قوباد تاڵەبانی، جێگری سەرۆک وەزیران بە جیا لەگەڵ هەر یەکە لە عیرفان سدیق، باڵیۆزی بەریتانیا و پاتریک دۆرێل، باڵیۆزی فەرەنسا لە عیراق کۆبووەوە و لە کۆبوونەوەکاندا تاوتوێی رەوشی ناوچەکە و پرسی هەڵبژاردنەکانی عیراق کرا.

لە هەردوو کۆبوونەوەکەدا کە ئەمڕۆ لە هەولێر بەڕێوەچوون، ئاڵۆگۆڕی بیروڕا کرا لەبارەی دواین گۆڕانکارییەکانی ناوچەکە، بە گرنگییەوە باس لە کۆتاییهاتنی جەنگی غەززە کرا و هیواخوازرا کە کۆتاییهاتنی ئەم جەنگە سەرەتایەکی باش بێت بۆ چەسپاندنی ئاشتی و سەقامگیرییەکی گشتگیر لە ناوچەکەدا.

لە تەوەرێکی دیکەی کۆبوونەوەکاندا گفتوگۆکرا لەبارەی پەیوەندییەکانی هەرێم و بەغدا. جێگری سەرۆک وەزیران بە ئاماژەدان بە رێککەوتن لەسەر پرسی نەوت و دەستپێکردنەوەی هەناردەکردنەوەی نەوت، روونیکردەوە کە هەموو هەوڵێک دەدەن کە ئەو لێکتێگەیشتنەی لەنێوان هەردوولادا دروست بووە وەک دەرفەتێک بقۆزنەوە بۆ چارەسەرکردنی ریشەیی ناکۆکییەکانی نێوان هەرێم و بەغداد و بە تایبەتیش گەرەنتیکردنی موچە و بەشە بودجەی هەرێمی کوردستان.

لە بەشێکی دیکەی هەردوو کۆبووەنەوەکەدا باسی هەڵبژاردنەکانی ئەنجومەنی نوێنەرانی عیراق کرا، قوباد تاڵەبانی رایگەیاند، بەڕێوەچوونی هەڵبژاردنێکی پاک و بێگەرد لە رەوشێكی ئارام و بە دوور لە بارگرژی، زۆر گرنگە بۆ سەقامگیری عیراق و پێکهێنانی حکومەتێکی کارا کە جێی رەزامەندیی هەموو پێکهاتەکانی عیراق بێت، هیواشی خواست خەڵکی کوردستان و عیراق بە رێژەیەکی بەرچاو بەشداری لە هەڵبژاردنەکاندا بکەن و بڕیار لە چارەنووسی چوار ساڵی داهاتووی خۆیان و وڵاتەکەیان بدەن.

دوای خۆپیشاندانە بەردەوامەکانی هاووڵاتییانی کۆماری ماداگاسکار، بە تایبەت نەوەی زێد سەرئەنجام  سەرۆک ناچاربوو، وڵاتەکەی بە فڕۆکەیەکی فەرەنسی بەجێبهێڵێت و ئاژانسی رۆیتەرزیش رایگەیاندووە؛ سوپا دەسەڵاتی گرتوەتە دەست و بڕیار وایە لە ماوەی 60 رۆژدا هەڵبژاردن ئەنجامبدرێت.

ئەمڕۆ سێشەممە، ئاژانسی رۆیتەرز بڵاویکردوەتەوە، دوای بە جێهیشتنی وڵاتەکەی لەلایەن ئەندری راجۆلینا، سەرۆک کۆمارەوە، خۆپیشاندەرانە بە بەشێک لە ئامانجەکانیان گەیشتن و لە ئێستادا سوپا دەسەڵاتی گرتوەتە دەست و دادگای دەستوری وڵاتەکەش داوای هەڵبژاردنی پێشوەختە دەکات.

ماداگاسکار یەکێکە لە وڵاتە هەژارنشینکانی ئەفریقا و بە گوێرەی زانیاریەکان زیاتر  لە ٪75 یان  هەژارن و بەهۆی خراپی رەوشیان و نەبونی خزمەتگوزارییە سەرەتاییەکان، زیاتر لە مانگێک خۆپیشاندانیان دەستپێکردوە.

