هەواڵەکان
کەشناسی پێشبینی کەشەوهەوای بۆ 48 سەعاتی داهاتووی بڵاوکردوەتەوە و ئاماژەبەوەدەکات؛ پلەکانی گەرما کەمێک بەرزدەبنەوە و گەرمیان بە 35 پلە گەرمترین ناوچە و حاجی ئۆمەران بە 21 پلە ساردترین دەبێت و کەشەکەی پایزانەیە.
ئەمڕۆ هەینی، بەڕێوەبەرایەتی کەشناسی و بومەلەرزەزانی سلێمانی بڵاویکردوەتەوە، ئەمڕۆبەراورد بە تۆمارکراوەکانی دوێنێ، پلەکانی گەرما کەمێک بەرزدەبنەوە و کەشی ئاسمانیش ساماڵ و پەلەهەور دەبێت .
ئەوەشی خستوەتەڕوو، جگە لە ناوچەی گەرمیان کە 35 پلەیە، تەواوی ناوچەکانی دیکە لە خوار ئەو پلەیەوەن و حاجی ئۆمەرانیش ساردترین ناوچەی هەرێم دەبێت بە 21 پلەی سیلیزی.
لەبارەی کەشی سبەینێ شەممەشەوە، پێشبینی دەکات گۆڕانکارییەکی بەرچاو رونەدات و هاوشێوەی تۆمارکراوەکانی ئەمڕۆ بێت.
بەرزترین پلەکانی گەرمای پێشبینیکراو بە پلەی سیلیزی بەمشێوەیە دەبێت؛
هەولێر : 32 پلەی سیلیزی
سلێمانی : 29 پلەی سیلیزی
دهۆک : 31 پلەی سیلیزی
زاخۆ : 32 پلەی سیلیزی
ئامێدی : 26 پلەی سیلیزی
ئاکرێ : 29 پلەی سیلیزی
کەرکوک : 33 پلەی سیلیزی
هەڵەبجە : 33 پلەی سیلیزی
سۆران : 30 پلەی سیلیزی
حاجی ئۆمەران : 21 پلەی سیلیزی
گەرمیان : 35 پلەی سیلیزی
رەجەب تەیب ئەردۆغان، سەرۆک کۆماری تورکیا، بەبیانوی ئەوەی لەسەر سنورەکانی وڵاتەکەی هەڕەشەکانی تیرۆر کۆتایی نەهاتووە، داوا لە پەرلەمانی وڵاتەکەی دەکات، بۆ سێ ساڵی تر مۆڵەتی رەوانەكردنی هێز و ئەنجامدانی ئۆپراسیۆنی سەربازی لە عیراق و سوریا درێژبكرێتەوە.
بەبیانوی ئەوەی تا ئێستا سەقامگیری هەمیشەیی مسۆگەرنییە، ئەردۆغان یاداشتێکی بە ئیمزای خۆی رەوانەی پەرلەمانی وڵاتەکەی کردوە، کە ناوەڕۆکەکەی بریتییە لە درێژکردەنەوەی ماوەی یۆپراسیۆنی هێزەکانیان لە رۆژئاوا و باشوری کوردستان، داواش دەکات دەنگی پێبدەن.
لەبەشێکی یاداشتەکەی سەرۆککۆماری تورکیادا باسی لەوەکردوە؛ لە سنورییەكانی باشوری وڵاتەکەی هەڕەشەی تیرۆر بەردەوامە و سەقامگیریی هەمیشەیی مسۆگەر نەکراو و ئەمەش هەڕەشە بۆسەر ئاسایشیی نیشتمانی دروست دەکات.
لەبارەی رۆژئاواشەوە ئاماژەی بەوەداوە، پەیەدە و یەپەگە بەهۆی ئەجێنداکانیانەوە، هیچ هەنگاوێک نانێن بۆ بەشداریکردن لە ئیدارەی ناوەندیی سوریادا و رێگری لە پێشکەوتنی پرۆسەی سەقامگیریی لەو وڵاتە دەکەن.
ئەم داوایەی سەرۆکی تورکیا لە کاتێکدایە زیاتر لە ساڵێکە پرۆسەی ئاشتی هاتوەتە ئاراوە و لە سوریاش هێزەکانی هەسەدە و دیمەشق رێککەوتون لەسەر تێکەڵاوکردنی هێزەکانیان.
