سوپای ئیسرائیل ئاماری بریندار و کوژراوەکانی لە سەرەتای شەڕیان لەگەڵ حزبوڵا بڵاوکردەوە و رایگەیاند لەسەرەتای مانگی ئازارەوە 27 ئەفسەر و  سەربازیان کوژراوە.

سوپای ئیسرائیل رایگەیاندوە، تەنها لە ماوەی چوار رۆژی رابردودا لە باشوری لوبنان 63 ئەفسەر و سەربازیان بریندار بوون.

لە ئامارەکانی سوپای ئیسرائیلدا هاتووە،  لە سەرەتای مانگی ئازارەو و لەگەڵ دەستپێکردنەوەی خولی نوێی شەڕەکان، 27 ئەفسەر و سەربازیان کوژراون و هەزار و 243 دیکەش بریندار بوون.

بەپێی راپۆرتە پزیشکی و سەربازییەکان، لە نێو کۆی گشتیی بریندارەکاندا، رەوشی 72  ئەفسەر و سەربازیان سەختە و 139ی دیکەشیان تەندروستیان جێگیرە.

میدیاکانیش بڵاویانکردەوە، ئەم ئامارە نوێیە کە لەلایەن خودی سوپاوە پشتڕاستکراوەتەوە، قەبارەی ئەو زیانە گیانیانە نیشان دەدات، کە  لەگەڵ حزبوڵادا توشیان بووە.

بە چاودێری جێگری سەرۆك وەزیرانی هەرێم رۆژانی 6 و 7ی ئەم مانگە دووەمین كۆڕبەندی ئابوری نێودەوڵەتی دێڵفی لە سلێمانی دەبەسترێت و لە 17 پانێڵدا ئاسایشی وزە تاووتوێ دەكرێت.

دكتۆرە رۆژە كەمال وتەبێژی كۆڕبەندی دێڵفیی لەسلێمانی، لە میانی بەشدارییكردنی لە گەشتی هەواڵە ئابوورییەكانی كوردسات نیوز رایگەیاند، بە هەوڵەكانی قوباد تاڵەبانی، جێگری سەرۆك وەزیرانی هەرێم، توانراوە كۆڕبەندەكە لە یۆنانەوە بگوازرێتەوە بۆ سلێمانی.

وتەبێژی كۆڕبەندی دێڵفیی جەختیکردەوە، هاتنی ئەم هەموو میوانە لە دەرەوەی وڵات و ناوخۆی ئێراق  هەرێم  لەم رەوشی شەڕەدا بۆ سلێمانی گرنگییەکی زۆری هەیە و دەرخەری ئەوەیە سلێمانی شارێکی ئارامە.

ئاماژەی بەوەشكرد، دوای سەركەوتنی خولی یەكەم، دووەمین خولی كۆڕبەندەكە بە چاودێری قوباد تاڵەبانی ، لە رۆژانی 6 و 7ی حوزەیرانی 2026 لە كارگەی كلتوری سلێمانی بەڕێوەدەچێت و 17 پانێڵ لەخۆدەگرێت.

وتیشی، كۆڕبەندەكە چەندین كەسایەتی باڵا، بڕیاربەدەست و بازرگانی گەورە لە هەرێم، عیراق و وڵاتانی وەك یۆنان، توركیا، ئیتاڵیا و فەرەنسا كۆدەكاتەوە و تیایدا گفتوگۆی چڕ دەكرێت لەسەر ئاڵنگارییە سیاسی، ئەمنی و ئابوورییەكانی ناوچەكە، بەتایبەت گۆڕانكارییە جیۆپۆلیتیكییەكانی رۆژهەڵاتی ناوەڕاست، ئاسایشی وزە، گواستنەوەی سەوز و دەرفەتەكانی وەبەرهێنان.

ناوى "ئۆباما" خۆى ئامادە دەکات بۆ گەڕانەوە بۆ سەر شانۆی سیاسی لە ویلایەتی کالیفۆرنیای ئەمریکا، ئەمەش دوای ئەوەی بەربژێرێک کە بە شێوەیەکی یاسایی ناوی خۆی گۆڕیوە بۆ ناوی سەرۆکی پێشوو باراک ئۆباما، بەشداری لە هەڵبژاردنە بەراییەکاندا دەکات بۆ پۆستی حاکمی ویلایەتەکە.