خۆپیشاندانەکە لەلایەن نەوەی زێدەوە سەرپەرشتی دەکرێت؛ کە ئەو کەسانە دەگرێتەوە رێیکەوتی لەدایبونیان لە نێوان ساڵانی 1990 بۆ 2010 دایە و بەرکەوتەی سەرەکیان هەبووە لەگەڵ گەشەکردنی موبایلە زیرەکەکان و تۆڕەکۆمەڵایەتییەکان.

سەرەڕای باسکردن لە رادەستکردنی چەکەکانیان، بەڵام بە گوێرەی زانیارییەکان حەماس لە ناو غەززە لە هەوڵی بەهێزکردنی هێزەکانیاندا و لە دوای کشانەوەی هێزەکانی حەماس دەستیان بەسەر شەقامەکاندا گرتووە و  دەستیان کردوە  بە ئۆپراسیۆن لە دژی گروپ و باندە نەیارەکانیان لە غەززە.

لەگەڵ بڵاوبونەوەی گرتە ڤیدیۆییەک کە تێیدا چەکدارەکانی حەماس ژمارەیەک هاووڵاتیی لەناو جەرگەی غەززە بە تۆمەتی هاوکاریکردن بۆ ئیسرائیل بە گولـلە دەکوژن و لەلایەن حەماس خۆشیەوە پشتڕاستکراوەتەوە  ئاژانسی رۆیتەرز دەڵێت؛ حەماس خۆی بەهێز دەکاتەوە.

ئاژانی رۆیتەرز بڵاویکردوەتەوە، حەماس لە هەوڵی بەهێزکردنەوەی ریزەکانیدایە و یەکەیەکی نوێیان پێکهێناوە، بە ناوی “هێزی خۆپاراستن”، دەستیان کردوە بە ئۆپەراسیۆن لە دژی هۆز و باندە چەکدارەکان  کە نەیاری حەماسن و پشتواینی ئیسرائیلن.

ئاژانسەکە ئەوەی خستوەتڕو، شایەتحاڵەکان باس لەوە دەکەن کە شەڕێکی سەخت لە رۆژهەڵاتی شاری غەززە لە نێوان چەکادرەکانی حەماس  ونەیارەکانیاندا ڕودەدات.

لەبارەی ئەو گرتە ڤیدیۆییەشەوە کە بڵاوکراوەتەوە حەماس ئاماژەی بەوەکردوە پەیامەکەمان روونە؛ هیچ شوێنێک بۆ یاساشکێنەکان یان ئەوانەی هەڕەشە لە ئاسایشی هاووڵاتیان دەکەن، نامێنێت”.

دوابەدوای گرژییە سەرەتاییەکانی نێوان حەماس و ئیسرائیل لەسەر گەڕانەوەی تەرمی بارمتە کوژراوەکان، رۆژنامەی گاردیانی بەریتانی بڵاویکردەوە، ئیسرائیل ئەمڕۆی بۆ حەماس دیاریکردووە، کەناڵی 13ی ئیسرائیلییش رایگەیاند؛ لە کاردانەوە رادەستنەکردنی تەرمەکان، ئیسرائیل بریاردا بە نەکردنەوەی دەروازەی رەفەح و کەمکردنەوەی هاوکارییە مرۆییەکان.

ئەمڕۆ سێشەممە، کەناڵی 13ی ئیسرائیلی، بە پشتبەستن بە سەرچاوەکان بڵاویکردوەتەوە، ناتانیاهۆ فەرمانیداوە بە هێزە ئەمنییەکان  بە کەمکردنەوەی رێگەدان بە چوونی هاوکارییەکان و نەکردنەوەی دەروازەی رەفح.

رادەستکردنی تەرمی 28 بارمتە کوژراوەکە بەشێک بوو لەو رێککەوتنەی کە بووە هۆی ئاگربەست لە غەززە، بەڵام تا ئێستا تەنها چوار تەرم رادەست کراون و ئیسرائیلیش حەماس بە پێشێلکردنی ئاگربەستەکە تۆمەتبار دەکات.

دوای ئەوەی دوێنێ حەماس چوار تەرمی رادەستی خاچی سور کرد، بە گوێرەی زانیارییەکان 24 ترەمی لابوە، وڵاتانی ناوبژیوان  پێیان وایە حەماس لە هەوڵدایە بۆ دۆزینەوەی هەموو تەرمەکان، بەڵام تۆڕی کان بڵاویکردەوە، حکومەتی ئیسرائیل پێی وایە ئەو گروپە بە مەبەست هەندێکیان رادەگرن.

