ئەمڕۆ شەممە، فەرماندەیی ناوەندیی هێزەکانی ئەمریکا (سێنتکۆم)، لە ئێکس راگەیەندراوێکی بڵاوکردەوە کە تیایدا هاتووە: " بەهاوکاری و رێنمایی هێزەکانمان، هێزەکانی سوریای دیموکرات (هەسەد) توانیان لە هەڵمەتێکدا سەرکردەیەکی رێکخراوی داعش لە سوریا دەستگیربکەن.

لە راگەیەندراوەکەی سێنتکۆم دا هاتووە: لە میانی ئۆپراسیۆنەکەدا هێزەکانی سوریای دیموکرات دەستیانگرتووە بەسەر چەندین جۆری چەکدا، کە بریتین لە ژمارەیەک قەناس و 47 نارنجۆکی دەستی و چەک و تەقەمەنی جۆراوجۆر.

ئاماژەش بەوەدراوە: ئەم ئۆپراسیۆنە بە هاوکاری (هەسەدە) بەشێکە لە هەڵمەتی شکست هێنان بە داعش و تێکدانی تۆڕەکانیان و پێشگرتن لە سەرهەڵدانەوەی ئەو تاقمە تیرۆریستییە لە ناوچەکەدا. 

وابڕیارە رۆژی دووشەممە 17ـی ئازار، وەفدی دەمپارتی سەردانی ئاک پارتی(حزبەکەی ئەردۆغان) بکەن و پێوەند بە پرسی ئاشتی و گفتوگۆکردن لەسەر پەیامەکەی ئۆجەلان کۆببنەوە.

توڵای هاتیمۆغوللاری و تونجەر باکرهان هاوسەرۆکانی دەمپارتی، سەرۆکایەتی وەفدەکە دەکەن و تا ئێستا هیچ زانیارییەک لەبەرچاو نییە سەبارەت بە وردەکارییەکان.

بەگوێرەی ئەو زانیارییانەی ئاژانسی هەواڵی ئانکا بڵاوی کردووەتەوە، 17ـی ئازار، هاوسەرۆکانی دەم پارتی و وەفدی هاوڕێیان، لەگەڵ ئاک پارتی و مەهەپە(حزبەکەی دەوڵەت باخچەلی) کۆدەبنەوە و تاوتوێی پەیامەکەی ئۆجەلان دەکەن، سەبارەت بە پرسی ئاشتی لە تورکیا و چەکدانانی پەکەکە.

شایەنی ئاماژە پێدانە، دەوڵەت باخچەلی، سەرۆکی مەهەپە لە كۆبوونەوەی پارتەكەی لە پەرلەمانی توركیا لە 26ی مانگی 11 ی 2024 وتی، "چاوەڕێ دەکەین کۆبوونەوەی رووبەڕوو لە نێوان ئیمراڵی و دەم پارتی بەبێ دواکەوتن بەڕێوەبچێت." دواتر وەفدی دەم پارتی لە 28ی مانگی 12 ی 2024 لەگەڵ ئۆجەلان لە ئیمڕاڵی كۆبوونەوە و پەیامێكیان بڵاوكردەوە و دوا بەدوای ئەوەش دیدار و پەیامەکان درێژەیان کێشا تا رۆژی 27ـی 2ـی 2025، وەفدی دەم پارتی بۆ ئیمرالی، لە کۆنفرانسێکی رۆژنامەوانیدا نوێترین پەیامی ئۆجەلانیان خوێندەوە کە تیایدا داوای چەکدانان لە پەکەکە دەکات و دەڵێت: سەردەمی ئاشتی و دیموکراتیە.

سەرۆک وەزیرانی عیراق لە وەڵامی پرسیاری ئەندامێکی فراکسیۆنی یەکێتی، سەبارەت بە موچەی مانگی دووی موچەخۆرانی هەرێم، رایگەیاند: "لەم هەفتەیەدا موچەی فەرمانبەرانی هەرێمی کوردستان دەنێردرێت".

