بەهۆی زریان و لافاوێکی وێرانکەر لە ناوچە سنورییەکانی نێوان نیپال و تبتی چین، لانیکەم 157 کەس گیانیان لەدەستداوە و سەدان کەسی تر کە گەشتیاری بیانییان تێدایە بێسەروشوێنن.

وتەبێژی پۆلیسی نیپال رایگەیاند، تا ئێستا گیان لەدەستدانی 157 کەس پشتڕاستکراوەتەوە، هاوکات 28 ئەندامی پۆلیس و بەلایەنی کەمەوە 384 گەشتیار و هاووڵاتی بێسەروشوێنن.

ئاژانسی فرانس پرێس ئاشكرایکردووە، بەهۆی هەرەسهێنانی بارستەیەک لە قوڕ و بەرد بۆ ناو روبارێکی سەر سنورەکانی نێوان نیپال و هەرێمی تبتی چین، لافاوێکی بەهێز دروستبووە و دەیان ماڵ، رێگاوبان و پڕۆژەی کارەبای وێران کردووە.

لەلای خۆشیەوە، وەزیری دەرەوەی نیپال لە پەرلەمانی وڵاتەکەی رایگەیاند، زانیارییە سەرەتاییەکان ئاماژە بەوە دەکەن کە بەهۆی رودانی بومەلەرزەیەک لە ناوچەکە، هەرەسی سەهۆڵبەندان رویدابێت و بووبێتە هۆی دروستبوونی ئەم لافاوە کارەسات بارە.

دەستەی گەشتوگوزاری نیپال ئاماژەی بەوەکردووە، لە نێو بێسەروشوێنەکاندا 105 گەشتیاری هیندی، 93 نیپالی، 12 بەریتانی و سێ ئەمریکی هەن.

دادگای رەسافە فەرمانە سالارییەکەی کۆمپانیای کۆڕەک تیلیکۆمی هەڵوەشاندەوە و پشتگیری لە بڕیارەکەی دەستەی راگەیاندن و پەیوەندییەکانی عیراق دەکات بۆ راگرتنی کارکردنی کۆمپانیاکە.

دەستەی راگەیاندن و پەیوەندییەکانی عیراق لە راگەیەنراوێکدا ئاشکرایکرد، دادگای رەسافە لە بەغداد بڕیارێکی دادوەریی دەرکردووە بۆ هەڵوەشاندنەوەی فەرمانی سالاریی کۆمپانیای کۆڕەک و هێشتنەوەی بڕیاری راگرتنی کارکردن لەگەڵ ئەو کۆمپانیایەدا.

دەستەی راگەیاندن و پەیوەندییەکان رایگەیاند، دادگای رەسافە لە 24ی ئابی 2026 بڕیاریدا بە هەڵوەشاندنەوەی ئەو فەرمانە سالارییەی لەلایەن بەڕێوەبەری رێگەپێدراوی کۆمپانیای کۆڕەک تیلیکۆم پێشکەش کرابوو.

بەپێی بڕیارەکەی دادگا، بڕیارەکەی دەستەی راگەیاندن و پەیوەندییەکان تایبەت بە راگرتنی کارکردن لەگەڵ کۆمپانیای کۆڕەک بە بەهێزی و چالاکی دەمێنێتەوە.

دەستەی راگەیاندن و پەیوەندییەکان ئەوەشی خستەڕوو، بڕیارەکە دوای ئەوە هات، سەرۆکی دەزگای جێبەجێکار لە دەستەی راگەیاندن و پەیوەندییەکان بە فەرمی تانەی لە داواکارییەکەی بەڕێوەبەری کۆڕەک دابوو.

ئاماژەی بەوەشکرد، دەستەی ڕاگەیاندن و پەیوەندییەکان رێزی خۆی بۆ دەسەڵاتی دادوەری دوپاتکردەوە و جەختی کردەوە لە بەردەوامبوونی رێکارە یاساییەکان لە دۆسیەی کۆڕەک تیلیکۆمدا، بە ئامانجی پاراستنی مافی دەوڵەت، بەرژەوەندیی گشتی و مافی بەکارهێنەران.

