سەبارەت بە درێژكردنەوەی ئاگربەست، میدیاکانی ئەمریكا دەڵێت: ئەگەر ئێران هەنگاوی نوێ نەنێت ئاگربەست زۆر ناخایەنێت، سوپای پاسدارانیش دەڵێت بەپێی بەرژەوەندی خۆیان مامەڵە دەكەن

چەند سەرچاوەیەك بە تۆڕی "فۆكس نیوز"یان راگەیاند، ئەو ئاگربەستەی سەرۆكی ئەمریكا رایگەیاندووە رەنگە بۆ ماوەیەكی كورت بێت، ئەگەر بە خێرایی رێككەوتن نەكرێت. 

راشیگەیاند، ئەم هەنگاوە كۆتا هەوڵە بۆ گەیشتن بە ئاشتی لە پێناو گەلی ئێران كە بەهۆی جەنگەوە لە نەهامەتیدان، هەروەها دەرفەتێكە بۆ حكومەتی ئێران كە لەناوخۆی خۆیاندا بگەنە رێككەوتن. 

لە بەرامبەردا، تەلەفزیۆنی ئێرانی رایگەیاند، رەنگە تاران پابەندی ئاگربەست نەبێت و بەپێی بەرژەوەندی خۆی بجوڵێتەوە. 
تەلەفزیۆنی ئێران لە زاری سوپای پاسدارانەوە بڵاویكردەوە، سوپای پاسداران ئامادەیە بۆ روبەڕوبوونەوەی هەر دوژمنكارییەكی نوێ، هەروەها گورز ئاڕاستەی بەرژەوەندییەكانی دوژمن دەكەن ئەگەر جەنگ سەرهەڵبداتەوە. 

ئیسماعیل بەقایی، وتەبێژی وەزارەتی دەرەوەی ئێران، ئەمڕۆ چوارشەممە، رایگەیاند کە وڵاتەکەی هێشتا بڕیاری کۆتایی نەداوە سەبارەت بە بەشداریکردن لە خولی نوێی دانوستانەکان.

بەقایی ئاماژەی بەوە کرد: ئێران هێشتا بڕیاری نەداوە ئایا بەشداری لە خولی نوێی وتوێژەکانی ئاشتی لەگەڵ ویلایەتە یەکگرتووەکانی ئەمریکا دەکات یان نا.

وتیشی: ئێمە بە نیازپاکی و بە جیدییەوە چووینە ناو وتوێژەکان، بەڵام لایەنی بەرامبەر بێباکی و بێخەمیی خۆی نیشان داوە.

بەقایی لە درێژەی قسەکانیدا وتی: هێرشکردنە سەر کەشتییە ئێرانییەکان پێشێلکارییەکی زەقی یاسا نێودەوڵەتییەکان و چەتەیی دەریاییە، هەر کاتێکیش دانوستانەکان بەرەو بەدەستهێنانی ئەنجامێکی دیاریکراو ئاراستە کران، ئەو کاتە ئێران بڕیار دەدات کە ئایا بەشداری تێدا دەکات یان نا.

حەمەی حەمەسەعید وەزیری رۆشنبیریی هەرێمی کوردستان بەبۆنەی 128ـەمین ساڵیادی رۆژنامەگەریی کوردی پەیامێکی بڵاوکردەو و تێیدا داوا لە تەواوی رۆژنامەنووس و میدیاکان دەکات بە ئەمانەتەوە کارەکەیان بکەن و نیشتمان بپارێزن

دەقی پەیامەکە:

بەڕێزان، ڕۆژنامەنووسان و قەڵەمە بوێرەکانی کوردستان

کەسوکاری سەربەرزی شەهیدانی ڕۆژنامەوان و بواری میدیا..

ڕۆژی 22ـی نیسان، یادی 128 ساڵەی دەرچوونی یەکەمین ژمارەی ڕۆژنامەی (کوردستان)ـە لە قاهیرە. ئەو وەرچەرخانە مێژووییەی لەسەر دەستی میقداد میدحەت بەدرخان دەستیپێکرد، تەنها سەرەتایەکی مەعریفی نەبوو، بەڵکو دامەزراندنی سەنگەرێکی گرنگی بەرگری و مانەوە بوو لە مێژووی بزوتنەوەی ڕزگاریخوازی گەلی کوردستاندا.

