د.نەرمین مەعروف، ئەندامی لیژنەی دارایی ئەنجومەنی نوێنەران بە کوردسات نیوزی راگەیاند، لیژنەکەی سەرۆک وەزیران جەختی لە قسەکانی وەزیری دارایی کردووەتەوە کە ھەرێم زیاتر لە شایستەی خۆی وەرگرتووە و پابەندی یاسای بودجە نەبووە.

لیژنەکە لە شەش ئەندام پێکھاتووە و رۆژی ٢٥ی حوزەیرانی ئەمساڵ لەلایەن سەرۆک وەزیرانی عێراقەوە پێکھێنرا بەمەبەستی گفتوگۆکردن لەگەڵ ھەرێمی کوردستان لەبارەی جێبەجێکردنی یاسای بودجە و ماددەکانی پەیوەست بە ھەرێمی کوردستان.

رۆژی شەممەی رابردوو تەیف سامی وەزیری دارایی عێراق لەمیانەی کۆبوونەوەیدا لەلایەن لیژنەی داراییەوە رایگەیاندبوو، ھەرێمی کوردستان بۆ شەش مانگی یەکەمی ئەمساڵ زیاتر لەپشکی خۆی وەرگرتووە و بۆ شەش مانگی دووەمی ئەمساڵیش ترلیۆنێک و ٥٠٠ ملیار دیناری پێدەدرێت.

سەرلەبەیانی ئەمڕۆ لەکاتی کردنەوەی بازارەکانی ئاڵوگۆڕی دراو لە ھەرێمی کوردستان، بەھای ١٠٠ دۆلار بە ١٥٤ ھەزار و ٩٥٠ دیناربوو، بەڵام دواتر بەرزبووەوە و لەکاتی داخستنی بازاڕیشدا بەھای ١٠٠ دۆلار بۆ ١٥٦ ھەزار و ٧٥٠ دینار بەرزبووەوە، جیاوازی بەرزبوونەوەکەش گەیشتە ھەزار و ٨٠٠ دینار.

لەلایەکی تریشەوە، ئەمڕۆ بانکی ناوەندی ١٩٦ ملیۆن و ٥٨٩ ھەزار دۆلاری خستەڕوو، لەو بڕەش ٢٧ ملیۆن و  ٤٦٠ ھەزار دۆلاری بە کاش خستەڕوو.

دابەزی بەرچاوی بەھای دینار بەرامبەر دۆلار، لەکاتێکدایە کە وەک خاوەن نوسینگەکانی ئاڵوگۆڕی دراو باسی دەکەن کەمی خستنەڕوی دۆلار بەشێوەی کاش و بڕیاری ژمارەیەک بانک بۆ راگرتنی دانەوەی دۆلار بە ھاوڵاتیان و ناچارکردنیان بە وەرگرتنەوەی پارەکانیان بە دینار، ھۆکاربوون بۆ زیادبوونی خواست لەسەر دۆلار.

پێشەوا ھەورامانی وتەبێژی حکومەتی ھەرێمی کوردستان لەبارەی مووچەوە رایگەیاند،"٩٠٦ ملیار دینارمان بۆ مووچەی مووچەخۆرانی ھەرێمی کوردستان پێویستە و نەدەبوو حکومەتی فیدراڵی ئەو بابەتە تێکەڵی ھیچ بابەتێکی دیکە بکات، دەبوو وەکو ناوچەکانی دیکەی عێراق کە ئێستا مووچەی مانگی ئەیلوول  وەردەگرن، مووچەی مووچەخۆرانی ھەرێمی کوردستان بنێردرێت و ئەوانیش مووچەکانیان وەرگرتایە نەوەک لە چاوەڕوانیدا بمێننەوە".

