لە دیدارێکدا ھەموو پشتیوانی و ھەماھەنگییەکی یەکێتیی نیشتمانیی کوردستانیان بۆ سەرۆککۆماری عیراق دووپاتکردەوە لەپێناو پارێزگاریکردن لە مافە دەستوورییەکانی گەلی کورد و ھەنگاونان بە ئاڕاستەی رێبازی سەرۆک مام جەلال کە خۆی لە تەبایی نێوان ھێز و لایەنە سیاسییەکان و پاراستنی بەرژەوەندییە باڵاکان دەبینێتەوە.

لە درێژەی دیدارەکەدا سەرۆک بافڵ جەلال تاڵەبانی ئاماژەی بەوەکرد، ھەڵبژاردنی د. لەتیف رەشید وەک

چوارەمین سەرۆککۆماری کورد لە مێژووی عێراقدا، شانازییەکی گەورەیە بۆ گەلی کورد و یەکێتیی نیشتمانیی کوردستان. وتیشی، لە ھەوڵەکانیان لەگەڵ دۆستەکانیان لە بەغداد بەردەوام دەبێن تاوەکو پارێزگاری لە پێگەی کورد بکەن.

لەبارەی حکومەتی نوێی عێراقیشەوە سەرۆک بافڵ وتی، باوەڕی تەواویان بە دەستوور و ھاوبەشیی راستەقینەیە لە بەڕێوەبردنی وڵاتدا.ئەرکی حکومەتی نوێیە بە پشتبەستن بە بنەمای نیشتمانی و یەکسانی خزمەتی ھەمووتاکەکانی وڵات بکات بەبێ جیاوازی و هەنگاوی گەورە بنێت کە ڕووبەڕووبوونەوە و دژایەتی گەندەڵیدا.

وتیشی، لە ھەوڵەکانیان لەگەڵ دۆستەکانیان لە بەغداد بەردەوام دەبێن تاوەکو پارێزگاری لە پێگەی کورد بکەن.

لە کۆبوونەوەکەدا سەرۆک بافڵ جەلال تاڵەبانی وێڕای ئاماژەدان بە سەرکەوتنی یەکێتی لەم وێستگە گرنگەدا، جەختی لە جێبەجێکردنی خواست و مافە دەستووری و یاساییەکانی تری گەلەکەیان و یەکێتی کردەوە لە حکومەتی نوێی عێراق بەسەرۆکایەتی دەوڵەتمەداری راسپێردراو، محەمەد شیاع سودانی. جەختیشی کردەوە پێویستە حکومەتێکی خزمەتگوزار، کارا و بەھێزبێت و پارێزگاری لە مافی ھەموو نەتەوە و پێکھاتەکان بکات.

بەشێکی تری کۆبوونەوەی مەکتەبی سیاسی لە بەغداد تایبەت بوو بە پێویستی پتەوکردنی ئامادەیی سیاسی و رێکخراوەیی یەکێتیی نیشتمانیی کوردستان لە بەغداد وەک سەنگەری پێشەوەی خەباتی دیموکراتی و نیشتمانیی گەلەکەیان، لەوبارەیەشەوە بڕیاری پێویست پەسەندکرا.

لە دوای ماڵئاوایی سەرۆک مام جەلالەوە، یەکەمجارە کۆبوونەوەی مەکتەبی سیاسی یەکێتی لە بەغداد بەڕێوەدەچێت.

فەرماندەیی ئۆپراسیۆنە ھاوبەشەکانی کەرکوک رایگەیاند، لە کاتی سوتاندنی خاشاک لە گوندی عەدلیەی سەر بە ناحیەی  یایچی تەنێکی نامۆ کە پێدەچێت پاشماوەی کۆنی جەنگ بوو بێت تەقیوەتەوە و بەھۆیەوە منداڵێک گیانی لە دەستدا و دوو منداڵی تریش برینداربوون.

فەرماندەیی ئۆپراسیۆنە ھاوبەشەکانی کەرکوک راشی گەیاندوە، لێکۆڵینەوە لە رووداوەکە دەستیپێکردووە.

