عیراق
شاناز ئیبراهیم ئەحمەد خانمی یەکەمی عیراق سەردانی پارێزگای سلێمانی کرد و لەلایەن د. هەڤاڵ ئەبوبەکر پارێزگاری سلێمانییەوە پێشوازی لێکرا.
لە راگەیەندراوێکیشدا کە پارێزگای سلێمانی بڵاویکردووەتەوە، تێیدا هاتووە، "د.هەڤاڵ ئەبوبەکر پارێزگاری سلێمانی، لە دیوانی پارێزگادا، پێشوازیکرد لە شاناز ئیبراهیم ئەحمەد خانمی یەکەمی عیراقی فیدراڵ، دواتر لەسەر دەستپێشخەریی و پێشنیازی کۆمپانیای ئەندازیاریی ڤیو پایۆنێر، کە بایەخ بە شوێنەوارو کولتور دەدات، کۆبوونەوەیەکی تایبەت بە دروستکردنەوەی پردی کۆنی شوێنەواریی قلیاسان کرا".
ئاماژە بەوەشدراوە، "لە کۆبوونەوەکەدا جێگری پارێزگاری سلێمانی بۆ کاروباری کارگێڕی و بەڕێوەبەری گشتی گەشتوگوزاری پارێزگای سلێمانی و بەڕێوەبەری شوێنەواری پارێزگای سلێمانی ئامادەی بوون، رێکاری پێویست دیاری کراو بە مەیدانیی شوێنی پردە کۆنەکەی قلیاسان بەسەرکرایەوەو وابڕیارە لە ئایندەیەکی نزیکدا دەست بە دروستکردنەوەی بکرێت".
سەرۆک كۆماری عیراق پیرۆزبایی لە دۆناڵد ترەمپ دەكات بەبۆنەی دەستبەكاربوونی وەكو سەرۆكی نوێی ئەمریكا.
د. لەتیف رەشید سەرۆک كۆماری عیراق پەیامێكی پیرۆزبایی ئاڕاستەی دۆناڵد ترەمپ سەرۆكی نوێی ئەمریكا كرد، لە پەیامەكەیدا هیوای سەركەوتنی بۆ خواستووە لە ئەركەكانیدا.
هاوكات سەرۆك كۆمار پشتیوانی خۆی بۆ بەرقەراركردنی ئاسایش و سەقامگیری لە ناوچەكە و جیهان و پتەوكردنی پەیوەندییە دوو قۆڵییەكانی نێوانیان دووپاتكردووەتەوە، وەك دوو وڵاتی دۆست بە شێوەیەك كە بەرژەوەندی هاوبەشی ئەو دوو گەلە بەدەست بهێنن لەگەڵ پەرەپێدانی پەیوەندییەكانیان.
چوارچێوەی هەماهەنگی شیعەكان جەخت لەسەر گرنگی یەكلاكردنەوەی یاسا گرنگەكان دەكاتەوە لە ئەنجومەنی نوێنەران بەتایبەت هەمواری یاسای بودجە و باری شارستانی .
چوارچێوەی هەماهەنگی لە راگەیەندراوێكدا بڵاویكردۆتەوە ، بە ئامادەبونی محەمەد شیاع سودانی سەرۆك وەزیرانی عیراق ، سەركردەكانی چوارچێوەكە لە نوسینگەی هومام حەمودی كۆبونەتەوە و كۆمەڵێك دۆسیەی ناوخۆیی و نێودەوڵەتیان تاوتوێكردوە .
سەرجەم سەركردەكانی چوارچێوەكە جەختیان لە گرنگیی یەكلاكردنەوەی یاسا گرنگەكان كردۆتەوە لە ئەنجومەنی نوێنەران بەتایبەت هەمواری بودحە و یاسای ناسنامەی كەسێتی ، هەروەها باس لە كاری ئەنجومەنی پارێزگاكان كراوە بۆ پێشكەشكردنی خزمەتگوزاری بە پارێزگاكان و داوایانكردوە پشتگیری تەواوی سەرجەم پارێزگارەكان بكرێت بۆ ئەنجامدانی كارەكانیان .
ئەمڕۆ ئەنجومەنی نوێنەرانی عیراق لەسەر چوار پرۆژەیاسای مشتومڕهەڵگر كۆدەبێتەوە، كە دووانیان تایبەتن بە هەرێمی كوردستان و گەلی كورد.
بەگوێرەی كارنامەی كۆبوونەوەكان، ئەمڕۆ ئەنجومەنی نوێنەرانی عیراق كۆدەبێتەوە و كۆبوونەوەكەش لە 10 بڕگە پێكهاتووە. چوار بڕگەی یەكەمی كۆبوونەوەكە، تایبەتكراوە بە دەنگدان بە چوار پرۆژەیاسای مشتومڕهەڵگر بە جیا. یەكەم هەمواری یاسای بوودجە تایبەت بە هەناردەی نەوتی هەرێم. دووەم، هەمواری یاسای باری كەسێتی. سێیەم، هەمواری یاسای لێبووردنی گشتی. چوارەم، پرۆژەیاسای گەڕاندنەوەی زەوی بۆ خاوەنەكانیان.
