتر کردووە.
وەزیری جەنگی ئەمریکا لەکۆنفڕانسێکی رۆژنامەوانیدا رایگەیاند، وڵاتەکەی رێگری تەواو دەکات لەوەی ئێران ببێتە خاوەنی چەکی ئەتۆمی، ئاماژەی بەوە کرد کە گەمارۆ دەریاییەکان بۆ سەر ئێران رەهەندێکی جیهانی وەرگرتووە و تا ئێستا 34 کەشتییان لە گەروی هورمز گەڕاندووەتەوە.
پیت هێگسێس، وەزیری جەنگی ئەمریکا ئاماژەی بەوەکرد، هێزی دەریایی ئێرانیان بە تەواوەتی تێکشکاندوە و جەختیشیکردەوە بەردەوام دەبن لە دەستبەسەرداگرتنی کەشتییە نەوتییەکانی ئێران و توندکردنی گەمارۆکان تا ئەو ئاستەی "هیچ شتێک نەچێتە ناو ئێران و لێی نەیەتە دەرەوە."
وەزیری بەرگری ئەمریکا هۆشداریشیدا، کە کات لە بەرژەوەندی ئێراندا نییە، هێشتا دەرفەتێکی مێژویی لەبەردەم تاراندایە بۆ ئیمزاکردنی رێککەوتنێکی باش و لە ئێستادا تۆپەکە لە یاریگای ئەواندایە.
وەزیری جەنگی ئەمریکا رەخنەی لە ئەورقپاش گرت، کە سەردەمی پاراستنی بێبەرانبەر لەلایەن ئەمریکاوە کۆتایی هاتووە و دەبێت ئەو وڵاتانە خۆیان بەرپرسیارێتی پاراستنی گەروی هورمز بگرنە ئەستۆ، چونکە ئەوان زیاتر لە ئەمریکا پێویستییان پێیەتی.
لە کۆتایی قسەکانیشیدا، پیت هێگسێس هۆشداری دا، کە هێزەکانیان لەوپەڕی ئامادەباشیدان و دەستیان لەسەر پەلەپیتکەی چەکەکانیانە بۆ هەر ئەگەرێکی تر.
قوباد تاڵەبانی، جێگری سەرۆک وەزیرانی هەرێمی کوردستان، لە میانی بەشدارییکردنی لە کۆڕبەندی نێودەوڵەتیی ئابوریی دێڵفی رایگەیاند، هەرێمی کوردستان نایەوێت ببێتە بەشێک لە جەنگی نێوان ئەمریکا و ئیسرائیل بەرانبەر بە ئێران.
ناوبراو ئاماژەی بەوە کرد کە ئەم جەنگە لە روی ئابوری، ئەمنی و دەروونییەوە کاریگەریی نەرێنی لەسەر هەرێم هەبووە، بۆیە هەموو هەوڵێکیان بۆ پاراستنی سەقامگیریی کوردستانە و دەیانەوێت وەک پردێک بن بۆ کۆتاییهێنان بەو جەنگە.
قوباد تاڵەبانی جەختی لە پێشوازیی هەرێم لە رێککەوتنی ئاگربەست کردەوە و هیوای خواست ئاگربەستەکە بەردەوام بێت و وەک هەرێمی کوردستان هەموو هەوڵێک دەدەن.
لە بەشێکی تری قسەکانیدا وتی؛ لە روی ستراتیجیشەوە، کورد لە رابردوودا وەک کێشە سەیری کورد کراوە و ئەمڕۆ کورد ئەو قۆناغەی تێپەڕاندوە و لە ئێستادا وەک پردێکن، کە پشتیوانی پرۆسەی ئاشتی لە نێوان تورکیا و پەکەکەدا دەکەن، لە تورکیا و لە سوریا هەوڵدەدەن مافەکانی کورد پارێزراوبێت و لە رۆژهەڵاتیش تەواوی هەوڵیان بۆ ئەوەیە کوردان زیانیان پێنەگات.
لە روی گەشەپێدانی ناوخۆیی هەرێمی کوردستانیشەوە، قوباد تاڵەبانی ئاماژەی بەوە کرد، حکومەتی هەرێم پلان و نییەتی هەیە گەشەپێدان لە شارە گەورەکانەوە، کە لە ئێستادا لە ئاستێکی باشدایە بگوازێتەوە بۆ گوند و ناوچە دوورەدەستەکان، چونکە ئەو شوێنانە سەرچاوەی سەرەکیی کەرتی کشتوکاڵ و ئاژەڵدارین.
قوباد تاڵەبانی جەختیکردەوە، ئەوان بۆ ئایندە دەڕوانن و دەیانەوێت دوربکەونەوە لە پشت بەستن بە نەوت و هەوڵدەدەن بەکاربهێنین بۆ نێوکردنەوەی کەرتەکانی تر؛ وەک کشتوکاڵ و گەشتیاری و پیشەسازی.
