كۆمپانیای بە بازاڕكردنی نەوتی عیراق (سۆمۆ) روونكردنەوەیەكی لەبارەی ئەو بەڵگەنامە دزەپێكراوانەوە بڵاوكردەوە كە باس لە جوڵە و گواستنەوەی نەوت دەكەن و رایگەیاندووە، بەهۆی ئەو رێكارە ئەمنیانەی دەگیرێنەبەر، ئەستەم و مەحاڵە نەوت بە قاچاغ ببرێت.

دەشڵێت، ئەو بەڵگەنامانەی دزەیان پێكراوە لێكدانەوەی هەڵەیان بۆ كراوە، چونكە ئەوانە كاری رۆژانەن و ماوەی چەندین ساڵە بەردەوامن لەسەری، كە لەرێگەی ئەو بەڵگەنامانەوە رۆژانە ناوی ئەو شۆفێر و تانكەرانە دیاری دەكرێن كە بەرهەمە نەوتییەكان دەگوازنەوە، ئەگەر هەر ناوێكی جیاواز لە لیستەكاندا هەبێت، راستەوخۆ بە سەرجەم وێستگە ئەمنی و جیهانییەكاندا بڵاو دەكرێتەوە و رێگری لێدەكرێت.

سۆمۆ راشیگەیاندووە، بەهۆی نەبوونی پسپۆڕیی یان جۆری نووسراوەكەوە نەتوانراوە لە میدیاكاندا ناوەڕۆكی بەڵگەنامەكە وەك خۆی بگەیەنرێت و وا بڵاوكراوەتەوە سۆمۆ دان بە قاچاغچێتی نەوتدا بنێت، بەڵام لەگەڵ لایەنە ئەمنییەكاندا هەماهەنگییەكی بەهێزیان هەیە بەو هۆیەشەوە قاچاغچێتیكردن بە نەوت ئەستەمە.

35 ساڵ بەسەر داگیركردنی كوەیت لەلایەن رژێمی ئەوكاتەی عیراقەوە تێدەپەڕێت، ئەو روداوەی دواتر هاوكێشەی هێزی لە جیهان گۆڕی.

بەرەبەیانی 2ی ئابی 1990 جەنگی یەكەمی كەنداو دەستیپێكرد، هێزە عێراقییەكان بە سەرۆكایەتی سەدام حسێن چوونە ناو كوەیت و لەماوەی دوو رۆژدا ئەو وڵاتەیان بە تەواوی كۆنترۆڵكرد، جابر ئەحمەد سوباح میری پێشووی كوەیتیش بەرەو سعودیە هەڵات، بەڵام دوای نزیكەی 20 هەفتە، هاوپەیمانییەكی سەربازیی بە سەركردایەتی ئەمریكا پێكهات و لە 28ی شوباتی 1991 دوایین سەربازی عیراق لە كوەیت وەدەرنرا.

پاساوی سەدام بۆ ئەو لەشكركێشییەی پشتیوانی بوو لە راپەڕینێكی جەماوەریی دژی میری كوەیت، لەگەڵ ئەوەشدا تۆمەتباری كرد كە بە ئەنقەست نرخی نەوتی دابەزاندووە و نەوتی زیاتری لە كێڵگە هاوبەشەكانی هەردوو وڵات بەرهەمهێناوە، بەڵام هۆكاری لەشكركێشییەكە ئەوەبوو كوەیت رەتیكردەوە قەرزەكانی پێشوو لەسەر عیراق هەڵبوەشێنێتەوە.

گەردەلولی بیابان وەرچەرخانێكی سەربازیی بوو، بەو پێیەی ئەمریكا بوو بە زلهێزی سەربازیی جیهان لەو ململانێ كورتە و خێراكردنی هەڵوەشاندنەوەی یەكێتی سۆڤیەتی پێشوو.

عەلی لاریجانی راوێژكاری رابەری باڵای ئێران دەبێتە سەرۆك ئەنجومەنی باڵای ئاسایشی نەتەوەیی ئەو وڵاتە.