خاوەندارێتی پرۆژەیاساكان بەجۆرێكە، هەمواری یاسای لێبوردنی گشتی تایبەت بە پێكهاتەی سوننە و هەمواری یاسای باری كەسێتی تایبەتە بە پێكهاتەی شیعە، هەروەها هەمواری یاسای بوودجە تایبەت بە نەوتی هەرێم و گەڕاندنەوەی زەوی بۆ خاوەنەكانیان لە كەركوك، تایبەتن بە گەلی كورد.
ئەوەش لەكاتێكدایە، تائێستا هیچ رێككەوتنێكی سیاسی گشتگیر بۆ تێپەڕاندنی ئەو پرۆژەیاسایانە لە ئەنجومەنی نوێنەران نەكراوە و بەوهۆیەشەوە لە رابردوودا بەجیا پرۆژەیاساكان چەند جارێك خراونەتە دەنگدانەوە، بەڵام پەسەند نەكراون.
دوای ئەوەی ئەنجومەنی نوێنەرانی عیراق دەنگیدا لەسەر درێژکردنەوەی کارەکانی کۆمیسیۆنی باڵای سەربەخۆی هەڵبژاردنەکان، سەرۆک وەزیرانی عیراق پشتیوانی خۆی بۆ کۆمیسیۆنەکە دووپاتدەکاتەوە.
نووسینگەی راگەیاندنی سەرۆک وەزیرانی عێراق لە راگەیەندراوێکدا بڵاویکردۆتەوە : ئەمڕۆ محەمەد شیاع سودانی، سەرپەرشتی کۆبوونەوەیەکی کرد کە سەرۆکی دەستەی کۆمیسیارانی کۆمسیۆنی باڵای سەربەخۆی هەڵبژاردنەکان و ئەندامانی ئامادەیبوون، سودانی لە سەرەتای کۆبوونەوەکەدا دەستخۆشی لە کۆمسیۆنی هەڵبژاردنەکان کرد بۆ درێژکردنەوەی کارەکانی دوای ئەوەی ئەنجومەنی نوێنەران دەنگی پێدا.
ئاماژەی بەوەشکرد، سودانی کۆمیسیۆنی راسپاردووە، ئامادەکاری و ڕێکخستن و پێویستییەکان ئامادە بکەن بۆ ئەنجامدانی هەڵبژاردنی گشتی ئەنجومەنی نوێنەرانی عیراق کە بڕیارە ئەنجامبدرێت.
سەرۆک وەزیرانی عیراق، وەزارەتی دارایی ئاگادارکردۆتەوە پێداویستیەکانی کۆمسیۆن دابین بکات، بۆ ئامادەکردنی بودجە و ڕێکخستنی پرۆسەی هەڵبژاردن، جەختیشی کردەوە تەواوی حکومەت پاڵپشتی لە کارەکانی کۆمسیۆن دەکات بە هەموو توانایەکی، بۆ دڵنیابوون لە ئەنجامدانی هەڵبژاردنێکی پاک و بێگەرد.
د.لەتیف رەشید سەرۆك كۆماری عیراق بۆ بەشداریكردن لە كۆڕبەندی ئابووری جیهانی لە داڤۆس گەیشتە سویسرا.
لە میانی کۆنفرانسەکەدا سەرۆک کۆمار، لەگەڵ ژمارەیەک لە سەرکردەکانی جیهان و سەرۆکی دامەزراوە ئابوورییە جیهانییەکان کۆدەبێتەوە، بۆ تاوتوێکردنی بابەتەکانی جێی بایەخی هاوبەش و پەرەپێدانی میکانیزمی پەیوەندییەکانی نێوان عێراق و وڵاتانی جیهان و چەسپاندنی بناغەکانی پەیوەندیی ئابووریی دووقۆڵی، تا ببێتە مایەی پەرەپێدانی ژێرخانی وڵات و ئاستی ئابووری نیشتمانی بەرز بکاتەوە.
كۆڕبەندی ئابووری جیهانی لە داڤۆس بە ناونیشانی "هاوكاری بۆ سەردەمی زیرەك"، 20ی ئەم مانگە دەستپێدەكات و چوار رۆژ بەردەوام دەبێت و نزیكەی سێ هەزار سەركردە لە 130 وڵاتی جیاواز و 350 سەرۆكی حكومەت بەڕێوەدەچێت، گفتوگۆكانی كۆڕبەندەكەش لە چوارچێوەی پێنج تەوەردا دەبن، كە بریتین لە پاراستنی سەرچاوەكانی گەشەكردن و پیشەسازیی لەسەردەمی زیرەك و وەبەرهێنان و گۆڕانكارییە جیۆئابوورییەكان، لەگەڵ پاراستنی هەسارە و بنیادنانەوەی متمانە لە جیهانێكی ئاڵۆز و خێرادا.
