د. کامەران یونس محەمەد سەرۆکی زانکۆی سەڵاحەدین لە کۆنفرانسێکی رۆژنامەوانیدا رایگەیاند، داوا لەلایەنە پەیوەندیدارەکان دەکەین کەیسی کوشتنی دوو مامۆستاکە دوانەخرێت و بەزووترین کات تۆمەتبار بە سزا بگەیەنرێت و وەکو زانکۆی سەڵاحەدینیش تیمێکی پارێزەری پێکدەھێنن و کەیسەکەش دەبێتە کەیسێکی زانکۆی سەڵاحەدین.

وتیشی، ئەو کەسەی تۆمەتبارە بە کوشتنی دوو مامۆستاکە پێشتر داواکاری پیشکەشی وەزارەتی خوێندنی باڵا کردووە بۆ خوێندن لە زانکۆی سەڵاحەدین و ئاڕاستەی راگری کۆلێژی یاسا کراوە و د. کاوان ئیسماعیل راگری کۆلێژی یاساش رەزامەندی لەسەر دەوامکردنی ئەو خوێندکارە داوە لە زانکۆی سەڵاحەدین.

بەڕێوەبەرایەتی پۆلیسی پارێزگای سلێمانی رایگەیاند، پاش دروستبونی شەڕو ئاڵۆزی لەنێوان ژمارەیەک ھاوڵاتییدا لە ‌گەڕەکی کانی سپیکەی شاری سلێمانی، دەستبەجێ ھێزەکانی پۆلیس گەیشتنە شوێنی ڕووداوەکە و بە ھاوکاری ھێزەکانی ئاسایشی سلێمانی توانرا شەڕەکە کۆنتڕۆڵ بکرێت و ١٠ تۆمەتباریش دەستگیربکرێن.

ئاماژەی بەوەشکردووە، دەستیش بەسەر دوو چەک لە جۆری کڵاشینکۆف ‌و دەمانچەدا گیران کە بەتۆمەتبارەکان بووە.

پۆلیسی سلێمانی راشیگەیاندووە، پەڕاوی لێکۆڵینەوە بۆ رووداوەکە کراوەتەوە ‌و سەرجەم تۆمەتباران بە ‌بڕیاری دادوەر راگیراون ‌و لێکۆڵینەوەکان بەردەوامە.

فەرمانگەی میدیا و زانیاری حکومەتی ھەرێمی کوردستان رایگەیاند، ئەمڕۆ چوارشەممە ٢٩ی حوزەیرانی ٢٠٢٢، ئەنجومەنی وەزیرانی ھەرێمی کوردستان کۆبوونەوەی ھەفتانەی خۆی بە سەرۆکایەتیی مەسرور بارزانی سەرۆکی حکومەتی ھەرێمی کوردستان و قوباد تاڵەبانی جێگری سەرۆکی حکومەت، ئەنجام دەدات، لە کۆبوونەوەکەدا باس لە چەند تەوەرێک دەکرێت.

ئاماژەی بەوەشکردووە، لە تەوەرێکی کۆبوونەوەکەدا بابەتی چەندبارەبوونەوەی ھێرشەکان بۆ سەر خەڵک و ژێرخانی کوردستان لە چەند مانگی ڕابردوودا و گرنگیی پێکھێنانی ھێزی ھاوبەشی پێشمەرگە و ھێزە ئەمنییەکانی عێراق بۆ پڕکردنەوەی بۆشایی ئەمنی و ڕێکارەکانی ھەردوو وەزارەتی کاروباری پێشمەرگە و ناوخۆ بۆ پاراستنی ژێرخانی گشتی و دامەزراوەکانی نەوت و گاز دەرخرێتەڕوو.

فەرمانگەی میدیا و زانیاری راشیگەیاند، لە تەوەرێکی تری کۆبوونەوەکەدا گوشاری بەردەوامی حکومەتی فیدڕالی بۆ وەبەرھێنەرانی بواری نەوت و گاز لە ھەرێمی کوردستان لە پێناوی پەکخستنی پڕۆژەکانی گەشەپێدانی سەرچاوەکانی نەوت و گاز لە ھەرێمی کوردستان کە ئەمەش بە ئاشکرا پێشێلکردنی دەسەڵاتە دەستوورییەکانی ھەرێمی کوردستانە باسدەکرێت.
ھەروەھا یەکێکی تر لە تەوەرەکانی کۆبوونەوەکە خستنەڕووی بابەتی پڕۆژە بودجەی ھەرێمی کوردستان بۆ ساڵی ٢٠٢٢ دەبێت.