لای خۆیەوە ئیسرائیل کاتز، وەزیری بەرگری ئیسرائیل هۆشداریدا بوو لەوەی رادەستنەکردنی تەرمەکان "پێشێلکردنی رێککەوتنەکە" دەبێت و دەرئەنجامەکانی لە ئەستۆی حەماسە، لە وەڵامدا حەماس رایگەیاند، پابەندە بە ئاگربەستەوە.

کۆمەڵەی بارمتەکان و خێزانی ونبووانی ئیسرائیل رایگەیاندووە؛ کە دەبێت   وەڵامی ئەوە بدرێتەوە بۆچی تا ئێستا حەماس تەرمی بارمتەکانی رادەست نەکردوە و حکمەتی ئیسرئیلیش خەمساردە لەو پرسە. 

ئەمە لە کاتێکدایە، ئەمڕۆ میدیاکانی فەلەستین بڵاویان کردەوە سوپای ئیسرائیل 45 ترەمی فەلەستینیان رادەستی خاچی سورکردوە و گەیەنراونەتە نەخۆشخانەکانی خان یونس

ئەمڕۆ ئەنجومەنی وەزیرانی عیراق کۆبووەوە و بەپێی زانیارییەکانی کوردسات نیوز، لە کۆبوونەوەکەدا بە هیچ جۆرێک باسی موچە نەکراوە.

محەمەد عەبدولڕەحمان پەیامنێری کوردسات نیوز لە بەغداد رایگەیاند: ئەنجومەنی وەزیرانی عیراق بڕیاریدا بڕی سێ ملیۆن بەرمیل نەوتی سپی بۆ پارێزگاکانی هەرێمی کوردستان دابینبکات.

وتیشی؛ لە کۆبونەوەکەدا بە هیچ جۆرێک باسی موچە نەکراوە و تەیف سامی وەزیری دارایی عیراقیش بەشداری کۆبوونەوەکەی نەکردووە.

تەقینەوەی کێڵگەیەکی دوو نهۆمی لە ئیتاڵیا سێ پۆلیسی کوشت و ژمارەیەک ئاگرکوژێنەوەشی بریندار کرد

بەپێی ئاژانسی هەواڵی ئەنسا، لە ئیتاڵیا کێڵگەیەکی دوو نهۆمی تەقیوەتەوە و بەهۆیەوە سێ پۆلیس گیانیان لەدەستداوە، هاوکات ژمارەیەک ئاگرکوژێنەوە و ئەفسەری دیکەش بریندار بوون.

پۆلیسی وڵاتەکە دەڵێت؛ پێدەچێت تەقینەوەکە بە ئەنقەست بووبێت و لە کاتی ئۆپەراسیۆنێکی دەستبەسەرداگرتنەوەی موڵکێکی داگیرکراوی نایاسایی رویداوە.

 دانیشتووانی موڵکەکە لە کاتی ئۆپراسیۆنەکەدا خۆیان لەناو ماڵەکەدا سجن کردووە و بەپێی زانیارییەکان، کاتێک دەسەڵاتداران دەستیان بە ئۆپەراسیۆنەکە کردووە، بوتڵی گازیان کردووەتەوە و لەکاتی کردنەوەی دەرگاکەدا تەقینەوەکە رویداوە.

سەرچاوە هەواڵیەکان دەڵێن؛ ژنێک و براکەی دەستگیرکراون، لە کاتێکدا برایەکی دیکەیان هەڵاتووە.

سەرۆک کۆمار د.لەتیف رەشید، ئەمڕۆ سێشەممە، لەکۆشکی بەغداد، پێشوازیکرد لەبەڕێوەبەری پێشوی ئاژانسی ناوەندی هەواڵگریی و فەرماندەی هێزەکانی هاوپەیمانان، ژەنەڕاڵ دەیڤید پێترایۆس.

لەمیانی دیدارەکەدا پەیوەندییە دووقۆڵییەکانی نێوان عیراق و ئەمریکا و پێشهاتە ناوچەیی و نێودەوڵەتییەکان تاوتوێ کران، سەرۆک کۆمار ئاماژەی بە پێویستی پەرەپێدانی هاوکارییه ئەمنییەکانی نێوان دوو وڵات لەچوارچێوەی ستراتژێکی هاوبەشی درێژخایەندا کرد، هاوکات ستایشی رۆڵی ووڵاتە یەکگرتوەکانی ئەمریکا و هێزەکانی هاوپەیمانی نێودەوڵەتی کرد لە پاڵپشتیکردنی عیراق لەجەنگی دژ بەتیرۆر و رزگارکردنی خاکی عیراق لەژێر کۆنترۆڵی رێکخراوی تیرۆریستی داعش .

