وەک کاردانەوەیەک بەرانبەر پێشهاتە سیاسییەکانی ئەمدواییە، ئەنجوومەنی باڵای ئاسایشی نیشتمانیی ئێران راگەیەنراوێکی رەسمی بڵاوکردەوە و تێیدا جەخت لەسەر سەرکەوتنی مەیدانی و سیاسیی وڵاتەکەی دەکاتەوە بەرانبەر بەو هەڕەشانەی لە ماوەی رابردوودا ئاراستەیان کراوە.

لە راگەیەنراوەکەدا هاتووە کە دوای تێپەڕبوونی 40 رۆژ بەسەر جەنگدا، ئێستا "دوژمن" ناچار بووە داوای وەستاندنی شەڕ بکات و مل بدات بۆ مەرجەکانی ئێران.

تاران جەخت دەکاتەوە کە هیچ گرنگییەک بەو وادە نادات کە سەرۆکی ئەمریکا دیاریی کردبوون و ئەوەی وای کردووە هێرشەکان رابگیرێن، شکستی ستراتیژیی ئەمریکا بووە لە مەیدانەکەدا.

مەرجەکانی ئێران بۆ رێککەوتن 
1- پابەندبوونی ئەمریکا و گەرەنتی ئەوەی جارێکی تر هێرش نەکرێتە سەر ئێران 
2- تێپەڕین بە گەرووی هورمزدا بە چاودیری ئیران دەبێت 
3- ئێران بەردەوام دەبێت لە پیتاندنی یۆرانیۆم 
4- لادانی هەموو سزاکانی سەر ئێران 
5- لادانی هەموو سزا و ئابڵۆقەکانی سەر ئیران
6- پاشگەزبوونەوە لە هەموو پرۆژە بڕیارەکانی ئەنجومەنی ئاسایشی نەتەوە یەکگرتووەکان 
7- پاشگەبوونەوە لە بڕیارەکانی ئاژانسی وزەی ئەتۆم 
8- قەرەبووکردنەوەی ئەو زیانەنەی بەر ئێران کەوتوون لە ئەنجامی هێرشەکان
9- کشانەوەی هەموو هێزە سەربازییەکانی ئەمریکا لە ناوچەکە 
10- راگرتنی شەڕ لە هەموو بەرەکان و راگرتنی جەنگ دژی حزبوڵا

میدیای رەسمی ئێران بڵاویکردەوە، بەپێی بڕیاری رابەری باڵای ئێران، بڕیاردراوە بۆ ماوەی 15 رۆژ دانوستانەکان لە پاکستان ئەنجام بدرێن بۆ چەسپاندنی ئەم خاڵانە لە چوارچێوەی بڕیارێکی پابەندکەری ئەنجوومەنی ئاسایشی نێودەوڵەتیدا.

تاران هۆشداریی دەدات کە ئەم دوو هەفتەیە بەواتای کۆتاییهاتنی یەکجاریی جەنگ نییە، بەڵکو تاقیکردنەوەیەکە بۆ لایەنی بەرانبەر؛ دەشڵێت: "دەستمان لەسەر پەلەپیتکەیە و هەر هەڵەیەکی دوژمن بە توندی وەڵام دەدرێتەوە."

ئەم راگەیەنراوە دوای ئەوە دێت کە دۆناڵد ترەمپ رایگەیاندبوو هێرشەکان بۆ ماوەی دوو هەفتە رادەگرێت، ئەمەش ئاماژەیە بۆ ئەوەی کە هەردوو وڵات لە لێواری جەنگێکی گشتگیرەوە بەرەو مێزی گفتوگۆیەکی سەخت و چارەنووسساز هەنگاو دەنێن.

دۆناڵد ترەمپ، سەرۆکی ئەمریکا، لە بڕیارێکی چاوەڕواننەکراودا و تەنیا چەند ساتێک پێش کۆتاییهاتنی مۆڵەتە مەترسیدارەکەی، راگرتنی سەرجەم هێرشە سەربازییەکانی بۆ سەر ئێران راگەیاند.