"باراک د. ئۆباما شۆ"، یەکێکە لە نێو زیاتر لە 60 بەربژێر لە هەڵبژاردنە بەراییەکانی پۆستی حاکمی کالیفۆرنیا کە بڕیارە ئەم هەفتەیە بەڕێوەبچێت.

داتاکانی ماڵپەڕی هەڵمەتی هەڵبژاردنەکەی نیشانی دەدەن کە "شۆ" زیاتر لە دە ساڵ لەمەوبەر و لە کاتی خزمەتکردنیدا لە هێزی یەدەگی سوپای ئەمریکا لە نێوان ساڵانی 2008 بۆ 2016، ناوی خۆی بە یاسایی گۆڕیوە، کە پێشتر ناوی راستەقینەی "سیسیل شۆـی سێیەم" بووە.

ئۆباما شۆ لە لێدوانێکدا بۆ تۆڕی "سپێکتڕەم نیوز" وتی: کاتێک بۆ سڵاوی سەربازی دەوەستام و وێنەی ئەو (باراک ئۆباما) لەسەر دیوارەکە بوو، هەستم بە شانازی دەکرد ئەو سەلماندی کە کەسێکی وەک منیش دەتوانێت ببێتە سەرۆک.

ئەم بەربژێرە لە رێگەی ماڵپەڕی هەڵمەتەکەیەوە ئاماژەی بەوە کردووە کە سەرسامبوونی بە سەرۆکی پێشووی دیموکراتەکان دەگەڕێتەوە بۆ "ئەو ئومێدەی کە بەخشییە جیهان"، و وەسفی کردووە بەوەی کە "هاندەر" بووە بۆ گۆڕینی ناوی بە مەبەستی پێشکەشکردنی هەمان جۆری ئومێد بە دەنگدەرانی ئەمڕۆ.

شۆ لە کۆمەڵگەی ناوخۆیی خۆی لە شاری ئەلامێدا چالاکە، لەوێ بەرنامەیەک بۆ بەهرەمەندە ناوخۆییەکان پێشکەش دەکات و کاری وانەبێژیی مۆسیقا بە منداڵان دەکات.

هەڵمەتی هەڵبژاردنی شۆ تیشک دەخاتە سەر چارەسەرکردنی قەیرانی بێماڵان، دروستکردنی یەکەی نیشتەجێبوونی نوێ، و کەمکردنەوەی خەرجییە ناپێویستەکانی حکومەت.

راپرسییەکان ئاماژە بەوە دەکەن کە ئۆباما شۆ بە جیاوازییەکی زۆر لە دوای بەربژێرە دیارەکانەوەیە، کە لە پێشەنگیاندا ملیاردێر و چالاکوانی بواری کەشوهەوا "تۆم ستایەر" و وەزیری تەندروستی و خزمەتگوزارییە مرۆییەکانی ئەمریکا "خاڤیێر بێسێرا" دێن.

سەرەڕای ئەمەش، شۆ جەختی لەسەر پێداگریی خۆی کردەوە بۆ بەردەوامبوون لە بەشداریکردن لە هەڵبژاردنەکانی داهاتوودا بە هەڵگرتنی هەمان ناوەوە.

شۆ لە کۆتاییدا وتی: باراک ئۆباما پاڵەوانە گەورەکەیە، منیش ئەو پیاوەم کە قاتەکەی ئەو دەپۆشێت.. شەرەفی هەڵگرتنی ئەم ئاڵایەم پێبڕاوە.

وتەبێژی وەزارەتی دەرەوەی ئەمریكا رایگەیاند، نامە گۆڕینەوە لەگەڵ ئێران بەردەوامە و سزاكانیشیان ئێرانی لە ملیۆنان دۆلاری رۆژانە بێبەشكردووە.

تۆمی پیگەت وتەبێژی وەزارەتی دەرەوەی ئەمریكا رایگەیاند، دانوستان و پەیوەندییەكانی نێوان واشنتۆن و ئێران لە رێگەی نێوەندگیرەكانەوە بەردەوامە و نامە لە نێوان هەردوولادا دەگۆڕدرێتەوە.

وتیشی، كاریگەریی گەمارۆكان و سزاكانیان رێگری لە ئێران كردووە رۆژانە ملیۆنان دۆلار بەدەستبهێنێت و لە ئێستادا بە توندی سەرنجیان خستووەتە سەر بەئامانجگرتنی ئەو تۆڕە دارایی و داهاتانەی ئێران كە هەوڵی دزەكردن و دەربازبوون لە سزاكانی ئەمریكا دەدەن.