هەروەها سەرۆک کۆمار باسی لەدۆخی سەقامگیری ئەمنی عیراق و هەوڵەکانی کرد بۆ پاراستنی ئەو دەستکەوتانەی لەم بوارەدا بەدەست هاتوون ، جەختیشی لەوە کردەوە کەسەقامگیری وڵات خاڵی دەستپێک بوو بۆ پێشکەشکردنی خزمەتگوزاری و نۆژەنکردنەوەی ژێرخانی ئابووری و جێبەجێکردنی پڕۆژە ستراتیژییەکان کە بەشدارن لە گەیشتن بە گەشەپێدانی بەردەوام و جێبەجێکردنی داواکاری هاوڵاتیان و بەڕێزیان ئاماژەی بەوەشدا کەعیراق خۆی بۆ هەڵبژاردنەکانی داهاتوو ئاماده دەکات و ئامادەکارییه کانیش بەردەوامە بۆ بەڕێوەچوونی پڕۆسەی هەڵبژاردن بەشێوەیەکی ئاسان و شەفاف و چەسپاندنی پڕۆسەی دیموکراسی وڵاتدا.

لەلای خۆیەوە ژەنەڕاڵ پێترایۆس پێزانینی خۆی بۆ هەوڵەکانی سەرۆک کۆمار دەربڕی بۆ یەکخستنی دیدگەی لایەنە سیاسییەکان بۆ بەهێزکردنی سەقامگیری وڵات و هەروەها ستایشی ئەو پێشکەوتنانەی کرد کە عیراق لە ئاستی ئەمنی و سیاسیدا بەدەستهێناوون و پاڵپشتیی بەردەوامی وڵاتەکەی بۆ عیراق لەبوارە جیاجیاکاندا دووپات کردەوە.

عەباس عراقچی، وەزیری دەرەوەی ئێران، لە پەیامێکدا رایگەیاند، دۆناڵد ترەمپ، سەرۆکی ئەمریکا، بەو درۆیە هەڵخەڵەتێندراوە کە گوایە؛ "پرۆگرامی ئەتۆمیی ئاشتییانەی ئێران لە بەهاری ئەمساڵدا لەسەر لێواری چەکداربوون بووە"، لە کاتێکدا هیچ بەڵگەیەک نییە ئەمە پشت راستبکاتەوە.

عراقچی بە جەختەوە وتی؛ ترەمپ ناتوانێت لە یەک کاتدا سەرۆکی ئاشتی و سەرۆکی جەنگ بێت.

عراقچی لە پەیامەکەیدا نووسیویەتی: "زیاتر لە جاران رونە کە سەرۆکی ویلایەتە یەکگرتووەکانی ئەمریکا (ترەمپ) خراپ بە درۆیەکی ساختە هەڵخەڵەتێنراوە کە پرۆگرامی ئەتۆمیی ئاشتییانەی ئێران لە بەهاری ئەمساڵدا لەسەر لێواری چەکداربوون بووە. ئەمە بە سادەیی درۆیەکی گەورەیە و دەبوو ئاگادار کرابا کە هیچ بەڵگەیەک بۆ ئەوە نییە، وەک چۆن دەزگا هەواڵگرییەکانی خۆیشی پشتڕاستیان کردووەتەوە."

وەزیری دەرەوەی ئێران ئاماژەی بەوەدا کە "ترەمپ بەڵێنی بە ئەمریکییەکان و جیهان دا کە کۆتایی بە فێڵبازیی زنجیرەیی ئیسرائیل لە سەرۆکەکانی ئەمریکا دەهێنێت؛ ئەوەی کە سوپای ئەمریکا چیتر ناگلێنرێتە ناو جەنگە بێ کۆتاییەکان کە لەلایەن شەڕخوازانەوە پیلانی بۆ دادەندرێت، ئەوانەی بۆ چەندین ساڵ دیپلۆماسییەتی ئەتۆمیی ئەمریکایان لەگەڵ ئێران تێکداوە."

