قوباد تاڵەبانی لە ئامادەیی رەوشەن بەدرخان لە سلێمانی دەنگیدا و لە پەیامێکیشیدا بۆ خەڵکی هەرێم و عیراق رایگەیاند دەنگ بدەن بەو حزبەی دەتوانێت لە بەغداد کێشەکان چارەسەر بکات، نەک ئەوانەی تێکیانداوە.

ئەمڕۆ سێشەممە، لە سەعات حەوتەوە بنکەکانی دەنگدان بەرویی هاووڵاتییاندا کرایەوە و قوباد تاڵەبانیش لە سلیمانی بەشداری پرۆسەکەی کرد.

لە دوای دەنگدانیش، قوباد تاڵەبانی قسەی بۆ رۆژنامەنسان کرد و رایگەیاند؛ داوا لە خەڵک دەکەم بچن دەنگ بدەن و دەنگدان مافی هەموانە.

ئاماژەی بەوەشکرد یەکێتی حزبێکی کاریگەرە و لە بەغداد گوێی لێدەگیرێت، داواشیکرد خەڵک دەنگ بدەن بەو لایەنەی دەتوانێت لە بەغداد کێشەکان چارەسەر بکات، نەک ئەو لایەنانەی تێکی دەدەن.

بافڵ جەلال تاڵەبانی، سەرۆكی یەكێتیی نیشتمانیی كوردستان، لە ئامادەیی رەوشەن بەدرخان لە سلێمانی دەنگیدا و لە پەیامێکیشیدا بۆ خەڵکی هەرێم و عیراق رایگەیاند بە ویژدانەوە دەنگ بدەن بەو لایەنەی دەتوانێت زیاتر لە 222 کێشەتان بۆ چارەسەر بکات.

ئەمڕۆ سێشەممە، لەگەڵ کردنەوەی بنکەکانی دەنگدان بەرووی دەنگدەراندا، سەرۆکی یەکێتی لە سلێمانی بەشداری پرۆسەکەی کرد و پەیامێکیشی ئاراستەی خەڵک کرد.

 لە دوای دەنگدان، بافڵ جەلال تاڵەبانی، سەرۆکی یەکێتیی نیشتیمانیی کوردستان پەیامێکی ئاراستەی خەڵک کرد و رایگەیاند بە ویژدانەوە دەنگ بدەن و دەنگیش بە لایەنێک بدەن کە دەتوانێت زیاتر لە 222 کێشە چارەسەر بکات.

ئەمڕۆ رۆژێکی جیاواز  و گرنگە  بۆ هاووڵاتیانی هەرێم و عیراقییەکان لە کاتژمێر حەوتی بەیانیەوە دەنگدانی گشتی لە هەرێمی کوردستان و عیراق بۆ هەڵبژاردنی  ئەنجومەنی نوێنەرانی عیراق دەستیپێکرد، لە دەنگدانی گشتیدا زیاتر لە 20 ملیۆن و 63 هەزار کەس مافی دەنگدانی هەیە  و پرۆسەکە کاتژمێر شەشی ئێوارە تەواو دەبێت و بە گوێرەی زانیاریەکانی کۆمیسیۆن، دوای 24 سەعات ئەنجامە بەراییەکان رادەگەیەندرێت.

لە پرۆسەکەدا بەکۆی گشتی دەنگدانی تایبەت و دەنگدانی گشتی زیاتر لە 21 ملیۆن و 400 هەزر کەس مافی دەنگدانیان هەیە؛ هەشت هەزار و 703 بنکە و 39 هەزار و 285 وێستگە لە تەواوی عیراق  و هەرێم ئامادەکراون بۆ پرۆسەکە.

لە هەرێمی کوردستان کە بە دەنگدانی تایبەت و گشتی رێژەی ٪14.3ـیی دەنگدانی عیراق پێکدەهێنت، کێبڕکێکە لەسەر 42 کورسی ئەنجومەنی نوێنەرانە و دەنگدەرانیش بەمشێوازە دابەشبون بەسەر هەرسێ بازنەکەدا؛

لە سلێمانی +( هەڵەبجە و گەرمیان و راپەرین) ملیۆنێک و 210 هەزار و 658 کەس مافی دەنگدانیان هەیە.

لە هەولێر ملیۆنێک و 87 هەزار و 880 کەس مافی دەنگدانی هەیە.

لە دهۆک 778 هەزار و 846 کەس مافی دەنگدانیان هەیە.

ئەمڕۆ هاووڵاتییان  دەچنە سەر سندوقەکانی دەنگدان و بۆ چوار ساڵ نوێنەری خۆیان  بۆ خولی شەشەمی لە ئەنجومەنی نوێنەرانی عیراق  هەڵدەبژێرن و بڕیارە پڕۆسەکە کاتژمێر شەشی ئێوارە کۆتایی بێت.

ئاسۆ مامەند داوا لە ئاوارەکانی کەرکوک دەکات بە جۆش و خرۆشەوە بگەرێنەوە بۆ خاکی باوک و باپیریان و دەنگ بە کوردستانی بونیی کەرکوک بدەن، چونکە ئەم پرۆسەیە بۆ میللەتەکەمان ئێجگار گرنگ و چارەنووسسازە، بە تایبەتیش بۆ کەرکوک و ناوچە جێناکۆکەکان.

ئاماژەی بەوەشکردوە بۆ گەڕانەوەی ئاوارەکان هەموو رێوشوێنێکی پێویستیان بۆ دەستەبەرکردوون تەنانەت بە تێچووی هاتن و رۆیشتن.

دەقی پەیامەکەی ئاسۆ مامەند

پەیامێک لە هەڤاڵ ئاسۆ مامەندەوە بۆ ئاوارە سەربەرزەکانی کەرکوک لە پارێزگاکانی هەرێمی کوردستان

-ئاوارە سەربەرزەکانی دانیشتووی ناوچەکانی هەرێمی کوردستان

 سبەینێ 11-11 پڕۆسەی هەڵبژاردنی  ئەنجومەنی نوێنەرانی عیڕاق لە کەرکوک و تەواوی عیڕاق بەڕێوەدەچێت.