خاتوو شاناز ئیبراهیم ئەحمەد پەیامێکی بۆ کۆچی دوایی مۆرین مکلکی بڵاوکردەوە و رایگەیاند، بە دڵێکی پڕ لە خەمەوە ماڵئاوایی لە مۆرین مکلکی ئەکەم، لە سەرەتای ساڵانی 1990ـەوە، شەو و رۆژ و لە هەموو قۆناغێکی سەخت و هەموو بەربەستەکاندا پاڵپشتمبوو.

دەقی پەیامەکەی خاتوو شاناز ئیبراهیم ئەحمەد بۆ کۆچی دوایی مۆرین مکلکی:

بە دڵێکی پڕ لە خەمەوە ماڵئاوایی لە مۆرین مکلکی ئەکەم؛ خانمێکی بێوێنە و بەڕێز کە ڕۆڵی سەرەکی هەبوو لە دامەزراندنی Kurdistan Children’s Fund و Kurdistan Save the Children. لە سەرەتای ساڵانی 1990ـەوە، شەو و ڕۆژ و لە هەموو قۆناغێکی سەخت و هەموو بەربەستەکاندا پاڵپشتمبوو.

تا ئێستاش ئەو شەوە بێ کۆتایانەم لە یادە کە تا بەرەبەیان لەسەر کۆمپیوتەر کارمان ئەکرد؛ پێشنیار و پلانمان ئامادە ئەکرد و وەڵامی نامەی ڕەتکردنەوەمان ئەدایەوە، وە کاتێکیش وا هەستمان بکردایە هەموو دەرگاکان داخراون، بەدوای ڕێگەیەکی نوێ بۆ بەردەوامبووندا ئەگەڕاین.

مۆرین تەنها خۆبەخشێک نەبوو، بەڵکو بۆ ساڵانێکی زۆر نزیکترین هاوڕێم بووە و هەمیشە سەرچاوەی هێز، پشتگیری و بەردەوامبوونم بووە.

بۆ چەندین دەیە، کات و وزە و دڵی خۆی پێشکەشی خەڵکی کوردستان کرد، یارمەتیدەربوو لە بنیادنانی پردەکانی پەیوەندی، دۆزینەوەی چارەسەری پزیشکی بۆ منداڵان و پشتگیری بۆ خێزانەکان، وە لەو کاتانەشی کە وا دەردەکەوت هیچ دەرفەتێک نییە، ئەو خۆی دەرفەتی دروست ئەکرد.

مۆرین، تۆ لە سەختترین کاتیشدا هەر لەگەڵماندا بوویت، یادت بۆ هەمیشە لە دڵ و دەروونمدا هەڵدەگرم.

مۆرین مکلکی لە ساڵی 1943 لە سکۆتلاند لە دایک بووە و هەر ساڵانی کۆتایی سەدەی رابردوودا لەگەڵ ئاشنایەتی لەگەڵ کورد، رۆڵێکی گرنگی بینی لە خزمەتکردنی منداڵانی کوردستان و یەکێک بوو لە دامەزرێنەرانی (سندوقی منداڵانی کوردستان)، جگە لەوەش لە بەریتانیا هەموو هەوڵێکی خۆی بۆ ناساندنی کورد و نەهامەتییەکانی و لۆبیکردن بۆ دۆزەکەی چڕکردەوە.

