قوباد تاڵەبانی پیرۆزبایی لە د.دیار محەمەد سدیق و عەلی محەمەد دەکات بەبۆنەی هەڵبژاردنیان بۆ دوو پۆستی جیاواز لە یەکێتیی تۆپی باسکەی عیراق.

قوباد تاڵەبانی پیرۆزبایی لە هەریەک لە د.دیار محەمەد سدیق، بەبۆنەی هەڵبژاردنی وەک سەرۆکی نوێی یەکێتیی تۆپی باسکەی عیراق و عەلی محەمەد، وەک ئەندامی نوێی دەستەی سەرۆکایەتیی یەکێتیی تۆپی باسکەی عیراق کرد.

قوباد تاڵەبانی رایگەیاندووە، "هیوادارم هەردوو بەڕێز لە ئەرکەکانی خۆیاندا سەرکەوتووبن و هاوکار و یارمەتیدەربن لە پێشخستنی تۆپی باسکەی عیراق و کوردستان و هەر ئەوەشیان لێ چاوەڕوان دەکرێت".

وەزارەتی نەوتی عیراق رایگەیاند، مانگی رابردوو هەناردەی نەوتی عیراق 99 ملیۆن بەرمیلی تێپەڕاندووە كە لەو بڕە زیاتر لە 5 ملیۆن بەرمیلی نەوتی هەرێمی كوردستان بووە .

وەزارەتی نەوتی عیراق لە راگەیەنراوێكدا بڵاویكردوەتەوە ، بەپێی ئامار و داتاكانی كۆمپانیای سۆمۆ ، كۆی گشتی هەناردەی نەوتی خاوی عیراق لە مانگی شوباتدا ، گەیشتوەتە 99 ملیۆن و 872 هەزار و 220 بەرمیل و داهاتەكەی زیاتر بووە لە 6 ملیار و 814 ملیۆن و 585 هەزار دۆلار.

هەروەها رونكراوەتەوە ، لە كۆی گشتی هەناردەی نەوتی عیراق لە مانگی شوباتدا ، 93 ملیۆن و 349 هەزار و 840 بەرمیل نەوت لە كێڵگە نەوتییەكانی ناوەراست و باشوری عیراقەوە هەناردەكراوە و 5 ملیۆن و 551 هەزار و 610 بەرمیلیش لە كێڵگە نەوتییەكانی هەرێمی كوردستان لە رێی بەندەری جەیهانی توركی هەناردەكراوەو بڕی هەناردەش لە كیڵگەی گیارەوە 971 هەزار و 130بەرمیل نەوت بووە .

شاناز ئیبراهیم ئەحمەد خانمی یەکەمی عیراق، پەیامێکی هاوخەمی بۆ کۆچی دوایی مەبەست سەردار بڵاوکردەوە و تێیداهاتووە، " زۆر بەداخەوە بەیانی ئەمڕۆ هەواڵی ماڵئاوایی یەکجارەکی میدیاکار و کامێرامان (مەبەست سەردار)م بیست، کۆچی دوایی ئەم گەنجە بەهرەمەندەی سلێمانی خەمێکی گەورەی لەدڵمدا جێهێشت".

دەقی پەیامەکە  

زۆر بەداخەوە بەیانی ئەمڕۆ هەواڵی ماڵئاوایی یەکجارەکی میدیاکار و کامێرامان (مەبەست سەردار)م بیست.

کۆچی دوایی ئەم گەنجە بەهرەمەندەی سلێمانی خەمێکی گەورەی لەدڵمدا جێهێشت بەتایبەت کەلە قۆناغەکانی سەرەتای ژیانیدا و پڕ ووزە و دڵسۆز و پەرۆشی بەجێگەیاندنی ئەرکەکانی بووە.

پرسە و سەرەخۆشی لەخێزان و کەسوکارەکەی و هاوڕێ و هاوپیشەکانی و هەموو میدیاکارانی شاری سلێمانی ئەکەم و هاوبەشی خەم و پەژارەیانم.