ناوبراو باسی لەوەش کرد، ئامانجیانە وەک هەرێمی کوردستان سود لە وڵاتانی تر وەرگرن و ببنە هەناردەکار، بەو پێیەی هەرێم خاوەنی بەرهەمی کوالێتی بەرزی کشتوکاڵی و میوەیە وەک هەنار، هەنگوین و گوێز، کە دەکرێت لە بازاڕە نێودەوڵەتییەکاندا جێگەی خۆیان بکەنەوە و کێبڕکێی وڵاتان بکەن.
ئیسماعیل سەقابی ئەسفەهانی، جێگری سەرۆک کۆماری ئێران و سەرۆکی رێکخراوی بەڕێوەبردنی ستراتیژیی وزە، هۆشدارییەکی توندی دا، لە ئەگەری هەر هێرشێکی ئەمریکا و ئیسرائیل بۆ سەر بیرە نەوتەکانی ئێران، وڵاتەکەی کێڵگە نەوتییەکانی سعودیە دەکاتە ئامانج.
ناوبراو لە چاوپێکەوتنێکدا لەگەڵ میدیای وڵاتەکەی رایگەیاند، کە پلانێکی دیاریکراویان بۆ ئامانجەکان هەیە و ستراتیژییەکیان بە ناوی "پەیژەی بەرپەرچدانەوە" داڕشتووە؛ کە تێیدا پەیڕەوی بنەمای (چاو بەرانبەر بە چاو) و لە قۆناغە باڵاکانیدا (چاو بەرانبەر بە سەر)دەکەن، وەک ئاماژەیەک بۆ ئەوەی هەر لێدانێکی کەرتی نەوتی ئێران بە وێرانکردنی کەرتی نەوتی وڵاتانی دراوسێ وەڵام دەدرێتەوە.
ئەم لێدوانانە لە کاتێکدایە،پێشتریش فەرماندەی هێزی ئاسمانی سوپای پاسداران هۆشداری دابووە وڵاتانی کەنداو، ئەگەر رێگە بە ئەمریکا بدەن خاک و ئاسانکارییەکانیان دژی ئێران بەکاربهێنێت، ئەوا دەبێت ماڵئاویی لە بەرهەمهێنانی نەوت لە تەواوی رۆژهەڵاتی ناوەڕاست بکەن.
ئەمە لە کاتێكدایە، پێشتریش ئێران دەستی نەپاراستوە و لە ماوەی نزیکەی 40 رۆژی جەنگی نێوان ئەمریکا، ئیسرائیل بەرانبەر بە ئێران، چەندین جار دامەزراوەکانی نەوت و وزە لە وڵاتانی کەنداو لەلایەن هێزەکانی ئێران و گروپە هاوپەیمانەکانیانەوە بە موشەک و درۆن کراونەتە ئامانج.
کەشناسی هەرێم، بڵاویکردوەتەوە بە گشتی کەشی ئاسمان لە نێوان هەور و نیمچە هەور دەبێت و ئەگەرێکی کەم هەیە بۆ بارینی نمەباران لە دوانیوەڕۆدا، لەبارەی کەشی سبەینێشيوە دەڵێت؛ لە ناوچە شاخاوییەکان ئەگەری باران بارین هەیە.
ئەمڕۆ هەینی، بەڕێوەبەرایەتی گشتی کەشناسی و بوومەلەرزەزانی هەرێم، پێشبینی 48 سەعاتی داهاتوی بڵاوکردەوە بە گوێرەی پێشبینییەکان، کەشەکە تەواو بەهارەیە و پلەکانی گەرماش نزیکن لە تۆمارکراوەکانی دوێنێ.
لەبارەی کەشی سبەینێ شەممەوە، کەشناسی ئاماژەی بەوەکردوە، پلەکانی گەرما یەک بۆ دوو پلە بەرز دەبنەوە بەراورد بە تۆمارکراوەکانی ئەمڕۆ و پێشبینی باران بارین لە ناوچە شاخاوییەکان دەکرێت.
بەرزترین پلەکانی گەرمای پێشبینیکراو بۆ سبەینێ بەم شێوەیە؛
هەولێر: 24 پلەی سیلیزی
پیرمام: 23 پلەی سیلیزی
سۆران: 20 پلەی سیلیزی
حاجی ئۆمەران: 13 پلەی سیلیزی
سلێمانی: 23 پلەی سیلیزی
چەمچەماڵ: 26 پلەی سیلیزی
دهۆک: 25 پلەی سیلیزی
زاخۆ: 25 پلەی سیلیزی
هەڵەبجە: 27 پلەی سیلیزی
گەرمیان: 29 پلەی سیلیزی