کوردستان
سەعدی ئەحمەد پیرە، وتەبێژی یەکێتیی نیشتمانیی کوردستان بە کوردسات نیوزی راگەیاند، رۆژی سێشەممە ٧ی تشرینی دووەم یەکێتیی نیشتمانیی کوردستان و پارتی دیموکراتی کوردستان لەئاستی باڵا کۆدەبنەوە.
وتیشی، لە کۆبوونەوەکەدا پەیوەندییەکانی نێوان یەکێتی و پارتی، رەوشی ھەرێمی کوردستان، پەیوەندییەکانی ھەولێر و بەغداد و بودجە و ھەڵبژاردنەکانی ھەرێمی کوردستان تاوتوێ دەکرێن.
لەدوای ئەنجامدانی پێنجەمین کۆنگرەی یەکێتی، ئەوە یەکەمین کۆبوونەوەی باڵای یەکێتی و پارتییە، لە ١٩ی تشرینی یەکەمی ئەمساڵیشدا مەکتەبی سیاسیی یەکێتیی لیژنەیەکی بۆ کۆبوونەوە لەگەڵ پارتی و لایەنەکانی دیکەی کوردستان پێکھێنا، کە بافڵ جەلال تاڵەبانی، سەرۆکی یەکێتیی نیشتمانیی کوردستان سەرپەرشتی کارەکانی لیژنەکە دەکات.
ئەنجومەنی وەزیرانی ھەرێم بە نوسراوێکی رەسمی داوای لە وەزارەتی خوێندنی باڵای ھەرێم کردووە، بە رەچاوکردنی خراپی رەوشی دارایی و بە مەبەستی دەستەبەرکردنی ئاسانکاری زیاتر، پێویستە قیستی یەکەمی کرێی خوێندنی خوێندکارانی پاراڵێل دوابخرێت و نەکرێت بە مەرجی وەرگرتن و دەستپێکردنی ساڵی خوێندنی ٢٠٢٣-٢٠٢٤ لە زانکۆ و پەیمانگەکان.
گروپی چەکداری مقاومەی ئیسلامی عێراق لە راگەیەنراوێکدا رایگەیاند، بە دوو فڕۆکەی بێفڕۆکەوان بنکەیەکی ھێزەکانی ئەمریکای لە شارۆچکەی ھەریر نزیک لەھەولێر کردوەتە ئامانج.
شەوی رابردووش گروپی چەکداری مقاومەی ئیسلامی عێراق رایگەیاند، بە مووشەک سەربازگەی خراب ئەلجیری ھێزەکانی ئەمریکایان لە باکووری رۆژھەڵاتی سوریا کردووەتە ئامانج، تائێستاش ھیچ زانیارییەک سەبارەت بە زیانەکانی ئەو بۆردومانانە بڵاونەکراوەتەوە.
لەدوای سەرھەڵدانی شەڕ و ئاڵۆزییەکانی کەرتی غەززە لە حەوتی ئۆکتۆبەر، تا ئێستا ٢٨ جار ھێرشکراوەتە سەر بنکەکانی ھێزەکانی ئەمریکا لە عێراق و سوریا و ئەمریکاش لە وەڵامی ھێرشەکاندا چەند جارێک پێگەی گروپە چەکدارەکانی لە سوریا بۆردومان کردووە.
بەڕێز خاتوو کافیە سلێمان، سکرتێری یەکێتیی ژنانی کوردستان
بەڕێزان ئەندامانی سکرتارییەت وھەموو ئەندامانی یەکێتیی ژنانی کوردستان.
لە یادی ٣٤ ساڵەی دامەزراندنی یەکێتیی ژنانی کوردستان، گەرمترین پیرۆزبایی ئاراستەی ئێوە و ئەندامانی یەکێتیی ژنان و سەرجەم ژنانی کوردستان دەکەم، خەبات و تێکۆشانتان لە ٣٤ ساڵی رابردوودا لەپێناو داکۆکیکردن لە مافەکانی ژنان بەرز دەنرخێنم.