لەم یادە پیرۆزەدا، سڵاوی ڕێز و ئەمەکداری دەنێرین بۆ هەموو ئەو ڕۆژنامەنووسە پێشمەرگانەی، کە لە سەنگەرەکانی شەڕ و ئاشتیدا بوونەتە دەنگی ڕاستەقینەی میللەتەکەمان، هەروەها سڵاو بۆ ئەو ڕۆژنامەنووسە خاوەن هەڵوێستانەی، کە پیشەییانە و دڵسۆزانە خزمەت دەکەن.

میدیای نیشتمانی..

ئەمڕۆ، کە ناوچەکەمان لە نێو جەرگەی ململانێ و ئاڵۆزییەکی گەورەدایە، ئەرکی میدیا و میدیاکاران لە هەموو کاتێک قورسترە. لە کاتێکدا کە ئێمە وەک هەرێمی کوردستان بەشێک نین لەو ململانێیانە، پێویستە میدیا ببێتە فاکتەری یەکڕیزی و قووڵکردنەوەی تەبایی، نەک ڕێگەخۆشکەر بۆ پەرتەوازەیی.

ئەرکی ئێوەیە بە ڕۆحیەتێکی نیشتمانییەوە ڕووماڵی ڕووداوەکان بکەن و بەرژەوەندییە باڵاکانی نیشتمان بپارێزن، بۆ ئەوەی قەوارەی هەرێمی کوردستان، کە بەرهەمی خوێنی هەزاران شەهید و تێکۆشانی ڕێبوارانی ڕێگای ئازادییە، بە پارێزراوی بمێنێتەوە.

لە کۆتاییدا، دروود بۆ گیانی پاکی سەرجەم شەهیدانی ڕۆژنامەنووس و شەهیدانی ڕێگای ڕزگاری کوردستان دەخوازین. هەمیشە لە پێشەنگی گەیاندنی ڕاستی و پاراستنی بەها نەتەوەییەکاندا بن.

حەمەی حەمەسەعید
وەزیری ڕۆشنبیری و لاوان
21ـی نیسانی 2026

لیستی موچەی مانگی چواری موچەخۆرانی هەرێمی كوردستان رادەستی وەزارتی دارایی عیراق كرا.

پەیامنێری كوردسات نیوز رایگەیاند، ئەمرۆ لیستی مووچەی مانگی نیسانی فەرمانبەران و مووچەخۆرانی هەرێمی كوردستان و ڕاپۆرتی تەرازووی پێداچوونەوەی مانگی ئازار لەلایەن تیمی تەكنیكی وەزارەتی دارایی و ئابووری هەرێمی كوردستانەوە ڕادەستی فەرمانگەی ژمێریاری وەزارەتی دارایی حكومەتی فیدراڵ كراوە.

سەرچاوەیەكیش لە وەزارەتی  دارایی حكومەتی هەرێم  وتی، بەهۆی ئەو كاریگەرییە ئابورییانەی بەهۆی جەنگی ناوچەكەوە روبەڕووی هەرێمی كوردستان بووەتەوە، لەگەڵ بەغداد رێككەتوون تا رەوشی ناوچەكە  ئاسایی دەبێتەوە، مانگانە داهاتی نانەوتیی هەرێمی كوردستان هەرچەندێك بێت، حكومەتی عیراق تەمویلی موچە دەكات.

قوباد تاڵەبانی جێگری سەرۆک وەزیرانی هەرێم بەبۆنەی 128ـەمین ساڵیادی رۆژنامەگەریی کوردییەوە پەیامێکی بڵاوکردەوە و تێیدا هاتووە: بۆ ئێمە، ڕۆژنامەگەریی ئاوێنەیەکە کە کەموکوڕییەکانمان نیشان دەدات، بەشێکی دانەبڕاوە لە خەباتی کولتووری و مەدەنی

دەقی پەیامەکە: 

بەر لە ١٢٨ ساڵ، «میقداد بەدرخان» لە قاهیرەوە مۆمێکی داگیرساند کە تەنها خەباتی نەتەوەیی نەبوو، بەڵکو دەستپێکی هۆشیاریی هزریی کورد بوو. 

