کوردستان
فەرماندەیی بڕیارگەی ناوەندی پاراستنی گەل نەپەگە لە راگەیەندراوێکدا ئاماژەی بەوەکردووە، ئەو ١٧ گەریلایە لە ھێرشەکانی تورکیا و بە چەکی کیمیایی گیانیانلەدەستداوە کە پێنجیان کچن.
ئاماژەی بەوەشکردووە، لەنێو ئەو گەریلایانەدا، ١٤یان لە ناوچەی "زاب" بەر چەکی کیمیایی کەوتوون و گیانیانلەدەستداوە و ئەوانەی تریش لە ناوچەی "ئاڤاشین" روبەڕووی ھێرشی تورکیا بە چەکی کیمیایی بوونەتەوە.
فەرماندەیی بڕیارگەی ناوەندی پاراستنی گەل راشیگەیاندووە، بەھۆی بێدەنگی کۆمەڵی نێودەوڵەتی و پشتیوانی بەشێک لە رێکخراوەکانەوە، ھێرشەکان بە چەکی کیمیایی زیادیانکردووە.
ناوەندی ھاوکاری حزبەکانی رۆژھەڵاتی کوردستان، داوا لە ھاووڵاتیانی رۆژھەڵاتی کوردستان و ئێران دەکەن رۆژی شەممەی داھاتوو لە ناوخۆی وڵات و دەرەوە بەشداری خۆپیشاندان و مانگرتنی سەرتاسەری بکەن.
ناوەندی ھاوکاری حزبەکانی رۆژھەڵاتی کوردستان لە راگەیەنراوێکدا ئاماژەی بەوەکردووە، خۆپیشاندان و ناڕەزاییە جەماوەرییەکان پێی ناوەتە مانگی دووەمەوە و دەسەڵاتدارانی ئێرانیش توندوتیژییەکانیان دژی خۆپیشاندەران زیاترکردووە و ھەزاران کەسیش دەستگیرکراون.
راشیگەیاندووە، حامید ئیسماعیلیون وتەبێژی ئەنجومەنی بنەماڵەی قوربانییانی فڕۆکە ئۆکرانییەکە، بانگەوازیکردووە بۆ خۆپیشاندانێکی گەورە لە شاری بەرلینی ئەڵمانیا، ئەوانیش پشتیوانی لە بانگەوازەکە و بەشداریی چالاکانە لەو خۆپیشاندانە دەکەن، داواش لە ھەموو ئێرانییەکان، بەتایبەتی کوردانی نیشتەجێی ئەڵمانیا و ئەوروپا دەکەن بەشێوەیەکی فراوان بەشداری خۆپیشاندانەکە بکەن.
ھەروەھا داوا لەسەرجەم خەڵک لە ئێران و لایەنە سیاسییەکان و ھەڵسوڕاوانی سیاسی و مەدەنی دەکەن ڕۆژی شەممە سەعات ١٢ی نیوەڕۆ لەسەرانسەری ئێران دەست بە مانگرتن و ناڕەزایی بکەن.
بەشدار حەسەن پارێزەری خۆبەخش بە کوردسات نیوزی راگەیاند، سکاڵاکە سەبارەت بە یاسای خانەنشینی گشتییە، کە لەسەر سەرۆکی حکومەت و وەزیری دارایی ھەرێم تۆمار کراوە.
وتیشی، خانەنشینان داوای جێبەجێکردنی یاسای خانەنشینی یەکگرتووی ژمارە ٩ی ساڵی ٢٠١٤ی ھەموارکراو دەکەن، لەبری یاسای خانەنشینی ژمارە ٢٧ی ساڵی ٢٠٠٦ کە لە عێراق ھەڵوەشاوەتەوە، بەڵام لە ھەرێم کاری پێدەکرێت و ئەوەش سەرپێچییە بۆ دەستور.
بەشدار حەسەن راشیگەیاند، بەھۆی ئامادەنەبوونی نوێنەرانی حکومەتی ھەرێمی کوردستان دادگاییکردنەکە بۆ ٨ی مانگی داھاتوو دواخرا.
