تیلیگرام پاکتاوکردنی دەستپێکردوە و بەگوێرەی داتاکانی پلاتفۆڕمەکە تەنها لەیەک رۆژدا زیاتر لە 500 هەزار گروپ و کەناڵی بلۆککردوە، کە لە ماوەی حەوت مانگی رابردودا وێنەی نەبوە و بەرزترین رێژەی بلۆککردنە.

بەگوێرەی داتاکانی تیلیگرام، تەنها رۆژی پێنجشەممە 519 هەزار و 645 گروپ و کەناڵی بلۆککردوە، کە ژمارەیەکی زۆریان  هۆکارەکەی پەیوەندیدار بووە بە تیرۆرەوە.

ئامارەکانی تیلیگرام، ئاماژەبەوەشدەکەن،  له‌ سه‌ره‌تای  ئەمساڵەوە  نزیکەی 35 ملیۆن کەناڵ و  گرووپ لە بەرنامەکەدا سڕاونەتەوە، کە زیاتر لە 200 هەزاریان راستەوخۆ پەیوەندیدار بوەوە بە بابەتی تیرۆرەوە.

پلاتفۆڕمەکە، ئەوەشیخستوەتەڕوو، له‌ ساڵی 2015وە پرۆسه‌ی چاودێریكردنیان دەستپیکردوە و له‌  ساڵی 2024چاودێریکردنەکە لە رێگەی بەکارهێنانی زیرەکی دەستکردەوە بەرزکراوەتەوە.

تێلیگرام یەکێکە لە کەناڵەکانی پەیوەندیکردن و مێژوەکەی بۆ ساڵی 2013 دەگەڕێتەوە و لە ئێستادا یەکێکە لە باشترین بەرنامە بەکارهاتووەکان لە جیهاندا.

ترسی روبەڕوبونەوە لەگەڵ روسیا، ئەوروپای ناچار بە گەڕاندنەوە بۆ خزمەتی سەربازی کردوە؛ ئەڵمانیا رەشنووسێکی نوێی بۆ خزمەتکردنی سەربازی پەسەند کرد و گەنجانی رەگەز نێر لە تەمەنی 18 ساڵیەوە ئیجباردەکرێن  فۆڕم پڕکەنەوە و لە ساڵی 2027وە دەبێت پشکنینی پزیشکی ئەنجام بدەن بۆ وەرگرتن لە خزمەتی سەربازی، بەڵام بۆ ژنان جۆرێکی دیکەیە و ئارەزومەندانەیە.

 ئەگەری گەڕانەوە بۆ وەرگرتنی سەربازی زۆرە ملێش یەکێکە لە بژاردەکان و هەموو ئەمانەش دەگەڕیتەوە  بۆ نیگەرانییەکان سەبارەت بە مەترسییە ئەگەرییەکانی هێرشی روسیا بۆسەر ئەوروپا.

گەنجانی ئەڵمانی تا رادەیەکی زۆر دژی ئەوەن و حکومەت دەڵێت؛ ئەو بنیاتنانی سەربازی پێویستە بۆ رێگریکردن لە ململانێ،  ئەم هەنگاوەی ئەڵمانیا، ئامانج لێی بنیاتنانی بەهێزترین سوپای ئاسایی ئەوروپایە کە هێزی 255 بۆ 260 هەزار کەسی هەبێت.

ئەمەش لە کاتێکدایە پیشتر میدیاکانی ئەڵمانیا رایانگەیاندبوو؛ وەزارەتی بەرگری ئەڵمانیا پلانێک بە ناونیشانی"مۆدێرنکردنی خزمەتی سەربازی"، بە سەرۆکایەتی فریدریش مێرتز، راوێژکاری ئەڵمانیا  تاوتوێ دەکات، کە بە پلەی یەکەم  خۆی لە خزمەتکردنی ناچاری گەنجانی وڵاتەکەیدا دەبینێتەوە.

 دەزگای هەواڵگری ئەڵمانیاش کاتی هێرشی مۆسکۆی بۆ سەر وڵاتانی ئەوروپا دیاریکردبوە، ئەوەی خستبوەڕوو، ساڵی 2029 روسیا هێرش دەکاتە سەر وڵاتانی ئەوروپا و دەبێت ئامادەکاری بکرێت بۆ ئەو هێرشە.

