فوئاد حسێن، وەزیری دەرەوەی عێراق لە لێدوانێکی رۆژنامەوانیدا بۆ تۆڕی ھەواڵی "سی ئێن ئێن"ی ئەمریکی ئاماژەی بەوەدا، ھەر کاتێک ئاڵۆزی لەنێوان ئێران و ئەمریکا ھەبێت عێراق باجەکەی دەدات و خاکی وڵاتەکە دەبێتە شوێنی ململانێکانی ئەو دوو وڵاتە، ئێستاش کە ململانێکان کەوتووەتە نێوان ئێران و ئیسرائیلەوە ھەر عێراق باجەکەی دەدات.

ئەوەشی خستەڕوو، ئێران یان نایەوێت یان ناتوانێت ھێرش بکاتە سەر ئیسرائیل، بۆیە لە بەرامبەردا بۆ شوێنگرەوەی ئیسرائیل لە وڵاتانی دراوسێ دەگەڕێت و لەو چوارچێوەیەشدا شاری ھەولێری بۆردومانکردووە.

وەزیری دەرەوەی عێراق بە توندی ئیدانەی بۆردومانی ھێرشەکەی رۆژی یەکشەممەی ڕابردووی ئێرانی بۆ سەر ھەولێر کرد و وتیشی، لەسەر ئاستی نێودەوڵەتی رێوێشوێنی پێویستیان لەبارەی ھێرشەکەوە گرتووەبەر.

لە مانگی تشرینی یەکەمی ساڵی رابردوو، ماڵپەڕی کوردبینی دەزگای میدیایی کوردسات بوو بە براوەی خەڵاتەکانی گــــڵۆباڵ ئیکۆنۆمیکسی بەریتانی بۆ باشترین خزمەتگوزاری ڤیدیۆیی لەسەر ئاستی عێراق، بڕیاریشە ئەمڕۆ لە رێوڕەسمێکدا لە شاری دوبەی، دەزگای میدیایی کوردسات ئەو خەڵاتە وەربگرێت. 

کوردبین یەکێکە لە ماڵپەڕەکانی دەزگای میدیایی کوردسات، کە سەرجەم بەرنامە و دراما و فیلم و دۆکیۆمێنتاری و کلیپ و کۆنسێرتەکانی تایبەت بە کوردساتی تێدا دادەنرێت و ھاووڵاتیان دەتوانن لەو رێگەیەوە بینەریانبن.

دامەزراوەی خەڵاتەکانی ئابوریی جیھانی کە دامەزراوەیەکی بەریتانییە و بارەگاکەی لە لەندەنە، ساڵانە ئەو پێگە و پلاتفۆرمانەی کە کارەکانیان جیاوازە و سەردانکارانی بەئاسانی دەستیان بە خزمەتگوزارییەکان دەگات، خەڵات دەکات.
ناوەڕاستی مانگی ئابی ساڵی رابردووش لە راپرسییەکدا، کەناڵی کوردسات لەسەر ئاستی ھەرێمی کوردستان، بە پڕبینەرترین کەناڵی گشتی دیاریکرا.

پاپای ڤاتیکان لە چاوپێکەوتنی ھەفتانەیدا، پرسە و سەرەخۆشی ئاراستەی خێزانی قوربانییەکانی بۆردوومانەکەی ھەولێر کردووە و دوپاتیکردووەتەوە کە نابێت پەیوەندی نێوان وڵاتە دراوسێکان لەو جۆرە کردەوانەی تێدا بێت، بەڵکو دەبێت ئاڵۆزییەکان لەڕێی دانوستانەوە چارەسەر بکرێن.

داواشی لەسەرجەم لایەنەکان کردووە خۆیان بەدووربگرن لە ھەر ھەنگاوێک، کە ئاڵۆزییەکانی رۆژھەڵاتی ناوەڕاست فراوان بکات .

فەیسەڵ نائیلی، ئەندامی لیژنەی دارایی ئەنجومەنی نوێنەرانی عێراق، لە لێدوانێکی رۆژنامەوانیدا ئاماژەی بەوەدا، حکومەتی فیدراڵ کێشەی دواکەوتن و دابەشنەکردنی مووچەی فەرمانبەرانی ھەرێم چارەسەر دەکات و رێوشوێنی پێویستی یاسایی لەوبارەیەوە دەگرێتەبەر.

