محەمەد باقەر قالیباف، سەرۆکی پەرلەمانی ئێران، لە پەیامێکدا کە لە ئێکس بڵاویکردوەتەوە، دەڵێت هێشتا دوو خاڵی سەرەکی لەو رێککەوتنانەی لە نێوان لایەنەکاندا کراون جێبەجێ نەکراونو تا ئەوانە جێبەجێ نەکرێن دانوستان دەستپێناکاتەوە.

سەرۆکی پەرلەمانی ئێران ئاماژەی بەوەکردوە، یەکێک لە مەرجەکان  کە بریتییە لەوەی کە ئاگرنەست لوبنانیش بگرێتەوە، کە لە ئێستادا بە چرەی لەلایەن ئیسرائیلەوە بۆردومان دەکرێت.

مەرجی دوەمیش بریتییە لە ئازادکردنی پارە بلۆکراوەکانی ئێران و قالیباف جەختی لەوە کردەوە، کە پێویستە ئەم دوو هەنگاوە وەک پێشمەرجێک پێش دەستپێکردنی هەر جۆرە دانوستانێک جێبەجێ بکرێن، بەبێ بەدیهاتنی ئەم مەرجانە تاران ئامادەی چوونە ناو دانوستانەکان نابێت

ئەم قسانەی قاڵیباف لە کاتێكدایە، بڕیارە سبەینێ شەممە، لە ئیسلام ئابادی پایتەختی پاکستان، ئەمریکا  و ئێران دانوستانەکانیان دەستپێبکەنەوە، گەرچی تا ئێستا ئێران بە رەسمی چونی وەفدی خۆی بۆ پاکستان رانەگەیاندوە.

رێکخراوی لێبوردنی نێودەوڵەتی بڵاویکردوەتەوە هاووڵاتیانی ئێران ژیانیان لەگەڵ بێ ئینتەرنێتیدا هەزار سەعاتی تێپەراندوە و  هۆشدارییەکی توند دەدات و کە ئەمە پێشێلکارییەکی رونی مافەکانی مرۆڤە.

رێکخراوەکە جەخت دەکاتەوە، کە نەبونی ئینتەرنێت بۆ ماوەی زیاتر لە هەزار سەعات، درێژترین تۆماری جیهانییە و ژیان و بژێوی 90 ملیۆن کەسی خستووەتە مەترسییەوە، ئاماژەی بەوەشکردوە، پێویستە دەسەڵاتدارانی ئێران دەستبەجێ دەستڕاگەیشتن بە زانیارییەکان بۆ هاووڵاتیان بگەڕێننەوە.

لە روی ئابوورییەوە، ئەم پچڕانە زیانی گەورەی بە ژێرخانی دارایی ئێران گەیاندووە؛ بەپێی ئامارە سەرەتاییەکان، ئابووری دیجیتاڵ نزیکەی 20 هەزار ملیار تمەن و ئابووری گشتیی وڵاتەکەش نزیکەی 200 هەزار ملیار تمەن زیانیان بەرکەوتووە.

رێکخراوەکە جەختدەکاتەوە، هەزار سەحات بەبێ پەیوەندی لەگەڵ خێزان و بێ ئاگایی لە جیهانی دەرەوە، تەنها بێبەشکردن نییە، بەڵکو لێسەندنەوەی مافێکی بنەڕەتی ژیانە لە مرۆڤەکان.

جەی دی ڤانس، جێگری سەرۆکی ئەمریکا،پێس رێککەوتنی بەرەو پاکستان، بە میدیاکانی رایگەیاند، کە واشنتۆن بە پەرۆشەوە چاوەڕوانی دەستپێکردنی دانوستانەکان لەگەڵ ئێران دەکات و هیوای خواست ئەم گەڕەی گفتوگۆکان ئەرێنی بن.

ڤانس ئاماژەی بەوە کرد، کە ئەوان ئامادەن دەستی هاوکاری درێژ بکەن لە دانوستانەکانی ئیسلام ئاباد، بەڵام جەختیشی کردەوە کە هەموو شتێک بەستراوەتەوە بەوەی ئایا ئێرانییەکان ئامادەن بە نیازپاکی و بێ فێڵ و تەڵەکەبازی بێنە سەر مێزی گفتوگۆ یان نا.