ئاماژەی بەوەش كرد، سەرۆك دۆناڵد ترەمپ كارتی فشاری بەهێزی لە دژی ئێران هەیە و بە هیچ شێوەیەك رازی نابێت بە ئیمزاكردنی رێككەوتنێكی لاواز و خراپ لەگەڵ تاراندا

 

نیشاندەری جیهانیی "هۆلۆجیک" بۆ تەندروستیی ژنان، کە ریزبەندییەکی ساڵانەیە و پشت بە راپرسییەکی زیاتر لە 76هەزار ژن و کچ لە سەرانسەری جیهاندا دەبەستێت، رەگەزنامەی ئەو ژنانەی ئاشكرا كرد کە توڕەترینیانن لە جیهاندا.

تایوان لە پلەی یەکەمی جیهانیدا هات، بەدوایدا لاتیڤیا، پاشان ژاپۆن، ڤێتنام و پۆڵەندا، هەروەها سەنگاپوورە و ئەڵمانیا و نەمسا لە پلەکانی پێشەوەدا بوون.

ئەو داتایانەی کە لە شوباتی 2024دا کۆکراونەتەوە و ئەم هەفتەیە بڵاوکراونەتەوە، ئاماژە بەوە دەکەن کە نزیکەی 2.3 لە ناو هەر 10ژنێکدا هەستیان بە توڕەیی کردووە.

راپۆرتەکە پشتی بە پێوانەکردنی باری دەرونیی گشتی لە وڵاتە جیاوازەکاندا بەستووە، ئەمەش لە رێگەی پرسیارکردن لە بەشداربووان دەربارەی ئەو هەستانەی کە لە بەشێکی زۆری رۆژی رابردوویاندا چەشتوویانە.

بەرزترین ئاستی توڕەیی لە ئەوروپا لە ماڵتا تۆمارکراوە، بەدوایدا یۆنان، پاشان کۆماری چیک، ئەلبانیا و ئیسپانیا.

وڵاتانی گینیا، ماداگاسکار، سیرالیۆن، لیبێریا و چاد بەپێی ڕێزبەندی لە پلەکانی کۆتاییدا هاتن.

تیم سیمپسۆن، بەڕێوەبەری باڵا لە کۆمپانیای هۆلۆجیک، لە کۆمێنتێکدا لەسەر ئەنجامەکان وتی: ژنان پێمان دەڵێن کە دەیانەوێت دەستنیشانکردنی پێشوەختە و دەستڕاگەیشتنێکی خێراتریان بە چاودێریی تەندروستی هەبێت.

وتیشی: باشترکردنی تەندروستیی ژنان پێویستی بە پابەندبوونی بەردەوامی داڕێژەرانی سیاست، دەستەی خزمەتگوزاریی تەندروستیی نیشتمانی، پزیشکان و کەرتی پیشەسازی هەیە بۆ ئەوەی پێکەوە کاربکەن لە پێناو جێبەجێکردنی ئەو گۆڕانکارییانەی کە ژنان داوای دەکەن.

دووەمین کۆڕبەندی ئابورى نێودەوڵەتی دێڵفی لە سلێمانی، لە رۆژانی 6 و 7ـی ئەم مانگە بەڕێوەدەچێت و کەسایەتییە باڵاکانی سەر ئاستی کوردستان و عیراق و جیهان تێیدا بەشداردەبن.

بۆ جاری دووەم و بەچاودێری قوباد تاڵەبانی، جێگرى سەرۆک وەزیرانی هەرێمی کوردستان، کۆڕبەندی ئابورى دێڵفی لەرۆژانی 6 و 7 ى حوزەیرانی 2026 لەهۆڵى فاوندەیشن لەکارگەى کلتورى لەسلێمانی دەبەسترێت. 

کۆڕبەندی ئەمساڵ کەسایەتییە باڵاکانی سەر ئاستی کوردستان و عیراق و جیهان کۆدەکاتەوە لەگەڵ بەرپرسانی وڵاتانی خاوەن ئابورى بەهێزی جیهان بۆ دیالۆگ لەسەر گرنگترین ئاڵنگارییە سیاسی و ئەمنی و ئابورییەکانی ناوچەکە، بەتایبەت کە رۆژهەڵاتی ناوەڕاست بەقۆناغێکی پڕ گۆڕانکارى جیۆپۆلیتیکیدا تێپەڕدەبێت.