میدیاكانی ئێران بڵااویانكردووەتەوە، لە چوارچێوەی گۆڕانكارییەكانی ئێران بۆ رێكخستنەوەی پەیكەری دەزگا ئەمنییەكان بڕیاردراوە عەلی لاریجانی راوێژكاری عەلی خامنەیی رابەری باڵای ئێران دەبێتە سەرۆكی ئەنجومەنی باڵای ئاسایشی نەتەوەیی ئەو وڵاتە و شوێنی عەلی ئەكبەر ئەحمەدیان دەگرێتەوە.

دەشڵێت، ئەحمەدیان دەبێتە سەرۆكی دۆسیە تایبەت و هەستیارەكان لە دەوڵەتدا و ئەو پۆستەش پێویستی بە كەسێكە كە هەماهەنگی بەهێزی لەگەڵ زۆربەی دەزگا و دامەزراوەكان هەبێت.

هەفتەی رابردووش لێپرسراوێكی ئێران رایگەیاندبوو، گۆڕانكاری بەرچاو لە دەزگا ئەمنییەكان دەكرێت بۆ خۆگونجاندن لەگەڵ گۆڕانكارییەكانی ناوچەكە و رەوشی هەستیاری ئێستای ئێران.

شوکولاتەی تاڵ تەنها خواردنێک نییە کە بۆ چێژوەرگرتن بخورێت، بەڵکو ژەمێکی دەوڵەمەندە بە پێکهاتە خۆراکییەکان و چەندین سوودی گرنگ بە جەستە دەبەخشێت، وەک باشترکردنی میزاج، پاراستنی تەندروستیی دڵ، و یارمەتیدان لە رێکخستنی کێشی لەشدا.

بەپێی راپۆرتێکی ماڵپەڕی "فێری وێڵ هێڵس" (verywellhealth)، بەدەستهێنانی ئەم سوودانە پەیوەندییەکی راستەوخۆی بە کاتی خواردنی شوکولاتەکەوە هەیە، بەجۆرێک کە هەر سوودێکی کاتی تایبەت بە خۆی هەیە.

باشترین کات بۆ خۆشترکردنی ڕۆژەکەو کاریگەری دانان لەسەر میزاج:

توێژینەوەکان دەریانخستووە کە خواردنی شوکولاتەی تاڵ وەک ژەمێکی سووک لە دوانیوەڕواندا، یەکێکە لە هەڵبژاردە گونجاوەکان بۆ بەرزکردنەوەی ورە و باشترکردنی میزاج.

ئەم جۆرە شوکولاتەیە کافاین و ماددە وروژێنەرە سروشتییەکانی تێدایە کە یارمەتی بەئاگاهێنانەوەی جەستە دەدەن و هەستی ماندوێتی ناهێڵن کە بەهۆی دابەزینی ئاستی شەکر لە خوێندا دروست دەبێت.

هەروەها دەرکەوتووە کە شوکولاتەی تاڵی رێژە %85، بەهۆی کاریگەریی لەسەر مایکرۆبایۆمی ریخۆڵە، میزاج باشتر دەکات، چونکە بەکتریا سوودبەخشەکانی ناو ریخۆڵە زیاد دەکات. لەلایەکی دیکەوە، ماددەی پۆلیفینۆڵ کە دژەئۆکسانێکی بەهێزە و لە کاکاودا هەیە، یارمەتی کەمکردنەوەی فشار و دڵەڕاوکێ دەدات لە رێگەی کەمکردنەوەی هۆرمۆنەکانی وەک کۆرتیزۆڵ و ئێپینفرین.

باشترین کات بۆ دابەزاندنی کێش

پسپۆڕان ئامۆژگاریمان دەکەن کە بۆ دابەزاندنی کێش، باشترە شوکولاتەی تاڵ لە بەیانیاندا بخورێت.