سروە محەمەد ئەندامی ئەنجومەنی نوێنەرانی عیراق لە فراکسیۆنی یەکێتیی نیشتمانیی کوردستان، بە کوردسات نیوزی راگەیاند، "لە کۆبوونەوەمان لەگەڵ محەمەد شیاع سودانی وەک لیژنەکانی ژنان، سەرۆک وەزیرانی عیراق پێی راگەیاندین کە لەم هەفتەدا موچەی موچەخۆرانی هەرێمی کوردستان دەنێرین".

ئەمە هاوکاتە لەگەڵ لێدوانی، سۆران عومەر ئەندامی ئەنجومەنی نوێنەرانی عیراق کە رایگەیاندبو، تەیف سامی وەزیری دارایی عیراق بۆ لیستی موچەی مانگی شوبات و مانگەكانی دواتر، جەختی لەسەر خێرا ناردنی زانیاری موچەخۆرانی هەرێم كردووەتەوە بە مەبەستی بەبانكیكردنی موچە بەپێی ئەو رێكارانەی كە لە بڕیاری دادگای باڵای فیدراڵی عیراقدا هاتووە.

لە بڕگەی لە رەمەزاندا هەر رۆژە و بابەتێک پەیوەست بە مانگی رەمەزان و رۆژوو باسدەکەین، ئەمڕۆش باس لەو رێنامییە گرنگانە دەکەین کە بۆ دابەزاندنی کێش لە مانگی رەمەزاندا دەبێت جێبەجێ بکرێن.

بچۆ سەر بەشی تەندروستیی سایتی کوردسات نیوز بۆ بینینی سەرجەم بڕگەکانی "لە رەمەزاندا"

مانگی رەمەزان جگە لە رووە ئایینییەکەی، سودی تەندروستی زۆر بە جەستەش دەگەیەنێت، زۆرن ئەو کەسانەشی دەیانەوێت لەم مانگەدا کێشی جەستەیان داببەزێنن.

دکۆر ئیسرا کەمال شا پزیشکی گشتیی و پسپۆڕی زانستی خۆراک 10 رێنمایی تایبەت بە دابەزاندنی کێش لە رەمەزاندا بڵاوکردووەتەوە.

دەقی رێنماییەکان:

1.پێویستە ئاو خواردنەوە لەبیر نەکرێت و لەدوای بەربانگەوە بە رێژەیەکی گونجاو ئاو بخورێتەوە، کە لەنێوان یەک لیتر و نیو بۆ دوو لیتر و نیودا بێت.

2.دوورکەوتنەوە لە خواردنەوەی شەربەت، بە تایبەت شەربەتە دەستکردەکان. هەروەها دوورکەوتنەوە لە خواردنی شیرینی و ئیشی هەویر و ساردەمەنییەکانی وەک ئایسکرێم.

3.یەک کاتژمێر پێش بەربانگ کاتێکی ئاڵتونییە بۆ وەرزشکردن، چونکە لەو کاتەدا جەستە زۆرترین چەوری دەسووتێنێت، بەڵام پێویستە ئەو وەرزشەی ئەنجام دەدرێت وەرزشێکی قورس و خێرا نەبێت.

4.پێویستە خواردن لەکاتی بەربانگدا قۆناغ بە قۆناغ بێت و هەموو خواردنەکان لە یەک کاتدا نەخرێنە سەر مێزی نانخواردن، گرنگە کاتی نانخواردن یەک کاتژمێری پێ بچێت و بە لەسەرخۆیی نان بخورێت، بۆ نموونە سەرەتا دەنکێک خورما و ئاو رۆژووی پێ بشکێنرێت، دواتر نوێژ بکرێت و شۆربایەک بخورێت، پاشان زەڵاتە و ژەمی سەرەکی، کە گرنگە لە نێوان هەریەک لەو خواردنانەدا ماوەیەک لەنێوانیاندا هەبێت و بەسەر یەکەوە نەخورێن.