لەمیانی کارەکانی کۆڕبەندی ئابورى دێڵفى دا، داڕێژەرانی سیاسەت و بڕیاربەدەستان و گەورە بازرگانانی وڵاتانی (یۆنان،تورکیا، بولگاریا، رۆمانیا، جۆرجیا، پۆڵەندا،  ئیتاڵیا و فەرەنسا) گفتوگۆى چڕ دەکەن لەسەر ئاسایشی هەرێمی و ووزە، گواستنەوەى سەوز، گەشەپێدانی ئابورى و دەرفەتە نوێیەکانی وەبەرهێنان لەلایەک و پرسەکانی حکومڕانی و هەوڵەکانی چاکسازی لەلایەکی ترەوە.

لەکاتێکدا جیهان لەسەرووبەندی دووبارە بوژاندنەوەدایە بەتایبەت لەدواى کێشمەکێشەکانی جیهان، کۆڕبەندی ئابورى دێڵفى، پەرۆشی هەرێمی کوردستان دەسەلمێنێت لە پشتیوانیی ئەنجامدانی گفتوگۆى بنیاتنەرانە و توندکردنەوەى پەیوەندییە ستراتیژیەکانی نێوان خۆرهەڵاتی ناوەڕاست و ئەوروپا و ئەمریکا و داڕشتنەوەى سیاسەتە ئابورییەکان.

لەئامێزگرتنی کۆڕبەندی ئابورى دێڵفی بۆ ساڵى دووەم، پێگەى سلێمانی لەسەر نەخشەى ووزەى جیهان جێگیر دەکات و هانی دیالۆگی ئەرێنی دەدات بۆ پشتیوانی رێوشوێنەکانی بەهێزکردنی سیاسەتی ئابورى و گەشەپێدانی لە رەوشی دژوار و ناسەقامگیرەکانیشدا.

 

 

ئەڵمانیا، فەرەنسا و بەریتانیا سەرقاڵی داڕشتنی پلانێكی نوێن بۆ ناچاركردنی روسیا بۆ ئەنجامدانی دانوستانی ئاشتی لەگەڵ ئۆكراین، ئەمەش لە كاتێكدایە كە واشنتۆن بەهۆی شەڕی ئێرانەوە بایەخی كەمتری بەو دۆسییە داوە.

ئاژانسی بلومبێرگ لە زاری سەرچاوە ئاگادارەكانەوە بڵاویكرۆتەوە، كە هەریەكە لە ئەڵمانیا و فەرەنسا و بەریتانیا لەگەڵ ئۆكراین كار دەكەن بۆ ئامادەكردنی پلانێك بە مەبەستی هاندانی روسیا بەرەو دانوستانێكی ئاشتی جدی، ئامانجی سەرەكیی ئەم هەوڵە سێقۆڵییەش، رێگریكردنە لەوەی جەنگەكە زیاتر درێژە بكێشێت.

بەپێی راپۆرتەكە، بەرپرسانی ئەو سێ وڵاتە تاوتوێی ئەگەری ئەنجامدانی گفتوگۆیان كردووە كە هەردوو لایەنی جەنگ بگرێتەوە.

جەختیش كراوەتەوە كە بڕیاری كۆتایی بۆ دەستپێكردنی هەر دانوستانێك تەنها لە دەستی ڤۆلۆدیمێر زێلێنسكی سەرۆكی ئۆكرایندایە و وڵاتانی ئەوروپا هیچ ستراتیژییەك بەسەریدا ناسەپێنن كە خۆی پێی رازی نەبێت.

ئەمەش لە كاتێكدایە كە واشنتۆن بەردەوام پشتگیری خۆی بۆ ئۆكراین دەردەبڕێت و ماركۆ رۆبیۆ وەزیری دەرەوەی ئەمریكا ،لەبەردەم كۆنگرێس ئاماژەی بەوە كرد وڵاتەكەی بە رەسمی لایەنگری خۆی بۆ ئۆكراین هەڵبژاردووە و لەم رەوشەدا رۆڵی بێلایەن نابینن.

