هەواڵەکان
بەپێی هەواڵێکی ماڵپەڕی "ئەکسیۆس"ی ئەمریکی، بڕیارە ئەمڕۆ چوارشەممە، ستیڤ ویتکۆف نێردەی تایبەتی ئەمریکا بۆ رۆژهەڵاتی ناوەڕاست، بەمەبەستی تاوتوێکردنی قەیرانی مرۆیی لە کەرتی غەززە، سەردانی ئیسرائیل بکات.
ماڵپەڕەکە لە زاری دوو بەرپرسی ئاگاداری ئەمریکییەوە بڵاویکردەوە، ئەگەری هەیە ئەو نێردەیە سەردانی کەرتی غەززەش بکات و سەنتەرەکانی دابەشکردنی هاوکارییە مرۆییەکان بەسەربکاتەوە.
ئاماژە بەوەشکراوە کە بڕیارە رۆژی پێنجشەممە، نێردە ئەمریکییەکە لەگەڵ بنیامین ناتانیاهۆ، سەرۆک وەزیرانی ئیسرائیل و ژمارەیەک بەرپرسی دیکەی ئەو وڵاتە کۆببێتەوە بۆ گفتوگۆکردن لەسەر دۆخی مرۆیی غەززە و دۆزینەوەی رێگەچارەی گونجاو.
بەرپرسێکی ئەمریکی بە "ئەکسیۆس"ی راگەیاندووە: "دۆناڵد ترەمپ دەیەوێت زانیاری زیاتری لەبارەی دۆخی مرۆیی غەززەوە هەبێت، تا بزانێت چۆن دەتوانرێت هاوکاری زیاتری هاووڵاتییانی مەدەنی لە کەرتەکە بکرێت."
ئەمە یەکەم سەردانی ئەو نێردە ئەمریکییەیە بۆ ئیسرائیل لە ماوەی نزیکەی شەش مانگی رابردوودا و سەردانەکەشی لە کاتێکدایە کە دانوستانەکانی ئاگربەست لە غەززە رووبەڕووی وەستان بووەتەوە و کەرتەکە بەدەست قەیرانێکی مرۆیی کارەساتبارەوە دەناڵێنێت.
وەزارەتی خوێندنی باڵا وردەکاریی دامەزراندنی سێ یەکەمەکان و خاوەن بڕوانامە باڵاکانی دانیشتوی دەرەوەی هەرێم لەسەر میلاکی حکومەتی فیدراڵی بڵاوکردەوە.
دەقی وردەکاریی و رێنماییەکان:
1.دەرچووانی ساڵی (٢٠٠٣) تا ئەمڕۆ دەگرێتەوە.
2. دەرچووانی دەرەوەی عێراق لە زانکۆى پارێزگاکانی خۆیان بەپێی کارتی زانیاری داوکاری پێشکەش دەکەن.
3.پێشکەشکار فۆرمی داوکاری دامەزراندن و فۆرمی وەرگرتنی کۆد بەدەستی پڕ دەکاتەوە و ئیمزاى لەسەر دەکات.
4.تۆماری کۆلێژ و پەیمانگەکان فۆرمی ئۆنلاین بۆ دەرچووان پڕ دەکەنەوە.
5.پێویستە دەرچوو ئەم بەڵگەنامانە لەگەڵ خۆی ببات لە کاتی پێشکەشکردن:
-کارتی نیشتمانی دەرچوو لەگەڵ کارتی نیشتمانی دایک و باوکی دەرچوو.
-کارتی زانیاری یان بەڵگەنامەی نیشتەجێبوونی مۆرکراو لە یەکێک لە پارێزگاکانی دەرەوەی هەرێمی کوردستان.
-هەر دەرچوویەک سەردانی تۆمارى کۆلێژ نەکات و فۆرمی دەستی پڕنەکاتەوە بێ بەش دەبێت لە وەرگرتنی کۆد و دامەزراندن.