لە بەشێکی تری قسەکانیدا، جێگری سەرۆکی ئەمریکا هۆشدارییەکی توندی ئاراستەی تاران کرد و رایگەیاند؛ ئەگەر لایەنی ئێرانی هەوڵی مانۆڕدان و کات کوشتن بدات، ئەوا دەبینن کە تیمی دانوستانکاری ئەمریکا بە هیچ شێوەیەک وەڵامدەرەوەی داواکارییەکانیان نابێت.

جێگرەکەی سەرۆکی ئەمریکا، دووپاتی کردەوە، کە ئامانجی ئەوان سەرکەوتنی دانوستانەکانی ناو پاکستانە، بەڵام ئەمە پێویستی بە جددییەتی لایەنی بەرامبەر هەیە.

فراکسیۆنی یەکێتیی نیشتمانیی کوردستان لە ئەنجومەنی نوێنەرانی عیراق، لە راگەیەندراوێکدا جەخت لەسەر پێویستی بەستنی کۆبوونەوەی سبەینێ شەممە 11ـی نیسان دەکاتەوە، بە مەبەستی یەکلاکردنەوەی پۆستی سەرۆک کۆمار وەک گرنگترین شایستەی دەستوری. 

فراکسیۆنەکە ئاماژە بەوە دەکات، کە ئەم پرسە کاتێکی زۆری وەرگرتووە و چیتر نابێت نەبوونی تەبایی سیاسی ببێتە رێگر لەبەردەم کاراکردنەوەی دامەزراوەکانی دەوڵەت، چونکە دواکەوتنی ئەم هەنگاوە زیانی راستەوخۆی بە ژیان و بژێوی هاووڵاتیان گەیاندووە و کاروانی خزمەتگوزاری و ئابووری پەکخستووە.

 

دەقی راگەیەندراوکەی فراکسیۆنی یەکێتی لە بەغداد

بەیاننامەی فراکسیۆنی یەکێتیی نیشتیمانیی کوردستان لە ئەنجوومەنی نوێنەران.

لەژێر ڕۆشنایی ئەو بارودۆخە هەنووکەییەی وڵات پێیدا تێدەپەڕێت، و لە وەڵامی شایستە دەستوورییەکان کە گەلی عێراق چاوەڕوانی دەکات، فراکسیۆنی یەکێتیی نیشتمانیی کوردستان لە ئەنجومەنی نوێنەران جەخت دەکاتەوە لەسەر پێویستی بەستنی کۆبوونەوەی ئەنجومەنی نوێنەران لە سبەی شەممەدا، بە مەبەستی تەواوکردنی گرنگترین شایستەی دەستووری کە خۆی لە هەڵبژاردنی سەرۆک کۆماردا دەبینێتەوە، دوای ئەوەی ئەم مەلەفە کاتێکی پێویستی بۆ یەکلاییکردنەوە وەرگرتووە، بۆیە نابێت پرسی نەبوونی تەبایی ببێتە هۆکارێک بۆ پەکخستن و  تەواوکردنی شایستە دەستوورییەکان، کە بە کۆڵەکەی سەرەکی بۆ کاراکردنەوەی دامەزراوەکانی دەوڵەت و دەستەبەرکردنی سەقامگیری سیاسی و ئابووری دادەنرێت.

دواکەوتنی یەکلاییکردنەوەی ئەم پۆستە کاروانی دەوڵەت پەکدەخات و دەبێتە هۆی کەڵەکەبوونی مەلەفە ئابووری، خزمەتگوزاری و ئەمنییەکان کە ڕاستەوخۆ پەیوەندییان بە ژیانی هاووڵاتییانەوە هەیە، هاووڵاتیانی عێراق چاوەڕوانن ئەنجومەنی نوێنەران هەڵبستێت بە بەرپرسیارێتییە دەستوورییەکانی بۆ ڕووبەڕووبوونەوەی ئەو تەحەدییانەی ڕووبەڕووی عێراق دەبنەوە لەسەر هەردوو ئاستی ناوخۆیی و دەرەکی، هەروەها باشترکردنی باری گوزەران و دابینکردنی هەلی کار .