کۆڕبەندی داڤۆس، ئەمساڵ دەوری 55ی کۆڕبەندەکەیە، و لە ساڵی 1971وە لەسەر دەستی ئابووری ناسێکی ئەڵمانی بە ناوی کڵاوس شواپ دەستی پێکردووە.
ئەنجومەنی نوێنەرانی عیراق دەنگدانی بە هەمواری یاسای بودجە بۆ كاتێكی نادیار دواخست
دانیشتنی ئەنجومەنی نوێنەرانی عیراق هەڵگیرا و بڕگەی دەنگدان بە هەمواری یاسای بودجەش بۆ كاتێكی نادیار دواخرا.
كۆبوونەوەی ئەنجومەنی نوێنەرانی عیراق بۆ دەنگدان بە هەمواری یاسای بودجەی عیراق بەڕێوەچوو، بەڵام بەهۆی تەواونەبوونی رێژەی یاسایی لەكاتی دەنگدان لەسەر ئەو بڕگەیە، سەرۆكی ئەنجومەنی نوێنەران بڕگەی هەمواری بودجەی بۆ كاتێكی نادیار دواخست.
هەر لە دانیشتنەكەی ئەنجومەنی نوێنەراندا دەنگ درا بە پڕۆژەیاسای دەزگای هەواڵگری نیشتیمانی و خوێندنەوەی یەكەمیش كرا بۆ پرۆژەیاساكانی رێكخستنی كرێی خزمەتگوزارییەكان لە فەرمانگەكانی دەوڵەت و پێشنیازە یاسای هەمواری یەكەمی یاسای دەستەی گشتیی چاودێریی داهاتە فیدراڵییەكان.
هەر بەپێی كارنامەی كۆبوونەوەكان، رۆژی سێشەممەی داهاتوو ئەنجومەنی نوێنەران كۆدەبێتەوە، بەڵام هەمواری یاسای گشتی بودجەی عیراق لە كارنامەكەدا نییە.
سەرۆك كۆماری عیراق بە مەبەستی بەشداریكردن لە كۆڕبەندی ئابووری جیهانی لە داڤۆس، سەردانی سویسرا دەكات.
سەرۆكایەتی كۆماری عیراق بڵاویكردەوە، د.لەتیف رەشید سەرۆك كۆماری عیراق سبەینێ بەرەو سویسرا بەڕێدەكەوێت بۆ بەشداریكردن لە كۆڕبەندی ئابووری جیهانی لە داڤۆس.
كۆڕبەندی ئابووری جیهانی لە داڤۆس بە ناونیشانی "هاوكاری بۆ سەردەمی زیرەك"، 20ی ئەم مانگە دەستپێدەكات و چوار رۆژ بەردەوام دەبێت و نزیكەی سێ هەزار سەركردە لە 130 وڵاتی جیاواز و 350 سەرۆكی حكومەت بەڕێوەدەچێت، گفتوگۆكانی كۆڕبەندەكەش لە چوارچێوەی پێنج تەوەردا دەبن، كە بریتین لە پاراستنی سەرچاوەكانی گەشەكردن و پیشەسازیی لەسەردەمی زیرەك و وەبەرهێنان لە خەڵك و گۆڕانكارییە جیۆئابوورییەكان، لەگەڵ پاراستنی هەسارە و بنیادنانەوەی متمانە لە جیهانێكی ئاڵۆز و خێرادا.
ئەمڕۆ لە کۆشکی بەغدا، دکتۆر لەتیف رەشید سەرۆک کۆماری عیراق پێشوازی لە باڵیۆزی ئێران کرد و باسیان لە پەیوەندییە دووقۆڵییەکانی هەردوو لا و هەوڵەکان بۆ بەهێزکردنی ئاشتی و ئاسایشی نێودەوڵەتی کرد.
ئەمڕۆ یەکشەممە، دکتۆر لەتیف رەشید سەرۆک کۆماری عیراق لە کۆشکی بەغدا لەگەڵ محەمەد کازم ئالسادق باڵیۆزی کۆماری ئیسلامی ئێران لە عێراق کۆبووەوە و لە دیدارەکەدا پەرەسەندنەکان لەسەر ئاستی ناوچەکە و جیهان و هەوڵەکان بۆ بەهێزکردنی ئاشتی و ئاسایشی نێودەوڵەتی تاوتوێ کران.
لە راگەیەنراوێکدا لەبارەی کۆبوونەوەکەوە ئەوە هاتووە، لە کۆبوونەوەیاندا سەرۆک کۆمار دووپاتی لە گرنگی پەیوەندییە دووقۆڵییەکانی نێوان هەردوو وڵات و هاوکاری و هەماهەنگی هاوبەش بەمەبەستی بەدیهێنانی سەقامگیری و ئاشتی ناوچەکە کردەوە، هاوکات، ئاماژەی بە گرنگی بەردەوامی هەوڵە نێودەوڵەتییەکان کرد بۆ سەرخستنی زمانی دیالۆگ و ئارامی و دوورکەوتنەوە لە هەر کاریگەرییەکی نەرێنی لەسەر ئاسایش و سەقامگیریی ناوچەکە.