عراقچی راستەوخۆ روی قسەی لە ترەمپ کرد و وتی: "بەڕێز سەرۆک، گەورەترین زۆرداری رۆژهەڵاتی ناوەڕاست، هەمان ئەو لایەنە مشەخۆرەیە کە ماوەیەکی زۆرە ویلایەتە یەکگرتووەکانی ئەمریکا زۆری لێدەکات و دەیدۆشێت."

عراقچی رایگەیاند: "کەس ناتوانێت خۆی بە سەرۆکی ئاشتی بناسێنێت لە کاتێکدا جەنگە بێ کۆتاییەکان دەوروژێنێت و لەگەڵ تاوانبارانی جەنگ هاوپەیمانە. بەڕێز ترەمپ یان دەتوانێت سەرۆکی ئاشتی بێت یان سەرۆکی جەنگ، بەڵام ناتوانێت لە یەک کاتدا هەردووکیان بێت."

لە ناوەراستی بەردەوامیی گفتوگۆکانی نێوان هێزەکانی سوریای دیموکرات (هەسەدە) و دیمەشق، رەجەب تەیب ئەردۆغان، سەرۆکی تورکیا، داوای لە هەسەدە کرد کە تێکەڵ بە سوپای سوریا ببن. 

لە لێدوانێکدا بۆ رۆژنامەنووسان لە کاتی گەڕانەوەی لە شەرم شێخ، ئەمڕۆ سێشەممە، ئەردۆغان رایگەیاند، تێکەڵبوونی هەسەدە لەگەڵ دیمەشق، هەنگاوەکانی گەشەپێدان لە وڵاتەکەدا خێراتر دەکات.

سەرۆکی تورکیا وتی: "هێزەکانی سوریای دیموکرات ئاگادار دەکەینەوە لە بەردەوامبوون لەسەر رێگا هەڵەکان، و داوایان لێدەکەین کە پشتگیری لە یەکێتی و یەکپارچەیی سوریا بکەن."

هەروەها هیواشی خواست کە "هەسەدە هەڵوێستێک بگرێتەبەر کە ببێتە هۆی یەکێتیی خاکی سوریا و داهاتوویەکی گەشاوە بۆ وڵاتەکە."

ئەردۆغان دووپاتیشی کردەوە کە پەیوەندییەکی گشتگیر و بەردەوام لەگەڵ حکومەتی سوریا لەسەر هەموو ئاست و بوارەکاندا بەڕێوەدەچێت. وتیشی: "ئێمە سورین لەسەر پتەوکردنی هەماهەنگی و هاوکاریی نزیک بۆ پاراستنی دەستکەوتەکانی سوریا و ناوچەکە."

لە رۆژانی رابردوودا چەندین کۆبوونەوە لە نێوان هەسەدە و حکومەتی سوریادا بەڕێوەچوو، بە ئامانجی تاوتوێکردنی تێکەڵکردنی ئەو هێزانە لە سوپا و دەزگا ئەمنییە رەسمییەکاندا. هەروەها هەردوو لا رێگاکانی جێبەجێکردنی رێککەوتنی 10ی ئاداری رابردوویان تاوتوێ کرد، کە لە نێوان سەرۆکی سوریا و مەزڵوم عەبدی، فەرماندەی گشتیی قەسەدە، واژۆ کرابوو.

وەزارەتی خوێندنی باڵا ئەنجامەکانی زانکۆلاینی راگەیاند.. %100ی دەرچووان وەردەگیرێن

وەزارەتی خوێندنی باڵا و توێژینەوەی زانستیی هەرێمی کوردستان، ئەنجامەکانی زانکۆلاینی بۆ ساڵی نوێی خوێندنی 2025-2026 راگەیاند و ئاشکرای کرد، کۆی گشتی وەرگیراوانی خوێندکاران دەگاتە 51,725 خوێندکار

دکتۆر ئارام محەمەد، وەزیری خوێندنی باڵا و توێژینەوەی زانستیی هەرێمی کوردستان، رایگەیاند: "بۆ ئەمساڵ 97%ی قوتابییان و خوێندکاران لە زانکۆ و پەیمانگاکان وەرگیراون." هاوکات جەختیشی کردەوە کە "15 هەزار کورسیمان لە دەرەوەی پلان وەرگرتووە و ئەمساڵیش 100%ی خوێندکاران لە زانکۆ و پەیمانگاکان وەردەگیرێن."