ئەمڕۆ کە یادی ڕۆژی ڕۆژنامەگەریی کوردی دەکەینەوە، بە ئەرکی سەرشانمانی دەزانین کە پشتیوان و داکۆکیکاری ئازادیی قەڵەم بین.
بۆ ئێمە، ڕۆژنامەگەریی ئاوێنەیەکە کە کەموکوڕییەکانمان نیشان دەدات، بەشێکی دانەبڕاوە لە خەباتی کولتووری و مەدەنی، و ڕێگەی چاکسازییمان بۆ ڕووناک دەکاتەوە.

پیرۆزبایی ئەم ساڵیادە لە هەموو ڕۆژنامەنووسان و سەرجەم گەلی کورد دەکەم و جارێکی دیکەش جەخت لە پابەندیی بە باشکردنی ژینگەی کاری ڕۆژنامەنووسی دەکەمەوە.

دوای درێژكردنەوەی ئاگربەست لەگەڵ ئێران فەرماندەیی ناوەندی ئەمریكا رایگەیاند، هێزەكانیان هێشتا لەوپەڕی ئامادەباشیدان.

فەرماندەیی ناوەندی ئەمریكا (سێنتكۆم)، بەرەبەیانی ئەمڕۆ،  لە تۆڕی كۆمەڵایەتی ئێكس لە پۆستێكی كورتی بڵاوكردەوە و تێیدا ئاماژەی بۆ ئەوەكردوە، هێزەكانیان لە دۆخی ئامادەباشی تەواودان بۆ هەر روبوربونەوەیەك.

پۆستەكەی سێنتكۆم ، كورتە ڤیدیۆیەكشی لەگەڵ بڵاواكراوەتەوە، كە لە ڤیدیۆكەدا لێدوانێكی براد كووپەر، فەرماندەی سێنتكۆم، تیدا بڵاوكراوەتەوە كە مێژووەكەی دەگەڕێتەوە بۆ 16ی نیسانی 2026، تێیدا جەخت دەكاتەوە لەوەی كاتی ئاگربەستی جەنگەكەیان بۆ دووبارە پڕچەك كردنەوەی هێزەكانیان  و گۆڕینی شوێنی هێزەكانیان بەكاردەهێنێت.

ئەمە لە كاتێكدایە، دۆناڵد ترەمپ سەرۆكی ئەمریكا رایگەیاند، هێزە ئەمریكییەكان لە رۆژهەڵاتی ناوەڕاست لە ئامادەباشی باڵادا دەمێننەوە تا ئەو كاتەی ئێران پێشنیازێكیان بۆ رێككەوتن پێشكەشدەكەن.

مەکتەبی سیاسیی یەکێتیی نیشتمانیی کوردستان بەبۆنەی 128ـەمین ساڵیادی رۆژنامەگەریی کوردی پەیامێکی بڵاوکردەوە و تێیدا هاتووە: زیاتر لە سێ سەدەیە کاروانی رۆژنامەگەریی کوردی سەکۆی گەیاندنی بانگەوازی ماف و داخوازییەکانێتی

دەقی پەیامەکە:

بە بۆنەی یادی ١٢٨ ساڵەی دەستپێکی ڕەوتی ڕۆژنامەوانی کوردییەوە گەرمترین پیرۆزبایی لە رۆژنامەنووسان، میدیاکاران و تێکۆشەرانی کایەی میدیایی لە سەرتاسەری کوردستان دەکەین.

رۆژنامەی (کوردستان) کە نیسانی ساڵی ١٨٩٨ لە لایەن میر مقداد بەدرخانەوە بڵاوکراوەتەوە،  سەرەتای ئەو ڕەوتە و مژدەی کەوتنەڕێی کاروانێکی ئاوەدانی خزمەتی گشتییە لە ڕێی درەوشانەوەی وشەی کوردی، هزری مۆدێرنی کوردستانی، بنیاتنانی چەندین تەلاری بەرزی ڕۆژنامەوانی کە ڕۆڵی سەربەرزانەی هەبوو لە پێگەیاندنی کوردەواری و گەشەی کوردایەتیدا. 

