بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغداد لەگەڵ هادی عامری، سەرۆکی هاوپەیمانیی فەتح لە بەغداد کۆبوونەوە و باس لە چارەسەرکردنی کێشەکانی هەرێم و بەغداد و بەڕێوەچونی هەڵبژاردنێکی بێگردیان کرد.

ئەمڕۆ یەکشەممە، لە میانی کۆبوونەوە و سەردانە فراوانەکانیدا، بافڵ جەلال تاڵەبانی، سەرۆکی یەکێتیی نیشتمانیی کوردستان هادی عامری، سەرۆکی هاوپەیمانیی فەتح لە بەغداد کۆبوونەوە.

لە کۆبوونەوەکەدا نزار ئامێدی، ئەندامی مەکتەبی سیاسیی یەکێتی و د. خالید شوانی، وەزیری دادی عیراق ئامادەیبوون، بە گرنگییەوە ئاماژە بە پەیوەندی دۆستانە و لەمێژینەی نێوان هەردوولا کرا.

جگە لە باسکردنی هەلومەرجی سیاسیی عیراق و پرسی هەڵبژاردن، جەخت لە بەڕێوەچوونی هەڵبژاردنێکی پاک و بێگەردیش کرایەوە.

بنیامین ناتانیاهۆ، رایگەیاند؛ گەڕانەوەی بارمتەکان روداویكی مێژوویە بۆ ئیسرائیل و جەختیشیکردەوە سەرکەوتنی گەورەیان بەدەستهێناوە، بەڵام شەڕەکە کۆتایی نەهاتووە و روبەڕووی ئاڵنگاری گەورەی ئەمنی دەبنەوە.

ئەمڕۆ یەکشەممە، لە پەیامێکی دا بۆ هاووڵاتیانی ئیسرائیل، بنیامین ناتانیاهۆ رایگەیاند، “ئەمشەو شەوێکی سۆزدارییە، تێکەڵ بە فرمێسک و شادییە، چونکە سبەینێ منداڵەکانمان دەگەڕێنەوە زێدی خۆیان”.

ئاماژەی بەوەشکرد؛ ئەمە روداوێکی مێژووییە کە خەمی ئازادکردنی بکوژەکان لەگەڵ خۆشی گەڕانەوەی بارمتەکان تێکەڵ دەکات، روداوێک کە هەندێک باوەڕیان نەبوو روبدات، بەڵام سەربازەکانیان باوەڕیان هەبوو، زۆر کەس باوەڕیان هەبوو، منیش باوەڕم هەبوو.

جەختیشیکردەوە کە ئەم سەرکەوتنەی بەدەستیان هێناوە جیهانی سەرسامکردوە، ئەوان لە هەر شوێنێک شەڕیان کردبێت سەرکەوتوبوون.

دەشڵێت؛ دوای ئەو سەرکەوتنەی بەدەستیانهێناوە، ئێستا دەرفەتی گەورەترلەبەردەمماندایە؛ دەرفەتێک کە پێشتر ئەزموونیان نەکردووە.

دامەزراوەی سەرۆک جەلال تاڵەبانی بڵاویکردوەتەوە، رۆژی یەکشەممە رێکەوتی 12ی 10ی 2025 ، کە هاوکاتە لەگەڵ دەیەمین رۆژی پیشانگەی نێودەوڵەتیی سلێمانی بۆ کتێب خولی سەرۆک تاڵەبانی سوپاس و پێزانین بەخشرایە دامەزراوەکەیان.

لەگەڵ بڵاوکردنەوەی چەند وێنەیەک نوسیویانە؛ لە مەراسیمێکدا بەبۆنەی هاوکاری و بەشداریی سەرەکی لە پیشانگەی نێودەوڵەتیی سلێمانی بۆ کتێب خولی سەرۆک تاڵەبانی سوپاس و پێزانین بەخشرایه دامەزراوەی سەرۆک جەلال تاڵەبانی.

ئاماژەیان بەوەشکردوە؛ لەهەمان مەراسیمدا رێز و سوپاسی وەزارەتی رۆشنبیری و لاوانی حکومەتی هەرێمی کوردستان بەخشراوەتە دامەزراوەکە.

