کوردستان
وەزارەتی دارایی عیراق بڕیاریدا بە خەرجكردنی موچەی مانگی ١٠ی موچەخۆرانی هەرێم.
پەیامنێری كوردسات نیوز رایگەیاند، وەزارەتی دارایی عیراق، مووچەی مانگی ١٠ی فەرمانبەرانی هەرێمی كوردستان خەرجكرد كە بڕەكەی ٧٦٣ ملیار و١٤٦ ملیۆن دینارە.
وتیشی، یەكشەممە بەغداد پارەكە دەخاتە سەر هەژماری وەزارەتی دارایی هەرێم.
باسی لەوەشكرد، بۆ موچەی سێ مانگی كۆتایی ئەمساڵ، بەغداد بڕیاریداوە دوو ترلیۆن و ٢٨٠ ملیار دینار ڕەوانەی هەرێم بكات لە بەرانبەریشدا داوای رادەستكردنی داهاتی ناوخۆی شەش مانگی ئەمساڵ لە هەرێم دەكات.
لەكاتێكدا هەرێم بۆ دابەشكردنی موچەی ئەم سێ مانگە بڕی دوو ترلیۆن و ٩٩٦ ملیار دیناری پێویستە، واتە مانگانە بڕی ٩٩٦ ملیار دینار، بەو پێیەش كورتهێنانی موچە بۆ ئەو سێ مانگە زیاتر لە ٧٠٠ ملیار دینارەو بۆ هەر مانگێك ٢٣٦ ملیار دینار كورتهێنان هەیە.
یەکێتیی نیشتمانیی کوردستان و یەکگرتووی ئیسلامی کوردستان کۆبوونەوە و هەردوولا جەختیان لەوەکردەوە کە پێویستە هەنگاوی کردەیی بۆ باشترکردنی بژێوی هاوڵاتیان بنرێت و خزمەتکردنیان لە پێشینەی کارەکانی داهاتوو بێت.
لەمیانەی سەردانەکانی وەفدی دانوستانکاری یەکێتی بۆ لای حزب و لایەنە سیاسییەکان، ئەمڕۆ پێنج شەممە ٢٨ی ١١ی ٢٠٢٤، وەفدەکە بەسەرۆکایەتی قوباد تاڵەبانی، لەگەڵ مامۆستا سەڵاحەدین محەمەد بەهادین ئەمینداری گشتی یەکگرتووی ئیسلامی کوردستان کۆبوونەوە.
لەکۆبوونەوەکەدا کە لە سلێمانی بەڕێوەچوو و ژمارەیەک لەئەندامانی مەکتەبی سیاسی و سەرکردایەتی هەردوولا ئامادەیبوون، پێکەوە گفتوگۆ لەبارەی پەیوەندییەکانی نێوانیان و دۆخی سیاسی هەرێمی کوردستان و ئامادەکارییەکانی قۆناغی پاش هەڵبژاردن کرا.
لەبەشێکی کۆبونەوەکەدا کە تایبەت بوو بە قۆناغی دوای هەڵبژاردن، هەردوولا هاوڕابوون لەسەر گرنگی پێکهێنانی دامەزراوەکانی هەرێمی کوردستان لەسەر بنەمای خزمەتکردنی باشتری هاوڵاتیان. بۆ ئەو مەبەستەش جەخت لە پێویستی گرتنەبەری هەنگاوی کردەیی باشتر کرایەوە کە بژێوی هاوڵاتیان و خزمەتکردنیان لە پێشینەی کارەکانی داهاتوو بێت.
لیژنەی باڵای جێبەجێكردنی مادەی ١٤٠ بڕیارێك لە بەرژەوەندی جوتیارانی كورد لە كەركوك دەردەكات كە لە سەردەمی رژێمی بەعسەوە بێبەشبوون لە بەكارهێنانی زەوییەكانیان.
بەپێی نوسراوێكی لیژنەكە كە ئاڕاستەی وەزارەتی كشتوكاڵ كردووە، داوای كردووە هەموو ئەو زەویانەی لە چوارچێوەی مادەی ١٤٠دان، بخاتە نێو پلانی كشتوكاڵییەوە جگە لەوانەی سكاڵایان لەسەرە.