ئەوروپا ئامادەکاری دەکات بۆ روبەڕوبوەنەوەی روسیا و دەنگەکانی ناو یەکێتیەکە هاودەنگن و هۆشداری دەدەن؛ کە روسیا تەنها بە شەڕی ئۆکراین رازی نییە، بەڵکو دەستیکردووە بە ئەنجامدانی شەڕێکی تێکەڵاو کە دڵی کیشوەری کۆن دەکات و لە رێگەی هێرشی ئەلیکترۆنی و هەڵمەتی زانیاری ناڕاست و فڕۆکەی بێفڕۆکەوانی نەناسراو فڕۆکەخانە گەورەکانی ئەڵمانیا و دانیمارک و نەرویج دەکاتە ئامانج.
دەزگای هەواڵگری ئەڵمانیا، هۆشداری توندی داوەتە یەکێتی ئەوروپا و رایگەیاندوە بە ئەگەری زۆرەوە لە ساڵی 2029 دا، روسیا هێرش دەکاتە سەر ئەوروپا و پێویستە وڵاتانی یەکێتییەکە ئامادەکاری تەواو بکەن بۆ ئەو هێرشە.
فریدریش مێرز، راوێژکاری ئەڵمانیا، کە لە ئێستادا سەرکردایەتی رووبەڕووبوونەوەی سیاسی دەکات لەناو کیشوەرەکەدا، پەرەپێدانی پلانێکی تۆکمەی بۆ رووبەڕووبوونەوەی ئەو شتەی کە بە "جەنگی تێکەڵاوی رووسیا دژی ئەوروپا" وەسفی کردووە، راگەیاندوە.
ئەو پێی وایە ئەوەی ئەمڕۆ روودەدات درێژکراوەی سیاسەتێکی بەردەوامی روسیایە کە لەسەر بنەمای تێکدانی سەقامگیری نەیاران لە ناوەوە پێش هەر کردەیەکی سەربازی راستەوخۆیە.
لەگەڵ پەرەسەندنی شەپۆلی هێرشە ئەلیکترۆنییەکان و تێکدەرەکان لە چەند وڵاتێکی یەکێتی ئەوروپا، ئۆرسولا ڤۆن دێر لاین سەرۆکی کۆمیسیۆنی ئەوروپا لەبەردەم پەرلەمانی ئەوروپا رایگەیاند کە کیشوەرەکە روبەڕووی شەڕێکی تێکەڵاوی تەواو دەبێتەوە کە لەلایەن روسیاوە بەڕێوەدەچێت.
فەرماندەی گشتیی هێزەكانی سوریای دیموكرات(هەسەدە) رایگەیاند؛ لەگەڵ دیمەشق ڕێککەوتون لەسەر چۆنێتی تێکەڵکردنەوەی هێزەکانیان لەگەڵ سوپا و وەزارەتی ناوخۆی سوریادا و ئاماژەی بەوەشکردوە؛ فەرماندە و ئەندامەكانی هەسەدە پێگەی بەرزیان لە سوپای سوریادا پێدەدرێت.
فەرمەندەکەی هەسەدە لە چاوپێکەوتنێکیدا لەگەڵ ئاژانسی ئەسۆشیدپرێس ئاماژەی بەوەشکردوە؛ رونیشیكردەوە، ئەو ئەزمونەی هەسەدە هەیەتی بەتایبەتی لە شەڕی دژ بە تیرۆر و روبەڕوبوونەوەی داعش، دەبێتە پشتیوانێكی باش بۆ بەرزكردنەوەی تواناكانی سوپای سوریا.
ناوبراو جەختیکردوەتەوە لەوەی، وەک ئەوەی بڕیاری لێدراوە، ئاسایشی ناوخۆ لە باكور و رۆژهەڵاتی سوریا تێكەڵ بە دەزگای ئاسایشی نیشتمانیی سوریا دەكرێن.
مەزڵوم كوبانێ ئەوەشی خستەوەتەڕوو؛ لە ئێستادا جۆرێك لە نەرمی نواندن لەلایەن توركیاوە بەرامبەر هەسەدە هەیە و هۆکاری دواکەوتنی رێککەوتنەکەی نێوان ئیدارەی خۆسەرو دیمەشقی بۆ گرژییە ناوخۆییەكان و روداوەكانی سوەیدا گەڕاندوەتەوە.
دۆناڵد ترەمپ، سەرۆکی ویلایەتە یەکگرتووەکانی ئەمەریکا رایگەیاند، بە ناردنی موشەکی تۆماهۆک بۆ ئۆکراین ناتوانێت کۆگا سەربازییەکانی کەمبکاتەوە و بۆ بەرگریکردن لە خۆی پێویستی بە موشەکەکانە.