ترەمپ لە تۆڕی کۆمەڵایەتی سۆشیاڵ تروس بڵاویکردەوە،  دوای گفتوگۆکانی لەگەڵ شەهباز شەریف، سەرۆک وەزیرانی پاکستان و مارشاڵ عاسم مونیر، فەرماندەی سوپای ئەو وڵاتە، بڕیاری داوە بۆ ماوەی دوو هەفتە هێرشەکان ڕابگرێت، ئەم بڕیارە مەرجدار کراوە بە کردنەوەی "تەواوەتی، دەستبەجێ و بێ مەرجی" گەرووی هورمز لەلایەن ئێرانەوە.

ترەمپ رایگەیاند، ئەمە ئاگربەستێکی دوولایەنە دەبێت و بۆ ماوەی 14 رۆژ هیچ هێرش و بۆردومانێک ئەنجام نادرێت.

سەرۆکی ئەمریکا ئاشکرای کرد، پێشنیازێکی 10 خاڵییان لەلایەن تارانەوە بەدەستگەیشتووە و واشنتن وای دەبینێت کە بنەمایەکی باشە بۆ دانوستان و کۆتاییهێنان بە ململانێکان.

ترەمپ ئەوەشی خستەڕوو، زۆربەی خاڵە ناکۆکەکانی رابردوو لە نێوان ئەمریکا و ئێران چارەسەر کراون و ئەم دوو هەفتەیە بۆ ئەوەیە کە رێککەوتننامەی ئاشتیی درێژخایەن کۆتایی پێ بهێنرێت و ئیمزا بکرێت.

سەرۆکی ئەمریکا جەختی کردەوە، هێزەکانیان سەرجەم ئامانجە سەربازییەکانی خۆیان پێکاوە و ئێستا کاتی دیپلۆماسییە بۆ گەیشتن بە ئاشتی لە رۆژهەڵاتی ناوەڕاست.

لە هەوڵێکی نوێی دیپلۆماسیدا بۆ رێگریکردن لە تەقینەوەی بارودۆخی ناوچەکە، سەرۆک وەزیرانی پاکستان بە رەسمی دەستپێشخەرییەکی بۆ هێورکردنەوەی گرژییەکانی نێوان ئەمریکا و ئێران راگەیاند.

سەرۆک وەزیرانی پاکستان ئاشکرایکرد، هەوڵە دیپلۆماتییەکان بۆ گەیشتن بە چارەسەرێکی ئاشتیانە لە رۆژهەڵاتی ناوەڕاست بەردەوامییان هەیە و هەنگاوی ئەرێنییان بڕیوە.

ئاماژەی بەوەکرد، پەیوەندی بە دۆناڵد ترەمپ، سەرۆکی ئەمریکاوە کردووە و داوای لێکردووە وادەی مۆڵەتەکە بۆ دوو هەفتەی تر درێژ بکاتەوە.

سەرۆک وەزیرانی پاکستان، داواش لە دەسەڵاتدارانی ئێران دەکات وەک نیشاندانی نیازپاکی، بۆ ماوەی دوو هەفتە گەروی هورمز بەڕووی کەشتیوانیی نێودەوڵەتیدا بکەنەوە.

ئەم دەستپێشخەرییەی پاکستان دەیەوێت کاتێکی زیاتر بۆ دانوستانەکان بڕەخسێنێت و رێگری بکات لە بە ئامانجگرتنی ژێرخانی وزە و گڕگرتنی تەواوەتی ناوچەکە.

ئەم پەرەسەندنە دیپلۆماسییە لە کاتێکدایە کە جیهان بە نیگەرانییەوە چاوەڕوانی کۆتاییهاتنی ئەو مۆڵەتە دەکات کە ترەمپ بۆ ئێرانی دیاری کردووە و پاکستان وەک لایەنێکی ناوبژیوان دەیەوێت بەربەست لەبەردەم بژاردەی سەربازی دروست بکات.