توێژینەوەکان سەلماندوویانە ئەو کەسانەی لە کاتێکی زووی رۆژدا شوکولاتە دەخۆن، کێشیان زیاد ناکات. تێبینی ئەوەشکراوە کە ئارەزوویان بۆ خواردنی شیرینی کەمتر دەبێتەوە و برسێتییان کەمدەکات، هاوکات ئاستی شەکری خوێن و کەمەریان بچووکتر دەبێتەوە.

جگە لەمانە، دژەئۆکسان و کانزاکانی ناو شوکولاتە وەک مس و مەگنیسیۆم، لە ڕێگەی باشترکردنی سووڕی خوێن، بەهێزکردنی مێتابۆلیزم و بەرهەمهێنانی وزەوە، یارمەتی کۆنتڕۆڵکردنی کێش دەدەن.

باشترین کات بۆ پاراستنی تەندروستیی دڵ

لێکۆڵینەوەکان ئاشکرایان کردووە کە خواردنی شوکولاتەی تاڵ لە بەیانیان یان دوانیوەڕواندا سوودی بۆ تەندروستیی دڵ هەیە.

پێوایە خواردنی لە بەیانیاندا یارمەتی رێکخستنی ئاستی شەکری خوێن دەدات و ئارەزووی خواردن کەمدەکاتەوە بە بەراورد بە خواردنی لە شەواندا.

ژمارەیەکی زۆر لە توێژینەوەکان خواردنی شوکولاتەیان بەستووەتەوە بە کەمبوونەوەی مەترسیی تووشبوون بە نەخۆشییەکانی دڵ، جەڵتەی دڵ، و جەڵتەی مێشک. بۆ نموونە، دەرکەوتووە ئەو کەسانەی بەشێوەیەکی بەردەوام شوکولاتە دەخۆن، مەترسیی تووشبوونیان بە نەخۆشییەکانی دڵ بە ڕێژەی %37 و مەترسیی جەڵتەی مێشک بە ڕێژەی %29 کەمدەبێتەوە.

سوودەکانی تری پێکهاتەکانی شوکولاتەی تاڵ بریتین لە خاوکردنەوەی بۆرییەکانی خوێن، دابەزاندنی فشاری خوێن، و کەمکردنەوەی هەوکردن لە جەستەدا.

دەقی راگەیەنراوەکە...

"هەمیشە پشتیوانی کەسوکاری شەهیدان و قوربانیانی ئەنفال بووم ، وەک بەڵێنم پێدان هەوڵی بەدیهێنانی دادپەروەری بدەین هەرچەند بخایەنێت، لێپرسینەوە لەوانەش بکرێت کە دەستی چەپەڵیان بەخوێنی ژنان و منداڵانی بێتاوانمان سوورە. 
دواجار توانیمان شوێنی عجاج ئەحمەد حەردان دیاری بکەین کە یەکێک بوو لەو جەلادە دڕندانەی زیندانی نوگرە سەلمان، کەلە لەقوڵایی بیابانی سەماوە لە پارێزگای موسەنا دەستگیربکەین، ئەو زیندانەی هەزاران ژن و منداڵ و پیر تێیدا ئەشکەنجە دران و برسی کران و بە بێدەنگی خرانە ژێر خاکەوە. 

عەجاج بە مامەڵەی دڕندانە و دژ بە مرۆڤایەتی و ئەو ترس و تۆقاندنە ناسراو بوو کە لەگەڵ شەهیدانی ئەنفالکراو بەکاری دەهێنا، وا لەدوای 37 ساڵ چیتر ئەم تاوانبارە ئازاد نییە و دەستبەسەرە. 

داوا لەهەموو زیندانیەکانی رابردوو، خێزانی قوربانیانی ئەنفال، کەسوکاری بێ سەروشوێنبوان ئەکەم سکاڵای یاسایی تۆمار بکەن و گەواهی بدەن تا دادپەروەری فەراهەم بێت و ئەم تاوانبارە خوێنمژە لەسەر تاوانەکانی دەرهەق بەگەلەکەمان، لێپرسینەوەی لەگەڵ بکرێت. 

