هەواڵەکان
رۆژنامەی تەلەگرافی بەریتانی لە زاری لێپرسراوێکی باڵای ئێرانی ئاشکرای کردووە کە تاران بڕیاری داوە پاڵپشتی حوسییەکانی یەمەن رابگرێت. ئەم هەنگاوە لە هەوڵێکدایە بۆ دوورکەوتنەوە لە ڕووبەڕووبوونەوەی سەربازی لەگەڵ ئەمریکا.
بەپێی ڕاپۆرتی رۆژنامەکە، لێپرسراوە باڵاکەی ئێران راشیگەیاندووە کە تاران پێداچوونەوە بە سیاسەتەکانی خۆی بەرامبەر بە هێزە بریکارەکانی لە ناوچەکەدا دەکات و بڕیاری داوە هێزە سەربازییەکانی لە یەمەن بکشێنێتەوە.
سەرچاوەکەی تەلەگراف جەختی کردووەتەوە کە ئەم بڕیارەی تاران بە ئامانجی دوورکەوتنەوەیە لە روبەروبوونەوەی سەربازی لەگەڵ ئەمریکا، و لە ئێستادا سەرنجی راستەوخۆی لەسەر کەمکردنەوەی ئەو هەڕەشانەیە کە روبەروی بووەتەوە.
هاوکات، مەسعود پزیشکیان، سەرۆکی ئێران، لە پەیوەندییەکی تەلەفۆنیدا لەگەڵ محەمەد بن سەلمان، جێنشینی پاشای سعودیە، جەختی لەوە کردەوە کە وڵاتەکەی جەنگی لە ناوچەکە ناوێت و ئامادەیە بۆ گفتوگۆ و چارەسەرکردنی کێشەکان بە شێوەیەکی ئاشتیانە.
پزیشکیان هەروەها جەختی لەوە کردەوە کە ئێران مافی خۆیەتی سوود لە وزەی ئەتۆمی ئاشتی وەربگرێت و بەرگری لە بەرژەوەندییەکانی خۆیان دەکەن بەبێ ئەوەی ببێتە هۆکاری ناسەقامگیری لە ناوچەکەدا.
ئەمشەو پێنجشەممە، فڕۆکە جەنگییەکانی ئیسرائیل جارێکی دیکە هێرشیان کردە سەر سوریا و بۆ یەکەمجار لە دوای هاتنەسەر دەسەڵاتی ئەحمەد شەرع، فڕۆکەکانی ئیسرائیل راستەوخۆ چەند پێگەیەکی سوپای ئەو وڵاتەیان کردووەتە ئامانج.
تەلەڤیزیۆنی فەرمی سوریا، بێ ئەوەی زیانەکان ئاشکرا بکات، پشتڕاستی کردەوە کە هەریەکە لە فیرقەی 75 و 91ـی سوپای وڵاتەکە کراونەتە ئامانج و هێرشی چڕی ئاسمانی کراوەتە سەریان.
هەر ئەمڕۆ پێنجشەممە، ئیسرائیل کاتز، وەزیری بەرگری ئیسرائیل لە بەیاننامەیەکدا رایگەیاند: "بۆ بەرەنگاربوونەوەی مەترسییەکان و هەڕەشەکانی سەر ئاسایشی وڵاتەکەمان، هێزەکانی سوپای ئیسرائیل لە ناوچە پارێزراوەکانی ناوخۆی سوریادا دەمێننەوە و هەرکاتێک پێویست بکات، بە توندی وەڵامی هەر مەترسییەک دەدەینەوە."
شایانی باسە، ئەمە یەکەمجار نییە ئیسرائیل سوریا بۆردومان دەکات. لە رابردووشدا بەردەوام ئەو وڵاتەی کردووەتە ئامانج، بەتایبەت ئەو شوێنانەی کە گومانی هەبووە چەکی کیمیاییان تێدا هەڵگیراوە. لە هەندێک حاڵەتیشدا ناوچە مەدەنی و نیشتەجێبوونەکانیش پارێزراو نەبوون، کە ئەمەش بووەتە هۆی دروستبوونی کۆدەنگییەکی نێودەوڵەتی بۆ ئیدانەکردنی هێرشەکانی ئیسرائیل.