گروپێكی چەكداری عیراقی ئازادكردنی ئەو  رۆژنامەنووسە ئەمریكییەكەی راگەیاند كە  لە كۆتایی مانگی رابردوودا لە بەغداد رفێنرا

ئاژانسەكانی هەواڵ  لەزاری  لێپرسراوێكی  باڵای گروپی چەكداری كەتیبەكانی حزبوڵاوە بڵاویانكردەوە،  ئەو كچە رۆژنامەنوسەیان ئازاكردووە بەمەرجی ئەوەی بە زووترین كات عیراق جیبهێلێت

شیلی كیتلسن كچە رۆژنامەنووسی ئەمریكی لە 31ی ئاداری ئەمساڵ لەلایەن چەند كەسێكی نەناسراوەوە رفێندرا و و  وەزارەتی ناوخۆی عیراقیش راگەیاند  رۆژنامەنوسەكە  لەلایەن گروپێكی چەكدارەوە رفێنراوە

شاناز ئیبراهیم ئەحمەد خانمی یەکەمی عیراق پرسە و سەرخۆشی ئاڕاستەی بنەماڵەی موسا ئەنوەر رەسوڵ و مژدە ئەسعەد حەسەن دەکات و دەڵێت: ئەم هێرشانە پێشێلکارییەکی زەقی یاسا نێودەوڵەتییەکانن و هەرگیز پاساویان بۆ ناهێنرێتەوە.

دەقی پرسەنامەیەکی شاناز ئیبراهیم ئەحمەد خانمی یەکەمی عیراق..

هاوبەشی ئەو خەمە گەورەیەم بۆ شەهیدبوونی  (مووسا ئەنوەر ڕەسووڵ) و (مژدە ئەسعەد حەسەن)، کە لە هێرشێکی درۆنیدا بۆ سەر گوندی زەرگەزەوی نزیک هەولێر شەهیدبوون.

هاوسۆزیی قوڵم بۆ بنەماڵەکەیان، بەتایبەت کچەکانیان کە ئێستا تووشی زیانێکی قەرەبوونەکراوە بوون دەردەبڕم. هیچ منداڵێک نابێت بەرگەی ئازارێکی وا بگرێت و هیچ خێزانێک نابێت بەم شێوەیە تێکبچێت.

هاوکات سەرەخۆشی لە هەموو ئەو کەسانە دەکەم کە بەهۆی توندوتیژییە بەردەوامەکانی سەرتاسەری عیراقەوە زیانیان بەرکەوتووە.

تەنیا لە هەرێمی کوردستان زیاتر لە 600 هێرشی درۆنی و موشەکی تۆمارکراون. ئەم هێرشانە پێشێلکارییەکی زەقی یاسا نێودەوڵەتییەکانن و هەرگیز پاساویان بۆ ناهێنرێتەوە.

لێپرسراوێکی پێشووی دژە تیرۆری ئەمریکا هۆشداری توند دەداتە دۆناڵد ترەمپ و رایدەگەیەنێت، هەڕەشەکردن لە شارستانیەتی ئێران، ئەمریکا لە هێزێکی سەقامگیرکەرەوە دەگۆڕێت بۆ سەرچاوەی "ئاژاوە" لە جیهاندا.

جۆ کێنت، لێپرسراوی پێشووی دژە تیرۆری ئەمریکا، لە پلاتفۆرمی ئێکس بڵاویکردەوە، ئەو هەڕەشە وێرانکارییانەی ترەمپ ئاڕاستەی تارانی دەکات، زیانەکەی بەر خودی واشنتن دەکەوێت.

دەشڵێت: ترەمپ پێیوایە هەڕەشە لە ئێران دەکات، بەڵام لە راستیدا ئێستا ئەمریکا خۆی لە مەترسیدایە.