هەوڵ و ماندووبوونی مۆرین مکلکی کاریگەریی لەسەر هاوکاریی منداڵی خێزانە کەمدەرامەتەکان و منداڵانی بێباوک هەبوو، ئەمەش زیاتر لە چوارچێوەی کارەکانی رێکخراوی منداڵپارێزی کوردستان کە گۆڕانکاریی بەرچاوی دروستکرد، هەروەها رۆڵێکی گرنگی بینی لە دروستکردن و پتەوکردنی پەیوەندییەکانی رێکخراوی منداڵپارێز لەگەڵ وڵاتانی دەرەوە، هەر لەو رێگەیەوە بەرپرس بوو لە هاوکاریکردنی سەدان منداڵ و ناردنە دەرەوەیان بۆ مەبەستی وەرگرتنی چارەسەر لە نەخۆشخانەکانی ئەورووپا.

مۆرین مکلکی چەندین جار سەردانی هەرێمی کوردستانی کردووە و دەیان کار و پرۆژە و دەستپێشخەریی گەورەی کردووە، کە بوونە هەوێنی دامەزراندن و فراوانبوونی رێکخراوی منداڵپارێزی کوردستان.

سەرۆکی فەرەنسا پیرۆزبایی تێکەڵبوونی ئاشتییانەی هەسەدەی بۆ ناو دەوڵەتی سوریا کرد و هەنگاوەکەی بە بڕیارێکی یەکلاکەرەوە بۆ بەدیهێنانی ئاشتی لەو وڵاتەدا وەسف کرد.

ئیمانوێل ماکرۆن، سەرۆکی فەرەنسا لە تۆڕی کۆمەڵایەتی ئێکس پەیامێکی سەبارەت بە پێشهاتەکانی سوریا و تێکەڵبوونی هێزەکانی سوریای دیموکرات 'هەسەدە' بۆ ناو دامەزراوەکانی دەوڵەت بڵاوکردەوە و پشتیوانیی وڵاتەکەی بۆ پرۆسەی گواستنەوەی سیاسی دووپاتکردەوە.

سەرۆکی فەرەنسا پیرۆزبایی لە سوریا کرد بەهۆی تێکەڵکردنی ئاشتییانەی هێزەکانی سوریای دیموکرات 'هەسەدە' بۆ ناو دەوڵەتی سوریا و ئەم هەنگاوەی بە شۆڕشێکی یەکلاکەرەوە لە پرۆسەی سیاسیی ئەو وڵاتەدا وەسف کرد.

ماکرۆن باسی لە پەیوەستبوونی ئەحمەد شەرع، سەرۆکی سوریا کرد و هاوکات پێزانینی خۆی بۆ هەستی بەرپرسیارییەتی مەزڵوم عەبدی و سەرکردایەتیی هەسەدە دەربڕی.

سەرۆکی فەرەنسا جەختی کردەوە لەوەی فەرەنسا لە سەرەتای پرۆسەی گواستنەوە رۆڵێکی چالاکی لە پشتیوانیکردنی ئەم ئاڕاستەیەدا بینیوە و بە وردی بەدواداچوون بۆ جێبەجێکردنی دەکات.

ئەوەشی خستەڕوو، وڵاتەکەی بەردەوام دەبێت لە پشتیوانیکردنی پرۆسەی گواستنەوە لە سوریا، بە مەرجێک رێز لە یەکپارچەیی، سەروەریی خاک، هەموو پێکهاتەکان و قۆرخکردنی چەک لە دەستی دەوڵەتدا بگرێت، بەوپێیەی ئەمە تاکە رێگەیە بۆ بەدیهێنانی ئاشتی و سەقامگیریی هەمیشەیی.

دۆناڵد ترەمپ، تێکشکاندنی هێزی دەریایی ئێرانی راگەیاند و جەختی لەسەر بەردەوامیی هێرشە سەربازی و فشارە ئابورییەکانی وڵاتەکەی بۆ سەر تاران کردەوە.

دۆناڵد ترەمپ، سەرۆکی ئەمریکا رایگەیاند، ئەمریکا تێکشکاندنی هێزی دەریاوانی ئێرانی بەدیهێناوە و تەنها لە شەوی رابردوودا 20 بەلەمی ئێرانییان لەناوبردووە.