لەبارەی ئەو ٥٠٠ ملیار دینارەی کە بۆ سێ مانگ بۆ ھەرێمی کوردستان دەنێردرێت، وتەبێژی حکومەتی ھەرێمی کوردستان دەڵێت، "حکومەتی فیدراڵی چەندین مانگی دیکەی ئەمساڵیان لەنێو پلانەکانیان لاداوە و باسیان نەکردووە، ھەروەھا نەشیانوتوە بۆ ئەو چەند مانگە ھەقی ھەرێمی کوردستان چەند بووە".

راشیگەیاند، لەپێناو دابینکردنی شایستە داراییەکانی ھاووڵاتییان، حکومەتی ھەرێمی کوردستان بۆ گفتوگۆکردن و دانووستان لەگەڵ حکومەتی فیدراڵی ئامادەیە و لەبارەی نەوت و داھاتی ناوخۆشەوە وردەکاریی تەواوی داوەتە حکومەتی فیدراڵی، ھیواخوازن بە ھەرجۆرێک بێت، پێداچوونەوە بەو ژمارانە بکرێت کە باس دەکرێن و پێداچوونەوە بەو بڕیارانەش بکرێت کە بەرامبەر ھەرێمی کوردستان دەدرێن و ورووژاندنی ھەر پرسیارێکی دیکەش کات کوشتنە.

سەرۆکایەتی ھەرێم بڵاویکردەوە، نێچیرڤان بارزانی سەرۆکی ھەرێمی کوردستان لەگەڵ محەمەد کازم ئالسادق باڵیۆزی ئێران لە عێراق کۆبووەتەوە، لە کۆبوونەوەکەدا پەیوەندییەکانی ئێران لەگەڵ عێراق و ھەرێمی کوردستان و رێککەوتنی ئەمنیی نێوان عێراق و ئێران و پەیوەندییەکانی ھەولێر و بەغداد تاوتوێکران.

نێچیرڤان بارزانی جەختی لەوەکردووەتەوە، ھەرێمی کوردستان پابەندی ڕێککەوتنی ئەمنیی نێوان عێراق و ئێرانە، ھەروەھا دڵنیاییدا ھەرگیز رێگەنادەن ھیچ ھەڕەشەیەکی ئەمنی لە ھەرێمی کوردستانەوە بۆسەر دروستببێت.

ھاوکات باڵیۆزی ئێران لە عێراق، جەختی لە بایەخ و گرنگیی پەیوەندییەکانی وڵاتەکەی لەگەڵ عێراق و ھەرێمی کوردستان کردەوە.

کارۆخ عەبدوڵا گوڵاوی نوێنەری گشتی وانەبێژانی ناڕازی لە ھەرێم رایگەیاند، رۆژی چوارشەممە ١٣ی٩ی٢٠٢٣ دەرگای ناوەندەکانی خوێندن دەکرێتەوە، بەبێ ئەوەی حکومەتی ھەرێم ھیچ ھەنگاوێکی کردەیی نابێت بۆ جێبەجێکردنی داواکاریەکانیان، سەرەڕای ئەمەش وا ھەنگاو دەنێن بۆ مانگی ١٠ ھیشتا مامۆستایان شایستەی مانگی حەوتیان وەرنەگرتووە.

ئاشکراشیکرد، بەکۆی دەنگی سەرجەم نوێنەرانی مامۆستایانی وانەبێژ لەسەرجەم پەروەردەکان بڕیاریاندا ھەر لەسەرەتای کردنەوەی دەرگای ناوەندەکانی خوێندن بایکۆتی پڕۆسەی خوێندنی ساڵی ٢٠٢٣_٢٠٢٤ بکەین نەچینەوە ناوەندەکانی خوێندن تا ئەوکاتەی حکومەتی ھەرێم بەکردار و بە نوسراوی رەسمی دامەزراندنی مامۆستایانی وانەبێژ بەیاندەکات ، لەھەمان ڕۆژیش خۆپیشادان لەبەردەم پەروەردەکان ئەنجامدەدەن.