ئەوەشی خستەڕوو، بەڕوونی لە یاسای بودجەدا باس لە شایستە داراییەکانی پارێزگاکان و مووچەی فەرمانبەران کراوە و جگە لە پارێزگاکانی ھەرێم، ھەر پارێزگایەک کێشەی دواکەوتنی مووچەی فەرمانبەرانی ھەبێت دەتوانێت داوا بەرزبکاتەوە و حکومەتی فیدراڵ راستەوخۆ مووچەی فەرمانبەرانی بۆ بنێرێت.

ئەو ئەندامەی ئەنجومەنی نوێنەران وتیشی، ھەر پارێزگایەکی عێراق مافی خۆیەتی داوای جیاکردنەوەی شایستەداراییەکانی پارێزگاکەی لە مووچەی فەرمانبەرانی بکات.

فوئاد حسێن وەزیری دەرەوەی عێراق لە پەراوێزی کۆنگرەی داڤۆس رایگەیاند، ماوەیەک لەمەوبەر بە سەرۆکایەتیی وەفدێکی باڵای عێراق سەردانی ئەنقەرەیان کردوە بۆ گفتوگۆکردن لەسەر دەستپێکردنەوەی ھەناردەی نەوتی ھەرێم بۆ بەندەری جەیھان.

وتیشی، گفتوگۆکان باشبوون، ھیچ کێشەیەک لە بەندەر و بۆرییەکەدا نییە، ئامادەییان دەربڕیوە دەست بە ھەناردەی نەوت بکەنەوە، ئەوەی ماوەتەوە و چارەسەرنەکراوە لە نێوان حکومەتی ھەرێم و حکومەتی عێراقدایە.

ھاوکات جەیک سۆلیڤان راوێژکاری ئاساییشی نیشتیمانی و مەسرور بارزانی سەرۆکی ئەنجوومەنی وەزیرانی ھەرێم لە داڤۆس کۆبونەوە، لە تەوەرێکدا باسیان لە ھەناردەی نەوتی ھەرێم کردووە، بۆ پشتیوانیی سەقامگیری و سەرچاوەی بژێوی لە ھەرێمی کوردستان.

سەکار سورچی وتەبێیژی وەزارەتی تەندروستی حکومەتی ھەرێمی کوردستان بە کوردسات نیوزی راگەیاند، گوایە حکومەتی عێراق و ھەرێمی کوردستان ١٠ ملیۆن دینار وەکو ھاوکاری دەدەنە کەسوکاری ئەو خێزانانەی کە بەھۆی ڤایرۆسی کۆرۆناوە  گیانیان لەدەستداوە، بەڵام ئەو ھەواڵە دوورە لەڕاستی.

وتیشی حکومەتی ھەرێم لەساڵی ٢٠٢٠دا بڕیاریدابوو ھەر کەسێک لە کاتی روبەڕوبوونەوەی کۆرۆنا گیانلەدەستبدات ٥ ملیۆن دیناری وەکو ھاوکاری پێدراوە،  بەڵام ھیچ ھاوکارییەک لەبارەی پێدانی پارەی لەلایەن عێراقەوە بۆ کەسوکاری قوربانیانی کۆرۆنا نییە .

ئاوات شێخ جەناب وەزیری دارایی ھەرێم لەمیانی پێشوازیکردن لە بەرپرسی نوسینگەی پەیوەندیەکانی یەکێتی ئەوروپا لە ھەرێمی کوردستان وتی، لەسەر ناوەرۆکی ھەمواری یاسای بودجە لەگەڵ بەغداد گەیشتونەتە رێککەوتن و چاوەڕێن لە نزیکترینکاتدا ئەنجومەنی وەزیران ھەموارەکە پەسەند بکات، ھیواشی خواست لە ئەنجومەنی نوێنەران بەبێ کێشە دەنگی لەسەر بدرێت.

دەربارەی دۆسیەی نەوتیش وەزیری دارایی رایگەیاند، لێکتێگەیشتنی باش لەسەر تێچووی دەرھێنانی نەوت لە نێوان کۆمپانیاکان و وەزارەتی نەوتی عێراق ھاتۆتە ئاراوە، ئومێدیشی خواست لەئایندەیەکی نزیکدا لەگەڵ بەغداد لەسەر دۆسیەی نەوت بگەنە رێکەوتن.