 ئەم پڕۆسەیەش بۆ میللەتەکەمان ئێجگار گرینگ و چارەنووسسازە، بە تایبەتیش بۆ کەرکوک و ناوچە جێناکۆکەکان.

 بۆیە داواتان لێدەکەم بە جۆش و خرۆشێکی کوردانەوە بگەڕێنەوە خاکی باوک و باپیرتان و دەنگ بە کوردستانیی بوونی کەرکوک بدەن.

 بۆ ئەو مەبەستەیش هەموو رێوشوێنێکی پێویستمان بۆ دەستەبەرکردوون تەنانەت بە تێچووی هاتن و رۆیشتن.

سڵاو لە خۆڕاگریتان

سڵاو لە کەرکوک و ناوچە جێناکۆکەکان

براتان

ئاسۆ مامەند

سەرپەرشتیاری کەرکوک-سەڵاحەدینی یەکێتیی نیشتمانیی کوردستان

شاناز ئیبراهیم ئەحمەد پەیامێکی ئاراستەی فایزل میرانی کردوە و رایگەیادوە ئەگەر ئەتەوێت لاپەرەکانی خیانەت هەڵبدرێنەوە کێشە نیە باهەڵی بدەینەوە، بەڵام پێویستە پێشەکی بزانین لە فەرهەنگی ئێوەدا خیانەت و جاشایەتی و خۆفرۆشی بە واتای چی دێت؟ ئاماژەی بەوەشکردوە؛ ئەگەر چی ئێمە وا پەروەردە نەکراوین کە بێرێزی بەرانبەر بە مردوو بکەین بەس تو و زۆر زیاد رۆیشتیت و کارێکی واتکرد کە پڕیشکی هەڵتەکاندنی قەبرێک، قەبرەکانی خوشتان هەڵتەکێنێت ..!!

لە بەشێکی دیکەی پەیامەکەشیدا نوسیویەتی؛ خۆ کە ئێمە بێدەنگین مانای ئەوە نیە کە زمانمان قرتاوە و پەنجەکانمان هەڵوەریون.. ئێمە هەست بە بەرپرسیارێتی ئەکەین بەرامبەر بە ژیانی هاووڵاتیانمان و ڕاگرتنی ئاشتی و تەبایی و ئارامی و سەقامگیری هەرێمەکەمان.

دەقی پەیامەکەی شاناز ئیبراهیم ئەحمەد

پەیامێک بۆ فازل مەتنی

جارێ یەکەم ناماقوڵیت کرد و نەک هەر تەنیا شەکرت شکاند بەڵکو قەندی کەرەجیشت شکاند!!

ئەگەر ئەتەوێت لاپەرەکانی خیانەت هەڵبدرێنەوە کێشە نیە باهەڵی بدەینەوە، بەڵام پێویستە پێشەکی بزانین لە فەرهەنگی ئێوەدا خیانەت و جاشایەتی و خۆفرۆشی بە واتای چی دێت و لای ئێمەی کوردیش بەچی ؟

تۆ باسی شەستەکانت کرد بەڵام من پێم باشە بگەڕێنەوە بۆ چلەکان و بەتایبەتی بۆ سەردەمی کۆماری مەهاباد، ئەرێ ئەوە باوکی من بوو کە پشتی کردە پێشەوا و لەچاوتروکانێکا بە جۆگەلەی ئاراسا پەریەوە و بەجێیهێشت ؟؟ ئەرێ ئەوە باوکی ئێوە بوو کە باوکی منی لە رووسیاوە دووبارە گەڕاندەوە عیراق و کردیە ئەوەی کە بوو و پاشان خیانەتی لێکرد یا باوکی من بوو؟

ئەوە باوکی من بوو لە سەرەتای شەستەکانا تەیارەی باجرو سۆخۆی و دەبابەی حکومەتی عیراقی ناردە سەر لادێ و ژن و مناڵی ئێوە لە کانی حسێنی؟؟ ئەی ئەوە باوکم بوو کە ئاگری بەردایە ماڵە گڵییەکەتان و کتێب و یادگاریەکانی مناڵی رابووردووتانی سوتاند ؟ ئەرێ ئەوە باوکی من بوو یا باوکی ئێوە بوو کە بە شانازیەوە گووتی من قەیتانی پێلاوەکانی عەبدوالکریمم ؟ ئەرێ ئەوە باوکی من بوو یا باوکی ئێوە بوو کە پەیماننامەی ئازاری لە پشتەوە بە دەرهێنانی کەرکوک لە موعادەلەیەکا واژوو کرد بە بێ گوێدانە گرنگی و ماندووبوونی ئەوانەی کە کەرکوکیان بە گرنگترین خاڵی ئەو پەیماننامەیە دانابوو ؟ ئەری ئەوە ئێوە بوون یا باوکی من بوو کە ئاشبەتاڵی کرد و چەمایەوە و دەستی شای ئێرانی ماچ کرد ؟ باوکی من تەرمی سلێمانی موعینی و برادەرانی دایەوە ئیران ؟ ئەرێ ئەوە باوکی من نەبوو کە لە مەلا مستەفا پاڕایەوە و ووتی کاک عەلی عەسکەری ودکتۆر خالید و شێخ حسین ئازار مەدە با ناکۆکییەکان قووڵتر نەبنەوە ؟ باوکم تاوانی هەکاری ئەنجامدا ؟