ئاماژە بەوەشکراوە، لەبەرامبەردا باڵیۆزی ئێران، جەختی لەپشتیوانی وڵاتەکەی بۆ هەوڵەکانی عێراق بۆ پاراستنی ئاسایش و سەقامگیری و گرنگی پەرەپێدانی پەیوەندییەکان لە خزمەتی بەرژەوەندیە هاوبەشەکاندا کردەوە.
ژمارەیەك ئەندامی ئەنجومەنی نوێنەرانی عیراق، پرۆژەیاسایەك پێشكەش بە سەرۆكایەتی ئەنجومەن دەكەن و تیایدا داوای پێدانی تایبەتمەندی و دەستكەوتی دارایی بەو كەسانە دەكەن كە بەشداری لە هەڵبژاردن دەكەن.
لە پرۆژەیاساكەدا هاتووە، ئەو كەسانەی دەنگ دەدەن و دانەمەزراون، لە كاتی دامەزراندندا لە پێشینەی ئەو كەسانە بن كە ناویان بۆ دامەزراندن دەگەڕێتەوە لە دامودەزگاكانی حكومەتدا.
هەر هاووڵاتییەكیش كە لە كەرتی تایبەت كار دەكات و بەشداری لە هەڵبژاردن دەكات، تاكو بڕی یەك ملیۆن دینار لێخۆشبوونی لە باج بۆ بكرێت.
بەشێكی دیكەی پڕۆژە یاساكە باس لەوەدەكات، ئەو ئەفسەر و پۆلیسانەی پڕۆسەی هەڵبژاردن بەڕێوەدەبەن، خزمەتی 6 مانگ بخرێتە سەر كۆی خزمەتیان لەو دامەزراوەی كە كاری تێدا دەكەن.
ئامانج لەم پڕۆژەیاسایە ئەوەیە، رێژەی بەشداری دەنگدەران بەرز بكرێتەوە، بەو پێیەی لە هەڵبژاردنی ساڵی 2021 دا رێژەی بەشداریكردن لە هەڵبژاردنی پەرلەمانی عیراق بۆ نزیكەی لە 41% دابەزیوە.
سبەینێ دانیشتنی ئەنجومەنی نوێنەران، بۆ دەنگدان لەسەر هەمواری یاسای بودجە تایبەت بە هەناردەی نەوتی هەرێم بەڕێوەدەچێت و سەرۆكی لیژنەی داراییش دەڵێت، ئامانج لە هەموارەكە كۆنتڕۆڵكردنی هەناردەی نەوتی هەرێمە لەلایەن حكومەتی فیدراڵەوە.
بەگوێرەی كارنامەی دانیشتنەكە، بڕیارە سبەینێ سەعات 1ـی دوانیوەڕۆ دانیشتنی ئەنجومەنی نوێنەران بەڕێوەبچێت و یەكەم بڕگەی دانیشتنەكەش، دەنگدانە لەسەر هەمواری بڕگەی12ـی یاسای بودجە تایبەت بە هەناردەی نەوتی هەرێم، كە تیایدا تێچووی بەرهەمهێنانی نەوت لە هەرێم، لە شەش دۆلارەوە بۆ 16 دۆلار زیادكراوە.
لەوبارەیەوە، عەتوان عەتوانی سەرۆكی لیژنەی دارایی رایگەیاند، هەموارەكە سەرەتایەك دەبێت بۆ بنیادنانی پەیوەندییەكی یاسایی لەنێوان بەغداد و هەولێر و هاوكاریكردنی هەرێم لە ئیدارەدانی كەرتی وزەدا.
وتیشی، ئامانج لە هەموارەكە كۆنتڕۆڵكردنی هەناردەی نەوتی هەرێمە لەلایەن حكومەتی فیدراڵەوە.
هاوكات، موختار مەحمود، ئەندامی ئەنجومەنی نوێنەران لە هاوپەیمانی فەتح دەڵێت، ناكۆكی قوڵی سیاسی لەسەر هەمواری یاسای بودجە هەیە و بەشێك لە ئەندامانی ئەنجومەنی نوێنەران دژی هەموارەكەن، بەوپێیەش ئەستەمە سبەینێ بخرێتە دەنگدانەوە و پەسەند بكرێت.
دەشڵێت، رەنگە سبەینێ بەشێك لە پەرلەمانتارەكان بایكۆتی دانیشتنەكە بكەن و رێژەی یاسایی دانیشتنەكە تەواو نەكرێت.
د.لەتیف رەشید سەرۆک کۆماری عیراق، ئەمڕۆ شەممە 18-1-2025، لە چوارچێوەی سەردانەکەیدا بۆ پارێزگای ئەنبار چاویکەوت بە محەمەد حەلبوسی سەرۆکی پارتی تەقەدوم و ئاماژەی بەوەکرد، ئاسایش و سەقامگیری و بەرەنگاربوونەوەی گەندەڵی کۆڵەکە سەرەکییەکانی باشترکردنی بارودۆخی ژیانی هاووڵاتیانە.