درەنگانێکی شەوی چوارشەممەش، فڕۆکەکانی ئیسرائیل گەورەترین فڕۆکەخانەی سەربازیی سوپای پێشووی سوریایان لە دەرعا کردە ئامانج و بەپێی راگەیاندنی دەسەڵاتدارانی شارەکە، لە ئەنجامی هێرشەکەدا زیاتر لە ٩ هاووڵاتی مەدەنی گیانیان لەدەستداوە.
هێزەكانی دژەتیرۆر ژمارەیەك تیرۆرستیان دەستگیر كرد كە خەڵكی پارێزگاكانی بەغداد و دیالەن و لە قەزای شارەزوور نیشتەجێبوون.
بەڕێوبەرایەتیی گشتیی دژەتیرۆر لە راگەیەندراوێكدا ئاماژەی بەوە كردووە، پاڵپشت بە زانیاری هەواڵگری ورد و بەدواداچوونی بەردەوامی تیمە تایبەتەكانیان، توانیویانە ژمارەیەك تیرۆرست لە چەند شوێنێكی جیاوازی سنووری قەزای شارەزوور دەستگیر بكەن.
دژەتیرۆر هێمای بۆ ئەوەش كردووە، دەستگیركراوەكان خەڵكی پارێزگاكانی بەغداد و دیالەبوون، كاری لۆجستی و دابینكردنی كەرەستەیان بۆ شانە نوستوو و چالاكەكانی تیرۆرستانی داعش كردووە، پاش ئاشكرابوونیان لەلایەن دەزگا ئەمنییەكانی عێراقەوە بەرەو هەرێمی كوردستان هەڵاتوون و لە سنووری شارەزوور نیشتەجێبوون.
هێڵی ئاسمانی ئیسرائیل (EL AL) رایگەیاند کە دوای نزیکەی شەش مانگ راوەستان، گەشتە ئاسمانییەکانی بۆ مۆسکۆ دەستپێدەکاتەوە.
ئەمڕۆ پێنجشەممە 3ـی نیسانی 2025، هێڵی ئاسمانی ئیسرائیل لە راگەیاندراوێکدا ئاشکرای کرد کە لە 1ـی ئایاری داهاتو گەشتە ئاسمانییەکانیان بۆ پایتەختی روسیا دەستپێدەکەنەوە، ئەوەش دوای ئەوەی کە کۆمپانیاکە دڵنیاییان لەبارەی پاراستنی ئاسمانی ئیسرائیلەوە پێدراوە.
بەپێی راگەیاندراوەکە، هێڵی ئاسمانی ئیسرائیل هەفتانە حەوت گەشتی ئاسمانی ئەنجام دەدات، واتە لە هەموو رۆژەکانی هەفتەدا گەشتی ئاسمانی نێوان تەلئەبیب و مۆسکۆ بەردەست دەبێت.
هەڵگیرانی گەشتە ئاسمانییەکان بۆ کۆتاییەکانی ساڵی 2024دەگەڕێتەوە، کاتێك فڕۆکەیەکی ئازەربایجانی لە ئاسمانی روسیا لەلایەن هێزەکانی ئەو وڵاتەوە تێکشکێنرا و بوە هۆی کوژرانی 38 کەس.
شایەنی باسە، بەهۆی شەڕی ئۆکراینەوە، ژمارەیەک وڵاتی ئەوروپی سزای ئابوریان بەسەر روسیادا سەپاند، بەمەش مۆسکۆ ئاسمانی وڵاتەکەی بەسەر 36وڵاتدا داخست کە 27یان وڵاتانی ئەوروپا بوون. بەڵام ئیسرائیل لە نێو لیستی وڵاتە قەدەغەکراوەکاندا نەبو، ئەگەرچی هاوپەیمانێکی نزیکی ئەمریکاشە.
