هەواڵەکان
ماڵپەڕی شەفافییەت داهاتی ئەم هەفتەیەی سلێمانی بڵاوکردەووە، کە زیاتر لە حەوت ملیار دینارە.
ماڵپەڕی شەفافییەت بۆ چاودێری و رێكخستنی داهاتە نانەوتییەكانی سلێمانی و هەڵەبجە و هەردوو ئیدارەی راپەڕین و گەرمیان بڵاویکردەووە، لە رۆژی 22ـی8ـی2026 تا 28ـی8ـی2026 داهاتی نانەوتی حەوت ملیار و 720 ملیۆن و 675 هەزار دیناربووە.
ئاماژەی بەوەشکردووە، بە بەراورد بە هەفتەی رابردوو زیاتر لە چوار ملیار دینار داهات کەمی کردووە.
ماڵپەڕی شەفافییەت ئەوەشی خستووەتەڕوو، داهاتەکە ٪86 بە شێوەی نەختینەیە و ٪14ـی بە شێوەی چەکە.
جێگەی ئاماژەیە، پڕۆژەی شەفافییەت لە داهات و خەرجی، لەسەر راسپاردەی قوباد تاڵەبانی جێگری سەرۆک وەزیرانی هەرێم دامەزرا، ئێستا رۆژانە لە رێگەی ئەو ماڵپەڕەوە دەتوانیت سەرجەم داهاتە نانەوتییەکانی هەردوو پارێزگای سلێمانی و هەڵەبجە و ئیدارە سەربەخۆکانی راپەڕین و گەرمیان بزانیت.
عەباس عراقچی، وەزیری دەرەوەی ئێران، ئەمڕۆ هەینی، داوای لە ویلایەتە یەکگرتووەکانی ئەمریکا کرد کە متمانە دروست بکات و دان بە مافەکانی ئێراندا بنێت.
عراقچی رایگەیاند: پێویستە ویلایەتە یەکگرتووەکان متمانە دروست بکات و بە رێزەوە قسە بکات و دان بە مافەکانی ئێراندا بنێت و پابەندی بەڵێنەکانی بێت، هەروەها جەختی کردەوە: گەڕاندنەوەی رێڕەوی دبلۆماسی بۆ دۆخی ئاسایی خۆی مەحاڵ نییە.
ئاماژەی بەوەش کرد: پێویستە واشنتۆن تێبگات لەوەی کە گوشار هیچ سوودێکی نییە، و روونیشی کردەوە: ئێران تاوتوێکردنی بەرهەمدار و دااهێنەرانەی لەگەڵ شێخ محەمەد بن عەبدولڕەحمان ئال سانی، سەرۆک وەزیران و وەزیری دەرەوەی قەتەر لە کاتی سەردانەکەیدا بۆ تاران ئەنجامداوە.
جەختیشی کردەوە: وڵاتەکەی پێیوایە گەڕانەوە بۆ رێڕەوی دبلۆماسی ڕێپێدراوە، بە مەرجێک ڕێزی دوولایەنە و پابەندبوون بە بەڵێنەکانەوە هەبێت".
ئەمینداری گشتیی ئەنجومەنی باڵای ئاسایشی نیشتمانیی ئێران رەتیدەكاتەوە وڵاتەكەی هیچ هەوڵێكی بۆ تیرۆركردنی بارۆن ترەمپ هەبێت.
موحسین رەزایی، ئەمینداری گشتیی ئەنجومەنی باڵای ئاسایشی نیشتمانیی ئێران، دروستیی ئەو راپۆرتانەی رەتكردەوە كە باس لە پلانێكی ئەگەری دەكەن بۆ تیرۆركردنی بارۆن، كوڕە بچووكی دۆناڵد ترەمپی سەرۆكی ئەمریكا لەلایەن ئێرانەوە.