بەوپەڕی توانامەوە بەرگری لەم دۆسییە مرۆیی و مێژوویی و نیشتمانییە دەکەم و هەرگیز کۆڵنادەم لە یادکردنەوەی شەهیدانمان، هەروەها بەردەوام دەبم لە تێکۆشان لەپێناو راستی و دادپەروەری".

لەماوەی مانگی رابردوودا روسیا نزیکەی چوار هەزار درۆن و زیاتر لە 250 موشەکی لە هێرشەکانیدا بۆ سەر ئۆکراین بەکارهێناوە.

ڤۆلۆدیمێر زیلینسکی سەرۆکی ئۆکراین لە تۆڕی کۆمەڵایەتی ئێکس بڵاویکردەوە، لەماوەی مانگی رابردوودا سوپای روسیا سێ هەزار و 800 درۆن و 260 موشەکی لە هێرشەکانیدا بۆ سەر ئۆکراین بەکارهێناوە.

راشیگەیاند، تەنها بەهەماهەنگی لە نێوان ئەمریکا و وڵاتانی ئەورپا دەتوانرێت هێرشەکانی روسیا بۆ سەر ئۆکراین بوەستێنرێت .

لەلایەکی دیکەوە وەزارەتی بەرگری روسیا ئاشکرایکرد، لەماوەی هەفتەیەکدا توانیویانە حەوت ناوچەی نوێ لە رۆژهەڵاتی ئۆکراین کۆنترۆڵبکەن و ژمارەیەک لە ژێرخانی وزە و نۆ کۆگای چەک و تەقەمەنی بەئامانج بگرن. 

تاکو ئێستا نزیکەی هەزار 400 کەس لە چاوەڕوانی وەرگرتنی هاوکاریە مرۆییەکان لە غەززە کوژراون.

رێکخراوی نەتەوە یەکگرتووەکان رایگەیاند، بەهۆی هێرشەکانی سوپای ئیسرائیلەوە تاکو ئێستا هەزار و 373 کەس لە کاتی هەوڵدان بۆ وەرگرتنی هاوکاریە مرۆییەکان لە ناوچە جیاوازەکانی کەرتی غەززە کوژراون.

راشیگەیاند، 859 کەس لەو شوێنانەدا کوژراون کە رێکخراوی مرۆیی غەززە هاوکاریەکانی دابەشکردوە، هەروەها 514 کەسیش لە شوێنەکانی دیکەی دابەشکردنی هاوکاریە مرۆییەکان کوژراون.

ئەوەش لە کاتێکدایە، تەندروستی غەززە بڵاویکردوەتەوە، لەماوەی 24 کاتژمێری رابردوودا لە ناوچە جیاوازەکانی کەرتی غەززە 91 کەس لە ئەنجامی هێرشەکانی ئیسرائیل کوژراون و 666 کەسی دیکەش برینداربوون.

وەزارەتی دەرەوەی ئێران دەڵێت، تۆمەتەكانی ئەمریكا و وڵاتانی ئەوروپا دژ بە ئێران  بێ بنەما و گاڵتەجاڕانەیە.

ئیسماعیل بەقائی، وتەبێژی وەزارەتی دەرەوەی ئێران رایگەیاند، ئەو تۆمەتانەی لەلایەن ئەمریكا و فەرەنسا و چەند وڵاتێكی تری ئەوروپاوە دژ بە ئێران بڵاودەكرێنەوە، هەوڵێكە بۆ لادانی سەرنجی رایگشتی لەسەر پرسی سەرەكی كە كێشەی فەلەستینە.

راشیگەیاند، ئەو جۆرە هەڵسوكەوتانە پێشێلكردنی بنەماكانی یاسا نێودەوڵەتییەكان و پەیمانی نەتەوەیەكگرتووەكانە و دەبێت لێپرسینەوەیان لەگەڵدا بكرێت، لەبەرامبەر پشتیوانی لە ئیسرائیل، لەبەرئەوەی ئەوە پشتیوانی كردنە لە تیرۆر.

