کوردستان
وەزارەتی خوێندنی باڵا، وەرگرتنی ٦٩٨ دەرچووی دیكەی قۆناغی ١٢ـی ئامادەیی لە زانكۆ و پەیمانگا حكومییەكانی هەرێم راگەیاند، كە فۆڕمی كورسی بەتاڵیان پڕكردبووەوە.
وەزارەتی خوێندنی باڵا و توێژینەوەی زانستی لە راگەیەنراوێکدا بڵاویكردەوە، لە ئەنجامی پڕكردنەوەی فۆڕمی كورسی بەتاڵ، ٦٩٨ دەرچووی دیكەی قۆناغی ١٢ـی ئامادەیی لە زانكۆ و پەیمانگا حكومییەكانی دیكە وەرگیراون.
ئەوەشی خستەڕوو، ئەو دەرچووانە پێشتر لە هیچ شوێنێك ناویان نەهاتبووەوە، بەڵام دوای ئەوەی خوێندنی باڵا بۆ جاری دووەم دەرگای پێشكەشكردنی زانكۆ و پەیمانگا حكومییەكانی كردەوە، ئێستا ئەو دەرچووانە لە زانكۆ و پەیمانگا حكومییەكان بە شێوازی زانكۆڵاین و پارالێل و ئێواران ناویان هاتووەتەوە.
رۆژی ٣ـی تشرینی دووەمی ئەمساڵ، وەزارەتی خوێندنی باڵا ئەنجامی زانكۆڵاینی بڵاوكردەوە و رایگەیاند، زیاتر لە ٤٤ هەزار دەرچووی قۆناغی ١٢ـی ئامادەیی لە زانكۆ و پەیمانگا حكومییەكانی هەرێم وەرگیراون.
وەزارەتی دارایی عیراق رازیبووە بە ناردنی موچەی مانگەكانی ١٠ و ١١ و ١٢ ی موچەخۆرانی هەرێم بەو مەرجەی داهاتی ناوخۆی هەرێم رادەستبكرێت.
پەیامنێری كوردسات نیوز رایگەیاند، وەزارەتی دارایی عیراق رازیبووە بە ناردنی موچەی مانگەكانی ١٠ و ١١ و ١٢ ی موچەخۆرانی هەرێم هەروەها رازیبوە بۆ هەر مانگێك بڕی ٧٦٠ ملیار دینار بۆ هەرێم بنێرێت، بەو مەرجەی هەرێم داهاتی ناوخۆ رادەستی بەغداد بكات.
ئەوە لەكاتێكدایە، ئەمرۆ وەزارەتی دارایی هەرێم رایگەیاند، كە لیستی مووچەی مانگی 11ی فەرمانبەرانی هەرێمی كوردستانی ڕادەستی وەزارەتی دارایی حكومەتی فیدراڵ كردوە.
ئهفسهرێكی هاتوچۆی سلێمانی رایگەیاند، قۆناغی یهكهم و دووهمی دانانی كامێرای خاڵ بۆ خاڵ لهسنوری پارێزگای سلێمانی سهركهوتوانه جێبهجێكراو قۆناغی سێیهمیش لهڕێگهی (عهربهت ـ سلێمانی) دهبێت.
فەرهاد گورون لێپرسراوی هۆبەی سەرپێچی کامێراکان لەبهڕێوهبهرایهتی هاتوچۆی سلێمانی ڕاشیگەیاند، کامێرایی چاودێری خاڵ بۆ خاڵ تائێستا دوو قۆناغی جێبەجێکراوە".
وتیشی، قۆناغی یهكهم ڕێگەی (تاسڵوجە ـ دوکان)و قۆناغی دوهمیش ڕێگهی تاسڵوجە ـ بانی مەقان) بوو كه لهیهكشهممهی ڕابردوهوه خراوهتهكار، بۆ قۆناغی سێیەمیش لەڕێگەی (سلێمانی ـ عەربەت) دەبێت.