-لە ئێستادا تەنها کۆد دروست دەکرێت و لە داهاتوودا دامەزراندنەکە لەسەر میلاکی حکومەتی فیدراڵی دەبێت بەپێی شوێنی نیشتەجێبوون.
6.ئەم پرۆسەیە تەنها دانەمەزراوەکان دەگرێتەوە.
7.ئەم پرۆسەیە تا رۆژی (2025/9/15) سەعات (4)ى ئێوارە بەردەوام دەبێت.
8.ماوەی سکاڵا لە (2025/9/16) دەست پێ دەکات تا (2025/9/30).
کەشناسیی هەرێم پێشبینییەکانی کەشوهەوای ئەمڕۆ و سبەینێی بڵاوکردەوە و ئاماژەی بەوەکردووە، پلەکانی گەرما زیاتر نزم دەبنەوە و خۆڵ دەبارێت.
کەشناسیی هەرێم رایگەیاند، ئەمڕۆ چوارشەممە، ئاسمان ساماڵ و پەڵەهەور دەبێت، لەگەڵ ئەگەرى خۆڵبارینێکی کەم و دابەزینى پلەکانى گەرما، هەروەها خێرایی با کەمێک زیاد دەکات و دەگاتە 25 کیلۆمەتر لە سەعاتێکدا.
ئاماژەی بەوەشکردووە، سبەینێ پێنجشەممە، ئاسمان ساماڵ و پەڵەهەور دەبێت، لەگەڵ ئەگەری بوونی خۆڵبارینێکی کەم بە هەمان شێوەی ئەمڕۆ.
لەبارەی پلەکانی گەرماوە کەشناسیی ئەوەی خستووەتە روو، ئەمڕۆ پلەکانی گەرما 3 بۆ 5 پلەی دیکە دادەبەزن و سبەینێش هاوشێوەی ئەمڕۆ دەبن.
بەرزترین پلەکانی گەرمای پێشبینیکراو بە پلەی سیلیزی بۆ سبەینێ بەم جۆرە دەبن:
هەولێر : 45 پلەی سیلیزی
سلێمانی : 44 پلەی سیلیزی
دهۆک : 44 پلەی سیلیزی
کەرکوک : 46 پلەی سیلیزی
زاخۆ : 45 پلەی سیلیزی
هەڵەبجە : 45 پلەی سیلیزی
سۆران : 43 پلەی سیلیزی
حاجی ئۆمەران : 34 پلەی سیلیزی
گەرمیان 46 پلەی سیلیزی
ئەمریكا بڕی 10 ملیۆن دۆلار وەك پاداشت دیاری دەكات بۆ دۆزینەوەی سەركردەیەكی قاعیدە لە یەمەن .
بەرنامەی پاداشت بۆ دادپەروەریی سەر بە وەزارەتی دەرەوەی ئەمریكا لە راگەیەنراوێكدا بڵاویكردەوە، هەر كەسێك زانیاریی لەسەر "سەعد بن عاتف عەولەقی" هەبێت و یارمەتیدەربێت بۆ دەستگیركردنی ئەو سەركردەیەی رێكخراوی تیرۆریستی ئەڵقاعیدە لە نیمچە دورگەی عەرەب، لە لایەن وەزارەتەكەوە خەڵات دەكرێت و دەپارێزرێت.
راگەیەنراوەكەی وەزارەتی دەرەوە لە كاتێكدایە كە ئەمریكا لە ساڵی 2022 بڕی شەش ملیۆن دۆلاری بۆ دۆزینەوە و دەستگیركردنی سەعد عەولەقی دیاریی كردبو.
ئەمریكا رایگەیاندوە عەولەقی یەكێكە لە مەترسیدارترین سەركردەكانی داعش كە لە یەمەن نیشتەجێیە و بە هەڕەشە بۆ سەر ئەمریكا لەقەڵەم دەدرێت و ئاشكراشكراوە كە بەهۆی جەنگی ئیسرائیل و حەماس لە غەززە ، داوای كوشتنی سەرۆك و سەركردەكانی میسر و ئوردونی كردوە.