خواى گەورە لەکۆچکردوو خۆش بێت، وجێگەی بەهەشت بێت، سەبرو ئارامی بەهەمووان ببەخشێت و ئەمە دوایین ناخۆشیمان بێت.

شاناز ئیبراهیم ئەحمەد

بەپێی پێشبینییەکانی کەشناسی لە 48 سەعاتی داهاتوودا بارانبارین بەردەوام دەبێت و لەهەندێک ناوچە ئەگەری بەرزبوونەوەی ئاستی ئاو هەیە.

بەڕێوەبەرایەتی گشتی کەشناسی و بوومەلەرزەزانی هەرێم پێشبینییەکانی بۆ 48 سەعاتی داهاتوو بڵاوکردەوە و رایگەیاند، شەپۆلێکی بارانبارین و هەورەبروسکە هەرێمی کوردستان دەگرێتەوە و لە هەندێک ناوچە مەترسی بەرزبوونەوەی ئاستی ئاو هەیە.

کەشناسی هەرێم ئاشکرایکرد، ئەمڕۆ ئاسمانی هەرێم بە گشتی هەوری باراناوی دەبێت و نمەباران و بارانی مامناوەند زۆربەی ناوچەکان دەگرێتەوە، هەندێک جار تەزرە و هەورەبرووسکەی لەگەڵ دەبێت.

ئاماژەی بەوەشکردووە، لە کاتەکانی شەودا رێژەی بارانبارین لە سنوری پارێزگای سلێمانی و ئیدارەی گەرمیان زیاتر دەبێت و پێشبینی بەرزبوونەوەی ئاستی ئاو دەکرێت، هاوکات لە ناوچە شاخاوییە سنورییەکانی باکور و باکوری رۆژهەڵات بەفرێکی کەم دەبارێت.

کەشناسی ئەوەشی خستەڕوو، سبەینێ هەینی ئاسمان بە هەوری تەواو دەمێنێتەوە و نمەباران لە زۆربەی ناوچەکان بەردەوام دەبێت، لە کاتەکانی ئێوارەدا ئەگەری بارانبارین لە زۆربەی ناوچەکان لاواز دەبێت، جگە لە سلێمانی و گەرمیان کە بارانبارین تێیاندا بەردەوامی دەبێت.

بەرزترین پلەکانی گەرمای پێشبینیکراو بۆ ئەمرۆ:

هەولێر 13 پلەی سیلیزی

پیرمام 11 پلەی سیلیزی

سۆران 12 پلەی سیلیزی

حاجی ئۆمەران 7 پلەی سیلیزی

سلێمانی 13 پلەی سیلیزی

چەمچەماڵ 13 پلەی سیلیزی

دهۆک 13 پلەی سیلیزی

زاخۆ 13 پلەی سیلیزی

هەڵەبجە : 15 پلەی سیلیزی

گەرمیان : 16 پلەی سیلیزی

میدیاکانی تورکیا بڵاویانکردەوە، کەشتیی نەوتهەڵگری "ئەلتورا"ـی تورکی، لە دەریای رەش، لەلایەن درۆنێکەوە کراوەتە ئامانج.

کەناڵی "NTV"ـی تورکی بڵاویکردەوە، لە دەریای رەش و لە نزیک کەناراوەکانی ئیستەنبوڵ، لە رێگەی فڕۆکەی بێفڕۆکەوانی نەناسراوەوە هێرشکراوەتە سەر ناقلەیەکی نەوتی کۆمپانیای "ALTURA"ی تورکی کە بڕی 140 هەزار تۆن نەوتی خاوی روسی هەڵگرتبوو.

بەپێی زانیارییەکان، هێرشەکە لە دووری 15 میلی دەریایی لە گەرووی بۆسفۆرەوە ئەنجامدراوە و بووەتە هۆی تەقینەوە لەسەر کەشتییەکە و دزەکردنی ئاو بۆ ناو ژووری بزوێنەرەکان، بەو هۆیەشەوە تیمی ناو کەشتییەکە داوای هاوکاریی بەپەلەیان کردووە.

