کوردستان
فەھمی بورھان، ئەندامی سەرکردایەتی یەکێتیی نیشتمانیی کوردستان بە کوردسات نیوزی راگەیاند، سەرۆک بافڵ رەزامەندیی دەربڕیوە لەسەر رێکخستنی کۆنفرانسێکی تایبەت بە کەرکوک و ناوچە جێناکۆکەکان و بڕیارە کۆنفرانسەکە لە داھاتوویەکی نزیکدا رێکبخرێت، تاوەکو نەخشەڕێگەیەک بۆ خزمەتکردنی زیاتری شارەکە و چارەسەری کێشەکان دابنرێت.
وتیشی، بڕیارە راپۆرتێکی گشتگیر لەسەر دۆخی کەرکوک و ناوچە جێناکۆکەکان ئامادەبکرێت و بخرێتە بەردەم مەکتەبی سیاسی، تاوەکو لە کۆبوونەوەکەدا میکانیزمێک ئامادەبکرێت بۆ رێکخستنەوەی دۆخی سیاسی و ئیداری کەرکوک و ناوچەکە.
فەھمی بورھان ئاماژەی بۆ ئەوەشکرد، لە کۆنفرانسەدا بە وردی پەنجە دەخرێتە سەر لایەنە ھەمەجۆرەکانی کەرکوک و ناوچەکان و لێکەوتەکانی ئەو دۆخە نەخوازراوانەی کە بەرۆکی ئەو ناوچانەی گرتووە و خودی کۆنفرانسەکەش بایەخپێدانی یەکێتییە بە کەرکوک و ناوچە کوردستانییەکان و زاڵکردنی برایەتی پێکھاتەکانە لە کەرکوک کە شارێکی کوردستانییە وەک ناسنامە و دەبێت مافی پێکھاتەکانیش پارێزراو بێت و شاری پێکەوەژیان بێت.
ئیحسان عبدالرحمان بەرێوەبەری گشتی چاکسازیەکانی ھەرێم بە کوردسات نیوزی ڕاگەیاند، بە مەبەستی کەمکردنەوەی جەنجاڵیەکان لەناو گرتووخانەکاندا، پڕۆژە یاسایەک بۆ لێبوردنی گشتیی ئامادە کراوە.
وتیشی ئەمرۆ لە پەرلەمانی کوردستان کۆبوونەوەیەکی گرنگ بە ئامادەبوونی سەرۆکی پارلەمان ئەنجام دەدرێت و پڕۆژەکە تاوتوێدەکریت.
لەھەرێمی کوردستان تا ئێستا سێ جار لێبوردنی گشتی لە ساڵەکانی ٢٠٠٧، ٢٠١٢، ٢٠١٧ بۆ سزدراوان دەرچووە و نزیکەی حەوت ھەزار کەس لێی سوودمەند بوون.
"ئەسیر دادو الغدێری" وەزیری بازرگانی عێراق رایگەیاند، کۆمپانیاکانی بەرھەمھێنانی خۆراک و دانەوێڵە و بازرگانی دانەوێڵە ئامادەکارییە تەکنیکی و کارگێڕییەکانیان تەواو کردووە بۆ دەستەبەرکردنی یەکەم سەبەتەی خۆراک و ئارد بۆ ساڵی ٢٠٢٣.
ئاماژەی بۆ ئەوەشکردووە، رۆژی یەک شەممە ٨ی کانوونی دووەم بەپێی پلانی ئامادەکراو دەست بە دابەشکردنی سەبەتەی خۆراکی ئەمساڵ دەکرێت، بۆ ئەو مەبەستەش ھەماھەنگی لە نێوان ھەردوو کۆمپانیای بەرھەمھێنانی دانەوێڵە و کۆمپانیاکانی بازرگانی دانەوێڵە بەردەوامە.
وەزیری بازرگانی عێراق جەختیشی کردەوە لەسەر پابەندبوون بە ڕێکخستنی پرۆسەی بڕین و ھەماھەنگی پێداچوونەوە بە کاری بریکارەکانی خۆراک.
"ھۆگر عەزیز"وتەبێژی پۆلیسی ھەولێر لە کۆنفرانسێکی رۆژنامەوانیدا رایگەیاند، ساڵی رابردوو ٧ ھەزار و ٦٧٨ تاوان ئەنجامدراوە، لەو ژمارەیەش ٦ ھەزار و ٨٩٤ تاوان ئاشکرا کراوە و تۆمەتباران دراونەتە دادگا.