د.سۆران جەمال تاھیر وتەبێژی رەسمی یەکێتیی نیشتمانیی کوردستان بە کوردسات نیوزی راگەیاند، دوای راسپاردنی محەمەد شیاع سودانی بۆ پێکھێنانی حکومەتی نوێی عێراق، یەکەمین سەردانی بۆ لای سەرۆک بافڵ تاڵەبانی سەرۆکی یەکێتیی نیشتمانیی کوردستان بووە، گفتوگۆیان کردووە لەبارەی دید و ھەڵوێستی یەکێتی سەبارەت بە میکانیزمی پێکھێنانی حکومەت و زامنکردنی مافەکانی گەلی کوردستان.
وتیشی، پشکی کورد لە حکومەتی داھاتووی عێراق چوار وەزارەتە، وەزارەتێکیان سیادییە، چاوەڕوان دەکرێت، یەکێتی دوو وەزارەتیان وەربگرێت، لەگەڵ ژمارەیەک دەستە و بریکاری وەزارەت و بەڕێوەبەری گشتی.
لەو گفتۆکراوەیەدا ستران عەبدوڵا، تیشکی خستە سەر ئەزموونی رۆژنامەوانی و کاری سۆشیاڵ میدیا لە رابردوو و ئێستادا ، ھەروەک تیشکی خستە سەر کۆمەڵێک بواری پەیوەست بە کاری رۆژنامەگەری و راگەیاندن و چۆنیەتی ئامادەکاری بۆ بڵاوکردنەوەی وقۆناغەکانی چاپ کردنی رۆژنامە.
لەبەشێکی تری قسەکانداو روو لەکادیرانی ئامادەبوو ستران عەبدوڵا ووتی ، ھەموو کوردستان بە مەیدانی خەباتی یەکێتی دەزانین لە رووی سیاسی و لە رووی راگەیاندنیشەوە ، ھەموو دەزانین ھەولێر پایتەختی ھەرێمی کوردستانە ، سیاسەتی رەسمی لە ھەولێرە ، بەڵام راستیەکەی سیاسەتی حەیەوی(زیندوو)ی کوردستان لە سلێمانیە.
لە بەشێکی گفتوگۆ کراوەکەدا ، کادرانی سەنتەری گەشەپێدانی تواناکانی کادیر لە ھەولێر سەرنج و تێبینی و پرسیارەکانی خۆیان دەربارەی کتێبی لەغەزەتەوە بۆ غەزای سۆشیاڵ میدیا خستەروو و لەلایەن ستران عەبدوڵاوە وەڵامیان درایەوە و گفتوگۆیان لە بارەیەوە کرا.
وەزارەتی سامانە سروشتییەکان لە روونکردنەوەیەکدا ئاماژەی بۆ ئەوەکردووە، ٢٠ی ئەم مانگە دەست بە دابەشکرنی نەوتی سپی لە ناوچە شاخاوییەکان دەکرێت، ھەموو خێزانێک ٢٠٠ لیتر نەوتی سپی بە ١٠٠ ھەزار دینار پێدەدرێت، کە بەرێژەی ٦٥٪ لەلایەن حکومەتەوە پاڵپشتیکراوە و ھاوڵاتیش تەنیا ٣٥٪ی پارەکە دەدات.
راشیگەیاندووە، ھەر کاتێک حکومەتی فیدراڵ نەوتی سپی بۆ ھەرێمی کوردستان بنێریت، بەو نرخە دەدرێتە ھاووڵاتیان کە لەلایەن حکومەتی فیدراڵەوە دیاریدەکرێت.
لە کاردانەوەی ئەو روونکردنەوەیەدا، کاروان گەزنەیی پەرلەمانتاری فراکسیۆنی یەکێتی رایگەیاند، ئەوە تەنھا بازرگانیکردنە بە ھاوڵاتییانەوە، چونکە ھەموو ھەرێمی کوردستان پێویستی بە ٢٥٨ ملیۆن لیتر ھەیە و تەنھا ٥٨ ملیۆنی بۆ ناوچە شاخاوییەکانە.