لە سۆنگەی بەرپرسیارێتی نیشتمانییەوە، فراکسیۆنی یەکێتیی نیشتمانیی کوردستان لە ئەنجومەنی نوێنەران داوا لە بەڕێزان ئەندامانی ئەنجومەنی نوێنەران دەکات ئامادەی کۆبوونەوەی سبەی شەممە بن، کە ڕێککەوتی ۱۱ی نیسانە، لە پێناو بەدیهێنانی خواستەکانی گەلەکەمان و چەسپاندنی پڕۆسەی سیاسی و دیموکراسی کە لەسەر خوێنی پاک و قوربانییەکانی گەلەکەمان دامەزراوە، کە لە پێناو عێراق و ئازادی گەلەکەیدا بەخشیویانە.

فراکسیۆنی یەکێتیی نیشتمانیی کوردستان

بانكی ناوەندی عیراق رێنماییەكی نوێی بۆ ئەو كەسانە بڵاوكردووەتەوە كە ناویان بۆ بەجێگەیاندنی فەریزەی حەجی ئەمساڵ دەرچووەو دەڵێت، بە نرخی پاڵپشتیكراو دۆلاریان پێ دەفرۆشن.

دەشڵێت، ئەو كەسانەی فەریزەی حەج بەجێدەگەیەنن، بڕی دوو هەزار دۆلاریان بەنرخی بانكی ناوەندی پێدەدرێت، واتە بۆ هەر دۆلارێك هەزار و 320 دینار و لە 13ی ئەم مانگەشەوە بڕیارەكە جێبەجێ دەكرێت.

ئاماژەی بەوەشكردووە، پێویستە ئەو كەسە خۆی ئامادە بێت بۆ وەرگرتنی ئەو بڕە دۆلارە و هەموو مامەڵەكانیش لە رێگەی سەكۆی ئەلیكترۆنی FITR تۆمار بكرێن، تەنیا ئەوانەش سودمەند دەبن كە ناویان لە لیستی دەستەی باڵای حەج و عومرەی عیراقدا بڵاوكراوەتەوە.

وەزارەتی ناوخۆی هەرێم رایگەیاند، شەوی رابردوو چەند هێرشێكی درۆنی كراوەتە سەر هەرێمی كوردستان و سەرجەمیان تێكشكێنراون.

بەپێی راگەیەندراوێكی وەزارەتی ناوخۆی هەرێم، شەوی رابردوو لە چەند كاتێكی جیاوازدا چەند هێرشێكی درۆنی كراونەتە سەر چەند شوێنێكی جیاوازی هەرێمی كوردستان كە سەرجەمیان تێكشكێنراون و خراونەتە خوارەوە.

جەختی لەوەش كردووەتەوە كە هەرێمی كوردستان هەر لە سەرەتاوە بەشێك نەبووە و ناشبێت لە شەڕ و گرژیەكان و ئاشتی دەوێت.

راشیگەیاندووە، هاووڵاتیان چاوەڕێی ئاساییبوونەوەی رەوشەكە بوون، بەڵام تیرۆیستان چاویان بە ئارامی وڵاتەكە هەڵنایەو لە نانەوەی پشێوی بەردەوامن.

داواش لە هەموو لایەك دەكات ئەو هێرشانە بۆ سەر هەرێم رابگرن و چیتر سەقامگیری و ئاسایشی كوردستان و بەرژەوەندییەكانی هاووڵاتیان نەكەنە ئامانج.

سانای تاكایچی، سەرۆك وەزیرانی ژاپۆن ڕایگەیاند، وڵاتەكەی هەنگاوی كردەیی ناوە بۆ كەمكردنەوەی پشتبەستن بە گەرووی هورمز و پێشبینی دەكرێت تا مانگی ئایاری داهاتوو، زیاتر لە نیوەی هاوردەی نەوتی ژاپۆن لە ڕێڕەوگەلێكی جێگرەوە دابین بكرێت كە بە ناو ئەو گەرووەدا تێنەپەڕن.

تاكایچی ئاماژەی بەوە كرد، ئاڵۆزییەكانی ڕۆژهەڵاتی ناوەڕاست و گەمارۆكانی سەر گەرووی هورمز، بوونەتە هۆی دروستبوونی قەیرانێكی جیهانی لە دابینكردنی وزەدا، بۆ ئەم مەبەستەش تۆكیۆ پلانێكی هەمەجۆر جێبەجێ دەكات.