دوای ئەوەی چەندین جار زیلینسکی دوای موشەکی تۆماهۆکی لە ئەمریکا کرد و ئەمڕۆش لەگەڵ پوتن کۆبوەتەوە سەبارەت بە پرسی چەنگی روسیا وئۆکراین و مامەڵەکردن بە موشەکی تۆماهۆکەوە، ترەمپ بە رۆژنامەنوسانی راگەیاند خۆیان پێوستیان بەو موشەکەیە و ناتوانن بیدەنە ئۆکراین
ترەمپ بە رۆژنامەنوسانی راگەیاند ، پێویستیان بە تۆماهۆک، راستە زۆریان هەیە، بەڵام ناتوانین کۆگاکانیان بەتاڵ بکەنەوە بۆ ئۆکراین.
لە بەشێکی دیکەی قسەکانیدا سەرۆکی ئەمریکا جەختی لەوە کردەوە کە تائێستا بڕیاری کۆتایی سەبارەت بە ناردنی ئەو مووشەکانە نەداوە و رەنگە پێش ئەوەی هیچ هەنگاوێک بگرێتەبەر جارێکی دیکە لەگەڵ پوتن قسە بکات.
پوتین پێشتر هۆشداری دابوو کە بەکارهێنانی ئەو موشەکانە بەبێ بەشداری راستەوخۆی هێزەکانی ئەمریکا ناتوانرێت و هەنگاوێکی لەو شێوەیە دەچێتە قۆناغێکی نوێی گرژی لە پەیوەندییەکانی روسیا و ئەمریکادا.
شەوی رابردوش، سەرۆکی ئۆکرانیا رایگەیاند، هەرکاتێک روسیا گوێی لە وشەی تۆماهۆک دەبێت ەنادەباتە بۆ گفتوگۆکردن.
وەزارەتی دادی ئەمریکا رایگەیاند جۆن بۆڵتۆن، راوێژکاری پێشووی ئاسایشی نیشتمانیی دۆناڵد ترەمپ بە تۆمەتی گواستنەوە و راگرتنی زانیاریی نهێنییەکانی بەرگری نیشتمانی بە شێوەیەکی نایاسایی تۆمەتبار کراوە، لە ئەگەری ساغبونەوەی تۆمەتەکانیش، بە دەیان ساڵ زیندانی سزا دەدرێت.
رۆژی پێنجشەممە، لیژنەی دادوەری گەورەی فیدراڵی لە ویلایەتی میریلاند رایگەیاند کە بەڵگەی پێویست هەیە بۆ تۆمەتبارکردنی بۆڵتۆن و ناوبراو روبەڕوی 18 تۆمەت کراوەتەوە و ئەگەر تۆمەتەکانی بەسەردا ساغ ببێتەوە، بە دەیان ساڵ زیندانی سزا دەدرێت.
لە تۆمەتنامەکەدا باس لەوە کراوە کە بۆڵتۆن ئیمەیڵ و خزمەتگوزاری نامەبەری کەسی بەکارهێناوە بۆ گواستنەوەی زانیاری نهێنی سەبارەت بە سیاسەتی دەرەوە و هەڕەشە ئەمنییەکانی ئەمریکا.
بۆڵتۆن، لە بەیاننامەیەکدا، وێڕای پێداگری لەسەر بێتاوانی خۆی، ئیدارەی ترەمپی بە "تۆڵەسەندنەوەی سیاسی" تۆمەتبار کرد و ترەمپیش لە وەڵامی ئەو تۆمەتانەی کە ئاراستەی جۆن بۆڵتۆن کراوە، بە رۆژنامەنووسانی راگەیاندووە کە ئاگاداری ئەو تۆمەتە نییە و بۆڵتۆنی بە “کەسێکی خراپ” ناوبردووە.
جێی باسە لە چەند رۆژی رابردوشدا، لێتیتیا جەیمس، داواکاری گشتی نیویۆرک، کە نەیاری سەرسەختی دۆناڵد ترەمپە، بە تۆمەتی ساختەکاری لە بانکەکان و لێدوانی ناڕاست بۆ دامەزراوەیەکی دارایی لە سەر کڕینی خانوویەک لە ڤێرجینیا تۆمەتبارکرا و ناوبرا دەستی تۆمەتی بۆ دۆناڵد ترەمپ راکێشا و رایگەیاند؛ ترەمپ سود لە خراپ بەکارهێنانی سیستەمی دادوەری بۆ تۆڵەسەندنەوەی سیاسی وەردەگرێت بە هەر نرخێک بێت.
