فەرماندەیی ناوەندیی ئەمریكا دەڵێت هێرشەكانیان وەستاندووە بەڵام هیزەكانیان لە ناوچەكە ئامادەن بۆ هەر ئەگەرێك.

براد كوپەر، فەرماندەی فەرماندەیی ناوەندیی ئەمریكا رایگەیاند، بە پێی ئاگربەستەكە  هێرشەكانیان بۆسەر ئێران وەستاندووە، بەڵام  هێزەكانیان لە ئامادەباشیدان بۆ وەڵامدانەوەی هەر هێرشێك.

وتیشی: زیانێكی زۆریان بە سوپای ئێران گەیاندووە كە بۆ ماوەی 40 ساڵ خەریكی بەهێزكردنی بوون و چەندین ملیار دۆلارییان لەو پێناوە خەرجكردووە.

براد كوپەر راشیگەیاند، 13 هەزار هێرشییان بۆسەر ئامانجەكانیان لە ئێران ئەنجامداوە و زۆربەی ئامانجە سەربازییەكانیان بەدەست هێناوە. 

تەمویلی موچەی مانگی سێ خرایەسەر هەژماری بانکی وەزارەتی دارایی هەرێم و رۆژی یەکشەممە دەست بەدابەشکردنی موچە دەکرێت.                                                                                              

وەزارەتی دارایی و ئابوری حکومەتی هەرێم لە راگەیەنراوێکدا بڵاویکردەوە، ئەمڕۆ بڕی 957 ملیار دینار و 122 ملیۆن دینار وەک شایستەی موچەی فەرمانبەران و موچەخۆرانی هەرێمی کوردستان بۆ مانگی ئازار خرایە سەر هەژماری بانکی وەزارەتی دارایی و ئابوری هەرێمی کوردستان لەلقی هەولێری بانکی ناوەندی عیراق.     

ئاماژەی بەوەشکرد، بەهۆی ئەوەی پارەکە لە کۆتایی دەوامی رەسمی بانکی ناوەندی عیراق داخڵی سەر هەژماری بانکی وەزارەتمان بووە، وەرگرتنی پارە لە لقی هەولێری بانکی ناوەندی عیراق دەکەوێتە رۆژی یەک شەممەو راستەوخۆ هەمان رۆژ دوای وەرگرتنی پارەکە دەست بەدابەشکردنی موچە دەکرێت.

بۆ چارەسەرکردنی کێشە خزمەتگوزارییەکان و رەوشی ئەمنی، سەرۆک وەزیرانی عیراق پێشوازی لە پارێزگاری کەرکوک کرد و هەوڵەکانی بۆ سەقامگیری شارەکە بەرز نرخاند.

محەمەد شیاع سودانی، سەرۆک وەزیرانی عیراق، لە بەغداد پێشوازی لە رێبوار تەها، پارێزگاری کەرکوک کرد و پێکەوە رەوشی ئەمنی و خزمەتگوزاریی پارێزگاکەیان تاوتوێ کرد.

لە دیدارەکەدا، سەرۆک وەزیرانی عیراق سوپاس و دەستخۆشی ئاراستەی پارێزگاری کەرکووک کرد بۆ ئەو هەوڵانەی کە لە پێناو چەسپاندنی سەقامگیریی ئەمنی و کۆمەڵایەتی داویەتی، هەروەها رۆڵی پارێزگاری بەرز نرخاند لە بەهێزکردنی گیانی پێکەوەژیانی ئاشتییانە لە نێوان سەرجەم پێکهاتە جیاوازەکانی کەرکووکدا.