 

ئەمینداری گشتیی حزبوڵڵای لوبنان لە پەیامێکی نوێدا هەڵوێستی توندی حزبەکەی سەبارەت بە گۆڕانکارییە سەربازی و سیاسییەکان راگەیاند و جەختی کردەوە کە هەر رێککەوتنێک لەسەر بنەمای داماڵینی چەکی بەرگریی بێت، بە واتای لەناوبردنی هێزی لوبنان دێت.

نەعیم قاسمی ئەمینداری گشتیی حزبوڵای لوبنان مەرجی چەکدانانی بۆ گەیشتن بە رێککەوتن بە تەواوەتی رەتکردەوە و ئاماژەی بەوەکردوە کە راگرتنی شەڕ لەژێر دروشمی "راگرتنی تاکلایەنەی شەڕ لەلاەین حزبەڵاوە تەنیا بە واتای خۆبەدەستەوەدان و شکست دێت.

لە بەشێکی تری قسەکانیدا، ئەمیندارانی گشتیی حزبوڵڵا داوای ئاڕاستەی بەرپرسانی لوبنان کرد، کە کۆتایی بەو پرۆسەیە بهێنن کە پێیان وایە  کۆتایی بەشەڕ دەهێندرێت.

هاوکات دەسەڵاتی سیاسی وڵاتەکەی بە بەرپرسیار دەزانێت لە بەرانبەر چارەسەرکردنی دابەشبوونی ناوخۆیی کە بەهۆی بژاردە سیاسییەکانیانەوە دروست بووە.

 نەعیم قاسم رونیشیکردوەتەوە، کە ئەوان تەنیا پابەندن بە راگرتنی هەمەلایەنەی دەستدرێژییەکان، ئاگربەستی گشتگیر و کشانەوەی تەواوی هێزەکانی ئیسرائیل، بە شێوەیەک کە هیچ جیاکارییەک لە نێوان باشوور و ناوچەکانی تری لوبناندا نەکرێت.

سەبارەت بە بەردەوامیی گرژییە سەربازییەکانیش ناوبراو هۆشداریداوە، کە تا کاتێک گوند و خەڵکی لوبنان بۆردومان بکرێن، ناوچەکانی باکوری ئیسرائیل بە پارێزراوی نامێننەوە و جەختی کردەوە کە هیچ بەڵێنێکیان بە هیچ لایەنێک نەداوە بۆ وەڵامنەدانەوەی هێرشەکان.

دۆناڵد ترەمپ، سەرۆکی ئەمریکا رەخنەی لە بڕیارەکەی ئەنجومەنی نوێنەران گرت بۆ سنووردارکردنی دەسەڵاتە جەنگییەکانی و بڕیارەکەی شەوی رابردووی بە کارێکی "ناقۆناغی و دژە نیشتمانی" وەسف کرد.

ترەمپ، ئەمڕۆ پێنجشەممە، لە پۆستێکدا لە هەژماری خۆی لە تۆڕی کۆمەڵایەتی "ترووس سۆشیاڵ" نووسیویەتی: دوێنێ، لە دەنگدانێکی بێمانادا، ئەنجومەنی نوێنەران ــ کە چوار کۆماریی خراپ و سەرجەم دیموکراتەکان بوون ــ دەنگیان دا بە سنووردارکردنی دەسەڵاتە جەنگییەکانم، ئەوەش لە ناوەڕاستی دوایین دانوستانەکانمدا بۆ کۆتاییهێنان بە شەڕ لەگەڵ ئێران.. کێ هەیە کارێکی وا دژە نیشتمانی بکات؟"

هەروەها ترەمپ پێیوابوو کە دیموکراتەکان "تووشی گرێی رقبوونەوە لە ترەمپ بوون" و وتی: ئەوان شکستی ئەمریکایان پێ باشترە لەوەی سەرکوتنێکی تر بخەنە سەر لیستی سەرکەوتنە زۆرەکانی من.

ماڵپەڕێكی ئەمریكی ئاشكرایكرد، ترەمپ دەوێت شەڕی لوبنان كۆتایی پێبێت و ناتانیاهۆ دەیەوێت دەستپێبكاتەوە.

ماڵپەڕ ئەكسیۆس لە زاری سەرچاوەیەكی ئیسرائیلی ئاشكرایكردوە، دۆناڵد ترەمپ سەرۆكی ئەمریكا لە پەیوەندییەكی تەلەفۆنیدا بە توندی داوای لە بنیامین ناتانیاهۆ كردووە هێرشەكانی بۆ سەر بەیروت رابگرێت.

