ئەمڕۆ دادگای فیدراڵی عێراق سکاڵایەکی زیاد جەبار سەرۆکی پێشوویی فراکسیۆنی یەکێتی لە خولی پێنجەمی پەرلەمانی کوردستان کە تایبەتە بە یاسای ھەڵبژاردن، بۆ ٢١ی مانگی داھاتووی دواخست.

لە سکاڵایەدا، سکاڵاکار داوای کرد دادگای فیدڕاڵی ماددەکانی ١ و ٩ و ١٥ و ٢٢ و ٣٦ لە یاسای ھەڵبژاردنی پەرلەمانی کوردستان بە نادەستوری دابنێت کە پەیوەندیدارن بە کورسی کۆتاکان و دانانی ھەرێم بە یەک بازنەی ھەڵبژاردن.

کۆمسیۆنی باڵای ھەڵبژاردنەکانی عێراق کە ئەرکی بەڕێوەبردنی ھەڵبژاردنی پەرلەمانی کوردستانی لە ئەستۆ گرتووە، سەرچاوەیەکی باڵایان بۆ کوردسات نیوزی ئاشکرا کرد، بڕیارەکەی ئەمڕۆی دادگای فیدراڵی، ھێندەی تر ئامادەکارییەکانی کۆمیسیۆنی قورس تر کرد و بە دووریشی دەزانێت بەو ماوە کەمەی لە بەردەمیاندا ماوە، ئامادەکارییەکان تەواو بکات بۆ ئەنجامدانی پڕۆسەکە لە کاتی خۆیدا، بەو ھۆکارەش ھەڵبژاردنی پەرلەمانی کوردستان دوادەکەوێت.

بەھۆی خراپبونی کوالیتی نەوتەکەی و گۆڕانی بۆ کۆندێسەید، لەئێستادا کۆمپانیای (پێت ئۆیڵی تورکی) کارەکانی بلۆکی نەوتی چیاسورخی راگرتوە.

بەپێیی زانیارییەکان لە ماوەی چەند مانگی رابردوودا کۆمپانیا تورکییەکە لەبەرئەوەی بتوانێت نەوتی بلۆکی چیاسورخ ھەناردە بکات، نەوتی خاوی کڕیووە و تێکەڵی کردووە، بەڵام سەرکەوتوو نەبووە و بەرھەم ھێنانی راگرتووە. 

پێت ئۆیڵ لە سێ رۆژی رابردوودا سەرجەم کارمەندەکانی ناردوەتەوە بۆ ماڵەوە و پێی راگەیاندوون لە دوای سەری ساڵی نوێوە گرێبەستیان نوێ ناکاتەوە.

کۆمپانیایی پێت ئۆیڵی تورکی خاوەنی بلۆکی نەوتی چیاسورخە لە سنوری ناحیەی قۆرەتوو لە گەرمیان.

پەیامنێری کوردسات نیوز لە شاری ھەولێر رایگەیاند، بەرەبەیانی ئەمڕۆ لە نزیک کۆمەڵگەی شاوێس لەسەر رێگەی شەقڵاوە، دەنگی تەقینەوەیەکی گەورە بیستراوە، بەپێی زانیارییەکان دەنگی تەقینەوەی ژمارەیەک فڕۆکەی بێفڕۆکەوانی بۆمبڕێژکراو بوون، کە ھەوڵیانداوە ھێزەکانی ئەمریکا بکەنە ئامانج.

پەیامنێری کوردسات نیوز وتیشی، ئەو شوێنەی دەنگەکەی لێبیستراوە، دەکەوێتە سەر رێگەی شەقڵاوە و نزیکە لە باڵیۆزخانەی ئەمریکا لە ھەولێر، زیانەکانیش نەزانراون و ھێزە ئەمنییەکانیش ھیچ زانیارییەکیان ئاشکرانەکردووە.

ئەو ھێرشە لەکاتێکدایە، ئێوارەی رۆژی دووشەممە بە فڕۆکەیەکی بێفڕۆکەوانی بۆمبڕێژکراو، ھێرشکرایە سەر ھێزەکانی ھاوپەیمانان لە فڕۆکەخانەی نێودەوڵەتیی ھەولێر و بەھۆیەوە سێ سەربازی ئەمریکی بریندار بوون.

دەقی پرسەنامەکەی سەرۆک بافڵ...