لای خۆیەوە، رێبوار تەها پارێزگاری کەرکوک، تیشکی خستەسەر ئەو ئاڵنگارییانەی لەم دواییانەدا رووبەڕووی پارێزگاکە بوونەتەوە، پارێزگار لیستێکی لە داواکاری و پێداویستییە بەپەلەکانی کەرکوکی پێشکەش بە سودانی کرد، بە تایبەت ئەو داواکارییانەی کە پەیوەستن بە چارەسەرکردنی زیانەکانی شەپۆلی بارانبارین و لافاوی ئەم دواییەی ناوچەکە و قەرەبووکردنەوەی زیانلێکەوتووان.

د. لەتیف رەشید سەرۆک کۆماری عیراق، لە ساڵیادی ئازادکردنی عیراقدا پەیامێکی بڵاوکردووەتەوە و تێیداهاتووە: وانە قووڵەکانی ئەم ساتەوەختە، داوامان لێدەکات ئەزموونی دیموکراسی بچەسپێنین و بناغەکانی پتەوتر بکەین و ئاڵنگارییەکان تێپەڕێنین و بە گیانێکی نیشتمانیی بەرپرسیارانەوە کاربکەین کەڕێگری لە دووبارەبوونەوەی کارەساتەکانی ڕابردوو بکات و داهاتوویەکی سەقامگیری شایستە بۆ هەموو عێراقییەکان دەستەبەر بکات.

دەقی پەیامەکە

لە ٩ی نیساندا یادی ساتەوەختێکی مێژووی نوێی عێراق دەکەینەوە، ئەو ڕۆژەی لاپەڕەی دیکتاتۆریەت هەڵدرایەوە کە ئەستۆی گەلەکەمانی بە ساڵانێکی دوورودرێژی ستەم و ئازار و جەنگی بێمانا قورس کردبوو، سەردەمێکی نوێی دیموکراسی و بنیاتنانی دەوڵەت لەسەر بنەمای دامەزراوەکان دەستی پێکرد.

وانە قووڵەکانی ئەم ساتەوەختە، داوامان لێدەکات ئەزموونی دیموکراسی بچەسپێنین و بناغەکانی پتەوتر بکەین و ئاڵنگارییەکان تێپەڕێنین و بە گیانێکی نیشتمانیی بەرپرسیارانەوە کاربکەین کەڕێگری لە دووبارەبوونەوەی کارەساتەکانی ڕابردوو بکات و داهاتوویەکی سەقامگیری شایستە بۆ هەموو عێراقییەکان دەستەبەر بکات.

هەر بەم بۆنەیەوە، بەئەوپەڕی ڕێزەوە قوربانیدانی ئەو شەهیدانەمان وەبیردەهێنیەوە کە ڕووبەڕووی دڕندەیی ڕژێمی ستەمکار بوونەوە، لە پێشەنگیاندا، سەید محمد باقر ئەلسەدر و خوشکەکەی، علوییە بنت ئەلهودا، شەهیدانی کیمیابارانی هەڵەبجە، شاڵاوەکانی ئەنفال، گۆڕە بەکۆمەڵەکان، ڕاپەڕینی شەعبانی و شەهیدانی بارزانیەکان و هەموو ئەو شەهیدانەی عێراق کەبوونە قوربانی سیاسەتەکانی ستەم و زۆرداری ڕژێمی بەعس، کەووڵاتی نوقمی دۆزەخی جەنگەکانی و کارەسات و وێرانکاری کرد.

وەفاداری بۆ خوێنی شەهیدان پێویستی بە بەرزڕاگرتنی یەکڕیزی و پتەوکردنی بەهاکانی دادپەروەری و ئازادی و بەرەوپێشچوونی بنیاتنانی عێراقێک کە تێیدا ئاشتی و خۆشگوزەرانی زاڵ بێت، و هەموو هاووڵاتیانی لە لەئامێز بگرێت.

 

د.لەتیف جمال ڕەشید

سەرۆک کۆمار

٩ی نیسان ٢٠٢٦

وەزارەتی دارای عیراق موچەی مانگی ئاداری فەرمانبەرانی هەرێمی كوردستانی خەرج كرد و بریارە هەر ئەمڕۆ بخرێتە سەر هەژماری وەزارەتی دارای هەرێم.

