هەواڵەکان
بەبۆنەی یۆبیلی زێڕینی 50 ساڵەی كۆمەڵەی خوێندكارانی كوردستان، بافڵ جەلال تاڵەبانی پەیامێکی پیرۆزبایی بڵاوکردەوە و تێدا هاتووە؛ ئەمڕۆ یادی رۆژێکی مێژوویی و وەرچەرخانێکی گرنگ دەکەینەوە لە مێژووی بزووتنەوەی رزگاریخوازی گەلی کوردستان و جوڵانەوەی خوێندکاران و لاواندا.
ئاماژەی بەوەشکردوە، کۆمەڵەی خوێندکاران لە قۆناغێكی سەخت و خەباتی چەکداری لە شاخ دامەزرا، بە ئامانجی یەکخستنی دەنگی خوێندکاران و گۆڕینی وزەی گەنجان بۆ هێزێکی کاریگەر لەپێناو ئازادی و دیموکراسیدا.
سەرۆکی یەکێتی جەختیکردوەتەوە، کە باوەڕی بە وزە و توانای خوێندکاران هەیە و دەڵێت؛" دڵنیام داهاتوو بۆ ئێوەیە، هێنانەپێشەوەتان و پەروەردەکردنتان لەپێشینەی کارەکانماندا دەبێت"
دەقی پەیامەکەی سەرۆکی یەکێتی
خوێندکارانی ئازیز ...
مەشخەڵ هەڵگرانی رێگای پەروەردە و زانست و نیشتمانپەروەریی
ئەمڕۆ یادی رۆژێکی مێژوویی و وەرچەرخانێکی گرنگ دەکەینەوە لە مێژووی بزووتنەوەی رزگاریخوازی گەلی کوردستان و جوڵانەوەی خوێندکاران و لاواندا، ساڵیادی دامەزراندنی کۆمەڵەی خوێندکارانی کوردستان تەنها یادکردنەوەی رێکخراوێکی پیشەیی نییە، بەڵکو رێزگرتنە لەو ناوەندە گەورەیەی کە دەیان سەرکردە، رۆشنبیر و تێکۆشەری پێگەیاندووە و هەمیشە سەنگەری پێشەوەی بەرگری بووە لە مافە رەواکانی گەلەکەمان و خوێندکاران و گەنجانی خۆشەویست.
کۆمەڵەی خوێندکاران لە قۆناغێكی سەخت و خەباتی چەکداری لە شاخ دامەزرا، بە ئامانجی یەکخستنی دەنگی خوێندکاران و گۆڕینی وزەی گەنجان بۆ هێزێکی کاریگەر لەپێناو ئازادی و دیموکراسیدا. ئەوەبوو خوێندکاران تەنها لە هۆڵەکانی خوێندندا نەمانەوە، بەڵکو لە شاخ و شار، لە خەباتی نهێنی و رێکخستن و رێپێوان و ناڕەزایەتی و زیندان و لە راپەڕینەکاندا، سەلماندیان کە زانست و خەبات دوو چەمکی دانەبڕاون.
لەم رۆژەدا بە شانازییەوە سەری رێز و نەوازش بۆ هەموو ئەو سەرکردە و خوێندکارە شەهیدانە دادەنەوێنین کە قەڵەمیان گۆڕی بە چەک و خوێنی خۆیان بەخشی بۆ ئەوەی ئەمڕۆ ئێمە لە سایەی ئازادیدا درێژە بە خەباتی مەدەنی و دیموكراسی بدەین.
سوپاس بۆ ماندووبوونی هەموو ئەو دڵسۆز و تێكۆشەرانەی لە رابردوو و ئێستادا، کات و وزەی خۆیان بەخشی بۆ ئەوەی ئەم رێکخراوە پیشەییە وەک قەڵایەکی بەهێزی زانست و پەروەردە و پرۆسەی فێربوون و کوردایەتی بمێنێتەوە.
لەم قۆناغی نوێبوونەوە و کارکردنتاندا، داواتان لێدەکەم وەک هەمیشە دەنگی راستەقینەی خوێندکار بن بەبێ جیاوازی و رێگا بۆ نەوەکانی دوای خۆتان رووناكبکەنەوە و بە ئومێدەوە بەرەو داهاتوو هەنگاو بنێن.
لەم رۆژەدا، دڵنیاتان دەکەمەوە هەمیشە بە شانازییەوە لەگەڵ ئێوەی خوێندکار و گەنجان دەمێنمەوە و پشتیوانتان دەبم لەپێناو داهێنان و پێگەیاندنی لاوەکانمان و گەشەپێدانی پرۆسەی پەروەردە و خوێند لە وڵاتەکەماندا.