نزیکەی سەدەیەک و سێ دەیەیە ئەم کاروانە ئامرازی  مەدەنی و دیموکراتی و چەکی شارستانی دەستی گەلەکەمان و سەکۆی گەیاندنی بانگەوازی ماف و داخوازییەکانێتی.

زیاتر لە سێ سەدەیە کاروانی رۆژنامەگەریی کوردی سەکۆی گەیاندنی بانگەوازی ماف و داخوازییەکانێتی

بێگومان ئەمڕۆش هەر گەشەکردنێک لە بواری ڕۆژنامەوانی و فراوانتریش لەوە، لە بواری هەموو ئامڕازەکانی میدیا و تەکنەلۆژیای نوێی راگەیاندن دەرفەتێکی ناوازەی سەردەمە بۆ خزمەتی زیاتری میللەتەکەمان لە سەر بنەمای سێکوچکەی هەواڵ ، زانیاری و پەیامی ڕاستەقینەی میدیا. 

بەم بۆنەیەوە سڵاو بۆ خەباتگێڕانی دێرینی وێستگە جیاجیاکانی ئەم رەوتە و شەهیدانی قەڵەم دەنێرین و

تەئکید لەسەر سیاسەتی نەگۆڕی یەکێتیی نیشتمانیی کوردستانیش دەکەینەوە لە پشتیوانیکردنی  میدیاکاران و پەرەپێدانی زیاتری ژینگەی ئازادی کاری میدیایی و هاوسەردەمی لەگەڵ گۆڕانکارییەکانیدا.

جارێکی تر پیرۆزە

مەکتەبی سیاسیی

یەکێتیی نیشتمانیی کوردستان

٢٠٢٦/٤/٢٢

لە 22ی نیسانی1370 دا، بە فەرمانی شارلی پێنجەم، پاشای فەرەنسا، بەردی بناغەی قەڵای "باستێل" دانرا.

 لە بنەڕەتدا ئەم قەڵایە بۆ پاراستنی پاریس لە هێرشەکانی ئینگلتەرا لە کاتی "جەنگی سەد ساڵە"دا دروستکرا، بەڵام مێژوو چارەنووسێکی دیکەی بۆ نووسیبوو.

باستێل تەنها بینایەکی ئاسایی نەبوو، بەڵکو قەڵایەکی زەبەلاح بوو لە هەشت بورجی بەرز پێکهاتبوو کە بەرزی هەر یەکێکیان 30 مەتر بوو.

 دەوروبەری قەڵاکە بە خەندەقێکی قووڵ دەورەدرابوو کە پانییەکەی زیاتر لە 24 مەتر بوو، ئەم شوێنە کە بڕیار بوو قەڵغان بێت، لە سەردەمی کاردیناڵ ریچیلیۆ لە سەدەی حەڤدەیەمدا، گۆڕدرا بۆ زیندانێکی فەرمیی دەوڵەت و بوو بە هێمای ستەمکاریی رەهای پاشایەتی.

زیندانی باستێل شوێنی سزادانی ئەوانە بوو کە هەوڵی هەڵاتنیان دەدا، شوێنێکی شێدار و تاریک، لە زستاندا دەبووە بەفرگر و لە هاویندا لەبەر گەرما دەکوڵان، ترسناکترین شت "نامەی پاشایەتی" بوو، کە رێگەی دەدا کەسەکە بۆ کاتێکی نادیار و بەبێ دادگایی زیندانی بکرێت.

زیندانییە بەناوبانگەکان و دەمامکە ئاسنینەکە

باستێل میوانداری زۆر کەسایەتی کردووە، لەوانە:

• ڤۆڵتێر: شاعیر و فەیلەسووفی ناودار کە دوو جار بەهۆی شیعرەکانییەوە زیندانی کرا.

• مارکیز دی ساد و نیکۆلا فۆکیێ.