وەزیری خوێندنی باڵا ئاماژەی بەوەشدا کە "نمرەی قوتابییان بە تایبەت بەشە زانستییەکان دابەزیوە،" بەڵام دووپاتیشی کردەوە "ستەم لە هیچ قوتابییەک نەکراوە و کارەکان دادپەروەرانەن."

دەرچووانی پۆلی 12ی ئامادەیی دەتوانن لەرێگەی ئەم لینکەوە (https://www.regayzanko.com/) بە بەکارهێنانی ناوی بەکارهێنەر و وشەی نهێنی ئەنجامەکانیان ببینن.

وەزارەتی خوێندنی باڵا ئەوەشی خستەڕوو، کە 14,731 کورسی بە بەتاڵی ماونەتەوە و دەیخەنە خزمەتی ئەو 3%یەی کە وەرنەگیراون، بەمەش هیچ خوێندکارێک بێ شوێن نامێنێتەوە.

هاوکات، خوێندکاران بۆ ماوەی هەفتەیەک دەتوانن تانە لە بڕیارەکە بدەن.

بەپێی راگەیەندراوی وەزارەتەکە، رۆژی 26ی تشرینی یەکەم یەکەم رۆژی دەستپێکردنی خوێندن دەبێت لە زانکۆکان بۆ خوێندکارانی قۆناغی یەکەم

ئەحمەد سەحاف كاربەڕێكەری باڵیۆزخانەی عیراق لە لیبیا رایگەیاند، ئەو 12 كۆچبەرەی لە لیبیا دۆزراونەتەوە و خەڵكی هەرێمی كوردستانن، دەگەڕێندرێنەوە عیراق. 

سەحاف وتیشی، 40 رۆژ بەدواداچوونیان بۆ ئەو بابەتە كردووە و 12 كۆچبەر دۆزراونەتەوە، كە هەموویان خەڵكی هەرێمی كوردستانن و بە تایبەت سلێمانی، وتیشی، رەوشی تەندروستییان باشە.

راشیگەیاند، باڵیۆزخانەی عیراق لەگەڵ دەزگا ئەمنییەكان هەماهەنگی دەكات بۆ گەڕانەوەی خۆبەخشانەی ئەو كۆچبەرانە و هەروەها وابڕیارە هەماهەنگییان لەگەڵ نوسینگەی پەیوەندییەكانی دەرەوەی كوردستان هەبێت. 

لەم ساڵانەی كۆتاییدا، لیبیا بووەتە وێستگەیەكی سەرەكی بۆ تێپەڕبوونی كۆچبەرانی نایاسایی بەرەو ئەوروپا، گرتنەبەری ئەو رێگەیەش لەلایەن كۆچبەرانی نایاسایی عیراقییەوە زیادیكردووە.

رەفیق قادر، بەڕێوبەری نەخۆشخانەی فریاکەوتنی کەلار، بە کوردسات نیوزی ووت سەرلەبەیانی ئەمڕۆ تەرمی هاووڵاتییەک گەیەنرایە نەخۆشخانەکەمان کە لە هۆتێلێکی کەلار گیانی لەدەستدابو.

وتیشی: وەک پێمان وترا هاووڵاتییەکە ماوەی 3 رۆژە لە ژورێکی هۆتێلەکەدا گیانی لەدەستداوە.

بەوتەی رەفیق قادر، هاوڵاتییەکە لەدایکبوی ساڵی 1941ـە و خەڵکی قەزای شارەبانە. بۆ توێکارییش تەرمەکەی رەوانەی پزیشکی دادوەریی کراوە.

پەیامنێری کوردسات نیوز رایدەگەیەنێت، چاوەڕوان دەکرێت ئەمڕۆ محەمەد شیاع سودانی، سەرۆک وەزیرانی عیراق، فەرمانی خەرجکردنی موچەی مانگی هەشتی فەرمانبەرانی هەرێمی کوردستان دەربکات.

محەمەد عەبدولڕەحمان، پەیامنێری کوردسات نیوز، رایگەیاند: "وابڕیارە ئەمڕۆ کاتژمێر یەک کۆبوونەوەی ئەنجومەنی وەزیرانی عیراق بەڕێوەبچێت و تێیدا سودانی بڕیاری خەرجکردنی موچەی مانگی هەشتی فەرمانبەرانی هەرێم بدات."