باوەڕم بە وزە و تواناتان هەیە، دڵنیام داهاتوو هەر بۆ ئێوەیە، یەکێتیی نیشتمانیی کوردستانیش لەبەرامبەرتاندا دەرگای کراوەیە، هێنانەپێشەوەتان و گۆشکردن و پەروەردەکردنتان لەپێشینەی کارەکانماندا دەبێت.
پیرۆزبێت یۆبیلی زێڕینی 50 ساڵەی كۆمەڵەی خوێندكارانی كوردستان، بەرەو ئایندەیەکی گەشتر بۆ خوێندکاران و نیشتمانەکەمان.
هەمیشە سەربەرز و سەرکەوتوو بن
بافڵ جەلال تاڵەبانی
سەرۆکی یەکێتیی نیشتمانیی کوردستان
عەباس عراقچی، وەزیری دەرەوەی ئێران، لە چوارچێوەی هەوڵە دیپلۆماسییەكانی بۆ كۆتاییهێنان بە شەڕ لە ناوچەكەدا، زنجیرەیەك پەیوەندی و سەردانی ئەنجامدا.
عراقچی لە پەیوەندییەكی تەلەفۆنیدا لەگەڵ هاكان فیدان، وەزیری دەرەوەی توركیا و بەدر عەبدولعاتی، وەزیری دەرەوەی میسر، دواین پەرەسەندنەكانی پەیوەست بە ئاگربەست و هەوڵە نێودەوڵەتییەكانی بۆ هێوركردنەوەی رەوشەكەی تاوتوێ كرد.
هاوكات، بڕیارە وەزیری دەرەوەی ئێران دوای كۆتاییهاتنی گەشتەكەی بۆ عومان و پێش سەردانی روسیا، جارێكی دیكە بگەڕێتەوە پاكستان.
ئاژانسی هەواڵی تەسنیم ئاماژەی بەوە كردووە، بەشێك لە وەفدی یاوەری عراقچی بۆ وەرگرتنی ڕێنمایی نوێ سەبارەت بە كۆتاییهێنان بە شەڕ گەڕاونەتەوە تاران و ئێوارەی یەكشەممە لە ئیسلام ئاباد پەیوەندی بە عراقچی دەكەنەوە.
دەشڵێت، ئەم جووڵە دیپلۆماسییانە نیشاندەری هەوڵە چڕەكانی تارانە بۆ گەیشتن بە ڕێككەوتنی كۆتایی لەبارەی ئاگربەست لە ناوچەكەدا.
دوێنێ عراقچی لە دوای گەڕانەوەی لە پاكستان وتی، هەڵوێستی ئێران و نەخشە رێگەی و كۆتاییهێنان بە جەنگ و ئاشتی هەمیشەییان خستووەتەڕوو، بەڵام دیارنییە ئایا ئەمریكا جدییە لەسەر گفتوگۆكان یاخودا نا.
راوێژكارێكی سودانی رایدەگەیەنێت، هەرچەندە وەرزی بارانبارینی ئەمساڵ ئاستی ئاوی بەنداوەكانی بەرزكردووەتەوە، بەڵام كێشەی كەمیی ئاو لە داهاتوودا چارەسەر ناكات.
تۆرهان موفتی، راوێژكاری سەرۆك وەزیرانی عیراق بۆ كاروباری ئاو جەختی كردەوە كە عیراق بەهۆی گۆڕانی كەشوهەوا و بەكارهێنانی نادروستی ئاوەوە، وڵاتەكە لە بەردەم مەترسییەكی گەورەدایە و پێویستە كولتووری دەستپێوەگرتن بە ئاو پەرەی پێبدرێت.
سەبارەت بە ڕێككەوتنی ئاویی نێوان بەغداد و ئەنقەرەش دەڵێت، بەهۆی ئەوەی حكومەت بووەتە كاربەڕێكەر، جێبەجێكردنی یاداشتی لێكتێگەیشتنەكەی تشرینی دووەمی ساڵی رابردوو دواكەوتووە بۆ دوای پێكهێنانی حكومەتی نوێ.
بەپێی ڕاپۆرتە نێودەوڵەتییەكان، عیراق یەكێكە لەو پێنج وڵاتەی جیهان كە زۆرترین زیانی بەركەوتووە و لە سێ دەیەی ڕابردوودا، بەجۆرێك 30%ی زەوییە كشتوكاڵییەكانی لەدەستداوە.
شارەزایان هۆشداری دەدەن كە عیراق تا ساڵی 2040 پێویستی بە 233 ملیار دۆلار هەیە بۆ چاككردنی ژێرخانی ئاویی و روبەڕووبوونەوەی وشكەساڵی.
وەزارەتی پێشمەرگەی هەرێم راگەیەندراوێکی بڵاوکردوەتەوە و تێیدا هاتووە، ئەمڕۆ دەست بە دابەشکردنی هاوکارییەکان داراییەکانی هاوپەیمانان بۆ مانغێ سێ دەکرێت.