ئەرێ ئەوە باوکی من بوو یا ئێوە بوون کە دەبابەی سەدامتان هێنایە ناو هەولێری پایتەختەوە و پەرلەمانی بەخوێن دەستکەوتووی گەلەکەمانتان داگیر کرد ؟؟ ئەرێ ئەوە باوکی من بوو یا ئێوە بوون کە زیاتر لە نەوەد ئەفسەری ئەندامی ئای ئێن سی و ئوپۆزسیۆنی عیراقی کە لە هەولێرەکەمانا پەنابەر بوون رادەستی سەدامی کردن و لە سێدارەی دان ؟ ئەرێ ئەوە ئێمە بووین یا ئێوەبوون کە لە بەرەبەیانا شەنگالتان رادەستی داعش کرد و رێگەتان دا لە بازارەکانی رەقەدا کڕین و فرۆشتن بە کێژۆڵە نازدارەکانمانەوە بکرێت؟ ئەرێ باوکی من نەوتی هەرێمی تاڵان فرۆش کرد ؟ ئەرێ ئەوە باوکی من بوو یا ئێوە بوون کە بە ریفراندۆمێکی بێ سەروبەر لەسەدا پەنجا و یەکی خاکی کوردستانتان بە کەرکوکیشەوە لەدەستدا ؟ ئەرێ ئەوە ئێوە نین کە شاری ئازیزی قەڵا و منارەتان کردوەتە شانۆیەک بۆ سەماکەرو کچە مۆدێل و ئاست نزمەکانی ئەملاو و ئەولا؟ پێ ئەچێت کە تێکەڵاویتان لەگەڵ دەرودراوسێکاندا کاریگەری لەسەر زمانتان دروست کردبێت !! چونکە بافڵ باسی سەردەمێکی کرد کە هەمووان شاهێدین و تێیدا ئەژین کەچی تۆ باسی هەڵتەکاندنی قەبری مردوو ئەکەیت .. !!

ئەگەر چی ئێمە وا پەروەردە نەکراوین کە بێرێزی بەرامبەر بە مردوو بکەین بەس توو زۆر زیاد رۆیشتیت و کارێکی واتکرد کە پڕیشکی هەڵتەکاندنی قەبرێک، قەبرەکانی خوشتان هەڵتەکێنێت ..!! گەر پێویستت بە بەڵگەش هەیە دەتوانم نامەکانی خوالێخۆشبووان پێشەوا قازی محمد و مەلا مستەفا و ئیدریس بارزانی و تۆمارە دەنگیەکانی نێوان باوکم و خودی کاک مسعودی کاتی شەڕی ناوخۆ و بەڵگە نامەکانی ئەحمەد چەلەبیت بۆ بڵاو بکەمەوە؟

خۆ کە ئێمە بێدەنگین مانای ئەوە نیە کە زمانمان قرتاوە و پەنجەکانمان هەڵوەریون.. ئێمە هەست بە بەرپرسیارێتی ئەکەین بەرامبەر بە ژیانی هاووڵاتیانمان و ڕاگرتنی ئاشتی و تەبایی و ئارامی و سەقامگیری هەرێمەکەمان.

بابەت زۆرن کە لێرەدا جێی نابێتەوە و ئەمەوێت بگەرێمەوە سەر بەیانەکەی کە لە یانزەی ئازاردا بڵاوتان کردەوە، ئەگەر ووردەکارییەکانی ناو پەیماننامەکەشم لەیاد کردبێت هەرگیز لافیتەکانم لەیاد نەکردوە کە بە خەتی خۆم نوسیم و بەدیوارەکانی بەغدایا بۆمان هەڵواسین گەر بیرت چووە بابیهێنمەوە بیرت کە چی لەسەر نوسرابوو ( يامن تعب يامن شكه يامن على الحاضر لگه )..

بەداخەوە ئێوە هەر وابوونە و هەموو شتێکتان بۆ لواوە بۆیە باکتان نە بە مردوو و نە بە زیندووش نیە…. وا ئەزانن بۆ بەدەست هێنانی کورسییەک ئەتوانن دەستی چەوری خۆتان بە سەرە بەرزەکان بسڕن.

شاناز ئیبراهیم ئەحمەد

١٠-١١-٢٠٢٥

 بەڕێوەبەرایەتیى گشتیى کار و دەستەبەرى کۆمەڵایەتى خاوەنکارەکان ئاگادار دەکاتەوە، سەبەینێ سێ سەعاتیك مۆڵەت بدەنە کرێکار و کارمەنەدەکانیان بۆ ئەوەی بتوانن دەنگبدەن، لە ئەگەری پێندانی مۆڵەتیشدا روبەڕی و سزا دەبنەوە.

بەڕێوەبەرایەتیى گشتیى کار و دەستەبەرى کۆمەڵایەتى، ئاگادارییەکی بۆ خاوەنکار و کرێکاران لەبارەى پڕۆسەى هەڵبژاردن  بڵاوکردوەتەوە  و تێیدا هاتووە؛ بەمەبەستی پەیڕەوکردنی مافەکانیان لە بەشداربوونیان لە پرۆسەی هەڵبژاردنی پەرلەمانی عیراق، پێویستە خاوەنکارەکان رێگە بە کرێکاران بدەن،  ئامادەبن لە بنکەکانی دەنگدان.

ئاماژەیان بەوەشکردوە؛ بۆ ئەوەى کرێکاران بێبەش نەبن لە مافى دەنگدان، پێویستە سبەینێ 11ی 11ی 2025 بەمەبەستى بەشداریکردن لە دەنگدانى گشتی، خاوەنکار بۆ ماوەى دوو تا سێ سەعات رێگە بە کرێکارەکانیان بدەن سەردانى بنکەکانى دەنگدان بکەن تاوەکو بتوانن بەشداربن لە مافەکەی خۆیان کە دەنگدانە.

بەڕێوەبەرایەتیى گشتیى کار و دەستەبەرى کۆمەڵایەتى، ئەوەشیان خستوەتە روو، لە ئەگەرى رێگریکردن لەبەردەم ئەم مافەى کرێکاران، لێپێچینەوە لەگەڵ خاوەنکار دەکرێت و لە کاتى سەرپێچیکردنیش کرێکاران دەتوانن پەیوەندی بکەن بە ژمارەکانى هێڵى هۆشیاری کرێکاران بەمشێوەیەى خوارەوە:

راستەوخۆ پەیوەندى بکە بە ژمارەکانى (5500) (07511225500) (07721225500)

یان دەتوانیت لە رێگەى (واتسەپ یان ڤایبەر) نامە بنێرى بۆ ژمارە (07511225500) یان (07721225500) بە شێوەى نووسین یان پەیامى دەنگى.