دەشڵێت، ژاپۆن سوود لەو بەندەرانەی رۆژهەڵاتی ناوەڕاست وەردەگرێت كە ناكەونە ناو گەرووی هورمز وەك بەندەری یەنبوع لە سعودیە و فوجەیرە لە ئیمارات.

ئەوەش لەكاتێكدایە، ژاپۆن و هیندستان بە دوو وڵاتی سەرەكی كڕیاری نەوت و پاڵاوتنی نەوتی خاو دادەنرێن لە جیهاندا.

 

سەعید خەتیبزادە، جێگری وەزیری دەرەوەی ئێران بە میدیاکانی راگەیاندوە کە گەروی هورمز کراوەیە و کەشتییە ئەمریکییەکان دەتوانن پێیدا تێپەڕن، بە مەرجێک بە شێوەیەکی دوژمنکارانە رەفتار نەکەن.

خەتیبزادە وتویەتی؛ گەروی هورمز کراوەیە، بەڵام بەهۆی سنورداربونی تەکنیکییەوە دەبێت کەشتیەکان لەگەڵ هێزەکانی ئێران هەماهەنگی بکەن، بە مەبەستی ئەوەی بە سەلامەتی بتوانن گەروەکە تێپەڕێنن.

ئەم لێدوانانە لە کاتێکدایە، کە راپۆرتەکان ئاماژەیان بەوە کردووە، کە دوای رێککەوتنی ئاگربەستی دوو هەفتەیی نێوان ئێران و ئەمریکا تەنیا چەند کەشتییەک توانیویانە بە گەروی هورمزدا ​​تێپەڕن.

پێشتریش ئیبراهیم عەزیزی، سەرۆکی کۆمیسیۆنی ئاسایشی نیشتمانی پەرلەمان، بە ئاماژەدان بە پێشنیاری پەرلەمانتاران سەبارەت بە گەروی هورمز، سەپاندنی سنوردارکردنی هاتوچۆی کەشتییەکان لە رێگەی ئەم رێڕەوی ئاوییەوە راگەیاندبوو.

ئەم قسانەی خەتیبزادە لە کاتێکدایە، سەرۆکی ئەمریکا شەوی پێنجشەممە لە پلاتفۆرمی سۆشیال میدیای تروس رایگەیاندبوو، ئێران کارێکی زۆر خراپ دەکات و ئەو شێوازی رێگەدانەی جێبەجێی دەکات بۆ تێپەربونی کەشتییەکان بە گەروی هورمزدا ئەوە نییە لەسەری رێککەوتون.

کەشناسی هەرێم بڵاویکردوەتەوە، کەشەکە تەواو بەهارە دەبێت  بۆ چونەدەرەوە گونجاوە و ئەگەری کەمی باران بارین هەیە لە ناوچە شاخاوییەکان،  لەبارەی کەشی سبەینێشەوە ئاماژەی بەوەکردوە، هاوشێوەی ئەمرۆ دەبێت و گۆڕانکاریی بەسەردا نایەت.

ئەمڕۆ هەینی، بەڕێوەبەرایەتی گشتی کەشناسی و بوومەلەرزەزانی هەریم، پێشبینی 48 سەعاتی داهاتوی بڵاوکردەوە بە گوێرەی پێشبینییەکان، ئاسمان هەور دەبێت و لە ناوچە جیاجیاکان ئەگەری بارینی باران هەیە و پلەکانی گەرماش یەک بۆ سێ پلە بە راورد بە تۆمارکراوەکانی دوێنێ بەرزدەبنەوە.

لەبارەی کەشی سبەینێشەوە، ئاماژەی بەوەکردوە، هاوشێوەی ئەمڕۆ کەشەکە تەواو بەهارە دەبێت و پلەکانی گەرماش نزیک دەبن لە تۆمارکراوەکانی ئەمڕۆ.