وتیشی، لە دوایین کۆبوونەوەیاندا لەگەڵ وەزارەتی سامانە سروشتییەکان باسیان لەوەکردووە کە حکومەتی ھەرێمی کوردستان ٧٠ ملیار دیناری تەرخانکردووە بۆ قۆناغی یەکەم و بەڵێنیاندا بە سێ قۆناغ بە شێوەی پاڵپشتی نەوت دابەشبکرێت
ئاگاداری لەمەڕ ئاسانکاری نوێ بۆ سەردانی ھاوڵاتیانی عێراقی بۆ ئێران
ئاگاداری ھاووڵاتییانی بەڕێزی ھەرێمی کوردستانی عێراق دەکەینەوە، بە پشتبەستن بە ڕێککەوتن لەگەڵ بەرپرسانی عێراق، شێوازی گەشتی ھاووڵاتیانی عێراقی کە پاسپۆرتی ئاسایییان ھەیە بۆ کۆماری ئیسلامیی ئێران تا راگەیاندنی دواتر بەم شێوەیەی لای خوارەوە دەبێت:
ھاووڵاتییانی عێراقی لە کاتی ھاتنەناو خاکی ئێران لە ڕێگای وشکانی و ئاسمانی و شەمەندەفەر و دەریاوە پێویستیان بە وەرگرتنی ڤیزە نییە و زانیاریەکانیان لە کاتی گەیشتنیان بۆ سنورەکان لەلایەن پۆلیسی جێگیر لە سنوورەکانی ئێرانەوە تۆمار دەکرێن و مۆڵەتی چوونە ژوورەوەی یاساییان بۆ ماوەی ٣٠ ڕۆژ پێ دەدرێت.
*تێبینی گرنگ:
- ئەو ھاووڵاتییە عێراقیانەی کە بە مەبەستی مەبەستی خوێندن، کار، وەبەرھێنان، کاری رۆژنامەوانی و ڕۆژنامەنووسی، یاخود خوازیاری ڤیزای خێزان (خانوادەی ھاوسەر ئێرانی) ن، پێویستە لە ڕێگەی باڵیۆزخانە و نوێنەرایەتیەکانی کۆماری ئیسلامی ئێرانەوە لە دەرەوەی وڵات ڤیزای پێویست وەربگرن.
- ئەم ئاسانکاریانە لەخۆگرتەی ھاتنە ژوورەوەی سەرجەم ھاووڵاتیانی عێراقیە لە سەرجەم سنورە رێگەپێدراوەکانی ئێرانەوە.
- پابەندبوون بە ڕێکار و ڕێسا تەندروستییەکانەوە پێویست و گرنگە: پێویستە پێش چوونە ژوورەوە بۆ ناو خاکی ئێران کارتی ڤاکسین کە لانی کەم دوو دۆزی پێوەبێت یاخود پشکنینی کۆرۆنای نێگەتیڤ کە کەمتر لە ٧٢ کاتژمێیری بەسەردا چووبێت، بخرێتەڕ
کاریگەری دوو نزمە پەستانی لاوازی دەریای ناوەڕاست و نیمچە دوورگەی عەرەبی
لە رۆژی پێنج شەممەوە ٢٠-١٠-٢٠٢٢ ئاسمانی ھەرێم بە گشتی بۆ نیمچە ھەور و ھەندێ ناوچە لە ھەندێ کات بۆ ھەوری تەواو دەگۆڕێت
رۆژی ھەینی ئاسمان بەردەوام نیمچە ھەور دەبێت لە ئێوارەدا ھەور زیاتر دەبێت لە ئاسمان ,لە ئەگەری دروست نەبوونی گۆڕانکاری لە پێشبینیەکان ئەگەری باران بارین لەسەر بەشێک لە سنووری پارێزگای ھەولێر و بارانێکی مامناوەند لەسەر بەشێک لە ناوچە شاخاوییەکانی سنووری پارێزگای ھەولێر و ناوچە جیاجیاکانی سنووری پارێزگای دھۆک ھەیە . باران بارینی پێشبینیکراو لەسەر سنووری پارێزگای ھەولێر و دھۆک زیاترە لە چاو ناوچەکانی تر .
سەنتەری سلێمانی و ھەڵەبجە ئەگەری نمە بارانی پچڕ پچڕی دەبێت لە ھەندێ کاتدا
پلەکانی گەرما بە چەند پلەیەک نزم دەبێتەوە ,خێرای با زیاد ئەگەری بەرزبوونەوەی تۆزوخۆڵیش دەبێت لەسەر بەشێک لەو ناوچانەی خێرا با زیاد دەکات بە تایبەت ناوچەکانی باشووری ھەرێم . لە کاتی نمە باران لەسەر ناوچە شاخاوییەکان ئەگەری ھەورە تریشقە ھەیە . ئەو ناجێگیریەی کە دروست دەبێت تا رۆژی دووشەممە لەسەر کەشی ناوچەکەمان بەردەوامی دەبێت .
