کوردستان
رۆژی پێنجشەممە 12ـی شەشی 2025 هاوکاریی دارایی هاوپەیمانان بۆ پێشمەرگە دابەش دەکرێت
وەزارەتی پێشمەرگە رایگەیاند کە پێنجشەممە 12ـی حوزەیران دەست دەکات بە دابەشکردنی هاوکاری دارایی هاوپەیمانان بۆ مانگی پێنج بەسەر61 هەزار و 375 ئەفسەر و پێشمەرگە.
بەپێی راگەیەندراوی وەزارەتی پێشمەرگە، ئەم هاوکارییە سبەینێ چوارشەممە 11ـی حوزەیران تەمویل کراوە و دوای تەواوبوونی رێکارەکان، پێنجشەممە دابەشکردنەکە دەست پێدەکات.
بەڕێوەبەرایەتیی هاتوچۆی سلێمانی ئاگاداری شۆفێرانی کردەوە کە بەهۆی کارکردن لە شەقامی بابان، شەقامی سەرەکی تاسڵۆجە لە کاتژمێر دووی پاشنیوەڕۆی ئەمڕۆ سێشەممەوە بەڕووی هاتوچۆدا دادەخرێت.
بەپێی ئاگادارییەکە، شەقامی سەرەکی تاسڵۆجە لە پردی تاسڵۆجەوە تاوەکو کۆتایی بازاڕەکە لەبەردەم هاتوچۆدا دادەخرێت.
بەڕێوەبەرایەتیی هاتوچۆ داوای لە شۆفێران کردووە کە شەقامی تاسڵۆجەی کۆن بەکاربهێنن وەک ڕێڕەوی جێگرەوە.
ئەم کارە ئاوەزانەیە بۆ باشترکردنی ژێرخانی شەقامەکە ئەنجام دەدرێت. بەڕێوەبەرایەتیی هاتوچۆ داوای سەلامەتی بۆ هەموو شۆفێران کردووە.
بەڕێوەبەرایەتیی گشتیی بەرگریی شارستانیی هەرێمی کوردستان ئاماری روداوەکانی رۆژانی جەژنی قوربانی بڵاوکردەوە.
بەڕێوەبەرایەتی گشتیی بەرگریی شارستانی رایگەیاند، گشت تیمەکانی بەرگریی شارستانی لە پارێزگا و ئیدارە سەربەخۆکانی هەرێم بەپێی پلانی دیاریکراو بۆ روبەروبوونەوەی بارودۆخە لەناکاوەکان لە ئامادەباشی تەواودا بوون و ئەمەش ئامارەکانی رۆژانی جەژنن:
ئاماری روداوەکان:
ئاگرکەوتنەوە:
- کۆی گشتی 173روداوی ئاگرکەوتنەوە لە سەرتاسەری هەرێمی کوردستان رویداوە
- 57 روداوی سوتانی پوش و پەڵاش تۆمارکراوە
روداوە کوشندەکان:
- یەک روداوی خنکان لە پارێزگای دهۆک رویداوە کە منداڵێکی 7ساڵان بووەتە قوربانی
- یەک کەس لە ئیدارەی زاخۆ بەهۆی روداوی ئۆتۆمبێلەوە گیانی لەدەستداوە
زیانە ماددییەکان:
- 8 ئۆتۆمبێل و یەک ماتۆرسکیل سوتاون
بەڕێوەبەرایەتیی بەرگریی شارستانی دەڵێت کە تەواوی کارەکان بەگوێرەی پلانی دانراو بەڕێوەچوون و تیمەکان بە تەواوی لە ئامادەباشیدا بوون بۆ روبەروبوونەوەی هەر بارودۆخێکی لەناکاو.
لەلایەن شارەوانی هەولێرەوە خانوی هاووڵاتییەک تێکدراو و خاوەنەکەشی دەڵێت، "یاسام پێشێل نەکردووە".
زیرەک خزر پێشمەرگەی دێرین و پارتیزان و مامۆستا کۆچی دوایی کرد و چەندین پرسەنامە ئاڕاستەی خێزان و کەسوکاری کراوە کە ئەمە دەقەکانیانە.