لێپرسراوی هۆبەی سەرپێچی کامێراکان لەبهڕێوهبهرایهتی هاتوچۆی سلێمانی جهختیشیكردهوه، هەرکاتێک ئەو شەقامە چاککراو تەواو ئامادەکرا، ئەوکات کامێرای (خاڵ بۆ خاڵ)ی لێ دادەنرێت.
ئەنجومەنی پارێزگای كەركوك كۆدەبێتەوە و ژمارەیەك لە بەرێوەبەرەكان بانگهێشتی كۆبونەوەكە كراون.
بە پێی كارنامەی كۆبونەوەكە، بەرێوەبەری هاتوچۆی كەركوك و بەڕێوەبەری بەشی كاروباری ماددە هۆشبەرەكان و ماددە دەرونییەكان و بەرێوەبەری تاوانی رێكخراو بانگهێشتی كۆبونەوەكە كراون.
تەوەرێكی تری كۆبونەوەكە تایبەتە بە دەنگدان لەسەر لۆگۆی نوێی پارێزگای كەركوك.
هاوسەرۆكی شارەوانی قەزایەكی سەر بە پارێزگای ئامەدی باکووری کوردستان دەستگیركرا.
پەیامنێری كوردسات نیوز رایگەیاند، چەنگیز دوندار هاوسەرۆكی شارەوانی قەیاپناری سەر بە پارێزگای ئامەد، بەتۆمەتی ئەندامێتی لە رێكخستن دەستگیركراوە.
وتیشی، چەنگیز دوندار كە ئەندامی پارتی یەكسانی و دیموكراسیی گەلان(دەم پارتی)یە و لە ماوەی هەشت ساڵی رابردوودا هاوسەرۆكی شارەوانی قەیاپناری سەر بە ناوەندی ئامەد بووە، بە بڕیاری وەزارەتی ناوخۆی توركیا لە پۆستەكەی دوورخراوەتەوە و دەستگیركراوەو قەیوم لە شوێنەكەی دانراوە.
باڵیۆزی ئەمریكا لە عیراق دەڵێت، گفتوگۆكانی نێوان هەولێر و بەغداد و گەیشتن بە بڕیاری یەكلاكەرەوە لەبارەی دارایی و وزە پێویستی بە پێكهێنانی حكومەتێكی بەهێزە و هانی لایەنەكانی هەرێم دەدات، بەزووترین كات حكومەت پێكبهێنن.
ئەلینا رۆمانۆسكی، باڵیۆزی ئەمریكا لە عیراق ئاماژەی بەوەدا، بەرپرسیارێتی پێكهێنانی حكومەتی نوێی هەرێم لە ئەستۆی لایەنە سیاسییەكانە، بەڵام بەهۆی بێ متمانەیی نێوان لایەنە سیاسییەكانەوە لەنێویاندا یەكێتی و پارتی ئەم قۆناغە سەخت دەبێت.
ئەوەشی خستەڕوو، گفتوگۆكانی نێوان هەولێر و بەغداد بەتایبەتی لە رووی دارایی و وزەوە و گەیشتن بە بڕیاری یەكلاكەرەوە و راستكردنەوەی رێڕەوی پەیوەندییەكانیان، پێویستی بە حكومەتێكی بەهێزە، بۆ ئەمەش داوا لە لایەنە سیاسییەكانی هەرێم كوردستان دەكەن، بەزووترین كات حكومەتی نوێی هەرێم پێكبهێنن بۆ خزمەتی بەرژەوەندی گشتی و گەلی كورد بە تایبەتی.
رۆمانۆسكی دەشڵێت، پێكهێنانی حكومەتی نوێی هەرێم بە زووترین كات و بەبێ دواكەوتن گرنگە و بەهێزی هەرێمی كوردستان یارمەتیدەر دەبێت بۆ بەهێزكردنی پێگەی حكومەتی فیدراڵ كە لەبەردەم هەڵبژاردنی ئەنجومەنی نوێنەراندایە لەساڵی داهاتوودا.
بەهۆی بارینی بەفرەوە ئاستەنگی هاتوچۆ لە باكوری كوردستان دروستبووە و و رێگای زیاتر لە ١٥٠ ناوچەش داخرا.
