هەواڵەکان
کەشناسیی هەرێم پێشبینی نوێی بۆ کەشوهەوای ئەمڕۆ و سبەی راگەیاند و ئاماژەی بەوەکردووە، کاریگەریی نزمەپاڵەپەستۆی دەریای سوور لەسەر چەند ناوچەیەکی هەرێم دەبێت و باران دەبارێت.
کەشناسیی هەرێم رایگەیاندووە، ئەمڕۆ چوارشەممە، ئاسمان نیمچە هەوردەبێت پاشان لە ئێوارەدا دەگۆڕێت بۆ هەورى تەواو، لەگەڵ هاتنى کاریگەرى نزمە پاڵەپەستۆی دەریای سوور بۆسەر ناوچەکانى باشوورى هەرێم و ئیدارەى گەرمیان و هەڵەبجە و سەنتەرى پارێزگاى سلێمانى و ناوچە کانى رۆژهەڵاتى شارەکە و دەستپێکردنى بارینى نمەباران لەو ناوچانە بەتایبەت لە کاتەکانى درەنگانى شەودا، بەڵام لە هەردوو پارێزگای دهۆک و هەولێر و ناوچەکانى پێشبینى باران بارین زۆر لاوازە.
ئاماژەی بەوەشکردووە، سبەینێ پێنجشەممە، ئاسمان دەبێتەوە بە نیمچەهەور و پەڵەهەور.
ئەوەش هاتووە، ئەمڕۆ پلەکانی گەرما هاوشێوەی دوێنێ دەبن و سبەینێش 1 بۆ 2 پلەی سیلیزی بەرز دەبنەوە.
بەرزترین پلەکانی گەرمای پێشبینیکراو بە پلەی سیلیزی :
هەولێر: 21 پلەى سیلیزى
سلێمانی: 19 پلەى سیلیزى
دهۆک: 20 پلەى سیلیزى
کەرکوک: 2 پلەى سیلیزى
زاخۆ: 21 پلەى سیلیزى
هەڵەبجە: 16 پلەى سیلیزى
حاجی ئۆمەران: 9 پلەى سیلیزى
سۆران: 18 پلەى سیلیزى
گەرمیان: 23 پلەى سیلیزى
شاناز ئیبراهیم ئەحمەد خانمی یەکەمی عیراق لە یادی راپەڕیندا پەیامێکی بڵاوکردەوە و رایگەیاند؛ پابەندبوونی خۆمان دووپات دەکەینەوە کە جارێکی تر هیچ هاوڵاتییەکی عێراق بەدەست ستەمکارانەوە نەناڵێنێت.
دەقی پەیامەکەی :
پێنجی ئازاری ساڵی 1991، بوێری ڕووبەڕووی ستەمکاری بۆوە.
لەم ڕۆژەدا گەلی کورد دژی ڕەفتاری دڕندانەی ڕژێمی سەددام ڕاپەڕی. ئەمەش بووە شۆڕشێکی نیشتمانی لەپێناو ئازادیدا. شانبەشانی شۆڕشگێڕانی ڕاپەڕینی شەعبانییە لەباشوور، کە پەیامی میللەتی بەڕوونی دەرخست: گەلی عیراق هەرگیز چەوساندنەوە و سەرکوتکردن و کۆمەڵکوژی یان لەناوبردنی شارستانییە دێرینەکەی قبوڵ ناکات. لەو پێناوەشدا باجی قورسی دا، بەڵام بوێری گەل و ڕۆحیەتی برایەتیی هێشتا زیندووە.
ئەمڕۆ ڕێز لەو قوربانیدان و بەرگەگرتنە دەگرین، پابەندبوونی خۆمان دووپات دەکەینەوە بۆ دوا ڕۆژێک کە جارێکی تر هیچ هاوڵاتییەکی عێراق بەدەست ستەمکارانەوە نەناڵێنێت.
توركیا بە عیراقی وتووە، بۆری نەوتی هەرێمی كوردستان ئامادەیە بە مەبەستی وەرگرتنی نەوت بۆ بەندەری جەیهان و پشكنینی بۆ كراوە.
باسم محەمەد خزەیر بریكاری وەزارەتی نەوتی عیراق بۆ كاروباری نەوت رایگەیاند، توركیا ئاگاداری كردوونەتەوە بۆری نەوت بۆ بەندەری جەیهان ئامادەیە بۆ گواستنەوەی نەوتی هەرێمی كوردستان و پشكنین بۆ هەناردەكردنی نەوت كراوە و تەواو بووە.
