پەیامنێری کوردسات نیوز رایگەیاند، لەسەر رێگای گوندی دەرگەڵە بۆ دۆڵی خانەقا، پاسێک کە ١٢ خوێندکاری ئامادەیی تێدا بووە، وەرگەڕاوە و بەھۆیەوە حەوت لە خوێندکارەکان برینداربوون. 

ئاماژەی بەوەشکرد، بۆ وەرگرتنی چارەسەری پزیشکی بریندارەکان رەوانەی نەخۆشخانەی ئاشتی لە سۆران کراون، باری تەندروستیشیان جێگیرە.

نەرمین مەعروف، ئەندامی لیژنەی دارایی لە ئەنجومەنی نوێنەران بە کوردسات نیوزی راگەیاند، لەگەڵ جێگری پارێزگاری بانکی ناوەندیی قسەیکردووە و ئاماژەی بەوەکردووە، راگرتنی فرۆشتنی دۆلار لە نوسینگەکانی ئارتی بانک تەکنیکییە.

ئاماژەی بەوەشکرد، ئەو پشکەی ھەفتەی رابردوو لەلایەن بانکی ناوەندییەوە دراوەتە بانکەکە سەرجەمی دراوە بە گەشتیاران و تەواو بووە، ئەم ھەفتەیەش دۆلاری دیکە دەدرێتە بانکەکە و پڕۆسەکە دەستپێدەکاتەوە.

نەرمین مەعروف باسی لەوەشکرد، ئارتی بانک داوایکردووە ئەو بڕە پارەیەی ھەفتانە پێیان دەدرێت زیادبکرێت.

ھەفتەی رابردوو فرۆشتنی دۆلار بە نرخی بانکی ناوەندیی، لە ھەولێر و دھۆک بەھۆی سپیکردنەوەی پارەوە راگیرا، لە سلێمانی و بەغدادیش بەشێوەیەکی کاتی لە ئەمڕۆوە راگیرا.

سەرچاوەیەک لە بانکی ئارتی بانک بە کوردسات نیوزی راگەیاند، راگرتنی پرۆسەی ئاڵوگۆڕی دراو لە سلێمانی و بەغداد بەشێوەیەکی کاتی بە بڕیاری بانکی ناوەندیی بووە.

پۆلیسی کەرکوک رایگەیاند، دوای ئەوەی لەسەر یەکێک لە شەقامەکان سێ کەس ھێرشیان کردووەتە سەر پۆلیسێکی ھاتووچۆ لەکاتی ئەرکی رەسمیدا، سکاڵای یاسایی تۆمارکرا و لە ماوەیەکی کەمیشدا بەرپەرشتی راستەوخۆی فەرماندەی ھێزەکانی پۆلیسی کەرکوک یەکێک لە تۆمەتبارەکانیان دەستگیرکرد و وێنە و زانیاری تەواویش لەسەر دوو تۆمەتبارەکەی تر کۆکراوەتەوە.

ئاماژەی بەوەشکردوە، دادوەر فەرمانی دەستگیرکردنی بۆ دوو تۆمەتبارەکەی تر دەرکردووە، ھێزەکانی پۆلیس بەدوایاندا دەگەڕێن، دوای دەستگیرکردنیان ھەرسێکیان رادەستی دادگا دەکرێن.

وەزارەتی دارایی ھەرێمی کوردستان بڵاویکردەوە، وەفدی ھەرێمی کوردستان بە سەرۆکایەتی ئاوات جەناب نوری وەزیری دارایی لە بەغداد لەگەل محەمەد شیاع سودانی سەرۆک وەزیرانی عێراق کۆبووەوەو لە دیدارێکدا، کە فوئاد حسێن، محەمەد تەمیم، جێگرانی سەرۆک وەزیران و حەیان عەبدولغەنی، وەزیری نەوتی عێراق و تەیف سامی، وەزیری دارایی عێراق و بەنگین ڕێکانی، وەزیری ئاوەدانکردنەوەی عێراق ئامادەی بوون، تاووتوێی پشکی ھەرێم لە پرۆژە یاسای بودجەی ساڵی ٢٠٢٣ عێراق کرا، وەفدی ھەردوولا گەیشتنە رێککەوتنی سەرەتایی بۆ چارەسەری کێشەکان.