ئەمە لە كاتێكدایە، تەلەڤزیۆنی رەسمی ئێران رۆژی سێشەممەی رابردوو لە رێگەی بڵاوكردنەوەی ڤیدیۆیەك كە باسی ژیانی تایبەتی و رۆژانەی بارۆن ترەمپ لەخۆگرتبوو، ئاشكرایكردبوو، خەڵاتێكی دارایی بە بڕی 10ملیۆن دۆلار تەرخانكراوە بۆ هەر كەسێك كە بتوانێت بارۆن، كوڕی دۆناڵد ترەمپ بكوژێت.
لە بەرانبەردا، دەزگای خزمەتگوزاریی نهێنیی ئەمریكا رایگەیاند، ئاگاداری ئەو ڤیدیۆیەیە كە لە تەلەڤزیۆنی رەسمی ئێرانەوە پەخشكراوە و تێیدا باس لە پلانێكی ئەگەری بۆ تیرۆركردنی بارۆن ترەمپ دەكرێت.
چین، رۆژی هەینی، ئۆپراسیۆنەکانی رزگارکردنی لە ناوەندی ناوچەی زیانلێکەوتووی تیبت راگرت، ئەوەش بەهۆی مەترسیی رودانی لافاوێکی نوێوە، لە کاتێکدا هێشتا سەدان کەس لە ناوچە سنوورییەکەدا بێسەروشوێنن.
پەیامنێرێکی تەلەڤیزیۆنی رەسمیی (CCTV) لە شوێنی روداوەکەوە رایگەیاند: ئاوەکە دەستی بە رژان کردووە لە گۆلێکەوە کە بەهۆی کەڵەکەبوونی بڕێکی زۆر لە داروپەردوو و پاشماوەوە دروستبووە، و بەرەو سەنتەری سنووریی جیرۆنگ دەڕژێت لەو ناوچەیەی کە زیاترین زیانی بەهۆی کارەساتەکەوە بەرکەوتووە.
ئاژانسی "فرانس پرێس" لە سەرچاوەکەوە گواستوویەتیەوە کە: فەرمان بە هەموو تیمەکانی فریاگوزاری دراوە لە شوێنەکانی خۆیان بمێننەوە و چاوەڕێی رێنمایی نوێ ببن.
تیمەکانی رزگارکردن 555 گەشتیاریان رزگارکرد کە لە تیبت گیریان خواردبوو، ئەوەش دوای روخانی زەوی داڕمانێکی کاولکەر لەسەر سنووری نێوان چین و نیپاڵ، وەک تەلەڤیزیۆنی رەسمیی وڵاتەکە ئاماژەی پێداوە.
کەناڵی (CCTV) باسی لەوەش کردووە کە تا بەیانی رۆژی هەینی 499 لە دانیشتووانی ناوچەکە و 555 گەشتیار لە ناوچەی کارەساتەکە رزگارکراون و گوێزراونەتەوە، بێ ئەوەی ئاماژە بە رەگەزنامەی گەشتیارەکان بکرێت.
دۆناڵد ترەمپ، سەرۆکی ئەمریکا لە هەژماری تایبەتی خۆی لە تۆڕی کۆمەڵایەتی 'تروس سۆشیاڵ' وێنەیەکی بڵاوکردەوە و تێیدا گەروی هورمز خراوەتە ناو لیستی "هەرێمەکانی ژێر دەسەڵاتی ئەمریکا".
لە وێنەکەدا کە ناونیشانی 'ناوچەکانی ئەمریکا'ـی هەڵگرتووە، ئاڵای چەندین هەرێمی سەر بە واشنتۆن پیشان دراوە و لە بەشی سەرەوەشیدا نەخشەی گەروی هورمز دانراوە و وشەی "نوێ"ـی لەپاڵ نووسراوە (U.S. Territories)، ترەمپ لەگەڵ بڵاوکردنەوەی ئەو وێنەیەدا هیچ روونکردنەوەیەکی نەداوە.
هاوكات لەگەڵ ئەمەشدا؛ براد کوپەر، فەرماندەی فەرماندەیی ناوەندیی هێزەکانی ئەمریکا 'سێنتکۆم' رایگەیاند، هێزەکانیان سەرکەوتوو بوون لە پاککردنەوەی گەروی هورمز لەو مینە دەریاییانەی پێشتر لەلایەن سوپای پاسدارانەوە چێنرابوون.