نوێنەری گشتی وانەبێژانی ناڕازی لە ھەرێم دەڵێت، لەساڵی ٢٠١٤ حکومەتی ھەرێم بەبیانوی جۆراوجۆر ستەم لە مامۆستایانی وانەبێژ دەکات و وەڵامی داواکاریە رەواکانیان ناداتەوە کە بریتیە لە دامەزراندن.

حزبی دیموکراتی کوردستانی ئێران، راگەیەندراوێکی بڵاوکردەوە و رایگەیاند، ئێران چەندینجار ھەڕەشەی پەلاماردانی کەمپی ئەو پەنابەرە کوردانەی ئێرانی کردووە، کە لە ھەرێمی کوردستان نیشتەجێن، بەدواداچوونەکانیش دەریدەخەن ئەو وڵاتە لە ئامادەکارییەکانی بۆسنووربەزاندن و ھێرشێکی تر بۆ سەرپەنابەرانی سیاسیی کوردی دانیشتوو لە ھەرێمی کوردستان و عێراق بەردەوامە.

دەشڵێت، ئێران کاتی بۆ شەپۆلێکی تری ھێرشکردن دیاریکردووە، ھەربۆیە داوا لە حکومەتی فیدڕاڵیی عێراق و حکومەتی ھەرێمی کوردستان دەکات، ئاگاداری ئەو پلانەی ئێران، ھەروەھا داوا لە ئەمریکا و ھێزەکانی ھاوپەیمانان لە عێراق دەکات، بەرپرسیاربن لە ھەنگاویی کردەیی دژی "دەستدرێژییەکان"ی ئێران.

سەرەتای ئەمساڵ عێراق و ئێران رێککەوتنێکی ئەمنییان ئیمزا کرد، بەشێکی رێککەوتنەکە تایبەتە بە چەککردنی ئەو حزبانەی رۆژھەڵاتی کوردستان، کە لە ھەرێمی کوردستانن، ھەروەھا ئێران ئەم مانگەی وەک دوایین مۆڵەت بۆ جێبەجێکردنی ئەو رێککەوتنە دیاریکردووە.

عەمید سەڵاح سابیر بەڕێوەبەری پۆلیسی لەیلان بە كوردسات نیوزی ڕاگەیاند: كوژراوەكە تەمەنی 69 ساڵە خەڵكی قەزای عەلەمە بە نەتەوە عەرەبە  لەكاتی چوونی بۆ وەرگرتنەوەی كارتی نیشتیمانی بۆ ناحیەی لەیلان لە پارێزگای كەركوك كوژراوە.

 وتیشی كوژراوەكە ئاسەواری لێدان و ئاشكەنجە بە جەستەیەوە دیارە.

بەڕێوەبەری پۆلیسی لەیلان ئاماژەی بەوەشكرد، لە لێكۆڵینەوەكاندا دەركەوتوە بكوژەكان لە گەڵ كوژراوەكەدا لە نێو هەمان ئۆتۆمبێل بوونە و دوای ئەنجامدانی تاوانەكە بكوژەكان بۆ شوێنێكی نادیار هەڵهاتون، ئێستا پۆلیس دۆسیەی لێكۆڵینەوەی كردوەتەوە و بە شوێن بكوژەكاندا دەگەڕێت.

دارا سێکانیانی ئەندامی ئەنجومەنی نوێنەرانی عێراق لە فراکسیۆنی یەکگرتوو رایگەیاند، دژی دواکەوتنی مووچەی فەرمانبەرانی ھەرێم، یەکگرتووی ئیسلامی کوردستان لە دادگای فیدراڵی عێڕاق، سکاڵای یاسایی لەسەر ھەردوو حکومەتی عێڕاق و ھەرێم تۆمار دەکات .

ئاماژەی بەوەشکرد، دابەشنەکردنی مووچە زیانەکانی تەنیا بۆ مووچەخۆرانی ئاسایی ھەرێمە و ژیانی رۆژانەی ھاوڵاتیانی تووشی بارگرانی کردووە. 