ئاسایشی باكور و رۆژهەڵاتی سوریا دەستگیركردنی نۆ تیرۆریستی لە رەققە راگەیاند و جەخت لە بەردەوامبونی هەڵمەتەكان دژی داعش دەكاتەوە.
هێزەكانی ئاسایشی ناوخۆی باكور و ڕۆژهەڵاتی سوریا بڵاویكردەوە لە چوارچێوەی هەڵمەتەكانی كانتۆنی رەققە نۆ تیرۆریستی داعش دەستگیركراون.
ئاماژە بەوەشكراوە، ئەو تیرۆریستانەی داعش ئامادەكارییان كردوە بۆ ئەنجامدانی چەند هێرشێك دژی هێزەكانیان و ئەو ناوچانەی لە ژێر كۆنترۆڵی هێزەكانی سوریای دیموكراتدان.
هێزەكانی ئاسایشی ناوخۆ باكوور و رۆژهەڵاتی سوریا جەختی لەوەشكردوەتەوە كە ئۆپراسیۆنەكانیان بەردەوام دەبن لە دژی شانە نووستووەكانی داعش لە ناوچەكەدا.
هەسەدە رایگەیاندوە لە ماوەی رابردودا جموجۆڵی تیرۆریستانی داعش لە دێرەزۆر و رەققە بەشێوەیەكی بەرچاو زیادی كردوە بۆیە هێزەكانیان بەردەوام دەبن لە هەڵمەتەكانیان دژی رێكخستن و چەكدارانی ئەو رێكخراوە تیرۆریستییە.
روانگەی ئابوریی "ئیكۆ عیراق" رایگەیاند، ئاستی بەرهەمهێنانی نەوت لە كێڵگە نەوتییەكانی هەرێمی كوردستان بەرزبووەتەوە بۆ نزیكەی 120 هەزار بەرمیلی رۆژانە، چاوەڕوانیش دەكرێت تاكو كۆتایی مانگی داهاتوو ئاستی بەرهەمهێنان بگاتە نزیكەی 280 هەزار بەرمیل.
روانگەی ئابوریی "ئیكۆ عیراق" بڵاویكردەوە، دوای ئەوەی بەهۆی هێرشە درۆنییەكانی چەند هەفتەی رابردووەوە بۆ سەر كێڵگە نەوتییەكانی هەرێم ئاستی بەرهەمهێنانی نەوت لەو كێڵگانە بۆ 81 هەزار بەرمیلی رۆژانە دابەزی، ئێستا ئاستی بەرهەمهێنان لەو كێڵگانە بەرزبووەتەوە و گەیشتووەتە نزیكەی 120 هەزار بەرمیل.
ئەوەشی خستەڕوو، چاوەڕوان دەكرێت تاكو كۆتاییەكانی مانگی داهاتوو ئاستی بەرهەمهێنانی نەوت لە كێڵگە نەوتییەكانی هەرێمی كوردستان بگاتە نزیكەی 280 هەزار بەرمیلی رۆژانە.
ئاماژە بەوەشكراوە، ئاساییبوونەوەی ئاستی بەرهەمهێنانی نەوت لە كێڵگە نەوتییەكانی هەرێمی كوردستان بەشدارییەكی بەرچاوی دەبێت لە چارەسەركردنی ناكۆكییەكانی نێوان بەغداد و هەولێر لەسەر دۆسییەی نەوت و میكانیزمی هەناردەكردنی.
جەختی لەوەشكردووەتەوە، تاكو ئێستا بەغداد و هەولێر نەگەیشتوونەتە رێككەوتن لەسەر وادەیەك بۆ دەستیپێكردنەوەی هەناردەی نەوتی هەرێم.
