کوردستان
دەقی پرسەنامەکە...
پرسە و سەرەخۆشیی قووڵم ئاراستەی خانەوادە و کەسوکار و ھاوسەنگەرانو ھاوڕێیانی خوالێخۆشبوو شەھید ئاکام عومەر فەرماندەی ھێزەکانی کۆماندۆ دەکەم کە دوای برینێکی سەخت و مانەوەی مانگێک و سێ ھەفتە لەژێر چاودێریی پزیشکیدا، بەداخەوە ئەمڕۆ گیانی لەدەستدا.
ھاوخەم و ھاوسۆزیانم و لە خوای مەزن داواکارم گیانی بە بەزەیی و میھرەبانیی خۆی شاد بکات و دڵنەوایی و ئارامی بە خانەوادە و کەسوکار و ھاوسەنگەران و ھاوڕێیان و ھەمووان ببەخشێت.
نێچیرڤان بارزانی
سەرۆکی ھەرێمی کوردستان
٢٠٢٢/١٢/١٢
دەقی پەیامەکە...
بە داخ و پەژارەیەکی زۆرەوە، ھەواڵی ماڵئاوایی فەرماندە ئاکام عومەر فەرماندەی ھێزەکانی کۆماندۆی کوردستانمان پێگەیشت.
شەھید بوونی فەرماندەیەکی لاو و پڕ لە ورە، کە ئەمڕۆ بە یەکجاری ماڵئاوایی لێکردین، خەمێکی گەورەی خستە دڵی ھەمووانەوە و لەناخەوە نیگەرانی کردم.
ئاکام عومەر، فەرماندەیەکی ئازا و چاونەترس بوو، بە شەھیدبوونی فەرماندەیەکی ئازامان لەدەستدا، بۆیە بەم بۆنە خەمناکەوە پرسە و سەرەخۆشی لە کەسوکار و بنەماڵە و خانەوادە تێکۆشەرەکەی فەرماندە ئاکام و ھەموو ئەفسەر و پێشمەرگەکانی ھێزی کۆماندۆ دەکەم.
ھێرۆ ئیبراھیم ئەحمەد
ئەندامی ئەنجومەنی باڵای سیاسی و بەرژەوەندیی ی.ن.ک
رەنج پشدەری، رۆژنامەنووس بەرەبەیانی ئەمڕۆ رایگەیاند، ٣٥ کۆچبەری کورد زیاتر لە سێ سەعات بەھۆی شەپۆلی زۆرەوە نەیانتوانیوە لە گەشتەکەیان بەردەوام بن و لە ئاوەکانی فەڕەنسا گیریان خواردووە و داوای بەھانەوەچوونیان کردووە.
وتیشی دوای پەیوەندیکردن بە رێکخراوەکانی فەڕەنسا و ئاگادارکردنەوەی لایەنی پەیوەندیدار، ھەر ٣٥ کۆچبەرە کوردەکە رزگارکران و ھەموویان سەلامەتن.
وەزارەتی شارەوانی و گەشتوگوزاری ھەرێم لە راگەیەندراوێکدا بڵاویکردەوە، حکومەتی ھەرێمی کوردستان بڕی ٢٠ ملیار و ٨٤٢ ملیۆن دیناری بۆ گۆڕینی بۆرییەکە تەرخانکردووە و ئەمڕۆقۆناغی یەکەمی دەستپێدەکات.
پڕۆژەی ئیفرازی سێ ٤٠%ی ئاوی خواردنەوە بۆ دانیشتیوانی شاری ھەولێر دابین دەکات، بەھۆی سەرپێچی و زێدەڕۆیی لەسەر بۆرییەکە، ٢٤ جار بۆرییەکە شکاوە و بۆ ماوەیەک بەشێکی زۆری دانیشتیوانی شاری ھەولێر بێ ئاو بوون.
بەپێی راگەیەنراوێکی کەشناسی، لە بەرەبەیانی ڕۆژی سێ شەممە کاریگەری نزمە پاڵەپەستۆی دەریای ناوەڕاست ڕوو لە ناوچەکە دەکات و باران بارین بە شێوەی نمە باران لە ناوچەی جیا جیا دەستپێدەکات.
دەشڵێت، لەگەڵ باران بارین بارستە ھەوایەکی ساردیش ڕوو لە ناوچەکە دەکات , ئاستی باران مامناوەند دەبێت و ھەروەھا لەگەڵ باران بارین لە سەر لووتکەی شاخە بەرزەکان بەفریش دەباریت.
بەپێی پێشبینی کەشناسی، کاریگەری ئەم شەپۆلە لەسەر ناوچەکە بەشێوەی نمە باران و بارانی مامناوەند دەبێت بە گشتی ڕۆژی پێنج شەممە کۆتای دێت.