سەبارەت بە رابەری باڵای ئێران سەرۆکی ئەمریکا ئاماژەی بەوەکرد، بڕوا ناکات رابەری باڵای ئێران کۆچی دوایی کردبێت.

جەختی کردەوە لەوەی فشاری ئابوری و هێرشی سەربازی هەردووکیان کارامەیی خۆیان سەلماندووە، راشیگەیاند ئێرانییەکان بەدەست هەڵاوسانی دارایی گەورە و داڕمانی ئابورییەوە دەناڵێنن.

ترەمپ ئەوەشی خستەڕوو، رژێمی ئێران بە شێوەیەکی زۆر خراپ مامەڵە لەگەڵ گەلەکەیدا دەکات و ژمارەیەکی زۆر لە خۆپیشاندەرانی کوشتووە.

جەختی کردەوە لەوەی ئەمریکا هێزێکی دارایی مەزنی هەیە و ئەم هەنگاوانە بەرەو سەرکەوتنێکی زۆر گەورە دژی ئێران دەچن، هەروەک چۆن لە ڤەنزوێلا سەرکەوتنیان بەدەستهێنا.

سەرۆکی ئەمریکا ئاماژەی بەوەشکرد، رووبەڕووبوونەوە لەگەڵ ئێران کەوتۆتە چوارچێوەی هیچ خشتەیەکی کاتییەوە و تا پێویست بکات بەردەوام دەبێت. لەبارەی گەڕانەوەش بۆ سەر مێزی دانوستان، رایگەیاند هیچ وادەیەکی دیاریکراو نییە.

سەرپەرشتیاری ناو تۆمارکردن لەپرۆژەی 'هەژماری من' هۆشداری بە موچەخۆران دەدات و دەڵێت: دوای 31ـی ئاب موچە دابەشکردن بە کاش نامێنێت.

سیڤان بەرزنجی، سەرپەرشتیاری ناو تۆمارکردن لەپرۆژەی 'هەژماری من' بە کوردسات نیوزی راگەیاند: تا ئێستا زیاتر لە 97٪ـی موچەخۆرانی هەرێم خۆیان لە 'هەژماری من' تۆمار کردووە.

ئاماژەی بەوەشداوە: رێککەوتنێک هەیە لە نێوان حکومەتی هەرێم و عیراقدا کە دوای 31ـی ئاب موچە تەنها لە رێگەی 'هەژماری من' و بە دیجیتاڵی دابەش دەکرێت.

سیڤان بەرزنجی باس لە ئامێرەکانی راکێشانی پارە (ATM) دەکات و دەڵێت: زیاتر لە 720 ئامێرمان لە سەرتاسەری هەرێمی کوردستان داناوە و ئامانجمانە ئەو ژمارەیە زیاتر بکەین، بەپێی رێنمایی بانکی ناوەندیی عیراقیش دەبێت بۆ هەر هەزار موچەخۆرێک ئامێرێکی راکێشانی پارە دابین بکرێت.

سەرپەرشتیاری ناو تۆمارکردن لەپرۆژەی 'هەژماری من' ئەوەشی خستەڕوو: لە ئێستادا گواستنەوەی بانکەکان کارا نییە، بەڵام لە داهاتوودا کارا دەبێت.

سەرۆک کۆماری ئێران رایگەیاند، ئەمریکا لەڕێگەی سەپاندنی گەمارۆ ئابورییە نوێیەکانی بۆ سەر ئێران ناگاتە هیچ ئامانجێک.

ئاژانسی هەواڵی "ئیسنا" بڵاویکردەوە، مەسعود پزیشکیان، سەرۆک کۆماری ئێران ئاماژەی بەوەکردووە: " ئەمریکا لەم قۆناغەدا لەڕێگەی فشاری ئابورییەوە هیچی دەستناکەوێت، وەک چۆن لە هەڵگیرساندنی جەنگدا نەیتوانی هیچ دەستکەوتێکی هەبێت."