داهاتی ئەم هەفتەی سلێمانی و هەڵەبجە و ئیدارە سەربەخۆكان بڵاوكرایەوە، بەپێی ماڵپەڕی شەفافیەت بڕی داهاتەكە زیاتر لە دوو ملیار و 653 ملیۆن دینارە.

ماڵپەڕی شەفافیەت بۆ چاودێری و رێكخستنی داهات بڵاویكردەوە، بە پێی ماڵپەڕەكە داهاتی ئەم هەفتەی سلێمانی و هەڵەبجە و ئیدارەی سەربەخۆی راپەڕین و گەرمیان لە 8/11/2025 تا 14/11/2025، بڕی دوو ملیار دینار و 653 ملیۆن و 975 دینارە، كە 100%ی داهاتەكەش بەشێوەی نەختینەیە.

ئەوەش بە بەراوورد بە هەفتەی رابردوو داهات حەوت ملیار دینار بەرێژەی 74% كەمیكردووە.

تونجەر باکرهان، هاوسەرۆکی گشتیی دەم پارتی لە "دیداری هاوسەرۆکانی شارەوانییەکان و هاوسەرۆکانی ئەنجومەنی گشتیی پارێزگاکان" لە ناوەندی کۆنگرەی چاندا ئامەد رایگەیاند، "ئەگەر لە تورکیا باس لە پرۆسەیەک و دیموکراسییەک بکرێت، پێویستە هەنگاوی وا بنرێت کە قەییومەکان لەناو ببات و هاوسەرۆکی شارەوانییەکانمان بگەڕێنەوە سەر کارەکانیان."

لە وتاری کردنەوەی کۆبوونەوەکەدا، تونجەر باکرهان جەختیکردەوە کە دەبێت هەموو زیندانییە سیاسییەکان ئازاد بکرێن و ئاماژەی بە رەتکردنەوەی داوای ئازادکردنی مەرجداری سەلچوک مزراکلی، هاوسەرۆکی پێشووی شارەوانیی گەورەی ئامەد کرد.

باکرهان وتی: "پاساوەکەیان ئەوەیە کە 'لە رێکخستن دانەبڕاوە'. بەڵێ، ئەو ئەندامی رێکخستنە، ئەندامی یەکێتیی پزیشکانی تورکیا و ئەندامی پارتەکەمانە. هیچ ئەندامێتییەکی دیکەی نەبووە. ئەم بڕیارە تۆڵەسێنەرەوانە هیچ سوودێکی نییە و دەبێت وازی لێبهێنرێت. ئەم وڵاتە بە زیندانیکردنی ئیرادەی گەلەکەی هیچ شتێکی بەدەست نەهێناوە."

باکرهان ئاماژەی بەوەکرد، لە هەر پرۆسەیەکی نوێی ئاشتیدا، ئەرک و بەرپرسیارێتیی گەورە دەکەوێتە ئەستۆی شارەوانییەکان و وتی:
"پرۆسەی ئاشتی بە واتای شارەوانیی چالاک دێت. بە واتای فراوانبوونی بواری کاری ئێوە دێت. ئاشتی واتە لەبری هەڵبژێردراوان، فەرمانبەرانی دەوڵەت دانەنرێن. ئاشتی واتە بانکی پارێزگاکان بە شێوەیەکی یەکسان مامەڵە لەگەڵ هەموو شارەوانییەکاندا بکات، نەک پڕۆژەی هەندێکیان بلۆک بکات و یارمەتیی هەندێکی دیکە بدات."

وتیشی: "جێبەجێکارە سەرەکییەکانی پرۆسەکە، هاوڕێیانی هاوسەرۆکی شارەوانییەکانن. داواکاریی سەرەکیمان ئەوەیە کە چیتر بەڕێوەبەرە خۆجێیەکان دەستگیر نەکرێن. شارەوانییەکانمان دەبێت ببنە ناوەندی چارەسەرکردنی کێشەکانی خەڵک."