پیت هێگسێت، وەزیری جەنگی ئەمریکا رایگەیاند؛  لە دوو هێرشدا بۆسەر دوو بەلەم کە کاریان گواستنەوە مادەی هۆشبەر بووە لە زەریای هێمندا شەش کەس کوژراون، بەمەش ژمارەی ئەو کەسانەی کە ئەمریکا کردونیەتییە ئامانج و کوژراون وەک بازرناگی مادەی هۆشبەر گەشتە 76 کەس.

ئەمڕۆ دووشەممە، ، وەزیری جەنگی ئەمریکا رایگەیاند، درەنگانێکێ شەوی یەکشەممە، لە دوو هێرشدا شەش کەس کوژراون کە سوپای ئەمریکا بە بەلەمی گومانلێکراوی قاچاخچێتی مادەی هۆشبەر وەسفی کردبوو، بەمەش ژمارەی کوژراوانی هەڵمەتی مشتومڕاوی واشنتۆن دژە بازرگانانی مادە هۆشبەرەکان گەیشتە 76 کەس.

هێگسێت لە پۆستێکدا لەسەر پلاتفۆرمی ئێکس پشتڕاستیکردەوە کە هێرشەکان لە ئاوە نێودەوڵەتییەکان لە رۆژهەڵاتی زەریای هێمن ئەنجامدراون و دوو بەلەمیان کردوەتە ئامانج کە "مادەی هۆشبەریان هەڵگرتبوو"، ئاماژەیبەوەشکردوە هەریەکەیان سێ کەسیان تێدابوو، تەواوی سەرنشینەکانی کوژراون.

وەزیرەکەی ئەمریکا نوسیویشیەتی؛ لە سەردەمی سەرۆک ترەمپدا ئێمە نیشتمان دەپارێزین و ئەم بازرگانانەی مادەی هۆشبەر دەکوژین کە دەیانەوێت زیان بە وڵات و گەلەکەمان بگەیەنن.

د.لەتیف رەشید، سەرۆک کۆمار لەکۆشکی بەغداد، پێشوازیکرد لە ژمارەیەک  لە چاودێرانی نێودەوڵەتی  تایبەت بەچاودێریکردنی هەڵبژاردنەکانی پەرلەمان، بەسەرۆکایەتی خاتوو  تامالا لۆنگبێرگەر و شاندی یاوەری، کە ژمارەیەک کەسایەتی دیار و پسپۆرانی نوێنەرایەتی هەڵبژاردنەکانی یەکێتی ئەوروپا و بەرپرسانی پەیوەندیدار بەکاروباری ئەفریقا و رۆژهەڵاتی ناوەڕاست کرد و لە میانی دیدارەکەدا جەختیان لە بەڕیوەجونی هەڵبژاردنێکی بێگەرد و شەفاف کرد، بە جۆرێک لە ئاستی چاوەڕوانی هەموو لایەکدا بێت

لە میانی دیدارەکەدا، کە  شارەزایانی سیاسی و یاسایی و هەڵبژاردن و نوێنەرانی نێودەوڵەتی و رێکخراوەکانی تایبەتمەند بەپشتگیریکردنی پرۆسەکانی هەڵبژاردن وگەشەپێدانی دیموکراسی لەخۆگرتبوو، باسیان لەرێگاکانی هاریکاری و هەماهەنگی نێوان ئۆرگان و دامەزراوە عیراقییەکان و هاوتا نێودەوڵەتییەکانیان کرد کە پەیوەندییان بە چاودێریکردنی هەڵبژاردنەوە هەیە، لەگەڵ چۆنیەتی پاڵپشتیکردنی پراکتیزەکردنی دیموکراسیەت و بەرەوپێشبردنی کلتووری بەشداریکردن و دەستەبەرکردنی بەرزترین ستانداردەکانی بێگەردی و شەفافیەت لە پرۆسەی هەڵبژاردنی داهاتوودا. 

سەرۆک کۆمار پابەندبوونی عیراقی بەدابینکردنی هەموو پێداویستییە پێویستەکان بۆ گەرەنتیکردنی بێگەردی و شەفافیەتی پرۆسەی هەڵبژاردن دووپاتکردەوە، بۆ ئەوەی چاودێرانی نێودەوڵەتی بتوانن بەئازادی و سەربەخۆ ئەرکەکانیان ئەنجام بدەن، هاوکات ڕۆڵی هاوبەشە نێودەوڵەتییەکانی لەپاڵپشتیکردنی پرۆسەی دیموکراسی وبەهێزکردنی متمانە بە هەڵبژاردنەکانی بەرز نرخاند و بەپەرەپێدانی متمانەی نیشتمانیی ناوبرد، کەڕەنگدانەوەی ئیرادەی گەلە.

سەرۆک کۆمار روونیکردەوە، ئەو سەقامگیرییە سیاسی و ئەمنییەی عیراق ئەمڕۆ پێوەی بەهرەمەندە، بەرهەمی هەوڵە نیشتمانییە هاوئاهەنگەکان و ئیرادەی جەماوەرییە، هەروەها نوێنەرایەتی و دەستپێکی بنەڕەتییە بۆ پرۆسەی ئاوەدانکردنەوە و گەشەپێدانی هەمەلایەنە، ئاماژەی بەوەشکرد، ئەم سەقامگیرییە کاریگەری ئەرێنی لەسەر بارودۆخی ئابووری و کۆمەڵایەتی هەبووە، یارمەتیدەر بووە لەدروستکردنی کەشێکی لەبار بۆ پێشخستنی کەرتی بەرهەمهێنان و خزمەتگوزاری، وەبەرهێنەرانی بیانی بۆ خۆی ڕاکێشاوە، هاوکات بەشداری کردووە لەچەسپاندنی پێگەی ناوچەیی و نێودەوڵەتیی عیراق و ڕۆڵی کارای عیراق لە پاڵپشتیکردنی ئاسایش و ئاشتی لە ناوچەکەدا هەبووە، هەروەها ئاسۆی فراوانی بۆ هاوکاری لەگەڵ وڵاتانی دۆست و رێکخراوە نێودەوڵەتییەکان لەبوارەکانی گەشەپێدان و چاکسازی دامەزراوەیی کردۆتەوە.