دەشڵێت، لە سۆنگەی بەرگری کردن لە مافی یاسایی فەرمانبەرانی ھەرێم، یەکگرتووی ئیسلامی کوردستان، سکاڵای یاسایی تۆمار دەکات و داوای دابین کردن و دابەشکردنی  تەواوی مووچە دەکات  لە کاتی خۆیدا.

مەریوانی حاجی جەمال، خاوەنی کۆمپانیای مایۆرکا بڕیاریدا بە لەبەرچاوگرتنی دۆخی دارایی ھاوڵاتیان بەھۆی دواکەوتنی موچەوە، ھەموو ئەو کەسانەی موچەخۆرن و لە پڕۆژەکانی مایۆرکا شوقەیان کڕیوە، تاوەکو ھاتنی موچە دەتوانن قیست نەدەن.

ئاماژەی بەوەشکرد، ئەو ئۆفەرەش بەردەوام دەبێت کە لەبری ھەر ١٠٠ دۆلارێکی قیستەکانیان تەنھا ١٣٢ ھەزار دیناریان لێ وەردەگیرێت.

کۆمپانیای مایۆرکا پێنج پڕۆژەی نیشتەجێبونی ھەیە (مایۆرکا ستی، سولی ڤیو، ڕۆڤار ستی، ئێم جەی و میرڤانۆس)، ئەم بڕیارەش ھەر پێنج پڕۆژەکە دەگرێتەوە.

دەقی پرسەنامەکە...

برای بەڕێزم کاک جەمال حاجی عەلی

برای بەڕێزم کاک ئەحمەد حاجی عەلی 

بەڕێزان خێزان و خانەوادەی کۆچکردوو کاوە حاجی فایەق

بەبیستنی ھەواڵی کۆچی دوایی (کاوە حاجی فایەق) سەرمایەداری شاری سلێمانی، نیگەران و دڵگران بووم. 

کاوە حاجی فایەق بازرگانێکی دڵسۆز و مرۆڤدۆست بوو، کۆچکردنی زیانێکی بەرچاو بە کاروانی ئاوەدانی و نیشتەجێبوون لەھەرێمی کوردستان دەگەیەنێت.

بۆ ئەم کۆستە ھاوبەشی غەمتانم و پرسە و سەرەخۆشی ئاڕاستەی ئێوە و ھەموو کەسوکار و ھاوڕێیانی دەکەم و خوای گەورە لێی خۆش بێت، سەبوری و دڵنەواییش بەھەموو لایەک ببەخشێت. 

انا للە وانا الیە راجعون

قوباد تاڵەبانی
سەرپەرشتیاری مەکتەبی سکرتارییەتی سەرۆک مام جەلال

باسم عەوادی وتەبێژی حکومەتی عێراق ئاماژەی بەوەکرد، محەمەد شیاع سودانی سەرۆکوەزیران بەمنزیکانە ھەوڵەکانی بۆ ئاساییکردنەوەی رەوشی کەرکوک دەستپێدەکات، سەرەتاش لەگەڵ ھاوپەیمانی بەڕێوەبردنی دەوڵەت کۆدەبێتەوە بۆ تاوتوێکردنی بابەتەکەو گەیشتن بە چارەسەر.

وتیشی، رەوشی کەرکوک سەقامگیرەو چاوەڕوانن لە رۆژانی داھاتوودا دوای دانوستانەکان قەیرانەکە کۆتایی بێت و رەوشی ئەمنی و سیاسی زیاتر سەقامگیر بێت.