ئەم هەڵوێستەی ترەمپ لە كاتێكدایە كە واشنتۆن هەوڵی جدی دەدات بۆ ئیمزاكردنی رێككەوتنێكی نوێ لەگەڵ تاران و نایەوێت ئاڵۆزییەكانی ناوچەكە رەوشی دانوستانەكان تێكبدەن.

ئەو سەرچاوەیە ئاماژەی بەوەشكرد،  پاشگەزبوونەوەی ناتانیاهۆ لە هێرشكردنە سەر بەیروت لەژێر فشاری ئەمریكادا، ناتانیاهۆ رووبەرووی رەخنەی توندی لێپرسراوانی ناوخۆی ئیسرائیل كردووەتەوە، ناتانیاهۆ ترسی هەیە لەوەی لە داهاتوودا واشنتۆن فشار و سنوورداركردنی زیاتر بخاتە سەر ئۆپراسیۆنە سەربازییەكانی وڵاتەكەی دژی حزبوڵا و رێگری لە جوڵە ئازادەكانی سوپا بكات.

جۆزێف عەون، سەرۆک کۆماری لوبنان زانیاری نوێی لەسەر ئەو دانوستانانە ئاشکرا کرد کە بۆ جێگیرکردنی ئاگربەست بەڕێوەدەچن و جەختی کردەوە کە ئەو رێککەوتنەی پێی گەیشتوون دواین دەرفەتە.

عەون لە گفتوگۆیەکدا لەگەڵ رۆژنامەنووسان وتی، ئەو دانوستانانەی دوێنێ ئەنجامدران زۆر قورس بوون، دانوستانەکان راوەستان و دواتر بەهۆی دەستوەردانی مارکۆ رۆبیۆ، وەزیری دەرەوەی ئەمریکاوە دەستیان پێکردەوە، ئەمەش دوای ئەوەی لەلایەن باڵیۆز سیمۆن کەرەم، سەرۆکی شاندی دانوستانکاری لوبنانەوە هەڵپەسێردرابوون.

سەرۆک عەون وتیشی: من لە کاتژمێر دووی بەرەبەیانەوە لەگەڵ لایەنە نێودەوڵەتی و ناوخۆییەکاندا لە پەیوەندیدا بووم بۆ جێگیرکردنی ئاگربەستەکە"، ئاماژەی بەوەش کرد کە هەمووان چاوەڕێی وەڵامی سەرجەم لایەنە پەیوەندیدارەکان و ئەو گەرەنتییانە دەکەن کە بۆ پابەندبوون بە رێککەوتنەکە پێویستن.

عەون رونی کردەوە کە رەنگە جێبەجێکردنی ئاگربەستەکە لە ماوەی 24 کاتژمێردا لە دوای بەدەستهێنانی رەزامەندی کۆتایی لەلایەن هەموو لایەنەکانەوە، دەست پێبکات.

سەرۆک کۆمار جەختی کردەوە کە ئەو رێککەوتنەی ئەمڕۆ گەیشتوونەتە سەرى، لە بنەڕەتەوە لەگەڵ رێککەوتنی 27ی تشرینی دووەمی2024 جیاوازە، چونکە ئەمەیان رێککەوتنێکی بەردەوام دەبێت، هاوکات متمانەی خۆی بە رۆڵی دۆناڵد ترامپ، سەرۆکی ئەمریکا و ئیدارەکەی بۆ مسۆگەرکردنی جێبەجێکردنی رێککەوتنەکە دەربڕی.

عەون پێشنیازێکی لوبنانی ئاشکرا کرد کە تێیدا هاتووە، لە قۆناغی یەکەمدا ناوچەی تاقیکاری هەریەکە لە ناوچەکانی (زۆتەری رۆژئاوا، زۆتەری رۆژهەڵات و قەڵای شەقێف) بگرێتەوە، ئەمەش بۆ تاقیکردنەوەی جددیەتی پابەندبوون بە ئاگربەستەکەوە پێش ئەوەی فراوان بکرێت و ناوچەکانی تریش بگرێتەوە.

سەرۆک عەون لە کۆتایی لێدوانەکانیدا وتی، رێککەوتنی ئێستا دواین دەرفەتە بۆ گەیشتن بە چارەسەر و هۆشداریشی دا کە لە ئەگەری پابەندنەبوون پێیەوە، با هەر لایەنە و بەرپرسیارێتی خۆی هەڵبگرێت.