د.ھیمداد فەیسەڵ، بە کوردسات نیوزی رایگەیاند، ئەو خوێندکارە سێ ساڵ پێش ئێستا، لەکاتی تاقیکردنەوەکانی کۆتایی، تووشی دەمەقاڵێ بووە لەگەڵ دکتۆرە نیشتمان ھاوسەری د.ئیدری حەمەخان، بەڵام دواتر کێشەکەیان چارەسەرکراوە.

وتیشی، دوای کۆتاییھاتنی تاقیکردنەوەکان، ئەو خوێندکارە داوای گواستنەوەی لە زانکۆی سۆران کردووە و فەرمانی گواستنەوەشی بۆ دەرچووە، بەڵام دوای ئەوەی لە زانکۆی سۆران نەماوە، نامەی بۆ دکتۆرە نیشتمان ناردووە و ئەو مامۆستایەش لە ترسی گیانی خۆی، سکاڵای لەسەر خوێندکارەکە تۆمارکردووە.

بەرێوەبەرایەتی تەندروستی دھۆک ڕوونکردنەوەیەکی لەو بارەیەوە بڵاوکردەوە و تێدا ڕایدەگەیەنێت ، لە ژمارەیەک دەزگایی ڕاگەیاندن وا بڵاوکرایەوە کە لە سنوری پارێزگاکەمان ‌ژنێک بە کۆلێرا گیانیلەدەستداوە، بۆ ڕونکردنەوەی ئەم بابەتە ژنی ناوبراو نەخۆشی شێرپەنجەی ھەبووە و لەبەر ھەبونی چەند نیشانەیەک و بۆ پشتراست بوون لەو حاڵەتە گوازرایەوە بۆ نەخۆشخانە و پشکنینی کۆلێرای بۆ کراوە و نێگەتیف بووە و بەھۆی نەخوشی شێرپەنجەوە گیانی لە دەستداوە.

ئاماژەیان بەوەشکردووە ، ئێمە خەڵکی خۆمان پشت راستدەکەینەوە ھیچ حاڵەتێکی سەختی کولێرا لە پارێزگای دھۆک تۆمارنەکراوە و ڕوژانەش پشکنین دەکرێت و ھەر حاڵەتێکی نەخوشی و گیانلەدەستدان تۆمار بکرێت ئێمە خەڵکی خۆمان ئاگادار دەکەینەوە.

بەڕێوەبەرایەتی ئاسایشی راپەڕین لە راگەیەندراوێکدا ئاماژەی بەوەکردووە، لە ھەڵمەتێکدا ھێزەکانیان لە یاریدەدەرێتی ‎ئاسایشی حاجیاوا توانیان کەسێکی مەترسیدار دەستگیر بکەن، کە دەستی ھەبوو لە دزی کردن لە ماڵان و بڕینی چەندین شوێنی کار و کەسابەتی خەڵک.

راشیگەیاند، تۆمەتبارەکە لە چیای ماکۆک دوای ھەوڵی تەقەکردن و ھەڵاتن توانییان دەستگیری بکەن، کە دانیشتوی قەزای کۆیەیە و لەدایکبووی ١٩٩٤ و پێشتریش لەلایەن دادگای لێکۆڵینەوەی ڕانیە لە ئیدارە ڕاپەڕین فەرمانی دەستگیرکردنی ھەبووە، بەڵام خۆی ڕادەست نەکردووە.

ئاسایشی راپەڕین ئاشکراشیکردووە، تۆمەتبارەکە ئۆتۆمبێلکی لە جۆری نیسان پاترۆلی بێسەرەتای بە ژمارە بەغداد پێبووە لەگەڵ کڵاشینکۆفێک لە جۆری سینی یەک مەخزەنی  پڕ فیشەک و دوو مۆبایل و چەندین کەل و پەلی تر.

بەشی پێشبینییەکانی بەرێوەبەرایەتی گشتی کەشناسی و بومەلەرزەزانی ھەرێمی کوردستان رایگەیاند، رۆژی ھەینی ئاسمان بە گشتی ساماڵ دەبێت پلەکانی گەرما پلەیەک بەرز دەبێتەوە، لە کاتەکانی شەوی رۆژی ھەینی ئەگەری بەرزبوونەوەی تۆزوخۆڵ ھەیە لەسەر بەشێک لە ناوچەکەمان ئاستی بەرزبوونەوەی کاریگەری ئەو تۆزوخۆڵە مامناوەندە یان کەم دەبێت و مەودای بینین بۆ حەوت بۆ ھەشت کیلۆمەتر دەبێت کەمدەبێتەوە.