محەمەد عەبدولرەحمان پەیامنێری كوردسات نیوز لە بەغداد رایگەیاند، ئەمڕۆ وەزارەتی دارای عیراق موچەی موچەخۆرانی هەرێمی خەرجكرد و نوسراوی ئاڕاستەی بانكی ناوەندی عیراق كردووە بۆ ئەوەی پارەكە بخاتە سەر هەژماری وەزارەتی دارایی هەرێم.

پەیامنێری كوردسات نیوز راشیگەیاند، بریارە هەر ئەمڕۆ ئەو پارەیە بخرێتە سەر هەژماری وەزارەتی دارایی هەرێم.

ئەمە لەكاتێكدایە، وەزارەتی دارایی هەرێم رایگەیاند، دوێنێ بڕی زیاتر لە 43 ملیار دیناری وەك داهاتی نانەوتی خستووەتەسەر هەژماری وەزارەتی دارایی حكومەتی فیدراڵ.

بەڕێوەبەرایەتی گشتی کەشناسی و بوومەلەرزەزانی هەرێم پێشبینییەکانی بۆ 48 سەعاتی داهاتوو بڵاوکردەوە و رایگەیاند، ئاسمانی هەرێم لە نێوان نیمچە هەور و هەوری تەواودا دەبێت و ئەگەری بارانی بەهاری و لێزمە باران لە هەندێک ناوچە هەیە.

کەشناسی هەرێم ئاشکرایکرد، ئاسمان نیمچە هەور دەبێت و لە ناوچە شاخاوییەکان ئەگەری بارانبارین هەیە. لە هەندێک کاتدا بارانەکە بە شێوەی بارانی کورتخایەن و لێزمەباران دەبێت، کە هەورەبروسکەی لەگەڵدا دەبێت.

ئەوەشی خستەڕوو، سبەینێ کاریگەری شەپۆلەکە بەردەوام دەبێت و ئاسمان بۆ هەوری تەواو دەگۆڕێت، پێشبینیش دەکرێت بارانبارین زیاتر ناوچە شاخاوییەکان و سنوری پارێزگای دهۆک و ئیدارەی سۆران بگرێتەوە، بە جۆرێک لە هەندێک کاتدا لێزمە بارانی بەهێز دەبێت.

بەرزترین پلەکانی گەرمای پێشبینیکراو بۆ ئەمرۆ:

هەولێر: 19 پلەی سیلیزی

پیرمام: 15 پلەی سیلیزی

سۆران: 15 پلەی سیلیزی

حاجی ئۆمەران: 9 پلەی سیلیزی

سلێمانی: 17 پلەی سیلیزی

چەمچەماڵ: 19 پلەی سیلیزی

دهۆک: 19 پلەی سیلیزی

زاخۆ: 19 پلەی سیلیزی

هەڵەبجە: 19 پلەی سیلیزی

گەرمیان: 22 پلەی سیلیزی

بەهۆی زیادبوونی گرژییەکانی رۆژهەڵاتی ناوەڕاست، پاریس داوای راگرتنی هێرشەکان بۆ سەر لوبنان و رێگری لە فراوانبوونی جەنگ دەکات.

وەزیری دەرەوەی فەرەنسا لە نوێترین لێدوانیدا سەبارەت بە پەرەسەندنی گرژییەکانی رۆژهەڵاتی ناوەڕاست، زنجیرەیەک هەڵوێستی توندی وڵاتەکەی راگەیاند و جەختی لە پێویستی پاراستنی سەقامگیری ناوچەکە کردەوە.

وەزیری دەرەوەی فەرەنسا ئاماژەی بەوەکرد، چیتر هێرشە بەردەوامەکانی سەر لوبنان "قبوڵکراو نین" و پێویستە دەستبەجێ کۆتاییان پێ بهێنرێت بۆ ئەوەی ناوچەکە نەچێتە ناو جەنگێکی فراوانترەوە.