لای خۆشیەوە ماڵپەڕی "هابەر دەنیزدە"ی تایبەت بە کاروباری دەریایی ئاماژەی بەوە کردووە، تا ئێستا هیچ زانیارییەک لەبارەی برینداربوونی تیمی ناو کەشتییەکە نییە کە لە 27 کەس پێکهاتوون، هاوکات هێزەکانی پاسەوانی کەناراوەکان و کەشتیی "نینی خاتوون" بۆ فریاگوزاریی خێرا رەوانەی شوێنی روداوەکە کراون.

کەشتییەکە لە جۆری "سویزماکس"ە و نزیکەی یەک ملیۆن بەرمیل نەوتی "ئۆرال"ی روسی بارکردووە؛ جێی ئاماژەیە کەشتیی "ئالتورا" لەلایەن بەریتانیا و یەکێتی ئەوروپاوە سزای بەسەردا سەپێنراوە، بەڵام لە لیستی سزاکانی ئەمریکادا نییە.

سەرۆکی ئەمریکا هۆشداری دەداتە سەرکردەکانی ئێران و جەخت لە پێویستی رێککەوتنێکی تر دەکاتەوە.

دۆناڵد ترەمپ، سەرۆکی ئەمریکا رایگەیاند، سەرکردەکانی ئێران لەگەڵ ویلایەتە یەکگرتووەکان خەریکی دانوستانن، بەڵام لە ترسی گەلەکەیان ئەو ڕاستییە دەشارنەوە و نکۆڵی لێ دەکەن.

سەرۆکی ئەمریکا ئاماژەی بەوەکرد، وڵاتەکەی توانیویەتی کۆتایی بە هەشت جەنگ بهێنێت و لە ئێستاشدا لە جەنگ دژی ئێران سەرکەوتنی بەدەستهێناوە، وتیشی: "دانوستانکارانی ئێرانی دەترسن لەسەر دەستی گەلەکەیان بکوژرێن، بۆیە پەلەیانە بۆ گەیشتن بە رێککەوتن."

ترەمپ جەختیشی کردەوە، هێزەکانیان هەموو شتێکیان لە ناو ئێران تێکشکاندووە و دەیانەوێت سەرکەوتنی تەواوەتی لە ئۆپەراسیۆنە سەربازییەکانیاندا لە ناو خاکی ئەو وڵاتە بەدەستبهێنن.

هاوکات، کۆشکی سپی هۆشداریی توندی دایە تاران و رایگەیاند، ئەگەر ئێران واقیعی ئێستا قبوڵ نەکات و دان بە شکستی سەربازیی خۆیدا نەنێت، ئەوا ڕووبەڕووی هێرشی زۆر توندتر دەبێتەوە.

کارۆلین لیڤیت، وتەبێژی کۆشکی سپی ڕایگەیاند، سەرۆک ترەمپ گەرەنتی ئەوە دەکات کە گورزی کەمەرشکێن ئاڕاستەی تاران بکرێت ئەگەر ئامادەی رێککەوتن نەبن، ئاماژەی بەوەش کرد کە پێویستە تاران دەستبەرداری بەرنامە ئەتۆمییەکەی ببێت و هەڕەشەکانی بۆ سەر ئەمریکا و هاوپەیمانەکانی رابگرێت.

لە ئەنجامی بەردەوامیی گرژییەکانی نێوان هەردوو وڵات، کۆشکی سپی هۆشدارییەکی توند دەداتە تاران کە ئەگەر دان بە شکستی سەربازیی خۆیدا نەنێت، رووبەڕووی لێدانێکی وێرانکەر دەبێتەوە.

کارۆلین لیڤێت وتەبێژی کۆشکی سپی ، لە کۆنفرانسێکی رۆژنامەوانیدا هۆشدارییەکی توند و بێپێشینەی ئاڕاستەی تاران کرد و رایگەیاند، ئەگەر ئێران دان بە "شکستی سەربازیی خۆیدا" نەنێت، ئەوا رووبەڕووی لێدانێکی زۆر بەهێزتر دەبێتەوە.