وتیشی، وەزارەتی نەوت هەموو ئەركەكانی جێبەجێ كردووە، چاوەڕێی هەرێمیش دەكەن گڵۆپی سەوز بۆ دیاریكردنی وادەیەك بەمەبەستی هەناردەكردنی 185 هەزار بەرمیل نەوت لە رۆژێكدا، بۆئەوەی بگاتە ئەو بڕەی لە بودجەی فیدراڵیدا دیاریكراوە.
راشیگەیاند، هەمواركردنی یاسای بودجە حكومەتی هەرێمی كوردستانیش پابەند دەكات بە رادەستكردنی بەرهەمی نەوتی خۆی بە كۆمپانیای سۆمۆ.
هاتوچۆی هەرێم نرخی نوێی بۆ وانەکانی دەرهێنانی مۆڵەتی شۆفێری بە هەردوو وانەی تیۆری و پراکتیکییەوە دیاری کرد.
هاتوچۆی هەرێم رایگەیاندووە، بۆ ئەو کەسانەی دەیانەوێت مۆڵەتی شۆفێری لە جۆری B دەربکەن، کە مۆڵەتی شۆفێری ئۆتۆمبێلی تایبەت دەگرێتەوە، چەند نرخێکی دیاری کردووە، داواش لە نووسینگەکانی دەرهێنانی مۆڵەتی شۆفێری دەکات، پابەندی نرخەکە بن.
بەپێی راگەیەنراوەکە، بۆ هەر وانەیەکی تیۆری 45 خولەکی، بڕی 3 هەزار دینار لە فێرخواز وەردەگیرێت.
بۆ هەر وانەیەکی پراکتیکی یەک سەعاتیش بڕی 20 هەزار دینار لە فێرخواز وەردەگیرێت.
هاتوچۆی هەرێم راشیگەیاندووە، پێویستە سەرجەم نوسینگەکان پابەندی بڕیارەکە بن و دەشڵێت، دەبێت فێرکردن بەو میکانیزمە بێت، کە لە رێنمایی ژمارە 12ی ساڵی 2024 دیاریکراوە.
پێشتریش هاتوچۆی هەرێم رایگەیاند، سیستمی نوێ بۆ دەرهێنانی مۆڵەتی شۆفێری دیاری کراوە و رێنماییەکانی بڵاو کردەوە. بەپێی سیستمە نوێیەکە، دەبێت فێرخوازان 21 سەعات وانەی تیۆری و 12 سەعاتیش وانەی پراکتیکی بخوێنن.
لە هێرشێکی ئاسمانی ئیسرائیلدا بۆ سەر ناوچەی تایر لە باشووری لوبنان، سەرکردەیەکی دیار لە هێزی ڕەدوانی سەربە حیزبوڵڵا کوژرا.
ئاژانسەکانی هەواڵ رایانگەیاند: “ فڕۆکەکانی ئیسرائیل لە هێرشێکدا بۆسەر ناوچەی رەشکانانیە لە لوبنان ئەندامێکی باڵای هێزی رەدوانیان لەناو ئۆتۆمبێلەکەیدا کوشت".
سەرەڕای ئەوەی لە 27ـی تشرینی دووەمی 2024 بە نێوەندگیری ئەمریکا حیزبوڵا و ئیسرائیل گەیشتنە رێککەوتنی ئاگربەست، بەڵام هێشتا بەردەوامە لە هێرشەکانی بۆسەر چەند ناوچەیەکی لوبنان و بە ئامانج گرتنی ئەندامانی حیزبوڵا.
بەپێی نوسراوێکی فەرمی وەزارەتی ئاوەدانکردنەوە و نیشتەجێکردن و شارەوانییەکانی عیراق، بەڕێوەبەری دوو فەرمانگە لە شاری کەرکوک لە پۆستەکانیان دورخرانەوە.
لە نووسراوەکەدا هاتووە (ئارام عەلی محەمەد) لە پۆستی بەڕێوەبەری شارەوانییەکانی کەرکوک لابراوە و (ئاری سەیفەدین یەحیا) بۆ ماوەی ساڵێک وەک جێگرەوەی ئەو دەستنیشانکراوە.
هەروەها (ئیحسان وەهبی ساڵح) لە پۆستی بەڕێوەبەری ئاوەڕۆی کەرکوک لابراوە و (زاگرۆس جان وەلی) بۆ ئەو پۆستە دەستنیشانکراوە. ئاماژە بەوەشدراوە؛ ئەم گۆڕانکارییانە بە مەبەستی باشترکردنی کارکردنی فەرمانگەکانی شارەوانی و ئاوەڕۆی کەرکوک ئەنجامدراون.