بانگەواز بۆ بانکی پارێزگاکان

هاوسەرۆکی دەم پارتی رەخنەی توندی لە بانکی پارێزگاکان (İller Bankası) گرت و رایگەیاند کە سیاسەتێکی جیاکارانە بەرامبەر شارەوانییەکانیان پەیڕەو دەکات.
"ئەم دەسەڵاتە هەوڵێکی تایبەت دەدات بۆ شکستپێهێنانی شارەوانییەکانمان. ئەو قەرزانەی قەییومەکان بەفیڕۆیان داوە، کاتێک ئێمە شارەوانییەکان وەردەگرینەوە، بیر دەسەڵاتیان دەکەوێتەوە و دەیانەوێت لە ئێمەی وەربگرن. بانکی پارێزگاکان نابێت بە عەقڵییەتێکی جیاکارانە بجوڵێتەوە."

باکرهان بە توندی رەخنەی لە نزیکایەتیی "سەرچاوەی بێسنوور بۆ دزی، بەڵام هیچ سەرچاوەیەک بۆ خزمەت" گرت و رایگەیاند، "کاتێک ئەم وڵاتە دیموکراتی بێت، داوا لەسەر ئەو کەسانە تۆمار دەکەین کە سەرچاوەی بێسنووریان بۆ دزی دابین کردووە."

کێشەی کورد چییە؟

لە کۆتایی قسەکانیدا، باکرهان پرسیاری "کێشەی کورد چییە؟"ی کرد و وتی: "کێشەی کورد بانکی پارێزگاکان و نزیکایەتییەکەیەتی. کێشەی کورد ئەو شارەوانیانەن کە پڕۆژەکانیان رادەگیرێن چونکە هی دەم پارتین. ئەم نزیکایەتیانە باوەڕی ئێمە بە پرۆسەکە لاواز دەکات و برینی وا دروست دەکات کە چارەسەر ناکرێن."

لەیادی 241 ساڵەی دامەزراندنی شاری سلێمانیدا، دکتۆر لەتیف رەشید، سەرۆک کۆماری عیراق، پەیامێکی پیرۆزبایی بڵاوکردەوە و رایگەیاند، سلێمانی بەدرێژایی مێژوو سیمبولی خەبات و تێکۆشان بووە و شایستەی ئەوەیە لە خێر و سامانی نیشتماندا بایەخی زیاتری پێبدرێت.

سەرۆک کۆمار لە پەیامەکەیدا ئاماژەی بەوەکردووە، "ئەمساڵ سلێمانی یادی 241 ساڵەی بونیادنانی دەکاتەوە، کە لەسەردەستی بابانەکان و لەلایەن ئیبراهیم پاشای بابان لە ساڵی 1784 دامەزرا و لە سەرەتای دروستبوونیەوە تا ئەمرۆ پێشەنگ بووە لە کاروانی پێشکەوتنی شارە گەورە و گرنگەکانی عیراق و تەنانەت ناوچەکەشدا."

راشیگەیاندووە، سلێمانی بووەتە نمونەیەک لە جوانییەکانی هەرێمی کوردستان و عیراق و بەدرێژایی مێژوو سیمبولی خەبات و تێکۆشان و خزمەت بە نیشتمان بووە.

لە بەشێکی دیکەی پەیامەکەیدا، سەرۆک کۆمار دەڵێت: "سلێمانی پێشەنگ بووە لە بەرەنگاربوونەوەی زوڵم و زۆرداریی رژێمە ستەمکارەکانی عیراق و هەمیشە دەیویست ئازاد و سەربەست بژی."

هەروەها ئاماژەی بەوەکردووە، لەپێناو بەدەستهێنانی مافی رەوای گەلی کورد و بەهێزکردنی دۆستایەتی لەگەڵ گەلی عەرەب و پێکهاتەکانی دیکە، سەرکردەکانی کورد وەک شێخ مەحمودی حەفید خەباتیان کردووە.

دکتۆر لەتیف رەشید جەختیکردووەتەوە، "ئەم شارە زیندووەی نیشتمان لە بونیادنانی عیراقێکی دیموکراتی ئازادی فیدراڵدا رۆڵێکی بەهێزی گێڕا، هەربۆیە شایستەی ئەوەیە لە خێر و خۆشی و سامانی نیشتماندا بایەخی زیاتری پێبدرێت و کاربکرێت بۆئەوەی جوانتر بێت."