بەڕێوەبەرایەتیی پاسپۆرتی پارێزگای سلێمانی رێنماییە نوێیەکانی تایبەت بە نۆرەگرتن و پێدانی پاسپۆرتی ئەلیکترۆنی بڵاوکردەوە.
ئەمڕۆ پێنجشەممە، بەڕێوەبەرایەتیی پاسپۆرتی پارێزگای سلێمانی لە راگەیەندراوێکدا ئاماژەی بەوە کردووە کە "نرخی تێچووی پاسپۆرت 91 هەزار دینارە گەر حجزی ئەلیکترۆنیت هەبێت، بەڵام ئەگەر حجزی ئەلەکترۆنیت نەبێت پێویستە 100 هەزار دینار رسوماتی زیادە بدەیت، لەگەڵ 91هەزار دینار تێچووی پاسپۆرتەکە، کۆی گشتی191هەزار دینار دەکات".
هەر لە راگەیەندراوەکەدا، بەڕێوەبەرایەتیی پاسپۆرت دوپاتی کردوەتەوە کە "باشترە حجزی ئەلیکترۆنی بکەیت، تاوەکو تەنها 91هەزار دینار بدەیت".
لەلایەکی دیکەوە، داوا لە هاوڵاتیان کراوە "بە گوێرەی کاتی دیاریکراوی خۆتان کە بە نامەی ئەلیکترۆنی بۆتان دیاریکراوە سەردانمان بکەن، واتە کاتژمێر و رێکەوتی حجزی ئەلەکترۆنییەکەت لە چ کات و رێکەوتێکدا بوو، ئەوا لەو کاتەدا سەردانمان بکەن، بۆ ئەوەی ئێمەش لە کاتی خۆیدا مامەڵەکانتان بۆ ڕایی بکەین".
لە کۆتاییدا، بەڕێوەبەرایەتی جەختی کردووەتەوە کە "تەنها کار بە کارتی نیشتمانی رەسەن (اصلي) دەکرێت، واتە کار بە (صورة قيد الكتروني)، پێناسی باری شارستانی، ڕەگەزنامەی عیراقی ناکرێ".
هەسەدە و سوپای نیشتمانی سوریا رێككەوتن لەسەر ئاڵوگۆڕكردنی دیلەكان و تەرمەكانی یەكتری ئەمڕۆش چووە بواری جێبەجێكردنەوە.
روانگەی سوریا بۆ مافەكانی مرۆڤ بڵاویكردەوە، هەسەدە 40 تەرمی شەڕڤانانی خۆی لە سوپای نیشتمانی وەرگرتووەتەوە و 25 تەرمی چەكدارەكانی ئەوانیشی ڕادەستكردووەتەوە كە چواریان تورك بوون و لە چەند هەفتەی رابردوودا لە بەنداوی تشرین و پردی قەرەقۆزاق كوژراون.
هەروەها ئاماژەی بەوەش كردووە، نزیكەی 250 زیندانی كە لەلایەن ئیدارەی نوێی سوریا و ئەنجوومەنی گەڕەكی شێخ مەقسوود و ئەشرەفیەوە ڕاگیرابون، ئاڵوگۆڕ كران، ئەمەش وەك جێبەجێكردنی ڕێككەوتنی سەرەتایی لەنێوان هەردوولا.
دۆناڵد ترەمپ سەرۆكی ئەمریكا، ئیمزای كرد لەسەر بەرزكردنەوەی پێناسی گومرگی بەسەر زیاتر لە 180 وڵاتدا ، لەنێویشیاندا عیراق، بەبێ ئەوەی هیچ كاریگەرییەك دروست بكات.