ڤۆلۆدیمێر زیلێنسکی، سەرۆکی ئۆکراین گەشتە ئەمریکا و بڕیار وایە لەگەڵ دۆناڵد ترەمپ کۆببێتەوە و رایگەیاند پێشبینی دەکەن ئەو زەبروزەنگەی بۆ وەستاندنی شەڕ لە رۆژهەڵاتی ناوەڕاستدا سەرکەوتوو بوو، ببێتە هۆکارێک بۆ کۆتاییهێنان بە شەری روسیا دژی ئۆکراین.
ڤۆلۆدیمێر زیلێنسکی لەگەڵ گەشتنی بە واشنتۆن، رایگەیاند لەگەڵ کۆمپانیاکانی چەک کۆدەبێتەوە بۆ بەهێزکردنی سیستەمی بەرگری ئاسمانی وڵاتەکەی و جەختیکردەوە لە ئێستادا روسیا کەرتی وزەی وڵاتەکەی دەکاتە ئامانج و ئەوانیش هەوڵی مانەوە و بەرگریکردن دەدەن.
دەشڵێت؛ سبەینێ لەگەڵ سەرۆک ترەمپ کۆدەبێتەوە و پێشبینیش دەکات ئەو زەبرەی بوە هۆی وەستاندنی شەڕ، لە رۆژهەڵاتی ناوەڕاستدا، یارمەتیدەر بێت بۆ کۆتاییهێنان بە شەڕی روسیا دژی ئۆکراین.
سەرۆکی ئۆکراین هێرشیکردوەتە سەر سەرۆکی روسیا و وتویەتی؛ پوتن لە حەماس ئازاتر نییە تا بە رێککەوتنی شەڕ رازی نەبێت، لە ئێستاوە دەتوانن ببینن کە مۆسکۆ هەر کە گوێی لە تۆماهۆک بوو، پەلە دەکات بۆ دەستپێکردنەوەی گفتوگۆ.
لەبارەی گەیشتن بە رێککەوتنیش بۆ کۆتاییهێنان بە جەنگی نێوان وڵاتەکەی و روسیا، دەڵێت؛ نابێت هیچ بەدیلێک هەبێت جگە لە ئاشتی و ئاسایشی تەواوەتی و پاراستنی خەڵک لە هێرشەکانی روسیا .
دۆناڵد ترەمپ سەرۆکی ئەمریکا رایگەیاندووە؛ ئەگەر حەماس بەردەوام بێت لە کوشتنی خەڵک لە غەززە، کە بەشێک نەبووە لە رێککەوتنەکە، ئەوا هیچ بژاردەیەکی تریان نابێت جگە لەوەی بچنە ناو غەززە و بیانکوژن.
ئەمڕۆ پێنجشەممە، سەرۆکی ئەمریکا لە تۆڕی کۆمەڵایەتی تروس، کەخۆی خاوەندارێتی دەکات پەیامێکی توندی ئاراستەی حەماس کرد و تێیدا هاتووە؛ ئەگەر بەردەوام بن لە کوشتنی خەڵکی ناو غەززە، ناچار دەبن دەستبکەن بە کوشتنیان و بژاردەی تریان نابێت، ترەمپ پێشتریش رایگەیاندبوو ئاگایان لە کارەکانی حەماسە و بە وردی چاودێریان دەکەن کە دەستیان کردوە بە لەناوبردنی نەیارەکانیان.
لە چەند رۆژی رابردوودا، چەند گرتە ڤیدیۆییەک بڵاوکرایەوە کە تێیدا چەکدارەکانی حەماس ژمارەیەک هاووڵاتی رەمی دەکەن بە بیانوی هاوکاریکردنی ئیسرائیل.
ئاژانسی رۆیتەرزیش گرتەڤیدیۆییەکانی لەسەر زاری چەکدارانی حەماسەوە پشتراستکردبوەوە و رایگەیاندبوو، لەدوای ئاگربەستەوە حەماس لاینیکەم 32 کەسی لە غەززە کوشتووە و لەهەوڵی خۆبەهێزکردنەوەدان.
ئەمە لە کاتێکدایە، کە بە گوێرەی پلانی ئاشتی دۆناڵد ترەمپ، دەبێت حەماس خۆیان هەڵبوەشێننەوە و چەکەکانیان دابنێن، ئەم داواکارییەش تا ئێستا لەلایەن حەماسەوە رەتدەکرێتەوە.