لە کۆتاییدا رایگەیاندووە، "ئێمە لە سەرۆکایەتیی کۆمار هەمیشە هەوڵمانداوە بۆ خزمەتکردنی هەموو پارێزگا و شارەکانی نیشتمان، دەمانەوێت خزمەتگوزاری و گەشەپێدان و پێشکەوتنی شارەکانی وڵات لە باشترین ئاستدا بێت."

لەیادی ٢٤١ ساڵەی دامەزراندنی شاری سلێمانیدا، قوباد تاڵەبانی پەیامێکی بڵاوکردەوە و رایگەیاند، سلێمانی وەک هەمیشە مەڵبەندی داهێنان و بیری ئازاد دەبێت.

دەقی پەیامەکەی قوباد تاڵەبانی:

لە یادی ٢٤١ ساڵەی بونیادنانی شاری شاران، جارێکی دیکە خۆشەویستیی قوڵی خۆمان بۆ سلێمانی و دانیشتووانە ئازا و سەربەرزەکەی دووپات دەکەینەوە و شانازی بە ئێستا و بە مێژووە درەوشاوەکەی دەکەین.

سلێمانی نەک هەر بۆ خەڵکی شارەکە، بەڵکو بەهۆی ئەو رۆڵە پێشەنگەی کە بە درێژایی مێژووەکەی بینیوویەتی لای هەموو کوردێک شارێکی خۆشەویستە. بە دڵنیاییەوە لەمەودواش هەر پێشەنگ دەبێت و ساڵ لە دوای ساڵ ئاوەدانتر و گەشەسەندووتر دەبێت و وەک هەمیشە مەڵبەندی داهێنان و رۆشنبیری و بیری ئازاد دەبێت.

وەزارەتی دەرەوەی ئەمریكا رایگەیاند، چوار رێكخراو و دەزگای چالاكیان لە سێ وڵاتی ئەوروپا خستووەتە لیستی تیرۆرەوە، كە چالاكی تیرۆرستییان لە ئەمریكا و وڵاتانی ئەوروپا ئەنجامداوە.

وەزارەتی دەرەوەی ئەمریكا لە راگەیەنراوێكدا بڵاویكردەوە، چوار رێكخراوی سەر بە ئەنتیفایان لە ئەڵمانیا و ئیتاڵیا و یۆنان خستووەتە لیستی تیرۆرەوە، كە چوار رێكخراوی دژە فاشیزمی توندڕەون و تێوەگلاون لە ئەنجامدانی چەند چالاكییەكی تیرۆرستی لە ناو ئەمریكا و وڵاتانی ئەوروپا.

ئاماژە بەوەشكراوە، ئەو رێكخراوانە چەند گروپێكی توندڕەون و پۆلێنكردنیان لەناو لیستی تیرۆردا لە چوارچێوەی هەوڵەكانی ئەمریكادا دێت بۆ رووبەڕووبوونەوەی مەترسیی زیادبوونی توندوتیژی چەپە توندڕەوەكان.

وەزارەتەكە ئەوەشی خستووەتە روو، ئەو گروپانە بەرپرسیارن لە ئەنجامدانی چەند چالاكییەكی توندڕەویی و تەقینەوە و ئامانجیان تێكدانی سەقامگیری و بناغەی شارستانییەتی رۆژئاوایە و بەشیكیان بەرپرسیارێتی خۆیان لە چەندین هێرش راگەیاندووە.

ئاژانسی نەتەوە یەكگرتووەكان بۆ كاروباری ئاوارە و پەنابەران رایگەیاند، ئەگەر هاوكاریی داراییان پێشكەش نەكرێت، ئەوا لە مانگی داهاتووەوە نزیكەی 75 هەزار كەس لە غەززە لە خزمەتگوزارییە سەرەتاییەكان بێبەش دەبن.

ئاژانسی نەتەوە یەكگرتووەكان بۆ كاروباری ئاوارە و پەنابەران 'ئۆنروا' رایگەیاند، بەهۆی بڕینی بەشە بودجەی رێكخراوەكە لەلایەن ئەمریكاوە رووبەڕووی قەیرانی دارایی بوونەتەوە و ئەگەر وڵاتانی بەخشەر هاوكاریی دارایی زیاتریان پێشكەش نەكەن، ئەوا لە مانگی داهاتووەوە، نزیكەی 75 هەزار كەسی دانیشتووی كەمپەكانی غەززە لە خزمەتگوزارییە سەرەتاییەكان بێبەش دەبن و ناتوانن موچەی كارمەندەكانیشیان بدەن.