ترەمپ لە لێدوانێكدا وتی، ئەو وڵاتانە چەندین ساڵە ئابووری ئەمریكا لە بەرژەوەندی خۆیاندا بەكاردەهێنن.
زیادكردنی پێناسی گومرگی لەسەر ئەو وڵاتانە لە 10% وە دەستپێدەكات بۆ 49% كە بە وتەی پسپۆڕای ئابووری، بڕیارەكە كاریگەری نەرێنی بەرچاوی نەك تەنها لەسەر وڵاتانی دەرەكی، بەڵكو لەسەر بەكاربەری ئەمریكیش دەبێت، بەوپێیەی هاوڵاتیانی ئەمریكی ناچار دەبن باجی زیاتر بدەن بۆ بەدەستهێنانی هەمان كاڵا كە پێشتر بە نرخێكی كەمتر بەدەستیانهێناوە، بەوپێیەی كۆمپانیاكان ناچارن نرخەكان بەرزبكەنەوە.
كاریگەرییە چاوەڕوانكراوەكان لە بڕیارەكەی ترەمپ بریتین لە بەرزبوونەوەی نرخەكان، بەرزبوونەوەی ڕێژەی هەڵاوسان و ئەگەری داخستنی هەندێك كارگە لە ژمارەیەك وڵاتی ئامانجدار، لەوانەش كەنەدا و مەكسیك.
عیراق لەنێو ئەو 180 وڵاتەدایە كە ترەمپ پێناسی گومرگی لەسەر زیادكردووە بەرێژەی 39% بەبێ ئەوەی نەوت و غاز بگرێتەوە، لەكاتێكدا عیراق پێش چەندین ساڵ بە رێژەی 78% پێناسی گومرگی لەسەر كاڵای ئەمریكی سەپاند بوو.
نەبیل مەرسومی شارەزای بواری ئابووری پێیوایە، لەبەرئەوەی هەناردەی عیراق بۆ ئەمریكا زۆر سنووردارە و ساڵانە نزیكەی 500 ملیۆن دۆلارە، بڕیارەكەی ئەمریكا كاریگەرییەكی كەمی دەبێت.
دوابەدوای بڕیارەكەی ئەمریكا، نرخی نەوت بەرێژەی 6% دابەزینی بەخۆیەوە بینی، بەڵام هۆكارەكەی بۆ بڕیارێكی ئۆپێك پڵەس دەگەڕێتەوە كە بڕیاریدا لە مانگی ئایارەوە تا مانگی ئاب، ئاستی بەرهەمهێنان بۆ 411 هەزار بەرمیل لە رۆژێكدا زیاد بكات، لەكاتێكدا ترسی دابەزینی خواست لەسەر نەوت لەدوای بڕیارەكەی ترەمپەوە لەزیادبووندایە.
ئەمریكا و یەكێتی ئەوروپا گەورەترین پەیوەندی بازرگانییان لەنێواندا هەیەو لە ساڵی 2023دا گەیشتووەتە یەك ترلیۆن و 700 ملیار دۆلار كە 30% بازرگانی جیهانی پێكدەهێنێت.
چاودێران پێانوایە ترەمپ ستراتیژی دانوستانی گومرگی بۆ وڵاتانی عەرەبی فراوان بكات ئەگەر بەردەوام بن لە ڕەتكردنەوەی داواكارییەكانیی بۆ نیشتەجێكردنی پەنابەرانی فەلەستینی پێش ئەوەی دەست بە هەوڵەكانی پاككردنەوەی غەززە بكات.
نیوەڕۆی ئەمڕۆ، بەهۆی ناکۆکییەکی سادە لەسەر "سەگێک" لە گوندی دووسەرەی ناحیەی شەمامکی سەر بە هەولێر، هاووڵاتییەک کوژرا.
بەپێی زانیارییەکانی پەیامنێری کوردسات نیوز:، "ئیسماعیل قساب" دوای دەمەقاڵێیەک لەگەڵ دراوسێکەی کە پێشتر سەگی خێزانەکەیانی بردبوو، بە فیشەک کوژرا.