پەیامنێری کوردسات نیوز لە بەغداد وتیشی: "دوای رێککەوتنەکەی نێوان هەرێم و بەغدا کە بە سەرپەرشتی بافڵ جەلال تاڵەبانی، سەرۆکی یەکێتیی نیشتمانیی کوردستان، ئەنجامدرا، ناردنی موچەی فەرمانبەرانی هەرێم پێویستی بە دەنگدانی کابینەی حکومی نییە و دەسەڵاتی سودانی خۆیەتی."

محەمەد عەبدولڕەحمان، پەیامنێری کوردسات نیوز، ئاشکرای کرد: "سودانی رایگەیاندووە کە چاوەڕێی هەرێمی کوردستان دەکەن 120 ملیارەکەی داهاتی نانەوتی بنێردرێت تاکو موچەی مانگی هەشت خەرجبکرێت و هیچ گرفتێک لە رێککەوتنەکەدا نییە".

ئەندامێکی لیژنەی پەیوەندییەکانی دەرەوەی ئەنجومەنی نوێنەرانی عیراق، ئەو ناوانە ئاشکرا دەکات کە دوای هەڵبژاردن بۆ وەرگرتنی پۆستی سەرۆک وەزیران کاندیدن، هاوکات باس لە دابەشبوونێکیش لەناو چوارچێوەی هەماهەنگیدا دەکرێت.

موختار موسەوی، ئەندامی لیژنەکە، رایگەیاند، نوری مالیکی سەرۆکی هاوپەیمانی دەوڵەتی یاسا، عەدنان زوورفی، قاسم ئەعرەجی، حەمید شەترانی، عەبدولحسێن عەبتان و محەمەد شیاع سوودانی سەرۆک وەزیرانی ئێستا، کاندیدە دیارەکانن.

ناوبراو وتیشی، کێبڕکێکە زیاتر لەنێوان مالیکی و زوورفیدایە، بەتایبەت کە عەدنان زوورفی پەیوەندی فراوانی لە دەرەوە و ناوەوەی وڵات هەیە، بەڵام چانسی سوودانی بۆ بەدەستهێنانی ویلایەتێکی دیکە کەمە.

سەرچاوەیەکیش لەناو چوارچێوەی هەماهەنگی شیعەکانەوە ئاشکرای کردووە، چوارچێوەکە بەسەر دوو بەرەدا دابەشبووە؛ یەکێکیان پشتیوانی مالیکی دەکەن و بەرەکەی دیکە پشتیوانی سوودانین.

جۆ بایدن، سەرۆکی پێشووی ئەمریکا، ستایشی دۆناڵد ترەمپی کرد، دوای ئیمزاکردنیی بەڵگەنامەی گشتگیری تایبەت بە رێککەوتنی ئاشتی غەززە لەلایەن ویلایەتە یەکگرتووەکان، میسڕ، قەتەر و تورکیاوە.

بایدن لە پۆستێکدا لە هەژماری تایبەتی خۆی لە "ئێکس" نووسیبووی: "هەستێکی قووڵی سوپاسگوزاری و ئاسوودەیی زۆرم هەیە بۆ هاتنی ئەم رۆژە... لەپێناو دوا 20 بارمتەی زیندوو کە دۆزەخێکی بڕوانەکراویان بینی، و لە کۆتاییدا بە خێزان و خۆشەویستانیان گەیشتنەوە، هەروەها لەپێناو خەڵکی مەدەنی غەززە کە زیانێکی زۆریان بەرکەوتووە و لە کۆتاییدا دەرفەتێکیان بۆ دەستکەوت بۆ دووبارە بنیاتنانەوەی ژیانیان."

بایدن وتیشی: "رێگای گەیشتن بەم رێککەوتنە ئاسان نەبوو. ئیدارەکەم ماندوونەناسانە کاری کرد بۆ گەڕاندنەوەی بارمتەکان بۆ ماڵەوە، دابینکردنی یارمەتی بۆ هاووڵاتیانی فەلەستینی، و کۆتاییهێنان بە جەنگ."

ناوبراو لە درێژەی قسەکانیدا وتی: "ستایشی سەرۆک ترەمپ و تیمەکەی دەکەم لەسەر هەوڵەکانیان بۆ گەیشتن بە رێککەوتنێکی نوێی ئاگربەست."