ھاوکات سەرچاوەیەک لە ناو چوارچێوەی ھەماھەنگی پێشبینی کردووە، سودانی لە میانی کۆبوونەوەی بەرپرسانی شارەکە و لایەنە سیاسییەکان چەند خاڵێکی گرنگ بخاتەڕوو ئەوەش بۆ ئامادەکردنی پلانی پاراستنی پێکەوەژیان و ھێورکردنەوەی رەوشەکە وەک ئامادەکارییەک بۆ ھەڵبژاردنی ئەنجومەنی پارێزگاکان.

پەیامنێری کوردسات نیوز رایگەیاند، ئەمڕۆ لە ناوچەی بەرمیزە و ناوروبارۆک و دەریا سۆر لە سنووری برادۆست، چوار بنکەی سەربازی  تورکیا بە فڕۆکەی بێفڕۆکەوان بۆردومانکران.

وتیشی، دوای بۆردومانەکە تەقەیەکی زۆر بەسەر بنکە سەربازییەکانی تورکیادا کراوە، بەپێی زانیاریەکانیش ھەر چوار بنکەکەی تورکیا بەتەواوەتی ئاگری گرتووە.

ئاماژەی بۆ ئەوەشکرد، تائێستاش ھیچ لایەنێک بەرپرسیاریتی خۆی لە بۆردومانی بنکە سەربازییەکان ئاشکرا نەکردووە.

دەقی نامەکە... 
بەرپرسیارێتی مێژوویی پاراستنی سەربازگەی تۆپزاوە، لە ئەستۆی وەزیرانی کوردە لە حکومەتی عێراق

بەڕێزان:
* فۆئاد حوسێن ـ وەزیری دەرەوە و جێگری سەرۆک وەزیرانی عیراق
* د. خالید شوانی ـ وەزیری دادی عیراق
* پەنگین رێکانی ـ وەزیری شارەوانی و ئاوەدانکردنەوە
* نزار ئامێدی ــ وەزیری ژینگە

وەک دەزانن، سەڕبازگەی تۆبزاوە، ھێمای دەڕندەیی ڕژێمی بەعسی فاشیست بووە و ھەر شوێن و جێگەیەکی ئەو سەربازگەیە، چیرۆکێکی تراژیدیای ئەنفال و بەڵگەی ئەو تاوانە دەڕەندەیە دەگێڕێتەوە، کە دەرھەق بە گەلی کورد لە تاوانی ئەنفالدا ئەنجامدرا.

لەگەڵ ئەوەی دەبوو، ھەر لە دوای ساڵی (٢٠٠٣)ـەوە، سەربازگەی تۆپزاوە بکرایە بە مۆنۆمێنتێکی شایستە بە قوربانیانی جینۆساید و تەواوی دۆکۆمێنت و بەڵگەکانی تاوانی ئەنفالی تێیدا بخرایەتەڕوو، بەڵام بەداخەوە بەھۆی بێباکی و کەمتەرخەمی حکومڕانانی کورد، ئەو شوێنە گرنگە پەراوێزخرا.

لە ئێستاشدا، مەخابن ماوەی سێ ساڵە، وەزارەتی بەرگری و سوپای عێراق، چاوی تەماعی بڕیووەتە سەر (سەربازگەی تۆپزاوە) و بێ رەچاوکردنی باری دەروونی کەسوکاری قوربانیانی ئەنفالکراوان، دەیەوێت جارێکی ئەو شوێنە بکاتەوە سەربازگە و سوپای تێیدا جێگیری بکات.. جاری یەکەم لە مانگی ١٠ ساڵی (٢٠٢١) و جاری دووەم، ماوەی دوو ھەفتەیە ئەم پرسە، لەلایەن سوپای عێراق سەریھەڵداوەتەوە.
 
دوایین پێشھات، کە زانراوە، بڕیاری دووبارە بە سەربازگاکردنەوەی (سەربازگەی تۆپزاوە)، وەک بڕیار ڕاگیراوە نەک ھەڵوەشێندراێتەوە، ئەمەش چارەسەری بنەڕەتی نییە و جۆرێکە لە چارەسەری ئازارشکێن (مسکنات)، چونکە جاری پێشوو لە ساڵی (٢٠٢١) بڕیارەکە راگیرا و ھەڵنەوەشێنرایەوە و دەرئەنجام لەم ماوەدا، جارێکی ئەو پرسە ھاتە ئاراوە.