لە لایەکی ترەوە، سەبارەت بە ئاسایشی دەریاوانی و دەستوەردانەکانی تاران، وەزیرەکەی فەرەنسا هۆشداریی دا و رایگەیاند، تێپەڕین بەناو گەروی هورمزدا کارێکی ئاسان نابێت تا ئەو کاتەی رێكکەوتنێکی گشتگیر نەیەتە کایەوە.

هاوکات جەختیشی کردەوە کە "نابێت ئێران فڕۆکەی بێفڕۆکەوان و موشەک" لە ململانێکاندا بەکاربهێنێت، چونکە ئەوە دەبێتە هۆی تێکدانی زیاتری ئاسایشی نێودەوڵەتی.

کۆریای باکور چەکێکی نوێی کارۆموگناتیسی تاقیدەکاتەوە و گرژییەکانی نیمچەدوورگەکە هەڵدەکشێن

ئاژانسی هەواڵی ناوەندی کۆریای باکور رایگەیاند، پیۆنگ یانگ لە نێوان ٦ بۆ ٨ی ئەم مانگەدا زنجیرەیەک تاقیکردنەوەی سەربازیی جۆراوجۆری ئەنجامداوە، کە گرنگترینیان تاقیکردنەوەی سەرەکیی جەنگیی موشەکی بالیستی تاتیکی و سیستمێکی نوێی چەکی کارۆموگناتیسی بووە.

سوپای کۆریای باشور پشتڕاستیکردەوە، تاقیکردنەوەکان لە ناوچەی (وۆنسان)ی سەر کەناراوە رۆژهەڵاتییەکان ئەنجامدراون، بەپێی زانیارییەکانی دەستەی ئەرکانی هاوبەشی کۆریای باشور، موشەکەکان مەودای 240 کیلۆمەتریان بڕیوە و لە ناو ئاوەکانی دەریای رۆژهەڵات کەوتوونەتە خوارەوە.

سەرۆکایەتی کۆریای باشور کۆبوونەوەیەکی بەپەلەی ئەنجومەنی ئاسایشی نەتەوەیی ئەنجامدا و تاقیکردنەوەکانی بە " پێشێلکردنی بڕیارەکانی ئەنجومەنی ئاسایش" وەسفکرد.

لەلایەکی دیکەوە، پاسەوانی سنوری ژاپۆن رایگەیاند، موشەکەکان لە دەرەوەی ناوچە ئابورییە تایبەتەکانی وڵاتەکەی کەوتوونەتە خوارەوە، بەڵام چاودێری وردی رەوشەکە دەکەن.

ئەم تاقیکردنەوە سەربازییانە لە کاتێکدایە کە ئومێدەکانی سیئۆل بۆ هێورکردنەوەی گرژییەکان بەرەو کاڵبوونەوە دەچن. لێپرسراوێکی باڵای وەزارەتی دەرەوەی کۆریای باکور رایگەیاند: "سیئۆل لە ناو وەهمدا دەژی ئەگەر پێی وابێت پیۆنگ یانگ وەک دەوڵەتێکی دوژمن تەماشای ناکات."

ئەم لێدوانە لە کاتێکدایە کە تەنها چەند رۆژێک لەمەوبەر، پیۆنگ یانگ لە بەیاننامەیەکدا ستایشی سەرۆکی کۆریای باشوری کردبوو، بەڵام تاقیکردنەوە موشەکییەکانی ئەمڕۆ جارێکی تر دۆخەکەی گەڕاندەوە بۆ خاڵی سفر و ئاستی هەڕەشە سەربازییەکانی لە ناوچەکەدا بەرزکردەوە.

سەرۆكی ئەمریكا رایدەگەیەنێت،  هێزەكانیان لە رۆژهەڵاتی ناوەڕاست دەمێننەوەو جارێ بەنیازی كشاندنەوەیان نین.