کۆچی دوایی فەرماندە و پێشمەرگەی دێرین، لیوا ھاشم ناسراو بە (ھاشم مام عەلی کۆیی) لە دڵەوە نیگەرانیکردم.

کاک ھاشم تێکۆشەرێکی دێرین و دیاری رۆژە سەختەکانی شۆڕشی نوێ بوو، دڵسۆزییەکەی کردبوویە یەکێک لە نزیکەکانی سەرۆک مام جەلال و لەھێزەکانی سکرتاریەت و پاشان لە ھێزەکانی ٧٠، خزمەتێکی بەرچاوی پێشکەشکرد.

پرسە و ھاوخەمیی قووڵی خۆمان ئاڕاستەی کەسوکار و خانەوادە سەربەرز و تێکۆشەرەکەیان دەکەم و لە خوای گەورە داواکارم کۆچکردوو بە بەھەشتی بەرینی شادبکات.

دڵسۆزتان 
بافڵ جەلال تاڵەبانی 
سەرۆکی یەکێتیی نیشتمانیی کوردستان

بەڕێوەبەراتی تەندروستی پارێزگای کەرکوک بڵاویکردەوە، بۆ ساڵی ٢٠٢٤ چەندین پلانیان ھەیە بۆ برەودان بە کەرتی تەندروستی و پشتیوانیکردنی توشبووانی شێرپەنجە و بەرەوپێشبردنی تاقیگەکان و ئامادەکردنی سەرجەم دەرمان و پێداویستییە تەندروستییەکان. ھەروەھا پلانیان ھەیە کە نەخۆشخانەی ٤٠٠ قەرەوێڵەیی تەواو بکەن بۆ ئەوەی ساڵی داھاتوو خزمەتی خەڵک بکات. 

سەبارەت بە ئامارەکانیش رایگەیاند، لەئەمساڵدا زیاتر لە یەک ملیۆن و ٧٥٤ ھەزار نەخۆش سەردانی نەخۆشخانە و ناوەندە تەندروستییەکانی کەرکوکیان کردووە و  ٣٤ ھەزار و ٢٩٣ مناڵیش لە سنوری پارێزگاکەیان لەدایکبوون.

دەقی پەیامەکەی شاناز ئیبراھیم ئەحمەد خانمی یەکەمی عێراق...

بەڕێزان خانەوادەی لیوا ھاشم

بەبیستنی ھەواڵی ماڵئاوایی یەکجارەکی فەرماندە و تێکۆشەری دێرین لیوا (ھاشم مام عەلی کۆیی)،زۆر غەمباربووم. 

پرسە و سەرەخۆشی لەخۆتان و خانەوادە نیشتمانپەروەرەکەتان ئەکەم و ھاوبەشی خەم و پەژارەتانم. 

خوای گەورە لە کۆچکردوو خۆش بێت، سەبرو ئارامی بەھەمووان ببەخشێت.

شاناز ئیبراھیم ئەحمەد

سەرچاوەیەک لە ئەنجومەنی وەزیرانی عێراق بە کوردسات نیوزی راگەیاند، لەکۆبوونەوەی ئەنجومەنی وەزیراندا بەھیچ شێوەیەک باسی ناردنی بڕی ٧٠٠ ملیار دیناری دیکە وەک قەرزێکی دیکە بۆ مووچەی فەرمانبەران نەکراوە.

وتیشی، تا ئێستا ھیچ بڕیارێک نییە ئەنجومەنی وەزیرانی عێراق لەکۆبوونەوەکانی داھاتوودا پرسی لەو شێوەیە تاوتوێ بکات و حکومەتی عێراق لەئێستادا چاوەڕوانی ھاتنی وەفدی ھەرێمە.

بڕیارە ئەم نزیکانە وەفدێکی حکومەتی ھەرێم بچێتەوە بەغداد بۆ تاوتوێکردنی چەند پرسێک لەناویاندا، چارەسەری کێشەی مووچە لە رێگەی ھەموارکردنەوەی یاسای بودجە و گواستنەوەی موچەی فەرمانبەران بۆ سەر بودجەی حاکیمە.

جەمال کۆچەر ئەندامێکی لیژنەی دارایی بە کوردسات نیوزی راگەیاند، حکومەتی فیدراڵ بە رەسمی ئامادەیی نیشانداوە بۆ دابەشکردنی مووچەی فەرمانبەرانی ھەرێم راستەوخۆ لە رێگەی ھەژماری بانکییەوە، حکومەتی ھەرێمیش تاڕادەیەک رازییە بە پرۆسەکە.