شایەتحاڵەکان دەگێڕنەوە کە شەوی پێشتر، بکوژەکە بەبێ ئاگاداری بنەماڵەی "ئیسماعیل" سەگەکەیانی بردووە. کاتێک "ئیسماعیل" بەیانی سەگەکەی خۆیانی هێناوەتەوە، ناکۆکی لەنێوانیان دروست بووە و دواتر پەرەی سەندوە.
لە پاش تەقەکردن و بریندارکردنی رەوانەی نەخۆشخانەی رۆژئاوا کرا، بەڵام بەهۆی قورسی برینەکەیەوە گیانی لەدەستدا.
وێنەی ئیسماعیل قەساب کە لەلایەن دراوسێیەکیانەوە کوژرا
مارکۆ روبیۆ، وەزیری دەرەوەی ئەمەریکا، دەنگۆی کشانەوەی وڵاتەکەی لە هاوپەیمانیی ناتۆ رەت کردەوە و داواشی لە ئەندامانی هاوپەیمانییەکە کرد بودجەی گشتیی بەرگریان بە رێژەی ٪5 بەرز بکەنەوە.
لە سەردانەکەی بۆ برۆکسل، روبیۆ رایگەیاند کە "نیگەرانی و دڵەڕاوکێی میدیا ناوخۆییەکان لەبارەی کشانەوەی هێزەکانی ئەمەریکا لە ناتۆ زۆر بێبنەمان و زیاد لە پێویست گەورە کراون".
ناوبراو جەختی کردەوە کە دۆناڵد ترەمپ، سەرۆکی ئەمرریکا، بە ئاشکرا پابەندبونی خۆی بە ناتۆ دەربڕیوە و "بە هیچ شێوەیەک لە دژی ئەو هاوپەیمانییە نییە، بەڵکوو دژی ئەو ئەندامانەیە کە پابەندی یاساکان نابن".
مارک روتە، سکرتێری گشتیی ناتۆ ئاماژەی بەوەدا کە لە چەند مانگی رابردودا "سەدان ملیار یۆرۆ بۆ بودجەی هاوپەیمانییەکە زیاد کراوە، ئەمەش بۆ یەکەم جارە دوای جەنگی سارد بودجەی ناتۆ بۆ ئەو ئاستە بەرز بێتەوە".
وەزیری بەرگری ئەمەریکا جەختی کردەوە کە "دەبێت هەموو ئەندامانی هاوپەیمانی ناتۆ پابەندی بەڵێنەکانیان بن" و رونیشی کردەوە کە ئەم کارە "رێڕەوێکی دروست و درێژی دەوێت" و لە ماوەی ساڵێک یان دوو ساڵدا ناکرێت.
ترەمپ لە گوتارێکی دوێنێ شەودا، ڕەخنەی لە وڵاتە هاوپەیمانەکانی ئەمەریکا گرت و گوتی "هەندێکجار دۆستەکانمان لە دوژمنەکانمان خراپترن".
ئەندامانی ئۆپیك پڵەس پابەندی خۆیان بە پەیرەوكردنی زیادكردنی بەرهەمهێنانی نەوت لە مانگی پێنج دا دوپاتكردەوە و رایانگەیاند ئەو بڕیارە بۆ پاراستنی سەقامگیری بازاڕە.
هەشت ئەندامی ئۆپیك پڵەس بریاریاندا بۆ ماوەی سێ مانگ لەمانگی پێنجەوە دەستبكەن بە زیادكردنی بەرهەمهێنانی نەوت بە بڕی 411 هەزار بەرمیل رۆژانە و هۆكاری ئەم بریارەشیان بۆ ئەوە گەراندەوە كە پێشبینییەكان بۆ خواستی جیهانی لەسەر نەوت لە ئاستێكی باشدایە.