لەدیدارەکەدا دوایین پێشهاتەکانی گۆڕەپانی سیاسی و پێشهاتەکانی ناوچەکە تاوتوێکران و جەخت لەسەر پێویستی دانانی بناغەیەک بۆ هەنگاوی بنیاتنەر کردەوە کەیارمەتیدەر بێت بۆ بەهێزکردنی تێگەیشتنی هاوبەش و پشتیوانیکردن لە ئاشتی و سەقامگیریی ناوچەکە و جیهان.
سەرۆک کۆمار ستایشی ئەو قوربانییە گەورەیەی کرد کە هۆکاری ئازادکردنی شاری فەلوجە بوو، روونیشیکردەوە کە فەللوجە بەهۆی تیرۆرەوە ئازارێکی زۆری چەشتووە، ئەمڕۆ بەهۆی هەوڵەکانی رۆڵەکانی و پشتیوانی دەوڵەت و دامەزراوەکانییەوە ئاوەدانە.
هەروەها سەرۆک کۆمار ئاماژەی بەوەدا، ئاسایش و سەقامگیری و بەرەنگاربوونەوەی گەندەڵی کۆڵەکە سەرەکییەکانی بەردەوامی ئاوەدانکردنەوە و دابینکردنی خزمەتگوزارییەکان و باشترکردنی بارودۆخی ژیانی هاونیشتمانیانن و جەختی لەڕۆڵی خەڵکی ئەنبار کردەوە لەبەهێزکردنی هەوڵەکانی دەوڵەت لەم بوارەدا.
هەروەها داوای لە سەرجەم هێزە سیاسییەکان کرد چ ئەوانەی لەکابینەی حکومەتن و یاخود ئەوانەی لە دەرەوەی کابینەی حکومەتن هەماهەنگی و هاوکاربن، بۆ پاراستنی ئاسایشی عێراق و یەکڕیزی نیشتمانی.
لەلای خۆیەوە محەمەد حەلبوسی، ستایشی سەردانەکەی سەرۆکی بۆ پارێزگای ئەنبار و پەرۆشی خۆی بۆ بەسەرکردنەوەی بارودۆخی عێراقییەکان لەناوچەکانیان و ئەو کاریگەرییە ئەرێنیەی لەناخی هاووڵاتیاندا بەجێدەهێڵێت.
هەروەها حەلبوسی پێشنیارەکانی سەرۆک کۆمار بۆ هاندان وەرە بەرزکردنەوە بۆ کار و دەستکەوتی زیاتر و جێبەجێکردنی ڕێڕەوی چاکسازی بەرزنرخاند، کە یارمەتیدەر دەبێت لە گرنگیپێدان و باشترکردنی ئاستی ژیانی هاووڵاتیان و دابینکردنی چاودێری و خزمەتگوزارییەکان.
لە میانەی سەردانەکەیدا بۆ پارێزگای ئەنبار، د.لەتیف جەمال رەشید سەرۆک کۆماری عیراق، ئەمڕۆ شەممە 18-1-2025 لەگەڵ کەسایەتی دیار و شێخی عەشیرەتەکانی پارێزگای ئەنبار کۆبوەوە.
لە میانی دیدارەکەدا دوایین پێشهاتەکانی دۆخی ئەنبار لە ئاستی ئەمنی و ئابووری و خزمەتگوزاری تاوتوێ کرا، سەرۆک کۆمار گوێی لە روونکردنەوەی وردی ئامادەبووان گرت سەبارەت بە سروشتی ژیان لەو پارێزگایە لە بوارە جیاجیاکاندا، جگە لەو ئاستی خزمەتگوزارییەی پێشکەش بە هاووڵاتیان دەکرێت لە ئاستی تەندروستی و پەروەردە و سەقامگیری ئێستا لە بواری ئاسایش و ئابووری.
سەرۆک کۆمار جەختیکردەوە، کە ئەنبار و شارەکانی دیکە بە هەلومەرجێکی دژواردا تێپەڕیوە، بە تایبەت لە رووبەڕووبوونەوەی تیرۆردا کە هەموویان بە شکۆمەندی و شانازییەوە لەو تاقیکردنەوەیانە تێپەراند لە سایەی هەوڵ و ویستی پێکەوەیی کۆمەڵی ئەنبار و هۆزەکانی و هاووڵاتیان و هێزە چەکدارە قارەمانەکانمان بە هەموو پێکهاتەکانیەوە.
سەرۆک کۆمار روونیکردەوە، کە هۆزەکانی عیراق فاکتەرێکی گرنگ و کارا بوون بۆ پتەوکردنی یەکڕیزی نیشتمانی، بەتایبەتی کە زۆرێک لە هۆزەکان وابەستبونێکی قوڵیان هەیە و ئەمەش هەلومەرجی گونجاو بۆ پتەوکردنی یەکڕیزی کۆمەڵی عێراق لەگەڵ هۆز و مەزهەب و نەتەوەکانی تر دروستدەکات، هاوکات ئاماژەیکرد بە پێویستی بەهێزکردنی هاوکاری و کاری هاوبەشی نێوان لێپرسراوانی شارەکە و هاووڵاتیان و یەکە کۆمەڵایەتی و سیاسیەکان و پاڵپشتی حکومەت بۆ بیناسازی و ئاوەدانکردنەوە و گەشەپێدان، لە چوارچێوەی ئەو کارانەی کە حکومەت لە عێراق بە گشتی بەڕێوەی دەبات بە شێوەیەک پەرە بە خزمەتگوزارییەکان بدات و گەندەڵی نەهێڵێت.