وەک ئاشکرایە، پاساوی وەزارەتی بەرگری و سوپای عێراق، ئەوەیە کە زەوییەکانی سەربازگەکە موڵکی وەزارتی ناوبراون، لە کاتێکدا ئەو زەوییانە موڵکی جوتیارانی کوردن و لە ساڵی ھەشتاکان بە بڕیاری (مجلس قیادە الپورە)ـی ھەڵوەشاوەی رژێمی بەعس و دوور لە ھەموو بنەمایەکی یاسایی، بە زۆر خاوەدارێتی زەوییەکان لە جوتیارانی کورد سەندراوەنەتەوە و کراون بە موڵکی دەوڵەت و دواتریش سەربازگەکەی لەسەر بنیادنراوە.

ھاوکات ئەم ھەنگاوەی وەزارەتی بەرگری و سوپای عێراق لە دووبارە بە سەربازگەکردنەوەی (سەربازگەی تۆپزاوە)، دوو پێشێلکارییی زەقی یاسایی و کارگێڕی لە خۆدەگرێت:
یەکەم: پێشیلکردنێکی ئاشکرای بڕیاری ژمارە (٣٠) ساڵی (٢٠١٢)ـی ئەنجومەنی وەزیرانی عێراقە تایبەت بە پەسەندکردنی پڕۆژە یاسای ھەڵوەشاندنەوەی بڕیارەکانی (مجلس قیادە الثورە) و ڕەوانەکردنی بۆ ئەنجومەنی وەزیران، کە بە پەسەندکردنی ئەو پڕۆژە یاسایە لە ئەنجومەنی نوێنەران، خاوەندارێتی زەوییەکانیش بۆ جوتیارانی خاوەن ڕەسەن دەگەڕێتەوە.

دووەم: پێشێلکارییەکی زەقی بڕیارەکانی دادگای باڵای تاوانەکانی عێراق لە دۆسیەی ئەنفالە، کە تێیدا بڕیاری قەرەبوکردنەوەی مەعنەوی قوربانیانی دەرکردووە و پاراستنی ئەو سەربازگەیەش لە چوارچێوەی ئەو قەربووە مەعنەوییەدا دێت، کە یادەوەرییەکانی تاوانی ئەنفالی ھەڵگرتووە.

بۆیە ئێمە وەک چالاکوانان و نووسەران و رێکخراوەکانی بواری جینۆساید و کەسوکاری ئەنفالکراوان، بەرپرسیارێتی مێژوویی پاراستنی سەربازگەی تۆپزاوە وەک یادەوەرییەکی تاڵی تاوانی ئەنفال، دەخەینە ئەستۆی ئێوەی وەزیرانی کورد لە ناو ئەنجومەنی وەزیرانی عێراق و  داوا دەکەین:

یەکەم: پرسی سەربازگەی تۆپزاوە لە ناو کۆبونەوەی ئەنجومەنی وەزیران بوڕژێنرێت و بڕیاری یەکلاکەرەوەی ئەنجومەنەکەی بۆ دەرکرێت، کە بە ھیچ شێوەیەک ئەو شوێنە نەکرێتەوە سەربازگە.

دووەم: ئەم یاداشتەی ئێمە وەک چالاکوانان و نووسەران و رێکخراوەکانی بواری جینۆساید، بخرێتە بەردەست ئەنجومەنی وەزیرانی عێراق، بە ئامانجی بە مۆنۆمێنتکردنی سەربازگەی تۆپزاوە، بە جۆرێک بکرێتە مۆنۆمێنتێکی تایبەت بێت تەنھا بە تاوانی ئەنفال.
سێیەم: ئەنجومەنی وەزیران، قەربووی مادی جوتیارانی خاوەنی ڕەسەنی زەوییەکانی سەربازگەی تۆپزاوە بکات.