بەریتانیا دان بە دەوڵەتی فەلەستیندا دەنێت، سەرۆک وەزیرانی ئەو وڵاتەش دەڵێت: ئەگەر ئیسرائیل تا مانگی ئەیلولی داهاتوو هەنگاو نەنێت بۆ ئاگربەست ئەو بڕیارە دەدەن.
كییەر ستامەر سەرۆكوەزیرانی بەریتانیا رایگەیاند، ئەگەر ئیسرائیل هەنگاونەنێت بەرەو ئاگربەست، ئەوا لە كۆبوونەوەی داهاتووی نەتەوە یەكگرتووەكان لە مانگی ئەیلول، دان دەنێن بە دەوڵەتی فەڵەستینیدا.
سەرۆك وەزیرانی بەریتانیا وتیشی، دانپێدانان بە دەوڵەتی فەلەستیندا لە ئێستادا باشترین كاتە و زۆرترین كاریگەری دەبێت، بەهیوای ئەوەی چارەسەری دوو-دەوڵەت ببێتە هۆی ئارامی و ئاشتییەكی ماوە درێژ لە ناوچەكەدا.
ئەم لێدوانەی ستارمەر لەكاتێكدایە، ئیمانیۆڵ ماكرۆن سەرۆكی فەرەنسا پێشتر ئاماژەی بەوەدا كە حكومەتەکەی داندەنێت بە دەوڵەتی فەلەستینیدا لە كۆبوونەوەكەی نەتەوە یەكگرتووەكاندا لە مانگی ئەیلولی داهاتوودا.
توركیا داوا دەكات، رێككەوتنی نوێی نێوان ئەنقەرە و بەغداد میكانیزمێك بۆ گرەنتیكردنی بەكارهێنانی تەواوەتی هێلی بۆری نەوتی كەركوك-جەیهان لەخۆبگرێت.
ئاڵب ئەرسەلان بەیرەكتار وەزیری وزەی توركیا رایگەیاند، لە چوارچێوەی ئەو دانوستانەی لە نێوان ئەنقەرە و بەغداد هەیە بۆ فراوانكردنی رێككەوتنی نێوانیان لە بواری وزەدا، ئەنقەرە داوایكردوە، رێككەوتنێكی نوێ دابڕێژرێت كە لە رێیەوە گرەنتی بەكارهێنانی تەواوی هێڵی بۆری نەوتی كەركوك-جەیهان بكرێت.
وتیشی، توانای ئەو هێڵە بۆ گواستنەوەی نەوت رۆژانە یەك ملیۆن و 500 هەزار بەرمیلە، بەڵام لە رابردوودا و لە كاتی كاركردنیدا هەموو تواناكەی بەكارنەهێنراوە، وەزیری وزەی توركیا بە دوریشی نەزانیوە لە چوارچێوەی رێككەوتنێكی نوێدا بتوانن هێڵەكە بۆ باشوری عیراقیش درێژ بكەنەوە.
هاوکات لەگەڵ زیادبوونی فشارە نێودەوڵەتییەکان بۆ کۆتاییهێنان بە شەڕی غەززە، گیدۆن سەعار، وەزیری دەرەوەی ئیسرائیل، رایگەیاند فشارەکان لەسەریان کاریگەری نابێت و وڵاتەکەی "خۆی ناکوژێت" لەپێناو ئەو وڵاتانەی "کۆنترۆڵی شەقامەکانی خۆیان لەدەستداوە".
سەعار لە کۆنفرانسێکی رۆژنامەوانی تایبەتدا لە وەزارەتەکەی، رۆژی سێشەممە وتی: "لەم رۆژانەی دواییدا شایەتحاڵی هەڵمەتێکی شێواوی فشاری نێودەوڵەتین لە دژی ئیسرائیل، ئەم هەڵمەتە شەپۆلی دژە جوولەکەبوون بەهێزتر دەکات."