بەیانی ئەمڕۆ دۆناڵد ترەمپ لە نوێترین لێدوانیدا وتی، هەموو كەشتی و فڕۆكە و هێزە سەربازییەكانی ئەمەریكا و هەر شتێكی تر كە پێویست بێت بۆ لەناوبردنی تەواوەتی دوژمن، لە شوێنی خۆیان دەمێننەوە لە رۆژهەڵاتی ناوەڕاست.

ئاماژەی بەوەشكرد، تا دڵنیابوون لە پابەندبوونی تەواوەتی ئێران بە رێككەوتنی راستەقینە، هێزەكانیان جارێ لە شوێنی خۆیان دەمێننەوە.

جەختی لەوەشكردەوە، ئەگەر رێككەوتنی راستەقینە نەكرێت، ئەوە زۆر خراپتر و كوشندەتر هێرش دەكەنەوە سەر ئێران بەشێوەیەك كە پێشتر هیچ كەسێك نەیبنیبێت.

ترەمپ باسی لەوەشكرد، ئێران دەمێكە رێككەوتووە لەگەڵیان و چەكی ئەتۆمیشی نابێت، گەروی هورمزیش بە كراوەی دەمێنێتەوە، لەم كاتەشدا هێزەكانیان پشوویەك وەردەگرن و چاوەرێی ئەركی داهاتوویان دەكەن.

شاناز ئیبراهیم ئەحمەد خانمی یەکەمی عیراق لە ساڵیادی کۆچی دوایی مامۆستا ئیبراهیم ئەحمەد دا پەیامێکی بڵاوکردەوە.

دەقی پەیامەکە

"دوێنێ شەو یەک لەو شەوانە بوو کە قەڵەم توانای دەربڕینی هەستەکانمی نەبوو بیست و شەش ساڵ لەمەوبەر و لەو شەوەدا، لە ژوورەکەت لەنەخۆشخانە، داوای قەڵەم و دەفتەرت لێ کردم. بە ڵێنم دا سبەی لەگەڵ چەپکێک گوڵی بەهارا بۆت بێنم ، من لەسەر بەڵێنەکەی خۆم بووم.. بەڵام داخەکەم کە هاتم رۆیشتبوویت.

ئەمشەو ئەگەرچی هەر لە خەیاڵما بوویت، بەڵام دەنگی فڕۆکە جەنگییەکان و هەورە تریشقە و درۆن ئەیهێنامەوە ئەم سەردەمە، بە تایبەتیش کە ئەمشەو هەموو جیهان بە پەرۆشەوە چاوەڕێی مژدەی ئاگربەستی شەڕێکی وێرانکەری ئەکرد.

ئەمشەو هەمووان لە دڵەڕاوکێدا بوون، هەمووان هەمان خەم و هەمان ئارەزوویان هەبوو، منیش لەگەڵ بڵاو بوونەوەی هەر کورتە هەواڵێکا ئەم ووت: بیرت ئەکەم ".

 

د. لەتیف رەشید سەرۆک کۆماری عیراق لەبارەی ئاگربەستی کاتیی نێوان ئەمریکا و ئێران بەیاننامەیەکی بڵاوکردەوە و تێیدا هاتووە: پێشوازی لە ڕاگەیاندنی ئاگربەستی نێوان ئەمریکا و کۆماری ئیسلامی ئێران دەکەین و بە پەرەسەندنێکی گرنگی دەزانین


دەقی بەیاننامەکە: 

پێشوازی لە ڕاگەیاندنی ئاگربەستی نێوان ئەمریکا و کۆماری ئیسلامی ئێران دەکەین و بە پەرەسەندنێکی گرنگی دەزانین کە یارمەتیدەر دەبێت بۆ هێورکردنەوەی گرژییەکان لە ناوچەکەدا.