سەرباری ھەوڵ و ماندووبوونی بێ وچانی ئێوە و رێکخراوەکان و چالاکوانەکانیتر، شتێکی شاراوە نییە کە ھێشتا دۆخی ژنان لە کۆمەڵگای ئێمەدا لە ئاستێکی پێویستدا نییە، ھەربۆیە جێی خۆیەتی، بە ھاوکاری رێکخراوەکان و چالاکوانەکانی دیکەی مافەکانی ژنان، بە روانینێکی رەخنەگرانەوە ھەڵسەنگاندنێکی نوێ بۆ دۆخی ئێستا و چۆنییەتی کارکردن لە داھاتوودا بکەن.
پێکەوە ھەڵە و کەموکوڕییەکان دەستنیشان بکەن و دواتر پلان و ستراتیژێکی گونجاو لەگەڵ دۆخی کۆمەڵایەتی و سیاسیی و ئابوری کۆمەڵگای کوردستان دابڕێژن و گوڕوتینێکی نوێ بدەنەوە بە بزووتنەوەی ژنانی کوردستان.
ھیوادارم و گەشبینیشم یەکێتیی ژنانی کوردستان، (٣٤)مین ساڵی تێکۆشانی خۆی بکاتە دەرفەتێک بۆ بەخۆداچوونەوە و دانانی بناغەیەکی پتەوتر بۆ تێکۆشانی لە ساڵەکانی داھاتوودا. لەم پێناوەشدا وەک ھاوبیرێکی خۆتان ئامادەی ھەموو جۆرە ھاوکارییەکم.
قوباد تاڵەبانی
سەرپەرشتیاری مەکتەبی سکرتارییەتی سەرۆک مام جەلال
دەقی پەیامەکە...
بەڕێزان سکرتێر و ئەندامانی سکرتاریەتی یەکێتیی ژنانی کوردستان
بەبۆنەی ساڵیادی دامەزراندنی رێکخراوەکەتانەوە، پیرۆزباییەکی گەرمتان لێدەکەم و ھیوای بەردەوامی و سەرکەوتنتان بۆ دەخوازم.
یەکێتیی ژنانی کوردستان خاوەنی مێژوویەکی زێڕین و درەوشاوەیە لە خەبات لەپێناو داکۆکیکردن، پاراستن و بەدیھێنانی مافەکانی ژناندا. ھیوادارم لە داھاتووشدا بەھەمان وزە و رۆحییەتەوە کار بۆ چەسپاندنی یەکسانیی کۆمەڵایەتی بکەن و رووبەڕووی ھەموو جیاکارییەک ببنەوە، ئێمەش پشتیوانتان دەبین.
شاد و سەرفرازبن
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
سەعدی ئەحمەد پیرە وتەبێژی یەکێتی ئاماژەی بەوەکرد، لە ئێستادا لیژنەکانی ھەردوو لا سەرقاڵی ئامادەکارین بۆ ئەنجامدانی ئەو کۆبونەوەیە، بەڵام تائێستا کات و شوێنی کۆبونەوەکە دیاری نەکراوە و ھەوڵەکان بۆ ئەوەیە لە نزیکترین کاتدا کۆبوونەوەکە ئەنجام بدرێت.
پەیامنێری کوردسات نیوز، رایگەیاند، لە سەعات ٧:٣٠ خولەکی ئێوارەوە دەستی بە سووڕانەوە لە سنووری برادۆست کردووە و چەند ناوچە و نزیک چەند گوندێکیان بۆردومانکردووە، لەوانە گەلی ڕەش، کەم کۆڕا، سنین.
وتیشی، بۆردومانەکان زیانی گیانیان نەبووە، بەڵام ترسیان لەلای دانیشتووانی ئەو ناوچانە دروستکردووە.