5.ئەنجمامدانی چالاکی لەدوای خواردن زۆر گرنگە، پێویستە دوو سەعات دوای بەربانگ چالاکییەک ئەنجام بدرێت، وەک رۆیشتن بە پێ یان راکردن یان وەرزشکردن.

6.دوای بەربانگ تاوەکو کاتی پارشێو نابێت بەردەوام شت بخورێت.

7.ئەگەر زۆر پێویستت بەوە بوو سوکە ژەمێک بخۆی لەنێوان ژەمی ئێوارە تاوەکو پارشێو، وا باشترە تەندروست بێت و بڕێکی دیاری کراو بێت، ئەگەر میوە بێت ئەوا هەر رۆژە و یەک جۆری میوە، لەگەڵیدا کاهوو یان خەیار بخورێت، ئەگەر میوەش نەبوو کەمێک چەرەسات یان بەقەدەر قاپی ماست زەڵاتەی میوە.

8.نەخەوتن تاوەک پارشێو هەڵەیەکی زۆر باوە، پێویستە کەسەکان لەکاتی خۆیدا بخەون و بۆ پارشێو هەڵبستنەوە. ئەگەر ئەو کەسانەشی جۆری جەستەیان بەو شیوەیەیە کە هەست دەکەن بە خواردنی ژەمی پارشێو لە رۆژدا زیاتر برسییان دەبێت، ئەوا تەنها ئاو بخۆنەوە.

9.پێویستە لە پارشێودا خواردنێکی سوک بخورێت، خواردنی قورس و چەور، شیرینی و ئیشی هەویر، خواردنی سوێر و سورکراوە و لە قوتونراو، یان ئەو ژەمەی بۆ بەربانگ ئامادە کراوە، ئەو خواردنانەن زیان بە جەستە دەگەیەنن.

10.باشترین خواردنەکان بریتین لە: پەنیر، هێلکە، زەیتون، ماست بە تۆوی شیا یان کەتان لە هەڵبژاردە باشەکانن. پێویستە ئەو خواردنانە بخورێت کە رێژەی پرۆتین و چەوری سودبەخشیان تێدایە، کە ئەوانە وادەکەن رۆژووەوانان زوو برسییان نەبێتەوە.

توركیا بەردەوامە لە بۆردومانكردنی بەنداوی تشرین، هاووڵاتییانیش نزیكەی دوو مانگە پشتێنی مرۆییان بۆ پاراستنی بەنداوەكە دروستكردووە.

سوپای توركیا دەوروبەری بەنداوی تشرینی بۆردومانكرد، بەیانی ئەمڕۆ  بەشێكی دانیشتوانی شارەكانی قامیشلۆ و دێرك و تربەسپی و عامودا و تل حەمیس لە كانتۆنی جزیرە، رۆیشتنە بەنداوی تشرین بۆ بەشداریكردن لە پاراستنی بەنداوەكەدا.

ئەوەش لە كاتێكدایە ئەمڕۆ 59 رۆژە بەشێكی زۆری دانیشتوانی هەرێمەكانی باكوور و رۆژهەڵاتی سوریا، بۆ پشتیوانیكردن لە هێزەكانی سوریای دیموكرات "هەسەدە" و پاراستنی بەنداوەكە لە هێرشەكانی توركیا و گروپە چەكدارەكان، روویان لە بەنداوی تشرین كردوە، لەو ماوەیەشدا بەهۆی بۆردومانەكانی توركیاوە 25 هاووڵاتی شەهید بوون و 221 هاووڵاتی تریش برینداربوون.

کەشناسیی هەرێم رایگەیاند، لەمڕۆوە شەپۆلێکی بارانبارینی بەلێزمە بە هەورەتریشقەوە ناوچە جیاوازەکانی هەرێم دەگرێتەوە و لە ناوچە شاخاوییەکانی پارێزگای هەولێر بەفر و کڕێوە دەبێت.