سەبارەت بە ململانێی ئۆکراین ئەدریان مەکرای، ئەندامی ئەنجومەنی پۆرت هێدلاند رایگەیاند، پێویستە ئەمریکا قەرەبووی هەموو لایەنەکان بکاتەوە کە لە ململانێی ئۆکراین زەرەرمەند بوون، بە روسیاشەوە.
ئەو نوێنەرەی ئوستورالیا، وتی: "واشنتۆن ئەو وڵاتە بوو لە ساڵی 2014وە بەرێوەبردنی ململانێکانی ئۆکراینی گرتە دەست و پشتگیری لێکرد، بۆیە پێویستە هەر ئەویش ئەو لایەنەبێت، کە قەرەبووی هەموان دەکاتەوە".
پەیوەست بە لێدوانەکانی ئەم دواییەی ترەمپەوە، کە گوایە ململانێکانی ئۆکراین خەتای زێلێنسکییە، دەڵێت: لێدوانەکانی لەگەڵ واقیعدا ناگونجێت، چونکە واشنتۆن ئەو وڵاتە بوو لە پشت فراوان بوونی ململانێکانی ئۆکراینەوە بوو.
وتیشی: ئەمریکا لە ساڵی 2014دا بە کودەتایەک دەستی بەسەر ئۆکرایندا گرت و لە دوورەوە کۆنترۆڵی کرد و خستیە ناو شەڕێکەوە کە ئامانج لێی ماندووکردنی روسیابوو، ئەوە ئۆکراین نییە کە پارەی ئەمریکا قەرزدارە، بەڵکو واشنتۆنە کە قەرزاری ئۆکراین و ڕوسیا و وڵاتانی ڕۆژهەڵاتی ناوەڕاستە.
لەسەر هەناردەكردنەوەی نەوتی هەرێم، وەزارەتی نەوتی عیراق و وەزارەتی سامانە سروشتییەكانی هەرێم و ئەپیكۆر ئەمڕۆ لە بەغداد كۆدەبنەوە، لیژنەی نەوت و وزەی ئەنجومەنی نوێنەرانیش دەڵێت، هیوادارن لە چەند رۆژی داهاتوودا هەناردەكردنەوەی نەوت لەڕێی بۆری نەوتی جەیهان دەستپێبكاتەوە.
وەزارەتی نەوتی عیراق ئەمڕۆی بۆ كۆبوونەوەیەك لەگەڵ وەزارەتی سامانە سروشتییەكانی هەرێم و ئەپیكۆر دیاری كردووە، بۆ تاوتوێ كردنی پرسەكانی تایبەت بە گرێبەستەكان و لێكتێگەیشتن سەبارەت بە پەرەدان بە كێلگە نەوتییەكان.
هاوكات سەباح سوبحی ئەندامی لیژنەی نەوت و وزە و سامانە سروشتییەكان لە ئەنجومەنی نوێنەرانی عیراق بە رۆژنامەی "سەباح"ی وتووە، وەزارەتی نەوت لیژنەی تایبەتی رەوانەی زاخۆ كردووە بۆ دڵنیابوونەوە لەسەرجەم بۆریە نەوتییەكان كە لە كێڵگەی كۆرمۆرەوە دەگەن بەرەو خاكی توركیا.
هەروەها ئاماژەی بەوەكرد، سەرجەم رێكارەكانی تایبەت بە دەستپێكردنەوەی هەناردەی نەوتی هەرێم لەڕێی بۆری نەوتی جەیهان تەواو بووە، بەڵام عیراق چاوەڕێی وەڵامی توركیایە سەبارەت بە رەوشی ئەو بۆرییانە و دەستپێكردنەوەی هەناردەكردنەكە لە ماوەی چەند رۆژی داهاتوودا.
كۆشكی سپی بڵاویكردەوە، بڕیارەكەی ترەمپ بۆ هەڵپەساردنی هاوكارییە سەربازییەكان بۆ ئۆكراین كاتییە و ئەو هاوكارییانە دەگرێتەوە كە لە سەردەمی جۆ بایدن سەرۆكی پێشووی ئەمریكا رەوانەی ئۆكراین دەكران، بەوانەشەوە كە تا ئێستا بە دەستی كیێڤ نەگەیشتووە.
ئەو بڕیارە دوای ئەوە هات كە ترەمپ جارێكی دیكە رەخنەی ئاڕاستەی ڤۆلۆدمیر زیلینسكی سەرۆكی ئۆكراین كردەوە و وتی، دەبێت پێزانینی زیاتری بۆ ئەمریكا هەبێت.