دەستەی کەشوھەوا و بومەلەرزە لە وەزارەتی گواستنەوەی عێراق بڵاویکردەوە، بەرەبەیانی ئەمرۆ سەعات ٢.٢٥ خولەک و بە دووری ھەشت کیلۆمەتر لە رۆژھەڵاتی قەزای خەزەری پارێزگای نەینەوا بوومەلەرزەیەک بە گوڕی ٤.٣ پلە بە پێوەری رێکخەر روویداوەو دانیشتوانی پارێزگاکانی ھەولێر، دھۆک، نەینەوا بەرێژەی جیاواز ھەستیان پێکردووە.

وەزارەتی گواستنەوەو گەیاندنی ھەرێمیش بڵاویکردەوە، ناوەندی بوومەلەرزەکە سنوری نێوان ھەولێر،موسڵ بووە، لە قوڵایی ھەشت کیلۆمەتر روویداوە و لە زۆربەی شارەکانی ھەرێم ھەستی پێکراوە.

 ھەروەھا پەیامنێری کوردسات نیوز رایگەیاند، دانیشتوانی قەزای خەبات زیاتر ھەستیان بە بومەلەرزەکە کردووەو بۆ ئاگادارکردنەوەی ھاووڵاتیان تەقەکراوە، چەند خانویەکیش زیانیان بەرکەوتووە.

ئیلھام ئەحمەد سەرۆکی ئەنجومەنی سوریای دیموکرات مەسەدە لە چاوپێکەوتنێکیدا لەگەڵ رۆژنامەی شەرقولئەوسەت رایگەیاندووە، سەردانەکانی بەشار ئەسەد، سەرۆکی سوریا بۆ ئوردن ھیچ لە ھەڵوێست و سیاسەتی حکومەتی دیمەشق ناگۆڕێت، چونکە ئەو رێگەیە نە بۆ خزمەتی گەلی سوریایە، نە بۆ دۆزینەوەی رێگەچارەی قەیرانی سوریایە، بەڵکو تەنھا بۆئەوەیە پێگەی حکومەتەکەی لەناو وڵاتانی عەرەبی بەھێز بکاتەوە.

وتیشی، زۆربەی رێگەکانیان گرتووەتەبەر بە مەبەستی دۆزینەوەی رێگەچارەیەکی گونجاو بۆ قەیرانی سوریا و داوایان لە کۆمکاری عەرەبیش کردووە لەو بابەتەدا رۆڵی ھەبێت، بەڵام کێشەو رێگرییەکە ئەوەیە حکومەتەکەی بەشار ئەسەد ھیچ لە ھەڵوێست و سیاسەتەکانی ناگۆڕێت.

د. ھەڤاڵ ئەبوبەکر پارێزگاری سلێمانی لە پەیامەکەیدا دەڵێت، "بۆیە؛ ئەمڕۆ، بەر لە سبەی داوا لە ھەموو تاک و دەستەو لایەنێکی ئەم کوردو کوردستانە، لە ناوەوەو دەرەوەی کوردستان، دەکەم: بەر لە نەورۆزی ئەمساڵ، بەگیانێکی لەخۆبوردووانەوە، بڕیاری قبوڵکردنی یەکتر بدەن، گرنگ نییە چی لە یەکتر قبوڵدەکەن، یاخود نایکەن، گرنگ ئەوەیە یەکتر قبوڵبکەن."

لە پەیامەکەدا ئاماژەی بەوەشکرووە، "خۆتان دەستی ئاشتەوایی بۆ یەکتر درێژبکەن، بۆ ئاشتی پرس بە کەس مەکەن، تێبگەن لەوەی کەستان ناتوانن ئەویترتان خاپور بکەن."