کەشناسیی هەرێم رایگەیاندووە، ئەمڕۆ هەینی، ئاسمان بەگشتى هەور دەبێت، لە کاتەکانی ئێوارە لە پارێزگاکانی سلێمانی و هەڵەبجە و کەرکوک و ئیدارەی گەرمیان باران بەشێوەی نمەباران و مامناوەند دەبارێت. پاشان لە کاتەکانی درەنگانی شەو کاریگەری دابارین زیاتر دەبێت و زۆربەی ناوچەکانی هەرێم دەگرێتەوە، کە هەندێک کات بەشێوەی لێزمەباران و هەورەتریشقە دەبێت.

کەشناسی دەشڵێت، هەر ئەمڕۆ پێشبینی دەکرێت لە ناوچە شاخاوییە سنوریەکانی پارێزگای هەولێر کەمێک بەفر ببارێت و کڕێوە ببێت. بە گشتیی ئەمڕۆ لە هەرێمی کوردستان پلەکانی گەرما کەمێک بەرزتر دەبنەوە بەراورد بە دوێنێ.

راشیگەیاندووە، سبەینێ شەممە، ئاسمان هەوری تەواو دەبێت لە کاتەکانی بەیانی زوودا بارانی مامناوەند دەبارێت پاشان دەگۆڕیت بۆ نمەبارانی پچڕپچڕ لە هەندێک ناوچە، بەڵام کاریگەری دابارین زیاتر دەبێت لە سنوری پارێزگای سلێمانی و هەڵەبجە و ئیدارەی گەرمیان، هەندێک کات لەم ناوچانە باران بە شێوەی لێزمە باران و هەورە تریشقە دەبێت .

کەشناسیی هەرێم ئاماژەی بەوەشکردووە، سبەینێ پلەکانی گەرما 2 بۆ 4 نزم دەبنەوە.

بەرزترین پلەکانی گەرمای پێشبینیکراو بە پلەی سیلیزی:

هەولێر: 19  پلەی سیلیزی

سلێمانی: 16 پلەی سیلیزی

دهۆک: 20  پلەی سیلیزی

کەرکوک: 19 پلەی سیلیزی 

زاخۆ: 22 پلەی سیلیزی

هەڵەبجە: 14 پلەی سیلیزی

سۆران: 15 پلەی سیلیزی

حاجی ئۆمەران: 5 پلەی سیلیزی

گەرمیان: 21 پلەی سیلیزی

کارەبای سلێمانی رایگەیاند، پڕۆژەی رووناکی چووە بواری جێبەجێکردنەوە و شەوی رابردوو کارەبای 24 کاتژمێری بۆ نۆ هەزار هاوبەشی کارەبا دانرا.

بەڕێوەبەرایەتی گشتیی کارەبای سلێمانی رایگەیاند، شەوی رابردوو، بە ئامادەبوونی بەرپرسانی بەڕێوەبەرایتی گشتی کارەبا و ستافی پڕۆژەی رووناکی، یەکەم قۆناغی پڕۆژەکە چووە بواری جێبەجێکردنەوە.

ئاماژەی بەوەشکردووە، یەکەم قۆناغ لە هەردوو وێستەی ناوەندی شار و مەڵکەندی جێبەجێکرا و لەم قۆناغەدا نزیکەی نۆ هەزار هاوبەشی کارەبای ماڵان و بازرگانی سودمەند دەبن.

ئەوەشی خستووەتە روو، ئەو نۆ هەزار هاوبەشە لەسەر هەشت فیدەر کارەبای بەردەوامیان بۆ دابینکرا، کە دەکەونە گەڕەکەکانی سەرکارێز، توی مەلیک، سابونکەران، مەڵکەندی، ئیبراهیم پاشا، دارۆغا، حاجی حان، شەقامی ئۆرزدی، ئەسحابەسی و شەقامی کاوە.

کارەبای سلێمانی راشیگەیاندووە، پڕۆژەی رووناکی لە سليمانی بەردەوام دەبێت و لە ئایندەیەکی نزیکدا قۆناغەکانی دیکە لە سەرجەم گەڕەکەکان دەچێتە بواری جێبەجێکردنەوە.