سەرۆک کۆمار رۆڵی هۆزو و کەسایەتی و عەشایرەکانی بەرز نرخاند لە چەسپاندنی ئاسایش و رەتکردنەوە و بەرەنگاربوونەوەی گەندەڵی و گەندەڵکاران و هەر دیاردەیەکی نەرێنی کە لە کۆمەڵی عیراقدا دروستدەبێت وەک بڵاوبوونەوەی ماددە هۆشبەرەکان، هاوکات رۆڵێکی گرنگیان بینی لە تێکشکاندن و نەهێشتنی پاشماوەکانی تیرۆر، بۆ ئەوەی کەشێکی نیشتمانی دوور لە تیرۆر بەدیبێت.
لای خۆیانەوە کەسایەتی دیاری پارێزگای ئەنبار و هۆز و عەشیرەتەکان سوپاس و پێزانینی خۆیان بۆ سەرۆک کۆمار دەربڕی بۆ سەردانەکەی و بە بۆنەیەکی گرنگیان دانا، کە ئەنبار و دانیشتووانەکەی شانازی پێوە دەکەن و سەرۆک کۆماریان لە هەوڵە بەردەوامەکانیان بۆ بەرقەرارکردنی ئاسایش و سەلامەتی و پشتیوانی لە سەروەری یاسا و دەوڵەت لە پارێزگاکەدا دووپاتکردەوە.
د.لەتیف جەمال رەشید، سەرۆک کۆماری عیراق لەگەڵ ئەندامانی ئەنجومەنی پارێزگا بە ئامادەبوونی محەمەد نووری دولەیمی پارێزگار و ئەندازیار عومەر مشعان دەبوس سەرۆکی ئەنجومەنی پارێزگا و فەرماندەکانی ئۆپەراسیۆن و پۆلیسی ئەنبار کۆبوەوە.
له میانی دیداره که ئەمڕۆ شەممە، 18-1-2025 دا لە بینای پارێزگا بەڕێوەچوو، باس لە دۆخی ئاسایش و خزمەتگوزاری و باری گوزەرانی هاووڵاتییان له پارێزگاکە کرا و سەرۆک کۆمار ئاماژەیکرد بە گرنگی هاریکاری و کاری هاوبەشی نێوان ئەندامانی ئەنجومەنی پارێزگا و لێپرسراوانی ئەنبار کە پایەیەکی گرنگی دیموکراسیەو و پرەنسیپێکە کە بەرژەوەندی گشتی بەدەستدەهێنێت، جەختیشیکردەوە لەسەر پێویستی پاراستنی سەقامگیری ئەمنی چونکە پایەی بنەڕەتییە بۆ هەنگاونان بەرەو بیناسازی و ئاوەدانکردنەوە و پێشکەوتن لە هەموو بوارەکاندا.
سەرۆک کۆمار جەختیکردەوە لەسەر پێویستی کارکردن بۆ قەرەبووکردنەوەی ئەوەی لەدەستچووە و دەستەبەرکردنی خزمەتگوزاریی تەندروستیی و پەروەردەیی و کۆمەڵایەتیی و ئاماژەی بەوەدا کە پارێزگاری ئەنبار رووبەرێکی فراوانی هەیە، بۆیە هەوڵی لە هەموو لایەک پێویستە و کارکردنی بەردەوامیش هەیە لەلایەن دەسەڵاتی جێبەجێکردن و پەرلەمانی لە حکومەتی فیدراڵی بۆ رەخساندنی دەرفەتی بیناسازی و گەشەپێدان بۆ پارێزگا کە زیانێکی زۆری بەرکەوتووە لە جەنگی دژە تیرۆر.
سەرۆک کۆمار جەختیکردەوە، لە ئامادەیی سەرۆکایەتی کۆمار بۆ پشتیوانیکردن لەم هەوڵانە و بە وردی دەروانێت بۆ ئەوەی گەشەپێدان لە هەموو پارێزگاکاندا بە دادپەروەرییەوە بەدیبێت و دەرگاکانی گەندەڵی دابخات.
لە بەرانبەردا ئەندامانی ئەنجومەنی پارێزگا روونکردنەوەیەکیان لەبارەی دۆخی پارێزگاکە و پرۆژە گرنگەکانی و ئەو ئاستەنگ و گرفتانەی کە ڕێگرن لە کارەکانی حکوومەتی خۆجێی خستەڕوو، جگە لە پلانی داهاتوو بۆ باشترکردنی خزمەتگوزاری و ئابووری و ژینگەیی بۆ بەدەستهێنانی گەشەسەندنی بەردەوام، جەختیانکردەوە کە خەڵکی پارێزگاکە ویستی کارکردن دەکەن بۆ هێنانەدی ئاسایش و سەقامگیری و بەردەوامبوون لە بیناسازی و ئاوەدانکردنەوە.