پرسەنامەی بافڵ جەلال تاڵەبانی
بەڕێزانمان لە خانەوادەی پێشمەرگەی دێرین و تێکۆشەر زیرەک خزر
بەداخ و خەمێکی زۆرەوە هەواڵی کۆچی دوایی پێشمەرگەی دێرین و پارتیزان مامۆستا (زیرەک خزر)مان پێگەیشت.
بۆ ئەم خەمە پرسە و سەرەخۆشی لە ئێوە و کەسوکار و بنەماڵە سەربەرز و تێکۆشەرەکەتان دەکەم کە نموونەیەکی باڵان لە خەباتی رزگاریخوازی گەلەکەمان.
لەخوای گەورە داواکارین گیانی هەڤاڵی کۆچکردوومان بە بەهەشتی بەرین شاد بکات و ئارامی و دڵنەوایی بە هەموولایەک ببەخشێت.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
پرسەنامەی مەکتەبی سیاسی یەکێتی
بەڕێزان کەسوکار و خانەوادەی پێشمەرگەی دێرین زیرەک خزر
بۆ کۆچی دوایی تێکۆشەر و پێشمەرگەی دێرین و پارتیزان زیرەک خضر ، لەناخی دڵەوە پرسەو ماتەمی خۆمان بە ئێوەی بەڕێز و گشت هەڤاڵان و هاوسەنگەرانی ڕادەگەیەنین
لە یەزدانی مەزن داواکارین کۆچکردوو بە بەهەشتی بەرین شاد بکات و ئارامی بە گشت لایەک ببەخشێت
انا للە وانا الیە راجعون
مەکتەبی سیاسی
یەکێتیی نیشتمانیی کوردستان
پلانی رۆژانی جەژن بەسەرکەوتووی جێبەجێکرا و قائیمقامی سلێمانیش دەڵێت: ئەو سەرپێچیکارانەی کە کڕین و فرۆشتنیان بەئاژەڵەوە کردووە لە شوێنی نەگونجاو و دەستگیرکراون، ئازاد دەکرێن .
قائیمقامی سلێمانی رایدەگەیەنێت؛ پلانی رۆژانی جەژنی قوربانی پیرۆز بەسەرکەوتویی جێبەجێ کراوە و سوپاسی تەواوی لیژنە هاوبەشەکان، ئاسایش و هێزە ئەمنییەکان و فەرمانگە خزمەتگوزارییەکان دەکەین.
ئاوات محەمەد، قائیمقامی سلێمانی رایگەیاند: ئامانج لە دانانی پلان بۆ رۆژانی جەژن و جێبەجێکردنی لەلایەن ئاسایش و هێزەئەمنییەکانی دیکە و تەندروستی و فەرمانگە خزمەتگوزارییەکان پاراستنی ئەمنییەت و تەندروستی هاووڵاتیانە، بەسوپاسەوە بۆ جەژنی قوربانی ئەمساڵ توانیویانە بەسەرکەوتویی پلانەکە جێبەجێ بکەن.
وتیشی، لە چوار رۆژەی جەژنی قورباندا لیژنەکانی قائیمقامییەتی سلێمانی بەردەوام بوون لە ئەرکەکانیان و سەردانی تەواوی ئەوشوێنانەیان کردوە کە میوانان و گەشتیارانی شاری سلێمانی بۆبەسەر بردنی کاتێکی خۆش رویان لێکردوە، ئەمە جگەلەئەوەی بەهاوبەشی تیمەکانی ئاسایش و پۆلیس هێزە ئەمنییەکانی دیکە تارادەیەکی زۆر رێگرییان لەسەربڕینی ئاژەڵ لە کۆڵان و شەقامەکان کردوە.
ئاماژەی بەوەشکردووە، ژمارەیەک لە ئەو سەرپێچیکارانەی کڕین و فرۆشتنیان بەئاژەڵەوە لەشوێنی نەشیاو و نەگونجاوەدا کردووە دەستگیرکراون، سەرجەمیان ئازاد دەکرێن.
قائیمقامی سلێمانی، سوپاسی تەواوی لیژنەکانی قائیمقامیەت، هێزە ئەمنییەکان و سەرجەم فەرمانگە خزمەتگوزارییەکانی شارەکە دەکات کە لەرۆژانی جەژنی قوربانی پیرۆزدا بەئەوپەڕی دڵسۆزییەوە ئەرکەکانی خۆیان جێبەجێ کردوە.