بەرزترین پلەکانی گەرمای پێشبینیکراو بە پلەی سیلیزی بۆ رۆژی شەممە؛

هەولێر: 22 پلەی سیلیزی

پیرمام: 18 پلەی سیلیزی

سۆران: 15 پلەی سیلیزی

حاجی ئۆمەران: 9 پلەی سیلیزی

سلێمانی: 18 پلەی سیلیزی

چەمچەماڵ: 21 پلەی سیلیزی

دهۆک: 20 پلەی سیلیزی

زاخۆ: 20 پلەی سیلیزی

هەڵەبجە: 22 پلەی سیلیزی

گەرمیان: 25 پلەی سیلیزی

سەرەرای ئامادەکارییەکانی پاکستان، بۆ دانوستان، میدیا رەسمییەکانی ئێران رەتی دەکەنەوە هیچ وەفدێکیان گەشتبنە ئیسلام ئاباد  بە مەبەستی دانوستان لەگەڵ ئەمریکا.

ئەمڕۆ هەینی ئاژانسی هەواڵی تەسنیم نزیک لە سەرچاوەیەکی ئاگاداری وڵاتەکەیەوە بڵاویکردوەتەوە، هیچ وەفدێکی  ئێران بۆ دانوستان لەگەڵ ئەمریکا نەچوتە ئیسلام ئابادی پایتەختی پاکستان.

ئەو سەرچاوەیە بە میدیای وڵاتەکەی راگەیاندوە، تا ئەمریکا پابەندی بەڵێنەکانی نەبێت و ئاگربەست لە لوبنان جێبەجێ نەکرێت، هەروەها ئیسرائیل هێرشەکانی بۆسەر لوبنان رانەگرێت بە هیچ جۆرێک دانوستان ناکەن.

ئەم قسانەی میدیاکەی ئێران لە کاتێکدایە، لایخۆیەوە ئیسحاق دار وەزیری دەرەوەی پاکستان رایگەیاندوە،  پێشوازی لە وەفدی وڵاتان دەکەن بەمەبەستی دانوستان و بۆ ئاسانکاریش ڤیزەیان لەسەر رۆژنامەنوسان و وەفدی هەڵگرتوە و دەتوانن بەبێ ڤیزە بچنە ئیسلام ئاباد و لەوێ راستەوخۆ ڤیزەیان پێدەدرێت.

 

کەشتیوانانی ئارتیمیس 2، دوای گەشتێکی مێژویی بۆ دەوری مانگ و تۆمارکردنی زانیاری نوێی زانستی  ئێستا لە قۆناغەکانی کۆتایی گەشتە 10 رۆژەکەیاندان، ئەویش گەڕانەوەیە بۆ ناو بەرگەهەوای زەوی و نیشتنەوە لە زەریای هێمن.

لەم ئەرکەدا، رید وایزمن، ویکتۆر گلاوەر و کریستینا کوک لە ئەمریکا، لەگەڵ جێرمی هێنسن لە کەنەدا، توانییان زیاتر لە هەر مرۆڤێکی تر لە زەوی دوور بکەونەوە؛ گەشتێک کە وەک هەنگاوێکی سەرەکی بۆ نیشتنەوەی مرۆڤ لەسەر روی مانگ لە داهاتوودا هەژمار دەکرێت.

بڕیارە ئەم چوار کەشتیوانە رۆژی هەینی، سەعات پێنجی ئێوارە بە کاتی کالیفۆڕنیا، کە دەکاتە رۆژی شەممە و بە نزیکەیی  سەعات سێی بەرەبەیان بە کاتی هەرێم لە نزیک کەناراوەکانی سان دیێگۆ بنیشنەوە.

راستەوخۆش دوای نیشتنەوەکە، تیمەکانی ناسا و هێزە سەربازییەکان هاوکارییان دەکەن بۆ چوونە دەرەوە لە کەپسولەکە و گواستنەوەیان بۆ سەر کەشتییەکی تایبەتی فریاگوزاری.

چوار کەشتیوانەکە، لە ئەرکەکەیاندا، تا ئێستا دەستکەوتی گەورەیان هەبووە و وێنەی سەرنجڕاکێشی مانگیان تۆمار کردووە، بەڵام بەرپرسانی ناسا جەخت دەکەنەوە، کە هێشتا زوە بۆ راگەیاندنی سەرکەوتنی کۆتایی

لای خۆشیەوە ئامیت کشاتریا، جێگری بەڕێوەبەری ناسا، لە کۆنگرەیەکی رۆژنامەوانیدا رایگەیاند، تەنها کاتێک دەتوانین ئاهەنگ بگێڕین کە ستافەکە بە تەندروستییەکی تەواوەوە گەیشتبنە سەر زەوی و  لەو ساتەدا دەتوانن هەستەکانیان دەربڕین و باس لە سەرکەوتنی ئەرکەکە بکەن.