ئەو لێپرسراوە هۆشداریداوە کە هەر هەوڵێک بۆ لەناوبردنی شارستانیەتی ئێران، دەبێتە هۆی ئەوەی ویلایەتە یەکگرتووەکان وەک " ئاژاوەگێڕ" لە جیهاندا دەربکەوێت، ئەمەش بە کردەیی کۆتایی بە پێگەی ئەمریکا وەک گەورەترین زلهێزی جیهان دەهێنێت و سیستم و رێکخستنی جیهانی پارچەپارچە دەکات.

لە کۆتایی پەیامەکەیدا، جۆ کێنت ئاماژەی بەوە کردووە کە هێشتا کات ماوە بۆ رێگریکردن لە کارەساتێکی گەورە کە ئابووری ئەمریکا تێکبدات، داواشی لە ترەمپ کردووە کە لەبری پەنابردن بۆ "توڕەیی و وێرانکاری بێباکانە"، پەنا بۆ دانوستانی جدی ببات.

شۆڕش ئیسماعیل، وەزیری پێشمەرگەی حکومەتی هەرێمی کوردستان لە پەیامێکدا دەڵێت: بەداخ و پەژارەیەکی قووڵەوە، هەواڵی شەهیدبوونی پێشمەرگەی قارەمان (وەیسی ئاخیر سعید)مان پێگەیشت؛ دووپاتیدەکەینەوە کە خوێنی ئەم قارەمانانە دەبێتە هەوێنی زیاتر سووربوونمان لەسەر پاراستنی دەستکەوتەکان و سەقامگیریی کوردستان.

دەقی پەیامەکە...

بەداخ و پەژارەیەکی قووڵەوە، هەواڵی شەهیدبوونی پێشمەرگەی قارەمان (وەیسی ئاخیر سعید)مان پێگەیشت، کە دوای مانەوەی بۆ ماوەیەک لەژێر چاودێری چڕی پزیشکیدا بەهۆی ئەو برینە سەختەی لە هێرشە مووشەکییە تێرۆریستییەکەی بەرەبەیانی ٢٤ـی ئاداردا کە شەش لە ئەفسەر و پێشمەرگە هاوڕێکانی شەهیدبوون، دواجار ئەویش چووە ڕیزی شەهیدە سەربەرزەکانی کوردستان.

ئێمە لە وەزارەتی پێشمەرگە، وێڕای سەرکۆنەکردنی هەموو ئەو دەستدرێژییانە بۆ سەر خاکی هەرێمی کوردستان، دووپاتی دەکەینەوە کە خوێنی ئەم قارەمانانە دەبێتە هەوێنی زیاتر سووربوونمان لەسەر پاراستنی دەستکەوتەکان و سەقامگیریی کوردستان؛ پرسە و سەرەخۆشی قووڵی خۆمان ئاراستەی بنەماڵە و کەسوکاری سەربەرزی شەهید و تەواوی هاوسەنگەرانی دەکەین، لە پەروەردگاری میهرەبان داواکارین گیانی کۆچکردوو بە بەهەشتی بەرین شاد بکات و ئارامی و دڵنەوایی بە هەمووان ببەخشێت.

شۆڕش ئیسماعیل

وەزیری پێشمەرگەی حکومەتی هەرێمی کوردستان

نیسانی ٢٠٢٦

تەیف سامی وەزیری دارایی عیراقی راسپێردراوە لەماوەی دوو رۆژدا موچەی مانگی سێی هەرێمی کوردستان خەرج بکات.

محەمەد عەبدولڕەحمان، پەیامنێری کوردسات نیوز: محەمەد شیاع سودانی، سەرۆک وەزیرانی عیراق تەیف سامی، وەزیری دارایی عیراقی راسپاردوە لە دوو رۆژدا موچەی مانگی سێی فەرمانبەرانی هەرێمی کوردستان خەرج بکات.

نوێدەکرێتەوە...

وەزارەتی پێشمەرگە شەهیدبوونی یەکێک لە پێشمەرگە بریندارەکانی سنوری سۆرانی راگەیاند.