ئاماژەی بەوەش کرد، لە چەند مانگی رابردوودا یارمەتی نزیکەی هەزار و 500 کەشتیی بازرگانی دراوە بۆ تێپەڕبوون لە گەروەکە، کە زیاتر لە 750 ملیۆن بەرمیل نەوتی خاویان هەڵگرتبوو.
هەر لە راگەیەنراوەکەدا، سێنتکۆم جەختیشیکردەوە، "کردنەوەی رێڕەوەکان بە مانای کەمکردنەوەی گەمارۆ دەریاییەکانی سەر ئێران نایەت، بەڵکو لە مانگی تەمموزەوە رێگە بە هیچ کەشتییەک نەدراوە بچێتە بەندەرەکانی ئێران یان لێیان بچێتە دەرەوە، جگە لەو کەشتیانەی هاوکاریی مرۆییان هەڵگرتووە"
جێی ئاماژەیە، بەپێی ئامارەکان هاتوچۆی کەشتییەکان لە گەروی هورمز بەراورد بە رابردوو لە ئاستێکی نزمتردایە و خستنەڕووی نەوت لەو رێڕەوە بەراورد بە ئاستی ئاسایی خۆی کەمبووەتەوە.
ئەو وێنەیەی دۆناڵد ترەمپ، سەرۆکی ئەمریکا لە هەژماری تایبەتی خۆی لە تۆڕی کۆمەڵایەتی 'تروس سۆشیاڵ' بڵاویکردەوە
سوپای ئەمریکا ئەمڕۆ هەینی رایگەیاند، نزیکەی 50 هەزار سەرباز بەشدارن لە سەپاندنی گەمارۆی دەریایی بەسەر ئێراندا، و ئاماژەی بە سەرکەوتنی ئۆپراسیۆنی پاککردنەوەی ئەو مینە دەریاییانە کرد کە لەلایەن سوپای پاسدارانی ئێرانەوە لە رێڕەوە نێودەوڵەتییەکانی کەشتیوانی لە گەروی هورمز چێندرابوون.
ئەدمیراڵ براد کوپەر، فەرماندەی فەرماندەیی ناوەندیی ئەمریکا (سێنتکۆم)، لە راگەیەندراوێکی ڤیدیۆییدا لەتۆڕی کۆمەڵایەتی ئێکس رایگەیاند: نزیکەی 50 هەزار سەربازی ئەمریکی لە رۆژهەڵاتی ناوەڕاست بڵاوکراونەتەوە و بەشدارن لە سەپاندنی گەمارۆی دەریایی بەسەر ئێراندا.
ناوبراو ئاماژەی بەوەش کرد، هێزەکانی ئەمریکا بەردەوامی بە بزوتنەوەی کەشتیوانیی بازرگانی دەدەن لە رێگەی گەروی هورمزەوە، و هەروەها جەختی لە سەرکەوتنیان کردەوە لە پاککردنەوەی ئەو مینە دەریاییانەی کە سوپای پاسدارانی ئێران لە رێڕەوە کەشتیوانییە نێودەوڵەتییەکانی گەروەکەدا چاندبوونی.
روونیشی کردەوە، هێزەکانی ئەمریکا لە ماوەی مانگەکانی رابردوودا هاوکارییان کردووە بۆ تێپەڕبوونی نزیکەی 1500 کەشتیی بازرگانی بە گەروی هورمزدا، کە ئەو کەشتییانە نزیکەی 750 ملیۆن بەرمیل نەوتی خاویان بۆ بازاڕەکانی جیهان گواستووەتەوە.
فەرماندەی سێنتکۆم راشیگەیاند، ئێران لە ناوەڕاستی تەمموزی رابردووەوە و لە کاتی دەستپێکردنەوەی گەمارۆ دەریاییەکەوە، هیچ نەوتێکی لە پارێزگا و ئاوەکانی خۆیەوە رەوانە نەکردووە.