بارینی بەفر لە زۆربەی ناوچەكانی باكوری كوردستان بەردەوامە و رێگاكانی ١٥٤ گوند و ناوچەی پارێزگاكانی موش و بەدلیس داخران.
لە شارەكانی باكوری كوردستان زیاتر لە ١٠ سانتیمەتر بەفر باریوە و لە گوندەكانیش دو بۆ سێ هێندە بەفر باریوە، ئەوەش وایكردووە هاتوچۆی نێوان شار و گوندەكان روبەڕووی ئاستەنگی ببێتەوە.
بەفر پارێزگای جۆلەمێرگ-یشی سپی پۆش كردوە و لەو پارێزگایە هاتوچۆی ئۆتۆمبێل روبەڕوی كێشە بوەتەوە، هەروەها بەفرێكی زۆر سێواش و ئەرزڕۆمی گرتوەتەوە.
شەپۆلێكی سەرما و سۆڵە و بەفر و باران عیراق و هەرێمی كوردستان دەگرێتەوە، كەشناسیش هۆشداری دەداتە شۆفێران.
دەستەی كەشناسی عیراق پێشبینی دەكات، لەمشەوەوە شەپۆلێكی سەرما و باران و رەشەبا سەرتاسەری وڵات بگرێتەوە لەنێویشیاندا میسان، واست، دیالە، سلێمانی و سەلاحەدین و بەسرە.
ئاماژەی بەوەشكردووە، كاریگەری شەپۆلەكە بەتایبەت لە كاتەكانی بەرەبەیاندا چڕدەبێتەوەو ئەگەری بەستنی رێگا و بانەكان هەیە لە ناوچەكانی باكووری ڕۆژئاوای وڵات و باشووری ڕۆژئاوا.
هاوكات كەشناسی هەرێم دەڵێت، باران لە زۆربەی ناوچەكان دەبارێت و لە ناوچە شاخاوییەكان رێژەكەی زیاتر دەبێت، لەناوچە سنوورییەكانیش بەفر دەبارێت بەتایبەت ناوچە سنورییەكان پارێزگای هەڵەبجە.
هەروەها دەڵێت لە ناوچە شاخاوییەكانی پارێزگای دهۆك لەكاتەكانی دوانیوەڕۆدا نزیكەی 10سم بەفر دەبارێت.
لەمساڵدا زیاتر لە ١١٠ ژن لە باكوری كوردستان كوژراون، لە رۆژهەڵاتی كوردستانیش لانیكەم ١٨ ژن كوژراون.
كۆمەڵەی مافی مرۆڤ لقی ئامەد لە كۆنفرانسێكی رۆژنامەوانیدا رایگەیاند، تەنها لەمساڵدا لانیكەم ١١٤ ژن لە باكوری كوردستان كوژراون، كە ٥٧ كەسیان قوربانیی توندوتیژی بون لە لایەن كەسوكاری خۆیان یان بە دەستی ئەندامێكی خێزانەكانیان كوژاون.
هەر ئەمڕۆ تۆڕی مافەكانی مرۆڤی كوردستان بڵاویكردەوە، لەمساڵدا لانیكەم ١٨ ژن لە رۆژهەڵاتی كوردستان كوژراون كە حەوت كەسیان پێشتر داوای جیابونەوەیان رادەستی دادگا كردووە، كە ١١ ژنیان لە لایەن هاوسەرەكانیانەوە كوژراوان و تەمەنی زۆربەی قوربانیانیش لە نێوان ١٨ بۆ ٥٠ ساڵدا بوە.
ئەو رێكخراوەیە رونی كردوەتەوە جگە لە توندوتیژیی خێزانی بەرامبەر ژنان لانیكەم ١٤ ژنی كورد لە رۆژهەڵاتی كوردستان دەستگیر كراون و سزای زیندانییش بەسەر ١٦ ژندا سەپێنراوە دوو چالاكوانی ژنیش مەترسیی لەسێدارەدانیان هەیە.