بەشی پێشبینی
پۆلیسی راپەڕین بڵاویکردەوە، لەسەر سکاڵای ھاوڵاتیان و لەسەر فەرمانی دادگا، تۆمەتبارێکیان لە شاری رانیە دەستگیرکردووە.
راشیگەیاند، ئەو کەسە لەدایکبووی ساڵی ١٩٨٦ە و رەوانەی لای دادوەری لێکۆڵینەوە کراوە بۆ وەرگرتنی وتەکانی.
بەپێی زانیارییەکانی کوردسات نیوز، ئەو کەسە قاچاغچییە و بەشداربووە لە ناردنە دەرەوە ئەو کۆچبەرە کوردانەی ساڵی رابردوو لە کەناڵی ئینگلیز یەختەکەیان ژێرئاوکەوت و ژمارەیەکیان گیانیانلەدەستدا و تائێستاش تەرمی بەشێکیان نەدۆزراوەتەوە.
رێکخراوی پەیامنێرانی بێ سنوور راپۆرتێکی سەبارەت بە پێشێلکارییەکان بەرامبەر بە رۆژنامەنوسان بڵاوکردۆتەوە، بەپێی راپۆرتەکە لە سەرەتای دەستپێکردنی خۆپیشاندانەکاندا لە شارەکانی ئێران ٤١ رۆژنامەنوس دەستگیرکراون، کە بەشێکی زۆری ئەو رۆژنامەنوسانە ژنن و دۆسیەکانیان رەوانەی دادگا کراون، بەوەش دەستگەیشتن بە زانیارییەکان گەیشتووەتە ئاستێکی مەترسیدار.
لە بەشێکی تری راپۆرتەکەدا ھاتووە، رێکخراوی پەیامنێرانی بێسنوور داوا دەکات، بە زووترین کات ھەموو ئەو رۆژنامەنووسانە ئازادبکرێن.
پەیامنێری کوردسات نیوز رایگەیاند، فڕۆکە جەنگییەکانی تورکیا ئۆتۆمبێلێکیان لە بەردەم ماڵێک لە قەزای شەنگال کردە ئامانج، بەوھۆیەشەوە سێ کەس برینداربوون.
وتیشی، بریندارەکان رەوانەی نەخۆشخانەی موسڵ کراون.
دەقی ڕوونکردنەوەکەیە:
ڕوونکردنەوەیەک لە بەڕێوەبەرایەتی پۆلیسی پارێزگای ھەولێرەوە
دوای ئەوەی ئەمشەو ڕێکەوتی (١٨-١٠-٢٠٢٢) ھێزەکانی بەڕێوەبەرایەتی پۆلیسی پارێزگای ھەولێر ئاگادار کرانەوە کەوا لە گەڕەکی (کەمئەندامان) لە ناحیەی کەسنەزان ڕووداوێکی کوشتن ڕووی داوە، دەستبەجێ ھێزەکانمان گەیشتنە شوێنی ڕووداو و دەستیان بە لێکۆڵینەوە کرد.
لە لێکۆڵینەوە سەرەتاییەکاندا دەرکەوت کە کەسێک بەناوی (ڕابەر .ج.ع) تەمەن (٢٧ ساڵ) لەلایەن براکەیەوە بەناوی (ب. ج. ع) لەسەر کێشەی پارە و قەرزداری بە چەکی جۆری (کلاشنکۆف) تەقەی لێکراوە و کوژراوە.
ھێزەکانمان لەئێستادا سەرقاڵی لێکۆڵینەوەن بۆ ئەوەی کە ڕێڕەوی یاسایی بەرامبەر تۆمەتباری ناوبراو بگیرێتەبەر.
سەرۆکایەتی کۆماری عێراق بڵاویکردەوە، ئەمڕۆ لە رێوڕەسمێکدا کە سەعات ١١ی پێش نیوەڕۆ دەستپێدەکات، "د.لەتیف رەشید" بە رەسمی لە کۆشکی سەلامەوە لە بەغداد ئەرکەکانی پێدەسپێردرێت و ئاَڵوگۆڕی دەسەڵات لەگەڵ . بەرھەم ساڵح سەرۆک کۆماری پێشوو دەکرێت.
رۆژی پێنجشەممەی رابردوو، "د.لەتیف رەشید" بە زۆرینەی دەنگ لەلایەن ئەنجومەنی نوێنەرانی عێراقەوە بە سەرۆک کۆماری نوێی عێراق ھەڵبژێردرا، دواتر لەبەردەم ئەنجومەنەکە وەک سەرۆک کۆمار سوێندی یاسایی خوارد و دواتر محەمەد شیاع سودانی راسپارد بۆ ئەوەی کابینەی نوێی حکومەتی نوێی عێراق پێکبھێنێت.