ئەم لێدوانانەی سەرۆک کۆماری ئێران لە کاتێکدایە، کە واشنتۆن هەڕەشەی توندترکردنی گەمارۆ ئابورییەکانی سەر تاران دەکات، ئەوەش دوای تێپەڕبوونی چەندین مانگ بەسەر دەستپێکردنی جەنگ و هێرشەکانی ئەمریکا و ئیسرائیل بۆ سەر ئێران لە 28ـی شوباتدا.

هاوکات لە کۆنگرەیەکی رۆژنامەوانیدا، سکۆت بێسێنت، وەزیری گەنجینەی ئەمریکا رایگەیاند، "سنوری گەمارۆکانیان بۆ سەر ئێران بەرفراوانتر کردووە تا کەرتەکانی دراوی دیجیتاڵی، تەکنەلۆژیا و کەشتیوانی، کە تاران بۆ پاڵپشتیکردنی ئابورییەکەی پشتیان پێدەبەستێت".

دوای هەڵوەشانەوەی ئەركی هێزەكانی سوریای دیموكرات و تێكەڵبوونیان بە سوپای سوریا تائێستا چارەنوسی یەكینەكانی پاراستنی ژنان یەكلانەبووەتەوە. 

مەزڵوم عەبدی كۆتاییهاتنی ئەركی سەربازیی هەسەدەی راگەیاند و ئاماژەی بەوەكرد، پێكهاتەی هەسەدە دەبێتە لیوایەك سەر بە سوپای سووریا و هێزە هاوبەشەكان لە ناوچە كوردییەكان دەمێننەوە.

پەیامنێری كوردسات نیوز رایگەیاند، تائێستا چارەنوسی یەكینەكانی پاراستنی ژنان (یەپەژە) یەكلانەكراوەتەوە و رێككەوتنی لەسەر نەكراوە. 

ئەوەش لەكاتێكدایە، پێشتر دەنگۆی ئەوە بڵاوكرایەوە سوریا رەزامەندی دەربڕیوە یەپەژە بكرێتە لیوایەكی تایبەتی دژە تیرۆر. 

رۆهڵات عەفرینی فەرماندەیی گشتی یەپەژە رایگەیاندبوو، حكومەتی كاتی سوریا داوایكردووە هێزەكانیان بچنە چوارچێوەی هێزەكانی ئاسایشی ناوخۆوە و ئەوان رەتیدەكەنەوە.

 

سەرۆكی پەرلەمانی ئێران رایگەیاند، لە جەنگی ئابوریدا شكست بە ئەمریكا دەهێنین، كشانەوەی هێزەكانی ئەو وڵاتەش لە عیراق بە دەسكەوتێكی مێژوییی وەسف دەكات.

محەمەد باقر قالیباف سەرۆكی پەرلەمانی ئێران لە كۆبوونەوەی لەگەڵ فائق زێدان سەرۆكی ئەنجومەنی باڵای دادوەریی عیراقدا رایگەیاند، چۆن لە جەنگی سیاسی و سەربازیدا ئەمریكا شكستی هێنا، لە جەنگی ئابوریشدا شكست دەهێنێت و سیستمێكی نوێی ناوچەیی دروست دەبێت.

ئاماژەی بەوەشكردووە، رەوشی ئێستای ئێران و عیراقیش لە قۆناغێكی هەستیاردایە.

هاوكات، پشتیوانی خۆی بۆ كشانەوەی هێزەكانی هاوپەیمانان لە عیراق دەربڕی و ئاماژەی بەوەكرد، دەستكەوتێكی مێژووییە و پێویستە كشانەوەكە كایەی وشكانی و ئاسمانیش بگرێتەوە.

 

روسیا و ئۆكراین نزیکن لە رێککەوتن بۆ ئاڵوگۆڕی ژمارەیەکی بەرفراوانی لە دیلی جەنگ. 