وەزارەتی پێشمەرگە رایگەیاندوە، دوای ئەوەی هاوکاریی دارایی هاوپەیمانان بۆ مانگى سێ خرایە سەر هەژماری وەزارەتەکەیان ، لەلایەن بەڕێوەبەرایەتى گشتى بوودجە و بەرنامەکان (ژمێریارى سەربازى) رێکارە دارایی و ژمێریارییەکان ئەنجامدراون.
ئاماژە بەوەشکراوە، دوای تەواو کردنی رێکارە ئیدارییەکان، ئەمڕۆ یەکشەممە دەست بە دابەش کردنی دەکرێت.
بەرەبەیانی ئەمرۆ بەکاتی هەرێم، ئاهەنگی ئێوارەخوانی رۆژنامەنوسەکانی کۆشکی سپی گۆڕدرا بۆ مەیدانی تەقەکردن و دروستبوونی ئاڵۆزی و دڵەراوکێ، ئەمەش لە دوای ئەوەی کەسێک دەستی کرد بە تەقەکردن و هەر زوو هێزە ئەمنییەکان کۆنتڕۆڵی رەوشەکەیان کرد.
بەپێی راپۆرتە میدیاییەکان، ئەو کەسەی هێرشی کردە سەر ئێوارەخوانی کۆشکی سپی، کە دۆناڵد ترەمپ تێیدا ئامادە بوو، ناوی "کۆڵ تۆماس ئالن"ـە و تەمەنی 31 ساڵە.
لێکۆڵینەوە سەرەتاییەکان دەریانخستووە، کە تۆمەتبارەکە دانیشتوی ویلایەتی کالیفۆرنیایە و ئەندازیارێکی میکانیکی و گەشەپێدەری سەربەخۆی یارییە ئەلیکترۆنییەکانە، کە خاوەنی بڕوانامەی ماستەرە لە زانستی کۆمپیوتەر لە زانکۆی "Caltech" و پێشتر وەک مامۆستایەک لە کۆمپانیایەکی پەروەردەیی کاری کردووە.
پۆلیسی واشنتۆن ئاماژەی بەوە کردووە، کە ئالین بە چەکی (راو و دەمانچە و چەقۆوە) خاڵێکی پشکنینی خزمەتگوزاری نهێنی بەزاندووە و پێش دەستگیرکردنی، تەقەی لە ئەندامێکی تیمە ئەمنییەکان کردووە و لە سنگی داوە، بەڵام قەڵغانی پارێزەر ژیانی رزگار کردووە.
تا ئێستا پاڵنەرەکانی پشت هێرشەکە ناڕوونن و لێکۆڵینەوەکان بەردەوامن بۆ ئەوەی بزانرێت ئایا ئامانجی سەرەکی ترەمپ بووە یان ئامادەبووانی دیکەی ناو ئاهەنگەکە.
داواکاری گشتیی ئەمریکاش رایگەیاندوە، سبەینێ دووشەممە، کۆل ئالنی تەمەن 31 ساڵ دەبرێتە بەردەم دادگا و دادگایی دەکرێ، کەناڵی سی بی ئێسیش بڵاویکردوەتەوە، لە سەرەتایی لێکۆڵینەوەکاندا ئەو کەسەی تەقەی کردوە، دانیبـەوەداناوە مەبەست لە هێرشەکەی لێپرسراوانی ئەمریکا بووە.
دۆناڵد ترەمپ، سەرۆکی ئەمریکا وردەکاری نوێی لەبارەی هێرشەکەی سەر ئێوارەخوانەکەی کۆشکی سپی ئاشکرا کرد و رایگەیاند، کە هێرشکارەکە لە مەودایەکی دورەوە لەلایەن هێزە ئەمنییەکانەوە پێکراوە و نەیتوانیوە بگاتە ناوچەی چالاکییەکە.
ترمپ ئاماژەی بەوە کرد، کە هێزەئەمنییەکان داواکارییەکی ئەویان بۆ بەردەوامبوون لە ئێوارەخوانەکە رەتکردووەتەوە و جەختی لەوەش کردەوە کە خێرایی وەڵامدانەوەی هێزە ئەمنییەکان لە بەرانبەر ئەو کەسەی تەقەی دەکرد، سەرسوڕهێنەر بوو.
سەرۆکی ئەمریکا بە میدیاکانی راگەیاند، ئـەم روداوە رێگری لە سەرکەوتنی ئەو ناکات لە جەنگی ئێراندا
ناوبراو وتیشی کە لەو بڕوایەدا بووە دەبوو زووتر خۆی بچەماندایەتەوە و دۆخی پاراستن وەربگرێت، هاوکات ئاماژەی بەوە کرد، کە بەپێی بەدواداچوونە ئەمنییەکان چەکدارەکە بە تەنیا ئەو کارەی ئەنجام داوە و هیچ پاڵپشتییەکی نەبووە.