د. لەتیف رەشید سەرۆک کۆماری عیراق، لە چوارچێوەی سەردانەکەی بۆ پارێزگای ئەنبار، گەشتێکی مەیدانی بۆ بەنداوی رومادی ئەنجامدا.
لە میانەی گەشتەکەیدا ئەمڕۆ شەممە 18-1-2025 سەرۆک کۆمار لە نزیکەوە ئاگاداری پێشکەوتنی کارەکانی بەنداوەکەدا بوو، هەروەها جەختیکردەوە لە گرنگی هەوڵی هاوبەش لە نێوان دەسەڵاتە حکومی و ناوخۆییەکان بۆ بەدەستهێنانی زۆرترین سوود لە سەرچاوە ئاوییەکان لە پارێزگاکەدا، هاوکات گوێی لە رونکردنەوەیەکی ورد گرت سەبارەت بە ئاستەنگەکان و دڵنیابوون لە بەردەوامیی کارکردنی بەنداوەکە بە شێوەیەکی کارا .
لە چوارچێوەی سەردانەکەی بۆ پارێزگای ئەنبار د.لەتیف رەشید سەرۆک کۆماری عیراق رۆژی شەممه 18ـی کانوونی دووەمی 2025 سەردانی زانکۆی ئەنباری کرد و لەگەڵ سەرۆکی زانکۆ پرۆفیسۆر مشتاق تالیب ساڵح ئەلنەدا و راگری کۆلێژەکان و ئەندامانی ئەنجومەنی زانکۆ و ژمارەیەک له قوتابیان کۆبوەوه.
لە وتارێکدا سەرۆک کۆمار خۆشحاڵی خۆی بە سەردانی زانکۆی ئەنبار و کۆبونەوەی لەگەڵ کادرانی زانستی و ئەکادیمی دەربڕی و پشتیوانی خۆی بۆ کاری زانکۆ و کۆلێژ و پەیمانگاکان و پەرەپێدانیان دووپاتکردەوە لەپێناو بەدیهێنانی ئامانجە خوازراوەکان لە گەشەپێدانی ناوبانگی زانکۆکان و بەرزکردنەوەی ئاستی زانستی کادرانی دەرچوو کە سوود بە دامەزراوەکانی دەوڵەت بگەیەنێت.
سەرۆک کۆمار جەختی لەسەر پێویستی کاری هاوبەش و هاوکاری کردەوە لەپێناو پتەوکردنی ئاسایش و سەقامگیری و پاراستنی دەستکەوتە نیشتیمانیەکان کە لەدوای ئەو قوربانیدانە گەورەیەی گەلەکەمان لەپێناو بەدەستهێنانی ئازادی و کەرامەتی خۆیان و پاراستنی نیشتمان پێشکەشیان کرد.
لە کۆتایی وتارەکەیدا.لەتیف رەشید جەختی لەوە کردەوە کە هەمووان هاوبەشێکی سەرەکین، بەتایبەتی کادیری زانستی، لێهاتوویی و نوخبەی زانستی و نوخبەی ڕۆشنبیران، لە پرۆسەی گەشەپێدان، بنیاتنانی کۆمەڵگە، چاکسازی سیاسی، بەرەنگاربوونەوەی دیاردە نێگەتیڤەکان، چارەسەرکردنی گەندەڵی ئیداری و دارایی، پاراستنی ژینگە و سەرچاوەکانی ژینگە و رووبەڕووبوونەوەی کاریگەرییەکانی گۆڕانی کەشوهەوا.
ئەمەش دەقی وتارەکەی بەڕێزیانە :
به ناوی خوای بەخشندەی میهرەبان
خوشک و برایانی بەڕێز ....
سڵاو و ڕەحمەت و بەرەکەتی پەروەرگارتان لەسەر بێت ..
زۆر خۆشحاڵم کە لەم زانکۆ گرنگە و لە پارێزگای ئەنباری خۆشەویست لەگەڵتاندام کەئێرە بەهۆی تیرۆرەوە ئازارێکی زۆری چەشتووە و هێزە ئەمنییە قارەمانەکانمان و خۆڕاگری خەڵکەکەی توانیان تیرۆرستان تێکیبشکێنن و پیلانە قێزەونەکانیان پوچەڵ بکەنەوە.