ئاژانسی تاسی روسی بڵاویكردەوە، ئۆكراین و روسیا لە گفتوگۆدان بۆ ئەوەی لە پرۆسەیەكدا زۆرترین ژمارەی دیلی جەنگ ئاڵوگۆڕبكەن، لە مانگی ئایاری ئەمساڵیشدا هەزار دیلی جەنگ بە نێوەندگیری ئەمریكا ئازادكران.

دیمتری پیسكۆڤ، وتەبێژی كۆشكی كرملن رایگەیاند، جۆن راتكلیف بەڕێوەبەری دەزگای هەواڵگریی ئەمریكا لە روسیایە و ئەمەش نیشانەی هەماهەنگیی نێوان هەردوو وڵاتەكەیە لە ئاستی هەواڵگریدا.

بەپێی زانیارییە میدیایەكان، راتكلیف چەند كۆبوونەوەیەك لەگەڵ لێپرسراوانی باڵای روسیا ئەنجام دەدات، بەڵام ئامانجی سەرەكی كۆبونەوەكە ئاشكرانەكراوە. 

 

مەزڵوم عەبدی هەڵوەشاندنەوەی هەسەدە و تێکەڵبوونی هێزەکەی بە دامەزراوەکانی سوریا راگەیاند.

مەزڵوم عەبدی، فەرماندەی گشتیی هێزەکانی سوریای دیموکرات 'هەسەدە' لە کۆشکی سەرۆکایەتی سوریا، لە دوای کۆبوونەوەی لەگەڵ ئەحمەد شەرع سەرۆکی سوریا، بە زمانی کوردی وتارێکی پێشکەشکرد رایگەیاند، دوای رێککەوتن لەگەڵ ئەحمەد شەرع، هەڵوەشاندنەوەی هەسەدە وەک هێزێکی سەربازیی سەربەخۆ، کۆتاییهاتنی ئەرکەکەی و تێکەڵبوونی تەواوەتیی لە دامەزراوەکانی سوریا رادەگەیەنن، جەختیشی کردەوە کە ئەمڕۆ لاپەڕەیەکی گرنگ لە مێژوی سوریا هەڵدەدەنەوە و وڵات چووەتە قۆناغێکی نوێوە.

ئاماژەی بەوەکرد، شەڕڤانان لە سەختترین قۆناغدا بەرپرسیارییەتیی گەورەیان هەڵگرت و زۆرێک لە شار و شارۆچکەکانیان لە دەسەڵاتی بەعس و تیرۆری داعش رزگار کرد، هەروەها هەزاران شەهیدیان لەپێناو داهاتوویەکی ئارام بۆ منداڵانی وڵات بەخشی تا رۆژێک بێت سورییەکان پێویستیان بە جەنگ نەمێنێت.

لە بەشێکی تری قسەکانیدا هیوای خواست ئەم رۆژە ببێتە دەستپێکی گواستنەوە لە چەکەوە بۆ ئاشتی و لە بەرگرییەوە بەرەو بونیادنانەوەی سوریا، هاوکات تیشکی خستەسەر مافی فێربوون بە زمانی کوردی و ئاشکرایکرد، ئەحمەد شەرع هەڵوێستێکی کراوەی بەرانبەر پاراستن و گەشەپێدانی زمانی دایک نیشان داوە.

دۆناڵد ترەمپ دەڵێت؛ سەرجەم مینەکانی گەروی هورمز تەقێندراونەتەوە و رێگە بە ئێران نادەین مین لە ناوچەکە دابنێتەوە

دۆناڵد ترەمپ سەرۆکی ئەمریکا لە تۆڕی کۆمەڵایەتی سۆشیال تروس نووسیویەتی، سەرجەم ئەو مینانەی لە گەروی هورمز چێنرابوون تەقێندراونەتەوە و جەختی کردەوە کە بەردەوام چاودێریی وردی ناوچەکە دەکەن.