ئۆنروا ئاماژەی بەوەشكردووە، پێویستیان بە دەستپێكردنی هەڵمەتێكی كوتانی منداڵانە و ئەگەر قەیرانی دارایی بەمجۆرە بەردەوام بێت، ئەوا ناتوانن خزمەتگوزارییەكانیان بەم جۆر و كوالێتییەی ئێستا پێشكەش بكەن.

مامۆستا شەماڵ جەمال رەشید، برای دکتۆر لەتیف رەشید، سەرۆک کۆماری عیراق، رۆژی چوارشەممە، 12ی 11ی 2025، لە وڵاتی سوید کۆچی دواییکرد.

بڕیارە ئەمڕۆ هەینی، 14ی 11ی 2025، یەکەم رۆژی پرسەکەی لە شاری سلێمانی بەڕێوەبچێت و دواتر لە بەغداش پرسەی بۆ دابنرێت.

بەرنامە و کاتی پرسەکەی لە سلێمانی و بەغداد:

لە شاری سلێمانی:

• ئەمڕۆ هەینی 14ی 11ی 2025: لە مزگەوتی شێخ فەرید، لە سەعات 1:00ی پاشنیوەڕۆ تا 5:00ی ئێوارە.

• رۆژانی شەممە و یەکشەممە 15و 16ی مانگ: لە هۆڵی نیعمەت خان لە گەڕەکی ئیبراهیم ئەحمەد (قرگە)، لە سەعات ١٠:٣٠ی بەیانی تا 6:00ی ئێوارە.

لە شاری بەغدا:

• رۆژی چوارشەممە 19ی 11ی 2025: لە هۆڵی "البرار" لە ئەلجادریە، لە سەعات 2:00ی پاشنیوەڕۆ تا 5:00ی ئێوارە (تەنها بۆ یەک رۆژ).

لەیادی 241 ساڵەی دامەزراندنی شاری سلێمانیدا، بافڵ جەلال تاڵەبانی، سەرۆکی یەکێتیی نیشتمانیی کوردستان، پەیامێکی پیرۆزبایی ئاراستەی خەڵکی شارەکە کرد و رایگەیاند، خزمەتکردنی سلێمانی بە کاری لەپێشینەیان دەمێنێتەوە.

دەقی پەیامەکە:

سڵاو سلێمانی، شاری ھەڵمەت و قوربانی، پایتەختی رۆشنبیری.

ئەمڕۆ بە دڵخۆشی و خۆشەویستیی زۆرمانەوە بۆ سلێمانی یادی 241 ساڵەی بونیادنانی شاری شاران دەکەینەوە.

ئەمڕۆ یادی شارێک دەکەینەوە کە بەدرێژایی مێژوو شانازیی نووسیوەتەوە و پێشەنگی قوربانیدان، بیری ئازاد، رۆشنبیری و نوێگەری بووە.

ئێمە بە شوێن باوک و باپیرانماندا هەنگاو دەنێین و بەردەوام لەگەڵ خەڵکی دڵسۆزی سلێمانی دەبین و وەفادارین بەرامبەریان.

وەک هەمیشە خزمەتکردنی سلێمانی بە کاری لەپێشینەمان دەمێنێتەوە و لەگەڵ خەڵکە خۆشەویستەکەمان پێکەوە هەنگاو بۆ داهاتوویەکی گەشتر دەنێین.

بافڵ جەلال تاڵەبانی
سەرۆکی یەکێتیی نیشتمانیی کوردستان

شەوی رابردوو روسیا هێرشێکی بەرفراوانی بە موشەک و درۆن کردە سەر کیێڤی پایتەختی ئۆکراین، کە بەهۆیەوە لانیکەم کەسێک کوژرا و دەیانی دیکە برینداربوون و زیانێکی زۆر بەر باڵەخانە و ژێرخانی شارەکە کەوت. لە بەرامبەردا، وەزارەتی بەرگریی روسیا رایگەیاند، زیاتر لە 200 درۆنی ئۆکراینیان لە ئاسمانی چەندین ناوچەی وڵاتەکەیان خستووەتە خوارەوە.