جەختیشی كردەوە لەوەی، ئەمریكا ئاشتی دەوێت و دەبێت هاوپەیمانەكانیان پابەندی ئەو ئامانجە بن. وتیشی، زیلینسكی ئاشتی ناوێت و ئەمریكا بۆ ماوەیەكی درێژ بەرگەی ناگرێت.
هاوكات بڕیارەكەی ترەمپ سەبارەت بە ئۆكراین نرخی نەوتی لە بازاڕەكانی جیهاندا 54 سەنت دابەزاند و نرخی بەرمیلێك نەوتی برێنت گەیشتە 71.08 دۆلار.
بەهۆی پێکدادانی پاسێک و بار هەڵگرێک لە بۆلیڤیا 31کەس گیانیان لەدەستدا و 22کەسیش برینداربوون، ئەم ڕوداوە تەنیا دوای چوار رۆژ دێت لە روداوێکی تری پێکدادانی دوو پاس کە بەهۆیەوە 37کەس گیانیان لەدەستدا و 39کەسیش برینداربوون.
ڕێگاکانی بۆلیڤیا شاخاوی و بێ خزمەتگوزارین و لە ریزبەندی کوشندەترین ڕێگاکانی جیهانن، کە ساڵانە بە تێکڕا 1400 کەس تیایاندا گیان لەدەستدەدەن.
پۆلیس و دەسەڵاتدارانی وڵاتی بۆلیڤیا رایانگەیاندوە، پاسەکە زیاتر لە 500 مەتر دوور لە شوێنی روداوەکە دۆزراوەتەوەو شۆفێری بارهەڵگرەکە دەستگیرکراوە، بریندارانی روداوەکەش گواستراونەتەوە بۆ شوێنی روداوەکە.
ئەم روداوە کوشندەیە هاوکاتی روداوێکە کە تەنیا چوار رۆژ پێش ئێستا، لە نێوان دوو پاسدا لە ناوچەی پۆتۆسی رۆژئاوای بۆلیڤیا رویداوە، تیایدا 37 کەس گیانیان لەدەستدا و ژمارەیەکی زۆریش لە سەرنشینانی هەردولا برینداربوون.
لە پارێزگایەكی توركیا 32 كۆچبەری نایاسایی دەستگیركران كە هەوڵیانداوە بەرەو وڵاتانی ئەوروپا كۆچ بكەن.
هێزەكانی پاسەوانی كەناراوەكانی توركیا لە راگەیەنراوێكدا ئاماژەی بۆ ئەوەكردوە، لە ناحیەی ئەیڤالیكی سەر بە پارێزگای بالیكەسیر، 32 كۆچبەری نایاسایی دەستگیركراون، كە هەوڵیان داوە، بە شێوەیەكی نایاسایی توركیا بەرەو وڵاتانی ئەوروپا بەجێبهێڵن.
راشیگەیاندوە، لە نێو دەستگیركراوەاندا 12 منداڵیان تێدابووە، كۆچبەرەكانیش گواستراونەتەوە بۆ بەشی كۆچبەری پارێزگاكە، دوای رێكارە كارگێرییەكان رەوانەی وڵاتەكانی خۆیان دەكرێنەوە.
ئوسامە حەمدان، بەرپرسی سیاسی بزووتنەوەی حەماس ئەمڕۆ دووشەممە رایگەیاند، تاکە رێگە بۆ گەڕانەوەی بارمتە ئیسرائیلییەکان، دەستبەجێ چوونە نێو قۆناغی دووەمی دانوستانەکانە.
حەمدان وتیشی: ئیسرائیل دەیەوێت شتەکان بگەڕێنێتەوە بۆ چوارگۆشەی یەکەم و هەڵوەشاندنەوەی ڕێککەوتنەکە، و بنیامین ناتانیاهۆ و حکومەتەکەی دەبێت بەرپرسیارێتی ئەمە هەڵبگرن.
ئاماژەی بەوەشکردووە، داوا دەکەین رێگە بدرێت یارمەتییە مرۆییەکان بۆ رزگارکردنی ژیانی هاووڵاتیانمان بچێتە ژوورەوە، هەروەها ئەو رەشبگیرییە ئیدانە دەکەین کە نەتانیاهۆ و حکومەتەکەی وەک کارتی فشار، لەناوچەکە ئەنجامی دەدەن.