لە کۆتاییدا، ترەمپ رەتیکردەوە، کە روداوەکە پەیوەندی بە ئێرانەوە هەبێت، بەڵام جەختی لە بەردەوامی لێکۆڵینەوەکان کردەوە و رایگەیاند، کە ئێوارەخوانی کۆشکی سپی لە ماوەی 30 رۆژی داهاتوودا دووبارە ئەنجام دەدرێتەوە.
سەرچاوە نزیکەکان لە حکومەتی سوریا ئاشکرایان کردووە، کە لە هەفتەی رابردوودا، دیمەشقی پایتەخت شایەدی کۆبوونەوەیەکی بێپێشینە بووە لە نێوان مەزڵوم عەبدی، فەرماندەی گشتیی هێزەکانی سوریای دیموکرات (هەسەدە) و نوح یەڵماز، باڵیۆزی تورکیا لە سوریا.
بە گوێرەی زانیارییەکان، لەم دیدارەدا هەردوولا پرسی پرۆسەی ئاشتییان تاوتوێ کردووە، کە ئەنقەرە لەگەڵ عەبدوڵڵا ئۆجەلان دەستی پێکردووە، لەگەڵ گفتوگۆکردن لەسەر کاریگەرییەکانی ئەم پرۆسەیە لەسەر کوردانی سوریا و پرسی چوونە دەرەوەی کادرە کۆنەکانی پەکەکە لە خاکی سوریا.
بەگوێرەی زانیارییە دزەپێکراوەکان، باڵیۆزی تورکیا ئاماژەی بە ئەگەری پێشوازیکردن لە مەزڵوم عەبدی لە ئەنقەرە داوە لە داهاتوویەکی نزیکدا، ئەمەش لە کاتێکدایە کە پێشتر لەلایەن تورکیاوە وەک کەسێکی داواکراو دەبینرا.
هەروەها جەخت لەسەر خێراکردنی پرۆسەی تێکەڵکردنی "هەسەدە" لەناو دامەزراوەکانی حکومەتی سوریادا کراوەتەوە وەک بەشێکی سەرەکی لە لێکتێگەیشتنەکانی قۆناغی گواستنەوە، ئەمە لە کاتیكدایە تا ئێستا هێزەکانی سوریای دیموکرات هیچ لێدوانێکی رەسمیان لەسەر ئەم هەواڵە نەداوە.
سوپای پاسدارانی ئێران لە راگەیەندراوێکی نوێدا هۆشداری توندی داوەتە ئەمریکا و ئیسرائیل و رایگەیاندوە، کە هەر جۆرە دەستدرێژییەک بۆ سەر خاکی ئێران، بە وەڵامێکی ستراتیژی و چاوەڕواننەکراو روبەڕوو دەبێتەوە.
وەک لە راگەیەندراوەکەدا هاتووە؛ سوپاسی پاسداران، بانگەشەی ئەوەدەکات کە هێزە چەکدارەکانی ئێران لەوپەڕی ئامادەیی ئۆپەراسیۆنی و بەرگریدان، بەجۆرێک کە تەنانەت پێشبینی هێرشی زەمینیشیان کردووە و کەمپیان بۆ دەستگیرکردنی سەربازەکانی ئەمریکا ئیسرائیل ئامادە کردوە.
سوپای پاسداران داوا لە ئەمریکییەکان دەکات، چیتر نەبنە یاری دەستی سەرۆک وەزیرانی ئیسرائیل و ئاماژە بەوە دەکەن کە بنکە سەربازییەکانی ئەمریکا لە ناوچەکەدا لەژێر هێرشەکاندا وێران بوون و توانای نۆژەنکردنەوەیان نەماوە؛ بۆیە تەنها بژاردەی بەردەمیان کشانەوەی بێ مەرج و خێرایە لە ناوچەکە.
سوپای پاسداران، لە راگەیەندراوەکەدا، جەختیکردوەتەوە، کە کۆنترۆڵکردنی گەروی هورمز ستراتیژییەکی جێگیری ئێرانە و بەردەوام دەبن لە رێگریکردن لە هاتوچۆی کەشتییە بازرگانییەکانی ئەمریکا، ئیسرائیل و هاوپەیمانەکانیان دەکرێت، لە کاتێکدا هاتوچۆ بۆ وڵاتانی تر بە ئاسانی بەردەوام دەبێت.