هێرشێکی گەورە بۆ سەر پایتەختی ئۆکراین:

بەرەبەیانی ئەمڕۆ هەینی، چەندین تەقینەوەی گەورە کیێڤی پایتەختیان هەژاند و بەرپرسانی ئۆکراین رایانگەیاند، هێرشەکە "بێوێنە" بووە و "نزیکەی هەموو ناوچەکانی" شارەکەی کردووەتە ئامانج.

بەپێی ئامارە سەرەتاییەکان، لانیکەم کەسێک کوژراوە و 26ی دیکە برینداربوون کە دوو منداڵ و ژنێکی دووگیانیان تێدایە و رەوشی تەندروستیی ناجێگیرە. تیمەکانی فریاگوزاری زیاتر لە 40 هاووڵاتییان لە باڵەخانە روخاوەکان رزگارکردووە.

تیمور تکاچینکۆ، سەرۆکی ئیدارەی سەربازیی شارەکە رایگەیاند، "روسەکان باڵەخانەی نیشتەجێبوون بۆردومان دەکەن... چەندین باڵەخانەی بەرز لە سەرانسەری کیێڤ و لە نزیکەی هەموو ناوچەیەکدا زیانیان بەرکەوتووە."

ڤیتالی کلیچکۆ، سەرۆکی شارەوانیی کیێڤ، هێرشەکەی بە "هێرشێکی گەورە بۆ سەر پایتەخت" وەسفکرد و داوای لە دانیشتووان کرد لە پەناگەکاندا بمێننەوە. ئاماژەی بەوەشکرد، ئاگر لە چەندین باڵەخانەی نیشتەجێبوون، قوتابخانەیەک و نەخۆشخانەیەک کەوتووەتەوە و بەشێک لە تۆڕەکانی گەرمکردنەوەی شارەکە زیانیان بەرکەوتووە.

روسیا: زیاتر لە 200 درۆنمان خستووەتە خوارەوە

هاوکات، وەزارەتی بەرگریی روسیا لە راگەیەندراوێکدا رایگەیاند، "شەوی رابردوو، سیستمی بەرگریی ئاسمانی 216 فڕۆکەی بێفڕۆکەوانی ئۆکراینی تێکشکاندووە."

بەپێی راگەیەندراوەکە، 66 درۆن لە هەرێمی کراسنادار، 45 لە ساراتۆڤ، 19 لە نیمچەدورگەی قرم و دەیانی دیکەش لەسەر ناوچەکانی ڤۆڵگۆگراد، رۆستۆڤ، بێلگۆرۆد و ئاسمانی دەریای رەش خراونەتە خوارەوە.

گروپی "دێلۆ" کە کارپێکەری وێستگەیەکی کۆنتێنەرە لە بەندەری نۆڤۆرۆسیسکی روسیا، رایگەیاند، پاشماوەی درۆنێک کەوتووەتە خوارەوە و بووەتە هۆی ئاگرکەوتنەوە، بەڵام زیانی گیانی نەبووە.

زیانەکان لە هەرێمی کیێڤ:

لە هەرێمی کیێڤ (دەوروبەری پایتەخت)، میکۆلا کالاشنیک، پارێزگاری ناوچەکە رایگەیاند، بەهۆی هێرشەکانەوە 6 کەس برینداربوون کە منداڵێکیشیان تێدایە. هەروەها زیان بەر چەندین خانوو، کۆگا و دامەزراوەی پیشەسازی کەوتووە.

ئەم هێرشە چڕانەی روسیا لە کاتێکدایە کە بەرپرسانی ئۆکراین و رۆژئاوا پێشبینی دەکەن مۆسکۆ لەگەڵ هاتنی وەرزی زستاندا، هێرشەکانی بۆ سەر ژێرخانی وزەی ئۆکراین چڕتر بکاتەوە.

دەزگای پەخشی بەریتانی (بی بی سی) بە رەسمی داوای لێبوردنی لە دۆناڵد ترەمپ، سەرۆکی ئەمریکا کرد، بەهۆی دەستکارییەکی "چەواشەکارانە" لە وتارێکیدا، کە بووە هۆی دەستلەکارکێشانەوەی بەڕێوەبەری گشتی و بەرپرسی هەواڵی دەزگاکە. لەگەڵ ئەوەشدا، بی بی سی داواکارییەکەی ترەمپی بۆ قەرەبووکردنەوە بە بڕی یەک ملیار دۆلار رەتکردەوە.