محەمەد ئەمین نوێنەری جوتیارانی كوردی كەركوك بە كوردسات نیوزی وت، نوسراوەكە جەخت كردنەوەیە لە نوسراوەكەی پێشووی رێبوار تەها پارێزگاری كەركوك كە ئاراستەی وەزارەتی كشتوكاڵی كردبوو لەسەر هەمان داوا.
وتیشی، ئەگەر وەزارەتی كشتوكاڵ داواكە پەسەند بكات و ئەو زەوییانە بخاتەوە نێو پلانی كشتوكاڵییەوە، جوتیارانی كورد لە هەموو مافێك سوودمەند دەبن.
زانكۆی پۆلیتەكنیكی سلێمانی ئەو دەنگۆیانە رەتدەكاتەوە كە باس لەوەدەكەن موچەخۆرانی زانكۆكە ئاگاداركرابنەوەی لەوەی فۆرمی هەژماری من پربكەنەوە و دەڵێت، لە 30/10 فۆرمی تەوتین لەزانكۆكەیان پڕكردووەتەوە.
سەرۆكایەتی زانكۆی پۆلیتەكنیكی سلێمانی لە رونكردنەوەیەكدا دەڵێت، ئاگاداری هەموولایەك دەكەینەوە كە زانكۆمان لە 30/10/2024 پڕۆسەی تەوتینی جێبەجێكردوە بۆ سەرجەم مامۆستایان و فەرمانبەرانمان، دەشڵێت ئەو نوسراوەی بڵاوكراوەتەوە تەنها گشتاندنێكی وەزارەتی خوێندنی باڵا و توێژینەوەی زانستیە و لە ڕووی كارگێڕییەوە گشتاندنی پێكراوە.
ئەوە لە كاتێكدایە ، لە هەندێك میدیا و تۆڕە كۆمەڵایەتییەكان نوسراوێك بڵاوكرایەوە و بەوجۆرە خوێندنەوەی بۆكرا، زانكۆی پۆلیتەكنیكی سلێمانی موچەخۆرانی زانكۆكەی پابەند دەكات بەوەی پڕۆژەی هەژماری من جێبەجێبكەن.
لەلایەکی دیکەوە سەرۆکی زانکۆی سلێمانیش لە هەمان رۆژدا رایگەیاند: ٩٥٪ـی مامۆستایان و فەرمانبەرزانی زانکۆی سلێمانی فۆرمی تەوتینیان پڕکردووەتەوە.
قوباد تاڵەبانی، جێگری سەرۆکوەزیران پێشوازیکرد لە ئیڤێت کوپەر، وەزیری ناوخۆی بەریتانیا و لە کۆبوونەوەی نێوانیاندا چەند بابەتێکی جێی بایەخی هەردوولا و بە تایبەتیش چۆنییەتی پتەوکردنی پەیوەندییەکان لە بواری ئەمنی و رێگریکردن لە دیاردەی کۆچی نایاسایی تاوتوێ کران.
کۆبوونەوەکە رۆژی پێنج شەمە(28/11/2024) لە هەولێر بەڕێوەچوو و تیایدا هەر یەکە لە جەلال شێخ ناجی، سەرۆکی ئاژانسی پاراستن و زانیاری / زانیاری و هیوا ئەحمەد سەرۆکی دەزگای ئاسایشی هەرێم و باڵیۆزی بەریتانیا لە عێراق و، کونسوڵی گشتی ئەو وڵاتە لە هەرێم ئامادە بوون.
لە تەوەری سەرەکی کۆبوونەوەکەدا گفتوگۆکرا لەبارەی پەیوەندییەکانی نێوان هەرێم و وڵاتی بەریتانیا لە هەموو بوارەکاندا و بە تایبەتیش لە بواری هەماهەنگی ئەمنی بۆ کەمکردنەوەی دیاردەکانی کۆچی نایاسایی و رێگریکردن لە تاوانی رێکخراو و قاچاخی مادەی هۆشبەر. ستایشی ئەو هەماهەنگی و پەیوەندییە باشە کرا کە تا ئێستا لەنێوان هەردوولادا هەیە و خوازیاربوون لە داهاتوودا لەمبارەیەوە پەیوەندییەکانی نێوان هەردوولا بەرەوپێشچوونی زیاتریش بەخۆیەوە ببینێت.