رۆژی هەینی رێکەوتی 3ی 10ی 2025 بە بەشداری بەڕێز قوباد تاڵەبانی، لێپرسراوی مەکتەبی سکرتارییەتی سەرۆک مام جەلال و بەڕێز باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی و بەڕێز شانازخان، خانمی یەکەمی عیراق و بەڕێز حەمەی حەمە سەعید، وەزیری ڕۆشنبیری و لاوانی حکومەتی هەرێمی کوردستان و بەڕێز هەڤاڵ ئەبوبەکر، پارێزگاری سلێمانی پێشانگای نێودەوڵەتیی سلێمانی بۆ کتێب خولی سەرۆک تاڵەبانی کرایەوە.

پیشانگەکەی ئەم ساڵ جیاواز و بەبەشدارییەکی سەرەکی دامەزراوەی سەرۆک جەلال تاڵەبانی و ناوەندە ناوخۆیی و جیهانییەکان بە شێوەیەکی فراوانتر و جیاوازتر بوو، ملیۆنان کتێب و سەدان هەزار ناونیشان بە زمانە جیاوازەکان نمایش کراون.

 سبەینێ کۆتا ڕۆژی پێشانگاکەیە، وەک دانراوە و بۆ ماوەی 11 رۆژ و لە رێکەوتی 3 تا 13ی 10ی 2025 پێشوازی لە کتێب دۆستان دەکات

 

بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغداد لەگەڵ موسەنا سامەڕائی، سەرۆکی ھاوپەیمانیی عەزم کۆبووەوە و باس لە چارەسەرکردنی کێشەکانی هەرێم و بەغداد و بەڕێوەچونی هەڵبژاردنێکی بێگردیان کرد.

ئەمڕۆ یەکشەممە، لە میانی کۆبوونەوە  و سەردانەکانیدا، بافڵ جەلال تاڵەبانی، سەرۆکی یەکێتیی نیشتمانیی کوردستان لەگەڵ موسەنا سامەڕائی، سەرۆکی ھاوپەیمانیی عەزم لە بەغداد کۆبووەوە.

لە کۆبوونەوەکەدا چارەسەرکردنی تەواوەتی کێشەکانی نێوان هەرێمی کوردستان و عیراق لەسەر بنەمای دەستوور و رێککەوتنە سیاسییەکان بە گرنگ زانرا.

پرسی هەڵبژاردنی ئەنجوومەنی نوێنەرانی عیراق خرایە بەر باس و جەخت لە بەڕێوەچوونی هەڵبژاردنێکی پاک و بێگەردیش کرایەوە.

ئەندامێكی مەكتەبی سیاسی یەكێتی دەڵێت، بەرنامەی حزبەكەی کە ئاوەدانکردنەوە  خزمەتگوزاری زیاترە، بە یەكێتییەكی بەهێز دەكرێت.

سەعدی ئەحمەد پیرە ئەندامی مەكتەبی سیاسی یەكێتیی نیشتمانیی كوردستان لە كۆنفرانسێكی رۆژنامەوانیدا رایگەیاند، بەرنامەی ئاوەدانكردنەوە و خزمەتگوزاری و پێشخستنی هەرێمی كوردستان بە كێتییەكی بەهێز دەكرێت، لە ناو ئەنجومەنی نوێنەران.

ئاماژەی بەوەشکرد؛  سەردانی سەرۆك بافڵ بۆ بەغداد، بۆ بەهێزكردنی پەیوەندییەكان و باشترکردنی رەوشی دارایی هەرێمە.

لەبارەی دڕاندنی فلێكس و پۆستەری كاندیدەكانی یەكێتیش، وتی، ئەگەر بەهێزی چەكدار ئەو كارە بكرێت، كارێكی خراپە و پێویستە لایەنەكەن لە ئاستی بەرپرسیارێتیدا بن و رێگە نەدەن رەوشی سیاسی و هەڵمەتی هەڵبژاردن بشێوێنرێت.

 

قوباد تاڵەبانی لە کۆبونەوەی لەگەڵ هەڤاڵانی بازنەی ١٣ی بەحرەکە و بازنەی حەوتی کوڕان رایگەیاند؛ یەکێتی پێیوایە پرۆسەی گەشەپێدانی هەرێمی کوردستان هاوکات لەگەڵ سەقامگیریی سیاسی و ئەمنی، پێویستیی بە سەقامگیریی داراییشە.