وەزارەتی پێشمەرگەی حکومەتی هەرێم رایگەیاندووە:​ بەداخ و کەسەرێکی زۆرەوە، جارێکی دیکه کاڕوانی شەهیدانی کوردستان رۆڵەیەکی تری بە ئەمەکی پێ سپێردرا، ئەمڕۆ 7ی نیسانی 2026 (وەیسی ئاخر سەعید شێروانی) پێشمەرگە لە فیرقەی پێنجی پیادەی فەرماندەیی دەڤەری یەکی سەر بە وەزارەتی پێشمەرگە، کە پێشتر  لە ئەنجامی هێرشە مووشەکییەکانی کۆماری ئیسلامی ئێران بۆ سەر بارەگاکانی هێزی پێشمەرگەی کوردستان لە سنوری سۆران بریندار ببوو، دوای 15 رۆژ مانەوە لە یەکێک نەخۆشخانەکانی هەولێر، بەهۆی سەختی برینەکەیەوە گەیشتە پلەی بەرز و پیرۆزی شەهادەت.

​لە راگەیەندراوەکەشدا هاتووە: وێڕای دەربڕینی پرسە و سەرەخۆشی خۆمان بۆ بنەماڵەی سەربەرزی شەهیدان و تەواوی خەڵکی کوردستان، جارێکی دیکە بە توندی سەرکۆنەی ئەو هێرش و پەلامارە ناڕەوایانە دەکەینەوە کە دەکرێنە سەر هێزی پێشمەرگە و خەڵکی سڤیلی هەرێمی کوردستان.

 

دۆناڵد ترەمپ، سەرۆکی ئەمریکا لە نوێترین پەیامیدا دەڵێت، ئەمشەو ساتەوەختێکی یەکلاکەرەوە و گرنگە لە مێژوی درێژ و ئاڵۆزی جیهاندا، ئاماژەی بەوەشکردوە  گەرچی نایەوێت ئەوە روبدات، بەڵام بە ئەگەری زۆرەوە شارستانیەتی ئێران دەمرێت.

لە بەشێکی دیکەی پەیامەکەیدا دەڵێت؛ گۆڕانکارییەکی ریشەیی و گشتگیر لە دەسەڵاتدا رویداوە و مێشکگەلێکی ژیرتر و کەمتر توندڕەو جڵەوی کاروباریان گرتووەتە دەست.

سەرۆکی ئەمریکا دەڵێت؛  ئەمەش هیوای ئەوەی خوڵقاندوە کە روداوی "شۆڕشگێڕانە و ناوازە" بێنە ئاراوە و رێگری بکرێت لە لەناوچونی شارستانییەتێک کە مەترسی لەسەر بوو.

دۆناڵد ترەمپ لە پەیامەکەیدا کە لە تروس سۆشیال بڵاویکردوەتەوە،  هۆشداریشیداوە ئەگەر نەگەنە رێککەوتن، ئەمشەو کۆتایی بە 47 ساڵ لە چەوسانەوە، گەندەڵی و کوشتن دەهێنرێت و شارستانیەتی ئێران بە تەواوەتی لەناو دەچێت.

فراکسیۆنی یەکێتیی نیشتمانیی کوردستان لە ئەنجومەنی نوێنەران عیراق، بەیاننامەیەکی سەبارەت بە هێرشکردنە سەر هەرێمی کوردستان بڵاوکردووەتەوە و تێیداهاتووە: ئەم پەلامارانە کە بەردەوام  لە ڕێگەی درۆنەوە دژ بە شارەکانی هەرێمی کوردستان ئەنجام دەدرێن، پێشێلکارییەکی مەترسیدارن ، بەئامانجگرتنی ماڵی هاوڵاتیان و شەهیدکردنی خێزانێکی سڤیل، تاوانێکی گەورەیە و دەچێتە خانەی "تاوانی جەنگ ، کە هیچ پاساوێک هەڵناگرێت.