دۆناڵد ترامپ سەرۆکی ئەمریکا، رایگەیاند کە خۆکاندیدکردنی جەی دی فانس، جێگری سەرۆک، و مارکۆ رۆبیۆ، وەزیری دەرەوە پێکەوە لە هەڵبژاردنە سەرۆکایەتییەکەی ساڵی 2028ی ئەمریکادا، وایان لێدەکات "شکستنەهێنەر" بن، ئەمەش لە کاتێکدایە کە ئاماژەکانی ململانێیەکی ئەگەری لە نێوان ئەو دووانەدا بۆ گەیشتن بە کۆشکی سپی خەریکە دەردەکەون.

تا ئێستا نە فانس و نە ڕۆبیۆ، هیچ ئارەزوویەکیان بۆ جێگرتنەوەی ترامپ لە رێگەی خۆکاندیدکردن بۆ هەڵبژاردنی سەرۆکایەتی داهاتوو دەرنەبڕیوە.

ترامپ لە پۆدکاستێکی رۆژنامەی "نیویۆرک پۆست"دا کە رۆژی چوارشەممە بڵاوکرایەوە، وتی: هەردووکیان نایابن. رێزی هەمویان دەگرم، بێ ئەوەی دیاری بکات کامەیان دەبێتە کاندیدی سەرۆکایەتی و ئەوی تریان دەبێتە جێگری.

هەروەها ئاماژەی بەوەدا کە ئەو دوو پیاوە "زۆر تەبان" و وتی: نازانم چۆن دەکرێت تێکبشکێنرێن ئەگەر تیمێک پێکبهێنن.

بەپێی راپۆرتێکی ئاژانسی فرانس پرێس، جەی دی فانس بەهۆی پۆستەکەیەوە بە توندی بەستراوەتەوە بە ئەنجامی کارەکانی سەرۆکی ئێستاوە، ئەمەش لە کاتێکدایە کە جەماوەریبوونی ترامپ بەهۆی شەڕی لەگەڵ ئێراندا روی لە پاشەکشە کردووە.

 

راوێژكاری سەربازیی رابەری باڵای ئێران رایگەیاند، ئەگەر ئەمریكا هێرشێكی نوێ بكاتە سەر ئێران، ئەوان بە شەپۆلێك لە مووشەك و درۆن وەڵام دەدەنەوە.

موحسین رەزایی راوێژكاری سەربازیی رابەری باڵای ئێران لە رێگەی پلاتفۆرمی ئێكسەوە راگەیاندراوێكی بڵاوكردەوە نوسویەتی، لە بەرانبەر هەر هێرشێك و هەر گولـلەیەك بۆسەر هێزەكانیان و وڵاتەكەیان، بە شەپۆلێك لە مووشەك و درۆن وەڵام دەدەنەوە.

ئەم قسانەش دوای ئەوەدێن، كە وەزارەتی دەرەوەی ئێران، هێرشەكانی ئەمریكای بۆ سەر تانكەرێكی نەوتی ئێرانی لە گەروی هورمز و ناوەندێكی پەیوەندییەكان لە دوورگەی كیش ئیدانەكرد، لە وەڵامی ئەوەش ئێران هێرشی كردە سەربنكەكانی ئەمریكا لە كوەیت و ئیمارات و بەحرەین.

رابەری باڵای ئێران رایگەیاند، هەڵوێستەكانیان بەرامبەر ئیسرائیل نەگۆڕە و بەمانهێشت بە ئامانجەکانی بگات.

موجتەبا خامنەیی رابەری باڵای ئێران، پەیامێكی بڵاوكردەوە و تیایدا ئاماژە بەوەدەكات، ئێران هەڵوێستەكانی بەرانبەر بە ئیسرائیل نەگۆڕە و پێیان وایە سیستمی هەژمونداری بووەتە هۆی دروستكردنی بنكەیەكی سەربازیی ئیسرائیلی لە ناوچەكەدا.

وتیشی، ئیسرائیل ئامانجی ئەوە بوو خۆڕاگری گەلی ئێران تێكبشكێنێت و كۆمەڵگەكەی تێكبدات، بەڵام نەیتوانی بە ئامانجەكانی بگات.