لەلای خۆیانەوە ئەندامانی شاندەکە، سوپاس و پێزانینی خۆیان بۆ سەرۆک کۆمار دەربڕی بۆ ئەو پێشوازییە گەرمە و پەرۆشیان بۆ بەهێزکردنی هاوکاری لەگەڵ دامەزراوەکانیان وهاوکات پابەندبوونی خۆیان دووپاتکردەوە بۆ کارکردن بەپێی ستانداردە نێودەوڵەتییەکان بۆ چاودێریکردنی هەڵبژاردن، بە شێوەیەک کە هاوکاربێت لە سەرکەوتنی ئەم بۆنە گرنگە نیشتمانییە.

لە میانی وتارێکیدا بەبۆنەی بەرێوەچونی هەڵبژاردنی پەرلەمانی عیراق، د. لەتیف رەشید رایگەیاند؛ بەشداری کاریگەر و بەرفراوان لەهەڵبژاردنەکاندا تاکە رێگەیە بۆ راستکردنەوەی هەڵەکان و چارەسەرکردنی لایەنە نێگەتیڤەکان و پەرەپێدانی سیستمی سیاسی.

سەرۆک کۆمار ئاماژەی بەوەکرد؛ ئەمڕۆ لەبەردەم قۆناغێکی نوێ و گرنگ وەستاون، لەسەر رێگای بەرقەرارکردنی ئاشتی و سەقامگیری و پێشکەوتن، گەلی عیراق سەلماندویەتی کە شایستەی درێژەدانن بە دەستکەوتە شارستانییەکان و مۆدێلی دێموکراسیان لە پێکەوەژیان لە نێوان پێکهاتە جیاوازەکاندا پێشکەش کردووە.

 لەبارەی هەڵبژاردنیشەوە سەرۆک کۆمار جەختیکردەوە کە هەڵبژاردن ماف و ئەرکێکی نیشتمانییە و ئەوان لە سەرۆکایەتی کۆمار کاریان کردووە بۆ پشتیوانیکردنی هەموو لایەنەکانی بەشدار لە جێبەجێکردنی مافەکانی هەڵبژاردن.

هەروەها داواشیکرد لە هەموو دەنگدەران کە واقیعبینانە و راستگۆیانە بیر لە کاندیدەکان بکەنەوە بۆ ئەندامێتی پەرلەمانی عیراق.

لە کۆتایی وتارەکەشیدا، سەرۆک کۆمار دوپاتیکردەوە کار دەکەن بۆ پشتیوانیکردن له پەرلەمانی عیراقی دهاتوو بۆ دەرکردنی یاسای گرنگ که مادەکانی دەستوور چالاک بکات بۆ تەواوکردنی بنیاتنانی دەستووری دەوڵەت.

ئەمەش لە کاتێکدایە بریارە سبەینێ کاتژمێر حەوت دەنگدانی گشتی بۆ خولی شەشەمی پەرلەمانی عێراق لە هەرێم وعیراق بەرێوەبچێت و زیاتر لە 20 ملیۆن و 63 هەزار کەس مافی دەنگدانیان هەیە.

ئەمەی خوارەوە دەقی وتارەکەی سەرۆک کۆمارە

"بەناوی خوای گەورە و میهرەبان

گەلی عیراقی خۆشەویست

 خوشک و برایانی هاووڵاتیانم

سڵاوتان لێبێت و ڕەحمەت و بەرەکەتی خواتان لەسەر بێت.

ئەمڕۆ لەسەر دەروازەی قۆناغێکی نوێ و گرنگین لە ڕێگامان بۆ دامەزراندنی ئاشتی و سەقامگیری و گەشەپێدان لە وڵاتەکەماندا، لە ڕێگەی ئەنجامدانی هەڵبژاردنی پەرلەمانییەوە ، بۆ ئەوەی پابەندبوونی خۆمان بە ژیانی سیاسی دەستووری و دیموکراسی و گواستنەوەی ئاشتییانەی دەسەڵات دووپات بکەینەوە.

گەلەکەمان سەلماندوویەتی کە شایستەی بەردەوامیدانە لە دەستکەوتە شارستانییەکانی و نموونەیەکی دیموکراسی پێشکەش کردووە لە پێکەوەژیانی نێوان پێکهاتە و ئاراستە جیاوازەکانی لەگەڵ پاراستنی مافی جیاوازی و ناڕەزایەتی و ئازادی ڕا دەربڕین.

بەشدارییەکی کارا و بەرفراوان لە هەڵبژاردنەکاندا تاکە ڕێگامانە بۆ ڕاستکردنەوەی هەڵەکان و چارەسەرکردنی لایەنە نەرێنییەکان و پەرەپێدانی سیستەمی سیاسیمان و ڕێگریکردن لە دیکتاتۆرییەت و تاکڕەوی لە دەسەڵاتدا و دەنگدانی بەرفراوانی گەل و ڕێزگرتن لە ئەنجامەکانی هەڵبژاردن و ڕێڕەوی دەستووریی پرۆسەی دیموکراسی گەورەترین بەڵگەیە لەسەر خواستی گەلەکەمان بۆ پێکەوەژیان و ئاشتی و ئازادی.

 گەلی خۆشەویستمان

دەبێت هەمیشە ئەو قوربانییە گەورانەمان بیر بێت کە پێشکەشمان کردوون بۆ دامەزراندن و پاراستنی سیستەمی دیموکراسی بەتایبەتی شەهیدان و بریندارانی هێزە ئەمنی و سەربازییەکان بە جۆرەها دەزگا و دامەزراوەکانیانەوە هەروەها قوربانییانی مەدەنی لە کردەوە تیرۆریستییەکاندا تاوەکو توانیمان بەسەر تیرۆردا سەربکەوین و شکۆی بشکێنین و لە توندڕەوی و بانگەشەکارانی ڕزگارمان بێت کە بوونەتە نامۆ و دابڕاو.