دەقی بەیاننامەکە

بە توندی ئیدانەی ئەو هێرشە درۆنییە دەکەین کە گوندی (زەرگەزەوی) لە سنووری پارێزگای هەولێر کردە ئامانج و بووە هۆی شەهیدبوونی دوو هاوڵاتی سڤیل لەناو ماڵەکەی خۆیاندا 

ئەم پەلامارانە کە بەردەوام  لە ڕێگەی درۆنەوە دژ بە شارەکانی هەرێمی کوردستان ئەنجام دەدرێن، پێشێلکارییەکی مەترسیدارن ، بەئامانجگرتنی ماڵی هاوڵاتیان و شەهیدکردنی خێزانێکی سڤیل، تاوانێکی گەورەیە و دەچێتە خانەی "تاوانی جەنگ ، کە هیچ پاساوێک هەڵناگرێت .

وەک فراکسیۆنی یەکێتیی نیشتمانیی کوردستان لە ئەنجومەنی نوێنەرانی عێراق ، داوا لە حکومەتی فیدراڵ دەکەین بەرپرسیارێتی یاسایی و دەستووری خۆی لە پاراستنی ئاسایشی هەرێمی کوردستان جێبەجێ بکات و ڕێگری بکات لە دووبارەبوونەوەی ئەم هێرشە نایاساییانە کە گیانی هاوڵاتیانمان دەکەنە ئامانج .

سەرەخۆشی لە بنەماڵەی هەردوو شەهیدی مەزڵووم دەکەین و هیوای سەقامگیریی بۆ نیشتمان دەخوازین.

فراکسیۆنی یەکێتیی نیشتمانیی کوردستان

لە ئەنجومەنی نوێنەرانی عێراق

٧ی نیسانی ٢٠٢٦

کاروان گەزنەیی وتەبێژی یەکێتیی نیشتمانیی کوردستان، پەیامێکی بڵاوکردووەتەوە و تێیداهاتووە: بەئامانجگرتنی ماڵ و حاڵی خەڵکی سڤیل، تەنها پێشێلکردنی سەروەریی خاک نییە، بەڵکو بەپێی هەموو عورف و یاسا نێودەوڵەتییەکان بە "تاوانی جەنگ" هەژمار دەکرێت و بە هیچ جۆرێک پاساو هەڵناگرێت، هەروەها ئامانجی سەرەکیی سەرۆک بافڵ جەلال تاڵەبانی و یەکێتیی نیشتمانیی کوردستان ئەوەیە، کە خاک و خەڵکەکەمان پارێزراو بن.

دەقی پەیامەکە

راگەیەندراوێک لە وتەبێژی یەکێتیی نیشتمانیی کوردستانەوە

بەتوندی ئیدانەی بەئامانجگرتنی ماڵی هاووڵاتییانی مەدەنی لە گوندی زەرگەزەوی  لەسنووری پارێزگای هەولێر دەکەین، کە بەداخەوە بووە هۆی شەهیدبوونی دوو هاوسەری بێتاوان.

بەئامانجگرتنی ماڵ و حاڵی خەڵکی سڤیل، تەنها پێشێلکردنی سەروەریی خاک نییە، بەڵکو بەپێی هەموو عورف و یاسا نێودەوڵەتییەکان بە "تاوانی جەنگ" هەژمار دەکرێت و بە هیچ جۆرێک پاساو هەڵناگرێت.

لێرەوە دووپاتی دەکەینەوە، ئامانجی سەرەکیی سەرۆک بافڵ جەلال تاڵەبانی و یەکێتیی نیشتمانیی کوردستان ئەوەیە، کە خاک و خەڵکەکەمان پارێزراو بن. 

هەروەک ئێمە لە کاتێکدا جەخت لە پاراستنی سەقامگیری هاووڵاتییانی کوردستان دەکەینەوە، لەهەمانکاتدا رایدەگەیەنین، هەرێمی کوردستان نابێت بەشێک بێت لەم جەنگ و ململانێیانە، چونکە پاراستنی ژیان و شکۆی هاووڵاتییانمان لە سەرووی هەموو ئەولەوییەتەکانمانەوەیە.