هەر لەم چوارچێوەیەدا سەبارەت بە چۆنییەتی کەمکردنەوەی دیارەی کۆچی نایاسایی، قوباد تاڵەبانی رایگەیاند: لەگەڵ ئەوەی دەبێت لەڕووی ئەمنییەوە هەوڵی زیاتر لەمبارەیەوە بدرێت، بەڵام بۆ بنەبڕکردنی ئەم دیاردەیە پێویستە حکومەتی هەرێم و حکومەتی فیدراڵ و وڵاتانی یەکێتی ئەوروپا پێکەوە کاربکەن تا پەرە بە گەشەسەندنی ئابوری قەزا و ناحییەکان بدرێت، چونکە گەشەسەندنی ئابوری و کەمکردنەوەی رێژەی بێکاری لەناو گەنجان لە ناوچە جیاوازەکان چارەسەری بنەڕەتییە بۆ نەهێشتنی دیاردەی کۆچی نایاسایی.
لە تەوەرێکی دیکەی کۆبوونەوەکەدا باس لە قۆناغی پاش هەڵبژاردن لە هەرێمی کوردستان کرا. لەمبارەیەشەوە قوباد تاڵەبانی روونی کردەوە گفتوگۆکان لەنێوان لایەنە سیاسییەکان بۆ پێکهێنانی کابینەی نوێ دەستی پێکردوە. وتیشی ئێمە خوازیاری پێکهێنانی حکومەتێکی کارا و خزمەتگوزارین کە بتوانێت کێشە بنەڕەتییەکانی خەڵکی کوردستان بە تایبەتیش کێشە ئابورییەکان و خزمەتگوزارییەکان چارەسەر بکات و دۆخی ژیان و گوزەرانی هاوڵاتییان باشتر بکات.
سەرۆکی زانکۆی سلێمانی ئاماژەی بەوەدا کە ٩٥٪ـی مامۆستا و فەرمانبەرانی زانکۆی سلێمانی فۆڕمی تەوتینیان پڕکردووەتەوە و ئەوانەی دیکەش بە هەمان شێوە دەتوانن فۆڕمەکە پڕبکەنەوە.
د.کۆسار محەمەد سەرۆکی زانکۆی سلێمانی لە کۆنفراسێکی رۆژنامەوانیدا رایگەیاند: ٩٥٪ی فەرمانبەرانی زانکۆی سلێمانی فۆڕمی تەوتینی موچەیان پڕکردووەتەوە، ئێمەش ئاڕاستەی لایەنی پەیوەندیدارمان کردووە تا بۆ بەغداد بنێردرێت".
ئاماژەی بەوەشدا: "هەرکەسێک کە پێشتر فۆڕمی (هەژماری من)ـی پڕکردووەتەوە دەتوانێت فۆڕمی تەوتینیش پڕبکاتەوە و هیچ کێشەیەکی بۆ دروست نابێت".
د.نەرمین مەعروف رایگەیاند لە وەزارەتی دارایی عیراق رێكارەكانی ناردنی موچەی موچەخۆرانی هەرێم دەستیپێكردووە.
د.نەرمین مەعروف ئەندامی ئەنجومەنی نوێنەرانی عیراق لە فراكسیۆنی یەكێتی بە كوردسات نیوزی راگەیاند، دوێنێ سەردانی وەزارەتی دارایی عیراقی كردوە و پێیان راگەیاندوە، رێكارەكانی ناردنی موچەی مووچەخۆرانی هەرێم لە وەزارەتەكەیانەوە دەستیپێكردوە، وتیشی بڕیارە لە ماوەی دوو رۆژدا بەغداد بری ٧٦٣ ملیار دینار رەوانەی هەرێم بكات.
وتیشی، ئەگەر رێكارەكان ئەمڕۆ تەواو بكرێت پێدەچێت ئەمرۆِ پارەكە بگاتە هەرێم.