ئاماژەی بەوەشکرد؛ لەپێناو سەقامگیریی دارایی و بووژانەوەی بازاڕدا هەموو توانای خۆیان چڕکردووەتەوە بۆ رێککەوتنێکی گشتگیر و بنەڕەتی لەگەڵ بەغداد.

 لە کۆبونەوەکەدا قوباد تاڵەبانی باسی لە هەوڵەکانی سەرۆک بافڵ تاڵەبانی کرد لە بەغداد و جەختیکردەوە جێی خۆیەتی وەک ئەندازیاری رێککەوتن ناوی بهێنرێت و داواشی لە هەڤاڵان کرد بچنە ناو جەماوەری خۆشەویستی هەولێر و روونی بکەنەوە دەنگدان بە یەکێتی، دەنگدانە بە رێککەوتن و سەقامگیریی دارایی لە هەرێمی کوردستان.

وتەبێژی حکومەتی ئیسرائیل ڕایگەیاند، بەرەبەیانی سبەینێ دووشەممە پرۆسەی ئازادکردنی بارمتەکان دەستپێدەکات، ئەوەشی خستوەتە روو، بارمتەکان رادەستی خاچی سور دەکرێن و دواتر بە رێوشوێنی ئەمنی دەگوازرێنەوە بۆ ئیسرائیل.

ئەمڕۆ یەکشەممە، دەیڤید مینسەری وتەبێژی ئیسرائیل رایگەیاندوە؛  حەماس پابەندە بە ئازادکردنی 20 بارمتە لە بەرامبەر ئازادکردنی 2000 فەلەستنی.

ناوبراو وتوشیەتی؛ پڕۆسەکە بەرەبەیانی سەبەینێ ئەنجامدەدرێت و خاچێ سور بارمتەکان لە حەماس وەردەگنو  دواتر دەیانگوازنەوە بۆ ئیسرائیل.

لەبارەی تەرمی بارمتەکانیشەوە ئاماژەی بەوەداوە، تەرمەکان لە ڕێورەسمێکی رێزدارانەدا رادەستی خێزانەکانیان دەکرێنەوە.

پرۆسەکە لەیەک کاتدا و لە ژێر چاودێری کۆمیتەی نێودەوڵەتی خاچی سووردا ئەنجام دەدرێن و وتوشیەتی؛ 400 بارهەڵگر کە هاوکاری مرۆیین؛ خۆراک، سووتەمەنی و دەرمانیان تێدایە، لە رێگەی دەروازەی ڕەفەحەوە دەچنە ناو غەززە.

ئەمە لە کاتێكدایە، میدیاکانی ئیسرائیل پێشتر بڵاویان کردبوەوە، لەلایەن سوپای ئیسرائیلەوە پەیوەندی کراوە بە بەشێک لە کەسوکاری بارمتەکانەوە  و ئاگادارکراونەتەوە کە بارمتەکانی ئەوانی تێدا نییە.

سوپای پاکستان رایگەیاند، شەوی ڕابردوو لە هێرشەکانی سەر بنکەسەربازییەکانیان لەلایەن تاڵیبانەوە زیاتر لە 200 چەکداری تاڵیبان و ئەندامانی داعش و گروپی تی تی پی کوژراون، و لە بەرامبەردا 23 سەربازیان کوژراوە و 29 سەربازی تریان بریندار بوون.

سوپای پاکستان راگەیەندراوێكی لەسەر شەڕوپێکدادانەکانی دوێنێ شەوی نێوان وڵاتەکەیان و تاڵیبان بڵاوکردوەتەوە  و تێیدا هاتوو؛ زیاتر لە 20 چەکداریان کوشتووە کە سەر بە تاڵیبانی پاکستان، تاڵیبان و چەکداری داعش بوون، دەستیشیان گرتووە بەسەر 21 بنکەی سەربازی تاڵیباندا.

ئەمڕۆ یەکشەمە، دوای شەڕی دوێنێ شەوی نێوانیان، پاکستان و تاڵیبان ئاماری جیاواز لەبارەی شەڕەکەوە بڵاو دەکەنەوە،  تاڵیبان رایگەیاندوە 58سەربازی پاکستانیان کشتوە و پاکستانیش دەڵێت؛ زیاتر لە 200 چەکداری تاڵیبان کوژراون.