ئاماژەی بەوەش کرد: زیاتر لە 20 کەشتیی جەنگی و سەدان فڕۆکە بەشدارن لە جێبەجێکردنی رێکارەکانی گەمارۆدانی دەریایی بەسەر ئێراندا، و جەختی کردەوە: لە کاتی دەستپێکردنەوەی گەمارۆکەوە هیچ کەشتییەک بێ مۆڵەتی ئەمریکا نەچووەتە هیچ بەندەرێکی ئێران و لێشی دەرنەچووە، و ئاماژەی بەوەش کرد: هێزەکانی ئەمریکا 75 کەشتییان ئاڕاستەگۆڕ کردووە و ناچاریان کردوون بگەڕێنەوە کە هەوڵیانداوە گەمارۆ دەریاییەکەی سەر ئێران بشکێنن.
سەرۆكی ئەنجومەنی وەزیرانی عیراق رایگەیاند، گەندەڵی مەترسیدارترین ئاستەنگە لە بەردم دەوڵەتدا و حكومەت لە جەنگێكی سەختدایە بۆ بنبڕكردنی.
عەلی زەیدی سەرۆك وەزیرانی عیراق لەگەڵ سەرۆك و ئەندامانی لیژنەی دەستپاكی ئەنجومەنی نوێنەرانی عیراق كۆبووەوە و رایگەیاند، گەندەڵی مەترسیدارتین ئاستەنگە لەبەردەم دەوڵەتدا لەمڕۆدا و حكومەت لە جەنگدایە بۆ نەهێشتنی لەگەڵ لەناوبردنی سەرچاوەكانیشی.
سەرۆك وەزیرانی عیراق جەختی لە گرنگی یەكخستنی هەوڵەكان كردەوە لە نێوان هەردوو دەسەڵاتی یاسادانان و جێبەجێكردندا بۆپاڵپشتیكردنی رێكارەكانی روبەڕوبوونەوەی گەندەڵی لە دۆزینەوەی ئەو كەسانەی تێوەگلاون.
وتیشی، گەندەڵی لە زیادڕەویكردن لە خەمڵانی تێچووی پرۆژەكانەوە دەستپێدەكات.
سەرۆك وەزیرانی عیراق باسی لەوەشكرد، حكومەت كاردەكات لەسەر پەیڕەوكردنی وردبینی پێشوەختە و دوای تەواوبوونی پرۆژەكان بە مەبەستی كەمكردنەوەی بەفیڕۆدان و پاراستنی سامانی گشتی.
وەزارەتی پەروەردەی سوریا بڕیاری ژمارە 2068ی دەرکرد، کە تێیدا گۆڕانکاریی مێژوویی لە سیستمی پەروەردەی وڵاتەکەدا دەکات و زمانی کوردی بە رەسمی دەخاتە ناو پڕۆگرامی خوێندن.
وەزارەتی پەروەردەی سوریا رایگەیاند، زمانی کوردی وەک 'زمانێکی نیشتمانی' لە خوێندنگە حکومی و تایبەتەکانی ئەو ناوچانەی رێژەیەکی بەرچاوی کوردنشینن، دەخوێندرێت.
بەشێک لە دەقی بڵاوکراوەی بڕیارەکەی وەزارەتی پەروەردەی سوریا:
- قۆناغەکانی خوێندن: بڕیارەکە هەموو قۆناغەکانی خوێندن دەگرێتەوە و زمانی کوردی دەبێتە بەشێکی سەرەکی لە پڕۆگرامی خوێندن.
- کاتی وانەکان و نمرە: هەفتانە سێ وانە بۆ زمانی کوردی تەرخان دەکرێت و نمرەی ئەم وانەیە وەک نمرەی وانەکانی عەرەبی و ئینگلیزی لە کۆنمرەی کۆتایی هەژمار دەکرێت.
- خوێندن بە زمانی کوردی: لە قۆناغی گواستنەوەدا (بۆ ساڵی یەکەم)، خوێندکاران سەرپشک دەکرێن لەوەی وانەکانی وەک مێژوو، جوگرافیا و فەلسەفە بە زمانی عەرەبی یان کوردی بخوێنن.