وتەبێژی کۆشکی سپی جەختی کردەوە، دۆناڵد ترەمپ گاڵتە ناکات و ئامادەیە بۆ هەڵگیرساندنی "جەنگێکی وێرانکەر"، وتیشی: "پێویستە ئێران جارێکی تر هەڵە لە هەژمارەکانیدا نەکات."

لیڤێت ئاماژەی بەوەکرد، ئەگەر تاران واقیعی ئێستا و شکستی سەربازیی خۆی قبوڵ نەکات، ترەمپ کار دەکات بۆ وەشاندنی گورزێک کە لە هەموو گورزەکانی پێشوو بەهێزتر بێت و "دەرگاکانی دۆزەخ" بە رووی ئەو وڵاتەدا بکاتەوە.

سەرەڕای هەڕەشە توندەکان، وتەبێژی کۆشکی سپی ئاشکرایکرد، ئەمریکا و ئێران هێشتا لە گفتوگۆی ئاشتی بەردەوامن، ئەمەش سەرەڕای ئەوەی میدیا رەسمییەکانی ئێران باس لە رەتکردنەوەی پێشنیازەکەی واشنتۆن دەکەن بۆ کۆتاییهێنان بە جەنگ.

لە چوارچێوەی هۆشدارییەکاندا، وەزارەتی دەرەوەی ئێران شکستهێنانی ستراتیژییەکانی ئەمریکا لە بەرانبەر تاران و گەرووی هورمز دەخاتە ڕوو.

عەباس عراقچی، وەزیری دەرەوەی ئێران، لە لێدوانێکی نوێدا هێرشی توندی کردە سەر سیاسەتەکانی واشنتۆن و هەڵوێستی وڵاتانی ناوچەکە و رایگەیاند، کە ئەمریکا نەیتوانیوە ئامانجە سەرەکییەکانی لەم جەنگەدا بپێکێت.

وەزیری دەرەوەی ئێران جەختی لەوەکردەوە، واشنتۆن هەم لە جەنگی سەربازی و هەم لە پڕۆژەی "گۆڕینی دەسەڵات" لە تاران شکستی هێناوە.

عراقچی ئاماژەی بەوەکرد، گەرووی هورمز بووەتە "شکستێکی تر بۆ دوژمن" و ئێستا تاران تاوتوێی پلانەکان دەکات بۆ چۆنیەتی بەڕێوەبردنی گەرووەکە لە قۆناغی دوای جەنگ.

عراقچی وڵاتانی دراوسێی تۆمەتبار کرد بەوەی هاوکاریی ئەمریکایان کردووە لە دژی ئێران و تەنانەت ئامادە نەبوون ئیدانەی هێرشەکانیش بکەن، هۆشداریشی پێدان کە گوێڕایەڵی نەکردنیان بۆ هۆشدارییەکانی تاران، ئەوانی گەیاندووەتە ئەم ڕەوشە نەخوازراوە.

وەزیری دەرەوەی ئێران داوای لە وڵاتانی ناوچەکە کرد، لە ئەمریکا دووربکەنەوە، چونکە بە وتەی ئەو، بەڵگەی تەواو لەبەر دەستە کە ئەو وڵاتانە لە جەنگی دژی ئێراندا هاوکاریی واشنتۆنیان کردووە.

سەبارەت بە ئەنجامدانی دانوستان لەگەڵ ئەمریکا، رایگەیاند، هیچ دانوستانێکیان لەگەڵ واشنتۆندا نەبووە و تەنها لە رێگەی چەند وڵاتێکەوە پەیامیان ناردووە.

ئێران هۆشداری دەداتە وڵاتانی ناوچەکە و دەڵێت؛ لە ئەگەری هەر هێرشێک ژێرخانی ئابوری وزەی ئەو وڵاتانە دەکاتە ئامانج.