دەقی پەیامەکە...
پەیامێک بۆ یەکخستنی ئیرادەی نیشتمانیی

بۆ ھەموو کوردو کوردستاننشینان، لە ھەر کوێیەکی دنیا ھەن..
ھۆکاری سەرەکیی بێسەریی و بێئیرادەیی و بێدەوڵەتیی و تەواوی نەھامەتیی و کەوتن و شکست و پاشەکشەو لەتبونمان؛ ناکۆکییە ناڕەواکانمانن، قبوڵکردنی ھەموو ئەوای ترە بە دوژمنەکانیشمانەوە؛ جگە لە خۆمان، لە دوای تۆفانەوە بۆ لە دەستدانی نێوان دەریای قەزوین و دەریای ڕەش، بۆ مادو بۆ چاڵدێران و بۆ ناوبەرداشی ململانێ ناوچەیی و نێودەوڵەتییەکان و شەڕی میرەکان و شەڕی براکان و بۆ ئەمڕۆ، بۆ شەڕی نێوان ھەست و نەستمان، چ لە سەر ئاستی خود، چ لەسەر ئاستی تاک، چ لەسەر ئاستی کۆمەڵگاو دامەزراوە کۆمەڵایەتیی و سیاسیی و حیزبیی حکومیی و ئابوریی و ئارامیی و زانیاریی و دادوەریی و دبلۆماسییەکان؛ پەرت و کەرت و کەم و کورت و کووڕ بوین و؛ چاومان یەکتر نابینێت. 

مێژومان ئەزموننەکردووەو ھەزار گلان نەیکردوین بەسوار، نە سودمان لە شکستەکانمان بینیوە، نە توانیومانە سەرکەوتنەکان بپارێزین.بەردەوام ھەندێکمان دەبینە کلکی تەورو ئەوی ترمان دەبڕینەوە، شایی لایەکمان شینی ئەویترمان و کۆستی لایەکمان شادیی ئەویترمانە، خۆمان بێئەرزش و دوژمنانمان سەردار کردووە.

((ئەوانەی لە مێژووی ڕابردووی خۆیان بێئاگا دەمێننەوە، مەحکومن بەوەی؛ کە دووپاتی بکەنەوە))؛ ئێستا ئیتر، کاتی ئەوە درەنگبووە کە دەبێت بەئاگابێینەوە، دەسەڵات و داھات و فەخفەخەو فەنتازیاو لەزەت و شیرینیی و چەوریی دەسەڵاتدارێتیی؛ لەمەزیاتر فریومان نەدەن.

مانەوەو چارەنوسی کوردو کوردستان بە تەمەن و مانەوەو ژیانی کەسمانەوە نەبەستراوەتەوە، بەڵام بەیەکەوە دەتوانین ئەمڕۆو ئایندەیەکی باشترو سەروەریی زیاتر بۆ خەڵک و خاک و نیشتمانەکەمان و خۆمان؛ زامنبکەین، تاوان و کارەسات و ھەڵەو چەوت و چەوێڵییەکانی پێشوومان؛ ڕاستبکەینەوە، باری لاری سەرشانمان ڕێکبکەینەوە.

بە ناکۆکیشمان تەنھا قەدەری ژیانێکی شایستەتر؛ دوردەخەینەوە.

بۆیە؛ ئەمڕۆ، بەر لە سبەی داوا لە ھەموو تاک و دەستەو لایەنێکی ئەم کوردو کوردستانە، لە ناوەوەو دەرەوەی کوردستان، دەکەم: بەر لە نەورۆزی ئەمساڵ، بەگیانێکی لەخۆبوردووانەوە، بڕیاری قبوڵکردنی یەکتر بدەن، گرنگ نییە چی لە یەکتر قبوڵدەکەن، یاخود نایکەن، گرنگ ئەوەیە یەکتر قبوڵبکەن، یەکتر ئاشتبکەنەوەو ئیرادەی نیشتمانیمان بەھێزبکەنەوە، لە کەلەڕەقیی و سەرکەشیی و سەرەڕۆیی و پەرتەوازەیی و جەمسەرگیریی؛ دور بکەونەوە.

خۆتان دەستی ئاشتەوایی بۆ یەکتر درێژبکەن، بۆ ئاشتیی پرس بە کەس مەکەن، تێبگەن لەوەی کەستان ناتوانن ئەویترتان خاپور بکەن.

ئیرادە و شکۆو مێژوو ڕەسەنایەتیی و قوربانیی و دەسکەوتەکانی کوردو کوردستانیان؛ لەمە وردوخاشتر مەکەن.

ئازابن، بەرپرسیارو جوامێر و دەستپێشخەرو لێبوردەو  بوێربن؛ 

پێش ئاگری نەورۆز، ئاگر لە ناکۆکییەکانتان بەردەن.