د. یاد نەقشبەندی بەڕێوەبەری نەخۆشخانەی ھیوا رایگەیاند، لە رۆژی یەک شەممە ٤٠ حاڵەتی نوێی شێرپەنجە تۆمارکراوە و کۆدی بۆ کراوە، ھەروەھا ھەزار و ٢٩ نەخۆش سەردانی نەخۆشخانەکەیان کردوە، ٣ ھەزار و ٥٠٠ پشکنینی جۆراو جۆری تاقیگەیی بۆ نەخۆش ئەنجام دراوە و ١٤٣ نەخۆش چارەسەری کیمیاییان وەرگرتوە و٢٠٥ نەخۆشیش پشکنینی تیشکی و ئیکۆ و سۆناریان بۆ کراوە.

راشیگەیاندوە، ٨٥ نەخۆش لە بەشی فریاکەوتنی خێرا داخڵ بووە و ٢٧٥ نەخۆش لە قاوشە جۆراو جۆرەکانی نەخۆشخانە داخڵ کراون.

عەباس ئیسماعیل سەرپەرشتیاری کۆمەڵگای دەروازەی نێودەوڵەتی پەروێزخان رایگەیاند، ئێران ڤیزا لەسەر ئەو ھاووڵاتی و گەشتیارانە ھەڵدەگرێت، کە لە عێراق و ھەرێمی کوردستانەوە سەردانی ئێران دەکەن، ئەو بڕیارە ئەو شۆفێرانەش دەگرێتەوە، کە لە ڕێگەی دەروازەی نێودەوڵەتی پەروێزخانەوە بە تانکەر پاشماوەی نەوت بۆ ئێران دەگوازنەوە، ئەوانیش دەتوانن بەبێ وەرگرتنی ڤیزا بارەکانیان ببەن بۆ ئێران.

ئاماژەی بۆ ئەوەشکردوە، لەئێستادا ھاووڵاتیان بەبێ ڤیزا و تەنیا بە مەرجی ھەبوونی پاسپۆرت سەردانی ئێران بکەن.

لە وەزارەتی سامانە سروشتییەکان لە روونکردنەوەیەکدا ئاماژەی بۆ ئەوەکردوە، ٢٠ی ئەم مانگە دەست بەدابەشکرنی نەوتی سپی لە ناوچە شاخاوییەکان دەکرێت، بۆ ئەو مەبەستەش ھەموو خێزانێک ٢٠٠ لیتر نەوتی سپی بە نرخی ١٠٠ ھەزار دینار پێ دەدرێت. ئەو نرخەش بەرێژەی ٦٥% لەلایەن حکومەتەوە پاڵپشتیکراوەو ھاووڵاتی تەنیا ٣٥%ی پارەکە دەدات. 

راشیگەیاندوە، ھەر کاتێکیش حکومەتی فیدراڵ نەوتی سپی بۆ ھەرێمی کوردستان بنێریت، بەو نرخە دەدرێتە ھاوڵاتیان کە لەلایەن حکومەتی فیدراڵەوە دیاری دەکرێت.

پەیامنێری کوردسات نیوز رایگەیاند، لە بەرزاییەکانی کانی دۆمەڵان نزیک گوندی نەبییاوە لە سنوری ناحیەی پردێ، فڕۆکە جەنگییەکانی عێراق نزیکەی ٣٠ خولەک بۆردومانی بەرزاییەکانی نزیک لە گوندەکەیان کرد.

بەوتەی دانیشتوانی گوندەکە ئەو ناوچەیەی بۆردومان دەکرێت پێشتر جموجۆڵی داعشی تێدا بەدی کراوە. لەبارەی زیانەکانی تیرۆریستانی داعش لەو بۆردومانە، تا ئێستاش بە رەسمی ھیچ زانیارییەک لەلایەن ھێزە ئەمنیەکانەوە بڵاونەکراوەتەوە.

مەھدی شەریعەت زادە، کەسوکاری ئەو گەنجەیە و بە کوردسات نیوزی راگەیاند، پێشەوا ئەحمەدی تەمەنی ١٧ ساڵ بووە و خەڵکی گوندی بێژوێی سەر بە شاری سەردەشتە، دوای ئەوەی لەگەڵ ٩٠ کۆچبەری تر کە زۆرینەیان کوردبوون، لە تورکیاوە بە یەخت بەڕێکەوتووە بۆ ئیتاڵیا.