• پیاوە دەمامکە ئاسنینەکە: تەمومژاوییترین زیندانی کە تا ئێستاش ناسنامەکەی بە نادیاری ماوەتەوە.

١٤ی تەمموز؛ رۆژی روخانی بتە شووشەییەکە

هەرچەندە لە کۆتایی سەدەی هەژدەیەمدا ژمارەی زیندانییەکان کەم ببووەوە، بەڵام باستێل لە ویژدانی خەڵکدا وەک "دێوەزمەی ستەم" مابووەوە. لە 14ی تەمموزی 1789، جەماوەری تووڕە هێرشیان کردە سەر قەڵاکە. هەرچەندە تەنها 7 زیندانی تێدا بوو، بەڵام رووخانی باستێل و کوژرانی فەرماندەکەی، بوو بە ئایکۆنی کۆتاییهاتنی دەسەڵاتی رەها و دەسپێکی شۆڕشی فەرەنسا.

بافڵ جەلال تاڵەبانی بەبۆنەی تێپەڕبوونی 128 ساڵ بەسەر دەرچوونی رۆژنامەی کوردستان پەیامێکی بڵاوکردەوە و تێیدا هاتووە: جەخت لە ئازادیی رادەربڕین و پاراستنی شکۆی رۆژنامەنووسان دەکەینەوە

دەقی پەیامەکە:

جەخت لە ئازادیی رادەربڕین و پاراستنی شکۆی رۆژنامەنووسان دەکەینەوە و فەراهەمکردنی ژینگەیەکی لەباری کارکردن بۆ ئەو قەڵەمانەی بە بەرپرسیارێتی و راستگۆییەوە کاردەکەن بە ئەرکی لەپێشینەی خۆمان دەزانین.

یەکێتیی نیشتمانیی کوردستان بە شانازییەوە میراتگری رێبازی سەرۆک مام جەلالە کە داکۆکیکارێکی سەرسەختی رۆژنامەوانی ئازاد بووە، بۆیە لای ئێمە پاراستنی ئەو ئازادییە وەفادارییە بۆ ئەو رێبازەی کە لەسەری دەڕۆین.

لەم رۆژەدا، بە رێزەوە لە ماندوبوون و شەونخونی هەموو ئەو رۆژنامەنووسانە دەڕوانین کە لە چوارچێوەی بنەما چەسپاوەکانی پیشەکەیان کارەکانیان بە ئەمانەتەوە رایی دەکەن.

بافڵ جەلال تاڵەبانی 
سەرۆکی یەکێتیی نیشتمانیی کوردستان

سەرۆكی ئەمریكا رایگەیاند، ئێران لە لێواری داڕماندایە و داوای كردنەوەی دەستبەجێی گەروی هورمز دەكات چونکە موچەی سلکی سەربازیی وڵاتەکەی بۆ نادرێت

دۆناڵد ترەمپ سەرۆكی ئەمریكا لە پۆستێكیدا لە سۆشیال تروس نووسویەتی، ئێران ەوبەڕووی قەیرانێكی دارایی بێپێشینە بووەتەوە و ئابوریی وڵاتەكە بەرەو داڕمانی تەواوەتی دەچێت.

ئاماژەی بەوەشكردوە، ئێران بەهۆی داخستنی گەرووی هورمز و گەمارۆ دەریاییەكانەوە، رۆژانە بڕی 500 ملیۆن دۆلار زیانی پێدەگات.

ئەوەشی روونکردەوە، تاران بەدەست نەبوونی نەختینەوە دەناڵێنێت و هەموو هەوڵێكی خۆی خستووەتەگەڕ بۆ ئەوەی گەروی هورمز بەڕووی بازرگانیدا بكرێتەوە، تاكو بتوانێت دووبارە دەست بە هەناردەكردنەوەی نەوت بكات.

لەلایەکی دیکەشەوە ئاماژەی بەوەداوە، هێزە سەربازییەكان و پۆلیسی ئێران چەندین مانگە مووچەیان وەرنەگرتووە، ئەمەش بووەتە هۆی دروستبوونی شەپۆلێكی ناڕەزایەتی و دابەزینی ورەی هێزە ئەمنییەكان.