کێشەکە دەگەڕێتەوە بۆ بەرنامەیەکی "پانۆراما" لە ساڵی 2024، کە تێیدا بەشێک لە وتارەکەی رۆژی 6ی کانونی دووەمی 2021ی ترەمپ بەجۆرێک دەستکاری کرابوو کە وا دەربکەوێت راستەوخۆ داوای توندوتیژی دەکات.

لە بەرنامەکەدا، قسەکانی ترەمپ بەم شێوەیە لکێندراون: "بەرەو کاپیتۆڵ بەڕێدەکەوین... لەوێ لەگەڵتان دەبم. و ئێمە دەجەنگین. وەک دۆزەخ دەجەنگین."
بەڵام لە راستییدا، ترەمپ سەرەتا وتوویەتی: "بەرەو کاپیتۆڵ بەڕێدەکەوین، و لەوێ هانی سیناتۆر و ئەندامانی کۆنگرێسی ئازامان دەدەین." پاشان دوای زیاتر لە 50 خولەکی دیکە دەڵێت: "و ئێمە دەجەنگین. وەک دۆزەخ دەجەنگین."

بی بی سی دانی بەوەدا ناوە کە "دەستکارییەکە بەبێ مەبەست وێنەیەکی هەڵەی دروستکردووە" و رایگەیاندووە کە جارێکی دیکە ئەو بەرنامەیە پەخش ناکاتەوە.

پارێزەرانی ترەمپ هەڕەشەیان کردووە ئەگەر دەزگاکە داوای لێبوردن نەکات، قەرەبووی نەکاتەوە و لە کارەکەی پەشیمان نەبێتەوە، ئەوا سکاڵای یاسایی تۆماردەکەن و داوای یەک ملیار دۆلار (759 ملیۆن پاوەند) قەرەبوو دەکەن.
ترەمپ لە لێدوانێکدا بۆ فۆکس نیوز رایگەیاند، وتارەکەی "شێوێندراوە" و شێوازی پێشکەشکردنەکەی "فێڵی" لە بینەران کردووە.

پاساوەکانی بی بی سی:

سەرەڕای داوای لێبوردنەکە، بی بی سی رەتیکردووەتەوە هیچ بنەمایەکی یاسایی بۆ داوای قەرەبووکردنەوەکە هەبێت و لە نامەیەکدا بۆ تیمی یاسایی ترەمپ، پێنج پاساوی سەرەکی خستووەتەڕوو:

1. بەرنامەکە لە کەناڵە ئەمریکییەکانی بی بی سی پەخش نەکراوە.

2. بەرنامەکە زیانی بە ترەمپ نەگەیاندووە، چونکە ماوەیەکی کەم دواتر هەڵبژێردرایەوە.

3. دەستکارییەکە بە مەبەستی چەواشەکاری نەبووە، بەڵکو تەنیا بۆ کورتکردنەوەی وتارێکی درێژ بووە.

4. کلیپەکە تەنیا 12 چرکە بووە لەنێو بەرنامەیەکی یەک سەعاتیدا کە چەندین دەنگی پشتیوانی ترەمپیشی تێدابووە.

5. قسەکردن لەسەر بابەتی سیاسی لە ئەمریکا بەپێی یاسا پارێزراوە.

هاوکات، رۆژنامەی "دەیلی تەلەگراف" ئاشکرایکردووە کە پێشتریش لە ساڵی 2022 و لە بەرنامەیەکی "نیوز نایت"دا، هەمان وتاری ترەمپ بە شێوازێکی هاوشێوە دەستکاری کراوە.
وتەبێژی تیمی یاسایی ترەمپ رایگەیاندووە، "ئێستا روونە کە بی بی سی بە شێوەیەکی سیستماتیک ناوبانگی سەرۆک ترەمپی زڕاندووە."

تارانی پایتەختی ئێران روبەڕووی خراپترین قەیرانی وشكەساڵی بووەتەوە، كەماوەی 60 ساڵە قەیرانی لەو شێوەیەی بەخۆوە نەبینیوە. 

پلانێك هەیە بۆ ئەوەی گەیاندنی ئاو بە دانیشتووانی تاران رابگیرێت یان زۆر كەم بكرێتەوە. 