ئەم بریارە بووەهۆی دابەزاندنی نرخی نەوت بەرێژەی %5 و نرخی بەرمیلێك نەوتی خاوی برێنت بۆ خوار 70 دۆلار و نەوتی خاوی تەكساسی بۆ خوار 67 دۆلار دابەزین.
ئەم دابەزینەی نرخی نەوت هاوكاتە لەگەڵ بریارەكەی دۆناڵد ترەمپ بۆ سەپاندنی باجی گومرگی بەسەر 180 وڵاتدا , بەڵام بەپێی ئاژانسی تاقە باجەكان كەرتی نەوت و غاز ناگرێتەوە.
هاوكات بەپێی داتاكان نەوتی كۆگاكانی ئەمریكا لە هەفتەی رابردوودا بەبڕی 6.2 ملیۆن بەرمیل بەرزبوونەوەی تۆماركردبوو ئەوەش هۆكارێكی تری دابەزینی نرخی نەوتە.
رێكخراوێك ئاشكرای دەكات توركیا لە دوای پەیامەكەی ئۆجەلان, هێرشەكانی لە هەرێمی كوردستان بەشێوەیەكی بەرچاو زیادی كردوە.
بە پێی راپۆتی رێکخراوی سی پی تی CPTـی ئەمریکی لە هەرێمی كوردستان، سوپای توركیا تەنها لە مانگی رابردودا 118 هێرشی لە هەرێمی كوردستان ئەنجام داوە.
رێکخراوی سی پی تی رونی كردوەتەوە كە دو هەفتە پێش پەیاماكەی عەبدوڵا ئۆجەلان، رێبەری بەندكراوی پارتی كرێكارانی كوردستان پەكەكە، هێرشەكانی سوپای توركیا 145٪ بەراورد بە رابردو زیادی كردوە بەڵام لە دوای پەیامەكە هێرشەكانی ئەو سوپایەی بەراورد بە مانگی شوبات تەنها 12 بۆ 21٪ كەمی كردوە.
هێزەكانی پاراستنی هەپەگە رایگەیاندوە لە دوای ئاگربەستی پەكەكە زیاتر لە 11 هێرش كراوەتە سەر ناوچەكانی گەریلا.
نرخی ئەمپێری کارەبای موەلیدە بۆ مانگی سێ لە هەولێر دیاری کرا و بەپێی کارکردنی موەلیدە لە گەڕەکەکاندا نرخی یەک ئەمپێر لەنێوان سێ هەزار بۆ 12 هەزار و 500 دیناردایە.
خۆران خۆرانی سەرۆکی ئەنجومەنی موەلیدە ئەهلییەکانی سنوری پارێزگای هەولێر رایگەیاند، بۆ مانگی رابردوو نرخی موەلیدە بەپێی نرخی گازوایل لە بازاڕەکاندا بۆناو شاری هەولێر دیاری کراوە و بڕیارە رۆژی یەکشەممەی داهاتوو نرخەکەی لە دەرەویە شارەکانیدا دیاری بکرێت.
ئەوەش هاتووە، مانگی رابردوو موەلیدەکان رۆژانە بە تێکڕا نزیکەی حەوت سەعات و نیو کاریان کردووە و نرخی یەک لیتر گازوایل بە 530 دینار دیاری کراوە، بەوەش بۆ هەر کاتژمێرێک 43 دینار و نیو دەکەوێت.
نرخی موەلیدەکان بەم جۆرەیە:
-نرخی یەک ئەمپێر لەناو شاری هەولێر لەنێوان سێ هەزار بۆ 12 هەزار و 500 دیناردایە، ئەوەش بەپێی کاتژمێرەکانی کارکردنی موەلیدە لە گەڕەکەکاندا دەگۆڕێت.
- نرخی یەک ئەمپێر لە ناوبازاڕی شاری هەولێر لەنێوان سێ هەزار بۆ چوار هەزار و 500 دیناردایە.