ئەوەش لەكاتێكدایە، دانوستانەكانی نێوان ئەمریكا و ئێران بۆ گەیشتن بە رێككەوتن بەردەوامە و دوێنێش دۆناڵد ترەمپی سەرۆكی ئەمریكا رایگەیاند، دانوستانەكان بە باشی بەڕێوەدەچن و بەمزووانە چاوی بە خامنەیی دەكەوێت.

لە چوارچێوەی گۆڕانکارییە وەرزییەکاندا، پێشبینی دەکرێت لە دوو رۆژی داهاتوودا پلەکانی گەرما کەمێک بەرزبوونەوە بەخۆیانەوە ببینن.

بەڕێوەبەرایەتی کەشناسی و بوومەلەرزەزانی هەرێم رایگەیاند، ئەمڕۆ پێنجشەممە ئاسمان لەنێوان ساماڵ و پەڵەهەوردا دەبێت و خێرایی با لەنێوان 10 بۆ 20  کیلۆمەتر لە سەعاتێکدا دەبێت.

سەبارەت بە پێشبینییەکانی رۆژی هەینی، ئاماژەی بەوەکرد، ئاسمان بە تەواوی ساماڵ دەبێت و پلەکانی گەرماش بەراورد بە تۆمارەکانی ئەمڕۆ کەمێک بەرز دەبنەوە.

بەرزترین پلەکانی گەرمای پێشبینیکراو بە پلەی سیلیزی

هەولێر 36پلەی سیلیزی

پیرمام 31پلەی سیلیزی

سلێمانی 35پلەی سیلیزی

چەمچەماڵ 37 پلەی سیلیزی

دهۆک 34پلەی سیلیزی

زاخۆ 35پلەی سیلیزی

رۆژنامەیەکی ئەمریکی ئاشکرایکردووە، ترەمپ بە نهێنی بە راوێژکارەکانی وتووە؛ کوژرانی هەر سەربازێکی ئەمریکی بە واتای کۆتاییهاتنی ئاگربەست لەگەڵ ئێران دێت.

رۆژنامەی وۆڵ ستیریت جۆرناڵ بڵاویکردووەتەوە، دۆناڵد ترەمپ، سەرۆکی ئەمریکا بە شێوەیەکی نهێنی بە تیم و راوێژکارەکانی راگەیاندووە، لە ئەگەری کوژرانی هەر سەربازێکی ئەمریکی لەلایەن ئێرانەوە، ئاگربەستی نێوانیان بەتەواوەتی کۆتایی پێدەهێنێت.

ئەم پەیامەی ترەمپ لەکاتێکدایە کە لە ماوەی رابردوودا چەند جارێک جەختی لەسەر بژاردەی دیپلۆماسی کردووەتەوە، بەڵام هاوکات بژاردەی سەربازیشی بە کراوەیی هێشتووەتەوە، بەپێی راپۆرتێکی "وۆڵ ستریت جۆرناڵ"، سەرەڕای زنجیرەیەک پێکدادانی کاتی لە نێوان هەردوو وڵاتدا، بەڵام بۆ ماوەی چەند هەفتەیەکە ئۆپەراسیۆنە ئاسمانییەکان راگیراون.

لە بەرانبەردا، مارکۆ رۆبیۆ، وەزیری دەرەوەی ئەمریکا لە کۆبوونەوەیەکدا لە ئەنجومەنی نوێنەران، ئەو پێکدادانانەی بە "رێوشوێنی بەرگری" وەسفکرد و رایگەیاند، ئەو چالاکییانە بە مانای گەڕانەوە بۆ شەڕی هەمەلایەنە نایەت، رۆبیۆ وتیشی: "ئەو پێکدادانانە وەڵامی کردەوەکانی ئێرانن، ئەگەر ئەوان دەستپێشخەری نەکەن، ئێمەش هیچ ناکەین، بەڵام ناچارین وەڵامی هەر دەستدرێژییەک بدەینەوە."

سەرچاوە ئەمریکییەکان ئاماژەیان بەوەشکردووە، بەردەوامبوونی ئەو هێرش و پێکدادانانە، گوشارێکی زۆری لەسەر ئیدارەکەی ترەمپ دروستکردووە و بووەتە هۆی ئەوەی گومان لەسەر مانەوەی ئاگربەستەکە بۆ ماوەی درێژخایەن دروست ببێت.