محەمەد باقر قالیباف، سەرۆکی پەرلەمانی ئێران، لە نوێترین لێدوانیدا هۆشدارییەکی توندی ئاڕاستەی ئەمریکا و وڵاتانی دراوسێ کرد و ڕایگەیاند، واشنتن بە هاوکاریی یەکێک لە وڵاتانی ناوچەکە پلان بۆ داگیرکردنی یەکێک لە دوورگەکانی ئێران دادەنێت.

قالیباف جەختی لەوە کردەوە، کە وڵاتەکەی بە هیچ شێوەیەک دەستبەرداری خاکەکەی نابێت و هۆشداریی دا کە ئەگەر هەر هەوڵێکی لەو شێوەیە بدرێت، ئێران ڕاستەوخۆ ژێرخانی ئەو وڵاتە ناوچەییە دەکاتە ئامانج کە هاوکاریی ئەمریکای کردووە.

لەپێناو پاراستنی سەلامەتی لە کاتی گۆڕانی خێرای رەوشی کەشوهەوا، داوا دەکرێت شۆفێران رێگای ناوچە شاخاوییەکان بەکارنەهێنن.

بەڕێوەبەرایەتی هاتوچۆی پارێزگای سلێمانی، پاڵپشت بە راپۆرتی بەشی پێشبینی لە بەڕێوەبەرایەتی گشتی کەشناسی هەرێم، ئاگادارییەکی گرنگی سەبارەت بە گۆڕانکارییە خێراکانی کەشوهەوا بڵاوکردەوە و ئاشکرایکرد، پێشبینی دەکرێت لە رۆژانی چوارشەممە، پێنجشەممە و هەینی، هەرێمی کوردستان بکەوێتە ژێر کاریگەری گۆڕانکارییەکی خێرای کەشوهەوا.

ئەوەشی خستەڕوو، ئەگەری بارینی لێزمەبارانی چڕ و بەخوڕ، تەرزە و هەورەبروسکە لە چەندین ناوچە هەیە، کە دەبێتە هۆی بەرزبوونەوەی ئاستی ئاوی باران.

هاتوچۆی سلێمانی داوا لە شۆفێران دەکات بۆ پاراستنی سەلامەتییان، لەم سێ رۆژەدا خۆیان بەدوور بگرن لە شۆفێریکردن لە رێگاوبانەکانی دەرەوەی شار و ناوچە شاخاوییەکان و سەیرانگاکان.

بەڕێوەبەرایەتییەکە جەختی لەوەشکردووەتەوە، کە لەم وەرزەدا ئەگەری گۆڕانکاری بەپەلە لە کەشوهەوادا زۆرە، بۆیە پێویستە هاونیشتمانیان بەوپەڕی وریاییەوە مامەڵە لەگەڵ پرسی شۆفێری و گەشت و سەیران بکەن.

هاوکات راگەیاندنەکانی هاتوچۆ لە سەرجەم پارێزگاکان بەردەوام دەبن لە بڵاوکردنەوەی هۆشیاری و ڕێنماییە پێویستەکان بۆ هەر حاڵەتێکی نەخوازراو.

بۆ وەرچەرخان بەرەو حاڵەتی ئامادەباشی جەنگ، وەزارەتی جەنگی ئەمریکا زنجیرەیەک رێککەوتنی ستراتیژی بۆ زیادکردنی بەرهەمهێنانی تەقەمەنی لەگەڵ کۆمپانیا زەبەلاحەکان ئیمزا کرد.

وەزارەتی جەنگی ئەمریکا 'پنتاگۆن' ئەمڕۆ چوارشەممە رایگەیاند، کە چەند رێککەوتنێکی چوارچێوەیی لەگەڵ کۆمپانیا زەبەلاحەکانی "بی ئەی ئی سیستمز"، "لۆکهید مارتن" و "هانیوێڵ" ئیمزاکردووە.

ئاماژەی بەوەشکرد، ئەم رێککەوتنانە بە ئامانجی زیادکردنی بەرهەمهێنانی چەندین سیستمی بەرگری و تەقەمەنییە، وەک بەشێک لە وەرچەرخانی واشنتن بۆ "حاڵەتی ئامادەباشی بۆ جەنگ".