ئاژانسی رۆیتەرز بڵاویکردەوە بنکە سەربازییەکانی ئەمریکا لە عێراق و سوریا روبەڕووی ھێرشی درۆنی بونەتەوە، بەپێی زانیارییەکان بنکەی سەربازی شەدادیە لە باشوری حەسەکە لە سوریا بە درۆن کراوەتە ئامانج، ھاوکات بنکەی سەربازی ھەریر لە ھەرێمی کوردستان کراوەتە ئامانج بەبێ ئەوەی ئامانجەکانی لەنێو بنکەکە بپێکێت، لەھەمان کاتدا فڕۆکەخانەی ھەولێر رایدەگەیەنێت ھەواڵی بۆردوومانکردنی فڕۆکەخانەی نێودەوڵەتی ھەولێر دوورە لەراستیەوە و کارکردن و گەشتەکانی ئاساییە.
بەر لەو بۆردوومانانە، پاتریک رایدەر وتەبێژی وەزارەتی بەرگری ئەمریکا لە کۆنفرانسێکی رۆژنامەوانیدا رایگەیاند، تاکە ئامانجی ھێزەکانی ئەمریکا لە عێراق و سوریا بەرەنگاربوونەوەی گروپی تیرۆریستی داعشە، بەڵام ئەگەر گروپە چەکدارەکانی نزیک لە ئێران بەردەوام بن لە ھێرشکردنە سەر ھێزەکانیان، ئەوا ھێزەکانی وڵاتەکەی وەڵامیان دەدەنەوە.
لە پەیامەکەدا کە بەبۆنەی بانگەشە بۆ ھەڵبژاردنی ئەنجومەنی پارێزگای کەرکوک بڵاوکراوەتەوە تێیداھاتووە، لیستی ١٤٢ ویستی کورد و کەرکوکییەکانە بۆ بەدەستھێنانەوەی دەسەڵات لە پارێزگای کەرکوک و پارێزگاری داھاتووی کەرکوکیش پارێزگارێکی کورد دەبێت، کە کاندیدی یەکێتیی و ھەڵقوڵاوی ویست و ئیرادەی (ھاوپەیمانی کەرکوک ھێزی و ئیرادەمانە) دەبێت.
ئاماژەبەوەشکراوە، پارێزگاری داھاتووی کەرکوک، پارێزگارێکی رەسەن دەبێت و کاتی ئەوە ھاتووە ئەم شارە لە دەست بارمتەیی پارێزگاری بە وەکالەت و بە کەفالەت دەربھێنن و ئیدارەکەی نوێنەری ئیرادەی خەڵکەکەی بێت.
باسیان لەوەشکردووە ، پارێزگای کەرکوک شایانی گەڕانەوەی چەرخی زێڕینی حوکمی شەرعیەت و خزمەتگوزارە لە سایەی پارێزگارێکی کورد و لیستی ١٤٢ش دەسەڵات دەداتەوە دەست کەرکوکییە رەسەنەکان.
نێچیرڤان بارزانی سەرۆکی ھەرێمی کوردستان لە کۆنفرانسێکی رۆژنامەوانیدا لە فەرەنسا ئاماژەی بۆ ھەناردەکردنەوەی نەوتی ھەرێم و کێشەکانی نێوان ھەرێم و بەغداد کرد و رایگەیاند، وەفدی ھەرێم لە گفتوگۆدایە بۆ دەستپێکردنەوەی ھەناردەی نەوت، بۆ ئەو بابەتەش ھەندێک رێکار ھەیە دەبێت رێککەوتنی لەسەر بکرێت.
وتیشی، ھەناردە نەکردنەوەی نەوت تەنیا زیانی بۆ ھەرێم نییە بەڵکو بۆ ھەموو عێراقە، کێشەکە تەکنیکییە نەک سیاسی، لەسەر ئەو بابەتەش گفتوگۆکان بەردەوامە، کێشەکانیان لەگەڵ عێراق لەسەر تێچوی دەرھێنانی نەوتە لەلایەن کۆمپانیاکانەوە.