شەشەمین پێشانگای نێودەوڵەتی سلێمانی بۆ کتێب بە بەشداری سەدان ناوەندی چاپ و بڵاوکردنەوەی ناوخۆیی و بیانی لە دەیان وڵاتی جیهانەوە بە سەدان هەزار کتێب و هەزاران ناونیشانی جیاواز دەستپێدەکات.
بە چاودێری سەرۆك كۆماری عیراق شەشەمین پیشانگەی نێودەوڵەتی بۆ كتێب لە سلێمانی دەكرێتەوە و ماوەی ١١ رۆژ بەردەوامدەبێت.
پەیامنێری كوردسات نیوز رایگەیاند، لە ئەمڕۆ ٢٨ی تشرینی دووەم بۆ ١٢ كانونی یەكەم، شەشەمین پیشانگەی نێودەوڵەتی بۆ كتێب لە سلێمانی دەكرێتەوە، لە پیشانگەكەدا زیاتر لە ٢٠٠ دەزگا و ناوەندنی ناوخۆی لە ١٢ وڵاتی جیاوازەوە بەشداری دەكەن .
هەروەها راشیگەیاند، ئەمرۆ لە سەعات ١١ پیشانگەكە دەكرێتەوە، بەڵام لە رۆژانی دواتردا رۆژانە لە سەعات ١٠ ی بەیانی بۆ شەشی ئێوارە پیشانگەكە كراوە دەبێت .
هەروەها لە پیشانگاکەدا زیاتر لە نۆ ملیۆن کتێب نمایشکراون کە خۆی دەبینێتەوە لە ٤٠ هەزار ناونیشانی کتێب کە دوو هەزاریان ناونیشانی تازەن.
یەکێتی نیشتیمانی کوردستانیش لە ژێر ناوی (چەپکە کتێبی یەکێتی) لە شەشەمین پیشانگەی نێودەوڵەتی کتێب بەشدارن و نزیکی هەزار ناونیشانی کتێب و گۆڤار و بڵاوەکراوەی یەکێتی نمایشکردووە کە خۆی دەبینێتەوە لە زیاتر لە ١٠ هەزار کتێب.
کتێبەکان بەشێکی تایبەتە بە نوسینەکانی سەرۆک مام جەلال و ئەو دیدار و چاوپێکەوتنانەی لەگەڵ سەرۆک مام جەلال ئەنجامدراوە و نوسینەکانی خۆیەتی، هەروەها ئەو کتێبانەی لەسەر سەرکردەکانی یەکێتی و شەهیدەکانی یەکێتی و ئەرشیفی شاخن و کۆ کراونەتەوە، هەروەها لە پیشانگەکەدا کۆبەرهەمی مامۆستا ئیبراهیم ئەحمەد و گەلاوێژخان نمایشکراوە.
بافڵ جەلال تاڵەبانی سەرۆکی یەکێتیی نیشتمانیی کوردستان، بەهۆی کۆچیدوایی هوشیار دیار عەونی ئاغا پەیامێکی هاوخەمی ئاڕاستەی بنەماڵەی کۆچکردوو دەکات و دەڵێت، "لە خوای گەورە داواكارم كۆچكردوو بە بەهەشتی بەرین شادبكات و سەبووری بەهەموولایەك ببەخشێت".
دەقی پەیامەکەی بافڵ جەلال تاڵەبانی...
بەڕێزان بنەماڵەی سەربەرز و تێکۆشەری عەونی مستەفا ئاغا ئاکرەیی
بەداخێكی زۆرەوە هەواڵی کۆچی دوایی هوشیار دیار عەونی ئاغامان پێگەیشت.
بۆ ئەم خەمە گەورەیە پرسە و هاوخەمیی قووڵی خۆمان ئاڕاستەی ئێوە و بنەماڵە تێكۆشەرەكەتان دەكەم كە نموونەی خەبات و تێكۆشانن لەپێناو كوردستان.
لە خوای گەورە داواكارم كۆچكردوو بە بەهەشتی بەرین شادبكات و سەبووری بەهەموولایەك ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
وەفدێکی باڵای یەکێتیی نیشتمانیی کوردستان بەسەرۆکایەتی قوباد تاڵەبانی لێپرسراوی مەکتەبی سکرتارییەتی سەرۆک مام جەلال، سەردانی کۆمەڵی دادگەری کرد و لەلایەن عەلی باپیر سەرۆكی كۆمەڵی دادگەریی و ژمارەیەک لە ئەندامانی سەرکردایەتی حزبەکە پێشوازییان لێکرا.