فراكسیۆنە كوردستانییەكان و سەرۆكی دادگای فیدراڵی بۆ تاوتوێكردنی كێشەی مووچەی فەرمانبەرانی هەرێم كۆبوونەوە و بریاردرا هەفتەی داهاتوو هەرێم و عێراق و دادگای فیدراڵی بۆ چارەسەركردنی كێشەكە كۆبنەوە.
هەرێم كەمال ئاغا، سەرۆكی فراكسیۆنی یەكێتی بە كوردسات نیوزی راگەیاند، وەكو سەرۆكی فراكسیۆنە كوردستانییەكان لەگەڵ سەرۆكی دادگای فیدراڵی تایبەت بە كێشەی مووچەی فەرمانبەرانی هەرێم كۆبوونەوەتەوە.
ئەوەشی خستەڕو، لە كۆبوونەوەكەدا ئاماژەیان بەوەكردووە، وەزیری دارایی فیدراڵ پابەندی بڕیارەكانی دادگای فیدراڵی نابێت تایبەت بە ناردنی مووچەی فەرمانبەرانی هەرێم و ناردنی موچەی پەیوەستكردووە، بە رادەستكردنی داهاتی نەوت و نانەوتی هەرێم و ململانێ سیاسییەكانی نێوان هەولێر و بەغداد، لە بەرامبەریشدا سەرۆكی دادگای فیدراڵی جەختیلەوەكردووەتەوە، كە پێویستە مووچەی فەرمانبەرانی هەرێم تێكەڵی هیچ بابەتێكی دیكە نەكرێت و لەكاتی خۆیدا بنێردرێت.
هەرێم كەمال ئاغا وتیشی، لە كۆبوونەوەكەدا بڕیاردراوە هەفتەی داهاتوو بە سەرپەرشتی سەرۆكی دادگای فیدراڵی لەسەر ئاستی باڵا كۆبوونەوەیەكی بەپەلە لەنێوان حكومەتی هەرێم و حكومەتی فیدراڵ ئەنجامبدرێت و تێیدا كێشەی مووچەی فەرمانبەرانی هەرێم یەكلایی بكرێتەوە.
هاوكات، شاخەوان عەبدوڵا، جێگری سەرۆكی ئەنجومەنی نوێنەران كە یەكێك لە بەشداربووانی كۆبوونەوەكە وتی، سەرۆكی دادگای فیدراڵی جەختیلەوەكردووەتەوە، كە ناوەڕۆكی بڕیارەكانیان لەبارەی مووچەی فەرمانبەرانی هەرێم بەشێوەیەكە، نابێت لە ژێر هیچ پاساوێكدا دەست بۆ مووچەی فەرمانبەرانی هەرێم ببرێت.
سەرۆکی ئاژانسی پاراستن و زانیاری/زانیاری رایدەگەیەنێت، هەموو هەوڵەکانیان لە چوارچێوەی یاسا بەرکارەکاندا دەبێت بۆ رێگریکردن لە هەر یاسا شکێنییەک کە زیان بە ئاسایشی نەتەوەیی و هاووڵاتیان بگەیەنێت.
ئەمڕۆ جەلال شێخ ناجی سەرۆکی ئاژانسی پاراستن و زانیاری/زانیاری لە بەغداد لەگەڵ قاسم ئەعرەجی راوێژکاری ئاسایشی نیشتمانیی عیراق کۆبووەوە و لە دیدارێکدا جەخت لە پێویستی بەردەوامی هەماهەنگییە هەواڵگری و ئەمنییەکان لەنێوان هەرێم و عیراق کرایەوە لەپێناو پاراستنی ئاسایش و ئارامی و سەقامگیری زیاتر لە وڵاتدا.
هەر لە کۆبوونەوەکەدا دواین پێشهاتە ئەمنییەکان، پرسی رووبەڕووبوونەوەی پاشماوەکانی تیرۆریستان و یاسا شکێنان و هەموو ئەوانەی دادگا داوایان دەکات تاوتوێکراو بڕیاری هاریکاری زیاتر لەنێوان هەردوولا درا بە ئاڕاستەی سەروەربوونی یاسا و پاراستنی ئارامی و ژیانی خەڵک.