ئەمڕۆ ئەو لێخۆشبوونەی ئەمریكا كۆتایی دێت كە رێگە بە عیراق دەدات بۆ كڕینی غاز و كارەبا لە ئێران.

لەگەڵ وادەی تەواوبوونی ئەو رێگەپێدانە، وەزارەتی گەنجینەی ئەمریكا دەیەوێت پێداچوونەوە بە بڕیارەكەدا بكات، بەو پێیەی عێراق ترسی هەیە لە وەرزی هاویندا قەیرانی بەرهەمهێنانی كارەبای بەهۆی نەبوونی غازەوە زیاتر لەسەر قورس ببێت.

تامی بروس وتەبێژی وەزارەتی دەرەوەی ئەمریكا لەو بارەوە ڕایگەیاندووە، پێداچوونەوە بۆ هەموو ئەو لێخۆشبونانە دەكرێت كە پاڵپشتی بۆ ئابووری ئێران دەكەن، داواش لە حكومەتی عیراق دەكات بە زووترین كات كۆتایی بە پشتبەستن بە سەرچاوەی وزەی ئێران بهێنێت، هاوكات ستایشی پابەندبوونی سەرۆك وەزیرانی عیراقی كرد بۆ هەوڵدان بە گەیشتن بە سەربەخۆیی وزە.

بەپێی دوو سەرچاوەی ئاگادار، ئەمریكا لێخۆشبوونەكان نوێ ناكاتەوە بە ئامانجی زیادكردنی فشارەكان لەسەر بەغداد بۆ ئەوەی سیاسەتی زۆرترین فشار لەسەر كەرتی نەوت و وزەی ئێران جێبەجێ بكات و لەو چوارچێوەیەشدا رێگری لە فرۆشتنی نەوتی ئێران بكات، لە پێناو رێگری لە بەرزبوونەوەی نرخی نەوتیش لە بازاڕەكانی جیهان، بەغداد نەوتی هەرێم وەكو جێگرەوەیەك بۆ نەوتی ئێران هەناردە دەكات.

ئیدارەی خۆبەڕێوەبەری لە باكور و رۆژهەڵاتی سوریا راگەیەنراوێكی سەبارەت بە شەڕ و پێكدادانەكانی سوریا بۆ رای گشتی بڵاوكردەوە و ئاماژەی بۆ ئەوەكردووە، گرژی و پێكدادان لەنێوان گروپە چەكدارەكانی سەر بە رژێمی پێشوی سوریا و هێزەكانی حكومەتی نوێی سوریا پەرە دەسەنێت.

راشیگەیاندووە، ئیدارەی خۆبەڕێوەبەری لە باكور و رۆژهەڵاتی سوریا نیگەرانە لە شەرو پێكدادانەكان و هۆكاری گرژییەكانیش دەگەڕێنێتەوە بۆ خوێندنەوەی هەڵەی واقیعی سوریا لەلایەن دەسەڵاتدارانی دیمەشق و رەچاونەكردنی هەستیاریی رەوشی سوریا.

ئیدارەی خۆبەڕێوەبەری داوا لە هەموو لایەنەكانی سوریا دەكات ئەو گرژی و ئاڵۆزییانە رابگرن، چونكە بە تەنیا خەڵكی سوریا باجی پێكدادانەكان دەدات.

جەخنی لەوەشكردوەتەوە، سوریا پێویستی بە دیالۆگێكی نیشتمانی راستەقینە هەیە بۆ گفتوگۆكردن لەسەر ڕێگاكانی گەیشتن بە سەلامەتی و چارەسەركردنی هەموو ئەو دژایەتی و كێشە و گرفتانەی كە لە نێوان هێزەكانی سوریادا هەڵپەسێردراون، هاوكات داوا لە گەلی سوریاش دەكات لە پشتی ئەو كەسانەوە رانەوەستن كە هەوڵی هەڵگیرسانی شەڕی ناوخۆ دەدەن.