پێویستە ئەم هەنگاوە بۆ بەهێزکردنی ڕێڕەوی دیالۆگی دیپلۆماسی بنیاتنەر و گرتنەبەری لۆژیکی دانایی و تێگەیشتن و چارەسەری ئاشتیخوازانە بۆ چارەسەرکردنی ناکۆکیەکان و پەنا نە بردنە بەر بەکارهێنانی هێز بۆ گەیشتن بە ڕێگا چارەیەکی یەکلاکەرەوەی بەردەوام کە ئاسایشی ناوچەکە و جیهان بپارێزێت.

عێراق لەسەر بنەمای ڕۆڵی خۆی لە ناوچەکەدا بەپەرۆشە بۆ پشتیوانیکردن لەهەوڵە نێودەوڵەتییەکان بەشێوەیەک کە ببێتە هۆی سەرکەوتنی دیالۆگ و دانوستانەکانی نێوان کۆماری ئیسلامی و ئەمریکا و بەدیهێنانی ئاشتی هەمیشەیی و پاراستنی تواناکانی گەلان.

جەخت لەوە دەکەینەوە کە ناوچەکە پێویستی بە هەوڵی هاوبەشی ناوچەیی و نێودەوڵەتی هەیە بۆ پتەوکردنی بنەماکانی ئاشتی، پاراستنی سەروەری دەوڵەتان و دەستەبەرکردنی ئایندەیەکی ئارام و خۆشگوزەران بۆ گەلانی.

                                                

د. لەتیف جەمال ڕەشید

        سەرۆک کۆمار

چوارشەممە 8 ی نیسانی 2026

 

فڕۆکەخانەی نێودەوڵەتیی جەلال تاڵەبانی لەبارەی دەستپێکردنەوەی گەشتە ئاسمانییەکانی فڕۆکەخانەکەیان راگەیەنراوێکی بڵاوکردەوە و تێیدا هاتووە، بڕیارە بەزووترین کات گەشتە ئاسمانییەکانیان دەستپێبکەنەوە
فڕۆکەخانەی نێودەوڵەتیی جەلال تاڵەبانی رایگەیاند، بەپێی ئەو ئاگاداری نامەیەی لەلایەن دەسەڵاتی فڕۆکەوانی شارستانی عێراقی گەیشتۆتە فڕۆکەخانەمان، لە ئەمڕۆوە 8ـی 4ـی 2026 ئاسمانی عیراق بەڕووی جوڵەی فڕۆکەوانیدا بۆ گەشتەئاسمانییەکان کرایەوە.

لە راگەیەنراوەکەدا ئاماژە بەوەشدراوە، بڕیارە هێڵە ئاسمانییەکان بەپێی پلانی خۆیان و دوای رێکخستنەوەی خشتەی گەشتەکان، بە زووترین کات گەشتە ئاسمانییەکان لە فڕۆکەخانەی نێودەوڵەتیی جەلال تاڵەبانی دەستپێدەکاتەوە.

دەسەڵاتی فڕۆکەوانیی مەدەنیی عیراق لەبارەی دەستپێکردنەوەی گەشتە ئاسمانییەکان راگەیەنراوێکی بڵاوکردەوە و تێیدا هاتووە، لە ئەمڕۆوە ئاسمانی عیراق بەڕووی گەشتە ئاسمانییەکاندا دەکرێتەوە

لە راگەیەنراوەکەدا ئەوەش هاتووە، رێگە بە دەستپێکردنەوەی سەرجەم گەشتە ئاسمانییە مەدەنییەکان دەدرێت، کە تێپەڕبوون (ترانزێت)، فڕین و نیشتنەوە لە فڕۆکەخانەکانی عیراق دەگرێتەوە.

ئەوەش روونکراوەتەوە، دەسەڵاتی فڕۆکەوانیی مەدەنیی عیراق جەخت لە پابەندبوونی تەواوی خۆی دەکاتەوە بە جێبەجێکردنی بەرزترین پێوەرەکانی سەلامەتی و ئاسایشی ئاسمانی دەکاتەوە.