دۆناڵد ترەمپ، دوای پەیوەندییە تەلەفونییەکەی لەگەڵ سەرۆکی روسیا رایگەیاند، سەرۆک پوتن پیرۆزبایی بەدیهێنانی ئاشتی لە رۆژهەڵاتی ناوەڕاست لێکردوە، دەشڵێت لەگەڵ پوتندا لە وڵاتی هەنگاری کۆدەبێتەوە بۆ ئەوەی بزانێت دەتوانن کۆتایی بەجەنگی شەرمەزارکەری نێوان روسیا و ئۆکراین بهێنن.
ئەمڕۆ پێنجشەممە، دۆناڵد ترەمپ لەگەڵ فلادیمێر پوتنی سەرۆکی روسیا پەیوەندییەکی تەلەفونیان ئەنجامدا و لە تۆڕی کۆمەڵایەتی تروس، کە خۆی خاوەندارێتی دەکات بڵاویکردوەتەوە کە گفتوگۆیەکی بەرهەمداریان لەگەڵ سەرۆک پوتندا ئەنجامداوە.
ترەمپ ئاماژەیبەوەشکردوە؛ پوتن پیرۆزبای لێکردوە و سوپاسی خانمی یەکەمی ئەمریکاشی کردوە بۆ هەوڵ و کارەکانی لەسەر پرسی منداڵان.
لە بەشێکی دیکەی پۆستەکەیدا، سەرۆکی ئەمریکا نوسیویەتی؛ پەیوەندییە بازرگانییەکانی نێوان واشنتۆن و مۆسکۆیان لەدوای کۆتایی هاتنی جەنگی روسیا و ئۆکرانیا تاوتوێ کردووە و رێککەوتن لەسەر ئەنجامدانی کۆبوونەوەی راوێژکارە باڵاکانی هەردوو وڵات لە هەفتەی داهاتوودا.
ناوبراو ئەوەشی خستوەتەڕوو، دواتر خۆشی لەگەڵ پوتن لە بوداپێستی پایتەختی هەنگاریا کۆدەبنەوە و تاوتوێی کۆتاییهێنان بەو "جەنگە شەرمەزارییە"ی نێوان روسیا و ئۆکراین دەکەن.
قائیمقامی قەزای رانیە بڵاویکردوەتەوە، بە هاوبەشی لەگەڵ لیژەکانی قائیمقامیەت پشکنینان بۆ چەند جۆرێک لە خورما کردوە، کە بە شێوەی ناتەندروست هێندراونەتە سنوری ئیدارەی راپەڕین، دوای ئەوەی بۆیان دەرکەوتووە خراپ بووە، دەستیان بەسەردا گرتووە کە 540 کیلۆگرام بوە و خاوەنەکەشی لێپێچینەوەی یاسایی لەگەڵدا دەکرێت.
ئەمڕۆ پێنجشەممە، لە راگەیەندراوێکدا قائیمقامی قەزای رانیە بڵاویکردوەتەوە لە بازگەی قەمتەران دەست بەسەر 540 کیلۆگرام خورمادا گیراوە و دوای ئەوەی لەلایەن لێژنەی خۆراکوە دڵنیابوونەتەوە بەهای خۆراکیان لەدەستداوە هەڵساون بە تەلەفکردن و لەناوبردنی.
لەڕاگەیەندراوەکەدا ئەوەش هاتووە؛ بەهۆی دانەپۆشینی و نە پاراستنی لە تیشکی خۆر، هەروەها بوونی ئاسەواری گەرا و پاشەڕۆی کۆگا و بارکردنی لەگەڵ سوتەمەنی لەجۆری بەنزین، خورماکان بە تەواوەتی خراپ بوون.
ئاماژەی بەوەشکردوە؛ دوای دەستبەسەراگرتنی خورماکە، ڕێکاری پێویستو یاسایی بۆ خاوەنەکەشی گیراوەتە بەر، کە هاووڵاتییەکی بە نەتەوە عەرەبە و روبەڕوی یاسا کراوەتەوە.
دوای ئەوەی حەماس رایگەیاند، ناتوانن بە ئاسانی تەرمی بارمتەکان بدۆزنەوە، ئاژانسی فرانس پرێسی فەرەنسی بڵاویکردوەتەوە، تورکیا بە ناردنی تیمێکی پسپۆڕ بەشدار دەبێت لە دۆزینەوەی تەرمی بارمتە ئیسرائیلیەکان لە غەززە.