بەریتانیا دەستی کرد بە میوانداریکردنی کۆبوونەوەیەکی سەربازیی باڵا کە بۆ ماوەی دوو رۆژ (چوارشەممە و پێنجشەممە) بەردەوام دەبێت، بەریتانیا 30 وڵات کۆدەکاتەوە.

 لەم کۆبوونەوەیەدا بەرپرسانی سەربازیی نزیکەی 30 وڵات بەشدارن بۆ داڕشتنی پلانێکی ورد بۆ پێکهێنانی هێزێکی دەریایی بە سەرکردایەتی بەریتانیا و فەرەنسا، بە مەبەستی پاراستنی ئاسایشی هاتوچۆ لە گەروی هورمز.

ئەم کۆبوونەوەیە دوای لوتکەی پاریس دێت کە هەفتەی رابردوو لە نێوان کییەر ستارمەر و ئیمانوێل ماکرۆن بەڕێوەچوو.

جۆن هیڵی، وەزیری بەرگری بەریتانیا، رایگەیاند کە ئامانجی سەرەکی بریتییە لە وەرگێڕانی کۆدەنگییە دیپلۆماسییەکان بۆ پلانێکی کرداریی هاوبەش کە ئازادی بازرگانی دەریایی بپارێزێت و هاوکار بێت بۆ گەیشتن بە ئاگربەستێکی هەمیشەیی.

لەگەڵ ئەم ئامادەکارییە سەربازییانەدا، لەندەن و پاریس دوو مەرجی سەرەکییان بۆ کاراکردنی ئەم هێزە داناوە کەبریتیە لەوەی ئەم هێزە تەنها کارنامەیەکی بەرگریی دەبێت و بەشداری هیچ هێرشێک ناکات، هەروەها هێزەکان تەنها ئەو کاتە بڵاو دەکرێنەوە کە ئاشتییەکی هەمیشەیی بێتە کایەوە و بارودۆخی ناوچەکە جێگیر بێت.

نەبوونی ویلایەتە یەکگرتووەکانی ئەمریکا و ئێران لەم گفتوگۆیانەدا نیشانەی پرسیاری زۆری لەسەر کاریگەریی ئەم هەنگاوە دروست کردووە، چونکە ئەم دوو وڵاتە لایەنی سەرەکین لە هاوکێشەی ململانێکان لە گەروی هورمزدا، ئەمەش وا دەکات جووڵە ئەوروپییەکە وەک هەوڵێک بۆ دۆزینەوەی "ڕێگەی سێیەم" و دوورکەوتنەوە لە پێکدادانی ڕاستەوخۆ دەربکەوێت.

دۆناڵد ترەمپ، سەرۆکی ئەمریکا رایدەگەیەنێت؛ لەسەر داوای پاکستان، بڕیاریداوە هێرشی سەربازی بۆ سەر ئێران رابگرێت و ماوەی ئاگربەست درێژ بکاتەوە.

ترەمپ رایگەیاند، لەبەر ئەوەی حکومەتی ئێران بە قووڵی دابەش بووە، کە ئەمەش کارێکی چاوەڕواننەکراو نەبوو، هەروەها پاکستان داوایان لێکراوە هێرشەکانمان بۆ سەر وڵاتی ئێران رابگرن.

سەرۆکی ئەمریکا ئاماژەی بەوە کردووە، ئەم بڕیارە تا ئەو کاتەیە کە سەرکردە و نوێنەرانی ئێران دەگەنە پێشنیازێکی یەکگرتوو بۆ دانوستان.

ترەمپ جەختیشی کردەوە، سوپای ئەمریکا راسپێردراوە بەردەوام بێت لە گەمارۆدانی دەریایی و لە هەموو روەکانی ترەوە لە ئامادەباشی تەواودا بمێننەوە.

سەرۆکی ئەمریکا ئەوەشی خستەڕوو، ئاگربەستەکە درێژ دەکرێتەوە تا ئەو کاتەی پێشنیازەکەی ئێران پێشکەش دەکرێت و گفتوگۆکان بە لایەکدا دەخرێن، جا چ بە رێککەوتن بێت یان بە پێچەوانەکەیەوە.