مەبەست لە سەردانەكەی وەفدەکەی یەكێتی بۆ لای سەرۆكی كۆمەڵی دادگەری، گفتوگۆکردن بوو لەسەر پێشهات و ئەگەرەكانی داهاتووی هەرێمی كوردستان و یەكەمین كۆبوونەوەی پەرلەمان و كابینەی نوێی حکومەت، هەردوولا هاوڕابوون كە پێویستە خەمی هاووڵاتی و بژێوییان لە پێشینەی كارەكانی هەموو لایەك بێت و حوكمڕانی بە شێوەیەك بێت كە هاووڵاتی لە سایەیدا بەهرەمەند بێت.
جارێكی دیكە سەرۆكی كۆمەڵ سەرنج و تێبینییەكانی كۆمەڵی دادگەریی لەسەر هەڵبژاردنی خولی شەشەمی پەرلەمانی كوردستان خستەڕوو و جەختی لە بڕیاری كۆمەڵ لە نەچوونە پەرلەمان كردەوە.
وەفدی یەكێتی باسیان لە ڕۆڵی گرنگی کۆمەڵی دادگەری کرد لە رابردوو و لە ئێستاشدا دەتوانن بە ئامادەبوونیان لە پەرلەمان رۆڵی کاریگەریان هەبێت.
هەر لە کۆبوونەوەکەدا پرسی موچە یەكێك بوو لەو بابەتانەی بە گرنگییەوە باسی لێوە كرا و داكۆكی كرا لەسەر ئەوەی پێویستە موچە كە مافی سەرەتایی هەر فەرمانبەرێكە بێ كەم و كورتی خەمی بخورێت و دابەش بكرێت و ستەم لە فەرمانبەران نەكرێت.
ئەنجومەنی وەزیرانی هەرێم رایگەیاند، لە هەوڵەكان لەگەڵ حكومەتی عیراق بەردەوامن بۆ دابینكردنی موچەی موچەخۆرانی هەرێمی کوردستان و پێویستە وەك ناوچەكانی دیكەی عیراق لەکاتی خۆیدا بدرێت.
ئەنجومەنی وەزیرانی حکومەتی هەرێمی کوردستان کۆبووەوە و دوای کۆبوونەوەکەش راگەیەندراوێکی بڵاوکردەوە و ئاماژەی بەوەدا، بۆ موچەی هەر سێ مانگی ١٠ و ١١ و ١٢ی ئەمساڵ جەختكراوەتەوە کە حكومەتی هەرێم لە هەوڵەكانی بەردەوامە لەگەڵ حكومەتی عیراق بۆ دابینكردنی موچە، هەروەها پێویستە وەك ناوچەكانی دیكەی عیراق موچەی موچەخۆرانی هەرێمیش بدرێت
لە راگایەندراوەکەدا ئەوەش باسکراوە، کە بەڕێوەچوونی سەرژمێریی گشتیی دانیشتووان خراوەتەڕوو، پێویستە لەمەودوا ئەو ڕێژەیەی ژمارەی دانیشتووانی هەرێم بكرێتە بنەما بۆ دەستنیشانكردنی شایستەكانی هەرێم لەلای حكومەتی عیراق و ژمارەی بەشداریی نوێنەرایەتی كورد لە دامەزراوە دەستووریەكان و دیاریكردنی بەشەبودجە و مووچەی هەرێم.
هاوکات سكرتاریەتی ئەنجومەنی وەزیرانیش راسپێردرا، بۆ ئامادەكردنی نووسراوێك بۆ ئەنجومەنی وەزیرانی عیراق، بۆئەوەی لەئێستا بەدواوە و بۆ ساڵی دارایی 2025، ڕێژەی نوێی ژمارەی دانیشتووانی هەرێمی كوردستان بكرێتە بنەما بۆ دیاركردنی پشكی هەرێمی كوردستان لە گشت شایستە دەستوورییەكانی عیراق.