وتیشی، یەختەکەی پێشەوا و ھاوڕێکانی بە دوو رۆژ و ١٥ سەعات لە رۆژی ١٢ی تشرینی یەکەمی ٢٠٢٢ گەیشتە کەناراوەکانی ئیتاڵیا، بەڵام دوای گەیشتنی بە کەناراوەکان، پێشەوا بێھۆش بووە و دواتر لە نەخۆشخانە دەرکەوت گیانی لەدەستداوە.

مەھدی شەریعەت زادە راشیگەیاند، تەرمی پێشەوا ئێستا لە نەخۆشخانەی شارۆچکەی رۆسانۆیە لە ئیتاڵیا، کەسوکارەکەی توانای داراییان باش نییە و ناتوانن تەرمەکەی بگەڕێننەوە، بۆیە داوا لە خێرخوازان و رێکخراوەکانی بواری کۆچبەران دەکەن ھاوکاریان بن بۆ ھێنانەوەی تەرمەکەی بۆ سەردەشت. 

 

پەیامنێری کوردسات نیوز رایگەیاند، ئەمڕۆ تورکیا چەند جارێک سنوری برادۆستی تۆپباران کردووە و لە بەردەوامی تۆپبارنەکە ژنێک بە ناوی (شەرمین ئەسعەد) بە سەختی بریندار بووە. وتیشی، بە مەبەستی چارەسەر، بریندارەکە رەوانەی نەخۆشخانەی ئاشتی لە سۆران کراوە.

ھەر لە کۆبوونەوەکەدا، جێگری سەرۆک وەزیرانی ھەرێم و باڵیۆزی پاکستان رێککەوتن لەسەر کردنەوەی خوێندنگەیەکی پاکستان تایبەت بە میوانداری و خزمەتگوزاری گەشتیاری لە سلێمانی و تاوتوێی "پڕۆژەی خزمەت"ی حکومەتی ھەرێم کرا، کە قوباد تاڵەبانی خۆی سەرپەرشتی دەکات، لەوبارەیەشەوە لێکتێگەیشتن کرا پاکستان ھاوکاری حکومەتی ھەرێم بکات بۆ پەرەپێدانی "پڕۆژەی خزمەت" کە ھەنگاوێکی بنەڕەتییە بۆ دروستکردنی حکومەتی ئەلیکترۆنی لە کوردستان و کەمکردنەوەی رۆتین.

ھاوکات قوباد تاڵەبانی و ئەحمەد ئەمجەد عەلی تاوتوێی چۆنییەتی پەرەپێدانی پەیوەندییەکانی نێوان ھەرێمی کوردستان و حکومەتی پاکستانیان کرد و ھەردوولا خواستی خۆیان دەربڕی، پێکەوە کار بکەن بۆ بەھێزترکردنی پەیوەندییەکانی نێوانیان.

 لە بەشێکیتری کۆبوونەوەکەدا باس لە پرۆسەی سیاسی عێراق کرا و تیایدا باڵیۆزی پاکستان پیرۆزبایی کرد بەبۆنەی ھەڵبژاردنی دکتۆر لەتیف رەشید بە سەرۆک کۆماری عێراق و ھیوای خواست قۆناغێکی نوێی سیاسی لە عێراق دەست پێ بکات و حکومەتی داھاتووی عێراق بتوانێت لە ئاستی چاوەڕوانییەکانی ھەموو خەڵکی عێراقدا بێت. 

 

٩٢ کۆچبەری نایاسایی لە نێوان سنوری تورکیا و یۆنان روتدەکرێنەوە، وەزارەتی پاراستنی ھاووڵاتیانی یۆنانیش رایگەیاند،تورکیا بەردەوامە لە بەکارھێنانی کۆچبەران و پێشێلکردنی مافەکانی مرۆڤ و یاسا نێودەوڵەتییەکان، کۆچبەرەکانیش لە نزیک رووباری ئیڤرۆس رزگارکراون.