وتیشی، تەواوی لایەنەکان جەخت لە چارەسەرکردنی کێشەکانی نێوان ھەرێم و عێراق دەکەنەوە، بەتایبەتیش کێشەی مووچەی فەرمانبەرانی ھەرێم، بۆیە چاوەڕواندەکرێت سەرەتای ساڵی داھاتوو ئەو کێشەیە چارەسەربکرێت، دواتریش قۆناغ بە قۆناغ کێشەکانی نێوان ھەردوولا چارەسەربکرێن.

دەقی پرسەنامەکە...

بەڕێزان خێزان و خانەوادەی کۆچکردوو لالە سەرحەدی خەلیفە یونس
بەڕێزان خزمانی عەشیرەتی رۆغزایی جاف

زۆر بەداخەوە ھەواڵی کۆچی دوایی (لالە سەرحەدی خەلیفە یونس) سەرۆکی عەشرەتی ڕۆغزایی جافم بیست و نیگەران و دڵگران بووم. 

لالە سەرحەد جگە لەوەی کەسایەتییەکی دیار و کۆمەڵایەتی بوو، خۆی و خانەوادە و کەسوکاریشی لەسەر رێبازی کوردایەتی و نیشتمانپەروەری و کۆڵنەدان خەباتیان کردووە و لەو پێناوەشدا قوربانییان داوە، کۆچکردنی خەسارەتێکی گەورەیە بۆ ھەموومان و مایەی نیگەرانیمانە. 

بۆ ئەم کۆستە، پرسە و سەرەخۆشی ئاڕاستەی خێزان و خانەوادە دڵسۆز و تێکۆشەرەکەتان دەکەم، خوای گەورە لێی خۆش بێت، سەبوری و دڵنەواییش بەھەموو لایەک ببەخشێت. 

انا للە وانا الیە راجعون
قوباد تاڵەبانی
جێگری سەرۆکی ئەنجومەنی وەزیران

دەقی پەیامی پیرۆزباییەکە...

جەژنی لەدایکبوونی حەزرەتی مەسیح (سڵاوی خوای لێبێت) لە خوشک و برا مەسیحییەکانی ھەرێمی کوردستان، عیراق و جیھان پیرۆزبێت و لە دڵەوە ھیوای دڵخۆشی و جەژنێکی پڕ لە کامەرانییان بۆ دەخوازم.

ھیوادارم ئەم بۆنەیە ببێتە مایەی ئاشتی و سەقامگیریی زیاتر لە وڵاتەکەمان و ئەو مێژووە درەوشاوەیەی ھەرێمی کوردستان خاوەنێتی لە تەبایی و پێکەوەژیاندا، ھەموومان پێکەوە گەشاوەتری بکەین. یەکێتیی نیشتمانیی کوردستان بە شانازییەوە رۆڵ و پێگەی مەسیحی و ھەموو پێکھاتە رەسەنەکانیتر بەرز دەنرخێنێت و کار بۆ قووڵکردنەوەی خۆشەویستی و یەکترقبووڵکردن دەکات، چونکە تەنیا بە ھەماھەنگی و پێکەوەیی سەرکەوتنمان مسۆگەر دەکەین و ھەنگاو بەرەو داھاتوویەک دەنێین کە ھەمووان خەونی پێوەدەبینن.

بافڵ جەلال تاڵەبانی
سەرۆکی یەکێتیی نیشتمانیی کوردستان

پەیامی سەرەخۆشیی خاتوو شاناز ئیبراھیم ئەحمەد بۆ کۆچی دوایی لالە سەرحەدی خەلیفە یونس.

بەڕێزان خانەوادەی لالە سەرحەدی خەلیفە یونس
بەڕێزان خزمانی عەشیرەتی رۆغزایی جاف

بەبیستنی ھەواڵی ماڵئاوایی یەکجارەکی (لالە سەرحەدی خەلیفە یونس) سەرۆکی عەشیرەتی ڕۆغزایی جاف، غەمباربووم. 

پرسە و سەرەخۆشی لەخۆتان و خانەوادە تێکۆشەرەکەتان ئەکەم و ھاوبەشی خەم و پەژارەتانم. 