پاکستان پشتڕاستیشیکردوەتەوە، سەرەرای هۆشدارییەکانی تاڵیبان،  بەرەبەیانی ئەمڕۆ بە هێرشی ئاسمانی چەند بنکەیەکی ئەمنی تاڵیبانیان لە پارێزگاکانی هێلمەند، پاکتیکا و قەندەهار کردوەتە ئامانج و سەرۆک وەزیرانی پاکستان، شەهباز شەریف رایگەیاند، سوپای وڵاتەکەی وەڵامێکی توندی  تاڵیبانیان داوەتەوە.

ئەمە لە کاتێكدایە، تاڵیبان  لەسەر زاری وتەبێژەکەی رایگەیاندوە؛ هێزەکانیان لە کاتی پێکدادانەکانی دوێنێشەودا، رایگەیاند 25 بنکەی سەربازی پاکستانیان کۆنتڕۆڵکردوە و 58 سەربازیشیان کوشتوە و 30 سەربازی تریش بریندارن.

بافڵ جەلال تاڵەبانی، سەرۆکی یەکێتیی نیشتمانیی کوردستان لە بەغداد لەگەڵ محەمەد حەلبوسی، سەرۆکی حیزبی تەقەدوم کۆبووەوە.

لە کۆبوونەوەکەدا کە نزار ئامێدی، ئەندامی مەکتەبی سیاسیی یەکێتی و د. خالید شوانی، وەزیری دادی عیراق ئامادەیبوون، هاریکاری و هەماهەنگی نێوان هەردوولا خرایە بەر باس و دووپات لە پەرەپێدانی پەیوەندییەکانی نێوانیان کرایەوە بۆ کارکردنی پێکەوەیی و زیاتر خزمەتکردنی کۆمەڵانی خەڵک.

کۆبوونەوەکە جەختی لە ئەنجامدانی هەڵبژاردنێکی پاک و بێگەرد کردەوە کە گوزارشت لە ئیرادەی سەرجەم هاووڵاتییان و نەتەوە و پێکهاتەکانی وڵات بکات.

سەبارەت بە کێشەکانی نێوان هەولێر و بەغداد لە کۆبوونەوەکەدا بیروبۆچوون ئاڵوگۆڕکرا و بافڵ جەلال تاڵەبانی رایگەیاند، یەکێتی پابەندە بە بنەما نیشتمانییەکانەوە و بەرژەوەندیی خەڵکەکەمان لە بەغداد دەبینێت، بۆ ئەوەش بەردەوام دەبین لە هەوڵەکانمان بۆ دابینکردنی موچەی خەڵکەکەمان و زامنکردنی ژیانیان.

دوای کوژرانی دەیان کەس لە هێرشەکانی دوێنێی سەر سنووری نێوان پاکستان و ئەفغانستان، هێشتا هەردوولا هەڕەشە لەیەکتر دەکەن و وڵاتانی نێوەندگیریش لە هەوڵی هێورکردنەوەی دۆخەکەدان.

ذەبیحوڵڵا موجاهید، وتەبێژی حکومەتی ئەفغانستان، رۆژی یەکشەممە رایگەیاند کە هێزەکانیان لە ئۆپەراسیۆنێکی شەوانەدا لەسەر سنوور 58 سەربازی پاکستانییان کوشتووە.

ذەبیحوڵڵا موجاهید لە کۆنگرەیەکی رۆژنامەوانیدا وتی: "لەم پێکدادانانەدا 58 سەربازی پاکستانی کوژران و 30ی دیکەش بریندار بوون"، ئاماژەی بەوەشدا کە "9 لە هێزەکانی تاڵیبانیش کوژراون".

هەروەها ئەمڕۆ یەکشەممە، ئەمیر خان موتق، وەزیری دەرەوەی ئەفغانستان، رایگەیاند کە وڵاتەکەی "ئامانجەکانی بەدەست هێناوە" لە ئۆپەراسیۆنەکەی شەوی شەممە دژی پاکستان.

وەزیرەکە بە رۆژنامەنووسانی وت کە ئەفغانستان "دەیەوێت پەیوەندی باشی لەگەڵ پاکستان هەبێت"، بەڵام هەڕەشەی ئەوەشی کرد کە "ئەگەر ئیسلامئاباد نەیویست دیالۆگ بکات، ئەوا بە شێوازی دیکە مامەڵە لەگەڵ دۆخەکەدا دەکەن". ناوبراو وتیشی کە "دۆخی سنوور لەگەڵ پاکستان لە ئێستادا ئاساییە"، داوای لە ئیسلامئاباد کرد "کێشەی بزوتنەوە چەکدارییەکان لەناو سنورەکانی خۆیدا کۆنتڕۆڵ بکات".