هاواکات جەلال شێخ ناجی سەرۆکی ئاژانسی پاراستن و زانیاری/زانیاری جەختی لە بەردەوامی هەوڵەکانیان کردەوە بۆ پاراستنی ئاسایشی هەرێمی کوردستان و رایگەیاند، بوونی پەیوەندی و بەرزکردنەوەی ئاستی هاریکارییە ئەمنییەکان فاکتەرێکی باشتر دەبێت بۆ رووبەڕووبوونەوەی پێشلکارییەکان.
ئەوەشی خستەڕوو، هەموو هەوڵەکانیان لە چوارچێوەی یاسابەرکارەکاندا دەبێت بۆ رێگریکردن لە هەر یاسا شکێنییەک کە زیان بە ئاسایشی نەتەوەیی و هاووڵاتیان بگەیەنێت، بە توندترین شێوەش رووبەڕووی ئەو کەسانە دەبنەوە کە سنوورەکانی یاسا دەبەزێنن.
وەزیری پلاندانانی هەرێم ئەنجامی بەرایی سەرژمێریی دانیشتووانی هەرێمی كوردستانی بڵاوكردەوە و رایگەیاند، ژمارەی دانیشتووانی هەرێم ٦ ملیۆن و ٣٧٠ هەزار و ٦٦٨ كەسە .
د.دارا رەشید وەزیری پلاندانانی هەرێم لە كۆنفرانسێكی رۆژنامەوانیدا ئاشكرایكرد، بەراورد بە ساڵی ٢٠٠٩، رێژەی گەشەی دانیشتووان لە هەرێمی كوردستان گەیشتووەتە لە ٢.٤٨٪ ، ژمارەی خێزانیش یەك ملیۆن و ٣٧٩ هەزار و ١٦٣ خێزانە، تێكڕای قەبارەی خێزانیش ٤.٦ كەسە، لەو رێژەیەش سەرۆك خێزانی ژن ١١.٨٦٪ پێكدەهێنێت.
بەوتەی وەزیری پلاندانان لەكۆی ژمارەی دانیشتووان، نێر ٣ ملیۆن و ٢٠٠ هەزار و ٥٠٦ كەس پێكدەهێنن، مێ ٣ ملیۆن ١٧٠ هەزار و ١٦٢ كەس پێكدەهێنن، بەم پێیەش پیاوان ٥٠.٢٤٪ پێكدەهێنن، ژنانیش ٤٩.٧٦٪ پێكدەهێنن.
ئاماژەی بەوەشكرد، رێژەی شارنشین لە هەرێمی كوردستان ٨٤٪ و رێژەی گوندنشین ١٦٪یە، دانیشتووانی سەرو تەمەنی كاركردن واتە ٦٥ ساڵ و سەرووتر، رێژەی لە ٤.٤٪ پێكدەهێنن، بەو پێیەش دانیشتووانی هەرێم بە دانیشتوانێكی گەنج لە قەڵەم دەدرێن.
بافڵ جەلال تاڵەبانی سەرۆکی یەکێتیی نیشتمانیی کوردستان لە رۆژی جیهانیی بەرەنگاربوونەوەی توندوتیژی دژی ژناندا پەیامێکی بڵاوکردەوە و دەڵێت، " ئەوەی لەم رۆژەدا پێویستە جەختی لێبکەینەوە، باوەڕی نەگۆڕمانە سەبارەت بە بەگژداچوونەوە و لێپێچینەوە لەو کەسانەی بەهەرشێوەیەک دەبنە مایەی هەراسانکردنی ژنان و ئەنجامدانی توندوتیژی بەرامبەریان".
دەقی پەیامەکەی سەرۆک بافڵ جەلال تاڵەبانی...
لە رۆژی جیهانیی بەرەنگاربوونەوەی توندوتیژی دژی ژناندا، پابەندیی خۆمان بە پشتگیریکردن، پاراستنی مافەکان و بەدیهێنانی خواستەکانی ژنان دووپات دەکەینەوە. جەخت لە رەخساندنی زەمینەی لەبار و تەندروستتر دەکەینەوە تاوەکو ژنانی کوردستان بەشداریی زیاتر و چالاکانەتریان هەبێت لە ناوەندەکانی بەڕێوەبردن و رۆڵی خۆیان لە بەرەوپێشبردنی وڵات و بونیادنانی داهاتوویەکی گەشتردا بگێڕن.