وێڕای شەرمەزارکردنی ئەم هێرشە ناڕەوایە، پرسە و هاوخەمیی قووڵی خۆمان ئاڕاستەی بنەماڵە و کەسوکاری سەربەرزی هەردوو شەهیدەکەی شەوی رابردوو دەکەین.

 

کاروان گەزنەیی

وتەبێژی یەکێتیی نیشتمانیی کوردستان

٧ی نیسانی ٢٠٢٦

هێرشکرایە سەر کونسوڵخانەی ئیسرائیل لە ئیستەنبوڵ و لە ئەنجامدا سێ کەس کوژران.

ئەمڕۆ سێشەممە 7ـی 4ـی 2026، سێ کەس هیرشیان کردە سەر کونسوڵخانەی ئیسرائیل لە ئیستەنبوڵ، لە ئەنجامدا ئەو سێ کەسە کوژران کە هێرشەکەیان ئەنجامدابوو، دوو پۆلیسیش برینداربوون.

نوێدەکرێتەوە...

د. لەتیف رەشید، سەرۆک کۆماری عیراق، لە کۆشکی سەلام لە بەغداد، پێشوازی لە وەفدێکی پەرلەمانتارانی پێکهاتەی ئێزدی کرد، کە پێکهاتبوون لە موراد ئیسماعیل، خالید سیدۆ و بسمان نافخۆش، لە دیدارەکەدا باس لە رەوشی ئێزدییەکان و ئاڵنگارییە ئەمنی و سیاسییەکان کرا.

لە دیدارەکەدا سەرۆک کۆمار جەختی لە پێویستی پاراستنی مافی ئێزیدییەکان و قەرەبووکردنەوەی قوربانییان کردەوە، هەروەها ئاماژەی بەوەش دا، کە دەبێت رێکارەکانی گەڕانەوەی ئاوارەکان تەواو بکرێن و لە رێگەی یاسا و هەنگاوە حکومییەکانەوە ژیانێکی شایستەیان بۆ دابین بکرێت.

لای خۆیانەوە، پەرلەمانتارانی ئێزیدی سوپاسی هەوڵەکانی سەرۆک کۆماریان کرد بۆ پشتگیریکردن لە دۆزی پێکهاتەکەیان و خێراکردنی پڕۆسەی ئاوەدانکردنەوە و باشترکردنی خزمەتگوزارییەکان.

هەروەها پاڵپشتی خۆیان بۆ تەواوکردنی شایستە دەستوورییەکان دەربڕی بە جۆرێک کە نوێنەرایەتییەکی دادپەروەرانە بۆ هەموو پێکهاتەکان، بە تایبەت ئێزیدییەکان، مسۆگەر بکات و مافی تەواوی هاووڵاتییانی عیراق بپارێزرێت

تەندروستی سلێمانی هۆشداری لە خواردنی کوزەڵە دەدات و دەڵێت؛ بەهۆی خواردنی ئەو سەوزەوە، توشبون بە کرمی جگەر بە رێژەیەکی بەرچاو زیادی کردوە و زۆترین توشبوەکانیش لەپارێزگای هەڵەبجە و ئیدارەی راپەڕین.

تەندروستی سلێمانی لە راگەیەندراوێکدا داوا لە هاووڵاتیان دەکات، بە مەبەستی توشنەبونیان بە کرمی جگەر دورکەونەوە لە خواردنی سەوزەی( کوزەڵە)

لە راگەیەندراوەکەدا ئاماژەی بەوەشکردوە، لەئیستادا حاڵەتەكانی كرمی جگەر لەناو هاووڵاتیان زیادی كردووە و چارەسەرەكەشی زۆر گرانە.

تەندروستی سلێمانی هۆشداریدەدات لە زیادبونی توشبوانی کرمی جگەر و دەڵێت؛ و بەم دواییە نزیکەی (90) حاڵەتی تووشبوون بە كرمی جگەر تۆماركراون و زۆرینەی لەپارێزگای هەڵەبجە و ئیدارەی راپەڕین بووە .