قائیمقامییەتی سلێمانی بەهۆی پابەندنەبون بەمەرج و رێنماییەکانی تەندروستی باڵە خۆشەکەی فاخیر هەریری داخست.
قائیمقامییەتی سلێمانی بڵاویکردەوە، بەهۆی پابەندنەبون بەمەرج و رێنماییەکانی تەندروستی و ڤێتێرنەری، رێستۆرانتی باڵە خۆشەکەی فاخیر هەریری داخرا.
ئاماژەی بەوەشکردووە، سەرباری ئەوەی کە پابەندی مەرجەکان نەبوە، مۆڵەتی کارکردنی شوێنەکە و کارمەندەکانیان نییە، ئەوەش یەکێکی دیکەیە لەسەرپێچییەکانی شوێنەکە.
قائیمقامییەتی سلێمانی راشیگەیاندووە، لەکاتی سەردانی لیژنەکانی قائیمقامیەتی سلێمانی، دەرکەوتوە پابەندی هیچ یەکێک لەمەرج و رێنماییەکانی تەندروستی و ڤێتێرنەری نەبووە، بۆیە ئەو رێستۆرانتە داخرا و خاوەنەکەشی روبەڕوی رێکاری یاسایی دەکرێتەوە.
هاتوچۆی دوکان رایگەیاند، رێگە بە هاتنەناوەوەی ماتۆڕسکیلی تۆمارنەکراو بۆ قەزاکە نادەن، ئەو گەشتیارانەشی ماتۆڕسکیلیان پێیە و رێگەیان پێدەدرێت، ئەوانەن کە تۆمارکراون و مۆڵەتی شۆفێریان هەیە.
کۆسرەت عەبدوڵا لێپرسراوی بنکەی هاتوچۆی دوکان رایگەیاندووە، لە دەروازەی قەزای دوکانەوە خاڵی پشکنین هەیە و رێگا بە هاتنەناوەوەی ماتۆڕسکیلی تۆمارنەکراو و ئەو ماتۆڕسکیلانە نادەن کە شۆفێرەکانیان مۆڵەتی نییە.
ئاماژەی بەوەشکرد، بەشێکی گەشتیاران بە کورد و عەرەبەوە بە ماتۆڕسکیل دەچنە قەزاکە، بەڵام رێگە بەوانە دەدرێت کە مۆڵەتیان هەیە و ماتۆڕەکانیشیان تۆمارکراون، هەروەها کەرستەی خۆپارێزییان بەکارهێناوە.
ئەوەش لە کاتێکدایە، وەزارەتی ناوخۆی هەرێم رێکارەکانی بۆ کۆنتڕۆڵکردنی ماتۆڕسکیلەکان توندکردووەتەوە و دەست بەسەر ماتۆڕسکیلە تۆمارنەکراوەکاندا دەگرن و رێگەش نادەن شۆفێران بەبێ مۆڵەت ماتۆڕسکیل لێبخوڕن.
بەڕێوەبەرایەتی بازرگانی دانەوێڵەی سلێمانی رایگەیاند کە سبەی سێشەممە دەست بە پرۆسەی کڕینی گەنمی جوتیاران دەکات بۆ وەرزی ٢٠٢٥.
سەرۆکی بەڕێوەبەرایەتی بازرگانی دانەوێڵەی سلێمانی لە راگەیەندنراوێکدا ئاماژەی بەوە کرد کە ئەمساڵیش وەک ساڵی رابردوو پرۆسەی کڕینی گەنم ناوچە بە ناوچە ئەنجام دەدرێت.
بەپێی راگەیەندراوەکە، سبەی تەنها جوتیارانی سنوری هەر دوو بەشی کشتوکاڵی پیرەمەگروون و تانجەرۆ(عەربەت) دەتوانن گەنمەکانیان بهێنن، و جوتیارانی بەشە کشتوکاڵیەکانی تر رێگایان پێ نادرێت.