یەکێتیی نیشتمانیی کوردستان بە شانازییەوە هەمیشە پاڵپشتی ژنان و هەوڵە بێوچانەکانیان بووە لەپێناو بەگژداچوونەوەی توندوتیژی، هێنانەکایەی دادپەروەری و کۆمەڵگەیەکی سەقامگیر. باوەڕی تەواوی بە رۆڵ و تواناکانی ژنان هەبووە و بەشێکی کاریگەربوون لە ئۆرگانەکانی حزبدا. بێگومان لە داهاتووشدا بە هەمان بڕوا و رۆحییەتەوە کاردەکەین و ژنان هاوکار و هاوشانمان دەبن بۆ هەنگاونان بەرەو کوردستانێکی ئاوەدانتر و خۆشگوزەرانتر.
ئەوەی لەم رۆژەدا پێویستە جەختی لێبکەینەوە، باوەڕی نەگۆڕمانە سەبارەت بە بەگژداچوونەوە و لێپێچینەوە لەو کەسانەی بەهەرشێوەیەک دەبنە مایەی هەراسانکردنی ژنان و ئەنجامدانی توندوتیژی بەرامبەریان. لە هەر شوێنێک پێشێلکاری هەبێت، رووبەڕووی دەبینەوە و هەر کەسێک لە هەر پلە و پۆستێکدا بێت رێکاری یاسایی بەرامبەر دەگرینەبەر. چونکە پێمانوایە هیچ دادپەروەری و یەکسانییەک لە کۆمەڵگەدا نایەتەدی، ئەگەر ژنان لە ئاشتی و سەقامگیریدا نەبن و هەڕەشە لەسەر ماف و خواستەکانیان بێت.
شاد و سەرفرازبن
بافڵ جەلال تاڵەبانی
سەرۆکی یەکێتیی نیشتمانیی کوردستان
نێچیرڤان بارزانی سەرۆکی هەرێمی کوردستان، له رۆژی جیهانیی بەرەنگاربوونەوەی توندوتیژی دژی ژناندا پەیامێکی بڵاوکردەوە و دەڵێت، لهم بۆنهیهدا بەڵێن بە ژنانی کوردستان دهدهن کە بێ وچان بەردەوام دەبن لە کارکردن بۆ بەدیهێنانی دادپەروەری و یەکسانی و بههێزكردنی تواناكانیان بۆ جێبەجێکردنی رۆڵی گرنگیان لە خزمهتكردن و بنیاتنانی وڵاتدا.
دەقی پەیامەکەی نێچیرڤان بارزانی...
لە ڕۆژی جیهانیی بنبڕکردنی توندوتیژی دژی ئافرەتاندا، پابەندیمان به پاراستنی مافەکانی ژنان لە کوردستان نوێ دەکەینەوە، ههروهها دڵنیایان دهكهینهوه كه بەردەوام دەبین لە کارکردن بۆ نەهێشتنی هەموو جۆرەکانی توندوتیژی و جیاکاری بهرانبهر ئافرەتان. تواناسازی و بەهێزکردنی پێگەی ژن، بەردی بناغەی بنیاتنانی کۆمەڵگەیەکی دادپەروەرتر و پێشکەوتووترە.
هەرێمی کوردستان پێشەنگ بووە لە پشتگیریکردنی مافەکانی ئافرەت و دابینکردنی دەرفەت بۆ بەشداریکردنیان لە ژیانی سیاسی و کارگێڕی بە یەکسانی لەگەڵ پیاودا. ئێمە باوەڕمان وایە کە ژن نەک تەنها هاوبەشێکی سەرەکییه لە بڕیاردان، بەڵکو بنەمایەکە بۆ گۆڕانکاری و گەشەپێدانی بەردەوام.