ئەوەش لە كاتێكدایە، ئەمریكا و بەشێك لە وڵاتانی ئەوروپا راگەیەنراوێكی هاوبەشیان دژ بە ئێران بڵاوكردەوە، دژایەتی هەوڵەكانی دەزگای هەواڵگری ئێرانی كرد.

وادەی پڕكردنەوەی فۆرمی ئەلیكترۆنی خۆراك تا 3 ی ئەم مانگە درێژكرایەوە. 

ئاراس محەمەد؛ بەڕێوەبەری پسوڵەی خۆراك لە سلێمانی بە كوردسات نیوزی راگەیاند، وادەی پڕكردنەوەی فۆرمی ئەلیكترۆنی خۆراك بۆ ماوەی دوو رۆژی تر واتا تا 3ی ئاب درێژكراوەتەوە، هاووڵاتیان دەتوانن سود لەو دەرفەتە وەربگرن و فۆرمەكە پڕ بكەنەوە.

وتیشی، لە سلێمانی بە رێژەی 82% و هەولێر 83% و دهۆك 76% و هەڵەبجە 85%ی هاووڵاتییان فۆرمەكەیان پڕكردوەتەوە، بە تێكڕاش لە هەرێمی كوردستان رێژەی پڕكردنەوەی فۆرمەكە گەیشتوەتە 81%.

ئاماژەی بۆ ئەوەشكرد، دواتر قۆناغی دووەم دەستپێدەكات، كە تایبەتە بە راستكردنەوەی هەڵەكان و گواستنەوە لەنێوان بریكارەكانی خۆراك و كەمكردن و زیادكردنی داتاكان لەسەر فۆرمەكە.

هاوكات نەوزاد كامیل بەرێوەبەری گشتی بازرگانی لە وەزارەتی بازرگانی هەرێم بە كوردسات نیوزی راگەیاند، درێژكردنەوەكە بۆ هەموو هەرێمە و  رۆژی یەكشەممە یەكلایی دەبێتەوە كە جارێكی تر وادە درێژ بكرێتەوە یاخود دەست دەكرێت بە قۆناغی دووەم.

ژمارەی كوژراوانی هێرشەكەی روسیا بۆ سەر كیێڤ بۆ 26 كەس بەرزبوویەوە، كە سییانیان منداڵن.

وەزارەتی ناوخۆی ئۆكراین، رایگەیاند، ژمارەی كوژراوانی هێرشەكەی بەرەبەیانی ڕۆژی پێنجشەممەی رابردووی روسیا بۆ سەر كیێڤ گەیشتە 26 كەس كە سێ منداڵیان تیدایە، هەروەها و 156 كەسیش بریندارن.

لەدوای ئەو رووداوەش، ڤۆلۆدیمیر زێلێنسكی سەرۆكی ئۆكراین ئەو هێرشەی روسیای  شەرمەزار كرد و داوای گۆڕینی سیستەمی سیاسی لە روسیا كرد.

هەروەها دۆناڵد ترەمپ، سەرۆكی ئەمەریكا، هێرشەكانی بە نامرۆڤانە وەسفكرد و نیازی خۆشی بۆ سەپاندنی سزای نوێ بەسەر روسیادا پشتڕاستكردەوە.

هاوكات، واشنتۆن رایگەیاند، كە ترەمپ بە روونی بە روسیای راگەیاندوە دەبێت پێش 8ی ئاب كۆتایی بە شەڕی ئۆكراین بهێنرێت.

ماوەی نزیكەی سێ ساڵە شەڕ لە نێوان ئۆكراین و روسیا دەسیپێكردوە ئاسۆی كۆتاپێهێنانی رونیەوە، كە بەهۆیەوە تا ئێستا زیاتر لە 13 هەزار ئۆكرانی كوژراون.

نووسینگەی بنیامین ناتانیاهۆ، سەرۆک وەزیرانی ئیسرائیل، رۆژی پێنجشەممە رایگەیاند، نووسینگەی ئاسایشی نیشتمانیی وڵاتەکەی هۆشدارییەکانی بۆ گەشتکردنی ئەو ئیسرائیلیانەی کە لە ئیماراتن، توندتر کردووەتەوە.