تەنیا لە ماوەی 24 سەعاتدا ژمارەیەك رۆژنامەوان و نوسەری باكوری كوردستان دەستگیركران.
ئاژانسی هەواڵی وڵات بڵاویكردەوە؛ لە چوارچێوەی هەڵمەتێكی فراوانی پۆلیسی توركیا تەنیا لەماوەی ٢٤ سەعاتدا ١٦ رۆژنامەوان و نوسەر و هونەرمەندی كورد لە باكوری كوردستان دەستگیر كران بێ ئەوەی هیچ بەڵگەیەكی تۆمەتباربونیان هەبێت.
ئاشكرایشیكردووە، جگە لەو رۆژنامەوان و نوسەرانە، هاوكات دەیان چالاكوان و ئەندامانی سەر بە پارتە كوردییەكانیش دەستگیركراون.
پارتی یەكسانی و دیموكراسی دەم پارتی و پارتی هەرێمە دیموكراتییەكان دەبەپە لە بەیاننامەیەكی هاوبەشدا ناڕەزایەتییان دژی هەڵمەتی دەستگیركردنەكان دەربڕی و رایانگەیاندووە، دەسەڵاتی توركیا بە تایبەت ئەكەپە و مەهەپە بۆ ئەوەی بەر بە روخانیان بگرن دەستیان بە دەستگیركردن رۆژنامەنوسان و سیاسەتمەدارانی باكوری كوردستان كردووە.
لیستی مووچەی مانگی 11ی مووچەخۆرانی هەرێم خرایە بەشی ئامانات لە گەنجینەكانی هەرێم، چارەنوسی دابەشكردنی نادیارە.
چەند سەرچاوەیەك لە گەنجینەكانی سلێمانی و هەولێر بە كوردسات نیوزی راگەیاند، لیستی مووچەی مانگی 11 ئامادەكراوە، بەڵام خراوەتە بەشی ئامانات و تا ئێستا دیار نیە خەرج دەكرێت یاخود نا، بۆیە خراوەتە بەشی ئامانات لە گەنجینەكانی هەرێم.
وتیشی، ئەو بەشە تایبەتە بە پاراستنی ئەو لیستانەی كە بودجەی پێوسیت نەبێت بۆ خەرجكردنی، بۆیە لە بەشی ئامانات دەپارێزرێت تا ئەو كاتەی یەكلا دەبێتەوە كە پارە دەبێت بۆ خەرجكردنی، یاخود پاشەكەوت دەكرێت.
ئەنجومەنی وەزیرانی هەرێم بۆ تاوتوێكردنی كێشەكانی موچە و ئەنجامی سەرژمێری لە كۆبونەوەدایە.
بەپێی راگەیەندراوێك ئەنجومەنی وەزیرانی هەرێم، بە سەرۆكایەتی مەسرور بارزانی، سەرۆكی حكومەتی هەرێم و قوباد تاڵەبانی، جێگری سەرۆكی حكومەتی هەرێم، لە كۆبونەوەدایەو تاوتوێی چەند پرسێك دەكەن.
ئەوەشهاتووە، لە بڕگەی یەكەمدا راپۆرتێك لەلایەن وەزیری پلاندانان سەبارەت بە بەڕێوەچوونی قۆناغی فۆرمی خێزانی لە پرۆسەی سەرژمێریی گشتیی دانیشتوان و سەركەوتوویی پرۆسەكە لە عیراق و هەرێم كە لە رۆژانی ٢٠-٢١ی ١١ی ٢٠٢٤ بەڕێوەچوو، پێشكەش دەكرێت و قۆناغ و هەنگاوەكانی دیكەی پرۆسەكە تاووتوێ دەكرێن.
بڕگەی دووەمی كۆبونەوەكەش خستنەڕووی پرۆژە بڕیارێكی پێشنیازكراوە لەلایەن وەزارەتی شارەوانی و گەشتوگوزار.