راگەیەندراوەکە چەند مەرجێکی دیکەی خستۆتە روو کە بریتین لە:
- ئوتومبێلە بارهەڵگرەکان دەبێت بە یەک ریز راگرن و تەواو پڕ بن لە دانەوێڵە
- تراکتۆرەکان لای دیواری سایلۆوە بۆ سەرەوە بۆ لای سەربڕخانەکەی پیرەمەگروون بە یەک ریز بۆستن
- بۆ هەر بارهەڵگرێک تەنها شوفێرەکە بچێتە ژوورەوە بۆ رایی کردنی مامەڵەکان
- ئەگەر بەرزی بۆدی بارهەڵگرەکان بەشێوەیەک بەرز کرابێتەوە کە ئامێری راکێشان نەگاتە بنی بۆدیەکە، گەنمەکەی لێ وەرناگیرێت
- جوتیاران گەنمەکانیان تەنها لەو بارهەڵگرانە باردەکەن کە خۆیان هەڵی دەڕێژن
کەشناسیی هەرێم پێشبینییەکانی کەشوهەوای بۆ ئەمڕۆ و سبەینێ بڵاوکردەوە و ئاماژەی بەوەکردووە، تاوەباران دەبارێت و پلەکانی گەرما بەرز دەبنەوە.
کەشناسیی هەرێم رایگەیاندووە، ئەمڕۆ دووشەممە، ئاسمان ساماڵ و پەڵەهەور دەبێت و لە هەندێک کات و شوێندا دەگۆرێت بۆ نیمچەهەور، لە کاتەکانی دوای نیوەڕۆوە ئەگەرى تاوەباران هەیە لە ناوچە شاخاوییەکانی باکوور و باکووری رۆژهەڵات.
ئاماژەی بەوەشکردووە، ئەمڕۆ خێرایی با زیاد دەکات و هەندێک کات دەگاتە سەروو 25 کیلۆمەتر لە سەعاتێکدا، پلەکانی گەرماش 1 بۆ 2 پلەی سیلیزی بەرز دەبنەوە.
ئەوەش هاتووە، سبەینێ سێشەممە، بەگشتی ئاسمان ساماڵ و پەڵەهەور دەبێت لە هەندێک ناوچە دەگۆڕێت بۆ نیمچەهەور، هەروەها ئەگەری نمەبارانێکی کەم هەیە لە ناوچە شاخاوییە سنوورییەکانی باکووری رۆژهەڵات.
بەپێی پێشبینییەکان، سبەینێ پلەکانی گەرما کەمێک بەرز دەبنەوە بەراورد بە تۆمارکراوەکانی ئەمڕۆ.
بەرزترین پلەکانی گەرمای پێشبینیکراو بە پلەی سیلیزی بۆ سبەینێ:
هەولێر : 39 پلەی سیلیزی
سلێمانی : 37 پلەی سیلیزی
دهۆک : 38 پلەی سیلیزی
کەرکوک : 44 پلەی سیلیزی
زاخۆ : 39 پلەی سیلیزی
هەڵەبجە : 38 پلەی سیلیزی
سۆران : 37 پلەی سیلیزی
حاجی ئۆمەران : 21 پلەی سیلیزی
گەرمیان : 45 پلەی سیلیزی
بەپێی ڕاپرسییەک لە فەیسبووک، کەناڵی کوردسات لەلایەن هاووڵاتییانەوە بە باشترین کەناڵی فەرهەنگی و کولتووریی دیاریکرا.
کەناڵی کوردسات لە راپرسییەک دا کە لەلایەن پەیجی "وێنە کۆنەکانی سلێمانی"ەوە، ئەنجام دراوە، بە رێژەی 96% لە دەنگەکان وەک باشترین کەناڵی کوردی لە بوارە فەرهەنگی، کلتوری و پەروەردەییەکاندا، لەلایەن هاووڵاتیانەوە هەڵبژێردراوە.
ئەم ئەنجامە، پشتگیریی هاووڵاتیان نیشان دەدات لە شێواز و سیاسەتی کەناڵی و بەرنامە جۆراوجۆرەکانی کەناڵەکە لە بوارە جیاوازەکانی کولتوور و فەرهەنگی کوردی.
لە کۆمێنتەکان دا، بینەرانی کوردسات، سوپاسی کوردسات دەکەن، بۆ هەوڵەکانی لە دەوڵەمەندکردنی کولتوری کوردی بە بەرهەمی باش و شێوازی کارکردنی جدی لە بوارە جیاوازەکاندا.
کوردسات کە لە یەکی کانوونی دووەمی ساڵی 2000 لە سلێمانییەوە دەستی بە کارکرد، بەردەوام بووە لە پێشکەشکردنی بەرنامە کلتوری، فەرهەنگی و پەروەردەییەکان بە زمانی کوردیی ناوەندی.