رۆژنامەی وۆڵ ستریت جۆرناڵ لە زاری بەرپرسێکی باڵای ئەمریکییەوە بڵاویکردەوە، کە دۆناڵد ترامپ، سەرۆکی ئەمریکا، پەیامێکی توندی ئاڕاستەی بنیامین ناتانیاهۆ، سەرۆک وەزیرانی ئیسرائیل کردووە و لە پەیامەکەیدا ترەمپ داوای لە ئیسرائیل کردووە دەستبەجێ هێرشەکانی بۆ سەر لوبنان کۆتایی پێبهێنێت.

بە گوێرەی زانیارییەکانی رۆژنامەکە، سەرۆکی ئەمریکا نیگەرانە لەوەی ئەم گرژییانە ببنە هۆی تێکدانی رێککەوتنی ئاگربەست لەگەڵ ئێران و ناسەقامگیربونی زیاتری ناوچەکە.

لەلایەکی دیکەوە، بەرپرسێکی ئیسرائیلی بە هەمان سەرچاوەی راگەیاندوە، کە تەلئەبیب بەدەم داواکارییەکەی ترەمپەوە چووە و بڕیارە چڕی هێرشەکانی بۆ سەر خاکی لوبنان کەم بکاتەوە.

ئەمەش لەکاتێکدایە کە سوپای ئیسرائیل بەرەبەیانی ئەمڕۆ هەینی رایگەیاند، نزیکەی 10 سەکۆی موشەکیی حزبوڵایان لە ناوخۆی لوبنان تێکشکاندووە، کە پێشتر بۆ بۆردومانکردنی باکووری ئیسرائیل بەکارهێنرابوون.

هاوکات لەگەڵ ئەم هەوڵە دیپلۆماسییانە و رێکەوتنی ئەمریکا و ئێران لەسەر ئاگربەست، رەوشی مەیدانی هێشتا ئاڵۆزە؛ بەرەبەیانی ئەمڕۆ دەنگی زەنگی مەترسی لە زۆربەی شارەکانی ئیسرائیل، لەوانەش تەلئەبیب و ئەشدۆد بیسترا، ئەمەش دوای ئەوەی چەندین موشەک لە خاکی لوبنانەوە ئاراستەی ئەو ناوچانە کران. 

بەردەوامەی هێرشەکانی ئیسرائیل و  حزبوڵای لوبنان بۆسەر یەکتری، مەترسییەکی راستەقینە لەسەر ئەو "ئاگربەستە ناسکە" دروست دەکات کە لە نێوان واشنتۆن و تاراندا هەیە، بەتایبەت کە هەردوولا لە چەند رۆژی رابردودا چەندین جار هێرشیان کردووەتە سەر یەکتری.

وەزیری دەرەوەی ئێران دەڵێت ناتانیاهۆ زیان بە ئابوری ئەمریكا دەگەیەنێت چونكە ئاستەنگ  بۆ هەوڵە دیپلۆماتییەكان دروست دەكات. 

عەباس عراقچی وەزیری دەرەوەی ئێران رایگەیاند، ئەگەر ئەمریكا دەیەوێت زیان بە ئابورییەكەی بكەوێت ئەوا با رێگە بە ناتانیاهۆ بدات هەوڵە دیپلۆماسییەكان تێكبدات.

وتیشی، ئەمریكا  دەتوانێت رێگە بە ناتانیاهۆ بدات ئاستەنگ  بۆ هەوڵە دیپلۆماسییەكان دروست بكات، بەڵام پێموایە بژاردەیەكی ژیرانە نییە، لەگەڵ ئەوەشدا ئامادەین بۆ هەموو ئەگەرێك.

ئاماژەی بەوەشكردووە، ئاگربەست هەموو ناوچەكە دەگرێتەوە بە جەنگی لوبنانیشەوە.

 

رێبەری باڵای ئێران جەختدەكاتەوە وڵاتەكەی بەدوای شەڕدا ناگەڕێت بەڵام دەستبەرداری مافەكانیشی نابێت.