لەم ڕۆژەدا، داوای هاوکاریی زیاتر دەکەین لەنێوان دامەزراوە حکوومییەکان، ڕێکخراوەکانی کۆمەڵگەی مەدەنی و میدیاکاندا، بۆ بڵاوکردنەوەی زیاتری هۆشیاری و بەهێزکردنی بەهاکانی لێبوردەیی و یەکسانی. هەروەها جەخت دەکەینەوە کە بنبڕکردنی توندوتیژی دژی ئافرەتان، پێویستی بە هەوڵی هاوبەشی هەمووانە بۆ دڵنیابوون لە بنیاتنانی داهاتوویەکی گەش و ئارام بۆ هەموو تاکەکانی کۆمەڵگە.
ههر لهم بۆنهیهدا بەڵێن بە ئافرەتانی کوردستان دهدهین کە بێ وچان بەردەوام دەبین لە کارکردن بۆ بەدیهێنانی دادپەروەری و یەکسانی و بههێزكردنی تواناكانیان بۆ جێبەجێکردنی ڕۆڵی گرنگیان لە خزمهتكردن و بنیاتنانی وڵاتدا.
نێچیرڤان بارزانی
سەرۆکی هەرێمی کوردستان
25ی نۆڤبهری 2024
ئەمڕۆ خولی راهێنان بۆ بژمێرەكان دەكرێتەوە و پێنج رۆژ دەخایەنێت، كۆتایی ئەم مانگەش قۆناغی سێیەمی سەرژمێری لە هەرێمی كوردستان دەستپێدەكات.
وەزارەتی پلاندانانی هەرێم لە راگەیەنراوێكدا ئاماژەی بەوەكرد، رۆژی دووشەممە خولی راهێنان بۆ سەرجەم بژمێرەكان دەكرێتەوە، لە پارێزگاكان و ئیدارە سەربەخۆكان و پێنج رۆژ دەخایەنێت، لەو ماوەیەدا بژمێرەكان راهێنانیان پێدەكرێت لەبارەی چۆنییەتی پڕكردنەوەی فۆرمی سەرژمێری و پێدانی زانیاری بە هاووڵاتییان.
لە بەشێكی تری راگەیەنراوەدا هاتووە، ٣٠ی ئەم مانگە، قۆناغی كۆتایی پڕۆسەی سەرژمێری دەستپێدەكات، ئەو هاووڵاتییانەشی تاوەكو ئێستا بە هەر هۆكارێك بێت نەیانتوانیوە لە ڕۆژانی ١٧ تا ٢٢ی مانگ، ناوی خۆیان تۆمار بكەن، لە قۆناغی كۆتاییدا دەتوانن خۆیان تۆمار بكەن.
لە سنووری نەوسودی رۆژهەڵاتی كوردستان ژنە كۆڵبەرێك كوژرا و لە سنەش ماوەی پێنج رۆژە ژنە چالاكوانێكی مەدەنی دەستگیراوە و چارەنووسی نادیارە.
رێكخراوی هەنگاو بۆ مافی مرۆڤ بڵاویكردەوە، رۆژی 19ـی ئەم مانگە، لە سنووری نەوسود ژنە كۆڵبەرێكی تەمەن ٢٦ ساڵ كە دایكی منداڵێكە، بە دەسترێژی هێزە چەكدارەكانی ئێران برینداركراوە و دواتریش بە هۆی سەختی برینەكەیەوە رۆژی هەینی رابردوو لە یەكێك لە نەخۆشخانەكانی شاری كرماشان گیانی لەدەستداوە.
ئەوەشی خستووەتەڕو، باوك و برای ئەو ژنە كۆڵبەرە كوژراوە، لەلایەن هێزە ئەمنییەكانەوە دەستگیركراون.
هاوكات، رێكخراوی هەنگاو ئاماژەی بەوەداوە، سەیران خەسرەوی كە ژنە چالاكوانێكی خەڵكی سنەیە ماوەی پێنج رۆژە لەلایەن هێزەكانی ئیتڵاعاتی ئێرانەوە دەستگیركراوە و چارەنووسی نادیارە، دامودەزگا ئەمنی و دادوەرییەكانیش ئامادەنین روونكردنەوە لەسەر چارەنووسی بدەن.