- ئامادەکارییەکان: وەزارەت 'سەنتەری نیشتمانیی بۆ پەرەپێدانی مەنهەجەکان'ـی راسپاردووە بۆ دانانی پەرتوکی تایبەت بە زمانی کوردی، هەروەها مامۆستایانی خاوەن بڕوانامە و شارەزا لە زمانی کوردی دادەمەزرێندرێن.
- ئەم بڕیارە لە 27ـی 8ـی 2026ـەوە دەرچووە و مەبەست لێی پاراستنی مافی پێکهاتەکان و بەهێزکردنی یەکێتیی نیشتمانییە لە سوریا.
وەزارەتی سامانە سروشتییەکان ئامادەیی خۆی بۆ رادەستی کردنی 50 هەزار بەرمیل نەوتەکە نیشان دەدات، لەبەرانبەر ئەوەدا بەغداد بەنزینی 450 دیناری دابینبکات.
ئەحمەد موفتی، بریکاری وەزارەتی سامانە سروشتییەکان لە لێدوانێکی رۆژنامەوانیدا رایگەیاند، ئامادەن 50 هەزار بەرمیلەکە رادەست بکەن و لەبەرانبەدا بەغداد بەنزینی 450 دیناری بۆ هەرێم دابین بکات.
وتیشی، ئەوان هەموو هەوڵێکیان بۆ ئەوەیە بەنزین بە نرخی پارێزگاکانی تری عیراق بگات بە هاووڵاتیان، بۆ ئەو مەبەستەش لەگەڵ بەغداد گەیشتووینەتە دوو چارەسەر.
ئەحمەد موفتی، ئەوەشی خستەڕوو، رێگەی یەکەمیان گێڕانەوەی 50 هەزار بەرمیل نەوتەکەیە و لەبەرانبەردا دابینیکردنی بەنزینی 450 دینار، رێگەی دووەمیشیان زیادکردنی نەوتی خاوە، بۆ ئەوەی هەرێم بتوانێت رێژەی بەرهەمهێنانی بەنزین زیاتر بکات.
سەرۆکی پەرلەمانی ئێران رایدەگەیەنێت؛ وڵاتەکەی لە ناوەڕاستی جەنگێکی ئابوریی هەمەلایەنەدایە و داوا لە حکومەت دەکات چاککردنی بژێویی خەڵک و رەخساندنی هەلی کار بخاتە سەرووی کارەکانییەوە.
محەمەد باقر قالیباف، سەرۆکی پەرلەمانی ئێران و گەورە دانوستانکاری وڵاتەکە رایگەیاند، ئێران لە ئێستادا رووبەڕووی "جەنگێکی ئابوریی هەمەلایەنە" بووەتەوە، بەڵام جەختی کردەوە بە هەوڵەکانی حکومەت و خۆڕاگریی گەلەکەیان دەتوانن بەسەر نەیارەکانیاندا سەربکەون.
قالیباف لە وتارێکدا لەبەردەم پەرلەمانی وڵاتەکەی ئاماژەی بەوەکرد، لە سایەی لێکەوتەکانی جەنگ و زیادبوونی فشارە دەرەکییەکان، پێویستە حکومەت چاککردنی ئاستی بژێوی، بەرزکردنەوەی توانای کڕین، رەخساندنی هەلی کار بۆ گەنجان و دەستەبەرکردنی ئاسایشی ئابوری بخاتە سەرووی کارەکانییەوە، وتیشی، نەیارانی تاران هەوڵیان داوە لێکترازانی ناوخۆیی دروست بکەن و توانای ناوخۆیی ئێران لاواز بڕوانن.
ئەم لێدوانانەی قالیباف لە کاتێکدایە کە ئەمریکا هەڕەشەی توندکردنەوەی سزاکانی کردووە بۆ روخاندنی رژێمی تاران، ئەمەش دوای تێپەڕبوونی نزیکەی شەش مانگ بەسەر هەڵگیرسانی جەنگ و یەکەم هێرشەکانی ئەمریکا و ئیسرائیل بۆ سەر ئێران لە 28ی شوباتی رابردوودا.