فرانس پرێس لەسەر زاری وەزارەتی بەرگری تورکیاوە رایانگەیاند؛ ئەنقەرە بە ناردنی تیمێکی پسپۆڕ بەشداری لە گەڕان بەدوای تەرمی بارمتەکان دەکات و ئۆپەراسیۆنەکە لەلایەن رزگارکەرانی دەزگای بەڕێوەبردنی کارەسات و فریاکەوتن (AFAD)ـوە ئەنجام دەدرێت.
بەگوێرەی زانیارییەکان، ئەو تیمە لە81 کەس پێکدێن و بە هەماهەنگی لەگەڵ وەزارەتی دەرەوەی تورکیا، لە ئێستادا لە ناو غەززەن.
ئاژانسەکە ئەوەشی خستوەتەروو، تیمەکە پسپۆڕن و لە ساڵانی رابردوودا بەشداریان لە ئەرکەکانی فریاگوزاری و یارمەتییە مرۆییەکان لە 50 وڵات زیاتر کردوە لە وانە؛ سۆماڵ، فەلەستین، ئیکوادۆر، فلیپین، نیپاڵ، یەمەن، مۆزەمبیق و چاد.
ئەمە لەکاتێكدایە درەنگانێکی شەوی رابردوو، حەماس دوو تەرمی دیکەی بارمتەکانی رادەستی خاچی سور کرد و رایگەیاند، تەواوی تەرمەکانی بەردەستیان رادەست کردوە، بۆ دۆزینەوەی تەرمەکانی تر پێویستیان بە ئامێری تایبەت و کاتی زیاترە.
ئیدارەی سەربەخۆی راپەڕین بڵاویکردوەتەوە، بۆ زیاتر خزمەتکردنی سنوری قەزای پشدەر، بە پشتیوانی قوباد تاڵەبانی ٪20ـی داهاتی مەرزی کێلێ، بە شێوەی نەختینەی مانگانە بۆ تەواوکردنی پرۆژەکانی سنورەکە خەرج دەکرێت.
ئەمڕۆ پێنجشەممە، ئیدارەی سەربەخۆی راپەڕین لە پەڕەی رەسمی خۆیان لە فەیسبووک بڵاویانکردوەتەوە، لە درێژەی هەوڵە بەردەوامەکانی هیوا قەرەنی سەرپەرشتیاری ئیدارەی سەربەخۆی راپەڕین بۆ زیاتر خزمەتکردنی سنوری قەزای پشدەر و بە پشتیوانی بەڕێز قوباد تاڵەبانی جێگری سەرۆک وەزیران، توانرا رەزامەندی وەربگیرێت بۆ تەرخانکردنی بڕی لە %20 ی داهاتی مەرزی کێلێ بۆ خزمەتکردنی ناوچەکە.
ئاماژەی بەوەشکردوە؛ ئەو بڕە داهاتە بە شێوەی نەختینەی مانگانە و بۆ تەواوکردنی پڕۆژە بەردەوام و وەستاوەکانی سنوری قەزای پشدەر لە ئیدارەی سەربەخۆی ڕاپەڕ خەرج دەکرێت.
ئیدارەی سەربەخۆی راپەڕین دەشڵێت؛ ئەم هەنگاوە دەبێتە مایەی خزمەتی زیاتر بۆ خەڵکی سنوری قەزای پشدەر و ئەنجامدانی پڕۆژەی زیاتر لەو قەزایە.
بەڕێوەبەرایەتی گشتیی دژەتیرۆر روونکردنەوەیەکی بڵاوکردووەتەوە و تێێداهاتووە: روونکردنەوەکە بۆ ئەوانەیە کە دروشمی (هەڵهاتنیش دەبێت)یان بەرزکردبووەوە.