وەزیری بەرگری ئیسرائیل نامەیەکی هەڕەشەئامێزی بۆ ئەحمەد شەرعی سەرۆکی ئەم قۆناغەی سوریا ناردووە و دەڵێت، سوریا باجێکی قورس دەدات ئەگەر رێگە بدات ئەو هێزانەی دژ بە ئیسرائیلن بچنە ناو خاکەکەیەوە.
یسرائیک کاتس وەزیری بەرگری ئیسرائیل ناوی ئەحمەد شەرعی بە ئەبو محەمەد جۆلانی هێناوە لە نامەکەیدا و دەڵێت، ئیسرائیل لە چەند ناوچەیەکی سوریادا دەمێنێتەوە و هەنگاو دەنێت بۆ بەرپەرچدانەوەی ئەو هەڕەشانەی رووبەڕووی وڵاتەکەی دەبێتەوە.
ئاماژەی بەوەشکردووە، هێرشە ئاسمانییەکانی شەوی رابردوو نامەیەکی روون بوو و ئاگادارکردنەوەیەک بوو بۆ داهاتوو، دەشڵێت، "رێگە بە هیچ زیانێک نادەین کە پەیوەست بێت بە ئاسایشی ئیسرائیلەوە".
شەوی رابردوو فڕۆکە جەنگییەکانی ئیسرائیل بۆردومانی چەند ناوچەیەکیان کرد لە هەریەک لە حەمما و دیمەشق، کە لە یەک کاتدا ناوەندێکی توێژینەوەی زانستی و فڕۆکەخانەی حەمایان کردە ئامانج، کەبەپێی دوایین ئامارەکان نۆ کەس بەهۆی هێرشەکانەوە کوژراون.
وەزارەتی کارەبای هەرێم رایگەیاند، بە هاوبەشی وەزارەتی سامانە سروشتییەکان هەماهەنگی لەگەڵ کۆمپانیای دانەغآزدا دەکەن بەمەبەستی ئەوەی هاوینی ئەمساڵ پێدانی کارەباینیشتمانی بە هاووڵاتیان زیاتر بکەن.
لە راگەیەنراوێکی هاوبەشی وەزارەتی کارەبا و سامانە سروشتییەکاندا هاتووە، بە مەبەستی ئامادەکاری بۆ هاتنی وەزی هاوینی ئەمساڵ، کۆمپانیای دانە غاز هەڵدەستێت بە ئەنجامدانی پڕۆسەی سازدانەوە و چاکسازی لە کێڵگەی کۆڕمۆر.
ئەوەش هاتووە، "ئەم پرۆسەیە لە کاتژمێر 12ـی ئەمشەوەوە دەستپێدەکات و ماوەی سێ هەفتە دەخایەنێت".
لە راگەیەنراوەکەدا ئاماژە بەوەشکراوە، هەریەک لە وەزارەتی کارەبا و وەزارەتی سامانە سروشتیەکان و کۆمپانیای دانە غاز هەماهەنگی نزیکیان دەبێت بۆ ئەوەی پڕۆسەکە بەشێوەیەکی سەرکەوتوو ئەنجام بدرێت.
ئەوەش خراوەتە روو، چاوەڕواندەکرێت لەڕێگەی ئەنجامدانی ئەم پڕۆسەیەوە ئاستی خزمەتگوزاری کارەبا لە وەرزی هاویندا بەشێوەیەکی بەرچاو بەرز ببێتەوە.
ئەوەش لەکاتێکدایە، حکومەتی هەرێم لەژێر ناوی پرۆژەی رووناکیدا دەستی کردووە بە گۆڕینی سیستمی پێدانی کارەبای نیشتمانی بەشیوەی 24 کاتژمێری و دەڵێت، دەبێت تاوەکو کۆتایی ساڵی داهاتوو، پرۆژەکە تەواوی هەرێمی کوردستانی گرتبێتەوە.