خوای گەورە لە لالە سەرحەدی کۆچکردوو خۆش بێت، سەبرو ئارامی بەھەمووان ببەخشێت.

شاناز ئیبراھیم ئەحمەد

دەقی پەیامەکە...

کۆچی دوایی لالە سەرحەد خەلیفە یونس، کەسایەتی دیاری ئێلی جاف و ریشسپیی عەشیرەتی رۆغزایی لەدڵەوە نیگەرانیکردم.

‎بۆ ئەم ماتەمە پرسە و ھاوخەمیی قووڵمان ئاڕاستەی ھەڤاڵ سالار سەرحەد، ئەندامی سەرکردایەتی و کوڕان و کەسوکار و بنەماڵەی سەربەرز و خانەدانی لالە سەرحەد دەکەم و ھاوبەشی خەمیانم.

‎لالە سەرحەد کەسایەتییەکی دیاری کۆمەڵایەتی و ناسراوی گەلەکەمان بوو، ھەمیشە دیوەخانەکەی لەخزمەت خەڵک و چاکەی گشتیدا بوو، نەوەکانیشی رۆڵێکی گرنگ و باڵایان گێڕاوە لە شۆڕش و خەباتی گەلەکەماندا.

‎لەخوای گەورە داواکارم کۆچکردوومان بە بەھەشتی بەرین شادبکات و سەبووری بەھەموولایەک ببەخشێت.

‎دڵسۆزتان 
‎بافڵ جەلال تاڵەبانی 
‎سەرۆکی یەکێتیی نیشتمانیی کوردستان

دەقی پرسەنامەکە... 

بۆ کۆچی دواییی کەسایەتیی کۆمەڵایەتیی ناسراو  خوالێخۆشبوو لالە سەرحەد خەلیفە یوونس، سەرەخۆشی لە خانەوادە و کەسوکاری بەڕێزیان و خزمانی دەکەم، ھاوبەشی خەمیانم. لە خوای مەزن داواکارم گیانی بە بەزەیی و میھرەبانیی خۆی شاد بکات و ئارامی و دڵنەوایی بە ھەمووان ببەخشێت.


نێچیرڤان بارزانی
سەرۆکی ھەرێمی کوردستان 
٢٠٢٣/١٢/٢٥

پەیامنێری کوردسات نیوز لە ھەولێر رایگەیاند، ئێوارەی ئەمڕۆ بە فڕۆکەیەکی بێفڕۆکەوانی بۆمبڕێژکراو ھێرشکراوەتەسەر فڕۆکەخانەی نێودەوڵەتیی ھەولێر، ئامانجی ھێرشەکەش بنکەی سەربازیی ھاوپەیمانیی نێودەوڵەتیی دژی داعش بووە لەناو فڕۆکەخانەکە.

لە ماوەی رابردوودا چەندین جار بە فڕۆکەی بێفڕۆکەوان، ھێرشکراوەتەسەر ھێزەکانی ئەمریکا و ھاوپەیمانان لە ھەردوو فڕۆکەخانەی سەربازیی ھەریر و فڕۆکەخانەی نێودەوڵەتیی ھەولێر، بەڵام ھێرشەکان لەلایەن سیستمی بەرگریی ئاسمانیی ئەو ھێزانەوە تێکشکێندراون.

ماڵپەڕی دەنگی کرێکار رایگەیاند، لە ٢٠٢٣دا ٧٣ کرێکار گیانیانلەدەستداوە کە ٥٢ کەسیان خەڵکی ھەرێمی کوردستانن، بە جۆرێک کە ١٩ کرێکار لە سلێمانی و ٢٢ کرێکار لە ھەولێر و شەش کرێکار لە دھۆک و پێنج کرێکار لە ھەڵەبجە گیانیانلەدەستداوە. 

ئاماژە بەوەشکراوە، لە ٧٣ کرێکارەی گیانیانلە دەستداوە ٢١ کەسیان خەڵکی کەرکوک و ناوچەی جێناکۆکەکان بوون و ١٨ کرێکاریشیان بیانی بوون. 

راشیگەیاند، کەوتنەخوارەوە، تەزووی کارەبا، کەوتنە ژێر ئامێرەکان و سوتان و خنکان و تەقینەوەی ئامێرەکان، لە باوترین ھۆکارەکانی گیانلەدەستدانی کرێکارەکان بوون.