گروپێكی چەكدار، كە بەپێی زانیارییە میدیاییەکان، سەر بە رژێمی بەشار ئەسەدن، هێرشیان بۆ سەر هێزەكانی حكومەتی نوێی سوریا دەستپێكرد و لە پەلامارێكدا لە نزیك شاری جەبلە 19 كەس كوژران. 

روانگەی سوری بۆ مافەكانی مرۆڤ رایگەیاند، گروپێكی چەكدار كە دەوترێت سەر بە رژێمی بەشار ئەسەدن لە نزیك گوندەكانی (بێت عانا و دالیە) لە دەوروبەری شاری جەبلەی سەر بە پارێزگای لازقیە لە رۆژئاوای سوریا، لە بۆسەیەكدا هێرشیان كردە سەر بازگەیەكی سەر بە بەڕێوەبەریەتی ئاسایشی گشتی و ئۆتۆمبێلی چەند هاوڵاتییەكی مەدەنی،  بەهۆیەوە 19كەس لە هێزەكانی ئاسایش و هاووڵاتیانی مەدەنی كوژران.

هەروەها ئاسایشی گشتی سوریا رایگەیاند، دوای بەدواداچوون و چاودێریكردنی چڕ توانیویانە (لیوا ئیبراهیم حەویجە) سەرۆكی پیشووی دەزگای هەواڵگری ئاسمانی سوریا دەستگیر بكەن كە تۆمەتبارە بە ئەنجامدانی هێرشەكە و لە رابردووشدا چەندین كەیسی تیرۆری بۆ كراوەتەوە، لەوانە تیرۆركردنی (كەمال جومبلات) لە سەردەمی رژێمی حافز ئەسەددا.

وەزارەتی بەرگری سوریا راشیگەیاند، هێزێكی گەورەی پشتیوانیان بۆ ناوچەكە ناردووە بۆ پاراستنی ئاسایش و ئاساییكردنەوەی رەوشەكە. 

لای خۆشییەوە، سەرۆکی روانگەی سوری بۆ مافەکانی مرۆڤ رایگەیاندووە؛ گرژی و ئاڵۆزییەکان لە سەر دەستگیرکردنی کەسێک لەلایەن ئاسایشەوە دروستبووە.

دوانیوەڕۆی ئەمڕۆ لە بنکەیەکی سەربازی سەر بە سوپای پاسدارانی لە تاران، تەقینەوەیەک رویدا کە بووە هۆی کوژرانی کەسێک و برینداربوونی 10کەسی دیکە.

هێزی دەریایی سوپای پاسداران لە راگەیەندراوێکدا ئامەژەی بە ئاگرکەوتنەوەیەک داوە و رایگەیاندووە، "بەهۆی ئاگرکەوتنەوە لە یەکێک لە بنکەکانیان، کەسێک کوژراوە و چەند کەسی دیکەش بریندار بوون"، بەڵام ئاماژەی بە شوێن و هۆکاری تەقینەوەکە نەکردووە.

وردەکاری روداوەکە:

جەلال مەلەکی، گوتەبێژی ئاگرکوژێنەوەی تاران، لەبارەی روداوەکەوە رایگەیاند، "دوانیوەڕۆی ئەمڕۆ ژوورێکی کانێکس (پلاستیکی) لە ناوەندی سەربازی لە شاڕێی یاسینی سەرووی ناوچەی کولاهدوز ئاگری گرتووە و تیمەکانی سێ وێستگەی ئاگرکوژێنەوە بۆ کوژاندنەوەی رەوانەی شوێنەکە کران."

مەلەکی وتیشی "بەهۆی داخراوی شوێنەکە و گەرمای زۆر، ژوورەکە تەقیوەتەوە و بەهۆیەوە سەربازێک کوژراوە و 10ی دیکەش بریندار بوون."

کۆمەڵەی پیشەسازی نەوتی کوردستان (ئەپیکۆر) رایگەیاند، ئامادەن بۆ دووبارە هەناردەکردنەوەی نەوتی هەرێمی کوردستان لە رێگەی بەندەری جەیهانی تورکییەوە، بەڵام بەچەند مەرجێک.