کەشناسیی هەرێم پێشبینییەکانی کەشوهەوای ئەمڕۆ و سبەینێی بڵاوکردەوە و ئاماژەی بەوەکرد، پلەکانی گەرما نزمتر دەبنەوە.
کەشناسیی هەرێم رایگەیاند، ئەمڕۆ پێنجشەممە، ئاسمان بەگشتى نیمچەهەور دەبێت و خێراى با کەمێک زیاد دەکات و هەندێک جار دەگاتە 25 کیلۆمەتر لە سەعاتێکدا.
ئەوەش هاتووە، سبەینێ هەینی، ئاسمان ساماڵ بۆ نیمچەهەور دەبێت و لە کاتەکانی شەودا دەگۆڕێت بۆ هەوری تەواو.
بەپێی پێشبینییەکانی کەشناسی، ئەمڕۆ پلەکانی گەرما 1 بۆ 3 پلەی سیلیزی دادەبەزن و سبەینێش هاوشێوەی ئەمڕۆ دەبن.
بەرزترین پلەکانی گەرمای پێشبینیکراو بە پلەی سیلیزی:
هەولێر: 26 پلەی سیلیزی
سلێمانی: 22پلەی سیلیزی
دهۆک: 22 پلەی سیلیزی
کەرکوک: 29 پلەی سیلیزی
زاخۆ: 22 پلەی سیلیزی
هەڵەبجە: 20 پلەی سیلیزی
سۆران: 23 پلەی سیلیزی
حاجی ئۆمەران: 14 پلەی سیلیزی
گەرمیان:28 پلەی سیلیزی
كۆمپانیای دانەغازی ئیماراتی رایگەیاند، بەرهەمهێنانی رۆژانەی غازی سروشتی لە كیڵگەی كۆرمۆر بۆ زیاتر لە 500 ملیۆن پێ سێجا بەرزبووەتەوە .
كۆمپانیای داناغازی ئیماراتی لەگەڵ هاوبەشەكەی كرێسێنت پترۆلیۆم راگەیەنراوێكی هاوبەشیان بڵاوكردەوە كە تێیدا ئاماژە بۆ ئەوە كراوە، بەرهەمی رۆژانەی كێڵگەی كۆرمۆر لە سەرەتای مانگی ئازاری ئەمساڵەوە گەیشتووەتە 525 ملیۆن پێ سێجا ستانداردی غازی سروشتی، كە هاوتای 500 بەرمیل نەوتی خاوە.
باسی لەوەشکردووە، بەراورد بە ساڵی 2017 بەرێژەی 75% بەرهەمهێنانی غاز شل رۆژانە زیادیكردووە. وتیشی، رۆژانە 10 هەزار و 70 تۆن غازی شل "ئێڵ پی جی" بەرهەمدەهێن، ئەوەشیان بە دەستكەوتێكی گرنگ وەسف کردووە و جەختی لەوەکردووەتەوە، لە هەوڵەكانیان بەردەوام دەبن بۆ بەرزتركردنەوەی ئەو ئاستە .
هەر بەپێی راگەیەنراوەكەی دانە غاز، كێڵگەی غازی كۆرمۆر رۆژانە 75% پێداویستی بەرهەمهێنانی كارەبا لە هەرێمی كوردستان پڕدەكاتەوە، بەمەش زیاتر لە شەش ملیۆن عێراقی لە هەرێم و پارێزگاكانی دیكەی عێراق سوودمەند دەبن.
ئاماژەیان بەوەشكردووە، داهاتی وەبەرهێنانەكانیان لە هەرێمی كوردستان گەیشتووەتە سێ ملیار و 500 ملیۆن دۆلاری ئەمریكی، ئەوەش یارمەتیدەر بووە لە رەخساندنی 20 هەزار هەلی كار لە هەرێم بەشێوەی راستەوخۆ و ناراستەخۆ.