هەڵبژاردن ماف و ئەرکێکی نیشتمانییەو ئێمە لە سەرۆکایەتی کۆمار کارمان کردووە لەسەر پشتگیریکردنی هەموو لایەنە بەشداربووەکان لە جێبەجێکردنی شایستەیی هەڵبژاردن و سوور بووین لەسەر هەوڵدان بۆ دڵنیابوون لە کەشوهەوایەکی پێشبڕکێکارانەی بێگەرد و دادپەروەر.

داوا لە هەموو دەنگدەران دەکەین کە بە واقیعی و ڕاستگۆیی و ئەمانەتەوە سەیری پرۆسەکە بکەن لە کاتێکدا کاندیدەکانی ئەندامێتی پەرلەمان هەڵدەبژێرن کە چاودێری پاراستنی ماف و بەرژەوەندییەکانی دەبن.

کار دەکەین بۆ پشتگیریکردنی پەرلەمانی داهاتوو بۆ دەرکردنی یاسا گرنگەکان ،بەتایبەتی ئەو یاسایانەی کە ماددە دەستوورییەکان کارا دەکەن بۆ تەواوکردنی بنیادنانی دامەزراوەیی دەوڵەت و پێکهێنانی حکومەتێکی فیدراڵی نوێی بەهێز و کارا بۆ وەڵامدانەوەی ئاواتەکانی هاووڵاتیان لە ئاسایش و دادپەری کۆمەڵایەتی و پەرەپێدانی ئابووری و دابینکردنی هەلی کار و خزمەتگوزارییەکان و پاراستنی یەکێتی و سەربەخۆیی و سەروەری عێراق و بنیادنانی پەیوەندییەکی جێگیر و دەستووری لەسەر بنەمای هاوکاری لەگەڵ حکومەتی هەرێمی کوردستان و بەرزکردنەوەی ئاستی دامەزراوە و دەزگا ئەمنی و سەربازییەکان و پەرەپێدانی پەیوەندی دۆستایەتی و هاوکاری لەگەڵ وڵاتانی جیهان.

هیوای سەرکەوتن بۆ هەمووان دەخوازین بۆ هەڵبژاردنی ئەنجومەنێکی نوێنەرایەتی کارا و پێکهێنانی حکومەتێکی سەرکەوتوو و سوپاسی کۆمسیۆنی باڵای سەربەخۆی هەڵبژاردنەکان دەکەین بۆ هەوڵەکانیان لە ئامادەکردنی پێداویستییەکانی هەڵبژاردن.

 هەروەها ستایشی هەوڵەکانی هێزە ئەمنییەکانمان دەکەین، بە هەموو پێکهاتەکانیانەوە، و هەموو لایەنە پشتیوانەکان لە سەرکەوتنی ئەم شایستە نیشتمانییەدا.

خودا عێراق و گەلەکەی بپارێزێت

قوباد تاڵەبانی، جێگری سەرۆک وەزیران پێشوازیکرد لە محەمەد ئەلحەسان، نوێنه‌رى تايبه‌تى سكرتێرى گشتیی نەتەوەیەكگرتووەكان له‌ عیراق و لە کۆبوونەوەی نێوانیاندا بەڕێوەچوونی هەڵبژاردنەکانی عیراق و چەند پرسێکی دیکەی جێی بایەخی هەردوولا تاوتوێ کران.

لە کۆبوونەوەکەدا کە رۆژی دووشەمە (10/11/2025) لە هەولێر بەڕێوەچوو، هەردوولا هیوایان خواست رۆژی سێ شەمە هەڵبژاردنەکانی ئەنجومەنی نوێنەرانی عیراق لە دۆخێکی ئارام و بە شێوەیەکی رێکوپێک بەڕێوەبچێت و هاووڵاتیانی عیراق و هەرێمی کوردستان بە رێژەیەکی بەرچاو بەشداری بکەن و چارەنووسی چوار ساڵی داهاتووی پرۆسەی سیاسی عیراق دیاری بکەن.

قوباد تاڵەبانی ئاماژەی بە گرنگیی ئەم هەڵبژاردنە کرد بۆ پەیوەندییەکانی چوار ساڵی داهاتووی عێراق و هەرێمی کوردستان و رایگەیاند، هاووڵاتیانی هەرێمی کوردستان دەیانەوێت کێشەکانی نێوان هەرێم و بەغداد لەسەر بنەمای دەستور بە شێوەیەکی بنەڕەتی چارەسەر بکرێت، لەم چوارچێوەیەدا بەپێویستی زانی ئەولەوییەتی هەردوو حکومەتی داهاتووی عیراق و هەرێم چارەسەرکردنی کێشەکان و بە تایبەتیش کێشەی بودجە و موچە بێت.

دەنگدان کە پرۆسەیەکی سیاسی و دیموکراسییە، کاریگەری هەمەلایەنی لەسەر تاکەکان هەیە، پسپۆڕانی دەرونى وسیاسیی گەیشتونەتە ئەو ئەنجامەى کە بەشداریکردن لە دەنگدان لەڕوی تەندروستییەوە سود بە کەسەکە دەگەیەنێت و هەڵبژاردنی کاندیدی دڵخوازیشی  رەنگە هۆکار بێت بۆ تەندروستییەکی باشتر.

رێکخراوەکانی وەک کۆمەڵەی پزیشکی ئەمریکی، کۆمەڵەی دڵی ئەمریکی و کۆلێژی پزیشکانی ئەمریکی پشتگیریان لەو بیرۆکەیە کردووە کە دەنگدان رۆڵی هەیە لە تەندروستیدا، ئەمەش وایکردووە دەستڕاگەیشتن بە دەنگدان شتێک بێت کە پێویستە پیشەییەکانی چاودێری تەندروستی باسی بکەن.

 توێژەران ئاماژە بەوەدەکەن، بونی مافی دەنگدان و بەشداریکردن لە پرۆسەکەدا، هۆکارێکە بۆ بەرەوپێشبردنی تەندروستی دەرونی و باشتربونی تەندروستی جەستەیی، ئەوەشیان خستوەتەڕوو،  ئەو کاریگەرییە رێژەییە  و لە کەسێکەوە بۆ کەسێکی تر دەگۆرێت.