خۆشحاڵی خۆمان دەردەبڕین کە سەردانمان کردن و لەگەڵ کادرە زانستی و ئەکادیمییەکانی پارێزگا کۆدەبینەوە و پشتیوانی خۆمان بۆ کاری زانکۆ و کۆلێژ و پەیمانگاکان و پێشکەوتنیان دووپات دەکەینەوە لەپێناو بەدیهێنانی ئامانجە خوازراوەکان لەگەشەکردنی زانکۆکەو ناوبانگ و بەرزکردنەوەی ئاستی زانستیان بۆ کادرانی دەرچوو کە سوود بە دامودەزگاکانی دەوڵەت بگەیەنێت
ئێوە ئاگاداری ڕۆڵی گەورەی کادرانی زانستی و نوخبەکانی عێراق بوون لەدروستکردنی هۆشیاری کۆمەڵگا و بنیاتنانی نەوەی گەنج بۆ دابینکردنی توانا و وزەی گەنجان بۆ دامەزراوەکانی دەوڵەت و کۆمەڵگا و بوارە مەعریفی و بەرهەمهێنەرەکان و هەروەها ڕۆڵی گرنگیان لەبەرەوپێشبردنی ژیانی سیاسی لەڕێگەی پێشکەشکردنی بینین و بیرۆکە و چارەسەر بۆ بڕیاردەران سەبارەت بەو کێشانەی ڕووبەڕووی وڵات دەبنەوە.
خوشک و برایان ...
ئێمە هەموومان بەرپرسیارێتییەکی گەورەی نیشتمانیمان هەیە کە پێکەوە کار بکەین و هاوکاری بکەین لەپێناو پتەوکردنی ئەو ئاسایش و سەقامگیرییەی کە وڵات بەدەستی هێناوە پاش ساڵانێک بەسەربردنی لە ڕووبەڕووبوونەوەی توندوتیژی و تیرۆر کە هەموو خەڵکی عێراقی گرتووەتەوە و لەپێناو پاراستنی ئەو دەستکەوتە نیشتیمانیانەی بەدەستهاتوون کە لەدوای ئەو قوربانییە گەورەیەی گەلەکەمان داویەتی لەپێناو بەدەستهێنانی ئازادی و کەرامەتی خۆیان و پاراستنی نیشتمان.
ئاسایش و سەقامگیری بناغەی بنەڕەتی هەنگاونانن بەرەو گەشەکردن و گەشەسەندن بۆ وڵاتەکەمان و گەلەکەمان، و بنیاتنانی بناغەیەکی بەهێز بۆ درێژەدان بە ڕێگای بیناسازی و ئاوەدانکردنەوە و پێشکەشکردنی خزمەتگوزاری و باشترکردنی بارودۆخی ژیانی هاوڵاتیان.
هەروەها دەبێت پێکەوە کاربکەین، بەبێ گوێدانە پێگەی ئەوان، بەتایبەتی کادرە زانستییەکان، لێهاتووییەکان، و نوخبە مەعریفی و ڕۆشنبیرییەکان، بۆ ئەوەی چارەسەری هەندێک لەو کێشانەی بەردەم وڵات بکەن، لە کەرتە جیاوازەکانی ئابووری، کۆمەڵایەتی، تەندروستی، ژینگەیی. هەموومان هاوبەشی جەوهەریین لە پرۆسەی گەشەپێدان، بنیاتنانی کۆمەڵگا، چاکسازی سیاسی، بەرەنگاربوونەوەی دیاردە نەرێنییەکان، و ڕووبەڕووبوونەوەی گەندەڵی ئیداری، پاراستنی ژینگە و سەرچاوە ژینگەییەکان، و ڕووبەڕووبوونەوەی کاریگەرییەکانی گۆڕانی کەشوهەوا.
لەم ڕووەشەوە دەبێت ئاماژە بەوە بکرێت کە وڵاتەکەمان یەکێکە لەو وڵاتانەی کە زۆرترین زیانی دیاردەی گۆڕانی کەشوهەوای پێگەیشتوە کە بەدەست کەمبوونەوەی سەرچاوەکانی ئاو و زیادبوونی بەبیابانبوون و وشکەساڵییەوە دەناڵێنن کە سێ هۆکاری سەرەکی کەشوهەوا، بەڕێوەبردنی ئاو و کرداری وڵاتانی دراوسێ کۆنتڕۆڵ دەکەن و ئەمەش پێویستی بە هەماهەنگییەکی نزیک هەیە لەنێوان دەزگا پەیوەندیدارەکانی حکومەت و پسپۆڕان و ئەکادیمیستەکانی پسپۆڕی ئەم بوارەدا بۆ پاراستنی سەرچاوەکانی ئاو لەڕێگەی عەقڵانیکردنی بەکارهێنان و دەستپێکردنی شێوازە مۆدێرنەکانی ئاودێری و هەروەها بەرەنگاربوونەوەی بەبیابان بوون و وشکەساڵی لەڕێگەی ستراتیژییەوە بڵاوبوونه وه ی سه وزایی و دارستان.
لە کۆتاییدا سوپاس و پێزانینی خۆم بۆ ئێوە دووپاتدەکەمەوە و خۆشحاڵم بە بینینتان کە سەردانی ئەم شارە خۆشەویستە دەکەم کە شایەنی زۆرزیاترە.
سڵاو و ڕەحمەت و بەرەکەتی
خوای گەورەتان لەسەر بێت