سەبارەت بە کێشەکانی نێوان ھەرێم و بەغدادیش رایگەیاند، دەبێت کێشەکانی نێوان ھەرێم و بەغداد بە دیالۆگ چارەسەر بکرێت، بە زووترینکات کێشەی مووچەی مووچەخۆران چارەسەر بکرێت، چونکە حکومەتی ھەرێم بە ھەموو شێوەیەک لەگەڵ عێراق چووەتە پێش و داتا و زانیاری دروستی داوە بە بەغداد.
نێچیرڤان بارزانی، سەرۆکی ھەرێمی کوردستان لە کۆنفرانسێکی رۆژنامەوانیدا لە فەڕەنسا رایگەیاند، ھەڵبژاردنی پەرلەمانی کوردستان بابەتێکی گرنگە و پەیوەندی بە شەرعیەتی ھەرێمی کوردستانەوە ھەیە و بەھیچ شێوەیەک لەگەڵ دواخستنی ھەڵبژاردنەکە نین و ھیچ رێککەوتنێک لەوبارەیەوە نەکراوە.
وتیشی، لە چەند رۆژی داھاتوودا پارتی و یەکێتی تایبەت بە چەند پرسێکی کۆدەبنەوە لەنێویشیاندا ھەڵبژاردنی پەرلەمانی کوردستان.
پارێزگای ھەولێر: ھەموو ھەوڵێکمان خستووەتەگەڕ بۆ بەرەنگاربوونەوەی روودانی لافاو
پارێزگای ھەولێر لە راگەیەندراوێکی سەبارەت بە مەترسییەکانی دروستبوونی لافاو بڵاوکردەوە و رایگەیاند، بە ھۆی داڕشتنی ئەو پلان و بەرنامانەی لەماوەی رابردوودا بۆ بەرەنگاربوونەوەی مەترسییەکانی روودانی لافاو و چارەسەری ھۆکارەکانی دروستبوون لەلایەن دامەزراوە و فەرمانگە خزمەتگوزارییەکان گیراونەتەبەر، لە وانە خاوێنکردنەوەی ٣٥٠ کیلۆمەتر لە فراوانکردن و پاککردنەوەی ڕێرەی ئاوی سروشتی باران و پاککردنەوەی سەرجەم چاڵەکانی ئاو وەرگرتن و مەنھۆلەکان و خاوێنکردنەوەی ئاوەڕۆکانی گەڕەک و شوێنە گشتیەکانی شاری ھەولێر و تەواوکردنی ٢٠ پڕۆژەی تایبەت بە کەمکردنەوەی مەترسیەکانی لافاو.
ھاوڵاتییان سنووری ھەولێریش دڵنیا دەکاتەوە، لە رێگەی لیژنە و تیمی فەرمانگە و دامەزراوەکانییەوە ھەموو ھەوڵێکی خۆی خستووەتەگەڕ بۆ بەرەنگاربوونەوەی روودانی ھەر ئەگەر و مەترسیەکی لافاو و رووداوێکی نەخوازراوی گۆڕانی کەشوھەوا، بە ھۆی دابارینی ڕێژەیەکی زۆری بارانیش لە زووترین کاتدا تیمەکان بەھانای ھاووڵاتییانەوە چوون و شەقامەکان پاککرانەوە و ھیچ زیانێکی گیانی و ماددی لێنەکەوتەوە.
بەپێی راگەیەنراوی سەرۆکایەتی ھەرێم نێچیرڤان بارزانی سەرۆکی ھەرێمی کوردستان لەگەڵ سێباستیان لوکۆرنو وەزیری بەرگریی فەرەنسا کۆبوەتەوە، ھەردولاش جەختیان لە پابەندی و بەردەوامیی پشتگیریی سەربازیی فەرەنسا بۆ عێراق و ھەرێمی کوردستان کردەوە.