عەبدولفەتاح سیسی سەرۆک کۆماری میسر لە پەیوەندییەکی تەلەفونیدا پیرۆزبایی لە د.لەتیف رەشید کرد بە بۆنەی ھەڵبژاردنی بە سەرۆک کۆماری نوێی عێراق و رایگەیاند، وڵاتەکەی لە ھەموو کات و رەوشێکدا ئامادەی ھەموو جۆرە ھاوکاریکردنێکی عێراقە و خوازیاریشن لەگەڵ سەرۆک کۆماری نوێی عێراق پەیوەندییەکانی نێوان بەغداد و قاھیرە بەھێزتر بکەن و زیاتر بەرەوپێشی ببەن لە ھەموو بوارەکاندا.
لە بەرامبەریشدا د.لەتیف رەشید سەرۆک کۆماری عێراق رایگەیاند، عێراق و میسر پەیوەندییەکی مێژوویی گرنگییان ھەیە و ھەموو کاتێکیش میسر رۆڵی بەرچاوی ھەبووە لە ھاوکاریکردنی عێراق و بە پێویستیشی دەزانن گرنگی زیاتر بەو پەیوەندییانە بدەن و بەھێزتریشی بکەن.
لە سەقز خۆپیشاندان بەردەوامی ھەیە و ھێزەکانی سەربە حکومەت ھێرشیانکردووەتە سەر ماڵی ھاووڵاتیان و گەڕەکەکانی شارەکە بۆ ترساندنی خەڵک. ھاوکات لە مەریوان خۆپیشاندان بووە و گرژی لە نێوان ھێزە ئەمنییەکان و خۆپیشاندەران دروست بووە.
رێکخراوی ھەنگاو بۆ مافەکانی مرۆڤ گرتە ڤیدیۆیەکی بڵاوکردووەتەوە، کە لە ناو خۆپیشاندانەکاندا ھێزە ئەمنییەکان منداڵێک لە شاری کرماشان دەستبەسەر دەکەن.
بەپێی ئەو زانیارییانەشی بەدەستیان گەیشتووە، ھێزە ئەمنییەکان پەیوەندییان بە بنەماڵەی دەستبەسەرکراوانەوە لە شاری مھاباد کردووە و داوای پارەیان لێکردوون.
بەپێی دوایین راپۆرتی رێکخراوی ھەنگاو، لەسەرەتای دەستپێکردنی ناڕەزایەتییەکانەوە کە لە سەقزەوە دەستیپێکرد و دواتر ١٠٥ شاری تری لە سەرتاسەری ئێران گرتەوە، لانیکەم ١٧٦ کەس بەھۆی تەقەی راستەوخۆی ھێزە ئەمنییەکانی ئێران گیانیانلەدەستداوە، کە ٣١یان منداڵن. ھەنگاو راشیگەیاندووە، تائێستا زیاتر لە ٥٠٠ ھاووڵاتی بەتەنھا لە شاری سنە دەستبەسەرکراون.
بەھۆی کەوتنەوەی ئاگر لە کۆگای خوێندنگەیەکی سنووری ناحیەی تانجەڕۆی سلێمانی، چوار کەس برینداربوون، کە برینی کەسێکیان سەختە.
ئارام عەلی وتەبێژی بەرگری شارستانی سلێمانی بە کوردسات نیوزی راگەیاند، لە خوێندنگەی بەردەکەڕی بنەڕەتی لە تانجەرۆ، کۆمپانیایەک بە ھەڵە لە بری نەوتی سپی، بەنزینی بۆ ناردوون و بەھۆیەوە لە کۆگای خوێندنگەکە ئاگرکەوتووەتەوە.
وتیشی، مامۆستاکان نەیانزانیبوو بەنزینە و لەکاتی گواستنەوەی بەنزینەکە بۆ تەنکی خوێندنگەکە ئاگرکەوتووەتەوە و بەھۆیەوە یاریدەدەری بەڕێوەبەر و مامۆستایەک و خوێندکارێک و کارمەندێک کە لەگەڵ تەنکەرەکەدا بوو برینداربوون و برینی کارمەندی تەنکەرەکە سەختە.