رێکخراوی ھەنگاو بۆ مافەکانی مرۆڤ، دواین ئاماری قوربانیانی خۆپیشاندانەکانی رۆژھەڵاتی کوردستانی بڵاوکردەوەو رایگەیاند، لە سەرەتای خۆپیشاندانەکانەوە تا ئێستا ١٢٤ کەس گیانیان لەدەستداوە،کە حەوتیان ژن و ١٥یان منداڵن.
ھەروەھا ٦٥٠٠ ھاووڵاتی لەلایەن ھێزە ئەمنییەکانەوە دەستگیرکراون کە لەو ژمارەیە ١٧٧ کەسیان ژن و ١٤٨ منداڵ و ٧٨یان خوێندکارن.
رێکخراوی ھەنگاو ئاماژەی بەوەشکردوە، خۆپیشاندان ٤٧شارو ٢٧ زانکۆی رۆژھەڵاتی کوردستانی گرتۆتەوەو لە پێکدادانەکانیشدا ٣٦ کەس لە ھێزە ئەمنییەکان کوژراون.
لەلایەکی ترەوە، رێکخراوی لێبوردنی نێودەوڵەتی بڵاویکردەوە، لە سێ مانگی رابردوودا ٤٤ منداڵ لە خۆپیشاندانەکانی ئێران و رۆژھەڵاتی کوردستان کوژراون، کە تەمەنیان لە نێوان ٩ بۆ ١٨ ساڵدایە و ١٤%ی کۆی گشتی کوژراوانی خۆپیشاندانەکان پێکدەھێنن.
دەقی پرسەنامەکە...
فەرماندەی تێکۆشەر و پێشمەرگەی رۆژە سەختەکان مام غەفور
بەخەمێکی قووڵەوە ھەواڵی کۆچی دوایی (جەبار ئەحمەد دەروێش) برای بەڕێزتانم پێگەیشت.
بۆ ئەم خەمە گەورەیە پرسە و ھاوخەمی خۆم ئاڕاستەی ئێوە و بنەماڵە تێکۆشەرەکەتان دەکەم و ھاوبەشی خەمتانم.
لەخوای گەورە داواکارم کۆچکردوو بە بەھەشتی بەرین شاد بکات و سەبووری بە ھەموولایەک ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
سوپای پاسداران لە راگەیەنراوێکدا ئاماژەی بەوەکرد، دەزگای ھەواڵگری لە پارێزگای خۆراسان ئەندامانی گروپێکی سەر بە رێکخراوی سوپای دادپەروەرییان دەستگیرکردوە کە پیلانیان ھەبووە کاری تیرۆریستی و تێکدەرانە بکەن لە پارێزگای مەشھەد و ھێرش بکەنە سەر بینای پارێزگا و ئەحمەد عەلەم ھودا باوکی ھاوسەری ئیبراھیم رەئیسی سەرۆک کۆمارو وتاربێژی ھەینی شارەکە بکوژن.
راشیگەیاند، بڕێکی بەرچاو لە چەک و کەرەستەی تەقینەوە لە حەشارگەی گروپەکەدا دەستی بەسەردا گیراوەو ژمارەیەک ئەندام و پشتیوانیان لە پارێزگاکانی تریش دەستنیشان کراون.
ھەر دوێنێ فرۆکە جەنگییەکانی تورکیا دووجار بۆردومانی ناوچەکانی گەروا سنگە و چیای بەربزین-یان لە سنوری برادۆست کرد.
پەیامنێری کوردسات نیوز رایگەیاند، فرۆکە جەنگییەکانی تورکیا ماوەی ٣٠ خولەک بە ئاسمانی سنوری برادۆست سوڕاونەتەوەو دووجار بۆردومانی ناوچەکانی گەروا سنگە و چیای بەربزینیان کردووە.
وتیشی، ئەو ناوچانەی بۆردومانکراون، ناوچەی قەدەغەکراون و رۆژی پێنج شەممەش سوپای تورکیا لە ناوچەکەدا تەقەی ھەڕەمەکی لە گوندەکانی خەلیفان و سیران کردووە.
لەم ھەفتەیەدا سێیەمجارە فرۆکە جەنگییەکانی تورکیا ناوچەکانی سنوری برادۆست بۆردومان دەکەن.
محەمەد حسێن ئاغاسی پارێزەری فەریدە مورادخانی خوشکەزای عەلی خامنەیی رابەری باڵای شۆڕشی ئیسلامی ئێران رایگەیاند، دوای چەندین دانیشتن، دادگای تایبەتی پیاوانی ئاین بڕیاریدا بە سەپاندنی سزای ١٥ ساڵ زیندانیکردن بەسەر فەریدە مورادخانیدا، بەڵام دوای قبوڵکردنی داواکارییەکی مورادخانی بۆ پێداچوونەوە بە دۆسییەکەی، سزاکەی کەمرایەوە بۆ سێ ساڵ.