دۆناڵد ترەمپ، سەرۆکی ئەمریکا، سەبارەت بە پەیوەندییەکانی وڵاتەکەی لەگەڵ ئێران و وڵاتانی ناوچەکە رایگەیاند گەشتی "ویتکۆف و کوشنەر"ی بۆ ئیسلام ئاباد هەڵوەشاندووەتەوە، چونکە نایەوێت 15 بۆ 16 سەعات گەشت بکەن بۆ بینینی کەسانێک کە نایانناسن.
ترەمپ ئاماژەی بەوە کرد، کە ئێستا ئێرانییەکان لە ناوخۆیاندا لە ململانێدان لەسەر ئەوەی کێ سەرکردایەتی بکات، بەڵام جەختی کردەوە کە ئەو ئامادەیە لەگەڵ هەر کەسێک کە ببێتە دەسەڵاتداری ئێران مامەڵە بکات، بەو مەرجەی تاران تەلەفۆنی بۆ بکات و هەموو کارتەکانی فشارەکانیشی بە دەستەوەیە.
سەبارەت بە دۆسیەی ئەتۆمی و دانوستانەکان، ترەمپ رایگەیاند کە ئێران نابێت و ناتوانێت ببێتە خاوەنی چەکی ئەتۆمی و ئەمە هێڵی سووری ئەوانە.
ئاماژەی بەوەشکرد، کە ئێرانییەکان پێشنیازێکیان پێشکەش کردووە، کە دەکرا باشتر بێت، هەرچەندە زۆر شتیان پێشکەش کردووە، بەڵام هێشتا لای ئەو بەسی نەبووە.
سەرۆکی ئەمریکا جەختیکردەوە، کە هیچ پلانێکی بۆ پاشەکشە لە رێککەوتنیرڕاگرتنی چەن نییە و چاوەڕێی هەنگاوی جددیتر لە تاران دەکات.
لە یادی یۆبیڵی زێڕینی كۆمەڵەی خوێندكارانی كوردستاندا، مەکتەبی سیاسی یەکێتیی نیشتمانیی کوردستان پەیامێکی پیرۆزبایی ئاراستەی كۆمەڵەی خوێندكارانی كوردستان دەکات.
لە پەیامەکەدا، مەکتەبی سیاسی یەکێتی ئاماژەی بەوەکردوە، كۆمەڵەی خوێندكاران لە خەباتی پیشەیی ، دیموكراتی و نیشتیمانیدا هەمیشە پێشڕەو و كارا بوون بۆ خزمەتی خوێندكاران و پێگەیاندنی سەركردەی لێهاتوو لەناو بزووتنەوەی سیاسی كوردستاندا
دەقی پەیامەکەی مەکتەبی سیاسی یەکێتی
هەڤاڵانی تێکۆشەری كۆمەڵەی خوێندكارانی كوردستان
لە یادی یۆبیڵی زێڕینی كۆمەڵەی خوێندكارانی كوردستاندا، پیرۆزباییەكی گەرمتان ئاڕاستە دەكەین و هیوای سەركەوتنی بەردەوامتان بۆ دەخوازین
كۆمەڵەی خوێندكاران لە خەباتی پیشەیی ، دیموكراتی و نیشتیمانیدا هەمیشە پێشڕەو و كارا بوون بۆ خزمەتی خوێندكاران و پێگەیاندنی سەركردەی لێهاتوو لەناو بزووتنەوەی سیاسی كوردستاندا
لە قۆناغی نوێی كاركردنیشتاندا کە مەبەستتانە بە ستایڵی کاریگەری سەردەمانە خەباتی پیشەیی خوێندکاری پەرەپێبدەن و خزمەتی چۆنایەتی توێژی خوێندکاران بکەن بونەتە جێگەی هیوا و ئومێدی یەكێتیی نیشتمانیی كوردستان كە هەمیشە پاڵپشت و داكۆكیكەر بوە لە ڕۆڵی رێكخراوە پیشەییەكان.
دووبارە یۆبیڵی زێڕین ی كۆمەڵەی خوێندكاران پیرۆز بێت و هەمیشە لە نوێگەریدا بن
مەكتەبی سیاسی
یەکێتیی نیشتمانیی کوردستان
تەندروستی چەمچەماڵ رایگەیاند لە نەخۆشخانەی گشتی شەهید پێشڕەو، لە سێ مانگدا 492 نەشتەرگەری جۆراوجۆر ئەنجامدراوە و زیاتر لە 12 هەزار پشکنین ئەنجامدراوە.
بەڕێوەبەرایەتی تەندروستی چەمچەماڵ، لە راگەیاندنێکی رەسمیدا، ئاماری وردی سێ ماننگی نەخۆشخانەی گشتی شەهید پێشڕەوی بڵاوکردوەتەوە.