ئەم بڕیارە کتوپڕەی ترەمپ لە کاتێکدایە کە تەنها چەند سەعاتێک مابوو بۆ کۆتاییهاتنی ئاگربەست، بەمەش جارێکی تر هەلی دیپلۆماسی لە پاکستان دەخرێتە پێش بژاردەی جەنگی راستەوخۆ.

مەكتەبی راگەیاندن و هۆشیاری یەكێتی پەیامێكی بۆ 128ـەمین ساڵیادی رۆژنامەگەری كوردی بڵاوكردەوە و دەڵێت، ئەم بۆنەیە تەنها یادكردنەوەی رابردوو نییە، بەڵكو نوێكردنەوەی پەیمانێكە لەگەڵ راستی، ئازادی و بەرپرسیاریی نیشتمانی.

مەكتەبی راگەیاندن و هۆشیاری یەكێتی نیشتمانی كوردستان لە پەیامەكەیدا دەڵێت، لە 128 ساڵی رابردوودا، رۆژنامەگەریی كوردی بە خەبات و قوربانیدان بنیادنراوە و قەڵەمە بوێرەكان هەمیشە دەنگی زوڵاڵی كۆمەڵگە بوون.

ئاماژەی بەوەشدا، میدیا دەبێت پارێزەری راستی بێت و لەنێوان چەواشەكاری و حەقیقەتدا، ویژدانی زیندووی كۆمەڵگە بێت، چونكە رۆژنامەگەریی تەنیا گواستنەوەی هەواڵ نییە، بەڵكو بەرگرییە لە مافەكان و بەشدارییكردنە لە بنیاتنانی كۆمەڵگەیەكی یەكسان و دادپەروەر.

مەكتەبی راگەیاندن و هۆشیاری یەكێتی دەشڵێت، دژی هەموو جۆرێك لە توندوتیژین و هیوادارن هێزی میدیا ببێتە دەنگی ئاشتی و دیالۆگ، لە بانگەوازێكیشدا بە میدیاكاران دەڵێت، پێنووسەكانتان بە بڕشت بێت و دەنگتان هەمیشە لەگەڵ راستی، رەوایی، ئازادی و سەقامگیریدا بێت.

دەقی پەیامەکە...

لە ساڵیادی دەرچوونی یەکەم ژمارەی رۆژنامەی «کوردستان»دا، گەرمترین پیرۆزبایی ئاراستەی هەموو رۆژنامەنووسان و میدیاکارانی کوردستان دەکەین. ئەم بۆنەیە تەنیا یادکردنەوەی رابردوو نییە، بەڵکو نوێکردنەوەی پەیمانێکە لەگەڵ راستی، ئازادی و بەرپرسیاریی نیشتمانییدا.

لە ماوەی (128) ساڵدا، رۆژنامەگەریی کوردی بە خەبات و قوربانیدان بنیات نراوە و قەڵەمە بوێرەکان هەمیشە دەنگی زوڵاڵی کۆمەڵگەکەمان بوون. ئەم مێژووە پابەندبوونمان زیاتر دەکات بە ئەرکە نیشتمانی و نەتەوایەتییەکان و بەرزکردنەوەی هۆشیاریی کۆمەڵگە.

لەم یادە پیرۆزەدا، پەیامی ئێمە روونە: میدیا دەبێت پارێزەری راستی بێت و لەنێوان چەواشەکاری و حەقیقەتدا، ویژدانی زیندووی کۆمەڵگە بێت. رۆژنامەگەریی تەنیا گواستنەوەی هەواڵ نییە، بەڵکو بەرگرییە لە مافەکان و بەشدارییکردنە لە بنیاتنانی کۆمەڵگەیەکی یەکسان و دادپەروەر.

لەم قۆناغە هەستیارەی کوردستان و عێراق و ناوچەکەدا، رۆڵی میدیا گرنگترە لە هەر کاتێک. پێویستە میدیاکان بە ئازادی و هیواوە کار بکەن بۆ پاراستنی سەقامگیری و بەهێزکردنی دیموکراسی.