نووسینگەی ئاسایشی نیشتمانیی ئیسرائیل ئاماژەی بەوە کردووە: "رێکخراوە تیرۆریستییەکان لەم رۆژانەدا بە چڕییەکی زیاترەوە کاردەکەن بۆ زیانگەیاندن بە ئیسرائیل."

ئەم هەنگاوە هاوکاتە لەگەڵ زیادبوونی هەستی توڕەیی و دژایەتیکردنی ئیسرائیلییەکان لە ناوچەکەدا، بەهۆی جەنگی بەردەوامی ئیسرائیل لەسەر کەرتی غەززە، کە بووەتە هۆی شەپۆلێک لە رەخنەی جەماوەری و رەسمی دژی سیاسەتەکانی تەلئەبیب، تەنانەت لەو وڵاتانەشدا کە رێککەوتنی ئاساییکردنەوەیان لەگەڵدا واژۆ کردووە، وەک ئیمارات.

لەلایەکی دیکەوە، راپۆرتە رۆژنامەوانییەکان لەم دواییانەدا ئاماژەیان بەوە کردبوو کە یوسی شێلی، باڵیۆزی تەلئەبیب لە ئەبوزەبی، بەهۆی تێوەگلانی لە رەفتارێک کە بە "ناشایستە" وەسف کرابوو لە دوبەی، مشتومڕێکی زۆری ناوەتەوە و بووەتە هۆی توڕەیی لە ناوەندە فەرمییەکانی ئیماراتدا.

رێبوار تەها، پارێزگاری کەرکوک، رایگەیاند کە بۆ ئەم مانگە نرخی ئەمپێری کارەبای مۆلیدە ئەهلییەکان لە کەرکوک لە نێوان 4500 بۆ 5500 دینار دەبێت، کە بە وتەی خۆی، نزمترین نرخە لەسەر ئاستی سەرجەم پارێزگاکانی عیراق و هەرێمی کوردستان.

پارێزگاری کەرکوک لە پەیامێکدا ئاماژەی بەوەکردووە: "بۆ ئەم مانگەش بەڵێنەکەمان بردەسەر و نرخی ئەمپێری مۆلیدەی ئەهلی لە کەرکوک لە نێوان 4500 - 5500 دینارە."

رێبوار تەها جەختی لەوەشکردووەتەوە، کە لەم مانگەدا کە بە گەرمترین مانگی ساڵ دادەنرێت، لە ساڵانی رابردوودا پێدانی کارەبا کەمبووە و نرخی ئەمپێر بەرزبووە، بەڵام ئەمساڵ دۆخەکە لە کەرکوک جیاوازە.

روونیکردەوە، بە بەراورد بە ساڵانی رابردوو، پێدانی کارەبای نیشتمانی زیاتر بووە و نرخی مۆلیدەش کەمترە، ئەمەش وەک جێبەجێکردنی ئەو بەڵێنەیە کە بە هاوڵاتیانی کەرکوکیان دابوو.

پەری نوری، راوێژکاری سەرۆکایەتیی کۆمار، لە میانی بەشداریکردنی لە گەشتی هەواڵەکانی کاتژمێر هەشتی کوردسات نیوزدا، وردەکاریی دەستگیرکردنی تاوانبارێکی ئەنفالی بە ناوی "عەجاج ئەحمەد حەردان" ئاشکراکرد و رایگەیاند، دەستگیرکردنەکە دوای هەوڵێکی زۆر و کاری هەشت مانگە هاتووە.

پەری نوری راوێژکاری سەرۆکایەتیی کۆمار وتی: "بە هەوڵی خانمی یەکەمی عیراق و نووسینگەی سەرۆک کۆمار، توانیمان لە رێگەی سەرچاوەکانی خۆمانەوە شوێنی تاوانبار 'عەجاج ئەحمەد حەردان' دەستنیشان بکەین." هەروەها ئاشکرایکرد، "پرۆسەی دەستگیرکردنەکە بە هاوکاریی دەزگای ئاسایشی نیشتمانیی عیراق ئەنجامدراوە."