کوردسات، بە دروشمی "کوردسات ماڵی هەموانە" بەردەوام دەبێت و سوپاسی هەموو بینەران و لایەنگرانی دەکات بۆ سەرنج و رەخنەکانیان، هەروەها بەڵێندەدەدات کە بەردەوام بێت لە پەرەپێدانی زیاتری بەرنامەکانی و بەدوور بوون لە هەر جۆرە بەسیاسیکردنێک بۆ ئەوەی هەمیشە وەک چەپکە گوڵە سپیەکە و ماڵی هەمووان بمێنێتەوە.
حكومەتی عیراق رادەستكردنی داهاتی ناوخۆی هەرێمی كوردستانی كردووەتە مەرجی پێشوەختە بۆ گفتوگۆكردن لەگەڵ حكومەتی هەرێم لەسەر كێشەی مووچە، وەكو میدیا عیراقییەكانیش دەڵێن، تاكو داهاتی ناوخۆ رادەست نەكرێت، پێشوازی لە هیچ وەفدێكی حكومەتی هەرێم ناكرێت.
بەشێك لە میدیا عیراقییەكان بڵاویانكردووەتەوە، حكومەتی عیراق رادەستكردنی داهاتی نەوت و ناوخۆی هەرێمی كوردستانی كردووەتە مەرجی پێشوەختە بۆ گفتوگۆكردن لەگەڵ حكومەتی هەرێم لەسەر كێشەی مووچە.
ئەوەشیانخستوەتەڕو، حكومەتی عیراق لە ئێستادا ئامادە نییە پێشوازی لە هیچ وەفدێكی حكومەتی هەرێم بكات تاكو داهات رادەستنەكرێت.
ئەوەش لەكاتێكدایە، حكومەتی هەرێم چاوەڕێی تەواوبوونی پشووەكانی جەژنی قوربان دەكات، تاكو دانیشتنەكانی دادگای فیدراڵی دەستپێبكاتەوە و دادگای ناوبراو لەبارەی سكاڵایەكەوە كە لەبارەی كێشەی مووچەی هەرێم تۆماركراوە هەڵوێستی خۆی دەرببڕێت.
هاوسەرۆكی وەفدی ئیدارەی خۆبەڕێوەبەری بۆ دانووستان لەگەڵ دیمەشق رایگەیاند، لە چوارچێوەی دانووستانەكانیان لەگەڵ دیمەشق داوایانكردووە، هەسەدە رۆڵێكی گەورەی پێبدرێت لە سوپای سوریادا.
فەوزە یوسف، هاوسەرۆكی وەفدی ئیدارەی خۆبەڕێوەبەڕی بۆ دانووستان لەگەڵ دیمەشق رایگەیاند، دانووستانەكانیان لەگەڵ دیمەشق لەژێر سەرپەرشتی ئەمریكا و وڵاتانی هەرێمی بەشێوەیەكی ئەرێنی بەڕێوەدەچێت و دوای جەژنی قوربانیش، لیژنەیەكی هاوبەش بۆ جێبەجێكردنی رێككەوتنی 11ـی ئاداری نێوان هەسەدە و دیمەشق پێكدەهێنرێت.
ئەوەشی خستەڕو، دیمەشق دەیەوێت دامەزراوەكانی ئێستای ئیدارەی خۆبەڕێوەبەری هەڵبوەشێتەوە، بەڵام وەكو ئیدارەی خۆبەڕێوەبەری ئەوان دژی ئەوەن و لەگەڵ مانەوەی دامەزراوەكانن بۆ سەركردایەتی قۆناغی ئێستای سوریا، دواتریش لە قۆناغی داهاتوودا كاردەكەن بۆ ئەوەی دامەزراوەكانی ئیدارەی خۆبەڕێوەبەری ببێتە بەشێك لە دەوڵەتی سوریا.
هاوسەرۆكی وەفدی ئیدارەی خۆبەڕێوەبەری ئاماژەی بەوەشدا، داوایان لە دیمەشق كردووە بەراورد بە گروپە چەكدارەكانی تری سوریا، هەسەدە رۆڵێكی گەورەتری پێبدرێت لە سوپای سوریادا.