ئەپیکۆر لە راگەیەندراوێکدا کە ئەمڕۆ پێنجشەممە دوای کۆبوونەوەی لەگەڵ وەزارەتەکانی نەوتی فیدراڵ و سامانە سروشتییەکان، بڵاویکردەوە، ئاشکرای کرد چاوەڕێی رێککەوتنی نوێین لەبارەی هەناردەکردنەوەی نەوت.

لە راگەیەندراوەکەدا هاتووە: "پابەندبوونی خۆمان بە دووبارە هەناردەکردنەوەی نەوتی هەرێمی کوردستان دووپات دەکەینەوە، بەڵام بەو مەرجەی ئەگەر داواکارییەکانمان جێبەجێ بکرێن."

کۆمەڵەی پیشەسازی نەوتی کوردستان جەختیشی کردەوە: "پێویستە ناوەرۆکی هەمواری یاسای بودجە وەک خۆی جێبەجێ بکرێت و بە زووترین کات قەرزەکانمان پێ بدرێتەوە."

هەروەها گوتیشی: "پێویستە هاوشێوەی بەرهەمهێنەرانی نەوت لە عیراق، مامەڵە لەگەڵ وەبەرهێنەرانی هەرێمی کوردستانیش بکرێت."

بەپێی ڕاگەیەندراوەکە، رێککەوتنی کۆتایی لەسەر دووبارە هەناردەکردنەوەی نەوت، پێویستی بە کۆبوونەوەی زیاترە لەنێوان لایەنە پەیوەندیدارەکان.

حکومەتی هەرێم بڵاویکردەوە، لە چوارچێوەی هەوڵەکانمان بۆ دابینکردنی کارەبای 24سەعاتی، وەزارەتی کارەبا وەک قۆناغێکی ئەزموونی، لە ڕێگای "پڕۆژەی روناکی" دەستی کرد بە دابینکردنی کارەبای نیشتیمانیی24 سەعاتی بۆ بازاڕی سلێمانی و کۆمەڵێک گەڕەک.

گەڕەکەکانی (ئیبراهیم پاشا، سابونکەران، دارۆغا، حاجی حان، مەولەوی، جادەی ئۆرزدی، سەلیم بەگ و خانەقا) کە زیاتر لە 9000هاوبەشی کارەبا لەخۆ دەگرن، سوودمەند دەبن لەم خزمەتگوزارییە.

بەپێی زانیارییەکانی کوردسات نیوز، ئەم هەنگاوە دوای ئەوە دێت کە پێشتر 17گەڕەکی شاری هەولێر کارەبای 24سەعاتی لەلایەن پڕۆژەی روناکیەوە بۆ دابین کرا، بەڵام بەهۆی زۆر هاتنەوەی پارە بۆ هاوبەشانی پرۆژەکە، نارەزایەتی هاووڵاتیانی شاری هەولێری لێکەوتەوە و تەنیا لە گەڕەکی شادی لەماوەی 42 رۆژدا بڕی 691 هەزار دینار بۆ ماڵی هاوڵاتییەک هاتبوەوە. 

بەریتانیا بڕیاریدا سزاكانی سەر سوریا لەنێویشیاندا سزاكانی سەر بانكی ناوەندی ئەو وڵاتە هەڵبگرێت.

بەپێی بەڵگەنامەیەك كە لە ماڵپەڕی گەنجینەی بەریتانیا بڵاوكراوەتەوە، حكومەتی بەریتانیا سزاكانی سەر 24 قەوارەی سوریای هەڵگرتووە، لەنێویشیاندا بانكی ناوەندی و ژمارەیەك بانك و چەند كۆمپانیایەكی نەوت كە بریتین لە فورات، دێرەزوور، ئیبلا، كۆمپانیای گشتی نەوت، كۆمپانیای مەحروقات، كۆمپانیای گواستنەوەی نەوتی سوریا، كۆمپانیای نەوتی سوریا، كۆمپانیای گشتی بۆ پاڵاوگەی حومس و كۆمپانیای پاڵاوگەی بانیاس.