ئاماژەی بەوەشکردووە، رۆژی شەممە تا کاتەکانی ئێوارە کاریگەری ئەم بەرزبوونەوەی تۆزوخۆڵە بە شێوەیەکی کەم دەمێنێتەوە لەسەر ناوچەکەمان بۆ رۆژی یەک شەممە کاریگەری نامێنێت.

لیژنەی پەروەردە و خوێندنی باڵای پەرلەمان داوای لە ھەردوو وەزارەتی پەروەردە و خوێندنی باڵا کرد لەبواری مامەڵەکردن لەگەڵ خوێندکاراندا بەشێوەیەکی خێرا و دیراسەکراو بە یاساکانی خۆیاندا بچنەوە و رێنمایی زانستی و ئیداریی لەبواری وەرگرتن و گواستنەوە و دابەزاندن لە قۆناغەکان و بەشە زانستییەکان دەربکەن، بۆ ئەوەی دەرفەتی ھاتنە کایەی پەیوەندی و سیستمێکی تەندروست لە نێوان مامۆستایان و خوێندکاران و دامەزراوە ئەکادیمییەکان بێتەدی.

دەستەی وەبەرھێنان دەڵێت، ئەو کەسانەی کە فۆڕمەکانیان پڕکردووەتەوە پێکھاتوون لە ٨٠ ھەزار و ٤٨٧ خێزان لەگەڵ ٩ ھەزار و ٦٧٥ سەڵت، تێکڕای ئەو کەسانەی داواکارییەکەیان پێشکەش کردووە بریتیە لە ٩٠ ھەزار و ١٦٢ کەس.

زیاتر لە ھەفتەیەکە حکومەتی ھەرێمی کوردستان فۆڕمی ٢٠ ھەزار یەکەی نیشتەجێبونی کرێنشینان بەشێوەی ئۆنلاین بڵاوکردۆتەوە و تا سەرەتای مانگی ٧ بەردەوام دەبێـت.

کرێنشینانیش سەردانی کۆمەڵەی داکۆکیکردن لەمافی کرێنشینان دەکەن بۆ وەرگرتنی زانیاری.

محەمەد شوکری سەرۆکی دەستەی وەبەرھێنان رایگەیاند، بە کوالیەتییەکی باش و نرخێکی ھەرزان لە پارێزگا و ئیدارە سەربەخۆکان ھەنگاوی یەکەمی دروستکردنی ٢٠ ھەزار یەکەی نیشتەجێبوون دەستپێدەکات، و  ئەولەویەت بۆ کەسانی شایستەیە.

بە پێی ئامارێکی بەڕێوەبەرایەتی ئاماری ھەرێم، لە ھەرێمی کوردستان، زیاتر لە ٢٠٠ ھەزار کرێنشین ھەیە.

بەڕێوەبەری ڕێکخراوی تەندروستی جیھانی لە عێراق لە کۆبوونەوەیەکدا لەگەڵ بەڕێوەبەری تەندروستی سلێمانی و پارێزگاری سلێمانی و بریکاری وەزارەتی تەندروستی حکومەت و بەڕێوەبەری ئاوی سلێمانی، باسی لە ھۆکار و چارەسەر و ڕێکارەکانی خۆپاراستن لە پەتای کۆلێرا کرد.

د.ئەحمەد زیورتی و د.وائیل ھەتاھیت بەرپرسی تیمی ئیمێرجنسی لە عێراق و نوێنەری ڕێکخراوی تەتدروستی جیھانی، پشتیوانی خۆیان بۆ ھەوڵەکانی تەندروستی سلێمانی دەربڕی بۆ کۆنتڕۆڵکردنی پەتای کۆلێرا.

لە کۆنگرەیەکی ڕۆژنامەگەریدا ئەنجامی کۆبوونەوەکە ڕاگەیەندراو، پارێزگاری سلێمانی ئەوەی خستەڕوو ژمارەی تووشبوانی کۆلێرا ڕوو لە کەمبوونە و پەتاکە لەژێر کۆنتڕۆڵدایە و بە ھەستیاری تەواوەوە پێویستە ھاوڵاتیان بەردەوام بن لەسەر خۆپارێزیی بۆ ئەوەی لە مانگەکانی داھاتوودا سەرھەڵنەداتەوە.