دەقی روونکردنەوەکە
ڕوونکردنەوەیەک لە بەڕێوبەرایەتیی گشتیی دژەتیرۆر بۆ ئەوانەی دروشمی (هەڵهاتنیش دەبێت)یان بەرزکردبووەوە
ئەمڕۆ 16-10-2025، پەڕەی فەرمی گروپێکی چەکداری لۆکاڵیی کۆمەڵێک دیمەن و وتەیان بڵاوکردوەتەوە کە هەر شایستە بەوانە، جیا لەوەی سەرلەبەری بلاوکراوەکانیان درۆ و چەواشەکاریە، بەپێویستمان زانی ڕوونکردنەوە لەسەر یەکێک لە دیمەنەکان بدەین کە گوایا تەنسیقی نێوان هێزەکانی بەڕێوبەرایەتیی گشتیی دژەتیرۆر-CTG و هێزی دژەتیرۆری عێراقە لە ڕۆژی 16ـی ئۆکتۆبەر، کە ئەمە سەرلەبەری درۆیە و بەڵکو دیمەنەکە هی ئۆپەراسیۆنێکی هاوبەشی نێوان هێزەکانی دژەتیرۆر و دەزگای ئاسایشی هەرێم و دژەتیرۆری عێراقە لە ڕۆژی 13-07-2020 کە ئۆپەراسیۆنێکی هاوبەشە لە سنوری پارێزگای دیالە بۆ دۆزینەوە و کێوماڵکردنی شانە نوستووەکانی داعش.
هێزەکانی بەڕێوبەرایەتیی گشتیی دژەتیرۆر وەک بەشێک لە هاوپەیمانیی نێودەوڵەتیی بۆ بەرەنگاربوونەوەی داعش هاوئاهەنگیی لەگەڵ سەرجەم هێزەکانی ناو ئەو هاوپەیمانییە دەکەن و چالاکییەکانیش لە سەرجەم پێگە فەرمییەکانمان بەردەستن کە بەشێکن لە هەوڵە بەردەوامەکانی دژەتیرۆر بۆ لەناوبردنی مەترسییەکانی پاشماوە و شانە نوستوو و چالاکەکانی تیرۆرستان.
بۆیە لامان سەیر نییە هێزێکی لۆکاڵی کە سەرجەم چالاکییەکانی لە وێنەگرتن و سەرکوتی چالاکوان و ڕۆژنامەنووس و خۆپیشاندان و بوونە کلاوسووری بەرلەشکری دوژمن کۆدەبێتەوە لەم چالاکییە گرنگ و نێودەوڵەتیانە تێبگات، با ئەو هێزە لۆکاڵیە سەرقاڵی کاری خۆیان بن و ئیشی گەورەی وەک ڕووبەڕووبنەوەی تیرۆر و چەسپاندنی یاسا و پاراستنی هەولێر و ئازادکردنی مەخمور لەو ڕۆژانەی ئەوان (هەڵهاتنیش دەبێت)یان کردبووە دروشمی خۆیان بۆ ئێمە جێبهێڵن.
دیمەن و هەواڵی چالاکییەکە لە پێگەی فەرمیی دژەتیرۆری عێراق
https://www.facebook.com/share/p/16RtQCvSwQ/
بەڕێوبەرایەتیی گشتیی دژەتیرۆر
قوباد تاڵيبانی لە میانی کۆبونەوەی لەگەڵ هاووڵاتیان و لایەنگرانی یەکێتی لە نازەنین رایگەیاند، راستییەکی تاڵە، بەڵام حاشاهەڵنەگرە لە دوای نەخۆشکەوتنی سەرۆک مام جەلال کە حزوری یەکێتی لە بەغدا لاوازبوو، کە پێگەی یەکێتی لە کوردستانیش لاوازبوو، دۆخی ئابووری و ژیان و گوزەرانی خەڵکی کوردستانیش لاواز بوو.
ئەمڕۆ پێنجشەممە، قوباد تاڵەبانی لەمیانی سەردانەکانیدا لە نازەنین قسەی بۆ هاوڵاتییان و لایەنگرانی یەکێتی کرد و ئاماژەی بەوەدا؛ هەمووان دەزانن چەندین بڕیاری ستراتیژیی هەڵە دران کە ژیان و گوزەرانی خەڵکی کوردستانیان تێکدا و پێگەی هەرێم و قەوارەی هەرێمیان خستە مەترسییەوە.
دەشڵێت؛ لەگەڵ برای بەڕێز و خۆشەویستم کاکە شاڵاو و هەروەها برای خۆشەویستم کاک لیوا ئەیوب و لەناو کۆڕی هەڤاڵانمان لە نازەنین، جەختیان کردەوە کە ئەم یەکێتییەی ئەمڕۆ بەهێزترە لە هەر کاتێكی دیکە و خاوەنی بڕیاری خۆیەتی.