وتیشی، ساڵی رابردوو ٦٢ تاوانی کوشتن ئەنجام دراوە، ٧٩ کەسیش بە تۆمەتی کوشتن دەستگیر کراون، ٧٧حاڵەتی خۆکوشتنیش لە بەرێوبەرایەتی پۆلیسی ھەولێر تۆمار کراوە.
وەزارەتی پێشمەرگە لە راگەیەنراوێکدا رایگەیاند، بەھۆی ھاتنی جەژنی سەری ساڵ و رۆژەکانی پشوو، دابەشکردنی مووچەی لیواکانی پیادەی وەزارەتی پێشمەرگە دواکەوت، بەڵام رۆژی دوو شەممە دەستدەکرێت بە دابەش کردنی مووچەی لیواکانی پیادە.
موچەی لیواکانی پیادەی وەزارەتی پێشمەرگە، لە بودجەی بەرگری ویلایەتە یەکگرتووەکانی ئەمریکا دابین دەکرێت.
دەقی پرسەنامەکە :
بەڕێزان و خزمانی کەڵکەسماق و بزووتنەوەی حەقە
بەداخێکی زۆرەوە ھەواڵی کۆچی دوایی خاتوو (حەلاوە عەبدولڕەحمان) ھاوسەری کاک مستەفای مامە رەزای کەڵکەسماق، رابەری کۆچکردووی بزووتنەوەی حەقە و دایکی ھەردوو پێشمەرگەی دێرین عەبدولرەحمان و سەربەستمان پێگەیشت.
بۆئەم خەمە گەورەیە پرسە و سەرەخۆشی ئاڕاستەی ئێوە، کەسوکار و بنەماڵە سەربەرز و تێکۆشەرەکەتان دەکەم.
لەخوای گەورە داواکارم کۆچکردوو بەبەھەشتی بەرین شادبکات و سەبووری و ئارامی بەھەموولایەک ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
دەقی پیرۆزباییەکە...
بەبۆنەی جەژنی سێ رۆژەی یاران (قەوڵتاس) پیرۆزباییەکی گەرم لە خوشک و برایانی کاکەیی دەکەم و ھیوادارم ئەم جەژنە بە دڵخۆشی و کامەرانییەوە بەسەربەرن.
کاکەییەکان پێکھاتەیەکی گرنگ و نموونەیەکی بەرزی قووڵکردنەوەی گیانی تەبایی و پێکەوە ژیان بوون لە کوردستان. یەکێتیی نیشتمانیی کوردستان بەڕێزەوە لە مێژوو و خەباتی کاکەییەکان دەڕوانێت و وەک ھەمیشە پارێزەر و بەدیھێنەری مافەکانیان دەبێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
دەقی پیرۆزباییەکە...
بە بۆنەی ھاتنەوەی جەژنی سێ شەوەی یاران (قەوڵتاس) پیرۆزباییەکی گەرم لەخوشک و برایانی کاکەیی و سەرجەم یارسانەکان دەکەم لەھەرێمی کوردستان.
ئومێدەوارم ئەم جەژنە ببێتە مایەی خێر و خۆشی و کۆتاییھاتنی ئەو نەھامەتیانەی کەکاکەییەکان رووبەرووی بونەوە لەسایەی چەپۆکی چەپەڵی تاریکپەرستانی داعش.
قەوڵتاس ببێتە ھەوێنی قوڵکردنەوە و بەھێزکردنی گیانی تەبایی و لێبووردەیی و پێکەوەژیان بێت لەنێوان ھەموو پێکھاتەکاندا.
قوباد تاڵەبانی
سەرپەرشتیاری مەکتەبی سکرتارییەتی سەرۆک مام جەلال
ھیوا عەلی، وتەبێژی وەزارەتی کشتوکاڵ و سەرچاوەکانی ئاوی ھەرێم بە کوردسات نیوزی راگەیاند، لە چەند شارێک راھێنانەکان دەستیان پێکردووە و لەم ھەفتەیەوە بە چەند قۆناغێک بە فراوانتر لە پارێزگا و ئیدارە سەربەخۆکان دەستدەکرێت بە ئەنجامدانی ڕاھێنان بە ئەو ١١ ھەزار دەرچووەی زانکۆ و پەیمانگاکان کە فۆڕمیان پڕکردووەتەوە و بڕیارە لە کەرتی تایبەت بۆ سەرپەرشتیکردنی پڕۆژە کشتوکاڵییەکانیان دابمەزرێن.
رۆژی ٢٨ی حوزەیرانی ٢٠٢٢ وەزارەتی کشتوکاڵ فۆڕمێکی بۆ دامەزراندنی پێنج ھەزار دەرچووی کۆلێژەکانی کشتوکاڵ و ڤێتێرنەری لە ھەرێمی کوردستان راگەیاند، بەڵام زیاتر لە ١١ ھەزار کەس ئەو فۆڕمەیان پڕکردەوە. لەوبارەیەوە وتەبێژی وەزارەتی کشتوکاڵ ئاشکرای کرد، زیاتر لەو پێنج ھەزار کەسە دادەمەزرێن کە پێشتر رایانگەیاندووە.