ئەم لێدوانە دوای ئەوە دێت کە هەفتەی رابردوو وەزیرانی دەرەوەی زیاتر لە 25 وڵات، لەگەڵ کۆمسیارێکی یەکێتی ئەوروپا، داوای کۆتاییهێنان بە شەڕی غەززەیان کرد و رەخنەیان لە مۆدێلی نوێی دابەشکردنی هاوکارییەکانی ئیسرائیل بۆ کەرتی غەززە گرت.
وەزیری دەرەوەی ئیسرائیل ئامانجی فشارەکانی بۆ دوو خاڵ گەڕاندەوە: یەکەم، رێگەدان بە حەماس بۆ سەپاندنی ئیرادەی خۆی بەسەر ئیسرائیلدا، کە بە وتەی ئەو "کارەساتێک دەبێت بۆ ئیسرائیلی و فەڵەستینییەکانیش". دووەمیش، "سەپاندنی دەوڵەتێکی تیرۆری فەڵەستینی بەسەر ئیسرائیلدا".
سەعار ئاماژەی بە لێدوانێکی وەزیری دەرەوەی فەڕەنسا کرد و وتی: "دوێنێ لە نیویۆرک وتی پێویستە ئەوروپا فشار بخاتە سەر ئیسرائیل بۆ قبوڵکردنی چارەسەری دوو دەوڵەت. دامەزراندنی دەوڵەتێکی فەڵەستینی ئەمڕۆ، واتا دامەزراندنی دەوڵەتێکی حەماس و دەوڵەتێکی جیهادی. ئەمە روونادات."
دوای چەند رۆژێک لە کاریگەریی شەپۆڵێکی گەرما لەسەر ناوچەکانی هەرێمی کوردستان، کەشناسی پێشبینی دابەزینی بەرچاوی پلەکانی گەرما دەکات و رایدەگەیەنێت کە شەپۆلەکە کۆتایی دێت.
بەپێی پێشبینییەکانی بەرێوەبەرایەتی کەشناسی هەرێم، ئەمڕۆ سێشەممە، هێشتا پلەکانی گەرما بە بەرزی دەمێننەوە، بەجۆرێک لە سەنتەری پارێزگاکان پلەی گەرما لە سەرووی 45پلەی سیلیزییەوە دەبێت. هاوکات لە ناوچە شاخاوییەکان نزیکەی 42 پلە و لە ئیدارەی گەرمیانیش نزیکەی 49 پلەی سیلیزی تۆمار دەکرێت.
بەڵام لە سبەینێوە، چوارشەممە، کاریگەریی شەپۆلە گەرمەکە لەسەر ناوچەکەمان کۆتایی دێت و پلەکانی گەرما دەگەڕێنەوە بۆ ئاستی ئاسایی خۆیان.
پێشبینی دەکرێت پلەکانی گەرما (3 بۆ 6) پلەی سیلیزی داببەزن و تا چوارشەممەی داهاتوو هیچ شەپۆلێکی دیکەی گەرما روو لە ناوچەکە ناکاتەوە.
د.لەتیف رەشید سەرۆک کۆماری عیراق، ئەمڕۆ سێشەممە 29ی تەمموزی2025 لە کۆشکی بەغداد، پێشوازیکرد لە عەتوان حەسەن سامر ئەلعەتوانی، پارێزگاری بەغداد و هادی مجید گزار پارێزگاری واست .
لە دیدارێکدا مەرسومی کۆماری تایبەت بە دامەزراندنی پارێزگارانی بەغداد و واست رادەستی پارێزگارە نوێیەکان کرا و رەوشی ئەمنی و ئابووری و خزمەتگوزاری لە هەردوو پارێزگاکە تاوتوێ کرا.
سەرۆک کۆمار جەختی لەسەر پێویستی تۆکمەکردنەوەی هەوڵەکان کردەوە بۆ باشترکردنی خزمەتگوزارییەکان بۆ هاووڵاتیان و نۆژەنکردنەوەی ژێرخانی ئابووری و چەسپاندنی ئاسایش و سەقامگیری.