پنتاگۆن ئەوەشی خستەڕوو، بەپێی ئەم رێککەوتنانە، کۆمپانیای "هانیوێڵ ئێرۆسپەیس" هەڵدەستێت بە زیادکردنی بەرهەمهێنانی پێکهاتە سەرەکییەکانی پێویست بۆ کۆگاکانی تەقەمەنی ئەمریکا، ئەوەش لە چوارچێوەی وەبەرهێنانێکی گەورەدا کە بڕەکەی دەگاتە 500 ملیۆن دۆلار و بۆ ماوەی چەند ساڵێک بەردەوام دەبێت.

لە لایەکی ترەوە، هەردوو کۆمپانیای "بی ئەی ئی سیستمز" و "لۆکهید مارتن" ئەرکی زیادکردنی بەرهەمهێنانی ئامێرەکانی ئاڕاستەکردنی تایبەت بە موشەکی بەرگریی "تاد"یان پێسپێردراوە، بە شێوەیەک کە قەبارەی بەرهەمهێنانەکەیان بۆ چوار هێندە زیاد دەکات، هاوكات رێککەوتنێکی نوێ لەگەڵ لۆکهید مارتن ئیمزا کراوە بۆ خێراکردنی پرۆسەی دروستکردنی موشەکی "Precision Strike Missile" کە سیستمێکی موشەکیی زۆر ورد و پێشکەوتووە بۆ پێکانی ئامانجەکان.

دژی ئەو هێرشانەی لەسەرەتای جەنگی ئێرانەوە دەكرێتە سەری، عیراق لە ئەنجومەنی ئاسایشی نێودەوڵەتی سكاڵا تۆمار دەكات . 

سەباح نوعمان، وتەبێژی فەرماندەی گشتی هێزە چەكدارەكانی عیراق لە راگەیەندراوێكدا بڵاویكردوەتەوە ، سكاڵایەك بە بەڵگە و وردكارییەوە پێشكەشی ئەنجومەنی ئاسایشی نێودەوڵەتی دەكەن لە دژی ئەو هێرش و پێشێلكارییانەی لە سەرەتای دەستپێكردنی جەنگی ئێرانەوە دەكرێتە سەر عیراق ، هەروەها ئاماژەی بۆ ئەوە كردوە ئامانجیانە لە رێی ئەو سكاڵایەوە  مافی گەلی عیراق بگەرێننەوە . 

هاوكات خالد یەعقوبی، ڕاوێژكاری ئەمنی سەرۆك وەزیرانی عیراق رایگەیاندووە ، بەغداد  لە ئەنجومەنی ئاساشی نێودەوڵەتی سكاڵا تۆمار دەكات دژی هێرشەكان و دەشڵێت ، لە 28 ی شوباتەوە تا ئێستا 80 ئەندامی هێزە ئەمنییەكانی عیراق 

مانگی سوری ئێران راپۆرتێکی لەبارەی ئامارەکانی زیان گەشتن بە وڵاتەکەی بڵاوکردووەتەوە و تێیدا هاتووە، لە سەرەتای جەنگەوە زیاتر لە 85 هەزار شوێنی مەدەنی بۆردومان كراون

مانگی سوری ئێران راپۆرتی ئاماری زیانە ماددییەکانی وڵاتەکەی بڵاوکردووەتەوە و ئاماژەی بەوە داوە، لە سەرەتای جەنگەکەوە تائێستا زیان بەر 85 هەزار شوێنی مەدەنی کەوتووە بەهۆی بۆردومانەکانەوە. 

لە راپۆرتەکەدا ئەوەش هاتووە، تائێستا 64 هەزار و 583 یەكەی نیشتەجێبوون بۆردومان كراون، کە لەو ژمارەیەش تەنها لەتاران زیاتر لە 26 هەزار شوێنی مەدەنی زیانیان بەركەوتووە.