دواتر وەفدی میوان لەگەڵ بەڕێزان بریکاری وەزارەتی تەندروستی و بەڕێوەبەری گشتی تەندروستی سلێمانی و بەڕێوەبەری ئاوی سلێمانی سەردانی پرۆژی ئاوی سەرچنارو چەند "شەمعەیەک" کرا کەپێشتر لەسەرداوی بەڕێوەبەرایەتی گشتی تەندروستی سلێمانی لەلایەن لیژنەکانی قائمقامیەتی مەرکەزی سلێمانی داخرابوون.

فەرمانگەی دیاریکردنی بینینی مانگ لە دادگەی باڵا لە سعودیە، ئەمڕۆ ھەینی، رایگەیاند، ئێوارەی ئەمڕۆ مانگ بیندرا، بۆیە سبەی ٥ شەممە یەکەم رۆژی مانگی زیلحیجە دەبێت.

ھەر بەوھۆیەوە، حاجییان ئەمساڵ لە ٨ـی تەممووزی ٢٠٢٢ دەچنە سەر کێوی عەرەفە و رێککەوتی ٩ی تەممووزیش یەکەم رۆژی جەژنی قوربانە.

وەزارەتی ئەوقاف و کاروباری ئاینی هەرێمی کوردستانیش رایگەیاند، رۆژی (٨ )ی تەموز وەستانە لەکێوی عەرەفە، ڕۆژی( ٩) تەمووز یەکەمین ڕۆژی جەژنی قوربانی پیرۆزە

وەزارەتی حەج و عومرەی سعودییە لە سەرەتای مانگی حوزەیرانی ٢٠٢٢ دا رایگەیاند؛ ئەمساڵ رێگە بە ١ ملیۆن لە ھاووڵاتیان و دانیشتووانی سعودییە دەدرێت حەج بکەن، بڕی تێچوی گەشتی حەج بۆ ھەرحاجیەکی ھەرێمی کوردستانیش ٤ ھەزار و ٧٠٠ دۆلار دیاریکراوە.

جوتیار عادل، وتەبێژی حکومەتی ھەرێمی کوردستان لە کۆنفرانسێکی رۆژنامەوانیدا رایگەیاند، ئامانجی ھێرشەکانی سەر ھەرێمی کوردستان پەکخستنی پرۆسەی وەبەرھێنانی ھەرێمە و داوایان لە عێراق کردووە لیژنەیەکی ھاوبەش پێکبھێنرێت و رێگری لە ھێرشەکانی سەر ھەرێم بکرێت.

جوتیار عادل داوای لە دەزگاکانی راگەیاندن کرد بەرپرسیارانە کار بکەن و نەبنە مایەی نانەوەی ترس و دڵەڕاوکێ.

لەبارەی رێککەوتنیش لەگەڵ حکومەتی عێراق وتەبێژی حکومەت وتی،  ئامادەن لەسەر پرسە داراییەکان لەگەڵ حکومەتی عێراق رێکبکەون.

جوتیار عادل وتیشی، مانگانە حکومەتی ھەرێمی کوردستان ٣١ ملیۆن دۆلار بۆ پاڵپشتی نرخی بەنزین تەرخان دەکات.

لە کۆبوونەوەی ئەنجومەنی وەزیرانی ھەرێم، قوباد تاڵەبانی جێگیری سەرۆک وەزیران ڕایگەیاند، زانیاری تەواویان ھەیە لەسەر ئەو لایەنەی ھێرشەکانی کردووەتە سەر کێڵگەی غازیی کۆرمۆر و لێکۆڵینەوەی ورد کراوە بۆ ئەوەی ڕێکاریان بەرامبەر بگیرێت.

قوباد تاڵەبانی وتیشی، ھێرشەکان کراونەتە سەر پڕۆژەی فراوانکردنی کێڵگەی کۆرمۆر نەک ئەو بەشەی کە ئێستا غاز بەرھەم دەھێنێت بۆ دابینکردنی پێویستی ھاووڵاتییان.

ھەر سەربارەت بە ھێرشەکان ئەنجومەنی وەزیران ئاشکرایکرد، ئامانج لە ھێرشەکانی سەر ھەرێم، زیان گەیاندنە بە سەرچاوەی دارایی و ئابووریی و پەکخستنی پرۆسەی وەبەرھێنان.