وتیشی، ئەو تۆمەتانەی ئاراستەی مورادخانی کراون، لە دەسەڵات و پسپۆڕی دادگای تایبەتی پیاوانی ئایندا نییە بەدواداچوون و لێکۆڵینەوەی بۆ بکات و بڕیاری لەسەر بدات، چونکە ئەو دادگایە تایبەتە بە دادگاییکردنی پیاوانی ئاینیی، بەڵام فەریدە مورادخانی نە پیاوە و نەکەسایەتییەکی ئاینیشە.
دەقەی پرسەنامەکە...
بەڕێز خاتوو لەیلا عومەر سەرۆکی شارەوانی سلێمانی
بەداخ و پەژارەیەکی زۆرەوە ھەواڵی کۆچی دوایی (عوسمان دەروێش علی) سابونکەرانی مامی بەرێزتانم بیست.
بۆ ئەم خەمە پرسە و سەرەخۆشی لەخۆتان و خانەوادە سەربەرزەکەتان دەکەم و ھاوبەشی خەم و پەژارەتانم.
خوای گەورە لە کۆچکردوو خۆش بێت و جێگای بەھەشت بێت، سەبوری و دڵنەوایی بەھەموو لایەک ببەخشێت.
انا للە و انا الیە راجعون
قوباد تاڵەبانی
سەرپەرشتیاری مەکتەبی سکرتارییەتی سەرۆک مام جەلال
ئەمیر سەعید ئیروانی نوێنەری ئێران لە نەتەوەیەکگرتوەکان لە نامەیەکدا بۆ ئەنتۆنیۆ گۆتێرێس سکرتێری گشتی نەتەوەیەکگرتوەکان رایگەیاند، ئەگەر ئەمریکا سەرکەوتوو بێت لە ھەڵوەشاندنەوەی ئەندامێتی وڵاتەکەی لە لیژنەی کاروباری ژنان پەیڕەوێکی مەترسیدار لە سیستمی نەتەوەیەکگرتوەکان دەھێنێتە ئاراوەو نیشانەی پرسیار دروست دەکات لەبارەی پەیڕەوی یەکسانی ئەندامان لەو رێکخراوە نێودەوڵەتییە.
رونیشیکردۆتەوە، لە کۆبوونەوەی داھاتووی ئەنجومەنی کۆمەڵایەتی و ئابوری نەتەوەیەکگرتوەکان کە ١٤ی ئەم مانگە بەڕێوەدەچێت گفتوگۆ لەبارەی داواکارییەکی نایاسایی ئەمریکا دەکرێت بۆ ھەڵوەشاندنەوەی ئەندامێتی ئێران لە لیژنەکە و ئەو داواکارییەی ئەمریکا ھەوڵێکی ترە بۆ خراپ بەکارھێنانی سیستمی نەتەوەیەکگرتوەکان بۆ مەبەستی سیاسی تایبەت بە خۆی.
لیوا تەحسین خەفاجی وتەبێژی ئۆپراسیۆنە ھاوبەشەکانی عێراق لە لێدوانێکی تایبەتدا بۆ کوردسات نیوز رایگەیاند، پێکھێنانی دوو لیوا ھاوبەشەکە یەکلابووەتەوە و پێکھاتە و شوێنەکانی بڵاوبوونەوە و پڕچەککردنیان بۆ دیاریکراوە.
وتیشی دەستبەکاربوونی لیوا ھاوبەشەکان یەک خاڵی ماوە، کە بریتییە لە پلەی وەزیفی، ئەوەش لەبەرئەوەی تا ئێستا بودجە پەسەندنەکراوە.
خەفاجی جەختیکردەوە، دوای پەسەندکردنی بودجە پلەی وەزیفی ئەندامانی لیوا ھاوبەشەکان دیاریدەکرێت و دەستبەکاردەبن.
جەمال کۆچەر رایگەیاند، نەناردنی پڕۆژە یاسای بودجەی ٢٠٢٣ لە حکومەتەوە بۆ ئەنجومەنی نوێنەران ھیچ پاساوێکی نییە و بێ ھۆکارە.
وتیشی، حکومەتی نوێ کاتی پێویستی بۆ ئامادەکردنی پڕۆژە یاسای بودجە وەرگرت، جگەلەوەش لە حکومەتەکەی مستەفا کازمیدا رەشنووسی پڕۆژە یاساکە ئامادەکرا بوو، بەڵام حکومەتەکەی محەمەد شیاع سودانی ھەندێک گۆڕانکاری سادەی لە رەشنووسەکەدا کردووە.
ئەندامەکەی لیژنەی دارایی وتیشی، ئەگەر لە ماوەی پشووی یاساداناندا، پڕۆژە یاسای بودجە رەوانە بکرێت، ئەوا ئەنجومەنی نوێنەران بۆ تاوتوێکردنی پشووەکەی رادەگرێت و بەپێی دەستوور لە کۆبوونەوەیەکی نائاساییدا پەسەندی دەکات.