ئاماژەی بەوەشکردوە؛ ئەم یەکێتییە بە سەرۆکایەتیی سەرۆک بافڵ کێشەکانی خەڵکی کوردستان لە بەغداوە چارەسەر دەکات و رێگە نادات کەس بە بڕیار و سیاسەتی هەڵە جارێکی تر ژیان و گوزەرانی خەڵک و داهاتووی هەرێم بخاتە مەترسییەوە.
جەختیشیکردوەتەوە لەوەی کە با بۆ هەموو لایەک روون و ئاشکرابێت، یەکێتی خاوەنی قسەی خۆیەتی، وەکچۆن هاوسەنگی هێزی رێکخستەوە، وەکچۆن لە کەرکوک قسە و بەڵێنی خۆی بردەسەر، وەکچۆن بەبێ رەزامەندی یەکێتی و سەرۆک بافڵ حکومەتی هەرێم پێکنایەت، بە دڵنیاییشەوە ئەمجارەش قسەی خۆی دەباتەسەر و لە بەغداوە کێشەکانی هەرێم چارەسەر دەکات.
حوسییەکانی یەمەن، پشتراستیان کردەوە، لە هێرشەکانی مانگی شەشی ئەمساڵدا ئیسرائیلدا بۆسەر یەکێک کۆبونەوەکانیان لە سەنعای پایتەخت، محمد عەبدولکەریم ئەلغمەری، سەرۆکی ئەرکانی سوپاکەیان کوژراوە و راشیدەگەیەنن تۆڵەی دەکەنەوە.
ئەمڕۆ پێنجشەممە لە راگەیەندراوێکدا، حوسییەکانی یەمەن، کوژرانی سەرۆک ئەرکانی سوپاکەیان راگەیەنداوە ئاماژەیان بەوەکردوە؛ بازنەی ململانێ لەگەڵ دوژمن کۆتایی نەهاتووە و سوپای ئیسرائیل سزای خۆی وەردەگرێت بەرامبەر بەو تاوانەی ئەنجامیان داوە.
لە راگەیەندراوەکەی حوسییەکاندا ئاماژە بە وادەی گیانلەدەستدانی ئەو بەرپرسە سەربازییە نەکراوە، بەڵام مانگی حوزەیرانی رابردوو، پێگەی هەواڵی ئاکسیۆسی ئەمریکی ئاشکرای کرد کە ئیسرائیل بۆردومانی کۆبوونەوەی ئەنجومەنی باڵای سەربازی حوسییەکانی لە سەنعای پایتەختی یەمەن کردوە و هەوڵی کوشتنی سەرۆک ئەرکان و چەند بەرپرشێکی حوسییەکانی داوە.
ئەلغەمەری جگەلەوەی سەرۆکی ئەرکانی حوسییەکان بووە، بە ئەڵقەی پەیوەندی نێوان ئەو گرووپە و سوپای پاسدارانی ئێران دادەنرا، بەتایبەتی سەبارەت بە هەماهەنگی سەربازی و پشتیوانی مەیدانی.
ئەمە لە کاتێكدایە، حوسییەکان لەکاتی هێرشەکەی ئیسرائیلدا و چوار مانگ پیس ئێستا رایانگەیاند بوو، ئیسرائیل شکستی هێناوە لە کوشتنی سەرۆکی ئەرکانی سوپاکەیان و ئەو سەلامەتە.
وەزارەتی خوێندنی باڵا و توێژینەوەی زانستی بڕیارێکی نوێی دەرکرد، بەمەبەستی ئاسانکاری بۆ خوێندکارانی وەرگیراوی ساڵی خوێندنی (2025-2026) لە ئەنجامدانی مامەڵەی دەستەبەر (کەفالەت).
بەپێی ئەم بڕیارە، دەسەڵاتی دادنووسی دراوە بە بەڕێوەبەری کاروباری یاسایی لە سەرۆکایەتی زانکۆ و پەیمانگە حکومییەکان بۆ راییکردنی کاروباری دەستەبەر بۆ خوێندکاران و قوتابیان.
ئەم بڕیارە لەسەر بنەمای یاسای دادنووسی ژمارە (33)ی ساڵی (1998) و نوسراوی وەزارەتی داد ژمارە (4_28) لە رێکەوتی (2022/6/4) دەرچووە. بەمە، پێویست ناکات خوێندکاران و قوتابیانی وەرگیراو بۆ ئەنجامدانی ئەم مامەڵەیە بگەڕێنەوە بۆ فەرمانگە دادییەکان و کارەکانیان لەناو سەرۆکایەتی زانکۆ و پەیمانگەکاندا بۆیان رایی دەکرێت.