ئەگەرنا؛

ناکۆکییە ناڕەواکانتان؛ ئاگر لە ھەموو ڕەوایەتییەک بەردەدات.

لەمیانی کۆبوونەوەیەکدا لەگەڵ ستافی مەڵبەند، کە ھەریەک لە د. مەجید حەمەدەمین، فەھیمە سابیر، ئەندامانی سەرکردایەتی ئامادەیبوون، دەرباز کۆسرەت رەسول کورتەیەکی لەبارەی دۆخی کوردستان، عێراق، پەیوەندی نێوان لایەنە سیاسییەکان و ھەڵوێستی یەکێتیی نیشتمانیی کوردستانی خستەڕوو. 

لەبەشێکی تری کۆبوونەوەکە گفتوگۆی ھەڤاڵانە لەبارەی کاروباری حزبی و خۆئامادەکردن بۆ قۆناغی داھاتوو کراو ئامادەبووان سەرنج و تێبینی خۆیان خستەڕوو.

فەرھاد شامی، بەرپرسی ناوەندی راگەیاندنی ھێزەکانی سوریای دیموکرات رایگەیاند، بڕیاری راگرتنی چالاکیەکانیان، بەھۆی بومەلەرزەکانەوە لەلایەن تورکیاوە خراپ بەکارھێنرا، لە ناوچەکانی رۆژئاوا شەڕی رانەگرتووە.

ئاماژەی بەوەشدا، لە ماوەی ١٨ رۆژی رابردوودا، تورکیا ١٨ ھێرشی زەمینی و دوو ھێرشی ئاسمانی ئەنجامدراوە، بەوھۆیەشەوە چەندین ھاووڵاتی برینداربوون و دوو ھاوڵاتیش گیاینان لەدەستداوە، یەکێک لەوانەی ھاووڵاتییەکی تەمەن ٧٠ ساڵ بووە، دوای بوومەلەرزەکە لە حەلەبەوە ھاتووەتە شەھبا.

بە پێی راگەیەنراوێکی رێکخراوی ھەنگاو بۆ مافی مرۆڤ، خەبات فەدایی، ھونەرمەندی کوردی خەڵکی شاری سنە و دانیشتووی شاری تاران، لەلایەن لقی یەکی دادگای شۆڕشی شاری وەرامین، بەتۆمەتی پڕوپاگەندە بە دژی نیزامی کۆماری ئیسلامی، سزای یەک ساڵ زیندانیکردنی بەسەرداسەپێنرا، بەتۆمەتی ئەندامێتی گروپ و دەستە بۆ تێکدانی ئاسایشی ئێران، سزای پێنج ساڵ زیندانی بەسەرداسەپێنرا.

ھەروەھا ئاناھیتا ڕەمەزان، کچە چالاکوانی شاری یاسوج، لەلایەن لقی دووی دادگای تاوانەکانی یاسووجەوە، بە تۆمەتی تێکدانی ئاسایشی گشتی لە ڕێگای ھاندانی خەڵک بۆ کۆبوونەوە، سزای حەوت مانگ زیندانیکردن و لێدانی ٤٠ قامچی بەسەرداسەپێنراوە.

دەقی پەیامەکە..

بەناوی ئەنجومەنی پەنابەرانی کوردانی رۆژئاوا-سوریا، سوپاسی کەمپینی ھاوخەمتانین دەکەین، کە لەلایەن دەزگای میدیایی کوردسات و بە بەشداری چەند رێکخراوێکی مەدەنی بەم شێوەی خوارەوە دەستیپێکرد و سپۆنسەر کرا:

پارێزگار و بەڕێوەبەرایەتی پارێزگای سلێمانی - قائیمقام و بەڕێوەبەرایەتیی قائیمقامیەتی سلێمانی - دەزگای میدیای کوردسات- لیوای یەکەم بۆ پاراستنی سلێمانی - بەڕێوەبەر و بەڕێوەبەرایەتی گشتی ئاسایش - بەڕێوەبەرایەتی کۆچبەران، ئاوارەیی و وەڵامدانەوەی قەیران - موزەخانەی نیشتمانی ئەمنە سورەکە - رێکخراوی منداڵپارێزی کوردستان - رێکخراوی گەشەپێدانی مەدەنی CDO - رێکخراوی ئاسۆیی - رێکخراوی تروسکی ھیوا - تۆڕی رێکخراوەکان - ئەنجومەنی پارێزگای سلێمانی -  بەرێوەبەرایەتی شارەوانی سلێمانی - مەکتەبی راگەیاندنی YNK - رێکخراوە دیموکراتیەکان - مەڵبەندی یەکی رێکخستنەکانی سلێمانی - دەزگای بەڕێوەبەرایەتی گشتی کۆنترۆڵی دارایی - بەڕێوەبەرایەتی گشتی تەندروستی سلێمانی - یەکێتی بەڵێندەران - کۆمپانیای ئای کییوو – کۆمپانیای ھەمسا - کۆمپانیای ئازاد بۆ قیرتاوکردنی رێگا و بانەکان - رێکخراوی ھوبەر عومەر سورچی - رێکخراوی میدیایی ڕێژنە - سەندیکای ئەلوە- پارێزگار و بەەێوەبەرایەتی پارێزگای ھەڵەبجە - بەەێوەبەرایەتی کۆچ و کۆچبەران وەڵامدانەوەی قەیرانەکانی ھەڵەبجە - قەیمقام و بەڕێوەبەرایەتی ھەڵەبجە - قائیمەقام و بەەێوەبەرایەتی قەزای دوکان - قەئیمقام و بەڕێوەبەرایەتی قەزای پێنجوێن - قەئیمقام و بەڕێوەبەرایەتی قەزای  سید سادق - ناوچەی  سیتەک - بەڕێوەبەری ناحیەی سوەیلا -  بەڕێوەبەری قەزای چەمجەماڵ).

جێگای ئاماژەیە، کە لە چوارچێوەی دەستپێک و سەرکەوتنی کەمپەینی ھاوخەمتانین، لەلایەن خەڵکی شاری سلێمانی و ھەڵەبجە و فەرمانگەکانی راپەڕین و گەرمیان، بە چاودێری دەزگای راگەیاندنی کوردسات، ١١ بارھەڵگری بارکراو بە کەرەستەی گرنگی حەوانەوە و دەرمانی پێویست و پێداویستی پزیشکیی بەپەلە بۆ زیانلێکەوتووانی بوومەلەرزەکە، لە ناوچەکانی شێخ مەقسود و ئەشرافیە لە حەلەب و ناوچەی شەھبا لە نزیک عەفرین کۆکرانەوە، کە زیاتر لە ١٥٠ ھەزار ئاوارەی کورد عەفرینی لێیە و قوربانی و برینداری زۆری لێکەوتۆتەوە.

سەرکەوتنی کەمپینی ھاوخەمتانین و گەیاندنی ھاوکاریی مرۆیی بۆ ناوچەکانی رۆژئاوا، بە گەڕەکەکانی شێخ مەقسود و ئەشرەفیە و ناوچەکانی شەھبا، بە مایەی شانازی و پێزانین دەزانین و لەسەر ئەم بنەمایە زیانلێکەوتووانمان لەناوچە زیانلێکەوتووەکانی بوومەلەرزەکەیی رۆژئاوای کوردستان و سوریا ستایشی ئەو دەستپێشخەرییە ئیجابیەیان کرد کە لەدڵ و رۆحی کوردایەتییەوە پێشکەشیان کراوە.

ئەنجومەنی پەنابەرانی کوردانی رۆژئاوا-سوریا

٢٥/٢/٢٠٢٣

بەھمەن قادر، وتەبێژی بەنزینخانەکانی سلێمانی بە کوردسات نیوزی راگەیاند، لەئێستادا نرخی لیترێک غاز، لە بەنزینخانەکان لە ٧٠٠ دینارەوە کەمکراوەتەوە بۆ ٦٧٥ دینار، نرخی لیترێک گازیش، لە ھەزار و ٢٥ دینارەوە کەمکراوەتەوە بۆ ھەزار دینار.

وتیشی، بەھۆی گۆڕانی کەشوھەوا، کەمبونەوەی خواست لەسەر سوتەمەنی بۆ خۆگەرمکردنەوە، نرخەکان دابەزیون و چاوەڕوان دەکرێت زیاتریش کەمبکرێنەوە.