بەپێی ئامارەکە، لەماوەی سێ مانگی رابردودا، 492 نەشتەرگەری جۆراوجۆر لەلایەن تیمە پزیشکییەکانەوە ئەنجامدراون و 421 نەخۆشیش لە نەخۆشخانەکە خەوێنداون و دوای وەرگرتنی چارەسەری پێویست و چاکبونەوەیان، نەخۆشخانەیان بەجێهێشتووە.
تەندروستی چەمچەماڵ ئاماژەی بەوەشکردوە، لە روی پشکنینە تەکنیکی و تاقیگەییەکانەوە، نەخۆشخانەکە قەبارەیەکی زۆری کار و چالاکی تۆمارکردووە، بە جۆرێک کە 12 هەزار و 28 نەخۆش پشکنینیان بۆ ئەنجامدراوە.
هاوکات شيش هەزار و115 پشکنینی تیشکی (X-ray)، تیشکی لەرەلەری موگناتیسی (MRI)، مامۆگرافی و سۆنار بۆ هاووڵاتیان و چارەخوازان کراوە.
لە کۆتایی راگەیەندراوەکەدا، بەڕێوەبەرایەتی تەندروستی چەمچەماڵ دەستخۆشی و سوپاسی ئاڕاستەی بەڕێوەبەر، پزیشکان، کارمەندانی تەندروستی و کارگێڕی، خۆبەخشان و تەواوی ستافەکانی پاککەرەوە و پاسەوانی نەخۆشخانەکە کردووە، کە سەرەڕای ئەرکە قورسەکانی سەر شانیان، بە دڵسۆزانە و بە شەو و رۆژ لە خزمەتکردنی هاووڵاتیانی ناوچەکەدا بەردەوامن.
سەرۆکایەتی شارەوانی گەرمک بڕیاری دا دەست بە قۆناغی یەکەم ی دابەشکردنی زەوی بەسەر فەرمانبەران و خانەنشیناندا بکات و رۆژی دووشيممە پرۆسەکە دەستپێدەکات و 65 پارچە زەوی دانراوە.
بە گوێرەی راگەیەندراوێکی رەسمی شارەوانییەکە، پڕۆسەکە لە رۆژی دووشەممە، رێکەوتی 27ی نیسانی 2026، سەعات 8:30ـی بەیانی لە بینای شارەوانی دەست پێدەکات.
شارەوانی گەرمک ئاماژەی بەوە کردووە، کە دابەشکردنەکە لەم قۆناغەدا بەپێی سیستەمی خاڵبەندی دەبێت و ئەو فەرمانبەرانە دەگرێتەوە کە خاڵەکانیان لەنێوان (27 بۆ 48) خاڵدایە.
وەک لە راگەیەندراوەکەدا هاتوە؛ پڕۆسەکە بە ئامادەبوونی بەڕێوەبەری ناحیە و نوێنەری یاسایی بەڕێوەبەرایەتی گشتی شارەوانییەکانی سلێمانی بەڕێوەدەچێت بۆ دڵنیابوونەوە لە شەفافیەت.
دەقی راگەیەندراوەکە
شارەوانى گەرمک دەست بە دابەشکردنى زەوى دەکات
ڕۆژی دوو شەممە ڕێکەوتی (٢٧/٤/٢٠٢٦) کاتژمێر (٨:٣٠)ى سەرلەبەیانى لە بینای سەرۆکایەتی شارەوانی گەرمک دەست بە قۆناغى یەکەمى دابەشکردنى زەوى بەسەر ئەو فەرمانبەران و خانەنشینانەدا دەکرێت کە ناویان لە لیستەکەدا هاتووە (لیستى ناوى فەرمانبەران لە کۆمێنت دانراوە).
شارەوانى گەمک ڕایدەگەیەنێت؛ دابەشکردنەکە بەپێى خاڵبەندییە و لەم قۆناغەدا لەخاڵی (٤٨)ەوە بۆخاڵی (٢٧) زەوی وەردەگرن کە بە ئامادەبونی بەڕێوەبەری ناحیە و نوێنەری یاسایی بەڕێوەبەرایەتی گشتی شارەوانیەکانی سلێمانی بەڕێوەدەچێت.
شارەوانى گەرمک ڕاشیدەگەیەێنێت؛ هەر فەرمانبەرو خانەنشینێک ڕەخنەی لەشێوازی خاڵبەندیەکە هەبێت دەتوانێت پێش دابەشکردنەکە سەردانی شارەوانیمان بکات بەمەستی وردبینیکردنی فەرمانی زەویەکەی لەکاتێکدا شارەوانیمان لەڕێگەی لیژنەیەکەوە وردبینی تەواوی بۆ فەرمانەکان کردوە بەشێوەیەکی زۆر شەفاف و دادپەروەرانە.