لە کۆتاییدا جەخت دەکەینەوە، ڕاگرتنی بڕیار تەنھا جۆرێکە لە ئازارشکێن (مسکنات) و پرسی سەربازگەی تۆپزاوە پێویستی بە بڕیاری یەکلاکەرەوەی ئەنجومەنی وەزیرانی عێراق و لەم پرسەدا دەتانخەینە بەردەم بەرپرسیارێتی میژوویی بەرانبەر بە رووحی قوربانیانی ئەنفالکراوان و کەسوکارییان.

چالاکوانان و نووسەران و رێکخراوەکانی بواری جینۆساید:-
ناوەکان : 
١- رێکخراوی کوردستان بێ جینۆساید
٢ـ رێکخراوی چاودێری کوردۆساید- چاک
 ٣- رێکخراوی چیرۆکەکانی ئەنفال
٤ـ تۆڕی رێکخراوە کوردستانیییەکان بۆ دادگای تاوانی نێودەوڵەتی - koncicc
٥ـ رێکخراوی ھەڵمەتی دادپەروەری ojc-
٦ـ رێکخراوی مانەوە بۆ پرسی شەھیدان و ئەنفالکراوان
٧ـ رێکخراوی باران بۆ پرسی ئەنفال
٨ـ ناوەندی داکۆکی پشدەر بۆ قوربانیان و جینۆسایدکراوان
٩ـ تۆڕی ئایکان کوردستان – ikn
١٠ـ رێکخراوی قەدەغەکردنی چەکی کۆکوژ لە کوردستان  – oawmd
١١ـ گۆڤاری تۆپزاوە
١٢ـ ڕۆژنامەی نوگرەسەلمان
١٣- رێکخراوی جیھانێکی بێ چەکی کیمیاوی و بایۆلۆجی
١٤ـ ھەڵمەتی ژیان دژ بە ئیعدام لە کوردستان
١٥ـ رێکخراوی کار بۆ ئەنفال
١٦ـ رێکخراوی بەرگری لە قوربانیانی گۆڕە بەکۆمەڵەکان
١٧- کۆمەڵەی داکۆکی لە پرسی ئەنفال
١٨ـ ھێمن حەسیب ــ چالاکوانی بواری جینۆساید
١٩ـ عەلی مەحمود محەمەد ــ چالاکوانی بواری جینۆساید
٢٠ـ د. عەبدولرحمان کەریم دەرویش ــ زانکۆی سۆران
٢١- دکتۆر فاتیح سەنگاوی ــ نووسەرو توێژەر لەبواری پرسی ئەنفال
٢٢ـ عەدالەت عومەر ــ نووسەرو لێکۆڵەری بواری جینۆساید
٢٣ـ گەردە مامە حمە ـ چالاکوان
٢٤ـ محەمەد عەلی ــ ڕزگاربووی شاڵاوەکانی ئەنفال
٢٥ـ  قاسم کازم ــ چالاکوانی بواری جینۆساید / کوڕی ئەنفالکراو
٢٦ـ فوئاد عوسمان ــ نووسەر و چالاکوانی بواری جینۆساید
٢٧ـ ھەژار ھوشیار بەرزنجی ــ توێژەری بواری جینوساید
٢٨ـ ڕۆژان شەھید حەمەڕەش ــ ئەندامی خولی پێنجەمی پەرلەمانی کوردستان
٢٩ـ پارێزەر ئارام محمد ــ سەرۆکی رێکخراوی باران بۆ پرسی جینۆساید
٣٠ـ شاخەوان قادر شۆرش ــ نووسەری بواری جینۆساید
٣١ـ دیمەن محەمەد ــ چالاکوانی بواری جینۆساید
٣٢ـ مەلاشاخی ــ نووسەر و رۆژنامەنووس
٣٣ـ  ھەڵمەت ھۆشیار ــ رۆژنامەوان
٣٤ـ سەلاح کەرکووکی ــ رێکخەری کاروباری ناساندنی تاوانەکانی جینۆساید لە سوید
٣٥ـ ئیبراھیم ھەورامانی ــ نووسەری بواری جینۆساید
٣٦ـ عەلی بەندی ــ نووسەرو لێکۆڵەری بواری ئەنفال
٣٧ـ ئەحمەد مەجید ــ چالاکوانی بواری جینۆساید / کەسوکاری ئەنفالکراو
٣٨ـ حازم محەمەد بلەیی ــ نوسەرو چالاکوانی بواری جینۆساید
٣٩ـ سامی بنیامێن ــ نوسەرو چالاکڤانی بواری جینۆساید
٤٠ـ حیکمت فائق ــ خاوەنی ١٠ شەھیدی کیمیاباران لە خێزانەکەم
٤١ـ عادل مەلاساڵح ــ ئەندامی دەستەی جینۆساید لە وەزارەتی کاروباری شەھیدان و ئەنفالکراوان
٤٢ـ خەبات عەبدوڵڵا ــ نووسەری بواری جینۆساید
٤٣ـ جەبار ئەحمەد ــ توێژەری بواری جینۆساید
٤٤ـ ناجی تالب ــ مامۆستا
٤٥ـ محەمەد سەید ــ فلیمساز
٤٦ـ ھابیل ئەحمەد کەریم ــ بەڕێوبەری مۆنۆمێنتی ئەنفال لە چەمچەماڵ
٤٧ـ سالار مەحمود ـ سەرۆکی یەکێتی نووسەرانی جینۆسایدی کوردستان