هەروەها سەرەخۆشی خۆی بۆ قوربانیانی کارەساتی ئاگرکەوتنەوەکەی بازاڕی هایپەرمارکێتەکەی واست دووپات کردەوە و هیوای سەرکەوتنی بۆ هەردوو پارێزگار خواست لە خزمەتکردنی عیراق و گەلەکەیدا.
لەلایەن خۆیانەوە، هەردوو پارێزگار پلانەکانی داهاتوویان و ئەو بەرنامانەی کە بۆ پێشخستنی کەرتی خزمەتگوزاری و تەواوکردنی پڕۆژەکان و بەردەوامیدان بە پڕۆسەی گەشەپێدان و ئاوەدانکردنەوە لە بەغداد و واست ئامادەیان کردووە پێشکەش بە سەرۆک کۆمار کرد.
هەروەها سوپاسی خۆیان بۆ گرنگیپێدانی سەرۆک کۆمار و پەرۆشی بۆ دابینکردنی پێداویستییەکانی ژیانێکی شایستە بۆ هەموو عیراقییەکان لە سەرتاسەری وڵاتدا دەربڕی.
دیدارەکە بە ئامادەبوونی عەمار ئەلحەمدانی، سەرۆکی ئەنجومەنی پارێزگای بەغدا، بەڕێوەچوو.
بەرپرسانی ئۆکراین رایانگەیاند، لە هێرشە درۆنی و مووشەکییەکانی شەوی رابردووی روسیادا، بەلایەنی کەمەوە 20 کەس کوژراون و زیاتر لە 40 کەسی دیکەش برینداربوون.
ئەندریە یەرماک، بەرپرسی نوسینگەی سەرۆکی ئۆکراین رایگەیاند، لە ئەنجامی زنجیرەیەک بۆردومانی سوپای روسیا بۆ سەر زیندانێک لە هەرێمی زاپۆریژیا، 16 کەس کوژراون و 35ی دیکەش برینداربوون. ناوبراو ئەم هێرشەی بە "تاوانێکی نوێی جەنگ لەلایەن روسەکانەوە" وەسف کرد.
هاوکات، سێرگی لیساک، سەرۆکی ئیدارەی ناوچەیی دنیپرۆپترۆڤسک لە پەیامێکدا لە تێلیگرام رایگەیاند، سێ هێرشی دیکە کراوەتە سەر ناوچەکەیان و بەهۆیەوە لانیکەم چوار کەس گیانیان لەدەستداوە و هەشتی دیکەش برینداربوون. به وتەی ئەو، هێرشەکان به درۆنی تەقینەوه و بۆمبی
لەلایەکی دیکەوە و لە بەرامبەردا، ئۆکراینیاش هێرشی درۆنی کردە سەر خاکی روسیا. یوری سلیوسار، پارێزگاری ناوچەی رۆستۆڤ لە باشوری روسیا رایگەیاند، بەهۆی هێرشێکی درۆنی ئۆکراینەوە، هاووڵاتییەک لە شاری سالسک کوژراوە کاتێک لەناو ئۆتۆمبێلەکەیدا بووە.
هەروەها هێڵی ئاسنینی روسیا بڵاویکردەوە، پاشماوەی یەکێک لە درۆنەکان کەوتۆتە خوارەوە و زیانی بە شەمەندەفەرێکی نەفەرهەڵگر و شەمەندەفەرێکی بارهەڵگر گەیاندووە، بەڵام هیچ زیانێکی گیانی لێنەکەوتۆتەوە.
لە پاش ئەوەی بەشیک لە میدیا عەرەبی و کوردییەکان بڵاویانکردەوە کە نوری مالکی سەرۆکی هاوپەیمانیی دەوڵەتی یاسا جەڵتە لێی داوە و باری تەندروستی ناجێگیرە؛ نوسینگەی راگەیاندنی نوری مالکی، سەرۆکی هاوپەیمانیی دەوڵەتی یاسا، ئەو دەنگۆیانەی رەتکردەوە و رایگەیاند: "کە ناوبراو چەند پشکنینێکی پزیشکیی لە نەخۆشخانەی "ئیبن بیتار" لە بەغدا ئەنجامداوە و پشکنینەکانیش ئاسایی و وەرزانەبوون".