شایەنی باسە لە سەرەتای جەنگەکەوە لە کۆتایی شوباتدا، ئێران بە کردەیی گەروی هورمزی داخستووە کە پێنجیەکی بەرهەمی نەوت و گازی شلی جیهانی پێدا تێپەڕ دەبێت، لە بەرانبەردا ئەمریکا گەمارۆی خستووەتە سەر بەندەرەکانی ئێران، ئەم پەرەسەندنانەش لە کاتێکدان ئێران هەفتانەیە لە دانوستاندایە لەگەڵ عوممان و جەخت دەکاتەوە گەروی هورمز بە داخراوی دەمێنێتەوە تا ئەو کاتەی واشنتۆن پابەند دەبێت بە لێکتێگەیشتنەکانی ناوەڕاستی حوزەیران بۆ هەڵگرتنی گەمارۆ و سزادانە ئابورییەکان.
لە هەڵمەتێکی لادانی زێدەڕۆیی لە بەغداد گرژی دروستبوو، لەئەنجامدا ئەفسەرێکی پۆلیس کوژرا و چوار کارمەندی تریش برینداربوون.
شانەی راگەیاندنی ئەمنیی عیراق ئاشکرایکرد، لە کاتی جێبەجێکردنی ئەرکێکی رەسمیدا بۆ لادانی زێدەڕۆیی نیشتەجێبوون لە ناوچەی 'دۆرە' لە باشوری بەغداد، هێزە ئەمنییەکان و مەفرەزەکانی خزمەتگوزاری رووبەڕووی تەقەکردن بوونەوە.
ئاماژەی بەوەشکرد، لە ئەنجامی دەستڕێژی گلولەکەدا، بەڕێوەبەری بەشی پۆلیسی ئەمیندارییەتی بەغداد، کە پلەی عەمیدە کوژرا، هەروەها چوار کەسی دیکە برینداربوون کە پێکهاتوون لە کارمەندێکی پۆلیسی فیدراڵی، دوو کارمەندی پۆلیسی ئەمیندارییەتی و موچەخۆرێکی ئەمندارییەتی بەغداد.
لەلایەکی ترەوە، بە فەرمانی فەرماندەی ئۆپراسیۆنەکانی بەغداد، هێزە ئەمنییەکان گەمارۆیەکی توندیان بەسەر ناوچەکەدا سەپاندووە و دەروازەکانیان داخستووە، لە ئۆپراسیۆنێکی کێوماڵکردنی فراواندا تا ئێستا کەسێکی تۆمەتبار دەستگیرکراوە و گەڕان بەدوای تاوانبارانی تردا بەردەوامە.
وەزیری ژینگەی عیراق ئاشکرای دەکات، وەزیری نەوت ئامادەیە پشکی 50 هەزار بەرمیل نەوتی هەرێم بگەڕێنێتەوە و هاوکاریی سوتەمەنی پێشکەش بکات، هاوکات دڵنیایی دەدات کە موچەی ئەمساڵ و ساڵی داهاتووی موچەخۆران پارێزراوە.
سروە عەبدولواحید، وەزیری ژینگەی عیراق لە کۆنفرانسێکی رۆژنامەوانیدا سەبارەت بە کێشەی سوتەمەنی لە هەرێم رایگەیاند، وەزیری نەوتی عیراق ئامادەیی دەربڕیوە بۆ ئەوە پشکی هەرێم 50 هەزار بەرمیل نەوتەکە بگەڕێنێتەوە و لەبەرانبەردا بەغدادیش بە هەمان شێوەی پارێزگاکانی تری عیراق هاوکاری هەرێم بکات.
وتیشی، سەبارەت بەو پرسە تا ئێستا گفتوگۆکان لە نێوان حکومەتی فیدراڵ و هەرێم بەردەوامە.
سەبارەت بە موچەی موچەخۆران وەزیری ژینگە ئاماژەی بەوەکرد، هەموو جارێک سەرۆک وەزیرانی عیراق دڵنیایی داوە لە خەرجکردنی تەواوەتی موچەی ئەمساڵی فەرمانبەران و موچەخۆران.