ئەوەشھاتووە، وەزیری بەرگری فەرەنسا ئامادەییی وڵاتەکەی بۆ فراوانکردنی ھاریکاریی ھاوبەش لە چوارچێوەی ڕێککەوتنی ستراتیژیی عێراق و فەرەنسا لە بواری سەربازی و ئەمنیدا دووپات کردوەتەوە.
ھاوکات بەرەوپێشچوونی ھاریکاری و ھەماھەنگیی پێشمەرگە و سوپای عێراق و مەترسییەکانی داعش لەسەر ئارامی و سەقامگیریی عێراق و سووریا و چەند پرسێکی دیکە گفتوگۆیان لەبارەوەکرا.
پەیامنێری کوردسات نیوز رایگەیاند، لە رێگەی بانکی رەشیدەوە ٢٥٠ ملیار و ٢٠٠ ملیاری لە رێگەی تی بی ئای-ەوە خراوەتە سەر ھەژماری بانکی ھەرێم.
وتیشی، بڕیارە رۆژی یەک شەممەی داھاتوو لە رێگەی بانکی رافیدەینەوە ٢٥٠ ملیار دیناری تر دەخرێتە سەر ھەژماری بانکی حکومەتی ھەرێم.
چاوەڕوانیش دەکرێت ئەمڕۆ وەزارەتی دارایی ھەرێم خشتەی مووچەی مانگی ئابی ئەمساڵ رابگەیەنێت.
وەزارەتی دارایی و ئابووریی ھەرێمی کوردستان، راگەیەندراوێکی بڵاوکردەوە و ئاماژەی بەوەکرد، ئەمڕۆ ٢٠٠ ملیار دینار لە بانکی رافیدەینەوە خراوەتە سەر ھەژماری بانکیی وەزارەتی دارایی ھەرێم.
راشیگەیاند، رۆژی شەممە چواری تشرینی دووەم، لەگەڵ داھاتی ناوخۆ دەست بەدابەشکردنی مووچەی مانگی ئاب دەکەن و رۆژی پێنجشەممە نۆی تشرینی دووەم دابەشکردنی مووچە کۆتایی دێت.
ئەو راگەیەندراوەی وەزارەت دارایی ھەرێم دوای ئەوەدێت بەیانیی ئەمڕۆ وابڵاوکرایەوە، کە بانکەکانی رەشید و بازرگانی، ٤٥٠ ملیار دیناریان خستووەتەسەر ھەژماری بانکیی وەزارەتی دارایی ھەرێمی کوردستان و رۆژی یەکشەممە بانکی رافیدەین ٢٥٠ ملیار دینار دەخاتە سەر ھەژماری بانکیی وەزارەتی دارایی.
کاکەڕەش سدیق، سەرۆکی ئۆفیسی کەرکوکی لیژنەی جێبەجێکردنی ماددەی ١٤٠، بە کوردسات نیوزی راگەیاند، ئەمرۆ لە بەغداد کۆبونەوەی لیژنەی باڵای راسپێردراو بۆ بەدواداچوون و ھەڵوەشاندنەوەی گرێبەستە کشتوکاڵییەکانی تەعریب لە پارێزگای کەرکوک، بەڕێوەدەچێت.
وتیشی، جگە لە ھادی عامری سەرۆکی لیژنەی باڵای جێبەجێکردنی مادەی ١٤٠، ژمارەیەک لە نوێنەرانی کەرکوکیش بەشداری دەکن و پێداگری دەکەن لیژنەکە گرێبەستە کشتوکاڵییەکانی تەعریب لە پارێزگای کەرکوک ھەڵوەبشێنێتەوە و موڵکدارێتیی زەوییەکان بۆ خاوەنە کورد و تورکمانەکانیان بگەڕێنێتەوە