لە راگەیەندراوێکی کورتدا، نووسینگەی مالکی ئاماژەی بەوەکردووە، پشکنینەکان لە چوارچێوەی "بەدواداچوونی مانگانە و ئاسایی"دا بوون بۆ دڵنیابوونەوە لە باری تەندروستیی ناوبراو.
لە کۆتایی راگەیەندراوەکەدا، سوپاسی هەموو ئەو کەس و لایەنانە کراوە کە پەرۆشیی خۆیان بۆ تەندروستیی مالکی دەربڕیوە و هیوای تەندروستییەکی باش بۆ هەمووان خوازراوە.
مەزڵوم کۆبانێ، فەرماندەی گشتیی هێزەکانی سوریای دیموکرات (هەسەدە)، لە چاوپێکەوتنێکدا لەگەڵ کەناڵی "عەرەبیە حەدەس"، دوایین پێشهاتەکانی پەیوەست بە گفتوگۆکانیان لەگەڵ حکومەتی سوریا و دۆخی باکوری رۆژهەڵاتی سوریای خستەڕوو و جەختی لەسەر یەکپارچەیی خاکی سوریا کردەوە.
گرنگترین وتەکانی مەزڵوم کۆبانێ:
- کەناڵەکانی پەیوەندیمان لەگەڵ حکومەتی سوریا رۆژانە چالاکن و منیش بەشداری لە کۆبوونەوەی پاریسدا دەکەم.
- لەنێوان ئێمە و حکومەتی سوریادا کۆدەنگی هەیە لەسەر یەکپارچەیی خاکی سوریا لەژێر یەک ئاڵا و یەک سوپای یەکگرتوودا.
- کۆبوونەوەکەم لەگەڵ ئەحمەد شەرع بەرهەمدار بوو، دوای سێ کاتژمێر لە گفتوگۆ گەیشتینە لێکتێگەیشتن.
- هەموومان لەسەر پاراستنی یەکپارچەیی وڵات کۆکین، لامەرکەزییەت بە واتای جیابوونەوە نایەت.
- ئێمە پابەندین بە ڕێککەوتنی 10ی ئازارەوە، هەرچەندە جێبەجێکردنی پێویستی بە کاتی پێویست هەیە.
- : تێکەڵکردنی 100 هەزار چەکدار بە وەزارەتی بەرگریی سوریاوە هەنگاوێکی گەورەیە.
- دیمەشق ئامادەیی خۆی نیشانداوە بۆ قبوڵکردنی داواکاریی بەفەرمیکردنی زمانی کوردی و مافە کلتوورییەکان.
- بە پێویستی دەزانین دێرەزوور وەک یەک پارێزگای یەکگرتوو هەردوو کەنارەکەی لەخۆبگرێت.
- پێشوازی لە هەر رۆڵێکی ئەرێنی سعودیە دەکەین لە نێوەندگیریدا لەگەڵ دیمەشق.
حکومەتی هۆڵەندا رۆژی دووشەممە، ئیتامار بێن گڤیر و بیزالیل سمۆتریچ، وەزیرانی ئاسایشی نیشتمانی و دارایی ئیسرائیلی، وەک "کەسایەتیی نەخوازراو" لە شانشینەکەیدا ناساند و هۆکارەکەشی بۆ "توندوتیژیی نیشتەجێبووە جووەکان" گەڕاندەوە.
دیک شوف، سەرۆک وەزیرانی هۆڵەندا، هەڕەشەی گرتنەبەری رێکاری زیاتری لە دژی ئیسرائیل کرد و لە پۆستێکدا لە تۆڕی کۆمەڵایەتی ئێکس نووسیویەتی: "پێویستە خەڵکی غەززە دەستبەجێ و بەبێ هیچ بەربەستێک، رێگەی سەلامەتیان بۆ گەیشتنی هاوکارییە مرۆییەکان بۆ بکرێتەوە."