بەڕێوەبەرایەتی پۆلیسی پارێزگای سلێمانی رایگەیاند، دوای ئەوەی کچێک سکاڵای لەسەر تۆمەتبارێک تۆمارکرد، کە بە فێڵ پارەی لێوەرگرتووە، ھێزەکانی پۆلیس لێکۆڵینەوەکانیان دەستپێکردوو دوای گەڕان و بەدواداچوونەکان توانرا لەماوەی کەمتر لە ٢٤ سەعات تۆمەتبار لە شاری ھەولێرەوە بھێنرێتە سلێمانی و لەلایەن بنکەی پۆلیسی ڕزگارییەوە دەستگیربکرێت و بەشێک لەپارەکانیش دەستیبەسەردابگیرێت .
ئاشکراشیکردووە، ئەو تۆمەتبارە کچەکەی لە رێگەی تۆڕەکۆمەڵایەتییەکانەوە ناسیوە و بڕی ١٥ ملیۆن و ٥٠٠ ھەزار دیناری لە کچەکە وەرگرتووە.
پۆلیسی سلێمانی ئاماژەی بەوەشکردووە، لە ئێستادا تۆمەتبار (م، ف، ع لەدایکبووی ٢٠٠٣، دانیشتووی ھەولێر-سەیدئاوا) بەبڕیاری دادوەر و بەپێی ماددەی ٤٥٢ لەیاسای سزادانی عێراقی ڕاگیراوە و لێکۆڵینەوە لەگەڵیدا بەردەوامە .
دەستەی سەربەخۆی مافی مرۆڤی ھەرێم لە راگەیەندراوێکدا ئاماژە بۆ ئەوە دەکات، دەستەکەیان بە تووندی ئیدانەی ئەو تاوانە دەکات کە رۆژی ھەینی لە گەڕەکی موفتی شاری ھەولێر، کچێکی پانزە ساڵان بەدەستی باوکی کوژرا. داواش لە ھێزە ئەمنییەکان دەکات، ھەوڵەکانیان چڕتر بکەن بۆ ئەوی بە زووترین کات تاوانبارەکە دەستگیر بکەن، بۆ ئەوەی بگات بە سزای یاسایی خۆی.
ھاوکات سیامەند عەبدولقادر، پارێزەری کەیسی ئەو خێزانەی کچەکەیان لەلایەن باوکیەوە کوژرا لە ھەژماری خۆی لە فەیسبووک نووسیویەتی، ماوەی دوو مانگە دادوەری لێکۆڵینەوە بە تۆمەتی کوشتن فەرمانی دەستگیرکردنی بۆ تۆمەتبار دەرکردووە، بەڵام لایەنی پەیوەندیدار کەمتەرخەم بوون و دەستگیریان نەکرد تا کچە ١٥ ساڵانەکەی خۆی کوشت.
بەرێوەبەرایەتی گشتی کەشناسی ھەرێمی کوردستان رایگەیاند، ئەم شەو ئەگەری نمەباران ھەیە لە ناوچەکانی ڕۆژھەڵات و باکوری ڕۆژھەڵاتی ھەرێمی کوردستان و ھەروەھا بەفرێکی کەم لە ناوچە سنورییەکانی دەبارێت لە گەڵ دروستبوونی تەم و مژ لە کاتەکانی بەیانی زوودا لە ناوچەی جیا جیا.
ئاشکراشیکرد، سبەی شەممە پێشبینی دەکرێت ئاسمانی ھەرێمی کوردستان ھەوری تەواو بێت لەگەڵ دەستپێکردنی نمەباران لە کاتەکانی نیوەڕۆدا پاشان ڕێژەی بارانبارین زیاتر دەبێت و زۆربەی ناوچەکانی ھەرێم دەگرێتەوە، ھاوکات بارستە ھەوایەکی ساردی لەگەڵ دەبێت و بەفر لە ناوچە شاخاوییەکان دەبارێت و پلەکانی گەرما زیاتر ڕوو لە دابەزین دەکەن.