مانگی سوری ئێران ئەوەشی رونکردووەتەوە، تائێستا 694 شوێنی بازرگانی و 600 خوێندنگە و 282 نەخۆشخانە و دەرمانخانە و بنكەی تەندروستی زیانیان بەركەوتووە.

 

وەزارەتی بەرگریی عیراق لەبارەی هێرشەکەی ئەمڕۆ بۆسەر بنکەی سەربازیی حەبانیە راگەیەنراوێکی بڵاوکردەوە و تێیدا هاتووە، ئیدانەی هێرشەکە دەکەن و ئاماژەی بەوەشدا کە وەڵامیان دەبێت

وەزارەتی بەرگریی عیراق رایگەیاند، بەهۆی بۆردومانكردنی بنكەیەكی تەندروستیی سەربازی لە  ناوچەی حەبانییەی سەر بە پارێزگای ئەنبار كە سەر بە وەزارەتی بەرگرییە، حەوت سەربازی سوپای عیراق گیانیان لەدەستدا و 13 سەربازی تر بریندار بوون و لە ئێستاشدا گەیەنراونەتە نەخۆشخانە.

ئاماژەی بەوەشكردووە، تا ئێستا تیمەكانی فریاكەوتن سەرقاڵی گەڕان و پشكنینن بەناو داروپەردوی بنكە بۆردومانكراوەكەدا.

وەزارەتی بەرگری عیراق ئەوەشی ئاشکرا کردووە، ئەم بەئامانجگرتنە پێشێلكارییەكی زەق و مەترسیداری سەرجەم یاسا نێودەوڵەتییەكانە و بە مافی خۆیانی دەزانن کە سەرجەم رێكارەكان بگرنەبەر بۆ وەڵامدانەوەی ئەم هێرشە.

پێگەی 'ئێران وۆر كۆست تراكەر' بڵاویکردەوە، لەسەرەتای دەستپێكردنی جەنگی ئێرانەوە تائێستا، ئەمریكا زیاتر لە 30 ملیار دۆلاری خەرجكردووە

لە ماوەی بەردەوامبوونی جەنگی 26 رۆژەی نێوان ئێران لەگەڵ ئەمریکا و ئیسرائیلدا، تێچوی جەنگی ئێران لەسەر ئەمریكا 30 ملیار دۆلاری تێپەراندووە.

پێشتریش سكۆت بێسنێت وەزیری گەنجینەی ئەمریكا رایگەیاندبوو، بودجەی پێویستیان بۆ جەنگەكە لە بەردەستدایە و تێچوی جەنگەكەش تائێستا لەو ئاستەدایە كە پێشبینیان كردبوو.

وەزیری گەنجینەی ئەمریکا ئاماژەی بەوەش دابوو، داوایان لە كۆنگرێس كردوە بودجەی زیاتریان بۆ دابین بكات بۆ ئەوەی گرەنتی بەردەوامیی پشتگیركردنی سوپا بكەن لە داهاتوودا.

كۆریای باكوور بەڵێنی پشتیوانی بێ مەرج و پتەوكردنی پەیوەندی سەربازی بۆ روسیا لە جەنگی ئۆكرایندا دووپات دەكاتەوە.

ئاژانسی هەواڵی رەسمی كۆریای باكوور رایگەیاند كە كیم جۆنگ ئون سەرۆكی كۆریای باكور لە نامەیەكدا بۆ ڤلادیمێر پوتن سەرۆكی روسیا جەختی لە پشتیوانی سەربازی هەمیشەیی وڵاتەكەی كردووەتەوە، ئەمەش دوای ئەوەی دووبارە وەك سەرۆكی كۆریا هەڵبژێردرایەوە.

ئاماژەی بەوەشكردووە،كە هاوكارییەكان بۆ پاراستنی سەروەری هەردوو وڵاتە، هاوكات بەپێی زانیاری لێپرسراوانی رۆژئاوا هەزاران سەربازی كۆری لە جەنگی ئۆكرایندا بەژدارن.