شوف وتیشی، "ئەگەر سبەی یەکێتی ئەوروپا بگاتە ئەو بڕوایەی کە ئیسرائیل پابەندی رێککەوتنە پەیوەندیدارەکان نییە، ئەوا هۆڵەندا پشتیوانی لە پلانی هەڵپەساردنی بەشداریی ئیسرائیل دەکات لە بەرنامەی توێژینەوەی 'هۆریزۆن'ی یەکێتی ئەوروپا. هەروەها فشار دەکەین بۆ گرتنەبەری رێکاری زیاتری ئەوروپی، بۆ نموونە لە بواری بازرگانیدا."
لای خۆیەوە، کاسپەر ڤێڵدکامپ، وەزیری دەرەوەی هۆڵەندا بە میدیای وڵاتەکەی راگەیاند، هۆڵەندا بڕیاریداوە بێن گڤیر و سمۆتریچ "وەک بیانیی نەخوازراو لە سیستمی تۆمارکردنی شنگن" تۆمار بکات، چونکە "بە شێوەیەکی بەردەوام هانی توندوتیژییان داوە لەلایەن نیشتەجێبووانەوە دژی دانیشتووانی فەڵەستین، و داوای پاکتاوی رەگەزییان لە کەرتی غەززە کردووە."
Today I had an additional meeting with the deputy prime ministers, the Minister of Foreign Affairs and the Minister of Defence about the catastrophic situation in Gaza.
— Dick Schoof (@MinPres) July 28, 2025
The government’s goal is crystal clear: the people of Gaza must be given immediate, unfettered, safe access to…
هەروەها حکومەتی هۆڵەندا رایگەیاند، باڵیۆزی ئیسرائیل لە وڵاتەکەی بانگهێشت دەکات بۆ گەیاندنی ناڕەزایەتیی کابینەی هۆڵەندی لە "دۆخی ئێستا"، کە بە "نائاسایی و نابەرگریکراو" وەسفی کرد. هاوکات جەختیشی کردەوە کە بەردەوام دەبن لە فشارخستنە سەر حەماس بۆ گەیشتن بە ئاگربەست.
بەپێی رێکارێکی نوێی بەڕێوەبەرایەتی گشتیی هاتوچۆ، سزای دارایی بۆ ئەو کەس و کۆمپانیایانە دیاریکرا کە پابەندی وادەی یاسایی نابن بۆ تۆمارکردنی ئۆتۆمبێلەکانیان.
لەمبارەیەوە، موقەدەم ڕێژەن بورهان، لێپرسراوی تۆماری هاتوچۆی سلێمانی، لە لێدوانێکی تایبەتدا بۆ کوردسات نیوز رایگەیاند، "بەپێی بڕیارێکی نوێی وەزارەتی ناوخۆ، لەدوای ئەنجامدانی گرێبەستی کڕین و فرۆشتنی ئۆتۆمبێل، خاوەنی نوێ تەنها 60 رۆژی لەبەردەستدایە بۆ ئەوەی ئۆتۆمبێلەکەی بەناوبکات و تۆماری بکات."
وتیشی، "هەر هاوڵاتییەک دوای تێپەڕبوونی ئەو 60رۆژە مامەڵەی تۆمارکردن پێشکەش بکات، ئەوا رووبەڕووی سزای دارایی دەبێتەوە کە بڕەکەی هەشت هەزار دینارە."
لێپرسراوی تۆماری هاتوچۆی سلێمانی ئاماژەی بەوەشکرد، سزاکە بۆ کۆمپانیاکانی فرۆشتنی ئۆتۆمبێلیش جێبەجێ دەکرێت و ئەگەر پابەند نەبن، بە بڕی 24 هەزار دینار سزای دارایی دەدرێن.