بەڕێوەبەرایەتی پۆلیسی پارێزگای ھەولێر ڕوونکردنەوەیەکی بڵاوکردەوە و ڕایگەیاند، ئەمڕۆ ھێزەکانی بەڕێوەبەرایەتیمان ئاگادارکرانەوە بەبوونی ڕووداوێکی کوشتن لە گەڕەکی موفتی، دوای گەیشتنی ھێزێکی لێکۆڵینەوە بۆ شوێنی ڕووداو دەرکەوت کەوا کچێک بەناوی (ڕەھا ب. ف.) کە بەدەستی باوکی کوژراوە، وە باوکی یەکێک بووە لە بەکارھێنەرانی ماددەی ھۆشبەر و دوای ئەنجامدانی تاوانەکە لەشوێنی ڕووداو ڕایکردووە.
ڕاشیانگەیاند ، لەکاتی ئێستادا پۆلیس سەرقاڵی لێکۆڵینەوەیە بۆ دەستگیرکردنی تۆمەتبار بۆ ئەوەی ڕادەستی یاسای بکات.
ماڵپەری میزان ئۆنلاین سەر بە دەسەڵاتی دادوەری ئێران بڵاویکردەوە، کازم غەریبابادی یاریدەدەری کاروباری نێودەوڵەتی لە دەسەڵاتی دادوەری و سکرتێری لیژنەی مافەکانی مرۆڤ داوای لە داواکاری گشتی کردووە لێکۆڵینەوەیەکی ورد لە تۆمەتەکانی دەستدرێژی سێکسی بۆ سەر ژنان لە گرتووخانەکاندا بکات.
لە چەند رۆژی رابردوودا مەسعود ستایشی وتەبێژی دەسەڵاتی دادوەری تۆمەتی دەستدرێژی سێکسی بۆ سەر ژنانی دەستگیرکراو رەتکردەوەو رایگەیاند، ئەو جۆرە ھەواڵانە لە لایەن میدیای نەیاری کۆماری ئیسلامی ئێرانەوە بڵاودەکرێتەوە.
رێکخراوی ھەنگاو بۆ مافەکانی مرۆڤ بڵاویکردەوە، ھاووڵاتیەکی کورد بەناوی (مەھدی عەسگری) تەمەن ٣٣ ساڵ و دانیشتووی تاران، بەتۆمەتی پەیوەندیدار بە ماددەی ھۆشبەر لە گرتوخانەی (قزڵحەسار)ی سەر بە شاری کەرەج سزای لەسێدارەدانی بەسەردا جێبەجێکراوە.
ھەروەھا بەرەبەیانی رۆژی چوارشەممە، (سەعدوڵا کەریمی) تەمەن ٤٣ ساڵ خەڵکی گوندی سەرین و (فەرھاد کەریمی) خەڵکی گوندی کۆمەرەی سەر بە پارێزگای کرماشان بە تاوانی کوشتن لە گرتووخانەی دێزڵئاوای کرماشان سزای لەسێدارەدانیان بەسەردا جێبەجێکراوەو رێگەشیان پێنەدراوە لە دوادیداردا چاویان بە کەسوکاریان بکەوێت.
وەزارەتی دارایی ھەرێم لە راگەیەنراوێکدا رایگەیاند، لە چوارچێوەی ھەوڵەکان بۆ بەجێگەیاندنی دۆسییەی شەفافیەت لە داھات و خەرجی و ڕێکخستنەوەی ئیشوکارە بانکییەکانی سلێمانی و بەئەلیکترۆنی کردنی موچەی خانەنشینان و دیجیتاڵکردنی دۆسییەکانیان، ئاوات جەناب نوری، وەزیری دارایی و ئابوری سەردانی بەڕێوەبەرایەتی خانەنشینی سلێمانی کردوو بڕیایدا بینای بەڕێوەبەرایەتییەکە بە تەواوی تەرخان بکرێت بۆ خانەنشینی و کاربکرێت بۆ کارئاسانی مامەڵە و سەردانی خانەنشینان بۆ بەڕێوەبەرایەتییەکە.
ئاماژە بەوەشکراوە، ھەروەھا وەزیری دارایی بڕیاریدا ھەریەک لە بانکی باخان و بانکی کوردسات تێکەڵ بکرێن و لە چوارچێوەی یەک بانکدا ئیشوکارەکانیان ڕێکبخرێتەوە و سەرجەم دۆسییەی خانەنشینان بەدیجیتاڵی بکرێت و شێوازی نوێ لە ئەرشیفکردنی دۆسیە و دیکۆمێنتەکان کارا بکرێت.
وەزیری دارایی بڕیاریشیدا بە ئەلکترۆنیکردنی موچەی خانەنشینان و دروستکردنی کارتی زیرەکی موچەکانیان کە وەزارەتی دارایی لە کابینەی نۆیەمی حکومەتی ھەرێم دەستیپێکردووە، قۆناغەکانی کاراتر و تەواو بکرێت.