هاوكات، پەیامنێری كوردسات نیوز لە زاری سەرچاوەیەك لە نێو كۆبوونەوەكەوە رایگەیاند، لە كۆبونەوەكەدا وەزیری دارایی و ئابوری هەرێم ئامادەیەو باس لە كێشەكانی بەردەم دابەشكردنی موچەی مانگەكانی ١٠ و ١١و ١٢ ی ئەمساڵ دەكرێت.
بە بڕیاری وەزیری خوێندنی باڵا، سەرجەم دەرچوانی کەرکوک و شەنگال و خانەقین و ناوچە دابڕێندراوەکان لە زانکۆکانی هەرێمی کوردستان وەرگیران.
وەزارەتی خوێندنی باڵاو توێژینەوەی زانستی هەرێم لە راگەیەنراوێکدا بڵاویکردەوە، بە بڕیاری د. ئارام محمد قادر وەزیری خوێندنی باڵا و توێژینەوەی زانستی، سەرجەم دەرچووانی کەرکوک و شەنگال و خانەقین و ناوچە دابڕێندراوەکانی دەرەوەی ئیدارەی هەرێمی کوردستان لە زانکۆکانی هەرێم وەرگیران، کە ژمارەیان نزیکەی ١٠٠٠ خوێندکارە.
هاوکات وەزیری خوێندنی باڵا و توێژینەوەی زانستی رایگەیاند، چەندین ساڵە کارئاسانی تەواویان کردوە بۆ وەرگرتنی خوێندکاران و قوتابیانی ناوچە دابڕێندراوەکانی دەرەوەی ئیدارەی هەرێمی کوردستان، بە تایبەت ئەو خوێندکارانەی لە خوێندنگە کوردییەکان دەخوێنن بۆ ئەوەی دەرفەتی خوێندنیان بۆ بڕەخسێنن لە زانکۆکانی هەرێمی کوردستان.
لەو چوارچێوەیەشدا وەزارەتی خوێندنی باڵاو توێژینەوەی زانستی داوا لە سەرجەم وەرگیراوان دەکات دوای دۆزینەوەی شوێنی وەرگرتنیان لە وێبسایتی رێگەی زانکۆ (regayzanko.com) پەیوەندی بە بەش و کۆلێژەکانیان بکەن بەمەبەستی ئەنجامدانی مامەڵەی دەستبەکاربوون لە زانکۆ و پەیمانگەکان لە هەرێمی کوردستان.
سەعدی ئەحمەد پیرە رایگەیاند، یەكێتی دەرگای بۆ هەر لایەنێک کراوەیە کە ئامادەی گفتوگۆ بێت و دووپاتیکردەوە، یەکێتی بەو بەرنامەیەوە بەشداری پەرلەمان دەكات كە لەكاتی بانگەشەی هەڵبژاردندا رایگەیاندبوو.
سەعدی ئەحمەد پیرە، وتەبێژی یەكێتیی نیشتمانیی کوردستان لەمیانی بەشداریکردنی لە گەشتی هەواڵەکانی ستۆدیۆ ٨ رایگەیاند، یەكێتی لە كۆبوونەوەی لەگەڵ لایەنەكاندا مەرجەكانی بۆ بەشداریكردن لە حكومەت ئاشكرا دەكات و دەرگای كراوەیە بۆ هەر لایەنێک كە ئامادەی گفتوگۆ بێت.
ئاماژەی بەوەشکرد، یەكێتیی نیشتمانیی کوردستان وەك هەوێنی سیاسیی نێوان لایەنەكان دەچێتە پەرلەمانی كوردستان.
ئەوەشی خستەڕوو، پێشتر هەندێک لایەن دەنگۆی ئەوەیان بڵاوكردبووەوە، کە هەڵبژاردن ناكرێت یان شەڕ دروستدەبێت، بەڵام بەشداریكردنی زیاتر لە ٧٠٪ـی خەڵك لە هەڵبژاردندا وەڵامێكە بۆ دەنگۆی نەیارەكان.
سەعدی ئەحمەد پیرە وتیشی، زۆربەی لایەنەكان پەرۆشن بۆ بەشداریكردن لە حكومەتی داهاتوودا، هەروەها حكومەتێكی كاربەڕێكەر ناتوانێت بەرەنگاری قەیرانە ئەمنی و سیاسییەكان ببێتەوە.