دکتۆر لین ساندەرز، مامۆستای یاریدەدەری لە بواری سیاسەت لە زانکۆی ڤێرجینیا کە بەشدارە لە ئەنجامدانی توێژینەوەک لەسەر کاریگەرییەکانی دەنگدان لەسەر تەندروستی رایگەیاندوە " ئەوەی تۆ دەتەوێت و هەوڵی بۆ دەدەیت بە رێگەی توندوتیژی، دەتوانیت لە رێگەی دەنگدانەوە  بەدەستی بهێنیت"

 ساندەرز دەشڵێت: کاتێک باوەڕت وایە شتێک دەکەیت کە دەتوانێت ژیانت باشتر بکات، ئەوە سودە دەرونییەکان زیاد دەبن و ئەمەش هۆکارە بۆ باشترکردنی تەندروستی جەستەیی و  بەشداریکردنیش لە دەنگدان پەیوەستە بە تەندروستی دەرونییەوە.

 مارک زیمەرمانیش کە یەکێکە لە دەرونناسە بەناوبانگەکان، لەوبارەیەوە دەڵێت؛ بەشێک لە وێنەی گشتی تەندروستی باش ئەوەیە فێرببیت چۆن دەتوانیت خۆت بەهێز بکەیت بۆ ئەوەی بتوانیت کۆنترۆڵی ئەو شتانەی ژیانت بکەیت کە لەژێر کۆنترۆڵی تۆدان بۆ ئەمەش دەنگدان بە نمونە دێنێتەوە.

توێژەران باسیان لەوەشکردوە، کە دەنگدان و تەندروستی جەستەیی پەیوەندییەکی راستەوخۆیان نییە، واتە بەشداریکردن لە دەنگدان نابێت هۆی دابەزاندی چەوری یاخود جارەسەرکردنی شێرپەنجە، بەڵام لە روی دەرونییەوە کاریگەری لەسەر دەرونی کەسەکان دەبێت.

زۆرن ئەو توێژینەوانەشی ئاماژە بەوەدەکەن، کە باشبونی دەرونی هۆکارە بۆ باشبونی تەندروسی جەستەیی مرۆڤەکان، واتە کاتێک لە رویی دەرونییەوە باشتر دەبێت راستەوخۆ لە روی جەستەیشەوە بەرەو باشبون دەچێت و چوون بۆ دەنگدانیش دەرونی کەسەکان باشتر دەکات، بەتایبەت کاتێک کەسەکە دەیەوێت لە رێگەی دەنگەکەیەوە کاندیدی دڵخوازی خۆی هەڵبژێرێت بە هیوای باشترکردنی ژیانی خۆی و کۆمەڵگەکەی.

لە بەرانبەر قەرزەکانی چاڤی، ژمارەیەک موڵک کە بەناوی ئەو کۆمپانیایەوە تۆمارکراوە لە زیادکردنی ئاشکرادا دەفرۆشرێت.

بەڕێوەبەرایەتی گشتی کارەبایی سلێمانی لە رایەگەیەنراوێکدا بڵاویکردەوە، بەڕێوەبەرایەتی جێبەجێکردنی دووەمی سلێمانی لەسەر داوای بریکاری داواکار 'وەزیری کارەبای حکومەتی هەرێمی کوردستان/ سەرەڕای کارەکەی' لە رێگەی زیادکردنی ئاشکراوە هەڵدەستێت بە فرۆشتنی سەرجەم ئەو موڵکانەی, کە هاوپێچی ئەم ئاگاداریيەن کە ژمارەیان 13 موڵکە.

ئاماژەی بەوەشکردووە، سەرجەمیان ( کەرتی (١)ی مەڵکەندی و دەباشان)ن و تۆمارن بە ناوی کۆمپانیای چاڤی بۆ وەبەرهێنانی گەشتیاری – هاوپشکی تایبەت، ئەویش بەرانبەر قەرزە کەڵکەبووەکانی کۆمپانیاکە، وەزیری کارەبای حکومەتی هەرێمی کوردستان / سەرەڕای کارەکەی، کە بڕەکەی سێ ملیار و هەشتا ملیۆن و حەوت سەد و دە هەزار دینارە، بە رەسمی لەلایەنبەرێوەبەرایتی کارەبای سلێمانییەوە دەفرۆشرێت.

کارەبای سلێمانی ئەوەشی خستەڕوو، زیادکردنەکە لە ماوەی 30 رۆژدا لە رۆژی دوای بڵاوکردنەوەی ئەم ئاگادارییە لە رۆژنامەدا لە بەڕێوەبەرایەتییەکەیان لە سەعات 12ـی نیوەڕۆ ئەنجام دەدرێت.

بەپێی پێشبیینەکانی کەشناسی لە 48 سەعاتی داهاتوودا ئاسمان نیمچە هەور دەبێت و پلەکانی گەرما زیاتر دادەبەزن.

بەرێوەبەرایەتی گشتی کەشناسی پێشبینییەکانی بۆ ئەمڕۆ و سبەینێ بڵاوکردەوە و رایگەیاند، ئەمڕۆ ئاسمان ساماڵ و پەڵە هەور دەبێت لەکاتەکانی ئێوارە لەناوچە شاخاویەکان بۆ هەوری تەواو دەگۆڕێت.

ئاماژەی بەوەشکرد، پلەکانی گەرما نزیک دەبێتەوە لە تۆمارکراوەکانی دوێنێ.

کەشناسی هەرێم راشیگەیاند، سبەینێ سێشەممە ئاسمان لەنێوان نیمچە هەورو هەوری تەواو دەبێت، هەروەها پلەکانی گەرما بەگشتی کەمێک نزم دەبێتەوە و لە ناوچە شاخاویەکان کەمێک زیاتر دادەبەزن بە ( 2 – 3 ) پلە، بەراورد بە تۆمارکراوەکانی ئەمڕۆ وەک لە خوارەوە ئاماژەیان پێدراوە.