حەمدان جەختیشی کردەوە: پابەندین بە هەنگاونان بەرەو پێشەوە بۆ رێککەوتنەکە و هەنگاونان بۆ قۆناغی دووەم.
جێگەی ئاماژە پێدانە، ئیسرائیل دەیەوێت قۆناغی یەکەم درێژ بکاتەوە، حەماسیش پێداگری لەسەر دەستپێکردنی قۆناغی دووەم دەکات و دەڵێت: تا نەچینە قۆناغی دووەمی ئاگر بەست دیلەکانی ئیسرائیل ئازاد ناکەین.
ئۆتۆمبێلێک لە شاری مەنهایمی ئەڵمانیا خۆی کردووە بەناو خەڵکدا و بەپێی لێدوانی پۆلیسی ئەو وڵاتە، سێ کەس گیانی لەدەستداوە و 24 کەسیش برینداربوون.
میدیاکانی ئەڵمانیا بڵاویانکردەوە؛ شۆفێرەکە لەلایەن پۆلیسی ئەو وڵاتەوە دەستگیرکراوە، بەڵام تا ئێستا ناسنامەکەی ئاشکرا نەکراوە.
میدیاکانی ئەڵمانیا، ئاماژە بە زیادبوونی ئەو هێرشانە دەدەن کە لەڕێگەی چەقۆ و ئۆتۆمبێلەوە هاوڵاتیانی مەدەنی دەکەنە ئامانج و داوادەکەن دەسەڵاتدارانی وڵاتەکە بیرێک لە رێگا چارەیەک بکاتەوە.
فەرمانی پنتاگۆن بۆ وەستاندنی سەرجەم ئۆپەراسیۆنە ئەلیکترۆنییەکانی دژی روسیا کەوتە بواری جێبەجێکردنەوە و زانیارییە میدیاییەکان باس لەوەدەکەن ترەمپ وتوێتی: ئەمریکا کێشەی گەورەتری لە مۆسکۆ هەیە.
ئەمڕۆ یەکشەممە چەند دەزگایەکی میدیایی ئەمریکی بڵاویانکردەوە، پیت هێگسێت وەزیری بەرگری ئەمریکا بڕیاری راگرتنی سەرجەم ئۆپەراسیۆنە ئەلیکترۆنییەکانی دژ بە روسیای دەرکردووە.
بەگوێرەی رۆژنامەی نیویۆرک تایمز، ئەم رێوشوێنە بەشێکە لە پرۆسەیەکی فراوانتر کە ئامانجی دووبارە هەڵسەنگاندنەوەی ئۆپەراسیۆنەکانی ئەمریکایە بەرانبەر بە روسیا و ماوەی کارکردنی بە رونی دیاری نەکراوە.
پنتاگۆن لە وەڵامی پرسیارەکانی ئاژانسی فرانس پرێسدا بە ئاماژەدان بە پێویستی پاراستنی ئاسایشی ئۆپەراسیۆنەکان، رەتیکردوەتەوە هیچ لێدوانێک بدات.
راگرتنی ئەو هێرشانە لەکاتێکدایە، کە دۆناڵد ترەمپ سەرۆکی ئەمریکا، چەند هەنگاوێکی مێژووی بۆ نزیکبوونەوە لە روسیا ناوە، بەتایبەت پێوەند بە پرسی جەنگ لە ئۆکراینەوە.
د.لەتیف رەشید سەرۆک کۆماری عیراق، ئەمڕۆ دووشەممە، بەیاوەری قوباد تاڵەبانی جێگری سەرۆکی حکومەتی هەرێم، گەیشتە میسر بۆ بەشداریکردن لە کارەکانی لوتکەی نائاسایی عەرەبی.
بەپێی سەرچاوە رەسمییەکان، کۆبوونەوەی نائاسایی سەرانی وڵاتانی عەرەبی بڕیارە سبەینێ لە قاهیرە دەستپێبکات و تایبەت دەبێت بە دواین پەرەسەندنەکانی کەرتی غەززە و خاکی فەلەستین.
شایانی باسە ژمارەیەک بەرپرسانی حکومەت و راوێژکار و کەسایەتییە سیاسییەکان، لەناویاندا جێگری سەرۆکی حکومەت، قوباد تاڵەبانی، یاوەری سەرۆک کۆمار دەکەن لەم سەردانەدا.
شایەنی ئاماژەپێدانە، لە فڕۆکەخانەی نێودەوڵەتی قاهیرە، ژمارەیەک لە بەرپرسانی باڵای میسری پێشوازییان لە سەرۆک کۆمار کرد.