سروە عەبدولواحید ئەوەشی خستەڕوو، بۆ ساڵی داهاتوو یاسای بودجە دەبێت و یەکەم بڕگەش لە لەو یاسایەدا جێگەی دەکرێتەوە موچەی موچەخۆرانە و مافەکانیان پارێزراو دەبێت.
سەرۆک کۆماری ئێران جەختی لەسەر هەڵوێستی وڵاتەکەی بەرانبەر پەرەسەندنی گرژییەکان کردەوە و دەڵێت، بەرگریکردن لە سەروەریی ئێران مافێکی رەوا و یاساییە و تاران بەکردەیی ئەو مافەی بەکارهێناوە.
مەسعود پزیشکیان، سەرۆک کۆماری ئێران رایگەیاند، وڵاتەکەی لە پێگەی لاوازییەوە رووبەڕووی روداوەکان نابێتەوە و بە باشی دەزانێت چۆن بەرگری لە خۆی بکات، ئاشکراشیکرد کە لە کاتێکدا دانوستانەکان لەگەڵ واشنتۆن لە ئارادا بوون، ئەمریکا و ئیسرائیل جەنگیان بەسەر ئێراندا سەپاندووە.
لە بەشێکی تری قسەکانیدا جەختی کردەوە: "ئێمە دەستپێشخەری جەنگ نەبووین، بەڵام بە توندی لە بەرانبەر دەستدرێژکاراندا وەستاوینەتەوە." هەروەها بەرگریکردن لە دۆزی فەلەستین و رەتکردنەوەی داگیرکاریی بە ئەرکێکی سەرەکیی وڵاتەکەی وەسف کرد.
لە کۆتاییدا، سەرۆکی ئێران داوای لە وڵاتانی ئیسلامی کرد، بەڵێن بدەن ئاسایشی یەکتر تێکندەن و سەرپەرشتیکردن و بەڕێوەبردنی ئاسایشی ناوچەکە بە دەستی خۆیان بێت.
وتەبێژی بەنزینخانەکەی سلێمانی دەڵێت؛ نرخی بەنزین گران نەبووە و دابەشکردنی بەنزینی 750 دینارییەکەش بەردەوامە.
بەهمەن شێخ قادر وتەبێژی بەنزینخانەکانی سلێمانی لە لێدوانێکی تایبەتدا بە کوردسات نیوزی راگەیاند، لە ئێستادا لە سلێمانی نرخی بەنزین لەسەرجەم بەنزینخانەکان وەک پێشترە و بە هیچ شێوەیەک گران نەبووە و نرخی هەر سێ جۆرەکەی وەکو پێشووترە.
وتیشی، دابەشکردنی بەنزینی 750 دیناری بەردەوامە و وێستگەکانی پێشتر دیاریکراوە دابەشکردن بەردەوامە و بەڵام رێکخستنەوەی بۆ کراوە، لە سەعات شەشی بەیانی دابەشکردنی بەنزینی 750ـی دەستپێدەکات تا ئەو بڕەی بۆی دیاریکراوە و تەواو دەبێت.
وتەبێژی بەنزینخانەکانی سلێمانی ئەوەشی خستەڕوو، لە نزیکەی 16 بەنزینخانە پرۆسەی دابەشکردنی بەنزینی 750 دیناری بەردەوامە.
لە ئەنجامی لافاوێکی وێرانکەر و رودانی داڕمانی بەفر لە ناوچە سنورییەکانی نێوان نیپاڵ و هەرێمی تیبتی چین، بووەتە هۆی گیانلەدەستدانی لانی کەم 165 کەس و سەدان کەسی تریش بێسەروشوێنن.