لای خۆشیەوە بەرپرسی پەیوەندییەکانی یەکێتی ئەوروپا رایگەیاند، ھەست بەو فشارو کاریگەرییانە دەکەن کە لەسەر ئابووری ھەرێم و مووچەخۆران ھەیەو ھەوڵەکانیان چڕ دەکەنەوە بۆ  ئەوەی ھەردوولا بگەنە رێککەوتنێکی گشتگیر.

بەپێی ئەو داتایانەی وەزارەتی دارایی عێراق بڵاویکردووەتەوە، کۆی گشتی داھات تا مانگی تشرینی دووەم گەیشتووەتە ١٢١ ترلیۆن و ٢١٤ ملیار و ٩٠٧ ملیۆن و ٨٧ ھەزار دینار، کە لە کۆی ئەو داھاتە، ١١٢ ترلیۆن و ٦٦٥ ملیار و یەک ملیۆن و ٤٠٢ ھەزار دیناری لەڕێگەی نەوتەوە بووە، بەو شێوەیەش نەوت سەرچاوەی سەرەکی داھاتی عێراق بووە و رێژەی لەسەدا ٩٣ی داھاتی پێکھێناوە، ھەروەھا کۆی گشتی  داھاتە نانەوتییەکان گەیشتووەتە  ٥٤٩ ملیار و ٥٠٤ ملیۆن و ٩٣١ ھەزار دینار.

ھەر بەپێی داتاکانی وەزارەتی دارایی عێراق، کۆی گشتی خەرجی و سلفەکان لە ماوەی ١١ مانگدا گەیشتووەتە ٩٨ ترلیۆن و ٧٢٧ ملیار و ٧٤٥ ملیۆن و ٤١٩ ھەزار دینار.

نەرمین مەعروف ئەندامی لیژنەی دارایی لە ئەنجومەنی نوێنەران رایگەیاند، بەپێی نووسراوێکی وەزارەتی دارایی فیدڕاڵ، کە لە ١٦ی ئەم مانگە دەرکراوە، وەزیری دارایی عێراق ھاوشێوەی سەرجەم دامودەزگاکانی تری دەوڵەت داوای لە وەزارەتی دارایی ھەرێم کردووە لیستی خەرجی موچەی فەرمانبەران مانگانە بۆ مانگی کانونی دووەم و مانگەکانی دواتر بدەنە فەرمانگەی ژمێرکاری وەزارەت یان گەنجینەی پارێزگاکان بەمەبەستی تەمویلکردنی مووچە.

لە بەشێکی تری نوسراوەکەشدا ھاتووە، رەوانەکردنی لیستی مووچە بەوشێوەیە دەبێت، تا ئەوکاتەی خشتەی نوێی بودجەی ساڵی ٢٠٢٤ لە ھەردوو ئەنجومەنی وەزیران و نوێنەران پەسەند دەکرێت.

دەقی راگەیەنراوەکە... 

کاتژمێر ١١:٣٠ی شەوی ١٥ لەسەر ١٦ی کانوونی دووەمی ٢٠٢٤، سوپای پاسدارانی ئێران بە چەندین مووشەکی بالیستیکی چەند ناوچەیەکی سڤیلنشینی ھەولێری بوردومان کرد، بەداخەوە بەپێی ئامارە سەرەتاییەکان چوار ھاووڵاتیی سڤیل شەھید و شەش کەسی دیکەش بریندار بوون، کە ڕەوشی تەندروستیی ھەندێک لە بریندارەکان ناجێگیرە.

سوپای پاسداران رایگەیاندووە، ئەم ھێرشە بۆ سەر چەند پێگەیەکی گرووپە دژبەرەکانی ئێران بووە. ئەم بیانووە بێ بنەمایە و ڕەتی دەکەینەوە، بەداخەوە ھەمیشە بیانووی بێبنەما بۆ ھێرشکردنە سەر ھەولێر بەکار دێنن و ھەولێر وەک دەڤەرێکی سەقامگیر ھیچ کات سەرچاوەی ھەڕەشە نەبووە بۆ سەر ھیچ لایەنێک.

ئەمە پێشێلکردنێکی ئاشکرای سەروەریی ھەرێم و عێراقە و پێویستە حکومەتی فیدراڵ و کۆمەڵگەی نێودەوڵەتی لەو تاوانە بێدەنگ نەبن.