بافڵ جەلال تاڵەبانی سەرۆکی یەکێتیی نیشتمانیی کوردستان لە 26ـەمین ساڵیادی کۆچیی دوایی مامۆستا ئیبراهیم ئەحمەد راگەیەنراوێکی بڵاوکردەوە و رایگەیاند: ئەمڕۆ بە شانازییەوە یادی مێژووی زیاتر لە نیو سەدە خەبات و تێکۆشانی سیاسی و رووناکبیریی ئەم سەرکردە مەزنەی گەلەکەمان دەکەینەوە

 دەقی راگەیەنراوەکە:

26 ساڵ بەسەر كۆچی دوایی سیاسەتمەدار و خەباتگێڕ و نووسەری ناوداری گەلەكەمان مامۆستا ئیبراهیم ئەحمەد تێدەپەڕێت.

ئەمڕۆ بە شانازییەوە یادی مێژووی زیاتر لە نیو سەدە خەبات و تێکۆشانی سیاسی و رووناکبیریی ئەم سەرکردە مەزنەی گەلەکەمان دەکەینەوە کە یەکێک بوو لە رێنیشاندەرەکانی رێگەی خەباتی نەتەوەیی.

 

لەم هەلومەرجە دژوارەدا، لە هەموو کات زیاتر پێویستمان بە حیکمەت و دیدگای مامۆستا ئیبراهیم ئەحمەدە تاوەکو ببێتە هەوێنی کارکردنی پێکەوەیی و یەکڕیزیی گەلەکەمان لەپێناو پاراستنی خەڵک و وڵاتەکەمان.

 

بافڵ جەلال تاڵەبانی

سەرۆکی یەکێتیی نیشتمانیی کوردستان

 

دۆناڵد ترەمپ سەرۆکی ئەمریکا، دوای راگەیاندنی ئاگربەستێکی دەستبەجێ بۆ ماوەی دووهەفتە، لە نوێترین پۆستیدا رایگەیاند: ئەگەر گەروی هورمز بکرێتەوە و ئاگربەست بەردەوامبێت، سەردەمی زێڕینی رۆژهەڵاتی ناوەڕاست دەستپێدەکات

ترەمپ لە نوێترین پۆستیدا لەسەر پلاتفۆرمی تروس سۆشیاڵ نووسیویەتی: ئەمڕۆ رۆژێکی گەورەیە بۆ ئاشتیی جیهانی. ئێران دەیەوێت ئاشتی بەرقەراربێت، وڵاتانی دیکەش هەمان شتیان دەوێت، چونکە بەشی پێویستیان بەهۆی جەنگەکەوە مەینەتی چەشت. 

ئاماژەی بەوەشداوە، ئەمریکا یارمەتیدەر دەبێت لە رێکخستنی جەنجاڵیی هاتوچۆ لە گەرووی هورمز و زۆر هەنگاو و کرداری ئەرێنیش دەبینرێت.

وتیشی، بە کردنەوەی گەروەکە پارەیەکی زۆر پەیدا دەکرێت و ئێرانیش دەتوانێت دەست بکات بە پرۆسەی ئاوەدانکردنەوەی وڵاتەکەی.

ئەوەشی روونکردەوە، ئەمریکا کەشتییەکانی لە هەموو جۆرە پێداویستییەک پڕ دەکات و لە دەوروبەری گەروەکە دەمێنێتەوە، تاکو دڵنیابن لەوەی هەموو شتێک بە باشی بەڕێوە دەچێت. 

لە کۆتایی پۆستەکەیدا ترەمپ ئەوەشی نووسیوە، متمانەی بەوە هەیە کە پرۆسەکە بەباشی بەڕێوە بچێت و ئەمەش دەکرێت ببێتە سەردەمی زێڕینی رۆژهەڵاتی ناوەڕاست.