لەلایەکی دیکەوە، وەزیری دەرەوەی ئەفغانستان رایگەیاند؛ کە قەتەر و سعودیە دوای ئاڵوگۆڕی تەقە لە نێوان ئەفغانستان و پاکستان شەوی شەممە، نێوەندگیرییان کردووە. هەردوو وڵاتیش لە راگەیەندراوێکدا نیگەرانی خۆیان لەبارەی پێکدادانەکانەوە دەربڕی.

لابەرامبەردا، شەهباز شەریف، سەرۆک وەزیرانی پاکستان، ئەمڕۆ یەکشەممە هۆشداریدا بە بزوتنەوەی تاڵیبان و جەختی لەوە کردەوە کە وڵاتەکەی "لە بەرگریکردن لە خاکەکەیدا سازش ناکات" و "هەر پڕوپاگەندەیەک بە وەڵامێکی توند و کاریگەر وەڵام دەدرێتەوە".

شەریف لە لێدوانێکدا کە رۆژنامەی "زە نەیشن"ی پاکستانی بڵاوی کردووەتەوە، وتی کە سوپا وەڵامێکی بەهێز و کاریگەری دایەوە بۆ "دەستدرێژیی ئەفغانستان" لە ناوچە سنورییەکاندا و شانازی بە "لێهاتوویی پیشەیی بەرزی هێزە چەکدارەکانی پاکستان" کرد.

بەرپرسانی پاکستانی رایانگەیاند کە وڵاتەکەیان رۆژی یەکشەممە دوای ئاڵوگۆڕی تەقەی شەوانە، دەروازە سنورییەکانی لەگەڵ ئەفغانستان داخستووە.

هێزەکانی ئەفغانستان درەنگانی شەوی شەممە ئاگریان لە بنکە سنورییەکانی پاکستان بەردا، وەزارەتی بەرگری ئەفغانستان رایگەیاند کە ئەمە وەڵامێک بوو بۆ هێرشە ئاسمانییەکانی پاکستان لە ئەفغانستان هەفتەی رابردوو.

هەردوو وڵات رایانگەیاند کە ژمارەیەک بنکەی سنوری لایەنەکەی دیکەیان وێران کردووە. بەرپرسانی ئەمنیی پاکستان گرتە ڤیدیۆییەکانیان بڵاوکردەوە کە گوایە تۆپبارانکردنی بنکە ئەفغانییەکان نیشان دەدات.

بەرپرسانی ئەمنیی پاکستان رایانگەیاند کە ئاڵوگۆڕی هێرشەکان بە شێوەیەکی بەرچاو بەیانی ئەمڕۆ یەکشەممە وەستاوە، بەڵام بەپێی قسەی بەرپرسانی خۆجێیی و دانیشتووان، لە ناوچەی کورامی پاکستان، تەقەی پچڕ پچڕ بەردەوام بووە.

 

قوباد تاڵەبانی باس لە گرنگی پڕۆژەی هێڵی ٣ـی ئاوی دوکان - سلێمانی دەکات، "بۆ ماوەی ٣٠ ساڵ کێشەی کەم ئاوی شاری سلێمانی چارەسەردەکات". 

قوباد تاڵەبانی جێگری سەرۆکی ئەنجومەنی وەزیرانی حکومەتی هەرێم رایگەیاندووە، "پڕۆژەی هێڵی ٣ی ئاوی دوکان – سلێمانی، پڕۆژەیەکی گرنگ و ستراتیژیی حکومەتی هەرێمی کوردستانە و بە گوژمەی ٤٢٣ ملیۆن دۆلار جێبەجێ دەکرێت و بۆ ماوەی ٣٠ ساڵ کێشەی کەمئاویی شاری سلێمانی چارەسەر دەکات".

ئاماژەی بەوەشداوە، "بە خۆشحاڵییەوە ئەمڕۆ سەرپەرشتیی واژۆکردنی گرێبەستی جێبەجێکردنی پڕۆژەکەم کرد لەنێوان وەزارەتی شارەوانی و گەشتوگوزار و کۆمپانیای جێبەجێکار (هابیکا). هەموو هەوڵێک دەدەین پڕۆژەکە لە وادەی دیاریکراوی خۆیدا تەواو بکرێت و بکەوێتە خزمەتی هاووڵاتییانی خۆشەویستی شاری سلێمانییەوە".