لەهەمانکاتدا لە ئاگاداریەکەى شارەوانى گەرمکدا هاتووە؛ ئەو فەرمانبەر و خانەنشینانەی کە لە قۆناغی یەکەمدا زەوییان پێ نادرێت دڵنیایان دەکەینەوە کە لە نزیکترین کاتدا دەست دەکەینەوە بە دابەشکردنی زەوی وەکو قۆناغی دووەم و کۆتایی، ئەوەش دوای قەرەبوکردنەوەی جوتیاران کە لەئێستادا نوسراوی قەرەبوکردنەوەکەیان لەسەرۆکایەتی ئەنجومەنی وەزیرانە، بۆیە سەرجەم ئەو فەرمانبەران و خانەنشیانە دەچنە قۆناغی دووەم و زەوی وەردەگرن و کەس بێبەش نابێت .
ڕوونکردنەوەى پێویست؛
١. ئەو فەرمانبەرانەی کە خاڵەکانیان (٢٧) خاڵە لەم لیستەدا بەشێوەی تیروپشک یەک فەرمانیان لادەبرێت لەبەرئەوەی ژمارەی زەویەکانمان (٦٥)پارچەیە نەک (٦٦)پارچە.
2. پێویستە فەرمانبەر یاخود خانەنشین (کارتی نیشتیمانی وکارتی زانیاری ) پێبێت و خۆی لەکاتی تیروپشکەکە ئامادەبێت.
3. ئەوفەرمانبەرو خانەنشینانە کەدوای پڕکردنەوەی فۆڕمی زەوی وەفاتیان کردوە پێویستە وارسەکەی (شەهادە وەفات و کارتی زانیاری وکارتی نیشتمانی) پێبێت.
4. سەرجەم ڕاگەیاندنکاران بانگهێشت دەکەین بۆ کاتی دابەشکردنەکە و پڕۆسەکە بەشێوەیەکى شەفاف بەڕێوەدەچێت.
5. نوێنەری هەر وەزارەت و دەستە و بەڕێوەبەرایەتییەک بیەوێت لەکاتی تیروپشکەکە ئامادەبێت و چاودێری پڕۆسەکە بکات بەخۆشحاڵیەوە بانگهیشتیان دەکەین.
6.ئەو فەرمانبەرو خانەنشینانە کە بە تیروپشک زەویەکەیان بۆ دەردەچێت ناتوانن کڕین و فرۆشتنی پێوە بکەن تا ئەو کاتەی تۆماردەکرێت بەناویانەوە.
تێبینی؛ ناوەکان لەو وێنانەدان کە دانراون
دۆناڵد ترامپ هەڵوەشاندنەوەی سەردانی نێردراوەکانی ئەمریکای بۆ پاکستان راگەیاند، کە بڕیار بوو تێیدا تاوتوێی دەستپێکردنەوەی دانوستانەکان لەگەڵ ئێران بکەن.
ترمپ لە چاوپێکەوتنێکدا لەگەڵ کەناڵی (فۆکس نیوز) رایگەیاند، وڵاتەکەی هەموو کارتە براوەکانی لەدەستدایە و ئاماژەی بەوەش کرد کە ئێرانییەکان دەتوانن لە هەر کاتێکدا بیانەوێت پەیوەندیمان پێوە بکەن، بەڵام جەختی کردەوە کە نێردراوەکانی چیتر گەشتی 18 کاتژمێری ئەنجام نادەن بۆ ئەوەی تەنها دابنیشن و لەسەر هیچ قسە بکەن.
هەروەها روونی کردەوە کە بە نێردراوەکانی راگەیاندووە گەشت نەکەن بۆ قسەکردن لەسەر شتانێک کە سوودیان نییە، ئاماژەی بەوەش کرد کە هەڵوێستی ئێران بەرامبەر دانوستانەکان پاڵنەری سەرەکی بووە بۆ بڕیاری هەڵوەشاندنەوەکە، هاوکات جەختیشی کردەوە کە ئەم هەنگاوە بە واتای دەستپێکردنەوەی جەنگ نایەت.
بە تەنیا جێی ناهێڵین، مەراسیمی گەڕاندنەوە و بەخاكسپاردنی تەرمی شاعیر د. رەفیق سابیر بۆ خاكی كوردستان، بەڕێوەدەچێت.
بڕیارە سبەینێ تەرمی د. رەفیق سابیر لە سویدەوە بگاتەوە هەرێمی كوردستان و لە هۆڵی رۆشنبیریی رانیە مەراسیمێكی رێزلێنانی بۆ ساز بكرێت، دواتر تەرمەكەی بەرەو گۆڕستانی قەڵادزێ بەڕێ دەكرێت.
رۆژی دواتر مەراسیمی پرسەكەی لە مزگەوتی ئەحمەدی حاجی عەلی لە شاری سلێمانی بەڕێوەدەچێت.