پەری نوری ئاماژەی بەوەشکرد، تاوانبارەکە بۆ ئەوەی خۆی بشارێتەوە و نەناسرێتەوە، "جوانکاری بۆخۆی کردووە، ئێستا پیر بووە و سەری سپی بووە." وتیشی: "لە کاتی لێکۆڵینەوەدا، ناوبراو نکۆڵی لەوە دەکات کە خۆی بێت و دان بەو تاوانانەدا نانێت کە ئەنجامی داون."

بەپێی زانیارییەکان، "عەجاج ئەحمەد حەردان" یەکێک بووە لە سەرپەرشتیارە دڕندەکانی زیندانی نوگرە سەلمان لە پارێزگای سەماوە، کە تێیدا هەزاران هاوڵاتیی کورد لە کارەساتی ئەنفالدا زیندانیکراون و رووبەڕووی ئەشکەنجە و مەرگ بوونەتەوە.

لە چوارچێوەی ئەمەشدا، نووسینگەی خانمی یەکەمی عیراق لە راگەیەندراوێکدا داوای لە سەرجەم زیندانیان و کەسوکاری قوربانیان و بێسەروشوێنبووانی دەستی ئەو تاوانبارە کردووە، پەیوەندییان پێوە بکەن بۆ تۆمارکردنی سکاڵای یاسایی، تا بە سزای عادیلانەی خۆی بگات.

بزووتنەوەی حەماس و ژمارەیەک لە لایەنە فەڵەستینییەکانی دیکە، رۆژی پێنجشەممە جەختیان کردەوە کە رێگای چارەسەر بە راگرتنی جەنگ دەست پێدەکات، ئاماژەیان بەوەشکردووە کە ئامادەن پرسی دیلەکان لە چوارچێوەی رێککەوتنێکی ئاگربەستدا چارەسەر بکەن.

لە راگەیەندراوێکی هاوبەشدا هاتووە: "لایەنە فەڵەستینییەکان بە گرنگییەوە چاودێریی رەوتی کۆنفرانسی نێودەوڵەتیی نەتەوە یەکگرتووەکانیان کردووە کە لەم دواییانەدا لە نیویۆرک کۆتایی هات، کە لە قۆناغێکی مەترسیدار و هەستیاری مێژووی فەلەستیندا بەڕێوەدەچێت."

لایەنە فەڵەستینییەکان رایانگەیاندووە کە رێگای چارەسەری سەرەتا بە راگرتنی جەنگ و ئەوەی بە "کۆمەڵکوژی و سیاسەتی برسیکردنی سیستماتیک" ناویان بردووە، دەست پێدەکات.

هەروەها ئامادەیی خۆشیان دەربڕیوە بۆ "چارەسەرکردنی پرسی دیلەکان لە چوارچێوەی رێککەوتنێکی ئاگربەست، کشانەوەی تەواوەتی سوپای ئیسرائیل لە کەرتی غەززە، کردنەوەی دەروازەکان و دەستپێکردنی دەستبەجێی ئاوەدانکردنەوە."

لایەنەکان داوای "رۆشتن بەرەو پرۆسەیەکی سیاسیی جددی، بە چاودێری نێودەوڵەتی و عەرەبی" دەکەن، کە ببێتە هۆی کۆتاییهێنان بە هێرشەکانی ئیسرائیل"

جێگای ئاماژەیە، "راگەیەندراوی نیویۆرک" کە رۆژی چوارشەممە دەرچوو، جەختی لەسەر پێویستیی کۆتاییهێنان بە دەسەڵاتی بزووتنەوەی "حەماس" و رادەستکردنی چەکەکانی بە دەسەڵاتی فەڵەستین کردبووەوە، ئەمەش بە پشتیوانی و بەشداریی نێودەوڵەتی، لەپێناو ئامانجی دامەزراندنی دەوڵەتێکی فەڵەستینیی سەربەخۆ.