ئێمە دژی هەموو جۆرێک لە توندوتیژین و هیوادارین هێزی میدیا ببێتە دەنگی ئاشتی و دیالۆگ، نەک ئامرازێک بۆ پڕوپاگەندەی جەنگ و ئاژاوە.

لە کۆتاییدا، بانگەوازی ئێمە بۆ هەموو میدیاکاران ئەوەیە:

پێنووسەکانتان بە بڕشت بێت و دەنگتان هەمیشە لەگەڵ راستی و رەوایی، ئازادی و سەقامگیریدا بێت.

عەباس عراقچی، وەزیری دەرەوەی ئێران، گەمارۆدانی بەندەرەکانی ئێران کردەیەکی جەنگییە و بەو هۆیەشەوە پێشێلکردنی راشکاوانەی ئاگربەستە.

ئاماژەی بەوەشکرد، هێرشکردنە سەر کەشتییە بازرگانییەکان و بە بارمتەگرتنی کارمەندەکانیان، پێشێلکارییەکی گەورەترە کە ئەمریکا ئەنجامی دەدات.

عەباس عراقچی وتیشی، "ئێران دەزانێت چۆن کۆت و بەندەکان پووچەڵ بکاتەوە، چۆن بەرگری لە بەرژەوەندییەکانی بکات و چۆنیش بەرەنگاری سیاسەتی فشار و زۆرداری ببێتەوە."

ئەم قسانەی عراقچی لە کاتێکدایە کە تەنها چەند سەعاتێکی کەم ماوە بۆ کۆتاییهاتنی ئاگربەست و پاکستان وەک ناوبژیوان هێشتا چاوەڕێی وەڵامی کۆتایی تارانە بۆ بەشداری لە دانوستانەکان، چاودێران پێیان وایە ئەم هەڵوێستەی وەزیری دەرەوەی ئێران ئاماژەیەکی روونە بۆ ئەوەی کە تاران لەژێر گوشاری سەربازی و گەمارۆی دەریاییدا ئامادەی سازشکردن نییە.

لە گەڕەکێکی کەرکوک خانوویەک بەسەر خێزانێکدا روخا، وتەبێژی بەرگری شارستانی کەرکوک بە کوردسات نیوزی راگەیاند، بەهۆی روداوەکەوە قوربانی لێکەوتوەتەوە.

قەیس عەبدولڕەزاق، وتەبێژی بەرگری شارستانی کەرکوک تایبەت بە کوردسات نیوز راگەیاند: روداوەکە لە گەڕەکی قۆریەی سەنتەری شارەکە بووە و تیمەکانیان دەستبەجێ رەوانەی شوێنی روداوەکە کراون بە مەبەستی رزگارکردنی ئەو کەسانەی لەژێر داروپەردووی خانووەکەدا ماونەتەوە.

ئاماژەی بەوەشکرد، بەپێی زانیارییە سەرەتاییەکان روداوەکە قوربانی لێکەوتووەتەوە، بەڵام هۆکاری روخانی خانووەکە بە رەسمی رانەگەیەندراوە.

سبەینێ لیستی موچەی مانگی نیسان و راپۆڕتی تەرازوی پێداچوونەوە رادەستی وەزارەتی دارایی عیراق دەكرێت.

وەزارەتی دارایی و ئابوری حکومەتی هەرێمی کورستان لە راگەیەنراوێکدا بڵاویکردەوە، ئێوارەی ئەمڕۆ لیستی موچەی مانگی نیسانی فەرمانبەران و موچەخۆرانی هەرێمی کوردستان و راپۆرتی تەرازووی پێداچوونەوەی مانگی ئازار لەلایەن تیمی تەکنیکی وەزارەتی دارایی و ئابوری هەرێمی کوردستانەوە رەوانەی بەغداد دەکرێت.

ئاماژەی بەوەشکرد، سبەینێ چوارشەممە رادەستی فەرمانگەی ژمێریاری وەزارەتی دارایی حکومەتی فیدراڵ دەکرێت.