کەشناسیی هەرێم بەپێی ئامارێک کە بڵاویکردووەتەوە نووسیویەتی، بەراورد بە 30 ساڵی رابردوو مانگی ئایاری ئەمساڵ فێنکترین مانگی ئایار بووە.
ئاماژەی بەوەشکردووە، بەرزترین پلەی گەرمای تۆمارکراوی مانگی ئایار لە 30 ساڵی رابردوودا 42 پلەی سیلیزی بووە، بەڵام ئەمساڵ بەرزترین پلە لە دهۆک و هەولێر 40 پلەی سیلیزی بووە و لە سلێمانیش 39 پلە بووە.
بەگشتیی مانگی ئایاری ئەمساڵ سەرەڕای کەمی رێژەی بارانبارین بەڵام لە رووی کەشەوە نزمی پلەکانی گەرمای پێوە دیار بوو.
لەپاڵ ئەوەشدا، رێژەیەکی زۆری خۆڵبارین و رەشەبای تێدا بووە و زۆرجار خێرایی با دەگەیشتە سەروو 50 کیلۆمەتر لە سەعاتێکدا.
گەشتیارێکی تەمەن 21 ساڵ لە رووباری سیروان لە گەرمیان خنکا.
روداوەکە پاشنیوەڕۆی ئەمڕۆ یەکشەممە، لە سنوری ناحییەی مەیدان ە گەرمیان رویداوە و گەشتیارێکی بە رەگەز عەرەب بەناوی "جابر نجم حمود" لەکاتی مەلەکردندا خنکاوە.
ئەو گەشتیارە لەدایکبووی ساڵی 2004ـە و دانیشتووی شارەبان بووە، بەمەبەستی گەشت و سەیران لەگەڵ چەند هاوڕێیەکیدا چوونەتە ناحیەی مەیدان و لەوێ بۆ مەلەکردن چووەتە ناو رووباری سیروانەوە.
پۆلیس گەرمیان رایگەیاندووە، ئەو سێ هاوڕێیەی کە لەگەڵیدا بوون لەکاتی روداوەکەدا دەستگیر کراون و تەرمی گەنجەکەش بەمەبەستی توێکاری بۆ پزیشکی داد نێردراوە.
بایكۆتی پزیشكانی نیشتەجێی خولاو و پلەبەندی هەولێر پێ دەنێتە رۆژی دووەمەوە و تەندروستی هەولێریش بڕیاریدا بە دوورخستنەوەی ئەو پزیشكانە لە نەخۆشخانە تایبەتەكان و بڕینی مووچەكەیان بۆ ماوەی یەك رۆژ.
بەگوێرەی نوسراوێكی بەڕێوەبەرایەتی گشتی تەندروستی هەولێر، كە ئاڕاستەی نەخۆشخانە تایبەتەكان كراوە تێیدا هاتووە، بەڕێوەبەرایەتی تەندروستی هەولێر لەپێناو بەرژوەندی گشتی و بەردەوامبوونی كار لە نەخۆشخانەكان، بڕیاریداوە بە سزادانی ئەو پزیشكانەی لە شوێنی كارەكانیان ئامادەنە بوون.
لە نووسراوەكەدا ئەوەش هاتووە، ئەو پزیشكانەی رۆژی شەممە بایكۆتی دەوامیانكردووە لە نەخۆشخانە گشتییەكان، بە بڕینی مووچەی یەك رۆژ و بە نەهاتوو هەژمار دەكرێن.
هەروەها، لە نووسراوەكەدا بۆ نەخۆشخانە تایبەتەكان ئاماژەبەوەكراوە، ئەو ژمارە پزیشكەی لە نەخۆشخانەكانی كەرتی گشتی بایكۆتی دەوامیانكردووە، نابێت لە نەخۆشخانە تایبەتەكان دەوام بكەن، بە پێچەوانەوە نەخۆشخانە بەرپرسیاردەبێت و دادەخرێت.
لە رۆژی شەممەوە، پزیشكانی نیشتەجێی خولاو و پلەبەند لە سنووری هەولێر كە ژمارەیان لەنێوان 400 بۆ 600 پزیشكە بایكۆتی دەوامیان راگەیاندووە و داوای دامەزراندنی پزیشكانی نوێی و دیاریكردنی وادەی دامەزراندنیان دەكەن، داواش دەكەن سیسمی پلەبەندی پزیشكان وەك خۆی بمێنێتەوە.