لێپرسراوانی ناوخۆی وڵاتەكەش دەڵێن، باران بارین لە تاران گەیشتووەتە كەمترین ئاست لە ماوەی سەدەیەكدا، تەنانەت نیوەی پارێزگاكانی وڵاتەكە چەندین مانگە یەك دڵۆپ بارانیان نەبینیوە.

بەڕێوەبەری پەیمانگای كۆمەڵەی نەتەوە یەكگرتووەكان بۆ ئاو و ژینگە و تەندروستی دەڵێت، رەوشەكە زۆر مەترسیدارە، چونكە شەش ساڵە وڵاتەكە لە وشكەساڵیدایە. 

قەیرانەكە گەیشتووەتە ئەو ئاستە مەترسیدارەی مەسعود پزیشكیان سەرۆك كۆماری ئێران هۆشداری داوە لەوەی ئەگەر بەر لە كۆتایی ئەمساڵ باران نەبارێت، دەبێت تاران چۆڵ بكرێت. بەڵام ئەو شارەزایە دەڵێت، چۆڵكردنی ئەو شارە هەروا ئاسان نییە.

تاران پشت بە پێنج بەنداوی سەرەكی دەبەستێت لە نێویاندا بەنداوی ئەمیر كەبیر، رێژەی باران بارینیش لە شارەكە بە نزیكەی 40% دابەزیوە. 

دەستەی ئاو لە تاران رایگەیاندبوو، كۆگاكانی ئاو لە شارەكە گەیشتوونەتە كەمترین ئاست لە ماوەی نزیكەی سەدەیەكدا. 

بەڕێوەبەرایەتیی هاتوچۆی سلێمانی رایگەیاند، بەبۆنەی یادی دامەزراندنی شاری سلێمانییەوە، ئەمڕۆ  چەند چالاکییەکی هونەری لە ناوەندی شار بەڕێوەدەچن و شەقامێکی سەرەکیش دادەخرێت.

لە ئاگادارییەکدا، هاتوچۆی سلێمانی ئاماژەی بەوەکردووە، ئەمڕۆ هەینی 14ی 11ی 2025، لە بەردەم سەرا لە ناوەندی شاری سلێمانی، چەند چالاکییەکی هونەری بەڕێوەدەچن.

هاتوچۆی سلێمانی داوا لە شۆفێران دەکات، بۆ دروستنەبوونی قەرەباڵغی و ئاستەنگی هاتوچۆ، ئۆتۆمبێلەکانیان لە شوێنی گونجاو رابگرن و هاوکاریی تیمەکانیان بن.

رونیشیکردووەتەوە، تەنیا شەقامی پیرەمێرد لە بەردەکی سەرا دادەخرێت کە بە ئاراستەی بازاڕی ئۆرزدی دەڕوات.

نوسینگەی سەرۆک وەزیرانی ئیسرائیل رایگەیاند، ئێوارەی ئەمڕۆ پێنجشەممە، ئیسرائیل لە رێگەی لیژنەی نێودەوڵەتیی خاچی سوورەوە، تەرمی یەکێک لەو چوار بارمتەیەی وەرگرتۆتەوە کە لای بزوتنەوەی حەماس لە غەززە مابوونەوە.

لە راگەیەندراوەکەی نوسینگەی ناتانیاهۆدا هاتووە، ئەو تابوتەی لە کەرتی غەززە رادەستی سوپای ئیسرائیل و دەزگای شاباک کراوە، دەگوازرێتەوە بۆ پەیمانگای نیشتمانیی پزیشکیی دادوەری لە تەلئەبیب، بەمەبەستی دەستنیشانکردنی ناسنامەی روفاتەکە.

گەڕاندنەوەی تەرمەکان بەپێی ئەو بڕگانەیە کە لە رێککەوتنی ئاگربەستی غەززەدا هاتووە، کە لە 10ی تشرینی یەکەمەوە کاری پێدەکرێت.

لەوەتەی رێککەوتنەکە دەستیپێکردووە، تەرمی 24 بارمتە گەڕێندراونەتەوە بۆ ئیسرائیل و ئەگەر ناسنامەی ئەم روفاتە نوێیەش پشتڕاست بکرێتەوە، روفاتی سێ بارمتەی دیکە لە غەززە دەمێنێتەوە.