بەرگەشت ئاکرەیی، وتەبێژی دەستەی وەبەرھێنانی ھەرێمی کوردستان بە کوردسات نیوزی راگەیاند، بانکی ناوەندی عێراق بۆ دانەوەی قیستی یەکەکانی نیشتەجێبون، بڕیاریداوە ١٠٠ دۆلار بە ١٣٢ ھەزار دینار لە خاوەنی یەکەکانی نیشتەجێبون وەربگرن.

وتیشی، بۆ ئەوەی ئەو بڕیارە ھەرێمی کوردستانیش بگرێتەوە، رۆژی دوو شەممەی داھاتوو ٢٧ی شوبات دەستەی وەبەرھێنانی ھەرێم کۆدەبێتەوە، بۆ تاوتوێکردنی بڕیارەکەی بەغداد، ھاوکات بۆئەوەی میکانیزم و رێوشوێنی پێویست لەوبارەیەوە بگیرێتەبەر، بڕیاری یەکلاکەرەوە لەسەر ئەو بابەتە بدرێت.

پێشتریش شوان جەبار، بەڕێوەبەری ئاماری پارێزگای سلێمانی بە کوردسات نیوزی راگەیاندبوو، سەرەتا ئەو خانەنشینانە موچەیان پێدەدرێت کە کارتەکانیان وەرگرتووەتەوە، دەتوانن سەردانی ئەو بنکانە بکەن کە دیاریکراون.

وتیشی، بۆ ئەوانەی کارتەکانیان وەرنەگرتووە پڕۆسەکە بەردەوامە، رۆژانە بانگھێشت دەکرێن، کارتەکانیان پێدەدرێت بۆ ئەوەی بەشێوەی ئەلیکترۆنی موچە وەربگرن.

د. یاد نەقشبەندی، بەڕێوەبەری نەخۆشخانەی ھیوا بە کوردسات نیوزی رایگەیاند، "تەنها لە ساڵی ٢٠٢٢، بە بڕی ٤٥ ملیار دینار دەرمان بۆ نەخۆش بەکارهاتووە، ئەمە جگە لە پێداویستی پزیشکی و پێداویستی تاقیگەیی و ئەو مغەزییانەی کە بۆ نەخۆش بەکاردێت."

بە وتەی د. یاد نەقشبەندی، بۆ یەکەمجار لە سلێمانی کۆنفڕانسێکی تایبەت بە نەخۆشی شێرپەنجە بە بەشداری سەرجەم پزیشکانی ھەرێمی کوردستان بەڕێوەدەچێت.

وتیشی، لە کۆنفڕانسەکەدا ئەو چارەسەرانە رێکدەخرێنەوە کە لە ناوەندەکانی چارەسەری شێرپەنجە بوونیان ھەیە، بۆ ئەوەی بتوانرێت بە شێوەیەکی وردتر خزمەت بە توشبووانی شێرپەنجە بکرێت.

"رەنج پشدەری" رۆژنامەنووس بە کوردسات نیوزی ڕاگەیاندووە ، بەرەبەیانی ئەمڕۆ دوو بەلەمی لاستیکی کۆچبەران لە ئاوەکانی فەڕەنساوە بەرەو بەریتانیا بەڕێککەوتوون، بەلەمێکیان بەسەلامەتی گەیشتووە، بەڵام بەلەمی دووەم کە ٧٠ کۆچبەری کوردی لەسەرە بەھۆی شەپۆلی دەریاوە دووچاری مەترسیبوون و بەلەمەکەیان لەکارکەوتووە و سوتەمەنییان پێنەماوە. 

وتیشی، سەرجەم کۆچبەرەکان خەڵکی ھەرێمی کوردستان و منداڵیشیان تێدایە، پۆلیسی "کالاس"یش دەڵێت، دەبێت لایەنی بەریتانی بەھانایانەوە بچێت چونکە گەیشتوونەتە سنورە ئاوییەکانی بەریتانیا. 

"رەنج پشدەری" ئاماژەی بەوەشکرد، ئەوە یەکەمجارە ژمارەیەکی زۆر کۆچبەر لەناو بەلەمێکی لاستیکیدا جێبکرێنەوە، چونکە ئەو بەلەمانە جێگەی ٣٠ بۆ ٤٠ کەس دەبێتەوە.