بەپێی زانیارییەکانی دەسەڵاتدارانی نیپاڵ، تا ئێستا زیاتر لە 165 کەس دۆزراوەتەوە، لە بەرانبەردا چین گیانلەدەستدانی سێ کەسی لە بەشی تیبت پشتڕاستکردۆتەوە، هەروەها دەستەی روپێوی جیۆلۆجی ئەمریکی رایگەیاندووە، لافاوەکە لە ئەنجامی داڕمانی شاخێکی بەفرەوە دروستبووە کە گوڕەکەی هاوشێوەی بوومەلەرزەیەک بووە بە گوڕی 5.2 پلە بە پێوەری رێختەر و بووەتە هۆی داڕمانی زەوی.
هاوكات تەلەفزیۆنی ناوەندیی چین بڵاویكرده‌وه، ژمارەی بێسەروشوێنکراوان لە پارێزگای "جیرۆنگ"ی تیبت بەهۆی هەرەسی قوڕ و لیتەوە بۆ 558 کەس بەرزبووەتەوە کە 260یان بیانین، لە لایەکی ترەوە، دەسەڵاتدارانی نیپاڵ بە رەسمی پەیوەندییان لەگەڵ 468 گەشتیاردا پچڕاوە.
سەرۆک وەزیرانی نیپاڵ، بەڵێنی دا تەواوی تواناکانی دەوڵەت بۆ رووبەڕووبوونەوەی ئەم کارەساتە بخاتە گەڕ و رایگەیاند: "ئەو ئازار و زیانەی پێتان گەیشتووە کەم نییە، بەڵام دڵنیاتان دەکەمەوە تاقانە نین و دەوڵەت بە تەواوی ئامرازەکانییەوە لە پاڵتاندا دەوەستێت."
ئێستا هێزە ئاسایشییەکان و تیمەکانی رزگارکردن لە نیپاڵ سەرقاڵی چۆڵکردنی ناوچە مەترسیدارەکان و گەڕانن بەدوای رزگاربووان لەنێو قوڕ و داروبەردی لافاوەکەدا، هاوکات سوپای نیپاڵ لە رێگەی ئاسمانییەوە ئۆپراسیۆنەکانی فریاگوزاری ئەنجام دەدات و داوای لە دانیشتووانی سەر روبارەکان کردووە ماڵەکانیان چۆڵ بڕیاڕ بدەن.
سەرۆك وەزیرانی قەتەر سەردانی تاران دەكات و ترەمپیش پێشبینی دەكات بەزوویی گەروی هورمز بكرێتەوە.
شێخ محەمەد بن عەبدولڕەحمان ئال سانی، سەرۆك وەزیران و وەزیری دەرەوەی قەتەر، بەیانی ئەمڕۆ بەرەو تاران بەڕێكەوت بۆ دیداری ژمارەیەك لە لێپرسراوانی ئێران، بە مەبەستی تاوتوێكردنی كەمكردنەوەی گرژییەكان و رەخساندنی زەمینە بۆ دەستپێكردنەوەی دیالۆگ، جگە لە تاوتوێكردنی ئازادیی كەشتیوانی لە گەروی هورمز و رێگەچەرەكانی گەڕاندنەوەی رەوشەکە بۆ پێش 28ی شوباتی رابردوو.
پێش گەشتەكەشی، سەرۆك وەزیرانی قەتەر زنجیرەیەك پەیوەندیی تەلەفۆنی لەگەڵ ژمارەیەك لە وەزیرانی دەرەوەی وڵاتانی ئەنجومەنی هاریكاریی كەنداو ئەنجامداوە ، بە مەبەستی تاوتوێكردنی هەوڵە دیپلۆماسییەكان.
ئەمەش لە كاتێكدا دۆناڵد ترەمپ، سەرۆكی ئەمریكا رایگەیاند، جەنگەكە بە زوویی كۆتایی پێدێت و جەختی لەوەكردەوە، واشنتۆن نزیكبووەتەوە لە پێكانی ئامانجەكانی و گەروی هورمز بۆتەوە بە كراوە و لەژێر كۆنتڕۆڵی ئەمریكادایە، سوپای پاسدارانی ئێران جەختی لەوە كردەوە كە گەروەكە هێشتا لەژێر دەسەڵاتی تاراندایە و تا ئەمریكا مەرجەكانیان قبوڵ نەكات، ناكرێتەوە.