حسێن حەمە ساڵح نوێنەری دەزگای لوتکە بۆ کاروباری ئاوارە و پەنابەران لە یۆنان بە کوردسات نیوزی راگەیاند، کەناڵی ئێرتی یەکی یۆنانی جەختی لەوەکردۆتەوە، ئەو کۆچبەرانە خەڵکی سوری و ئەفغانین، خەڵکی عێراق و ھەرێمی کوردستانیان تێدا نییە و گواستراونەتەوە بۆ بنکەی پۆلیسی ئیڤرۆس. 

ھاوکات رەنج پشدەری رۆژنامەنووسی کورد لە یۆنان بە کوردسات نیوزی راگەیاند، ئەو کۆچبەرانە گەنجن و زۆرینەیان خەڵکی سوریان و لەلایەن ھێزە ئەمنییەکانی تورکیاوە توندوتیژییان بەرامبەر کراوە و جەستەیان جێگەی برینی پێوە دیارە.

شا سەلمان بن عەبدولعەزیز پاشای سعودیە پەیامێکی پیرۆزبایی ئاڕاستەی د.لەتیف رەشید کرد بەبۆنەی ھەڵبژاردنی بە سەرۆک کۆماری عێراق و رایگەیاندووە، بەھێزکردنی پەیوەندییەکانی نێوان بەغداد و ریاز بە گرنگ و پێویست دەزانن، وەک سعودیەش ھەموو ھەوڵێکیان بۆ ئەو مەبەستەیە بۆئەوەی لەسەرجەم بوارەکاندا پەیوەندییەکانیان لەگەڵ عێراق لەگەشەکردن و بەرەوپێشچووندا بێت.

محەمەد بن سەلمان جێنشین و سەرۆک وەزیرانی سعودیەش پەیامێکی پیرۆزبایی ئاڕاستەی د.لەتیف رەشید کرد و ئامادەیی ھەموو جۆرە ھاوکاری و پشتیوانییەکی بۆ عێراق دەربڕیووە و جەختیشی لە بەھێزکردنی پەیوەندییەکانیان کردووەتەوە.

زانکۆی زانستە پزیشکییەکانی سنە بڵاویکردەوە، ژمارەی توشبووانی نەخۆشی کۆلێرا لە سنوری پارێزگای سنە گەیشتووەتە ٥٤ کەس، بە شێوەیەک لە مەریوان ٣٥ توشبوو، لە سەقز ٧، لە سەنتەری شاری سنە ٤، لە بانە ٤، لە کامیاران ٢ و لە سەوڵئاواش ٢ حاڵەتی توشبوون بە کۆلێرا تۆمارکراون.

رێکخراوی ھەنگاو بۆ مافەکانی مرۆڤ، بڵاویکردووەتەوە، ئەمڕۆ عەزیز وەیسی لە شاری جوانڕۆی رۆژھەڵاتی کوردستان، لەلایەن ھێزە ئەمنییەکانی ئێرانەوە دەستگیرکرا.

رێکخراوەکە ھۆکاری دەستگیرکردنی عەزیز وەیسی بۆ بڵاوکردنەوەی گۆرانییەک گەڕاندووەتەوە، کە ناوبراو وەک پشتگیرییەک بۆ خۆپیشاندانەکانی رۆژھەڵاتی کوردستان بڵاویکردووەتەوە.

سەھەند وەیسی کوڕەکەی عەزیز وەیسی لە تۆڕی کۆمەڵایەتی ئینستاگرام لە ڤیدیۆیەکدا رایگەیاند، باوکم لەلایەن ھێزە ئەمنییەکانی کرماشانەوە دەستبەسەر کراوە.

‎لە کۆنفرانسێکی رۆژنامەوانیدا ئیبراھیم عەلی رۆژنامەنووس رایگەیاند، دوای شەش رۆژ لە دەستگیرکردنیان بە ھەوڵی تیمی پارێزەرانی بافڵ جەلال تاڵەبانی، سەرۆکی یەکێتیی نیشتمانیی کوردستان ئازاد کراون.

پێشتر سەرۆک بافڵ جەلال تاڵەبانی رایگەیاند، سلێمانی شوێنێک نییە بۆ زیندانیکردن و ئازاردانی رۆژنامەنووس و نووسەران، بەڵکو جێگەیەکە بۆ رێزگرتن لە رەخنە و ئازادییەکانی رۆژنامەنوسان و خاوەن قەڵەمە ئازا و بوێرەکان.