بافڵ جەلال تاڵەبانی، سەرۆکی یەکێتیی نیشتمانیی کوردستان، لە بەغدا لەگەڵ د. لەتیف رەشید، سەرۆک کۆماری عیراق، کۆبوەوە.

لە کۆبوونەوەکەدا کە نزار ئامێدی، ئەندامی مەکتەبی سیاسیی یەکێتی و د. خالید شوانی، وەزیری دادی عیراق ئامادەی بوون، جەخت لەسەر چەند خاڵێکی گرنگ کرایەوە، لەوانە: پێویستی بەردەوامبوونی دیالۆگی نیشتمانی لەنێوان سەرجەم لایەنە سیاسییەکان و کارکردنی پێکەوەیی بۆ خزمەتکردنی وڵات. هەروەها، گرنگی پاراستنی ئارامی و ئاسایش و ئەنجامدانی هەڵبژاردنێکی پاک و بێگەرد دووپات کرایەوە.

لەتەوەرێکی دیکەی کۆبوونەوەکەدا، بەردەوامبوونی گفتوگۆی نێوان هەولێر و بەغدا بە پێویست زانرا. ئامانج لەم گفتوگۆیانە نەهێشتنی تەواوی بەربەستەکان و پابەندبوون بە دەستوور و یاسا بەرکارەکانە، بە شێوەیەک کە مافی هەموو لایەک پارێزراو بێت و موچە و شایستە داراییەکانی خەڵکی هەرێمی کوردستان دابین بکرێت.

سەرۆک بافڵ جەلال تاڵەبانی سوپاسی رۆڵی سەرۆک کۆماری عیراقی کرد لە نزیککردنەوەی بۆچوونی لایەنەکان. ناوبراو راشیگەیاند: "یەکێتی هەمیشە لەگەڵ دیالۆگدایە، چونکە بەرژەوەندی گەلەکەمان و خەڵکەکەمان لە بەردەوامی سازان و شەراکەتی راستەقینەدا دەبینینەوە و بەغداد قوڵایی ستراتیجی سیاسیمانە."

 

بافڵ جەلال تاڵەبانی، سەرۆکی یەکێتیی نیشتمانیی کوردستان، لە درێژەی سەردانەکەیدا بۆ بەغداد، ئەمڕۆ لەگەڵ نوری مالکی، سەرۆکی هاوپەیمانیی دەوڵەتی یاسا کۆبووەوە.

لە کۆبوونەوەکەدا کە نزار ئامێدی، ئەندامی مەکتەبی سیاسیی یەکێتی و د. خالید شوانی، وەزیری دادی عیراق ئامادەی بوون، گفتوگۆیەکی چڕ لەبارەی نوێترین گۆڕانکاری و پێشهاتە سیاسییەکان لەسەر ئاستی عیراق و ناوچەکە ئەنجامدرا.

یەکێک لە تەوەرە سەرەکییەکانی کۆبوونەوەکە، پرسی هەڵبژاردنەکان بوو. هەردوولا جەختیان لەسەر پێویستی رەخساندنی زەمینەیەکی لەبار بۆ ئەنجامدانی هەڵبژاردنێکی پاک و بێگەرد کردەوە. داواش کرا کە هەموو لایەنەکان بە هەستکردن بە بەرپرسیارێتی نیشتمانییەوە بانگەشەیەکی شارستانییانە بەڕێوەببەن و پرۆژە و هەوڵەکانیان لە چوارچێوەی خزمەتکردنی ئامانجە باڵاکانی وڵاتدا بێت.

تەوەرێکی دیکەی گفتوگۆکان تایبەت بوو بە پرسی رێککەوتنی نەوتی نێوان هەرێمی کوردستان و حکومەتی فیدراڵی عیراق. لەم روەوە، جەخت لە پابەندبوونی هەردوولا بە رێککەوتنەکەوە کرایەوە بە شێوەیەک کە مافی خەڵک و دابینکردنی موچە پارێزراو بێت. هەروەها، هەردوولا هاوڕا بوون لەسەر دوورخستنەوەی خەڵک و بژێویی ژیانیان لە ململانێ سیاسییەکان.