لە کۆتاییدا وتی: "ئێستا، بە پشتیوانی ویلایەتە یەکگرتووەکان و جیهان، رۆژهەڵاتی ناوەڕاست لەسەر رێگای ئاشتییە کە هیوادارم بەردەوام بێت، و داهاتوویەک بۆ ئیسرائیلییەکان و فەلەستینییەکان بە هەمان شێوە، کە تێیدا هەمووان بە یەکسانی لە ئاشتی، کەرامەت و ئاسایشدا بژین."

شەوی دووشەممە، ویلایەتە یەکگرتووەکان، میسڕ، قەتەر و تورکیا، بەڵگەنامەی گشتگیری تایبەت بە رێککەوتنی غەززەیان ئیمزا کرد.

دۆناڵد ترەمپ، سەرۆکی ئەمریکا، عەبدولفەتاح سیسی، هاوتا میسڕییەکەی، ڕەجەب تەیب ئەردۆغان، سەرۆکی تورکیا، و شێخ تەمیم بن حەمەد ئال سانی، میری قەتەر، بەڵگەنامەکەیان ئیمزا کرد.

ئیمزاکردنەکە لە لووتکەی شەرم شێخ بەڕێوەچوو، کە میسر میوانداریی کردبوو، بە ئامادەبوونی ژمارەیەک لە سەرکردە عەرەبی و بیانییەکان.

ترەمپ پێش جێهێشتنی میسر رایگەیاند: "پێکەوە لەوەدا سەرکەوتین کە هەمووان پێیان وابوو مەحاڵە. لە کۆتاییدا، ئاشتی لە رۆژهەڵاتی ناوەڕاستدا هەیە."

رونی کردەوە کە "بەڵگەنامەکە یاسا و رێکخستن و چەندین وردەکاری دیکە لەخۆدەگرێت"، و دوو جار بەجەختەوە وتی: "ئەم رێککەوتنە درێژخایەندەبێت."

وەزارەتی دەرەوەی ئێران، ئەمڕۆ سێشەممە، رەخنەی توندی لە بانگەوازی دۆناڵد ترەمپ بۆ گفتوگۆ گرت و واشنتنی بە "رەفتاری دوژمنکارانە و تاوانبارانە" تۆمەتبار کرد. ئەمەش دوای ئەوە دێت کە ترەمپ لەبەردەم کنێست رایگەیاند، وڵاتەکەی ئامادەیە بۆ گەیشتن بە رێککەوتن لەگەڵ تاران.

ویلایەتە یەکگرتووەکانی ئەمریکا لە مانگی حوزەیران، شانبەشانی ئیسرائیل، دەستی کرد بە بۆردوومانکردنی دامەزراوە ئەتۆمییەکانی ئێران. ئەمەش دوای پێنج گەڕی گفتوگۆی ناڕاستەوخۆی ئەتۆمی لەگەڵ تاران کە بەهۆی کێشەکانی وەک پیتاندنی یۆرانیۆمەوە وەستابوو.

وڵاتانی رۆژاوا ئێران تۆمەتبار دەکەن بە هەوڵدان بۆ بەدەستهێنانی چەکی ئەتۆمی، بەڵام تاران ئەمە رەتدەکاتەوە و جەخت دەکاتەوە کە پرۆگرامە ئەتۆمییەکەی تەنها بۆ مەبەستی مەدەنییە.

رۆژی دووشەممە، دۆناڵد ترەمپ لە وتارێکدا لەبەردەم کۆنگرێس دووپاتی کردەوە کە خوازیاری رێککەوتنێکی ئاشتییە لەگەڵ تاران، ئەوەش دوای ئەوەی ویلایەتە یەکگرتووەکان لە سەرەتای ئەمساڵدا شانبەشانی ئیسرائیل هێرشی کردە سەر چەند ناوەندێکی ئەتۆمی لە ئێران.

ترەمپ وتی: "زۆر نایاب دەبێت ئەگەر بگەینە رێککەوتنێکی ئاشتی"، هەروەها وتیشی"ئەمە دڵخۆشتان ناکات؟ ئایا ئەمە جوان نابێت. پێم وایە ئەوانیش ئەوەیان دەوێت."

ناوبراو بەردەوام بوو: "ئێمە ئامادەین کاتێک ئێوە ئامادەبن" بۆ گەیشتن بە رێککەوتن.

وتیشی: "ئەگەر ئێران خاوەنی چەکی ئەتۆمی بووایە، ئەوا وڵاتانی عەرەبی بەو رێککەوتنەی ئێستامان قایل نەدەبوون."