ھاوکات ئەنجومەنەی وەزیران باسی لەوەکردووە، حکومەتی فیدڕاڵی، بە بێ ھیچ پاساوێک ھەرێمی بێ بەشکردووە لە شایستە داراییەکانی و لە کۆی ٢٦ مانگ، تا ئێستا تەنیا بۆ ماوەی ١٣مانگ بڕە پارەیەکی بە ناوی پێشینە کە تەنیا دووسەد ملیار دینارە ناردووە، داواشی لە حکومەتی فیدڕاڵیی و وەزارەتی نەوت کرد گوشاریی ناڕەوایان بۆ سەر وەبەرھێنەرانی نێودەوڵەتی بواری نەوت وگاز لە ھەرێم ڕابگرن.

ئەمڕۆ ئەمین بابەشێخ، ئەندامی مەکتەبی سیاسی و لێپرسراوی مەکتەبی پەیوەندییەکانی یەکێتیی نیشتمانیی کوردستان، لە بارەگای مەکتەبی سیاسی لەسلێمانی پێشوازی کرد لە ئۆلێگ ڤلادیمیرۆڤیچ لێڤین، کونسوڵی گشتی روسیا لە ھەرێمی کوردستان، کە سەردانەکەی بەبۆنەی کۆتاییھاتنی ئەرکەکەی بوو وەک کونسوڵی گشتی روسیا لە ھەرێمی کوردستان.

سەرەتا ئەمین بابەشێخ سوپاسی ھەموو ئەو ھەوڵ و خزمەتانەی کرد کە لەماوەی ئەرکەکەیدا پێشکەشی ھەرێمی کوردستانی کردووەو ھیوای سەرکەوتنی بۆ خواست لە ئەرک و کاری داھاتوویدا.

دواتریش گفتوگۆ لەسەر چەند پرس و تەوەرێکی گرنگ کرا لەوانەش بەردەوامیدان و پتەوکردنی پەیوەندیەکانی نێوان روسیای فیدراڵ و عێراق و ھەرێمی کوردستان بەتایبەت لە بوارەکانی ئابوری و بازرگانی و تەندروستی و رۆشنبیری و خوێندنی باڵا، بۆئەوەی سود لە ئەزموون و وزەو توانا ھاوبەشەکان وەربگیرێت، کۆمپانیا روسیەکان وەبەرھێنان و کارەکانیان فراوانتر بکەن لە ھەرێمی کوردستان، ئاڵوگۆڕی کلتوری و رۆشنبیری پەرەی زیاتری پێبدرێت.

لە بواری خوێندنی باڵاشدا باسیان لەوە کرد، ساڵانە زەمالەی خوێندن لە بوارو پسپۆڕیە جیاوازەکاندا لەلایەن زانکۆکانی روسیاوە بۆ خوێندکارانی عێراق و ھەرێمی کوردستان دابین بکرێت.

بەڕێوەبەرایەتی گشتی تەندروستی سلێمانی ڕایگەیاند، لە ٢٤ سەعاتی ڕابردوودا لە کۆی ٢٠٢ پشکنینی کۆرۆنا، ٥٠ حاڵەتیان پۆزەتیف بووە و ئەوەش بەرزترین ڕێژەیە کە لە ماوەی دوو مانگی ڕابردوودا لە سلێمانی تۆمار کراوە.

وەزارەتی تەندروستی حکومەتی ھەرێمیش ڕایگەیاندووە، لە ٢٤ سەعاتی ڕابردوودا ٤١٠ تووشبووی نوێی کۆرۆنا لە ھەرێم تۆمارکراوە.

ئومێد خۆشناو پارێزگاری ھەولێر رایگەیاند، ئەمڕۆ خوێندکارێک کە ویستوویەتی لە زانکۆی سۆرانەوە بگوازرێتەوە بۆ زانکۆی سەڵاحەدین،  تەقەی لە د.کاوان ئیسماعیل راگری کۆلێژی یاسای زانکۆی سەڵاحەدین کردووە و برینداری کرد، دواتریش بەھۆی سەختی برینەکەیەوە ئەو دکتۆرە گیانی لەدەستداوە.

بەپێی زانیارییەکان، روداوەکە پەیوەندیی بە ھەمان کەیسەوە ھەیە. ئومێد خۆشناو راشیگەیاند، تۆمەتبارەکە لە یاسا رزگاری نابێت و تا ئێستا دەستگیر نەکراوە.