یائیر ناتانیاهۆ، کوڕی بنیامین ناتانیاهۆ، سەرۆک وەزیرانی ئیسرائیل، لە ئێکس لە هەژماری رەسمی خۆی، پرسیارێکی راستەوخۆ ئاڕاستەی وڵاتانی رۆژئاوا دەکات و رەخنە لە داننەنان بە مافەکانی گەلی کورد دەگرێت.

یائیر لە ئێکس نووسیویەتی: "کورد گەورەترین نەتەوەی بێ دەوڵەتە لە جیهاندا، کە ژمارەیان نزیکەی 45 ملیۆن کەسە."

ناوبراو لە بەشێکی تری پۆستەکەیدا ئاماژەی بەوە کردووە: "ئەوان هاوپەیمانی رۆژئاوان. خاکەکەیان لەلایەن تورکیا، ئێران، عیراق و سوریاوە دابەش و داگیرکراوە."

لە کۆتاییدا کوڕەکەی ناتانیاهۆ بە شێوەیەکی راستەوخۆ پرسیار دەکات و دەڵێت: "بۆچی فەرەنسا، ئیسپانیا، ئێرلەندا، بەریتانیا، نەرویج، پورتوگال، کەنەدا، ئەڵمانیا، ماڵتا و سلۆڤینیا دان بە کوردستاندا نانێن؟"

ئەم ئێکسەی کوڕەکەی ناتانیاهۆ کاردانەوەی بەرفراوانی لە تۆڕە کۆمەڵایەتییەکاندا لێکەوتووەتەوە و وەک پشتگیرییەکی ئاشکرا بۆ دۆزی رەوای گەلی کوردستان لێکدەدرێتەوە.

نێردەی ئەمریکا لە نەتەوە یەکگرتووەکان رایگەیاند، دۆناڵد ترەمپ، سەرۆکی ئەمریکا، دەیەوێت تا هەشتی ئابی داهاتوو رێککەوتنێک لەسەر قەیرانی ئۆکرانیا ئەنجام بدرێت.

جۆن کێلی، جێگری کاروباری ئەمریکا لە نەتەوە یەکگرتووەکان، ئەمڕۆ پێنجشەممە، لە کۆبوونەوەی ئەنجومەنی ئاسایشی نێودەوڵەتی سەبارەت بە ئۆکرانیا وتی: "پێویستە روسیا و ئۆکرین لەسەر ئاگربەست و بەدیهێنانی ئاشتییەکی هەمیشەیی رێکبکەون. کاتی ئەوە هاتووە رێککەوتنێک بکرێت."

ناوبراو ئاماژەی بەوەشکرد: "ترەمپ بە روونی وتوویەتی کە دەبێت ئەمە تا هەشتی ئاب ئەنجام بدرێت."

کێلی وتیشی: "ویلایەتە یەکگرتووەکان ئامادەیە رێوشوێنی زیاتر بگرێتەبەر بۆ دڵنیابوون لە ئاشتی."

پێشتر سەرۆکی ئەمریکا رایگەیاندبوو کە مۆڵەتی 50 رۆژ دەداتە روسیا و ئۆکراین بۆ گەیشتن بە رێککەوتن، دوای ئەوە بەنیازە باجی بازرگانی بە ڕێژەی %100 بەسەر مۆسکۆ و هاوبەشە بازرگانییەکانیدا بسەپێنێت.

دواتر ترەمپ نائومێدی خۆی لە rوسیا و لە پێشکەوتنەکانی پرۆسەی چارەسەری دەربڕی، بۆیە مۆڵەتەکەی بۆ 10 بۆ 12 رۆژ کەمکردەوە. لەگەڵ ئەوەشدا، سەرۆکی ئەمریکا دانی بەوەدانا کە دڵنیا نییە لە کاریگەریی ئەو سزایانە.