مەسرور بارزانی، سەرۆکی حکومەتی ھەرێم لەپەیامێکدا ئیدانەی ھێرشەکەی سەر ھەولێری کرد و ئاماژەی بەوەشکردوە، ھێرشەکەی ھەولێر بێ پاساوە و شەھید و برینداری لێکەوتووەتەوە، بۆیەش داوا لە حکومەتی فیدراڵی دەکات ھەڵوێستی توندی ھەبێت بەرامبەر بەو پێشێلکاریەی دەکرێتە سەر سەروەریی عێراق و بەتایبەتی ھەرێمی کوردستان.

باسی لەوەشکردووە، داوا لە کۆمەڵگەی نێودەوڵەتی دەکات لە سەر ئەو ستەمکارییەی بەرامبەر بە خەڵکی کوردستان دەکرێت بێنە دەنگ.

پەیوەست بە ھەوڵەکانیش بۆ راگرتنی ھێرشەکان، سەرۆکی حکومەتی ھەرێم ئەوەی خستوەتەڕوو، لە رۆژانی داھاتوودا، لەگەڵ کۆمەڵگەی نێودەوڵەتی لە پەیوەندیی بەردەوامدا دەبن لە پێناو کۆتاییھێنان بەو ھێرشانەی دەکرێنە سەر خەڵکی بێتاوانی کوردستان.

د.ھەڤاڵ ئەبوبەکر، پارێزگاری سلێمانی لە راگەیەندراوێکدا بڵاویکردەوە، بە توندی ئیدانەی ھێرشەکەی شاری ھەولێر و ھەموو ناوچەکانی تری ھەرێمی کوردستانی کردوە و پرسە و ھاوخەمی بۆ قوربانییەکان و ھیوای زوو چاکبوونەوەی بۆ بریندارەکان دەربڕیوە .

پارێزگاری سلێمانی داوای کردووە ئەو ھێرشانە لەلایەن وڵاتانی ناوچەکەوە بۆ سەر ھەرێمی کوردستان رابگیرێن، داواشی لە لەلایەنە سیاسییەکان و حکومەتی ھەرێمی کوردستان کردوە یەکریزی لەنێوخۆدا بھێننە کایەوە و خۆیان لە ھەر لایەنداری و ھەژمونێکی ناوچەیی و نێودەوڵەتی بەدوور بگرن.

دەقی راگەیەندراوەکەی یەکێتی زانایانی ئایینی ئیسلامی کوردستان...
 
لە پەیامێکدا یەکێتی زانایان ئیدانەی موشەکبارانی شەوی رابردووی سەر شاری ھەولێر دەکات، کە بەداخەوە قوربانی گیانی و ماددی زۆری لێ کەوتەوە، ئەمەی خوارەوە دەقی پەیامەکەیە: 

بەناوی خوای بەخشندەی میھرەبان 

بەداخەوە شەوی رابردوو لەرێی درۆن و موشەکەوە ھێڕشی زۆرو کوێرانە لەلایەن سوپای پاسدارانی ئێرانەوە کرایە سەر شاری ھەولێرو بەھۆیەوە قوربانی گیانی و ماددی زۆری لێ کەوتەوەو چەندین ھاوڵاتی سیڤیل شەھیدو بریندار بوون.

ئێمە لە یەکێتی زانایانی ئایینی ئیسلامی کوردستان بە توندی ئیدانەی ئەم موشەکبارانە دەکەین و خوازیارین لە لایەنی پەیوەندیدار بەزوویی رێ لەو جۆرە ھەوڵە تێکدەرانە بگرن، خەڵکی خۆڕاگری کوردستان ئاشتی دەوێ بۆ ھەموو لایەک نەک بە درۆن و موشەک ھەوڵی شێواندنی سەقامگیری و ئارامی ھاوڵاتیانی بە ئامانج بگیرێ، داواش لە وڵاتی ئێران دەکەین وەک ئەرکێکی ئایینی و ئینسانی مافی دراوسێیەتی کوردستان بپارێزێت.

ھەر لێرەشەوە داوا لە سەرجەم وتاربێژانی بەرێزی ئایینی دەکەین لە وتاری ھەینی داھاتوو ئیدانەی ھێڕشەکە بکەن و نزای خێرو سەلامەتی و ئارامی بۆ کوردستان بکەن. 

یەکێتی زانایانی ئایینی ئیسلامی کوردستان 
١٦ی١ی٢٠٢٤

مەكتەبی سیاسی یەكێتی نیشتمانی كوردستان لە راگەیەندراوێكدا بڵاویكردەوە، هێرش بۆ سەر  هەولێری پایتەخت ناڕەوایەو ئیدانەی بە ئامانجگرتنی خەڵكی سیڤیل دەكەن.