رۆژی 28ی شوباتی ئەمساڵ، د. رەفیق سابیر، نووسەر، شاعیر و لێكۆڵەر لە تەمەنی 75 ساڵیدا لە سوید كۆچی دوایی كرد، ناوبراو بە هۆنراوە و نووسین و لێكۆڵینەوە زانستییەكانیی، خزمەتێكی گەورەی بوارەكانی ئەدەب و رۆشنبیری كوردی كردووە.
میدیاکانی عیرااق بڵاویانکردەوە، کۆبوونەوەکەی چوارچێوەی هەماهەنگی کە بڕیار بوو ئەمڕۆ ئەنجام بدرێت، بۆ تاوتوێکردنی هەڵبژاردنی کاندیدێک بۆ سەرۆک وەزیران بەهۆی بەردەوامی ناکۆکییەکان، نەگەیشتونەتە رێککەوتن و دواخراوە بۆ سبەینێ یەکشەممە.
بەگوێرەی زانیارییەکان، بڕیار بوو ئەمڕۆ سەعات چواری عەسر کۆبونەوەکە ئەنجام بدرێت، کە ئامانجی کۆبوونەوەکە لێی نزیککردنەوەی دیدوبۆچوونی هێزەکانی ناو چوارچێوەکە بوو، بۆ ئەوەی پاڵپشتی لە رێککەوتنێک بکرێت لەسەر شێوازێکی کۆتایی بۆ هەڵبژاردنی ئەو کەسایەتییەی ئەرکی پێکهێنانی حکومەتی داهاتوی پێدەسپێردرێت.
میدیاکانی عیراق، لەزاری سەچاوەکانی نزیک لە ئەندامانی کۆبوونەوەکە بڵاویانکردوەتەوە، چەند لایەنێک هێشتا دەستبەسەر کاندیدەکانی خۆیان نەبوون، لە بەرانبەردا چەند لایەنێکی تری هێزە شیعەکان، داوا دەکەن پێوەرێکی دیاریکراو پەیڕەو بکرێت، کە پەیوەست بێت بە قبوڵکردنی سیاسی و توانای بەڕێوەبردنی قۆناغی داهاتوو.
بەمەش جارێکیتر بەهۆی جیاوازییەکان سەبارەت بە میکانیزمی هەڵبژاردنەکە، چ لە رێگەی تەوافوقی سیاسی یان دەنگدانی ناوخۆیی، رێگر بوون لە ئەنجامدانی کۆبوونەوەکە لە کاتی دیاریکراوی خۆیدا و پرسی کاندیدکردنی کەسێک بە هاوبشی بە نادیاری ماوەتەوە.
بەیانی ئەمڕۆ شەممە، باماکۆی پایتەختی مالی رووبەڕووی دۆخێکی ئەمنیی گرژ بووەوە دوای ئەوەی چەند گروپێکی چەکداری سەر بە رێکخراوی قاعیدە هێرشێکی بەرفراوانیان کردە سەر بنکەی سەربازیی "کاتی" و فڕۆکەخانەی نێودەوڵەتی و چەند شوێنێکی هەستیاری دیکەی سەربازی.
لەگەڵ دەستپێکی هێرشەکە لەسەعات شەشی بەیانی، دەنگی تەقەیەکی زۆر و تەقینەوەی بەهێز لە دەوروبەری پایتەخت بیسترا و هێزە ئاسمانییەکانی مالی بە هێلیکۆپتەر و چەکی قورس وەڵامی هێرشەکەیان دایەوە، ئەمەش وای کرد شارەکە بۆ چەند سەعاتێک بە تەواوی پەک بکەوێت و شەقامەکان چۆڵ بن.
سوپای مالی دوای چەند سەعاتێک لە شەڕ رایگەیاند کە دۆخەکە لەژێر کۆنتڕۆڵدایە و هێرشەکەیان تێکشکاندووە، بەڵام تا ئێستاش دڵەڕاوکێ و ترس بەسەر پایتەختدا زاڵە و هێزە ئەمنییەکان لەناوچە هەستیارەکاندا لە ئامادەباشی تەواودان بۆ رێگری لە هەر پێشێلکارییەکی تری ئەمنی.
بەپێی ڕاپۆرتەکان، هێرشەکان تەنها ئامانجە سەربازی و سیادییەکانیان پێکاوە و نەچوونەتە ناو گەڕەکە نیشتەجێبووەکان.
چاودێران پێیان وایە ئەم رووداوە تاقیکردنەوەیەکی سەختە بۆ دەسەڵاتدارانی مالی بۆ پاراستنی سەقامگیری و رێگریکردن لە دووبارەبوونەوەی ئەم جۆرە پێشێلکارییە ئەمنییە گەورانە.