کۆبوونەوەکەی نێوان بافڵ جەلال تاڵەبانی و نوری مالکی، بەشێکە لە هەوڵەکانی سەرۆکی یەکێتی بۆ بەهێزکردنی پەیوەندییەکان لەگەڵ لایەنە سیاسییە عیراقییەکان و دۆزینەوەی چارەسەر بۆ کێشە هەڵپەسێردراوەکان.

 

ئێران ئەنجامدانی دانوستان لەگەڵ وڵاتانی ئەوروپا سەبارەت بە بەرنامە ئەتۆمییەكەی رەتدەكاتەوە.  

عەباس عراقچی، وەزیری دەرەوەی ئێران رایگەیاند، بەهۆی ئەوەی دانوستانیان لەگەڵ ئەوروپا هیچ ئەنجامی ئەرێنی نابێت و ئەوروپییەكان هیچ هەنگاوێكی ئەرێنی نانێن ، بۆیە هیچ هۆكارێك نابینن بۆ ئەوەی دانوستان لەگەڵیاندا دەستپێكەنەوە سەبارەت بە بەرنامەی ئەتۆمی ئێران . 

لێدوانەكانی وەزیری دەرەوەی ئێران لەكاتێكدایە ، فەرەنسا و بەریتانیا و ئەڵمانیا رۆژی هەینی لە راگەیەندراوێكی هاوبەشدا رایانگەیاند ، سورن لەسەر ئەوەی لەگەڵ ئێران دەست بە دانوستان بكەنەوە بۆ ئەوەی بگەنە  رێكەوتنێكی گشتگیر  و لە رێیەوە گەرەنتی ئەوە بكەن كە ئێران نابێتە خاوەن چەكی ئەتۆمی. 

وەزارەتی کارەبای حکومەتی هەرێمی کوردستان رایگەیاند، تیمەکانی چاککردنەوەی بەڕێوەبەرایەتی گشتی کارەبای سلێمانی، بە هەماهەنگی لەگەڵ تیمەکانی پڕۆژەی روناکی، دەست بە چاکسازی لە تۆڕی کارەبای وێستگەی کارەبای ئەزمەڕ دەکەن.

بەپێی راگەیەندراوەکە، ئەم پڕۆسەیە لە رۆژی یەکشەممە، 12ی تشرینی یەکەمی داهاتوو دەستپێدەکات و بۆ ماوەی پێنج رۆژ بەردەوام دەبێت. کاتەکانی کارکردن لە نێوان کاتژمێر 8ی بەیانی تاوەکو 5ی ئێوارە دەبێت.

ئەو گەڕەکانەی دەکەونە ژێر کاریگەری ئەم چاکسازییە:

کاریگەری ئەم چاکسازییە راستەوخۆ دەبێت لەسەر دابەشکردنی کارەبا لەم گەڕەکانەی سلێمانی: (کازیوە، ئیبراهیم ئەحمەد، ئازادی، شەهیدان، گۆیژەی نوێ، دارۆغە، هەواری شار، کەڵەکن و سارداو).

یسرائیل کاتز، وەزیری بەرگری ئیسرائیل، رایگەیاند کە گەورەترین ئاستەنگی بەردەم ئیسرائیل دوای قۆناغی گەڕاندنەوەی بارمتەکان، وێرانکردنی تەواوی تونێلە تیرۆریستییەکانی حەماسە لە غەززە.

کاتز ئاماژەی بەوەدا کە ئەم کارە بە شێوەیەکی راستەوخۆ لەلایەن سوپای ئیسرائیلەوە ئەنجام دەدرێت، هەروەها لە رێگەی میکانیزمێکی نێودەوڵەتییەوە کە بە سەرۆکایەتی و چاودێری ئەمریکا دادەمەزرێت.

وەزیری بەرگری ئیسرائیل جەختی لەوە کردەوە کە ئەمە واتای سەرەکی جێبەجێکردنی بنەمای بێچەککردنی غەززە و پووچەڵکردنەوەی چەکەکانی حەماسە.

کاتز راشیگەیاند: "رێنماییم بە سوپای ئیسرائیل کردووە بۆ ئەوەی خۆیان بۆ جێبەجێکردنی ئەو ئەرکە ئامادە بکەن."