راشیگەیاند، وەكو یەكێتی پێیانوایە هەر كێشەیەكی سیاسی و ئەمنی هەستیار لە نێوان وڵاتە دراوسێكاندا بەم شێوەیە تاكلایەنە و لە دەرەوەی تێگەیشتنی سیاسیی و ئەمنی هاوبەش، چارەسەر نابن و تەنها ئاڵۆزی و ژینگەی پەیوەندییە ئیقلیمییەكان تێكدەدەن.

مەكتەبی سیاسی یەكێتی دەڵێت، ئەركی سەرشانی حكومەتی فیدراڵییە هەوڵەكانی  چڕتر بكاتەوە بۆ داكۆكی لەسەر سەروەری وڵات و ئاسایشی هاووڵاتیان، پێویستە دامەزراوە رەسمییەكانی هەرێم و پارتە سیاسیەكانیش بەهەماهەنگی لەگەڵ حكومەتی عێراق رۆڵی زیاتر بگێڕن لە چارەسەركردنی كێشە هەڵپەسێردراوەكان.

هەروەها سەرەخۆشی ئاڕاستەی كەسوكاری شەهیدان بەتایبەتی خانەوادەی شەهید پێشڕەو دزەیی دەكات  و هیوای زوو چاكبوونەوە بۆ بریندارەكان دەخوازێت.

لە ڕاگەیەندراوێکدا لە بزوتنەوەی گۆڕان داوا دەکات لایەنە سیاسیەکانی ھەرێمی کوردستان بە یەکگرتویی و یەک گوتاری کوردستانی و کاری پێکەوەیی، وەڵامی ئەو مەترسی و ئاڵنگارییانە بدەنەوە کە ھەڕەشە لە ئاشتی و ئاسایش و سەقامگیری ھەرێمی کوردستان دەکەن.

ھاوکات کۆمەڵی دادگەریش دەڵێت، ئەمە یەکەم جارنیە ھەرێمی کوردستان دەکەوێتە بەر پەلاماری دەوڵەتانی دراوسێ، پێشێلی سەروەری خاکی عێراق و ھەرێمی کوردستانە.

داواکارە بەرپرسانی حکومەتی عێراقی فیدراڵ و حکومەتی ھەرێم ھەڵوێستی پێویست بگرنە بەر و ڕێگە نەدەن ھەرێمی کوردستان ببێتە مەیدانی یەکلایی کردنەوەی کێشەو ململانێی نێوان دەوڵەتان.

دەقی ڕاگەیەندراوەکەی وتەبێژی رەسمی یەکێتی نیشتیمانی کوردستان....

بەداخ و پەژارەیەکی زۆرەوە هەواڵی شەهید بوونی کاک پێشڕەو مەجید-مان بیست لە کارەساتەکەی شەوی رابردووی شاری هەولێر ، کاک پێشڕەو یەکێک بوو لەو کەسایەتیانەی تەنها بە توانا و ماندوبوونی خۆی پێگەیەکی ئابوری و کۆمەڵایەتی زۆر فراوانی لەناو هەرێمی کوردستان پێکهێنابوو ، خزمەتی زۆری خەڵکی دەکرد لە پێناو خۆشکردنی ژیانی مرۆڤ لە رێگای چالاکییە ئابوری و کۆمەڵایەتییەکانی دەژیا دوور لە هەموو تێوەگلانێک

غەدرێکی زۆر گەورەیە ، لە ژێر ناونیشانی جیا جیا خەڵکی بێ تاوان دەکرێنە ئامانج بۆیە هەرچی زووە حکومەتی عێراق و حکومەتی هەرێمی کوردستان، بەتایبەتیش لایەنە سیاسییەکانی هەرێمیش بەیەکگرتوویی هەموو جهودی سیاسی و دیبلۆماسی خۆیان بەکاربێنن بۆ دۆزینەوەی چارەسەرییەک و رێگرتن لەم جۆرە تاوانانە

خودا کاک پێشڕەو و شەهیدانی ئەم کارەساتە بەبەر رەحمەتی خۆی بخات و ئارامی بە کەس و کاریان ببەخشی 

سەعدی ئەحمەد پیرە 
وتەبێژی فەرمی یەکێتی نیشتیمانی کوردستان 
١٦/١/٢٠٢٤