هەر لەو چوارچێوەیەدا، سزاكانی سەر هێڵی ئاسمانی عەرەبی سوریاش هەڵگیران جگە لە 8 بانك كە لەنێویاندا بانكی پیشەسازی و بانكی بازرگانی سوریا هەیە.

مانگی ڕابردوو وڵاتانی یەكێتی ئەوروپا ڕێككەوتن لەسەر راگرتنی كۆمەڵێك سزای سەر سوریا، لەوانەش كەرتی وزە، گواستنەوە و بیناسازی، جەختیان لەوەشكردەوە، بەردەوام دەبن لە چاودێریكردنی دۆخی سوریا بۆ دڵنیابوون لە گونجاوی هەڵپەساردنی سزاكان.

دوای تێپەڕبوونی زیاتر لە چوار ساڵ و 5مانگ بەسەر زیندانیکردنیدا، رۆژنامەنووس شێروان شێروانی، یەکێک لە گیراوەکانی کەیسی بادینان، رۆژی یەکشەممەی داهاتوو ئازاد دەکرێت.

بارزان شێروانی، برای شێروان شێروانی، لە لێدوانێکی تایبەتدا بە کوردسات نیوزی راگەیاند: "بڕیارە رۆژی یەکشەممە سزای برایەکەم تەواو ببێت و دوای تێپەڕبوونی 1612 رۆژ لە زیندانی، ئازاد بکرێت".

بارزان شێروانی ئەوەشی خستەڕوو کە بەپێی بڕیاری دادگا، دەبێت رۆژی 9ـی مانگ شێروان ئازاد بکرێت و وتیشی: "تا ئێستا نازانرێت هیچ کەیسێکی تر لەسەر شێروان شێروانی دەکرێتەوە یان نا، ئێمەش چاوەڕێی چاکسازی هەولێر و دادگا دەکەین".

شایەنی باسە، شێروان شێروانی رۆژنامەنووس و یەکێک لە گیراوەکانی کەیسی بادینانە کە لە سەرەتای ساڵی 2020ـەوە لە زینداندایە.

ناوی ترەمپ لە ساڵانی پێشووتریشدا وەک کاندیدێک دەرکەوتووە، بەڵام کاندیدکردنی لە ئەمساڵدا زیاتر جێگەی مشتومڕە، بە تایبەتی لە پاش هەڵوێستە دژ بەیەکەکانی ئەم دواییەی پەیوەست بە پرسی کۆچبەران و راگواستنی خەڵکی غەززەو جەنگی ئۆکراینەوە. 

ئەمساڵ زیاتر لە 300 کەس و دامەزراوە، کاندید کراون بۆ وەرگرتنی خەڵاتی نۆبڵ بۆ ئاشتی، رێکخەرانی ئەمساڵیش رایانگەیاند، بەرپرسانی سیاسی دامەزراوەکە، دۆناڵد ترەمپ سەرۆکی ئەمریکایان کاندید کردووە بۆ وەرگرتنی خەڵاتی نۆبڵ بۆ ئاشتی.

بەپێی ئامارەکانی دامەزراوەی نۆبڵ، ژمارەی پاڵێوراوانی خەڵاتی نۆبڵ بۆ ئاشتی گەیشتووەتە 338 کەس، کە 244 کەسیان کەسایەتین و 94 یان دامەزراوەن، ئەمەش لەچاو ساڵی پێشوو کە ژمارەکە 286کەسە، زیاد بوونێکی بەرچاوە.

ڕۆژی دووشەممە دارێل عیسا ئەندامی کۆنگرێسی ئەمریکا لە پۆستێکدا لە پلاتفۆرمی “X” رایگەیاند: ترەمپ کاندید دەکات بۆ وەرگرتنی خەڵاتەکە و ئاماژەی بەوەشکرد “کەس لە ئەو زیاتر شایەنی ئەوە نییە”.