بەرزترین پلەکانی گەرمای پێشبینیکراو بە پلەی سیلیزی

هەولێر : 27 پلەی سیلیزی

سلێمانی : 26 پلەی سیلیزی

دهۆک : 25 پلەی سیلیزی

زاخۆ : 26 پلەی سیلیزی

کەرکوک : 28 پلەی سیلیزی

هەڵەبجە : 27 پلەی سیلیزی

سۆران : 27 پلەی سیلیزی

حاجی ئۆمەران : 19 پلەی سیلیزی

گەرمیان : 34 پلەی سیلیزی

ئەحمەد شەرع وەک یەکەم سەرۆکی سوری، بڕیارە لە کۆشکی سپی لەگەڵ دۆناڵد ترەمپ سەرۆکی ئەمریکا کۆببێتەوە.

میدیا جیهانییەکان بڵاویانکردووەتەوە، تەوەرەی سەرەکی کۆبوونەوەی نێوان هەردوو سەرۆکی ئەمریکا و سوریا، پرسی رێککەوتن لەگەڵ ئیسرائیل و رووبەڕووبونەوەی تیرۆر دەبێت.

ئەحمەد شەرع سەرۆکی سوریا رایگەیاند، دۆسیەی هەڵگرتنی سزا لەسەر وڵاتەکەی چووەتە قۆناغەکانی کۆتاییەوە، و پێشبینی دەکات ئەنجامەکان لە دوو رۆژی داهاتوودا دوای دیدار لەگەڵ سەرۆکی ئەمریکا سەرجەم سزاکانی سەر سوریا هەڵبگیرێت.

وتیشی، حکومەتی وڵاتەکەی هەوڵی سەقامگیرکردنی باشوری سوریا دەدات، وەک ئامادەکارییەک بۆ ئاوەدانکردنەوە.

جێگەی ئاماژەیە، لە ماوەکانی رابردوودا شەرع بە یاوەری ئەسعەد شەیبانی وەزیری دەرەوەی ئەو وڵاتە، سەردانی ئەمریکایان کرد و بەشدارییان لە کۆبوونەوە کۆمەڵەی گشتی نەتەوەیەکگرتووەکان کرد.

ئەحمەد شەرع دەبێتە یەکەم سەرۆکی سوریا ، لە دوای سالی 1946وە لە کۆشکی سپی پێشوازی لە سەرۆکێکی سوری بکرێت و لەگەڵ سەرۆکی ئەو وڵاتە کۆببێتەوە.

ئەندامێکی مەکتەبی سیاسی یەکێتی وەڵامی باڵێکی پارتی دەداتەوە و دەڵێت: فازل میرانی لە وەڵامەکانیدا مێژووی شێواند و پارتی لە رابردوودا چەندینجار لەگەڵ حکومەتی عیراق رێککەوتووە.

شاڵاو عەلی عەسکەری ئەندامی مەکتەبی سیاسی یەکێتیی نیشتمانیی کوردستان لە میانی بەشداریکردنی لە بەرنامەی پانۆرامای کوردسات نیوز رایگەیاند، بۆ وەڵامدانەوە رۆڵێک بە فازل میرانی سپێردرابوو، کە لە وەڵامەکانیدا مێژووی شێواند و بەشێوەیەکی خراپ باسی ئەو کەسانەی دەکرد کە کۆچی دوایین کردووە، دەبوایە فازل میرانی ئەو رۆڵە قبوڵ نەکات کە لەلایەن باڵێکی پارتییەوە پێسپێردرابوو، چونکە ئەو جۆرە وەڵامدانەوە زۆر ناڕەوا و پڕ زیادەڕۆیی بوو.

وتیشی، لە قسەکانیدا فازل میرانی وتی باڵی مەکتەبی سیاسی ساڵی 1964 لەگەڵ حکومەتی عیراق رێککەوتووە، بەڵام لەو ساڵەدا مەلا مستەفای بارزانی بوو کە لەگەڵ حکومەتی عەبدول سەلام عارف رێککەوت و باڵی مەکتەبی سیاسی بە زەبری سوپا و ئۆتۆمبێل و چەکی حکومەتی عیراق لە ماوەتەوە  ئاوارەی ئێران کران.

شاڵاو عەلی عەسکەری ئاماژەی بەوەشکرد، پارتی پێشتر چەندینجار لەگەڵ حکومەتی عیراق رێککەوتووە، هەروەها چەندین حاڵەتی لە شۆرش و مێژوودا دروستکرد، وەک کارەساتی هەکاری و شەهیدکردنی چەندین کەس و تەنانەت براکانی خۆشیان بە کوشدا لە بەغداد، بۆیە مێژوو شاهیدە و هەموو کەس دەیزانێت لە رابردوودا چی رویداوە، بۆیە پێویست ناکات مێژوو بشێوێندرێت.

راشیگەیاند، هەر کاتێک کورد پێویستی بە یەکڕیزی بووبێت پارتی کارێکی کردووە یەکڕیزی تێک بدات و نارێکی بخاتە نێوان لایەنەکان، بۆیە داواکارم چیتر ئەو جۆرە قسەکردن و لێداوانانە نەدرێت و یەکڕیزی نێوان کورد تێکنەدرێت.

بەپێی بەدواداچوون و بەراوردکارییەکی کوردسات نیوز، دەنگەکانی یەکێتیی نیشتمانیی کوردستان لە دەنگدانی تایبەتدا بەراورد بە هەڵبژاردنی ساڵی 2021، زیادبوونێکی بەرچاوی بەخۆیەوە بینیوە و بە کردەوە دەنگەکانی دوو هێندە بووەتەوە.

یەکێتیی نیشتمانیی کوردستان، دەنگەکانی لە 38 هەزار دەنگی ساڵی 2021ـەوە، بۆ زیاتر لە 70 هەزار دەنگ لە دەنگدانی تایبەتی ئەمساڵدا بەرزبووەتەوە. ئەمەش نیشاندەری ئەوەیە کە یەکێتی توانیویەتی نزیکەی 32 هەزار دەنگ زیاد بکات.

ئەم بەراوردکارییە دەریدەخات کە یەکێتیی نیشتمانیی کوردستان بە بەدەستهێنانی نزیک بە 100%، گەورەترین براوەی دەنگدانی تایبەتە.