موجتەبا خامنەیی، رێبەری باڵای ئێران پەیامێكی بەبۆنەی چلەی  ماتەمینی رابەری پێشوو بڵاوكردەوە و تیایدا ئاماژەی بەوەكرد، گەلی ئێران لە جەنگی دژی ئەمریكا و ئیسرائیل سەركەوتوو بووە و ئێستا خەریكە دەبێتە زلهێزێكی ناوچەیی، وتیشی، دوژمنە خۆبەزلزانەكانیان تا دێت لاوازتر دەبن.

باسی لەوەشكرد، واز لەوانە ناهێنین كە هێرشیان كردووەتە سەریان و داواش دەكەن سەرجەم ئەو زیانانەی پێیان گەیەنراوە قەرەبوو بكرێنەوە.

موجتەبا خامنەیی ئەوەشی خستەڕوو، خۆبەزلزانەكان لەڕێگەی كوشتن و ستەمكارییەوە رووخساری ناشیرینی خۆیان نیشاندا و بەدرێژایی 40 رۆژ دەستیان لە كوشتنی تەنانەت منداڵانیش نەپاراست.

 رێبەری باڵای ئێران جەختیشیكردەوە، ئێران بەدوای شەڕدا ناگەڕێت، بەڵام دەستبەرداری مافەكانیشی نابێت، پێداگریش دەبێت لەسەر تۆڵەكردنەوەی كوژرانی رابەری پێشوو.

 

 

رۆژی شەممە ئەنجومەنی نوێنەرانی عیراق بۆ هەڵبژاردنی سەرۆك كۆمار كۆدەبێتەوە.

فەرمانگەی راگەیاندنی سەرۆكایەتی ئەنجومەنی نوێنەرانی عیراق  كارنامەی دانیشتنی رۆژی شەممەی داهاتوی ئەنجومەنەكەی بڵاوكردەوە، بەپێی كارنامەكەش دانیشتنەكە لە یەك تەوەر پێكهاتووە كە بریتییە لە هەڵبژاردنی سەرۆك كۆماری عیراق.

رۆژی 29ی ئاداری رابردوو سەرۆكایەتی ئەنجومەنی نوێنەرانی عیراق ئاشكرایكرد دوای كۆبونەوە لەگەڵ سەرۆكی فراكسیۆنەكان بڕیاریانداوە رۆژی 11ی نیسان بۆهەڵبژاردنی سەرۆكا كۆماری عیراق دیاری بكرێت

یاریدەدەری وەزیری دەرەوەی ئێران ئاشكرایكرد وەفدی وڵاتەكەی بۆ دانوستانەكان لەگەڵ ئەمریكا بەرەو ئیسلام ئاباد بەڕێكەوتوون و پێدەچێت قالیباف سەرۆكایەتیان بكات.

سەعید خەتیبزادە، یاریدەدەری وەزیری دەرەوەی ئێران  رایگەیاند، وەفدێكی ئێران بۆ دانوستانی رۆژی هەینی لەگەڵ ئەمریكا دەچێتە ئیسلام ئابادی پایتەختی پاكستان.

خەتیبزادە ئاماژەی بەوەشكرد، پاكستان پێی راگەیاندوون، جەی دی ڤانس، جێگری سەرۆكی ئەمریكا سەرۆكایەتیی وەفدی ئەمریكا دەكات، بۆیە ئەگەری هەیە محەمەد باقر قالیباف، سەرۆكی پەرلەمانی ئێران سەرۆكایەتی وەفدەكەی ئێران بكات.

 راشیگەیاند، بەهۆی پێشێلكردنی ئاگربەست لەلایەن ئیسرائیلەوە، وڵاتەكەی شەوی رابردوو لە لێواری وەڵامدانەوەی سەربازیی یەكلاكەرەوەدا بووە، بەڵام بە نێوەندگیریی پاكستان و گەیاندنی پەیامێك لەلایەن ئەمریكاوە بۆ قایلكردنی ئیسرائیل بۆ راگرتنی ‌هێرشەكان بۆ سەر لوبنان، ئێران وەڵامدانەوەی دواخستووە.

جەختیشیكردەوە، پێویستە بەدیهاتنی ئاشتی لە ناوچەكە لوبنانیش بگرێتەوە و سەعاتەكانی داهاتووش زۆر چارەنووسساز دەبن.