ترەمپ هۆشدارییەکی توندی ئاڕاستەی تاران کرد و ئاشکرایکرد، رێگە نادەن ئێران هیچ مینێک لە گەروی هورمز دابنێتەوە، ئاماژەی بەوەشکرد، هەر بەلەمێکی ئێرانی بە مەبەستی میندانان هەوڵ بدات، دەستبەجێ لەلایەن هێزەکانیانەوە تێکدەشکێندرێت.

سەرۆکی ئەمریکا ئەوەشی خستەڕوو، بە شێوەیەکی ورد و لە نزیکەوە چاودێریی 'چیای تەور' و پێگە ئەتۆمییەکانی نەتەنز، فۆردۆ و ئەسفەهان دەکەن.

عەبدوڵا ئۆجەلان رایگەیاند، پڕۆسەی ئاشتی گەیشتووەتە قۆناغێکی زۆر جدی و هەنگاوی باشی ناوە، بەڵام هەندێک لایەن دەیانەوێت بە پیلانگێڕی پڕۆسەکە تێک بدەن.

ئۆجەلان بەرز نرخاندنی بۆ هەڵوێستی سەرکردەکانی تورکیا دەربڕی و ئاماژەی بەوەکرد، ئەردۆغان و باخچەلی ئیرادەیەکی بەهێزیان نیشان داوە. هەروەها جەختی لەوە کردەوە کە لەسەر بانگەوازی ئەو خەباتی چەکداری کۆتایی پێهاتووە و پارتە سیاسییەکانیش پشتیوانییەکی مێژووییان لەو بانگەوازییە کردووە.

لە بەشێکی دیکەی قسەکانیدا، ئۆجەلان ئاماژەی بە بەردەوامی هەنگاوە یاساییەکان کرد و رایگەیاند ئەو کۆمیسیۆنەی لەسەر بنەمای ئەم یاسایە دامەزرا دوێنێ یەکەمین کۆبوونەوەی خۆی ئەنجام دا. هاوکات ئەو بڵاوکراوانەی ئاڕاستەی پرۆسەکەن بە جووڵەی تێکدەرانەی دژبەرانی پڕۆسەکە وەسف کرد و ئەوەشی خستەڕوو، ئەو وتانەی لە تۆڕە کۆمەڵایەتییەکان بڵاودەکرێنەوە بە ناوی ئەوەوە راست نین.

لە کۆتاییدا جەختی کردەوە: "من هەوڵەکانم بۆ بونیادنانی ئاشتیی کۆمەڵایەتی و یاسای برایەتی زیاتر بەرەو پێشەوە دەبەم" و داوای لە هەموو لایەک کرد بە رۆحی برایەتی، هۆشیاری و هەستیارییەوە نزیک ببنەوە و هەوڵ بۆ سەرخستنی پڕۆسەکە بدەن.

دۆناڵد ترەمپ، سەرۆکی ئەمریکا، ئێرانی تۆمەتبار کرد بەوەی شکستی هێناوە لە دابینکردنی موچەی بەشێکی گەورە لە هێزە چەکدارەکانی، هاوکات جەختی کردەوە لەسەر بەردەوامی سەرکوتکردنی خۆپێشاندەران بە ئاستێک کە پێشتر وێنەی نەبووە.

ترەمپ لە بڵاوکراوەیەکدا لە تۆڕی کۆمەڵایەتیی ترووس سۆشیاڵ نووسیویەتی: کۆماری ئیسلامیی ئێرانی شکستخواردوو موچەی بەشێکی زۆری سوپاکەی نادات، لە هەمان کاتدا خۆپێشاندەران دەکوژێت، تەنانەت لە دەرەوەی کاتی خۆپێشاندانەکانیشدا و بە ئاستێک کە پێشتر نەبینراوە.

سەرۆکی ئەمریکا ئاماژەی بەوەش کرد: ئەم قەوشە قەیرانێکی مرۆیی رەهەند گەورەیە و دەبێت دەستبەجێ بوەستێندرێت.