د. سامان بەرزنجی وەزیری تەندروستی ھەرێم بە رۆژنامەنوسانی راگەیاند، حاڵەتی کۆلێرا لە ھەرێمی کوردستان ھەیە، کۆلێرا نەخۆشییەکی گوازراوەیە بەدوای چارەسەرەکەیدا دەگەڕێن.

وتیشی، لە ھەولێر ١٠ حاڵەتی پشتڕاستکراوەی کۆلێرا تۆمارکراوەو رێژەی بڵاوبونەوەی نەخۆشیەکەش لە سلێمانی زیاترە بە بەراورد بە شارەکانی تر.

سامان سیوەیلی، وتەبێژی وەزارەتی پەروەردەی ھەرێم لە راگەیەنراوێکدا رایگەیاند، ڕێژەی نەخوێندەواری لە ھەموو کوردستان زۆر دابەزیوە بەتایبەتی تریش لە پارێزگای دھۆک.

وتیشی، ڕێژەی نەخوێندەواری پارێزگای دھۆک لە ساڵی ٢٠١٢ دا ( ٢٧،٢٪)، لەساڵی ٢٠١٨ لە ( ٢٣،٢٪) و  لە ساڵی ٢٠٢١ دا ( ١٨،٧٪) بووە.  

سامان سیوەیلی باسی لەوەشکردووە، دھۆک وێڕای ئەوەی سێیەمین پارێزگای ھەرێمی کوردستانە لە ڕووی ژمارەی دانیشتوانەوە، بەڵام لە پلەبەندی دووھەمدایە لە ڕووی ژمارەی قوتابیان و خوێندکاران ، ئەمەش ئەوە دەگەیەنێت ئاستی پەیوەندیکردنی بە خوێندن لە بەرزترین ئاستدایە.

ئەوە لەکاتێکدایە پێشتر وتەبێژی وەزارەتی پەروەردەی عێراق رایگەیاندبوو، پارێزگای دھۆک ، دووھەمین پارێزگایە لە رووی رێژەی نەخوێندەوارییەوە.